1 အိုယ် ဘေ ဒူအီ အီ မုး အာမျုဝ် အာကူပ်၊ အီ စိူဝ် ဒူအီ အီဆာရေလ၊ အီ တး ခဲင် ခြိုဝ် အာယူဒါ၊ ဘေ ပီ ဘော ဟဲ့ ဂါဝ် ပွုန် ဇဝ်ဖြာ၊ ဟဲ့ ဒိူင် တဝ်း၊ ဘေ ဒီ ကြိုပ် မီ ဇဝ်ဖြာ ပီ ကြိုပ် ဒူအီ အီဆာရေလ။ ဂြုဝ်း ဘေ တီ ယီ တူ မုး တူ မှာန်။ န့ တူ လေး ခဲင် နဝ်း ဆိူဝ် နဝ်း မှာန်။

2 ပီ ဘော ဟဲ့ ပါယ် တီ မိူဝ်၊ ဘေ ယီ ဝီ ပီဖုင် ဘေ တဝ်း၊ “ယေ မုး ဒူအီ ခဲင် ရဝ် ခဲင် မိူင် အီ ဆီငါ ဘွတ်။ ယေ ဘော ဘိုင် ဇဝ်ဖြာ ပီ ကြိုပ် ဂေ ဒူအီ အီဆာရေလ။ အန် ဇဝ် အီ စိူဝ် ‘ဇဝ်ဖြာ အီ အိုပ် တူတ့် ဒွန် မျုဝ်။’”

3 ဇဝ်ဖြာ ပီ ဝီ ကာလာင် ဒီ ဂေ ဒူအီ အီဆာရေလ တဝ်း၊ “ဒေါ မွိုန် အုဝ် ဟဲ့ ဟွတ့် ကာလာင် အုန် ဒီ အာတ့် လွင် အီ ဒီ ဘုဝ် ဘဲန်။ ဝါယ် အန် တီ ဒေါ တူ နမ်လှုဝ်း အီ၊ အုဝ် မိူဝ် ဟဲ့ ဘူင် တဲး န့ ဘုဝ် ဘဲန် အူ ဇေန့်။ အုဝ် ဟဲ့ ကာလာင် လွင် အန် တီ၊ တဲး အီ နပ်။

4 အုဝ် ဟဲ့ နပ်၊ ဘေ မိုဝ်း နဝ်း ဒိူဝ် ကာဆဝ်။ ဆီန မဲင် ဘေ ဘော ပ့လူမ် ဒီဂတ့် ပီ ဟိန်။ ကာတဝ်း ဘေ မိူဝ် ဘော ပီ ဒီဂ်ု ဘွင့် ဒေန့်။

5 ခုဝ်၊ အုဝ် ဟဲ့ ဟွတ့် ကာလာင် အုန် လွင် အန် တီ အူ ဆိန့် ဒေါ မွိုန်။ အုဝ် မိူဝ် ဟဲ့ ဟွတ့် ကာလာင် ဘျ ဒီ ဘေ အူ ဆိန့် အာတ့် ဘုဝ် ဘဲန် လွင် အန် တီ။ ကွဲ့ တဲး ဘေ ဝီ ပွိုန် ဒီ တဝ်း၊ ‘အာရိုပ် ရာင် ပီ ဘူင် အုဝ် ဟဲ့ ဘူင် ဇိုဝ် တီ။ အာရိုပ် ရာင် ပဲ့ ဟဲ့ ဘ့လုဝ်း အုဝ် ဘော အာရိုပ် ရာင် ပဲ့ ဟဲ့ လှုဝ် အုဝ်၊ ဂေ ဟဲ့ ဘူင် တဲး န့ ဘဲန် ပါယ် တီ။’

6 ဘေ ဟဲ့ ယိုဝ် ဆာဒါင် လွင် အန် တီ ဘော ဟဲ့ ယိုဝ် ဒီ ငါယ် ဘေ လွင် ပဲ့ ဟဲ့ ဘူင် အုဝ်။ ဘေ ယီ တူ ဝီ ကာလာင် ဒီ ဒူအီ ဟဝ်။ အုဝ် ယီ တဝ်း ဒီ ဘေ၊ ဆိန့် ဒေါ တီ နီ အုဝ် ဒီ ဝီ ကာလာင် ဒီ ဘေ လွင် အီ ကာမာယ်၊ မျုဝ် ပီ တူ ဒွိုမ် ကာလာင် အုဝ် ခေါ အူ ဇေန့်။

7 လွင် အန် တီ အုဝ် ဟဲ့ ဘူင် တဲး န့ ဘဲန် ဒေါ တီ နီ။ လွင် အန် တီ အူ ဆိန့် ဒေါ မွိုန် ကော ဇမ် ဒေါ တီ နီ၊ ဘေ တူ ဒွိုမ် ယိုဝ် ဒေါ မှဝ်။ ခုဝ်၊ ဘေ တူ ပွိုန် တဝ်း၊ ‘အုဝ် ဟဲ့ ဟွတ့် နပ်။’

8 ဘေ တူ ဒွိုမ် ထူမ် ပီ တဝ်း အုဝ်၊ န့ မိူဝ် တူ ဒွိုမ် ကာလှုး ဒီ နဝ်း ဘေ။ ဆိန့် ဒေါ မွိုန် ဂြုဝ်း အုဝ် တူ ဒွိုမ် လိုပ် ခဲင် ဟျုဝ့် ဘေ။ အုဝ် ဟဲ့ ဟွတ့် နပ်၊ ဘေ မုး ဒူအီ တူ ပွိုန် ညှိုမ်။ အုဝ် ဟဲ့ ဟွတ့် ယိုဝ်၊ ဘေ ဒိူန် ဒီ ကာဘး ဒီ အုဝ် ဆေဆေ။

9 အုဝ် ခမ် ဒီ အူတ် ဒီ ယိူန် နဝ်း ရူ အုဝ် ဒီ ဘေ။ ခုဝ်၊ အုဝ် ဆီ တဲး အီ ဟဝ် နပ် နဝ်း အုဝ်။ အုဝ် တူ ဘူင် တဲး ဘေ လိုဝ် စှိုမ်။ ခုဝ်၊ အုဝ် ဆီ တဲး အီ ဟဝ် အိူပ် မျုက် အုဝ်။

10 အုဝ် ဟဲ့ မာနုဝ် ဘေ။ အုဝ် တူ ဘူင် ဒီ ဘေ ပီ ဒူအီ ဒင် ရွိုန် ခဲင် ငဝ်။ အုဝ် ဟဲ့ တဲး ဘေ ခမ် ဒုက် အီ ပီ အီ ဒင် ရွိုန် ခဲင် ငဝ်။ အုဝ် ယီ တူ ဘူင် ဒီ ဘေ ပီ အီ ထာရွင် ရွိုန်။

11 လွင် ပီ ဘူင် အုဝ် တီ၊ အုဝ် ဟဲ့ ဘူင် တဲး အီ နပ် နဝ်း အုဝ်။ ကွဲ့ တဲး ဆာရေ အုဝ် ချဝ့်။ အာဖုင် ဒင်ခုဝ် အုဝ်၊ အုဝ် တူ တဲး အာဆေ ဖာတ် ဒိုဝ်း။” ဇဝ်ဖြာ ဟဲ့ ကာလာင် ပါယ် တီ ဒီ ဒူအီ အီဆာရေလ အီ ဒိူဝ် ကာဆဝ်။

12 ဝါယ် အန် တီ ဇဝ်ဖြာ ပီ ဝီ တဝ်း၊ “အိုယ် ဘေ ဒူအီ အီဆာရေလ အီ မုး ဒူအီ ပီ ရဝ်း အုဝ်၊ တဲး ဘေ ထူမ် ဂြုဝ်း အုဝ်။ အုဝ် မုး အန် ဇဝ် အီ ကာစုး တူတ့် ဒွန် မျုဝ်၊ အုဝ် ဒီ ဘော ဘူင် တဲး န့ ကော ဟွတ့်။

13 ဒဲ အုဝ် နီ အီ ဟဲ့ ဘူင် ဒင် ကာဒါယ် ဘော ဘ့လး ဂါင်ဟြာဝ်။ ဒေါ ဒဲ့ အုဝ် ဒီ ဂေ ဘော ကာဒါယ် ဘော ဂါင်ဟြာဝ် ဟဲ့ ဘဲန် အူ ဇေန့်။

14 ခဲ့ ကွယ် ဘေ ဘောကာဂ့လျီတ်၊ တဲး ဘေ တး ကာဇု ထူမ် ဂြုဝ်း အုဝ်။ ကာတဲ ဂေ ဇဝ် ပီ ကြိုပ် အီ ဟဝ် ဝီ မှဝ် ဟဲ့ ပွိုန် ကာလာင် ဒီ အာတ့် တဝ်း၊ ‘ဝီ ပီ ရဝ်း အုဝ် အန် ဒီ ကာဂုဝ်း ဒီ မိူင် ဘာဘဲ။ ဝီ ပီ ရဝ်း အုဝ် တီ၊ အန် ဒီ ဘူင် ဒီ အီ ဟဝ် ခဲ့ ပီ ဆီ တဲး အုဝ် အန် ဘူင်။’

15 န့ မုး အုဝ် အီ ဟဲ့ ကာလာင် အုန် လွင် အန် တီ။ အုဝ် အီ ဒဲ့ ဝီ တီ။ အုဝ် ဟဲ့ ဒဲ့ တး အန်၊ အုဝ် ဒီ ဘော တဲး အန် အွင်။

16 တဲး ဘေ ဝီ တး ကွယ် ကာတတ် အုဝ်၊ တဲး ဘေ ထူမ် ဂြုဝ်း ပီ ကာလာင် အုဝ်။ ဆိန့် ဒေါ ဂုဝ် အန် အုဝ် ဟဲ့ ကာလာင်၊ အုဝ် တူ ချြီင် ဂြုဝ်း အုဝ်။ အုဝ် ဟဲ့ ကာလာင် တဲး န့ လိုဝ်း ဆီချာ ဒီ ဒွန် အီ။ ဒေါ ဟဲ့ ဝီ ဘုဝ် ဘဲန် ခဲ့ ပီ ကာလာင် အုဝ်၊ အုဝ် ဟဲ့ ကွယ်။” ဒေါ တီ နီ၊ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ အာပ် နဝ်း ဖွိုမ် အန် ဒီ အုဝ်။

17 ဇဝ်ဖြာ အီ ဆီငါ ဘွတ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ ဇဝ်ဖြာ အီ ဟဲ့ ထုတ် လေး ဘေ၊ အန် ဟဲ့ တဝ်း၊ “အုဝ် မုး ဇဝ်ဖြာ အီ မာနုဝ် ဘေ၊ တဲး န့ ဘဲန် အာဂျိုဝ် ဒီ ဘေ။ အုဝ် တိုယ် တဲး ဘေ ဒူပ် န့တေန့် ပီ ကာအာပ် ဘေ ဒူပ်။

18 အာတ့် နီ ဆေ ဘေ ဘူင် ဒူပ် ဒါရာ အုဝ်၊ ဘေ ဘော ပွိုန် မွင့်ကာရာ အီ ပီ အိုမ် ဘ့လဲင် အီ လှဲ တူ ဟိတ် ဒေါ မှဝ်။ နဝ်း ဆိူဝ် နဝ်း မှာန် ဘေ မိူဝ်၊ န့ ဘော ပီ ဆီလွယ် အိုမ် နမ်မုက်ဆာရာ။

19 အုဝ် မိူဝ် ဒီ တဲး ခြိုဝ် ဘေ ဘြဲ ကိူန် ပီ ကာဟာတ့်။ ဘော လှုက်လှာန် ဘေ ပီ ကာဟာတ့် ဒွန် ဂဝ် အီ ကွယ် ခူပ် အိုမ် နမ်မုက်ဆာရာ။ အုဝ် မိူဝ် တူ ဆီ တဲး ဂေ လိုဝ် စှိုမ် ဒေါ မှဝ်။ ကူပ် တူ ထူမ် ဂေ ဂြုဝ်း အုဝ်၊ န့ ယီ တူ ဘဲန် ပါယ် တီ။”

20 တဲး ဘေ လေး ခဲင် မိူင် ဘာဘဲ တီ။ တဲး ဘေ ဘော လေး ဟာဝ် ဒါခိုယ် ဒါခိုယ်။ တဲး ဘေ ဒတ် တဝ်း မှုဝ် ဘျုဝ် ဘျုဝ် ကျဝ် ကျဝ်၊ ကာလာင် လွင် ဒါင် ဘေ၊ တဲး န့ ကော ဇမ် ဒူင် ဆိူတ် ကာဒါယ်။ တဲး ဘေ တဝ်း၊ “ဇဝ်ဖြာ ဟဲ့ ဟွတ့် ထုတ် လေး ဂေ ဒူအီ အီ မုး ဒဲစေန့် အန် အီ မုး ဒူအီ အာမျုဝ် အာကူပ်။

21 ဒေါ တိုယ် ဟာဝ် ဇဝ်ဖြာ ဂေ ဒူအီ ပီ အိုပ် အန် ဒူပ် န့တေန့် ခဲင် ပြဲ ကာဟဝ်း အီ ဟဲ့ ဆောဒါတ် ကာဆဝ်၊ ဂေ ယီ တူ အေတ့် အိုမ်။ အန် ဇဝ် ဟဲ့ တဲး အိုမ် တုဝ်း လေး ဒီ ဒါအာင် မာဝ် တဲး ဂေ ဒျီင်။ အန် ဟဲ့ ဒး မာဝ် တီ၊ အိုမ် မိူဝ် ဘော ကာစှူတ့် လေး အူ ဇေန့်။

22 ဂေ အီ မိုဝ်း မှာပ်၊ ဂေ ယီ တူ ယိုဝ် ဂျာမ်ဆာ ဒေါ မှဝ်။” ဇဝ်ဖြာ ဟဲ့ ကာလာင် အုန် ပါယ် တီ။