1 ဇဝ်ဖြာ ဝီ တဝ်း၊ “အိုယ် ဘေ ဒူအီ ခဲင် မိူင် ဘာဘဲ အီ ပီ ဂွန် ဒီဘျာ၊ တဲး ဘေ တုတ့် ဒဲင် ကာပုး။ ဘေ ဂွန် ဒီဘျာ ခဲင် မိူင် ကာလာဒေ၊ တဲး ဘေ လေး ဒဲင် မာလာင် ဘေ၊ ဝီ တုတ့် ဒဲင် ကာဒါယ်။ ဆိန့် ဒေါ တီ နီ ဟာဝ် နာ အာတ့် အာဝ် ဟူ မိုဝ်း အာဆေ အီ တဝ်း၊ ဘေ စှိတ်၊ ဘေ ချုဝ်။

2 တဲး ဘေ ဝီ ဒိုဝ်း မာဝ် ကြိတ် ဘေ ခါမုန်၊ တဲး ဘေ ဝီ ကြိတ် ငှုဝ်။ တဲး ဘေ ဘုတ့် လေး ကာမဲ့ ပီ ကာမှုဝ့် ဘေ ဂိန့် ဘေ။ ဘုတ့် လေး ဘော ဆီတုဝ် တာင် ဘေ ဘော ဂ့လာင် ဘေ၊ ဝီ ကာလုဝ်း ဒီလယ့် ဘ့လဲင် အိုမ်။

3 ဂေ ဒူအီ ကိူန် ဒီ ဘော ယိုဝ် ဘေ ဟဲ့ ဂ့လ။ ဘေ ဟဲ့ မွှိုမ် ဆာယ် ကာဆဝ်။ အုဝ် ဒီ ဘူင် ဝျီ့ ခဲ့ ပီ ဘူင် ဘေ။ အုဝ် မိူဝ် တူ တဲး အာဆေ လွတ်။”

4 ဇဝ်ဖြာ အီ ဆီငါ ဘွတ်၊ ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အီ ဟဲ့ ထုတ် လေး ယေ၊ အန် မုး ဇဝ်ဖြာ အီ အိုပ် တူတ့် ဒွန် မျုဝ်။

5 အန် ပီ ဝီ ကာလာင် ဒီ ဂေ ဂွန် အီဘိုန့် ခဲင် မိူင် ဘာဘဲ တဝ်း၊ “တဲး ဘေ ကွယ် နှိမ် နှိမ်၊ ကွယ် ခဲင် အပ် ဝွင့်။ ဝါယ် နီ၊ အာဝ် မိုဝ်း ခေါ အူ ဝီ အီ ဒီ ဒဲ့ ဘေ တဝ်း၊ ဘေ ပီ နာင် ဟောခမ် အီ အိုပ် ဘဲန် မိူင် ဘဲန် မိူင်။

6 အုဝ် ဇဝ်ဖြာ မိူဝ် ဟဲ့ ဒွိုမ် ရူ စာဝ် ဒီ ဂေ ဒူအီ ပီ အိုပ် အုဝ်။ အုဝ် မိူဝ် ဟဲ့ ဝဲန် ခါဂုန် အုဝ်၊ ဝီ တဲး န့ ကာဒါတ့်။ အုဝ် ဟဲ့ အာပ် တဲး ဘေ အိုပ် ဂေ။ မာလဲ၊ ဘေ ယီ တူ မိုဝ်း နဝ်း ကာဝေ ဂေ။ ဘေ ဟဲ့ ဝီ တဲး ဂေ ဒူအီ ကတ် ဒူအီ ဂဲ ဝီ ဘူင် ဂါန် စန်။

7 ဘေ ဘော ထာင်၊ ဘေ ဒီ ပွိုန် ဒီ ဘဲန် နာင် ဟောခမ် ဆေဆေ။ ဘေ မိူဝ် တူ ကာဖာ လွင် အန် တီ။ ဘေ မိူဝ် တူ ထာင်၊ ဘေ ဒီ ဇမ် ဒုက်။

8 အိုယ် ဘေ အီ အိုင် ဒီ ဘျုဝ် ဒီ ကျဝ် ဒူပ် နဝ်း ဘြိမ် ဘေ၊ ဘော တူ ကာဒွါ့ ကာဖာ မာဆေ။ တဲး ဘေ ထူမ်။ ဘေ ဘော ထာင်၊ ဘေ ဟဲ့ ပွိုန် ဒီ ကွယ် ဒါခိုယ်၊ ကွယ် ဆီချာ။ ဘေ ဘော တဝ်း၊ ‘ဟဲ့ မုး မီ အုဝ်၊ အာဝ် မိုဝ်း အီ ဟဝ် ခေါ အူ ဝီ အီ ပီ အုဝ်။’ ဘေ ဘော ထာင်၊ ဘေ အာဝ် ဟူ ကာဒုး ဒီ ဘဲန် ယာ ဆီပြး၊ အာဝ် ဟူ လုဝ် ခမ် ဒုက် ကူပ် ဟဲ့ ယမ် ဂွန် ဘေ။

9 အူ ဆီငဲ ဒုက် အာ မျုဝ် ဒီ ဘော ဘုဝ် ဘဲန် ဒီ ဘေ အူ ဇေန့်။ ဘေ လုဝ် ခမ် ဘော ဒုက် အီ တဲး အီမာယ် ဘေ ယမ် ဘော ဒုက် အီ တဲး ဂွန် ဘေ ယမ်။ ဘေ ပီ ဘော ဟဲ့ နပ် ဒီ ဘိုင် ကာနမ် ဘော ဘူင် အာဒါတ် ဂေ အာကျုန် မိူဝ်၊ အီမာယ် ဘေ ဂေ ဂွန် ဘေ ယီ ဒီ စှိုမ်။

10 ဘေ ဟဲ့ ဘိုင် အီ ဟာယ် အီ စီစိဝ် ပဲ့ ဟဲ့ ဘူင် ဘေ တီ၊ ဘေ ဘော ထာင် အာဝ် မိုဝ်း အီ ယိုဝ် ခေါ အူ ဝီ။ အာငျာန် ဘေ ဘော ပီ နပ် ဘေ၊ န့ ဟဲ့ ဝီ ယဲတ့် တဲး ဘေ ကာလိုပ်။ ခုဝ်၊ ဘေ ဟဲ့ တဝ်း ဒီ ဒုဝ် ဘြိမ် ဘေ၊ ‘အာဝ် မိုဝ်း အီ ဟဝ်။ ဒဲင် အုဝ် အာဝ် မိုဝ်း အာဆေ။’

11 ဘေ ဒီ ဘော ခမ် အာဖေ အာရေ။ အာဒါတ် ပီ ဘိုင် ဘေ တီ၊ န့ ယီ တူ ပွိုန် ဂွင့် ရဲ ဘေ။ မျုဝ် အီ နပ် ဒီ တဲး ဘေ လိုဝ် စှိုမ်၊ န့ ဒီ ဘော ဘုဝ် ဘဲန် ကာစွာ ဒီ ဘေ အူ ဇေန့်။ ဘေ မိူဝ် တူ ပွိုန် ဒွင်ဘာန်။ ဒုက် ပီ တူ နမ်လှုဝ်း ဘေ၊ န့ ဒီ တး ဒီ ဘေ ဒေါ တူ ထာင် ဘေ။

12 တဲး ဘေ ဘိုင် အာဒါတ် ဘော အာကျုန် ပဲ့ ဟဲ့ ဘူင် ဘေ၊ ပဲ့ ဟဲ့ အွန် ဘေ ဒီ ဘူင် ဆိန့် ဒေါ မုး ဘေ ဂွန်။ ဆေ န့ ဘော မွှိုမ် ဘဲန် အာဂျိုဝ် ဒီ ဘေ၊ တဲး ဘေ ဘူင်၊ တဲး န့ ဘော ဂွင့် ဘေ။ မင် ဇေန့် န့ ယီ ဒီ တဲး ဘေ ကာစွာ ဘော ယုဝ် ဒီယုး ဒီယေန့်။

13 ဘေ ဟဲ့ ဒုက် ညှာပ် ကာဆဝ် ကူပ် ဟဲ့ ဝီ ကာမွုန် ဆင်ချာင် ကိူန် ကာဆဝ် ဘေ။ ဂေ အီ နပ် ဒီ ယွတ် ပီ ပါယ် နာခါတ် ဂါင်ဟြာဝ် ဘော ဂေ အီ နပ် ဒီ ယွတ် နာခါတ် ဆီမန့်၊ ဂေ အီ နပ် ဒီ ယွတ် အီ ဒီ ပါယ် ဒွန် မာဂျီန်၊ တဲး ဂေ တာက် ဒီ ယွတ် လွင် အီ ဒီ ဘုဝ် ဘဲန် ဒီ ဘေ တီ၊ တဲး န့ ချွတ် ဘေ။

14 ဂေ ဒါ ဆာရာ တီ၊ ဂေ ဒီ ဘော ပီ ကာအး ကာအူပ်။ ငဝ် ဒီ ဘော ကာဆိုမ် တူတ့် ဂေ။ ဂေ မိူဝ် တူ ပွိုန် စွယ် တဲး ဒုဝ် ဘြိမ် ဂေ လွတ် ဒီ ပ့လဲ့ ငဝ် အီ ဟဲ့ ကုး ဟဲန့် ကာဆဝ်။ ငဝ် တီ၊ အာဝ် မုး န့ကိုဝ် ငဝ် တဲး အီ ဝါတ်၊ အာဝ် မုး ငဝ် အီ တဲး န့ ဆီအုန့် ဒီ အီ။

15 ဂေ ဒါ ဆာရာ တီ၊ ဂေ နပ် ဒီ စွယ် ဘေ မီ ခဲ့ တီ။ ဘေ ဟဲ့ ဘူင် ဂါန် ရိုမ် ဒူပ် ဂေ ဘော ကာစိုဝ်း ကာယွင့် ဒူပ် ဂေ ဆိန့် ဒေါ မုး ဘေ ဂွန် ဒီရွယ်။ ဂေ ဒွန် အီ ယီ တဲး ဘေ ဘူင် ဟာဝ် အီ ကာလိုပ် ဆေဆေ။ အာဝ် မိုဝ်း အာဆေ အီ ဒီ ပွိုန် ချွတ် ဘေ။”