1 ဇဝ် ဘာလ ဟဲ့ ဟွတ့် စုဝ်း လူင်၊ ဘော ဇဝ် နေပေါ ဟဲ့ ကေး ဆီဂိုပ်။ အီ ဟဝ် ဟဲ့ ဒါင် အာရိုပ် ရာင် ဂေ တီ ဒဲင် ကာတု ဒုဝ် ဆတ်။ ဘော မက် အီ လာက် လဝ် အန် ဟဲ့ စန် ကာဆဝ်။ န့ ဘော တဲး ဒုဝ် ဆတ်ဒါဝါ ဂေ တီ ကော နုန် ကာဆဝ်။

2 အာရိုပ် ရာင် ဂေ တီ မိူဝ်၊ တူ ပွိုန် ဝီ ခြဲ ဒုဝ် ဘြိမ် ဂေ၊ ကွဲ့ တဲး ဂေ လွတ် ဒီ ဒူအီ အီ ဆီ မှေတ့် ဟာဝ် ဂေ။

3 ဇဝ်ဖြာ ပီ ဝီ တဝ်း၊ “အိုယ် ဘေ ခြိုဝ် အာကူပ်၊ တဲး ဘေ ထူမ် ဂြုဝ်း အုဝ်။ ဘေ ဒူအီ ပီ အိုပ် အုဝ် အီ ဆီ ဂိတ် ဆီ ကွယ် ခဲင် မိူင် ဘြိမ် ဘေ၊ အုဝ် ဟဲ့ တဲး ဘေ ဂွိုတ် တး။ အုဝ် မိူဝ် ဟဲ့ လိုမ်လာ ဘေ ဆိန့် ဒေါ ဂွိုတ် ဘေ။

4 အုဝ် အီ မုး ဇဝ်ဖြာ ပီ ကြိုပ် ဘေ၊ အုဝ် ဒီ လိုမ်လာ ဘေ တဲး ကော ဇမ် ပန် ကတ် ဘေ၊ တဲး ဟိုက် ဂိန့် ဘေ ကော လုယ်။ အုဝ် အီ ဖာန် ဘ့လေး ဘေ။ အုဝ် အီ လိုမ်လာ ဘေ။ အုဝ် အီ စွယ် ဘေ ဘော ချွတ် ဘေ။

5 ဘေ ဒီ ကာဂဝ် အုဝ် ဒီ အာဆေ အီ ပီ အုဝ်။း ဘေ ဒီ ကာဂဝ် အုဝ် ဒီ အာဆေ၊ တဲး အန် နှဲန် အုဝ်။း”

6 ဂေ ဒူအီ ကိူန် ဘော ဝိုဝ်း ကာဘျာဝ် ဂေ၊ ဝီ ဟုး လေး ခြိဝ် ဂေ။ ဂေ ပီ ဝီ ဒိုဝ်း ညွယ် ဂေ လစူ၊ ဝီ ဆ ရွိုန် ဂေ၊ ဝီ ဟာဝ် ဇာင် ဂေ အီ နပ် ဒီ စိုမ် ခြိဝ်၊ တဲး ဂေ ဝီ ဘူင် အာရိုပ် ရာင်။ ဟဲ့ ဟွတ့်၊ ဂေ ဘော ဝီ မုတ် ဂိုပ် ကြိုပ် အာရိုပ် ရာင် တီ။

7 ဂေ ဘော ဝီ ကာဂွတ် အာရိုပ် ရာင် တီ၊ ဝီ ဟာဝ် အုန် ဒူင် ကွယ် အန်။ အာရိုပ် တီ မိူဝ် စွင့် ဒီ တီ။ အန် မိူဝ် တူ ကာထုဝ့် ဒူင် ကွယ် အန် တီ ဒေါ မှဝ်။ ဂေ ပီ ဘော ဂါဝ် ပွုန် အန်၊ ဆာခိုဝ် ဒီ အန် မိူဝ်၊ အန် တူ ဝျီ့ ဂြုဝ်း ဂေ။ အန် မိူဝ် တူ ပွိုန် ချွတ် တဲး ဂေ လေး ခဲင် ဒုက် ပီ ခမ် ဂေ။

8 ခုဝ်၊ ဇဝ်ဖြာ တဝ်း၊ “အိုယ် ဘေ ဒူအီ အီ ကာဘး ဒီ အုဝ်၊ တဲး ဘေ ဝီ ကာဒွါ့ ကာဖာ လွင် အန် တီ။

9 တဲး ဘေ ဝီ လှုဝ်း လွင် အီ ဟဲ့ ဒွိုမ် ဘုဝ် ဘဲန် အူ ဆိန့် ဒေါ မွိုန် တွိုန်။ တဲး န့ ဘော ကာလှုး ဒီ နဝ်း ဘေ၊ န့ မိုဝ်း မီ အုဝ် အူ ကာဒင် အီ မုး ဇဝ်ဖြာ။ ဒဲင် အုဝ် နီ၊ အာဝ် မိုဝ်း ဇဝ်ဖြာ ပေါ အူ ကာဒင်။

10 ဆိန့် ဒေါ ဂုဝ် အန် ဒေါ မွိုန်၊ အုဝ် ဟဲ့ ဟွတ့် ကာလာင် အုန် လွင် အီ ဒီ ဘုဝ် ဘဲန်။ ဆိန့် အာတ့် နီ ဟဲ့ လှေန့် ကာဆဝ် အုဝ် ဟဲ့ ဟွတ့် ကာလာင် အုန်၊ န့ ဒီ ဘဲန် ပါယ် မှဝ်။ ဂြုဝ်း ပီ ကာလာင် အုန် အုဝ် ဘော ပဲ့ ဟဲ့ ခြာမ် အုဝ်၊ အုဝ် ဒီ ဘူင်။ အုဝ် ဒီ ဘော ဘူင် ခဲ့ ပီ အိုင် အုဝ်၊ တဲး န့ ကော ဇေ့ဇုင်။

11 အုဝ် ဒီ ဒဲ့ မာဂ့လာင် အီ ကွယ် နာ လေး ဆီငဲ တး။ အုဝ် ဒီ ဘော ဒဲ့ ဒူအီ အူ ဝီ အီ ကွယ် ခဲင် မိူင် တူင့်။ အန် ဒီ ဘော တး အူ ဇေန့်၊ တး ဘူင် ပဲ့ ဟဲ့ တဝ်း အုဝ် ဒီ ဘူင်။ အုဝ် ဒီ ဘူင် ခဲ့ ဟဲ့ ခြာမ် အုဝ် ဒီ ဘူင်၊ တဲး န့ ကော ဟွတ့် တူတ့်။

12 အိုယ် ဘေ အီ မိုဝ်း နဝ်း ဒိူဝ်၊ နဝ်း ပ့လူမ် ဒီဂတ့်၊ ဘေ အီ တူ ဇေန့်ဇာ လွင် နဝ်း ဆိူဝ် နဝ်း မှာန်၊ တဲး ဘေ ထူမ် ဂြုဝ်း အုဝ်။

13 အုဝ် ဒီ တဲး နဝ်း ဆိူဝ် နဝ်း မှာန် ဒီ ဘေ၊ တဲး န့ ပီ န့ ဟဲ့ တး ကာတတ်၊ တး ကာချြီ့ ဒီ ဘေ။ အာဝ် လှေန့် အုဝ် ဒီ ဘော ချွတ် ဘေ။ အုဝ် ဒီ ချွတ် ဂေ ဒူအီ ခဲင် မိူင် ယေရူဆာလဲမ်။ ဘော အာဖုင် ဒင်ခုဝ် အုဝ် အုဝ် ဒီ ဒွါ ဒီ ဒူအီ အီဆာရေလ။” ခဲ့ တီ ဇဝ်ဖြာ ဟဲ့ ကာလာင်။