1 ဇဝ်ဖြာ ဝီ ကာလာင် ဒီ ခုန်ဒီခမ် အာဆာယ်ရတ် အီ မုး ဒူအီ ပီ ရဝ်း ပီ တိုယ် အန်။ အန် တဝ်း ဒီ စွယ် ခုန်ဒီခမ် တီ၊ တဲး န့ ပီ ဇဝ်ဖြာ ပါ ဒဲ အန်၊ တဲး အန် ကာဂုဝ်း ပဲ ဒါ ဆိုက် ဒွန် မျုဝ်၊ တဲး အန် ဘ့လွာ့ ဝဲန် ဘော ဂေ ခုန်ဒီခမ် ဘဲန် ကာဒင် ဘဲန် ကာဒင်၊ ကွဲ့ တဲး ဂေ ဆီ မိုဝ်း ပွုန်။ ဇဝ်ဖြာ မိူဝ် ဒီ ဝိုဝ်း မာလုဝ်း မိူင်၊ တဲး ခုန်ဒီခမ် အာဆာယ်ရတ် ပွိုန် ဒီ လိုပ်၊ ကွဲ့ တဲး ဂေ ဝီ ကာဘိတ်။ ဇဝ်ဖြာ ဘော တဝ်း၊

2 “အုဝ် ဒီ ယဲတ့် ဒီ အာတ့် မဲ။ ခဲ့ ကွယ် နွန် အီ တာင်၊ အုဝ် ဒီ တဲး န့ ဂ့လင်။ ဘော မာလုဝ်း ဘွင့်၊ အုဝ် ဒီ ကာဘက် ဝဲန်။ အုဝ် ဒီ ဒဲပ် ဝဲန် ဘော မာလုဝ်း ဟိန်။

3 အုဝ် ဒီ ဝီ ဒိုဝ်း ကြုဝ်ကြာမ် အီ ကွယ် ခဲင် အပ် ဝွင့် ဘော ကြုဝ် အီ မိုဝ်း ဒီငဝ်း ဒီခန် ပဲ့ ဟဲ့ ချြီင် အုန် အီ၊ ဝီ ဒွါ ဒီ မဲ။ ပါယ် တီ မဲ ဒီ ဘော နပ် အုဝ် မုး ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ ဘော ဇဝ်ဖြာ အီ ဟဲ့ ဒဲ့ စိူဝ် မဲ။

4 အုဝ် ဟဲ့ ဒဲ့ မဲ ကူပ် ရွက့် အုဝ် ဒူအီ အာမျုဝ် အာကူပ် အီ မုး ဒဲစေန့် အုဝ် ဘော ဒူအီ အီဆာရေလ ပဲ့ ဟဲ့ ရဝ်း အုဝ်။ မဲ ပီ ဆ နပ် အုဝ် မိူဝ်၊ အုဝ် ယီ ဒီ ဒဲ့ စိူဝ် မဲ၊ ဘူင် တဲး မဲ မိုဝ်း ဆာရေ။

5 မီ အုဝ် အူ ကာဒင် နီ မုး ဇဝ်ဖြာ။ ဒဲင် အုဝ် အာဝ် မိုဝ်း ဇဝ်ဖြာ ပေါ အူ ကာဒင်။ မဲ ပီ ဆ နပ် အုဝ် မိူဝ်၊ အုဝ် ဒီ တဲး မဲ မိုဝ်း ပ့လူမ် ဂေ ဟဲန့် ခဲ့ ပီ လုဝ် မဲ။

6 အုဝ် ဘူင် ပါယ် တီ တဲး ဂေ ဒူအီ နပ်၊ ဒဲင် အုဝ် အူ ကာဒင် နီ၊ အာဝ် မိုဝ်း ဇဝ်ဖြာ ပေါ အူ ကာဒင်။ ဂေ အီ ကွယ် ဒူင် ဆိူတ် ကာဒါယ် စုး အူ ဘ့လာက် ကော ဝီ ဇမ် ဒူင် ဆိူတ် ပေါ အူ ဘ့လာက်၊ တဲး ဂေ နပ်၊ န့ မိုဝ်း မီ အုဝ် အူ ကာဒင် နီ အီ မုး ဇဝ်ဖြာ။

7 အုဝ် ဘော မုး အီ ဘူင် တဲး န့ မိုဝ်း ဘ့လာင် ဘော အပ် ဝွင့်။ အုဝ် ဘော ဘူင် တဲး အီ ဘျုဝ် ဒါခိုယ်၊ ဘော ဘူင် တဲး အီ ခမ် အာဖေ အာရေ။ ဇိုဝ် တီ ဒွန် မျုဝ်၊ န့ ဘော မုး အုဝ် ဇဝ်ဖြာ အီ ဘူင်။

8 အုဝ် ဒီ ဘော ကာလာင် တဲး ဒူအီ မိုဝ်း နဝ်း ဆိူဝ် နဝ်း မှာန် အီ လေး တး ခဲင် ဂါင်ဟြာဝ်၊ တဲး န့ ဘော စုဝ်း ပီ အိုမ် ဂ့လာယ်။ တဲး ဒူအီ ကိူန် မိုဝ်း နဝ်း ဆိူဝ် နဝ်း မှာန်၊ တဲး န့ ချွတ် ဂေ၊ တဲး န့ ပီ ကာဒါယ် ဘော ဝိုဝ်း ဘော ရပ် ဘော ရွုး အိုမ် ဂ့လာယ် တီ။ အုဝ် ဇဝ်ဖြာ ဒီ ဘူင် တဲး န့ ဘဲန် ပါယ် တီ။

9 ဝီ အီ ဘူင် ကာဘး ဒီ အုဝ် အီ မုး ဒါ ကာညာ အီ ဖာန် ဘ့လေး အန်၊ အန် ဒီ ခမ် ဒုက် တာင်။ အန် ပီ ဒူန့် ကာလုဝ့် ကာဒါယ် ပဲ့ ဟဲ့ ဝဲန် အီ။ ကာဒါယ် အီ ကာပိတ် တွိုန်၊ အန် တူ ပွိုန် ဝီ ဒီမွှတ် ဒါ အီ ဘူင် ကာလုဝ့် တဝ်း၊ ‘မာဆေ ပီ ဘူင် မဲ။း’ ကာဒါယ် ကာပိတ် တီ တူ ပွိုန် ဝီ နဲ ဒါ အီ ဘူင် အန် တဝ်း၊ ‘ဒါ အီ ဘူင် အုဝ် နီ တူ မှုဝ် ဒီ ဘူင်။’

10 ဆေ ဒူအီ အူ ဝီ ဝီ တဝ်း ဒီ ဂုန့် အန်၊ ‘မှဝ် န့ ပါယ် ပီ တဲး မဲ အုဝ် ဘဲန် ဒူအီ။း’ ဘော တဝ်း ဒီ ဂုန့် အန်၊ ‘မှဝ် န့ ပါယ် ပီ တဲး မဲ အုဝ် ဂွိုတ် တး။း’ ဒူအီ ဝီ တီ ဒီ ခမ် ဒုက် တာင်။

11 ဇဝ်ဖြာ အီ မုး ဇဝ်ဖြာ အီ ဆီငါ ဘွတ်၊ ဇဝ်ဖြာ ပီ ကြိုပ် ဂေ ဒူအီ အီဆာရေလ ဘော မုး ဒါ ကာညာ အီ ဖာန် ဘ့လေး ဂေ။ အန် ဟဲ့ တဝ်း၊ “ဘေ တူ ပွိုန် ဒီမွှတ် အုဝ် လွင် ဂေ ဂွန် အုဝ် ဝီ အီ ဒီ တး ဝါယ် နီ။ ဘေ မိူဝ် တူ ပွိုန် စ်ု အုဝ် ဘူင် ပါယ် နီ ပါယ် နီ။

12 အုဝ် မုး အီ ဖာန် ဘ့လေး ကာဒါယ် ဘော ဒူအီ။ အုဝ် ဘော တဲး ဂေ ကွယ် ဒဲင် ကာဒါယ် တီ။ အုဝ် ဟဲ့ တာ အာဖုင် ဒင်ခုဝ် အုဝ်၊ ဘူင် တဲး ဂါင်ဟြာဝ် မ့ဘ့လး။ အုဝ် ဟဲ့ စ်ု ဆီငဲ ဂေ မာဂျီန် ဘော ဆီမန့် ဘောကာဂ့လျီတ်၊ တဲး ဂေ လေး။

13 အုဝ် ယီ ဒီ စ်ု ခုန်ဒီခမ် အာဆာယ်ရတ်၊ တဲး အန် ဘူင် ခဲ့ ပီ ခြာမ် အုဝ်၊ တဲး န့ ဇေ့ဇုင်၊ တဲး န့ ဘော ဒူပ် နဝ်း ဆိူဝ် နဝ်း မှာန် အုဝ်။ အုဝ် ဒီ ဘူင် တဲး န့တေန့် ဒူင် ဒီ ဟာဝ် အန် ဒွန် ပ့လုဝ့် ဆိူဝ် ဆီချာ။ အန် ဒီ ဝီ မ့ပြာယ် မိူင် ပီ အိုပ် အုဝ် အီ မုး မိူင် ယေရူဆာလဲမ်။ အန် ဒီ ဘူင် တဲး ဂေ ဒူအီ ပီ အိုပ် အုဝ် လွတ် လေး ခဲင် ဒုက်။ န့ ယီ တူ မိုဝ်း အာဆေ အီ ဇာင် အန် ဘူင်၊ တဲး အန် ပွိုန် အာဂျိုဝ်။ အာဝ် မိုဝ်း အာဆေ အီ ဒွါ လက်ဆွင် ဒီ အန်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

14 ဇဝ်ဖြာ ပီ ဝီ ကာလာင် ဒီ ဂေ ဒူအီ အီဆာရေလ တဝ်း၊ “ပီ ကာစိုဝ်း ကာယွင့် ဘော ခြမ် ဂေ ဒူအီ ခဲင် မိူင် အဲဂိုပ် ဂါယ် မိူင် ကူဆာ၊ န့ ဒီ ဝီ ဘဲန် ကြုဝ် ဘေ။ ဒူအီ ဒီ တူင့် ဒီ တာင် အီ ကွယ် ခဲင် မိူင် ဆေဘာ၊ ဂေ ဒီ ဝီ တး ဒူင် ကွယ် ဘေ ဘော ကာဒုး ဒီ ဘဲန် မှာယ် ဘေ။ ဂေ ဒီ ဘော ခမ် အီ ပက် ဂေ တာ ဝန် ဟိန်၊ ဝီ ဒူပ် ဒီ ပန် ဘေ။ ဂေ ဒီ ဘော ဝီ ဂူမ် ကြိုပ် ဘေ ဘော ကန်ဒုဝ် ဘေ တဝ်း၊ ‘ဘေ မုး ဒါ ကာညာ ယေ၊ ဇဝ်ဖြာ ဟဲ့ ကွယ် ရိုမ် ဒူပ် ဘေ။ ဒဲင် ဇဝ်ဖြာ ကာဒင် နီ၊ အာဝ် မိုဝ်း ဇဝ်ဖြာ ပေါ အူ ကာဒင်။’”

15 အိုယ် မဲ ဇဝ်ဖြာ ပီ ကြိုပ် ဒူအီ အီဆာရေလ၊ မဲ မုး ဇဝ်ဖြာ အီ ချြီင် ဒုဝ် မဲ။ မဲ ဘော မုး အန် ဇဝ် အီ ချွတ် ဂေ ဒူအီ ပီ အိုပ် မဲ။

16 ဂေ အီ ဘူင် အာရိုပ် ရာင်၊ ဂေ ဒီ ဝီ ဆာယ် အီ ဘော စှိုမ် ဆာရေ။ ဂေ ဘောကာဂ့လျီတ် ဒီ ဟြာယ် တူတ့် အူ ဇေန့်။

17 အီ မုး ဂေ ဒူအီ အီဆာရေလ၊ ဇဝ်ဖြာ ယီ ဒီ ချွတ် ဂေ တဲး ဂေ ကွယ် ဆီချာ ဆေဆေ။ ဂေ တူ လုဝ် ခမ် အီ မွှိုမ် ဆာယ် ဘော အီ စှိုမ် ဆာရေ ဒေါ မှဝ်၊ ဘော ဒေါ မုး စုဝ် ဂေ ဘော ဒွန် စုဝ် ဒွန် ဘာန်။

18 ဇဝ်ဖြာ အီ ဟဲ့ ဖာန် ဘ့လေး ဂါင်ဟြာဝ်၊ အန် ဟဲ့ တဲး ဘော ကာဒါယ် ကွယ် မန် ဆီချာ။ အန် ဇဝ် မိူဝ် တူ ဘူင် တဲး ကာဒါယ် ဘ့လဝ် တူ မိုဝ်း မာဆေ။ အန် ဘူင် တဲး န့ ဘဲန် ဒူင် ဒီ ကွယ် ဒုဝ် ဆတ်ဒါဝါ။ အန် ဇဝ် တီ မိူဝ် ဟဲ့ တဝ်း၊ ‘အုဝ် အီ မုး ဇဝ်ဖြာ။ ဒဲင် အုဝ် အူ ကာဒင် နီ၊ အာဝ် မိုဝ်း ဇဝ်ဖြာ ပေါ အူ ကာဒင်။

19 အုဝ် မိူဝ် တူ ဒွိုမ် ချြီင် ပီ ကာလာင် အုဝ်၊ တူ တဲး န့ လိုဝ်း ဒီ အီ။ အုဝ် မိူဝ် တူ တဝ်း တဲး ဂေ ဒူအီ အာမျုဝ် အာကူပ် ဟြေတ့် အုဝ်၊ ဆေ န့ တူ မိုဝ်း ဒီခုဝ်။ အုဝ် မုး ဇဝ်ဖြာ အီ ကာလာင် ဂြုဝ်း မုး ဂြုဝ်း မှာန်၊ တဲး န့ ဘော လိုဝ်း ဆီချာ ဒီ အီ။’”

20 ဇဝ်ဖြာ ဟဲ့ ဟွတ့် ကာလာင် ပါယ် တီ။ အန် ပီ ဝီ တဝ်း၊ “အိုယ် ဘေ ဒူအီ အီဆာရေလ ဘော ဒွန် ခြိုဝ်၊ တဲး ဘေ ဝီ တး ကွယ် ကာဇု။ ဘေ အီ ဟဲ့ လွတ် အာဖေ အာရေ ဒီ ဒူအီ ခဲင် မိူင် ဟဝ်၊ တဲး ဘေ ဝီ တး ဒူင် ကွယ် ဘြိမ် ဘေ။ ဂေ အီ ဒိုဝ်း ဟေ ဘူင် အာရိုပ် ရာင်၊ ဝီ ကြိုပ်၊ ဘော ဂေ အီ ဆာခိုဝ် ဒီ ဇဝ်ဖြာ အီ တူ ပွိုန် ချွတ် ဂေ၊ ဒူအီ ဂေ တီ ဘောကာဂ့လျီတ်၊ ဂေ တူ မိုဝ်း အာငျာန်။

21 တဲး ဘေ တး ကာလာင် လွင် အီ ဒီ ပါယ် နာ အာတ့် ဟာဝ်။ တဲး ဘေ လာယ် ကာမွုန် ဆင်ချာင် လွင် အန် တီ။ တဲး ဘေ ကာလာင် အူ ဆိန့် ဒေါ မွိုန် ကော ဇမ် ဒေါ တီ နီ၊ န့ မိုဝ်း အာဆေ အီ ဟဲ့ ပွိုန် ကာလာင် လွင် အီ ဒီ ဘဲန် နာ အာတ့် ဟာဝ်။ န့ မုး မီ အုဝ် ဇဝ်ဖြာ၊ အီ ဟဲ့ ကာလာင်။ ဒဲင် အုဝ်၊ န့ မိူဝ် တူ မိုဝ်း ဇဝ်ဖြာ ပေါ အူ ကာဒင်။ အုဝ် မုး ဇဝ်ဖြာ အီ မိုဝ်း နဝ်း ဆိူဝ် နဝ်း မှာန်။ အုဝ် မိူဝ် နပ် ဒီ ချွတ် အီ။ ဒဲင် အုဝ် အာဝ် မိုဝ်း ဇဝ်ဖြာ ပေါ အူ ကာဒင်။

22 အိုယ် ဘေ ဒူအီ အီ ကွယ် ဒူင် ဆိူတ် ကာဒါယ်၊ တဲး ဘေ ဝီ တး ချြီ့ အုဝ်၊ တဲး အုဝ် ပွိုန် ဒီ ချွတ် ဘေ။ ခုဝ်၊ အုဝ် မုး ဇဝ်ဖြာ အူ ကာဒင်၊ အာဝ် မိုဝ်း ပေါ အူ ကာဒင်။

23 အုဝ် ဟဲ့ ဒွါ ကာဒိက် ဆတ်ဇာ၊ အုဝ် မိူဝ် တူ ဘျွင် တူ ကာပ့လု ဂြုဝ်း တီ ဒေါ မှဝ်။ ခုဝ်၊ န့ ဟဲ့ မှာန် အာခါခ်ု။ အုဝ် မိူဝ် ဟဲ့ ဟွတ့် ဒိူင် တဝ်း၊ ဒူအီ ဒွန် အီ ဒီ တး ခြိုပ်ခြဝ် ဒီ အာတ့် အုဝ်။ ဘော ဒွန် အီ ဒီ လုဝ် ခမ် ဒီ ကာလာင် လွင် မုး အုဝ် ဇဝ်ဖြာ။

24 ဒွန် အီ ဒီ ဘော တဝ်း လွင် အုဝ်၊ “မီ ဇဝ်ဖြာ နပ် ဒီ အွင်၊ နပ် ဒီ ပဲ တူတ့် ဒွန် မျုဝ်။ မီ အန် ဇဝ် မိုဝ်း ဘော အာဖုင် ဒင်ခုဝ် တာင်။ ခဲ့ ကွယ် ဂေ ရန်ဆူ အန် ဘောကာဂ့လျီတ် ဒီ ဝီ မွှိုမ် ဆာယ် ဒီ အာတ့် အန် ဇဝ်။”

25 ဒူအီ အာမျုဝ် အီဆာရေလ ဘောကာဂ့လျီတ်၊ ဂေ ဒီ ဘော ဝီ အိူပ် မျုက် အန် ဇဝ် ကူပ် ဟဲ့ ညှိုမ် ဘိုင် ဂေ အန် ဇဝ် ဘော ပွိုန် နဝ်း ဆိူဝ် နဝ်း မှာန်။