1 ဇဝ်ဖြာ ဝီ တဝ်း၊ “အိုယ် ဘေ ဒူအီ အာမျုဝ် အာကူပ် အီ မုး ဒဲစေန့် အုဝ် ဘော ဘေ ဒူအီ အီဆာရေလ အီ ဟဲ့ ဘဲန် ဒူအီ ပီ ရဝ်း အုဝ်၊ တဲး ဘေ ထူမ် ဂြုဝ်း အုဝ်။

2 အုဝ် မုး ဇဝ်ဖြာ အီ ဖာန် ဘ့လေး ဘေ။ ဆိန့် အာတ့် ဂွိုတ် ဘေ အုဝ် ဟဲ့ ဘူင် အုန် ဘေ။ အုဝ် မိူဝ် ဒီ စွယ် ဘေ။ ဘေ ခြိုဝ် အာကူပ် အီ မုး ဒဲစေန့် အုဝ် ဘော ဘေ ခြိုဝ် အာယေဆူရူန် အီ မုး ဝီ ပီ ရဝ်း အုဝ်၊ ကွဲ့ တဲး မဲ ယုဝ်။^a

3 ဒီ ကာဒါယ် ကာဟဝ်း၊ အုဝ် ဒီ လှုဝ် အိုမ်။ ဒီ ကာဒါယ် ဟေန့်၊ အုဝ် ဒီ ဝီ တဲး န့ မိုဝ်း အိုမ် လှဲ။ ပါယ် တီ အုဝ် ဒီ ဘော တဲး နဝ်း ဖွိုမ် အုဝ် လိုပ် ခဲင် နဝ်း ဂေ လှုက်လှာန် ဘေ။ အုဝ် ဒီ ဘော မွင့်ကာရာ ဒွါ ဒီ ဂေ ခြိုဝ် ဘေ။

4 ဂေ ဒီ ဘော စေဝ် ဟြေး၊ စေဝ် တာင် ပီ ပြဲ အီ ဟဲ့ ဖဲ အိုမ်၊ တဲး န့ ပီ ဘော ဟေ အာရာပ် အီ ကွယ် ခူပ် ဘာင် ဘ့လဲင်။

5 အူ ဝီ ဒီ ဘော တဝ်း၊ ‘အုဝ် မုး ဒူအီ ပီ အိုပ် ဇဝ်ဖြာ။’ မင် အီ ဘော ဒိုဝ်း စိူဝ် အာကူပ်၊ ဘဲန် စိူဝ် ဂေ။ မင် အီ ဂေ ဒီ ဘော ဒဲမ် ဒီ ဒဲ ဂေ၊ ‘ဇဝ်ဖြာ အီ အိုပ် အုဝ်။’ ဂေ ပီ ဒီ ဝီ တဝ်း၊ ‘အုဝ် မုး အာမျုဝ် အီဆာရေလ၊’ တဲး န့ ဘဲန် စိူဝ် ဂေ။”

6 ဇဝ်ဖြာ အီ မုး ခုန်ဒီခမ် ဂေ ဒူအီ အီဆာရေလ၊ အီ ထုတ် လေး ဂေ ဘော အိုပ် တူတ့် ဒွန် မျုဝ်၊ အန် ပီ ဝီ တဝ်း၊ “အုဝ် မုး ဇဝ် အီ ကာစုး တူတ့် ဒွန် မျုဝ်။ အုဝ် ဒီ ဘော ဘူင် တဲး န့ ကော ဟွတ့်။ ဒဲင် အုဝ် အာဝ် မိုဝ်း ဇဝ်ဖြာ ပေါ အူ ကာဒင်။

7 န့ မိူဝ် တူ မိုဝ်း အာဆေ အီ ပီ အုဝ်။ ဆေ ဘေ ယီ ထာင် ဟဲ့ မိုဝ်း၊ တဲး ဝီ တီ တး ကာလာင် ဒီ အုဝ် လွင် အီ ဒီ ဘုဝ် ဘဲန် နာ အာတ့် ဟာဝ် ဒေါ ညှမ် ဘဲန် အန်။ တဲး အန် ကာလာင် ဒီ အာတ့် လွင် အီ ညှမ် ဘဲန်။ တဲး အန် ကာလာင် ဒီ အုဝ် ဘော လွင် အီ ဟဲ့ ပွုန် တး ဆိန့် ဒေါ ဂုဝ် တဲး န့ ကော ဝီ ဇမ် ဒေါ တီ နီ။

8 အိုယ် ဘေ ဒူအီ ပီ အိုပ် အုဝ်၊ ကွဲ့ တဲး ဘေ ဒီယုး ဒီယေန့် ဒီ ယုဝ်။ အုဝ် ဟဲ့ ဟွတ့် ကာလာင် ဒီ ဘေ လွင် အီ ဟဲ့ ဟွတ့် ဘုဝ် ဘဲန် တီ။ အာဝ် မိုဝ်း ဇဝ်ဖြာ အီ ဆီ ဒီ တာင် လွှိုမ် အုဝ်။ အာဝ် မိုဝ်း အီ ဒီ ပွိုန် ဘိုင် အီ ပီ ဒါအာင် မာဝ်။ အုဝ် မိူဝ် တူ ဒွိုမ် ယိုဝ်။”

9 ဂေ အီ ဘူင် အာရိုပ် ရာင် အာဝ် မိုဝ်း ဒီခုဝ် မာဆေ။ ကြုဝ် ပီ မာတ် ဂေ ဟဲ့ ငဝ်း တာင်၊ ဂေ တူ မိုဝ်း ဒီငဝ်း ဒီခန် မာဆေ။ ဂေ အီ အိူပ် အာရိုပ် ရာင် တီ၊ ဂေ ပီ ဒူအီ ငါယ် အပ်။ ဂေ တူ မိုဝ်း အာငျာန်။ ဂေ ဒီ ဝီ ဆာယ် အီ။

10 ဝီ အီ ဘူင် အာရိုပ် ဇဝ်ဖြာ၊ အီ လှုဝ် ဘော အာရိုပ် ရာင်၊ အန် တူ မိုဝ်း အာဂျိုဝ် မာဆေ။

11 ဘော အန် ဘော ဂိုက် အန်၊ ဂေ ဒီ ဝီ ဆာယ် အီ။ ဂေ ဒီ ဝီ စုဝ်း ဒူင် တျီမ်။ ဂေ အီ ဘူင် အာရိုပ် ရာင်၊ ဂေ တူ မိုဝ်း ဒီခုဝ်။ ဆေ ဂေ တး ကာဇု ဘျ ခဲ့ ကျ ခဲ့ ပီ နပ် ဂေ၊ ဂေ ဒီ ဝီ ယုဝ်၊ ဝီ မွှိုမ် ဆာယ် ဒွန် အီ။

12 ဒါ အီ စိုမ် ဟိန်၊ အန် ဘော ဒိုဝ်း ဒီဂ်ု ဟိန်၊ ဟပ် ခဲင် ငဝ် ကာဆဝ်း။ ဟဲ့ ဟွတ့်၊ အန် ဘော ဝီ ဒိုဝ်း မီဒဲ မး ဟဲန့် ဟဲန့် ဒီဂ်ု ဟိန် တီ၊ တဲး န့ ဝီ ဘဲန် အာရိုပ် ရာင်။ ဒေါ ဘူင် အန် ပါယ် တီ န့ ဘော ဘဲန် ဆီ ဒျီင် အိုမ် ဘော ဘဲန် ကာပြာန့် ဘူမ် ဘော နုန် ကာဆဝ်။

13 ဆေ န့ မုး လက်ဆာမာ၊ အန် မိူဝ် ပါယ် တီ။ အန် ဘော ဒိုဝ်း မဲမီ ဝီ ထတ် ဟေ၊ ဝီ ဒိုဝ်း အိုမ် မိုက်၊ ဒဲမ် ရာင် အာရိုပ်။ ဟဲ့ ဟွတ့်၊ အန် ဝီ ဒိုဝ်း မ့ပ့လုဝ်း ဂေ ကာလွင့် ခြိုင် တာ၊ ဝီ ဘ့လုဝ်း တဲး န့ ဘဲန် ရာင် အာရိုပ် အီမာယ် အီ စှိတ်၊ ဝီ ဘ့လေး အုန် ဒဲင် ယာင်ဖြာ။

14 ဂေ ဘော ဟာဝ် ဒဲပ် တး ဟေ အာရိတ်၊ ဘော ရဝ်း ဘော ဟေ ထာဆူရာ ဘော ဟေ ထေရေပ် အီ ကွယ် ခဲင် ပြဲ။ ဆေ အာဝ် ပါယ် တီ ဂေ ဘော ဆမ် ဟေ န့ကေ၊ တဲး ဂ့လာယ် ဘော စုဝ်း၊ တဲး န့ စေဝ် တာင်။

15 ဒူအီ ဝီ တီ၊ အန် ဘော ဝီ ဘူင် တဲး န့ ဘဲန် ဟေ ဒုဝ့်။ အာဒါ အူ ပွတ်၊ အန် ဒုဝ့် ခဲင် ငဝ်၊ တဲး အန် ဝီ ပွိုန် ဒီ ဝါတ်၊ ပွိုန် ဒီ ဒင် ပီ ဒီ ဟူမ်။ အာဒါ ပေါ အူ ပွတ်၊ အန် ဘော ဝီ ဘူင် တဲး န့ ဘဲန် အာရိုပ် ရာင် ပီ ဒီ ကြိုပ် အန်။

16 အာဒါ အူ ဆိ၊ အန် ဘော ဝီ ဒး ဘဲန် ဟေ ဒုဝ့်၊ တဲး အန် ပွိုန် ဒီ ခုဝ် ယင် ပီ ဒီ ဟာပ် အန်၊ တဲး န့ ကော ဆိန် ဆီချာ။ အန် ဘော ဝီ ဝါတ် ငဝ် တီ ဘော တဝ်း၊ “အာလုဝ်၊ ငဝ် အုဝ် နီ ဟဲ့ ဆီအုန့် ကာဆဝ်၊ ဟဲ့ မွှိုမ် အာခါခ်ု။”

17 ဆိ အီ ဆီ ဂိတ်၊ အန် ဘော ဝီ ဘူင် အာရိုပ် ရာင်။ ဟဲ့ ဟွတ့်၊ အန် ဘော ဝီ ခြိုပ်ခြဝ် ကြိုပ် အာရိုပ် ရာင် ပီ ဘူင် အန် တီ ဘော ဝီ ဆာခိုဝ် ဒီ အာရိုပ် ရာင် တီ တဝ်း၊ “မဲ မုး ဇဝ်ဖြာ အီ အိုပ် အုဝ်။ အုဝ် မှာန့်၊ တဲး မဲ ချွတ် အုဝ်။”

18 ဒူအီ အီ ဘူင် ဇိုဝ် တီ၊ ဂေ တူ မိုဝ်း အာငျာန်၊ အာဝ် ကာလှုး ဒီ နဝ်း ဂေ လွင် ပီ ဘူင် ဂေ တီ။ ဂေ ဘော ကာဘိတ် ငါယ် ဂေ၊ ကွဲ့ တဲး ဂေ ယိုဝ် မာဆေ။ ဂေ ဘော ကာဘိတ် အာငျာန် ဂေ၊ ကွဲ့ တဲး ဂေ နပ် လွင် ဇဝ်ဖြာ။

19 အာဝ် မိုဝ်း ဒူအီ အီ မိုဝ်း အာငျာန် ခေါ အူ ဝီ၊ အီ ဝီ တဲး န့ ကာလှုး ဒီ နဝ်း အန် တဝ်း၊ “အော၊ ဟေ နီ အာဒါ အူ ဆိ အုဝ် ဟဲ့ ဒုဝ့် ခဲင် ငဝ်၊ ဟဲ့ ဝီ ဒိုဝ်း ခါမုန် ဒွင့် ဒဲင် န့ကိုဝ် အန်။ အုဝ် ဟဲ့ ပိင် ဘော ယင် ဝီ ဟာပ် ကော ဖဲ။ ဆေ န့ ပါယ် တီ ဟေ ဆိ အီ ဆီ ကာလူယ် တွိုန် အာဝ် ကာအာပ် ဘူင် အီ မွှိုမ် ကာအိး၊ ဘော အာဝ် ကာအာပ် အုဝ် ဝီ မုတ် ကြိုပ် ဒီ အာတ့် ဟေ ဆိ တီ။”

20 ပီ ဘူင် အန် တီ န့ ဘော ပီ အန် ဟူမ် ကာဝှါင် ပီယေန့်။ အီ ဟဝ် အီ တူ မိုဝ်း နဝ်း ဆိူဝ် နဝ်း မှာန် ဟဲ့ ကာလုဝ်၊ ဘူင် တဲး အန် ကာလိုပ်။ ပါယ် တီ အန် တူ ပဲ ဒီ ချွတ် နဝ်း ဖွိုမ် အန်။ အန် မိူဝ် တူ တဝ်း ခဲင် နဝ်း အန်၊ “အာရိုပ် ရာင် ပီ ဂူင့် အုဝ် ခဲင် ဒဲ ဘ့လာက် အာအး အုဝ် နီ၊ န့ တူ မုး ဇဝ်ဖြာ။”

21 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “အိုယ် ဘေ ဒူအီ အာမျုဝ် အာကူပ် ဘော ဘေ ဒူအီ အီဆာရေလ၊ တဲး ဘေ နုဝ်၊ တဲး ဘေ နပ်၊ ဘေ မုး ဒဲစေန့် အုဝ်။ အုဝ် ဟဲ့ ဖာန် ဘ့လေး ဘေ၊ တဲး ဘေ ဘဲန် ဒဲစေန့် အုဝ်။ အုဝ် မိူဝ် တူ ပိဝ် ဘေ ဒေါ မှဝ်။

22 အုဝ် ဟဲ့ ဟွတ့် ဘျတ် ဝဲန် ပဲ့ ဟဲ့ ကာလိုပ် ဘေ၊ တဲး န့ ဟြာယ် ပီ န့အု။ အုဝ် ဟဲ့ ဟွတ့် ဂဝ်း ဝဲန် မှာပ် ဘေ၊ တဲး န့ ဟြာယ် ပီ အိုမ် ဒီငါန်။ တဲး ဘေ ဝီ တး ဒူင် ကွယ် အုဝ်၊ အုဝ် ဟဲ့ ဟွတ့် ထုတ် လေး ဘေ။”

23 “အိုယ် ဘေ အီ ကွယ် ခဲင် ဂါင်ဟြာဝ်၊ တဲး ဘေ တဝ်း မှုဝ် ကူပ် ဟဲ့ ဒါခိုယ် နဝ်း ဘေ။ ခုဝ်၊ ဇဝ်ဖြာ ဟဲ့ ဘူင် ပါယ် တီ။ ဘေ အီ ကွယ် ခြိုမ် ကာဒါယ်၊ တဲး ဘေ ဒတ် တာင်။ ဘေ နွန် တာင် ဘော ဟေ ဂေ ပြဲ၊ တဲး ဘေ ကာဖြူမ် ဒီ တဝ်း မှုဝ် တာင် တာင်၊ တဝ်း မှုဝ် ဒါခိုယ် ဒါခိုယ် အီ အိူပ် မျုက် ဇဝ်ဖြာ။ ခုဝ်၊ ဇဝ်ဖြာ ဟဲ့ ချွတ် ဂေ ဒူအီ အာမျုဝ် အာကူပ် ဘော ဘျ အာဖုင် ဒင်ခုဝ် အန် ခဲင် မိူင် အီဆာရေလ။”

24 ဇဝ်ဖြာ ပီ ဝီ တဝ်း၊ “အုဝ် မုး ဇဝ်ဖြာ အီ ဟဲ့ ထုတ် လေး ဘေ။ ဆိန့် အာတ့် ဂွိုတ် ဘေ အုဝ် ဟဲ့ ဘူင် ဘေ။ အုဝ် ဘော မုး ဇဝ်ဖြာ အီ ဖာန် ဘ့လေး တူတ့် ဒွန် မျုဝ်။ အုဝ် အူ ကာဒင် နီ အီ ဟဲ့ ပီခြဲန့် ဘ့လေန့် ဂေ ဂါင်ဟြာဝ်။ အုဝ် မိူဝ် ဟဲ့ ဖာန် ဘ့လေး ကာဒါယ် ရာင် အုဝ် အူ ဝီ၊ အာဝ် မိုဝ်း အာဆေ အီ စွယ် အုဝ်။

25 အုဝ် ဘူင် ကွဲ့ တဲး န့ ဘဲန် ပီ ကာလာင် ဂေ ဒူအီ အီ ကာလုဝ် ဒီ ဘျာန် ဂြုဝ်း ဇဝ်ဖြာ။ ဘော ဂေ ဒါ ဘေဒါင်၊ အုဝ် ဝီ တဲး န့ လိုဝ်း ခဲ့ ရိုဝ် ဂေ။ ဘော ဂေ ဒါ ဆာရာ၊ အုဝ် ဘူင် တဲး အာငျာန် ဂေ ဟြာယ် တူတ့်။ ဂြုဝ်း ပီ ကာလာင် ဂေ အီ မိုဝ်း အာငျာန်၊ အုဝ် ဟဲ့ တဲး န့ ဝီ ကာဝှ်ု ကာဝျှီန် တူတ့် ဒွန် မျုဝ်။

26 အုဝ် မိူဝ် ဘူင် တဲး န့ ဘဲန် ပီ ကာလာင် ဂေ ဒဲစေန့် အုဝ်။ အုဝ် ဒီ ဘူင် ဒူပ် ဂြုဝ်း ဂေ ဒူအီ ပီ တိုယ် အုဝ်၊ တဲး ဂေ ကာလာင် ပီ ခြာမ် အုဝ် ဒီ ဘူင်။ လွင် ဂေ ဒူအီ မိူင် ယေရူဆာလဲမ် အုဝ် မိူဝ် ဟဲ့ ကာလာင် တဝ်း၊ ‘ဂေ ဒူအီ ကိူန် ဒီ ဝီ တး ကွယ် ဒီ နီ။’ ဟဲ့ ဟွတ့်၊ အုဝ် ပီ ဝီ ကာလာင် ဘော လွင် မိူင် အီ ကွယ် ခဲင် အိူင် ယူဒါ တဝ်း၊ ‘ဂေ ဒီ ဘော ဝီ မ့ပြာယ်၊ ဝီ ဒဲ မိူင် ဂေ နီ။ အုဝ် မိူဝ် ဒီ တဲး ဂေ ဝီ မ့ပြာယ် အီ ဟဲ့ ဟွတ့် လိုဝ်၊ ဟဲ့ ဟွတ့် ကာပျာတ့်။’

27 အုဝ် မိူဝ် ဟဲ့ စ်ု အိုမ် နမ်မုက်ဆာရာ၊ တဲး အန် ဟိတ် ကာဟဝ်း။ ဘော အိုမ် ဘ့လဲင် ခဲင် မိူင် ဘေ၊ အုဝ် ဒီ တဲး န့ ဟိတ်။

28 အုဝ် ဟဲ့ ကာလာင် လွင် ခုန်ဒီခမ် အာဆာယ်ရတ် တဝ်း၊ ‘မဲ ပီ ဒူအီ အီ ဟျီင် မာဘူ အုဝ်။ မဲ ဒီ ဘော ဘူင် ဒူပ် ခဲ့ ပီ ဆီ တဲး အုဝ် မဲ ဘူင်။ မဲ ဒီ ဘော စ်ု ဂေ၊ တဲး ဂေ ဝီ မ့ပြာယ် မိူင် ယေရူဆာလဲမ်၊ ဝီ ဆမ် အုန် ဘော စေန့် ရွင့် ဟုဝ် ဇဝ်ဖြာ။’”