1 ဒေါ တီ နီ ဇဝ်ဖြာ အီ ဟဲ့ ဒဲ့ ဒူအီ အီဆာရေလ၊ အီ ဟဲ့ ဖာန် ဘ့လေး ဘေ လှုက်လှာန် အာကူပ်၊ အန် ဟဲ့ တဝ်း၊ “ကွဲ့ တဲး ဘေ ယုဝ်။ အုဝ် ဟဲ့ ချွတ် ဘေ။ အုဝ် ဟဲ့ ဒဲ့ စိူဝ် ဘေ တဝ်း၊ ဘေ မုး ဒူအီ ပီ အိုပ် အုဝ်။

2 ဒေါ ကာလုဝ်း ဟာဝ် ဘေ ခဲင် အိုမ် လိုက်၊ အုဝ် ဒီ ကွယ် ရိုမ် ဒူပ် ဘေ။ ဒေါ ကာလုဝ်း ဘေ ဘ့လဲင် အိုမ် တာင်၊ အိုမ် မိူဝ် တူ မ့ပုန် ဘေ။ ဒေါ ညဲတ့် ဟာဝ် ဘေ ခဲင် ငဝ်၊ ဘေ မိူဝ် တူ ပါယ် မှဝ်၊ တူ ဘ့လုး။ ပ့လဲ့ ငဝ် မိူဝ် တူ လှာ့ တူ ကာဆိုမ် ဘေ။

3 ခုဝ်၊ အုဝ် အီ မုး ဇဝ်ဖြာ၊ အုဝ် မုး ဇဝ်ဖြာ ပီ ကြိုပ် ဘေ၊ ဇဝ်ဖြာ အီ အိုပ် ဒူအီ အီဆာရေလ အီ ဆီငါ ဘွတ်၊ ဇဝ်ဖြာ အီ ချွတ် ဘေ။ အုဝ် မိူဝ် ဒိုဝ်း ဒူအီ ခဲင် မိူင် အဲဂိုပ်၊ တဲး ဂေ ခမ် ကာဒါင် ဘေ၊ တဲး အုဝ် ထုတ် လေး ဘေ။ အုဝ် ဟဲ့ ဒိုဝ်း ဘော ဒူအီ ခဲင် မိူင် ကူဆာ ဘော ခဲင် မိူင် ဆေဘာ၊ တဲး ဂေ ဝီ ကာဒါင် ဘေ၊ ဝီ လာယ် ကာရဝ်း ဂါယ် ဘေ။

4 ကူပ် ဟဲ့ မိုဝ်း ဘေ ဒီငဝ်း ဒီခန်၊ ဟဲ့ မိုဝ်း ဆာရေ ကာဆိူဝ် အုဝ်၊ အုဝ် မိူဝ် ရွက့် ဘေ။ အုဝ် မိူဝ် ဟဲ့ ဒိုဝ်း ဒူအီ ကိူန် ဝီ လာယ် ကာရဝ်း ဂါယ် ဘေ။ အုဝ် ဟဲ့ ဝီ ဒိုဝ်း အာဆာက် ဒူအီ အာမျုဝ် ဟဝ် ဝီ ကာရဝ်း အာဆာက် ဘေ။

5 ကွဲ့ တဲး ဘေ ယုဝ်၊ အုဝ် ကွယ် ရိုမ် ဒူပ် ဘေ။ ဒူအီ ဘေ အီ ကွယ် တူင့် ကာဆဝ်၊ အီ ကွယ် နာ လေး ဆီငဲ ဘော ဂေ အီ ကွယ် ဘ့လာက် နာ ဂေတ့် ဆီငဲ၊ အုဝ် ဒီ ဝီ ဒိုဝ်း တး ဂေ၊ တဲး ဂေ ဝီ ကွယ် ခဲင် မိူင် ဂေ။

6 အုဝ် ဒီ ကာလာင် ဒီ ဂေ ဒူအီ အီ ကွယ် ဘ့လာက် နာ ကွာ၊ တဲး ဂေ ဘ့လေး ဝေန့် ဘေ။ အုဝ် ဒီ စ်ု ဘော ဂေ အီ ကွယ် ဘ့လာက် နာ တေတ့်၊ ကွဲ့ တဲး ဂေ ခြဲ ဂွန် အုဝ်။ ဂေ ဒူအီ အာမျုဝ် အုဝ် အီ ကွယ် ခဲင် မိူင် အီ တူင့် ကာဆဝ် ဘော ဂေ အီ ကွယ် ဒူင် ဆိူတ် ကာဒါယ် ဒွန် နာ ဒွန် ပ့လုဝ့်၊ အုဝ် ဒီ ဝီ ဒိုဝ်း တး တူတ့် ဂေ။

7 ဂေ ဘောကာဂ့လျီတ် မုး ဒူအီ အာမျုဝ် အုဝ်။ အုဝ် ဟဲ့ ဖာန် ဘ့လေး ဂေ ဒွန် အီ၊ တဲး ဂေ ဘဲန် အီ ဘျ အာဖုင် ဒင်ခုဝ် အုဝ်။”

8 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “တဲး ဘေ ဒဲ့ ဂေ ဒူအီ ပီ အိုပ် အုဝ်၊ တဲး ဂေ တး ကာဇု ဒူင် ဆုင်ဖျာတ် အီ ဒါရာ။ ဂေ အီ မိုဝ်း ငါယ် ယီ တူ လိုဝ်း၊ ဂေ အီ မိုဝ်း ဟျုဝ့် ယီ ကာအာဝ်။ တဲး ဂေ တး ဒီ တီ။

9 တဲး ဒူအီ ဘောကာဂ့လျီတ် တး ကာဇု၊ တဲး အေ ပွိုန် ဒီ ဇဲတ်ဆေ ဒီ ယွတ် အာမူ ဂေ၊ တဲး အေ နပ်၊ ကာတဲ ဂေ တီ န့ မိုဝ်း ဝီ မှဝ် အီ နပ် ဒီ ကာလာင် လွင် အီ ဒီ ဘုဝ် ဘဲန် နာ အာတ့် နီ ဟာဝ်။ န့ မိုဝ်း ဝီ မှဝ် အီ နပ် ဒီ ခဲ လွင် အီ ဟဲ့ ဟွတ့် ပွုန် တး နာ ပန် နီ။ တဲး ဂေ ဟြေတ့် တး ဘော အီ နပ် ဒီ ကာလာင် လွင် ပီ ခဲ ဂေ၊ ယုဝ် ဟဲ့ မုး တူ မုး။ တဲး အေ ထူမ် ဂြုဝ်း ဂေ အီ ဟဲ့ တဝ်း၊ ဟဲ့ မုး ဂြုဝ်း မုး ဂြုဝ်း မှာန်။

10 အိုယ် ဘေ ဒူအီ အီဆာရေလ၊ ဘေ ဟဲ့ ဘဲန် ဆက်ဆေ လွင် အုဝ်။ အုဝ် ဟဲ့ ရဝ်း ဘေ၊ တဲး ဘေ ဘဲန် ဒဲစေန့် အုဝ်။ တဲး ဘေ နပ် ဆီချာ အုဝ် မုး ဇဝ်ဖြာ အီ တဲး ဘေ ညှိုမ် ဘိုင် မီ အုဝ်။ ဒဲင် အုဝ်၊ အာဝ် မိုဝ်း ဇဝ်ဖြာ ပေါ အူ ကာဒင်။ ဒီ အာတ့် အုဝ် မိူဝ်၊ န့ တူ ဒွိုမ် မိုဝ်း။ ဝါယ် အုဝ် မိူဝ်၊ န့ တူ ဝီ မိုဝ်း ခေါ အူ ကာဒင်။

11 န့ မိုဝ်း မီ အုဝ် အီ မုး ဇဝ်ဖြာ။ ဒဲင် အုဝ် အူ ကာဒင် နီ၊ အာဝ် မိုဝ်း အာဆေ အီ ပွိုန် ချွတ် ဒူအီ။

12 အုဝ် ဟဲ့ ဒွိုမ် ခဲ၊ ဒွိုမ် ကာလာင် လွင် အန် တီ ဒီ ဘေ။ အုဝ် မိူဝ် ဟဲ့ ချွတ် ဘေ။ ဇဝ်ဖြာ ပီ ကြိုပ် အီ ဟဝ် ဒွန် မိူင်၊ ဂေ တူ ဒွိုမ် ဘူင် ပါယ် တီ။ ဘေ ဟဲ့ နပ် ဒီ ကာလာင် လွင် ပီ ဘူင် အုဝ် တီ။ ဘေ ဘော နပ် ဆီချာ အုဝ် မုး ဇဝ်ဖြာ။

13 ဆိန့် ဒေါ ဂုဝ် အန် အုဝ် ဇဝ်ဖြာ ဟဲ့ ကွယ်။ န့ မိူဝ် တူ မိုဝ်း အာဆေ အီ ပွိုန် ဖာတ် ဒိုဝ်း ဂေ ဒူအီ ပီ အိုပ် အုဝ် ဒီ အုဝ်။ ပီ ဘူင် အုဝ်၊ အာဝ် မိုဝ်း အာဆေ အီ ပွိုန် ခြဲ။”

14 ဇဝ်ဖြာ အီ ဆီငါ ဘွတ်၊ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အီ မုး အန် ဇဝ် အီ ချွတ် ဂေ၊ အန် ဟဲ့ တဝ်း၊ “ကူပ် ရွက့် အုဝ် ဒီ ဘေ၊ အုဝ် တိုယ် ဒါ ဆိုက် ဟာဝ် ဒီ မိူင် ဘာဘဲ၊ တဲး ဂေ ဒူအီ ခဲင် မိူင် တဝ် ဟာဝ်။ ဂြုဝ်း အီ ဘျုဝ် ဒါခိုယ် ပီ ကာလာင် ဂေ ဒူအီ ကာလာဒေ တွိုန်၊ န့ ဒီ ဝီ ဘဲန် ဂြုဝ်း ယာမ်၊ ဂြုဝ်း ငှုန်။

15 အုဝ် မုး ဇဝ်ဖြာ အီ ဆီငါ ဘွတ်။ အုဝ် ဟဲ့ ဖာန် ဘ့လေး ဘေ ဒူအီ အီဆာရေလ။ အုဝ် မုး ဘော ခုန်ဒီခမ် အီ အိုပ် ဘေ။” ခဲ့ တီ ဇဝ်ဖြာ ဟဲ့ ကာလာင်။

16 ဇဝ်ဖြာ ဟဲ့ ဘူင် တဲး န့ မိုဝ်း န့တေန့် ခဲင် အိုမ် နမ်မုက်ဆာရာ၊ တဲး န့ ပွိုန် ကာလုဝ်း ဟာဝ် ခဲင် အိုမ် အီ ဇဲဝ် အီ ဇုး ဟဲန့် ကာဆဝ်။

17 ဘော ဒါ ဆိုက် အီ ပဝ့် လက်လဝ် ဘော ဒါ ဆိုက် အီ ပဝ့် မင်ပြွင့်၊ အန် ဇဝ် ဟဲ့ ဘူင် တဲး ဂေ လိုဝ် စှိုမ် တူတ့်။ ဂေ ဟဲ့ ဟွတ့် ကေး၊ ဂေ မိူဝ် တူ ပွိုန် ဒီ ဝီ ယိတ့် ဒေါ မှဝ်။ ဂေ ဟဲ့ ယမ် ဟြာယ် ပီ အီ ဘျတ် ယတ် န့ကိုဝ် ငဝ် ဒေန်။

18 မာလဲ၊ ဇဝ်ဖြာ ပီ ဝီ တဝ်း၊ “တဲး ဘေ ပိဝ် အီ ဟဲ့ ပွုန် အာတ့် နီ။ ကွဲ့ တဲး ဘေ နုဝ် ပီ ပါယ် ဒေါ မွိုန် တွိုန်။

19 တဲး ဘေ ဝီ ယွတ် အီ ကာမာယ် ပီ ဒီ ဘူင် အုဝ်။ န့ ဆီလွ့ ဘဲန် ဒေါ တီ နီ၊ တဲး ဘေ ယိုဝ်။ အုဝ် ဘူင် တဲး န့ မိုဝ်း န့တေန့် တာင် ခဲင် ပြဲ ကာဟဝ်း၊ တဲး န့ ဝီ မိုဝ်း ဘော အိုမ် ဘ့လဲင် အိုမ် လှဲ ခဲင် ဒူင် ဂ့လင်။

20 ခဲ့ ကွယ် ဂေ မာဒုဝ် ပြဲ၊ ဂေ ဒီ ရုဝ်ဆေ အုဝ်။ မာဆုဝ် ပြဲ ဘော မာဆိမ် ကာဟာတ့်၊ ဂေ ဟဲ့ နပ် ဒီ ဝီ ကာလာင် ဂုင် ဂေဇူ ဒီ အုဝ် ကူပ် ဟဲ့ တဲး အုဝ် မိုဝ်း အိုမ် ကိူန် ခဲင် ပြဲ တာင် တီ၊ တဲး ဘော ဂေ ဒူအီ ပဲ့ ဟဲ့ ရဝ်း အုဝ်၊ အီ မုး ဒူအီ အာမျုဝ် ပီ အိုပ် အုဝ် ပွိုန် ဒီ ဒျီင် ဖဲ။

21 ဒူအီ ပဲ့ ဟဲ့ ရဝ်း အုဝ် တီ၊ အုဝ် ဟဲ့ ဖာန် ဘ့လေး ဂေ၊ တဲး ဂေ ဘဲန် ဒူအီ အီ ကာဒိုက် ကာဒဝ့် ဒီ အုဝ်၊ တဲး ဂေ ဘျ ဂုင် ဂေဇူ အုဝ် ဒီ အီ ဟဝ်။”

22 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “အိုယ် ဘေ ဒူအီ အီဆာရေလ၊ ဘေ တူ ဟြေတ့် အုဝ်။ ဘေ မိူဝ် ဟူ ညိုင်ရာင် ယိုဝ် ဒီ အုဝ်။

23 ဘေ မိူဝ် အာဝ် ဟူ ဒိုဝ်း ဂွန် မာဘူ လှူ ဒီ အုဝ်၊ တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်။ ဘေ မိူဝ် အာဝ် ဟူ လှူ ပီ ဒီ လှူ၊ တဲး ဘေ ပွိုန် ဒီ အိူပ် မျုက် အုဝ်။ အုဝ် မိူဝ် တူ ဒမ် တူ မှာန့်၊ တဲး ပီ လှူ ဘေ ဒီ အုဝ် ဘဲန် ဂါန် စန် ဒီ ဘေ။ အုဝ် မိူဝ် တူ မှာန့် ကာညန် လေဘူန် ဒီ ဘေ၊ တူ ဆီ တဲး န့ ဒုက် န့ ညှာပ် ဒီ ဘေ။

24 ဘေ မိူဝ် တူ ဒိုဝ်း ရွိုန် ဘေ၊ ဟာဝ် စိုဝ်း ဒီမှာယ်၊ လှူ ဒီ အုဝ်။ ဘေ မိူဝ် တူ ဒွါ ဘျြီင် ဒုဝ် ပီ လှူ ဘေ၊ တဲး န့ လဝ့် နဝ်း အုဝ်။ ဘေ ယီ ဝီ ဒွါ မှာပ် ဘေ ဒီ အုဝ်၊ ဝီ ဘူင် တဲး န့ ဝီ စန် ဒီ နဝ်း အုဝ်။ ဘေ ယီ ဝီ ဒိုဝ်း ဒွါ ပီ ဘူင် ဘေ အီ တူ မွှိုမ် အီ ဟာယ် ဒီ အုဝ်၊ တဲး န့ ဝီ ဘဲန် ဒုက် ဘဲန် ညှာပ် ဒီ နဝ်း အုဝ်။

25 ပီ ဘော ဟဲ့ ပါယ် တီ မိူဝ်၊ အုဝ် အီ မုး ဇဝ်ဖြာ ဒီ ဘျတ် ဝဲန် မှာပ် ဘေ။ အုဝ် ဘူင် ပါယ် တီ ကူပ် အိုင် အုဝ် ဒီ ဘူင်။ အုဝ် မိူဝ် တူ နုဝ် မှာပ် ပဲ့ ဟဲ့ ဘူင် ဘေ တီ။

26 တဲး ဘေ ကာလာင် ဒီ အုဝ် လွင် အီ ဟဲ့ ပွုန် တး၊ တဲး အေ လာယ် ကာလာင်၊ တဲး ဘေ ဘျ ဒီ အုဝ် လွင် တူ မိုဝ်း ဘေ မှာပ်။

27 ဂုန့် ဒင် ဘေ ဝီ ဒေါ ဂုဝ်၊ ဂေ ဟဲ့ ဟွတ့် ဘူင် အီ တူ မွှိုမ်။ ဂေ ဒါ ဆာရာ ဘေ မိူဝ်၊ ဟဲ့ ဟွတ့် ကာဘး ဒီ အုဝ်။

28 ခုဝ်၊ အုဝ် ဟဲ့ ဘူင် တဲး ဂေ ဒါ ကာညာ ဘေ အီ အိုပ် ခဲင် ဒူင် ဆီငါ ဘွတ် ဝီ စှိုမ် ဆာရေ။ ကူပ် န့ ပါယ် တီ အုဝ် ဟဲ့ တဲး ဂေ ဒူအီ အာမျုဝ် အာကူပ် ဘဲန် ပီ ဒိူင် အီ။ အုဝ် မိူဝ် ဟဲ့ တဲး ဂေ ဒူအီ အီဆာရေလ ဘဲန် ပီ နဲန အီ ဟဝ်။”