1 ဇဝ်ဖြာ ဝီ တဝ်း၊ “တဲး ဘေ ယွတ် ဒူအီ ပီ ဆုတ့် ပီ စ်ု အုဝ်၊ ဒူအီ ပီ စွယ် အုဝ်။ အန် ဘော မုး ဝီ ပီ ရဝ်း အုဝ်၊ အီ ဟဲ့ လဝ့် နဝ်း အုဝ်။ အုဝ် ဟဲ့ တဲး နဝ်း ဖွိုမ် အုဝ် ကွယ် ခဲင် နဝ်း အန်။ အန် ဒီ ဘော တဲး ဂေ ဒူအီ အာမျုဝ် ဟဝ် နပ် ဒါရာ အီ မုး အီ မှာန်၊ ဘော ဆုင်ဖျာတ် အာမူ ဂေ၊ တဲး န့ ကာရမ်။

2 အန် တူ ဒတ် တာင်၊ တူ ဆီနန် ဆီနိူင်။ အန် မိူဝ် တူ ကာလာင် ဂြုဝ်း တာင် ဒီ ဂ့လ။

3 ဆေ န့ မိုဝ်း ဒူအီ အီ ပီ မဲအော အီ ဟဲ့ ရိန် ဒီ ကာဘက်၊ အန် မိူဝ် တူ ဝီ ကာဘက် တဲး န့ ကာဒတ်။ ဘော ဆဲ ဂေ ပီ ငဝ် အွမ် အီ ဟဲ့ န့ကိုဝ် ရိန် ဒီ ယတ်၊ အန် မိူဝ် တူ ဝီ ဘျတ်၊ တဲး န့ ယတ်။ အန် ဒီ ဆုင်ဖျာတ် ဒါရာ၊ တဲး န့ လိုဝ်း နာ မုး နာ မှာန်။

4 ဟဲန့် အန် မိူဝ် တူ နပ် ဒီ ယူမ်။ နဝ်း အန် မိူဝ် တူ လိုဝ်၊ တဲး န့ ကော ဇမ် ပန် ဒီ နပ် ဂေ ဒူအီ ဘော ကာဒါယ် ဒါရာ အန်။ ဂေ ဒူအီ အီ ကွယ် တူင့် ခဲင် ဂုန် အိုမ်၊ ဂေ ဒီ ဘော နှဝ့် တဲး ဂေ နပ် ဒါရာ အန်။”

5 ဇဝ်ဖြာ အီ ဟဲ့ ဖာန် ဘ့လေး ဂါင်ဟြာဝ် ဘော ဒိူတ် တဲး န့ ကာခြဲန့်၊ အန် ဘော ပီဝဝ်း ကာဒါယ် ဘော ပီဘြဲ အာမျုဝ် အီ ကွယ် ဒဲင် ကာဒါယ်။ အန် ဘော တဲး ဂေ ဒူအီ ပီ အိုပ် အန် မိုဝ်း အာဆာက် ဘော မိုဝ်း ဖွိုမ်။ ဇဝ်ဖြာ တီ ပီ ဝီ ကာလာင် ဒီ ဒဲစေန့် အန် တဝ်း၊

6 “အုဝ် ဟဲ့ ဒဲ့ မဲ၊ တဲး န့ ဒူပ် နဝ်း ဆိူဝ် နဝ်း မှာန် အုဝ်။ အုဝ် ဒီ ပါ ဒဲ မဲ၊ တဲး မဲ ပွိုန် ဒီ ဟာဝ် ဒါခိုယ်။ အုဝ် ဒီ တဲး မဲ ဘဲန် ဝီ ပီ ကာဆဲန့် အုဝ် ဒီ ဒွါ ဒီ ဒူအီ ကိူန်၊ တဲး မဲ ပီ ဘ့လာင် ဒီ ဒူအီ အာမျုဝ် ဟဝ်။

7 တဲး မဲ ဝီ ပီဘ့လာင် ငါယ် ဂေ အီ ဟဲ့ အပ်၊ ဝီ ချွတ် လေး ဂေ အီ ကွယ် ခဲင် အပ် ဝွင့် ဘော ဂေ အီ ကွယ် ခဲင် ကာပိုမ်။

8 အုဝ် မုး ဇဝ်ဖြာ။ ပွုန် ဘော အာဖုင် ဒင်ခုဝ် အုဝ်၊ အုဝ် မိူဝ် တူ ဒွါ ဒီ ဇဝ် ဘဲန် ကာဒင် ဘဲန် ကာဒင်။ အုဝ် မိူဝ် တူ ဒွါ အာဖုင် ဆာရေ အုဝ် ဒီ အာရိုပ် ရာင်။

9 လွင် ပဲ့ ဟဲ့ ဒွိုမ် ကာလာင် အုန် အုဝ် အာတ့် နီ ဟဲ့ ဟွတ့် ဘဲန် ဒေါ တီ နီ။ ဒေါ တီ နီ အုဝ် ပီ ဒီ ဝီ ကာလာင် ဒီ ဘေ အီ ကာမာယ် အာတ့် ဘုဝ် ဘဲန် အန်။”

10 တဲး ဘေ တဝ်း မှုဝ် ကာမာယ် အီ အိူပ် ဇဝ်ဖြာ။ ဘေ အီ ကွယ် ဒူင် ဆိူတ် ကာဒါယ်၊ တဲး ဘေ တဝ်း မှုဝ် အီ အိူပ် အန် ဇဝ်။ ဘေ အီ ကာလုဝ်း အိုမ် နမ်မုက်ဆာရာ ဘော အီ ကွယ် ခဲင် အိုမ် နမ်မုက်ဆာရာ ဒွန် မျုဝ်၊ ဘေ အီ ကွယ် ခဲင် ဂုန် အိုမ်၊ တဲး ဘေ ဘောကာဂ့လျီတ် တဝ်း မှုဝ် အီ အိူပ် အန် ဇဝ်။

11 ဘေ အီ ကွယ် ခဲင် ပြဲ ကာဟဝ်း ဘော ခဲင် မိူင် ဒွန် မိူင်၊ တဲး ဘေ တဝ်း မှုဝ် တာင်၊ အိူပ် ဇဝ်ဖြာ။ တဲး ဘေ အီ ကွယ် ခဲင် ရဝ် ဒူအီ ကေဒါ အိူပ် အန် ဇဝ်။ တဲး ဘေ အီ ကွယ် ခဲင် မိူင် ဆေလာ တဝ်း မှုဝ် တာင် တာင် ကူပ် ဟဲ့ ဘျုဝ် ဒါခိုယ် ဘေ။ တဲး ဘေ တဝ်း တာင် ဒဲင် နွန် စာ ဒွန် ပ့လုဝ့်။

12 တဲး ဘေ အိူပ် မျုက် ဇဝ်ဖြာ၊ တဲး အာဖုင် ဒင်ခုဝ် အန် ဇဝ် လိုဝ်း ခဲင် ဂုန် အိုမ်။

13 ဇဝ်ဖြာ ဒီ လေး ဟာဝ် ပီ ဂိန့် ဆိုက် အီ ကျ ဒီ ကာဂုဝ်း။ အန် ဇဝ် ဘော ကာဆုး နဝ်း အန် ပီ ဒါ ဆိုက် အီ ဘူင် တဲး ဂေ မိုဝ်း နဝ်း ယ။ ဟဲ့ ဟွတ့်၊ အန် ဘော ဝီ ပဲ ရန်ဆူ အန်။

14 ဇဝ်ဖြာ ပီ ဝီ တဝ်း၊ “အုဝ် ဟဲ့ အူတ် နဝ်း၊ အူတ် ဖွိုမ် အုဝ်။ ဟဲ့ လှေန့် ကာဆဝ် အုဝ် တူ တဝ်း မာဆေ၊ ဟဲ့ ကွယ် နှိမ် နှိမ်။ ဒေါ တီ နီ အုဝ် ဒီ ဒတ် ရျီင် ပီ အီဘိုန့် အီ ဟဲ့ ဝတ့် ဆဝ် ဒီ ဂွန်။ အုဝ် ဒီ ဘူင် တဲး န့ ကာပျာတ့် လိုဝ် တူတ့် အူ ဇေန့်။

15 အုဝ် ဒီ ဘူင် တဲး နွန် အီ တျီ့ အီ တာင် ရာမ် တူတ့်။ အုဝ် ဒီ ဘူင် တဲး ပြဲ ဂေ ပေတ့် ဘော ဟေ ဂေ ဟြင် ဟျီ့ ကာဟဝ်း တူတ့်။ အုဝ် ဒီ တဲး ဒီလယ့် ဘ့လဲင် အိုမ် ဝီ ဘဲန် တူတ့် ကာဒါယ် ဟေန့်။ ဘော အိုမ် ဒိုင် ဒီ ဟိတ် တူတ့်။

16 အုဝ် ဒီ တိုယ် ဂေ ဒူအီ ငါယ် အပ်၊ ဝီ ဟာဝ် ဒူပ် န့တေန့် ဒူင် တူ ဒွိုမ် ဟာဝ် ဂေ။ အုဝ် ဒီ တဲး ဒူင် အပ် ဝွင့် ဝီ ဘဲန် ဒူင် ဘ့လာင်။ ဒူင် ဒီဂ့လုဝ့် ဒီဂ့လျီမ်၊ အုဝ် ဒီ တဲး န့ ဝီ ဘဲန် ဒူင် ဂ့လင် ဒီ အာတ့် ဂေ။ ပါယ် တီ အုဝ် ဒီ စွယ် ဂေ။ အုဝ် တူ ပိဝ်၊ တူ ဝဲန် ဂေ ဒေါ မှဝ်။

17 ဂေ အီ ဘိုင် အီ ကြိုပ် အာရိုပ် ရာင် ဘော ဂါဝ် ပွုန် အာရိုပ် တီ တဝ်း၊ ‘န့ မုး ဇဝ်ဖြာ ပီ ကြိုပ် ယေ၊’ ဂေ ဒီ လုဝ် တဝ် ရန်ဆူ ဂေ ဘော စှိုမ် ဆာရေ။”

18 ဟဲ့ ဟွတ့်၊ ဇဝ်ဖြာ ဝီ တဝ်း ဒီ ဒူအီ အီဆာရေလ၊ “အိုယ် ဘေ ဒူအီ အီ ဟျုဝ့် ကာအာဝ်၊ တဲး ဘေ ထူမ်။ ဘေ ဒူအီ ငါယ် အပ်၊ တဲး ဘေ ယွတ်၊ တဲး ဘေ ယိုဝ်။

19 အာဆေ မုး ဒူအီ ငါယ် အပ်။း န့ မုး မီ ဒဲစေန့် အုဝ် အီ ငါယ် အပ်။ န့ မိူဝ် တူ မိုဝ်း အာဆေ အီ ဟျုဝ့် ကာအာဝ် ပီ ဒူအီ ပီ ရဝ်း ပီ တိုယ် အုဝ်။ အာဆေ ငါယ် အပ် ပီ ဒူအီ အီ ဟဲ့ အာပ် ဒုဝ် ဘူင့် အန် ဒီ အုဝ်။း အာဝ် မိုဝ်း အာဆေ ငါယ် အပ် ပီ ဒူအီ ပီ ဆုတ့် ပီ စ်ု အုဝ် တွိုန်။

20 အိုယ် ဘေ ဒူအီ အီဆာရေလ၊ ဘေ ပီ ဘော ဟဲ့ ယိုဝ် ကိူန် ကာဆဝ် မိူဝ်၊ ဘေ ယီ တူ တဲး န့ လိုပ် ခဲင် နဝ်း ဘေ။ ဘေ ပီ ဘော ဟဲ့ မိုဝ်း ဟျုဝ့် အီ နပ် ဒီ ထူမ်၊ န့ ယီ တူ ကာလှုး ဒီ နဝ်း ဘေ။”

21 ကူပ် မိုဝ်း ဇဝ်ဖြာ နဝ်း ဆိူဝ် နဝ်း မှာန်၊ အန် အိုင် ကာဆဝ် ဒီ တဲး ဒူအီ ရုဝ်ဆေ ဒါရာ အန် ဘော နပ် ခဲ့ တာင် အာဖုင် ဒင်ခုဝ် အန်။

22 မာလဲ၊ ဂေ ဒူအီ ပီ အိုပ် အန် တီ၊ ဂေ ဝီ ဘဲန် ဒူအီ ပီ ပျာတ့် ပီ ဇူန် အီ ဟဝ်။ အီ ဟဝ် မိူဝ် ဒီ ဟာဝ် အုန်၊ ဟာဝ် ခြွင့် ဂေ ခဲင် ကာဒဝ် ကာဒါယ် ဘော ခဲင် ကာပိုမ်။ ဂေ ကာဒုး ဒီ အီ ဟဝ် ပါယ် တီ မိူဝ်၊ န့ တူ မိုဝ်း အာဆေ အီ တး စွယ်၊ တး ချွတ် ဂေ။

23 ကာတဲ ဘေ အာဆေ ဒီ ထူမ် ဂြုဝ်း တီ ဒေါ တီ နီ။း အာဆေ ဒီ ယိုဝ် ဒီ နုဝ် လွင် အန် တီ ဆေ န့ ဒီ ဘုဝ် ဘဲန် ပါယ် တီ နာ အာတ့် နီ ဟာဝ်။း

24 အာဆေ အာပ် ဒူအီ အီဆာရေလ ဒီ ဒူအီ အီ တး ပျာတ့်၊ တး ဇူန် ဂေ။း န့ မုး ဇဝ်ဖြာ ပဲ့ ဟဲ့ လုတ့် ဂေ အီ အာပ် ဂေ ကူပ် တူ ဘူင် ဒူပ် ဂေ ဒါရာ အန် ဇဝ် ခဲ့ ကာအာပ် ဒူပ်။ ဂေ မိူဝ် တူ ဒွိုမ် ထူမ် ဒါရာ အန် ဇဝ် ခဲ့ ကာအာပ် ထူမ်။

25 ကူပ် န့ ပါယ် တီ အန် ဇဝ် ရူ ကာဆဝ် ဒီ ဂေ။ ဂေ မိူဝ် လုဝ် ခမ် ပီ ဘူင် ဒါ ဆိုက် အီ ဟာယ် ကာဆဝ်။ နဝ်း ရူ အန် ဇဝ် ဟဲ့ ပီ ငဝ် ကာဆိုမ် ဂေ ဒူအီ အီဆာရေလ။ မာလဲ၊ န့ ယီ တူ ကာလှုး ဒီ ဂေ လွင် အန် ဇဝ်ဖြာ ဘူင် ဘဲန် ပါယ် တီ ဒီ ဂေ။ ဂေ တူ တဲး န့ ဘျွင် နဝ်း ဂေ။