1 ဇဝ်ဖြာ ဝီ တဝ်း၊ “အိုယ် ဘေ ဒူအီ အီ ကွယ် ခဲင် ဂုန် အိုမ်၊ တဲး ဘေ ကွယ် ယေန် ဘော ထူမ် ဂြုဝ်း အုဝ်။ တဲး ဂေ အာမျုဝ် ဒူအီ ဒဲင် ကာဒါယ် ဘူင် တဲး န့ ဘဲန် ပ့လူမ် ဘဲန် ဟဲန့် ကာမာယ် ဒီ ဂေ။ တဲး ဂေ ပွိုန် ဒီ ကာလာင် လွင် အာမူ ဂေ။ တဲး ဂေ တး တဲး အေ ဆုင်ဖျာတ် အာဆေ ဟဲ့ မှာန် တူ မှာန်။

2 အာဆေ ဟဲ့ ဒဲ့ ဒူအီ အူ ဝီ အီ ဟဲ့ တး ဘ့လာက် နာ လေး ဆီငဲ။း ဇဝ်ဖြာ ဟဲ့ တဲး အန် ဘဲန် ဒဲစေန့် အန် အီ မိုဝ်း နဝ်း ဆိူဝ် နဝ်း မှာန်။ အန် ဇဝ် ဟဲ့ တဲး အန် ပဲ တူတ့် ခဲ့ ကွယ် ခုန်ဒီခမ် အီ အိုပ် ဘဲန် မိူင် ဘဲန် မိူင်။ မာပွါ့ လာင် အန် မိူဝ် ဟဲ့ ဒဲပ် ယမ် ဂေ၊ တဲး ဂေ ဝီ ပီ ကာပုး။ ဘ့လာ အ အန် မိူဝ် ဟဲ့ ဘူင်၊ တဲး ဂေ တဝ် ကာယဝ်း ပီ ဒျီပ် ငှုဝ်။

3 အန် ဘော ခုင်ခြး ဒူပ် ဂေ။ အန် ဘော လွတ် အာဖေ အာရေ ဒွန် မျုဝ်။ ပီ ပါယ် အန် ဒီ ခြန်၊ ပ့လဝ် အန် ကော နှဲန် ဟူ ဇာပ် ဒီ ကာဒါယ်။^a

4 အာဆေ ဟဲ့ ဘူင် တဲး န့ ဘုဝ် ဘဲန် ပါယ် တီ။း အာဆေ ဟဲ့ ဒဲ့ ဂေ ဒူအီ ဘဲန် စုဝ် ဘဲန် စုဝ် တး ဒီ အန် ဆိန့် ဒေါ ဂုဝ် အန်။း အုဝ် ဇဝ်ဖြာ ဟဲ့ ကွယ် ဒီ တီ ဆိန့် ဒေါ ဂုဝ် အန်။ အုဝ် ပီ ဒီ ဝီ ကွယ် ဒီ တီ၊ တဲး န့ ကော ဇမ် ပန် ဒီ ကာဒဲ့ ဆိူတ်။

5 ဂေ ဒူအီ အီ ကွယ် ခဲင် ဂုန် အိုမ်၊ ဂေ ဟီ ယိုဝ် ပီ ဘူင် အုဝ် တီ၊ ဂေ ဒီ ဘော ယုဝ် ဒီယုး ဒီယေန့်။ ဂေ အီ ကွယ် ဒူင် ဆိူတ် ကာဒါယ်၊ ဂေ ဒီ ဝီ တး ကွယ် ကာဇု ကာဒိုမ်၊ တး ကွယ် ချြီ့။

6 ဂေ ဒွန် အီ ဘော နပ် ဒီ လာယ် စွယ်။ အူ ဝီ ဘော နပ် ဒီ ကာလာင် ဒီ ဘီနွင် အန် တဝ်း၊ ‘တဲး မဲ မိုဝ်း ပ့လူမ် မိုဝ်း ဟဲန့်။’

7 ဒါ လက်ဆာမာ ဘော ဝီ ကာလာင် ဒီ ဒါ အီ စိုမ် ခြိဝ်၊ တဲး အန် မိုဝ်း နဝ်း ကြွိုမ် နဝ်း တာင်။ ဒါ အီ ဖွတ်ဖ အာရိုပ် ရာင် တဲး န့ ကာလ၊ အန် ဘော နပ် ဒီ ဒွါ ပ့လူမ် ဂေ ဟဲန့် ဒီ ဝီ အီ စိုမ် ဟိန်။ အန် တဝ်း၊ ‘ပီ ဘူင် မဲ၊ ဟဲ့ ဟွတ့် ကာငျာ။’ ဟဲ့ ဟွတ့်၊ ဂေ ဘော ဝီ ဒိုဝ်း မာဟိန် ဒွက် ဒီ အာရိုပ် ရာင် တွိုန် ဒီ ဒင် အန်၊ တဲး အန် မန် ဆီချာ။

8 န့ ယီ မုး ဘေ ဒူအီ အာမျုဝ် အီဆာရေလ အီ မုး ဒဲစေန့် အုဝ်၊ ဘေ လှုက်လှာန် အာကူပ် အီ မုး ဒူအီ ပီ ရဝ်း အုဝ်၊ ဘော ဘေ ခဲင် ခြိုဝ် အာဘြာဟမ် အီ မုး ဂိုက် အုဝ်၊

9 အုဝ် ဟဲ့ ဒိုဝ်း တး ဘေ ဒူင် ဆိူတ် ကာဒါယ်။ အုဝ် ဟဲ့ ဒဲ့ တး ဘေ ဒီ ကာတုဝ့် ကာဒါယ် အီ တူင့် ကာဆဝ်။ အုဝ် ဟဲ့ တဝ်း၊ ‘ဘေ မုး ဒဲစေန့် အုဝ်။ အုဝ် ဟဲ့ ရဝ်း ဘေ။ အုဝ် မိူဝ် တူ ဝဲန် ဘေ။’

10 ဘေ ကွဲ့ ယုဝ်။ အုဝ် ကွယ် ရိုမ် ဒူပ် ဘေ။ ကွဲ့ ကာပိုန့်။ ခုဝ်၊ အုဝ် မုး ဇဝ်ဖြာ ပီ ကြိုပ် ဘေ။ အုဝ် ဒီ တဲး ဘေ မိုဝ်း ပ့လူမ် မိုဝ်း ဟဲန့်။ အုဝ် ဒီ စွယ် ဘေ၊ တဲး န့ ပီ အုဝ် ပါ ဘေ တာ ဒဲ အုဝ် ဘ့လာက် အာအး၊ တဲး န့ ဒူပ် နဝ်း ဆိူဝ် နဝ်း မှာန် အုဝ်။

11 ဘ်ု ဘေ ယွတ် ဂေ အီ ပီရူ ပီစာဝ် ဒီ ဘေ တွိုန်၊ ဂေ ဒီ ဝီ ဆာယ် အီ ဘော စှိုမ် ဆာရေ။ ဂေ တူ ပါယ် မာဆေ။ ဂေ အီ ကာထဲန့် ဒီ ဘေ၊ ဂေ ဒီ ဝီ လိုဝ် စှိုမ် တူတ့်။

12 ဘေ ပီ ဘော ဝီ ဟြေတ့် ဂေ မိူဝ်၊ ဘေ ဟူ ယိုဝ် ဂေ ဒေါ မှဝ်။ ဂေ အီ ကာဂုဝ်း ကာထဲန့် ဒီ ဘေ တီ၊ ဂေ တူ ပဲ ဒီ ဘူင် မာဆေ၊ အာဝ် မိုဝ်း ဒီခုဝ် မာဆေ။

13 အုဝ် မုး ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ အုဝ် ဒီ ပါ ဒဲ အာအး ဘေ။ အုဝ် ဟဲ့ တဝ်း၊ ‘ဘေ ကွဲ့ ယုဝ်၊ အုဝ် ဒီ စွယ် ဘေ။’

14 အုဝ် ဟဲ့ တဝ်း၊ ‘အိုယ် ဘေ ဒူအီ အာမျုဝ် အာကူပ် အီ ပီ ဝရျီ၊ ဘော ဘေ ဒူအီ အာမျုဝ် အီဆာရေလ၊ ကွဲ့ တဲး ဘေ ယုဝ်၊ အုဝ် မုး ဇဝ်ဖြာ ပီ ကြိုပ် ဘေ အီ ဆီငါ ဘွတ် အီ ဒီ ထုတ် လေး ဘေ ခဲင် ဒုက်။

15 အုဝ် ဒီ တဲး ဘေ ပီ မင် မး ငှုဝ် အီ ကာမာယ်၊ အီ မိုဝ်း ဟြာင် အီ လမ် ကာဆဝ်။ ဘေ ဒီ ဘော မး နွန် ဒီတာင် ဘော နွန် ဒီတဲတ်၊ တဲး န့ ကာလာတ့် ကာမုန်၊ တဲး န့ ဝီ ဘဲန် ပီ ဒျီပ် ငှုဝ်။

16 ဘေ ဒီ ယပ် တဲး န့ ဘုင်ဘြတ် ဟာဝ် ဒူပ် ခုန်။ ခုန် ဒီ ဝီ ဘုတ် ကာယဝ်း ဟာဝ် ဒွန် ဘ့လာက်။ ပန် တီ ဘေ ဒီ ဝီ ဘျုဝ် ဒါခိုယ် ကူပ် ဇဝ်ဖြာ ပီ ကြိုပ် ဘေ။ ဘေ ဒီ ဘော ဝီ အိူပ် မျုက် အုဝ် ဘော ကာလာင် ဂုင် ဂေဇူ အုဝ် တဝ်း၊ အုဝ် မုး ဇဝ်ဖြာ အီ ဆီငါ ဘွတ်၊ ဇဝ်ဖြာ ပီ ကြိုပ် ဘေ ဒူအီ အီဆာရေလ။

17 ဆေ ဒူအီ ဂိန် ဒူအီ ဖ့လာန် ဆီ ဒျီင် အိုမ်၊ ယီ တူ မိုဝ်း ဒီ ဒျီင်၊ မဲင် ဂေ မိူဝ် ဟဲ့ ဟေန့် ကာဟဝ်း၊ ဒေါ အန် တီ အုဝ် ဇဝ်ဖြာ ဒီ ဘော ထူမ် ဂြုဝ်း ဂေ။ အုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အုဝ် မိူဝ် တူ ဝဲန် ဘေ။

18 အုဝ် ဒီ တဲး အိုမ် ဘ့လဲင် လှဲ လေး ဒီ ကာတဲ နွန်။ ဒူပ် ဒီလယ့် န့ ဒီ ဘော မိုဝ်း အိုမ် တုဝ်း။ ခဲင် ပြဲ ကာဟဝ်း အုဝ် ဒီ ဘူင် တဲး န့ ဝီ ဘဲန် အိုမ် ဒိုင်။ ဒူင် ကာဒါယ် ဟေန့် ဒီ ဝီ မိုဝ်း အိုမ် တုဝ်း။

19 အုဝ် ဒီ တဲး ဟေ ဘဲန် မျုဝ် ဘဲန် မျုဝ် ဝီ လတ့်။ ဘော မုး ဟေ အာရိတ် ဂေ ဟေ ကာထိန်၊ ဟေ မူရာတူ ဘော ဟေ နာမန်၊ ဂေ ဒီ ဝီ လတ့် ခဲင် ပြဲ ကာဟဝ်း။ ခဲင် ဂ့လင် န့ ဒီ ဝီ လတ့် ဟေ န့ကေ ဂေ ဟေ ထာထီရာ ဘော ဟေ ထာဆူရာ။

20 ဂေ ဒူအီ ကိူန် ဟီ ယိုဝ် လွင် အန် တီ၊ ဂေ ဒီ ဘော နပ် အုဝ် မုး ဇဝ်ဖြာ အီ ဟဲ့ ဘူင် လွင် အန် တီ။ ဂေ ဒီ ဘော ဝီ ကာဒွါ့ ကာဖာ၊ ဝီ လှုဝ်း ဇဝ်ဖြာ အီ ဆီငါ ဘွတ်၊ ဇဝ်ဖြာ ပီ ကြိုပ် ဂေ ဒူအီ အီဆာရေလ အီ ဟဲ့ ဖာန် ဘ့လေး အန် တီ။’”

21 ဇဝ်ဖြာ အီ မုး ခုန်ဒီခမ် အီ အိုပ် လှုက်လှာန် အာကူပ်၊ အန် ဘော တဝ်း၊ “အိုယ် ဘေ အီ မုး ဇဝ် ပီ ကြိုပ် ဒူအီ ဟဝ်၊ တဲး ဘေ တး ကာလာင် လွင် အာမူ ဘေ။ တဲး ဘေ ခဲ ဆိူဝ် ဆိူဝ် မှာန် မှာန်၊ တဲး န့ ကော လိုဝ်း ဆီချာ။

22 တဲး ဘေ တး ခဲ တူတ့် ဒွန် မျုဝ် လွင် အန် ဘော ကာလာင် နာ အာတ့် နီ ဟာဝ်၊ န့ ဒီ ပါယ် မှဝ်၊ တဲး ယေ နပ် လွင် အန် တီ ဆေ န့ ဒီ ဘုဝ် ဘဲန်။ တဲး ဘေ ဘော တး ခဲ လွင် အီ ဟဲ့ ပွုန် တး နာ ပန် နီ၊ န့ ဟဲ့ ပါယ် မှဝ်။ တဲး ယေ ပွိုန် ဒီ ဇေန့်ဇာ လွင် အန် တီ။

23 တဲး ဘေ ကာလာင်၊ တဲး ဘေ ဘျ မာဆေ အီ ဒီ ဘုဝ် ဘဲန် နာ အာတ့် နီ ဟာဝ်၊ တဲး အီ ဘော နပ်၊ ဘေ မုး ဇဝ် ပီ ကာအာပ် အီ ကြိုပ်။ တဲး ဘေ ဘူင် အီ မွှိုမ် အာမ် ဘော အီ တူ မွှိုမ် မင် မျုဝ်၊ တဲး ယေ ကော အာမ် ကော ယုဝ်။

24 ဘူင့် မှာန် အန်၊ ဘေ တူ မိုဝ်း ဒီခုဝ် မာဆေ။ ဘော ပီ ဘူင် ဘေ၊ အာဝ် မိုဝ်း အာဂျိုဝ် မာဆေ။ ဂေ အီ တဝ်း ဒီ ကြိုပ် ဘေ မိူဝ်၊ ဟဲ့ မွှိုမ် ကာအိး ကာဆဝ်။

25 အုဝ် ဇဝ်ဖြာ ဟဲ့ ရဝ်း ဒူအီ အူ ဝီ အီ ကွယ် ဒီ မိူင် ဘ့လာက် နာ ကွာ။ အန် ဒီ တး နာ လေး ဆီငဲ ဘော ဆာခိုဝ် ဒဲ့ အုဝ်။ အန် ဒီ ဘော ညဲတ့် ဂေ ခုန်ဒီခမ် ပီ အီ ညဲတ့် ညုဝ့် ည။ အန် ဘော ဘူင် ဒီ ဒါ တာင် အီ အိုပ် မိူင်၊ တဲး န့ ပီ ဒူအီ အီ ဘူင် ကာလုဝ့် ကာဒါယ် အီ ညဲတ့် ကာဒါယ် တဲး န့ ကာပိတ်။

26 အာဆေ ဟဲ့ ပွိုန် ကာလာင် လွင် အန် တီ၊ တဲး ယေ နပ် အီ ဒီ ဘဲန် နာ အာတ့် နီ ဟာဝ်။း ဆေ ဟဲ့ ဘုဝ် ဘဲန် တဲး အေ ပွိုန် ဒီ တဝ်း၊ “အိုဝ်၊ ဟဲ့ မှာန် အာခါခ်ု။” အာဝ် မိုဝ်း ခေါ အူ ဝီ အီ ဟဲ့ ဒွိုမ် ကာလာင် လွင် အန် တီ။ အာဝ် မိုဝ်း အီ ယိုဝ် ဂြုဝ်း ဘေ ခေါ အူ ဝီ။

27 န့ မုး အုဝ် ဇဝ်ဖြာ အီ ဟဲ့ ကာလာင် ဒီ အာတ့် ဒီ ဒူအီ ခဲင် မိူင် ဇီအူန် လွင် အီ ဒီ စွယ် ဂေ။ “အုဝ် ဟဲ့ စ်ု ဒါလာမ် ဟာဝ် ကာလာင် ခဲင် မိူင် ယေရူဆာလဲမ် မျုဝ် အီ တဲး နဝ်း ဒူအီ ဒါခိုယ်။”

28 အုဝ် ဟဲ့ ယွတ်၊ ယီ တူ ယိုဝ် ဇဝ် အီ ပွိုန် ကာလာင် မာဆေ။ အုဝ် မိူဝ် ဒီမွှတ် ဂေ၊ ဂေ ယီ တူ ဝီ ဝျီ့ ဂြုဝ်း အုဝ်။

29 ဇဝ် ပီ ကြိုပ် ဒူအီ အာမျုဝ် ဟဝ်၊ ဂေ အာဝ် မိုဝ်း ဒီခုဝ် မာဆေ။ ပီ ဘူင် ဂေ မိူဝ်၊ အာဝ် ပါယ် မာဆေ။ ခဲ့ ကွယ် အာရိုပ် ရာင် ဘောကာဂ့လျီတ်၊ အာဝ် မိုဝ်း ပွုန်။ ဂေ ပီ ဟိုတ့် ပီယေန့်။