1 ဇဝ်ဖြာ ဟဲ့ ကာလာင် အုန်၊ “တဲး ဘေ လှဝ် နဝ်း ဂေ ဒူအီ ပီ အိုပ် အုဝ်၊ တဲး ဂေ ဝီ မိုဝ်း နဝ်း ကြွိုမ်၊ နဝ်း တာင်။

2 တဲး ဘေ ဝီ ကာလာင် ဂြုဝ်း ဒါခိုယ် ဒီ ဂေ ဒူအီ ခဲင် မိူင် ယေရူဆာလဲမ်။ တဲး ဂေ နပ် လွင် ဟဲ့ ခမ် ဂေ ဒုက် ဒီ ရန်ဆူ အီ ကာဂုဝ်း ဒီ ဂေ ဟဲ့ ဟွတ့် တူတ့်။ ခဲ့ ကွယ် မှာပ် ဂေ၊ အုဝ် ဇဝ်ဖြာ ဟဲ့ ဟွတ့် ဂဝ်း ဝဲန် တူတ့်။ ခုဝ်၊ အုဝ် ဟဲ့ တဲး ဂေ ခမ် မှာပ် ဂေ အာဒါ အာ ဘုန်။”

3 န့ ဒီ မိုဝ်း ဂြုဝ်း ပီ ဒတ် ဂေ ခဲင် ပြဲ ကာဟဝ်း အီ တဝ်း၊ “တဲး ဘေ မ့ပြာယ် န့တေန့် ပီ လုဝ် ဝဝ့် ဇဝ်ဖြာ၊ ဘူင် တဲး န့ ကော ဆိူဝ်။

4 ဆေ န့ မိုဝ်း ဒူင် ဒီဂ့လုဝ့်၊ တဲး န့ ဝီ ဖဲန့်။ ဒူင် ကုက် ကာဒါယ်၊ တဲး ဘေ လုဝ့် ဝဲန်၊ တဲး န့ ဝီ ဂ့လင်။ ဆေ န့ မိုဝ်း ဒူင် ဂုဝ့် ဂဲ့၊ တဲး ဘေ ဘူင် တဲး န့ ဆိူဝ်။ ဒူင် ဒီဂ့လုဝ့် ဒီဂ့လျီမ်၊ တဲး ဘေ ပုန် ဝဲန်၊ တဲး န့ ဟာဝ် ဒါခိုယ် တူတ့် ဒွန် ပ့လုဝ့်။

5 ဆေ အေ ဘူင် ပါယ် တီ အာဖုင် ဒင်ခုဝ် ဇဝ်ဖြာ ဒီ ဘော လိုဝ်း ဆီချာ။ ခဲ့ ကွယ် ဒူအီ ဒဲင် ကာဒါယ် ဘောကာဂ့လျီတ် ဒီ ဘော ယိုဝ် လွင် အန် တီ။ ခုဝ်၊ ဇဝ်ဖြာ ဟဲ့ ဟွတ့် ကာလာင် အုန် ပါယ် တီ။”

6 န့ ဘော မိုဝ်း ဂြုဝ်း အီ တဝ်း၊ “တဲး မဲ ဒတ် တာင်။” အုဝ် ယီ ဝီ ဒီမွှတ် တဝ်း၊ “လွင် မာဆေ ပီ လုဝ် ဒတ် အုဝ်။း” ဂြုဝ်း တီ ပီ ဝီ တဝ်း၊ “မဲ လုဝ် ကာလာင် တဝ်း၊ “ဂေ ဒူအီ ဘောကာဂ့လျီတ် ဂေ ဒီ ပီ ပေတ့် ဂေ ပြဲ။ အာဖုင် ဒင်ခုဝ် ဂေ မိူဝ်၊ န့ ဒီ ပီ ဘုဝ်း အီ ကွယ် ခဲင် ဒူင် နာ။

7 ပေတ့် ဒီ ဘော ဟျီ့ ကာဟဝ်း တူတ့်။ ဘုဝ်း မိူဝ် ဒီ ရး ဒေါ ဘုတ် ဇဝ်ဖြာ ဖွိုမ် အန်။ ခဲ့ ကွယ် ဒူအီ၊ ဂေ ဒီ ဘော ပီ ပေတ့် ဂေ ပြဲ အာခ်ု မှာန်။

8 ဟဲ့ မှာန်၊ ပြဲ ဂေ ပေတ့် ဒီ ဘော ဟျီ့ ကာဟဝ်း၊ ဘော ဘုဝ်း အန် ဒီ ဟျီ့ ကာဟဝ်း။ ဂြုဝ်း ဇဝ်ဖြာ ယီ ကွယ် ဆေဆေ။”

9 အိုယ် ဘေ ဒူအီ အီ နပ် ဒီ ကာလာင် ဒဲင် နွန် ဇီအူန် လွင် အီ တဲး နဝ်း ဒူအီ ဒါခိုယ်၊ တဲး ဘေ ဟုဝ့် ဒဲင် နွန် စာ။ ဘေ အီ နပ် ဒီ ကာလာင် ခဲင် မိူင် ယေရူဆာလဲမ် လွင် အီ တဲး နဝ်း ဒူအီ ဒါခိုယ်၊ တဲး ဘေ ဟာဝ် ဒီ မိူင် ဘဲန် မိူင် ဘဲန် မိူင် ခဲင် အိူင် ယူဒါ၊ တဲး ဘေ ဒတ် တာင်၊ ကွဲ့ တဲး ဘေ ယုဝ်။ တဲး ဘေ ကာလာင် ဒီ ဒူအီ အာယူဒါ တဝ်း၊ “ဇဝ်ဖြာ ပီ ကြိုပ် ဘေ ဟဲ့ တး ကွယ် ဒီ နီ။”

10 တဲး ဘေ ယွတ်၊ ဇဝ်ဖြာ ဒီ ဘော တး ဘော ဘျ ပွုန် အန်။ အန် ဒီ ဘော အိုပ် တူတ့် ဒွန် မျုဝ်။ အန် ဒီ ဘော ဒိုဝ်း တး ဘော ရုး ပီ ဒီ ဒွါ အန် ဒီ ဒွန် အီ။ န့ ဒီ ဘော ဘဲန် အာဂျိုဝ် ခဲ့ ကာအာပ် ပွိုန် ဝီ မှဝ် ဝီ အန်။

11 အန် ဇဝ် ဒီ ဘော ဟျီင် ဒူအီ ပီ အိုပ် အန်၊ တဲး န့ ပီ ဒူအီ အီ ဟျီင် မာဘူ ယွတ် လိုမ်လာ မာဘူ အန်။ န့ ပီ အန် ဒီ ဒိုဝ်း ကာဇု ဂေ ဂွန် မာဘူ ဘော စုဝ့် ငျီမ်၊ စုဝ့် ဒီ ဂူင့် ဂေ။ အီ မုး မာဘူ ဂုင်င၊ အန် ဒီ ဘော ကြဲ ဒီ ဝဲတ် ဟာဝ် လွယ် လွယ်။

12 န့ တူ ဒွိုမ် မိုဝ်း အာဆေ အီ ဟဲ့ ဒွိုမ် တာ ဒဲ အန် ကာတူမ် ဂဝ် ဒီ ယွတ် အိုမ် အီ ကွယ် ဘဲန် ပ့လုဝ့် ဘဲန် ပ့လုဝ့်။ န့ မိူဝ် တူ မိုဝ်း အာဆေ အီ ဟဲ့ ကာဆာန် ဒီ ယွတ် ဂါင်ဟြာဝ် ဘော ဒိုဝ်း ခွန် ဂဝ် ဒီ ယွတ် ကာပုး အီ ကွယ် ဒဲင် ကာဒါယ် ဘော ဒိုဝ်း လစူ ဆ ဒီ ယွတ် နွန် အီ တျီ့ အီ တာင်။

13 န့ မိူဝ် တူ မိုဝ်း ခေါ အူ ဝီ အီ ပွိုန် မာနုဝ် ဇဝ်ဖြာ၊ တဲး အန် ဘျွင် ပီ ဇေန့်ဇာ အန်၊ ဒွါ ဘော အာကျာမ် အာငျာန် ဒီ အန်။

14 ဇဝ်ဖြာ တူ ဒွိုမ် ဆင်ချာင် ဒီ အာဆေ၊ တဲး အန် နပ် အီ မုး အီ မှာန်။ အန် ဇဝ် မိူဝ် တူ ဒွိုမ် ဟေန် ဒီ အာဆေ၊ တဲး အန် ဝီ နပ် ပီ ပါယ် ဘဲန် မျုဝ် ဘဲန် မျုဝ်၊ တဲး န့ ကာလှုး ဒီ နဝ်း အန်။

15 ဇဝ်ဖြာ ယွတ် ပီ ပါယ် ဒူအီ ဘောကာဂ့လျီတ်။ ဂေ ဘော ပီ အိုမ် အူ န့ စွတ် အီ စုဝ်း ခဲင် ပုင်။ ဂေ ဘော ပီ ကာပုး အီ ကွယ် ဒဲင် လစူ။ ဘော ဂုန် အိုမ်၊ အန် မာတ် ဂေ ပီ ကာပုး။

16 ခဲ့ ကွယ် ဟေ ဒီ နွန် လေဘာနုန်၊ အာဝ် ကူပ် ဂ့လိုမ် အာဒါ ပီဒဝ့် ငဝ်။ ခဲ့ ကွယ် ဒုဝ် ဆတ်ဒါဝါ အီ ကွယ် ခဲင် ပြဲ တီ၊ ဂေ ဘောကာဂ့လျီတ် တူ ကူပ် ဂ့လိုမ် အာဒါ ဒီ လှူ ဒီ ဇဝ်ဖြာ။

17 ခဲ့ ကွယ် ဒူအီ ဒဲင် ကာဒါယ် ဘောကာဂ့လျီတ်။ ဂေ တူ မိုဝ်း ဒီခုဝ် မာဆေ ဒီ အာတ့် ဇဝ်ဖြာ။ အန် ဇဝ် ဘော မာတ် ဂေ ပီ မျုဝ် တူ မိုဝ်း ဒီငဝ်း ဒီခန်၊ တူ မိုဝ်း အာရေ မာဆေ။

18 ဆေ ဟီ ပါယ် တီ အေ ပွိုန် ကာဂဝ် ဇဝ်ဖြာ ဒီ အာဆေ။း အေ ဒီ လာယ် ကာဂဝ် အာရိုပ် အန် ဇဝ် ဒီ အာဆေ။း

19 အန် ဇဝ် တူ ပီ အာရိုပ် ရာင် ပီ ဘူင် ဒူအီ။ ဂေ ဒါ အီ နပ် ဒီ စိုမ်၊ ဂေ လှုဝ် အာရိုပ် ဘော ဒိုဝ်း အိုမ် ခြိဝ် လှိုပ် နာ ရေတ့်။ မင် ဇေန့် ဂေ ဘော ဘူင် ဝန် ရွိုန်၊ ဟပ် ဒီ အာရိုပ် တီ။

20 ဝီ အီ တူ ပဲ ဒီ လှူ ရွိုန် ဂေ ခြိဝ်၊ အန် ဘော ဝီ ဟာဝ် ဟြေတ့် ဟေ အီ တူ နပ် ဒီ ပုယ်၊ တူ နပ် ဒီ ရာမ်၊ ဝီ ဟာဝ် ဒွါ ဒါ လက်ဆာမာ အီ လှဲဝ် ဒီ ဘူင်၊ တဲး အန် ဘူင် ရာင် အာရိုပ်၊ တဲး န့ ဘော ပွိုန် ကွယ် ဆီချာ၊ ကွဲ့ တဲး န့ ကေး။

21 မှဝ် မ့ပါယ် ပီ တူ နပ် ဘေ လွင် ပွုန် ဇဝ်ဖြာ။း ဘေ တူ ဒွိုမ် ထူမ် လွင် အန်။း အာဝ် မိုဝ်း အီ ဒွိုမ် ကာလာင် ဒီ ဘေ ဆိန့် ဒေါ ဂုဝ် အန်။း ဘေ တူ ဒွိုမ် နပ် လွင် ဇဝ်ဖြာ ဆိန့် ဒေါ ဒဲ အန် ဇဝ် ဘိူန် ကာဒါယ် နီ။း

22 န့ မုး အန် ဇဝ် အီ ကွယ် နာ ဒဲင်၊ အန် ယွတ် ဒွန် နာ ဒွန် ပ့လုဝ့် ဒဲင် ကာဒါယ် နီ။ အန် မာတ် ဂေ ဒူအီ ဒဲင် ကာဒါယ် နီ ဘောကာဂ့လျီတ် ပီ မာ အာဇူင့်။ အန် ဇဝ် မိူဝ် ဟဲ့ ဘ့လး ဂါင်ဟြာဝ်၊ တဲး န့ ပီ အီ ဘ့လး ဘိက် တာင်၊ တဲး န့ ဘဲန် ထိုပ် အီ ပွိုန် ကွယ် နာ ခဲင်။

23 န့ ဘော မုး အန် ဇဝ် အီ ဘူင်၊ တဲး ဂွန် ခုန်ဒီခမ် ဒဲင် ကာဒါယ် နီ တူ မိုဝ်း ဒီခုဝ်။ အန် ဘော တဲး ဂေ ဒါ တာင် အီ ဆုင်ဖျာတ် ဒါရာ ဒဲင် ကာဒါယ် နီ တူ ခုဝ် မာဆေ။

24 ဂေ ဘော ပီ ဟေ ပီ တူ ဆမ် အီ ဘော ကာအာင် ဆီမာ ပီ တူ ဘြတ် အီ။ ရျီး တူ ပွိုန် လိုပ် ခဲင် ကာဒါယ်။ ဒေါ ဝီ တဲး ဇဝ်ဖြာ ခုန် တး ဘုတ် ဂေ၊ ဂေ ဘော ဝီ ဟျီ့ ကာဟဝ်း ယမ်။ ဒေါ ဝီ မိုဝ်း ခုန် လာင် တး ဘုတ် ဂေ၊ ဂေ ဘော ဟြာယ် ပီ ဒျီပ် ငှုဝ်။

25 “အုဝ် ဇဝ်ဖြာ ဟဲ့ ဆီငါ ဘွတ်။ အာဝ် ပွိုန် ကာဂဝ် အုဝ် ဒီ အာဆေ။ န့ မိူဝ် တူ မိုဝ်း ခေါ အူ ဝီ အီ ပီ အုဝ်။” ခဲ့ တီ ဇဝ်ဖြာ ဟဲ့ ကာလာင်။

26 တဲး ဘေ ဆာကိုဝ်း ယွတ် ခဲင် ဂါင်ဟြာဝ်၊ အာဆေ ဖာန် ဘ့လေး ဆီမန့် ပီ ယိုဝ် ဘေ တီ။း န့ ဘော မုး အန် ဇဝ် အီ ဟဲ့ တိုယ် လေး ဂေ ဘဲန် ဖိုင် ဘဲန် ဖိုင်။ ဂေ ပီ ဘော ဟဲ့ ကိူန် ခဲ့ တီ၊ အန် ဇဝ် ယီ နပ် တူတ့် ဘော ဒါင် တဲး ဂေ မိုဝ်း စိူဝ် ဒွန် ဘူင့်။ ကူပ် မိုဝ်း အန် ဇဝ် ပွုန် တာင်၊ ဂေ မိူဝ် တူ ဘျုဝ်း တူ ဟြာယ် ခေါ အူ ဘူင့်။

27 အိုယ် ဘေ ဒူအီ အီဆာရေလ၊ မှဝ် န့ ပါယ် ပီ ငှုန် ပီ ပိုန့် ဘေ တဝ်း၊ “ဇဝ်ဖြာ တူ ယွတ် ပီ ပါယ် အုဝ်။ အန် မိူဝ် တူ ဒိူန် အာရေ အုဝ်။”

28 မဲ တူ နပ်၊ တူ ဒွိုမ် ထူမ်။း ဇဝ်ဖြာ အီ ကွယ် ဆေဆေ၊ အီ ဟဲ့ ဖာန် ဘ့လေး ကာဒါယ် နီ၊ အန် တူ နပ် ဒီ နုန်၊ တူ နပ် ဒီ ဒီလှး။ အာဝ် မိုဝ်း အာဆေ အီ နပ် ပီ ခြာမ် အန် ဇဝ် ဒေါ မှဝ်။

29 အန် ဇဝ် ဘော နပ် ဒီ ဒွါ ပ့လူမ် ဂေ ဟဲန့် ဒီ ဂေ အီ ဟဲ့ ဒီလှး အီ ဟဲ့ နုန်။

30 ဒူအီ နှိုမ် ဆီ ဘော နပ် ဒီ နုန်၊ တူ မိုဝ်း ပ့လူမ်။ ဂေ ဂွန် ကာညူမ် ဆီ ဘော နပ် ဒီ ဒီလှး ကေး။

31 မာလဲ၊ ဂေ အီ နှဝ့် န့ဒဝ့် ဇဝ်ဖြာ၊ ဂေ ဒီ ဘော မိုဝ်း ပ့လူမ် မိုဝ်း ဟဲန့် ကာမာယ်။ ဂေ ပီ မာဂ့လာင် အီ ဟဲ့ မိုဝ်း ဖျီင် ကာမာယ်။ ဂေ ပီ ဘော ကာဘ့လဲပ် ဟာဝ်၊ န့ တူ တိူက်၊ တူ ကာဆဝ် ဒီ ဂေ။ ဂေ ပီ ဘော ဟာဝ် ဒူပ် န့တေန့် တူင့်၊ ဂေ မိူဝ် တူ နုန် ခဲ့ မှဝ်။