1 ဇဝ်ဖြာ ဝီ ကာလာင် ဂြုဝ်း ဒီ အုဝ် တဝ်း၊

2 “တဲး မဲ ဟာဝ် ကာလာင် ဒီ ဂေ ဒူအီ ခဲင် မိူင် ယေရူဆာလဲမ်၊ တဲး ဂေ ထူမ် ဆီချာ။ တဲး မဲ တဝ်း၊ ‘အုဝ် ဟဲ့ ဝီ လှုဝ်း၊ ဒေါ ဆီ နှိုမ် ဘေ၊ ဘေ ဟဲ့ ဒူပ် ဆီချာ အုဝ်။ ဘေ မိူဝ် ဟဲ့ ရွက့် အုဝ် ပီ ဒီဘျာ အီ ဟဲ့ ရွက့် ပါဝ် အန်။ အုဝ် ဟဲ့ လှုဝ်း ဘော ဒေါ ဟဲ့ ဒူပ် ဘေ ဒီ အုဝ် ခဲင် ပြဲ ကာဟဝ်း ဒူင် တူ မိုဝ်း ဒီ ဆမ် မာဆေ။

3 ဒေါ အန် တီ ဂေ ဒူအီ အီဆာရေလ ဟဲ့ ဆီငါ ဘွတ်။ ဂေ ကြိုပ် မီ ဇဝ်ဖြာ။ ဂေ ဟဲ့ ပီ ဘော ဘ့လေ ဒင် ပီ ဂဲပ် အုန် အီ ဒီ အာတ့်။ ဂေ အီ ဟူမ် ဘ့လေ တီ၊ ဂေ ဟဲ့ ဘူင် မှာပ်။ ဂေ လုဝ် ခမ် အာဖေ အာရေ။’” ဇဝ်ဖြာ ဟဲ့ ကာလာင် ပါယ် တီ ဒီ အုဝ်။

4 အိုယ် ဘေ လှုက်လှာန် အာကူပ်၊ အိုယ် ဘေ ဒူအီ အီဆာရေလ၊ တဲး ဘေ ထူမ် ဂြုဝ်း ဇဝ်ဖြာ။

5 ဇဝ်ဖြာ ဟဲ့ တဝ်း၊ “ဂေ ဂုန့် ဒင် ဘေ၊ ဂေ ဟဲ့ ယိုဝ် ပီ ကာလိုပ် အုဝ် မျုဝ် မှဝ် အီ တဲး ဂေ ဝီ ဝး အုဝ်၊ တဲး ဂေ ကော ဝီ ဟာဝ် ဒူပ် အီ တူ မိုဝ်း ဒီခုဝ်။း န့ ဘော တဲး ဘော ဂေ ဝီ ဘဲန် ဒူအီ အီ တူ မိုဝ်း ဒီခုဝ်။

6 ဂေ တူ ဒီမွှတ် တဝ်း၊ ‘ဇဝ်ဖြာ အီ ဟဲ့ ချွတ် လေး အေ ခဲင် မိူင် အဲဂိုပ် တွိုန်၊ အန် ကွယ် ဒီ မှဝ်။း’ အန် ဟဲ့ ယဲတ့် ဟာဝ် အေ ခဲင် ပြဲ ကာဟဝ်း အီ မုး ခဲင် ကာဒါယ် ဒီ ဂ့လုဝ့် ဒီဂ့လျီမ်၊ ကာဒါယ် ကာဟဝ်း ကာဟန့်၊ ဒူင် အီ အပ် ဝွင့် ဒီတိန့် ဘော မိူင် ဒူင် တူ ဒွိုမ် မိုဝ်း ဒူအီ အီ ကွယ်၊ အီ ဟာဝ် ဒူပ် န့တေန့်။

7 ဝါယ် အန် တီ အုဝ် မိူဝ် ဟဲ့ တဲး ဘေ ဟာဝ် ကွယ် ခဲင် မိူင် အီ မိုဝ်း ကာပိုမ် ဟေ ဘ့လေ ဒွန် မျုဝ်၊ တဲး ဘေ ဘော ပွိုန် ဒီ ဟူမ် ဘ့လေ အန်၊ ပွိုန် ဘော နာ ဘွတ် နာ မွှိုမ် အီ ကွယ် ခဲင် မိူင် တီ။ မာလဲ၊ ဒေါ ဝီ တး ကွယ် ဘေ ခဲင် မိူင် တီ၊ ဘေ ဘော ဝီ ဘူင် တဲး န့ ကာဒါတ့်၊ ဘူင် တဲး ခါဂုန် ပီ ဒွါ အုဝ် ဒီ ဘေ တီ ဝီ ဘဲန် အီ မွှိုမ် ကာအိး။

8 ဂေ ဒါ အီ လှူ ဒီ ဇဝ်ဖြာ မိူဝ် တူ ဒီမွှတ် တဝ်း၊ ‘ဇဝ်ဖြာ ဘော ကွယ် ဒီ မှဝ်။း’ ဂေ ဒါ တာင် အီ ဆုင်ဖျာတ် ဒါရာ မိူဝ်၊ ဂေ အာဝ် ဟူ ဝီ နပ် အုဝ်။ ဂေ ဒါ တာင် အီ အိုပ် ဒူအီ ကိူန် ဟဲ့ ဝီ ဘူင် လုတ့် အုဝ်။ ဂေ ဒါ အီ ဘျာန် ဂြုဝ်း ဇဝ်ဖြာ မိူဝ် ဟဲ့ ဝီ ဘိုင် ဇဝ် ဘာလ ဘော တဝ်း ဒီ ဘျာန် ဂြုဝ်း အန် ဘော ဒူပ် အီ တူ မိုဝ်း ဒီခုဝ်။

9 ကူပ် န့ ပါယ် တီ ဇဝ်ဖြာ ဝီ တဝ်း၊ ‘အုဝ် ဒီ ဖျာက် ဘေ။ ဘော ဂေ ဂွန် ဘေ ဘော လှာန် ဘေ မိူဝ်၊ အုဝ် ဒီ ဆုင်ဖျာတ် ဒါရာ ဒီ ဂေ ပါယ် တီ။

10 တဲး ဘေ ဟာဝ် နာ ဂေတ့် ဆီငဲ ဒီ မိူင် ခီထိမ်။ တဲး ဘေ ဟာဝ် နာ လေး ဆီငဲ၊ ဟာဝ် ဒီ မိူင် ကေတာ။ တဲး ဘေ ယွတ် ယုဝ် န့ ဟဲ့ ဒွိုမ် ဘုဝ် ဘဲန် ပါယ် တီ။

11 ဂေ ဒူအီ အာမျုဝ် ဟဝ် တူ ဒွိုမ် ဘျွင် ဇဝ် ပီ ကြိုပ် ဂေ။ ဇဝ် ပီ ကြိုပ် ဂေ ယီ တူ မုး ဇဝ်ဖြာ အာခါခ်ု။ အီ မုး ဂေ ဒူအီ ပီ အိုပ် အုဝ်၊ ဂေ ယီ ဟဲ့ ဝဲန် အုဝ် အီ ဟဲ့ မိုဝ်း အာဖုင် ဒင်ခုဝ်၊ ဝီ ကာရဝ်း အာရိုပ် ရာင် အီ တူ မွှိုမ်၊ အီ တူ မိုဝ်း ဒီခုဝ်။’

12 ဘေ အီ ကွယ် ခဲင် ဂါင်ဟြာဝ်၊ တဲး ဘေ ကာအိး လွင် အန် တီ။ တဲး ဘေ ကာစွာ ကာပိုန့်။” ဇဝ်ဖြာ ဟဲ့ ကာလာင် ပါယ် တီ။

13 ဇဝ်ဖြာ ပီ ဝီ တဝ်း၊ “ဂေ ဒူအီ ပီ အိုပ် အုဝ်၊ ဂေ ဟဲ့ ဘူင် နာ တူ မွှိုမ် အာ မျုဝ်။ ဂေ ဟဲ့ ဝဲန် အုဝ် အီ ဟဲ့ ပီ အိုမ် တုဝ်း အီ ဒွါ အာဆာက် ဒီ ဂေ။ ဂေ ဘော ဝီ ဂိုဝ်း အိုမ် ဒိုင် အီ ဟဲ့ လိုဝ် ဟဲ့ ကာပျာတ့် အီ တူ ပွိုန် ကင် အုန် အိုမ်။

14 ဘေ ဒူအီ အီဆာရေလ၊ ဘေ တူ မုး မှာယ် အီ ဟဝ်။ ဘေ တူ ဂွိုတ် တး ဒီ ဒူအီ အီ မုး မှာယ် အီ ဟဝ်။ မှဝ် န့ ပါယ် ပီ ဝီ ခမ် ဘေ ဒူအီ ဟဝ် ဖာတ် ဒိုဝ်း ဘေ။း

15 ရန်ဆူ ဟဲ့ ဒတ် တာင် ကာဆဝ် ပီ မာခြင်ဆီ ကာအိူန်။ ဂေ ဟဲ့ ဟာဝ် ညိူဝ် ဂေ ဒူအီ အီဆာရေလ။ ရန်ဆူ ဂေ တီ ဘူင် တဲး မာန် မိူင် ဂေ ဒူအီ အီဆာရေလ ကာပျာတ့် လိုဝ် တူတ့်။ ဂေ ရန်ဆူ ဘော ဒိုဝ်း ငဝ်၊ ဒုဝ့် ဘော မိူင်။ ဂေ ဘော မှေတ့် ဟာဝ် ဂေ ဒူအီ ကော ဟူ မိုဝ်း ဒူအီ ခေါ အူ ဝီ။

16 ဒူအီ ခဲင် မိူင် နောဖ ဘော ဒူအီ ခဲင် မိူင် တာပါနိတ် ဂေ ဟဲ့ ဂ့လွက် ဂိန့် ဘေ။

17 ဘေ လုဝ် ခမ် ပါယ် တီ ကူပ် ဟဲ့ ဝဲန် ဘေ ဇဝ်ဖြာ ပီ ကြိုပ် ဘေ။ န့ မုး ဇဝ်ဖြာ အီ ဟဲ့ ဒွိုမ် ယဲတ့် ဘေ ဟာဝ် ဒူပ် န့တေန့်။

18 ဆေ န့ ပါယ် တီ မှဝ် န့ ပါယ် ပီ လူင် ဘေ ဒီ မိူင် အဲဂိုပ် ဘော ဒျီင် အိုမ် ခဲင် ဘ့လဲင် နီလာ။း မှဝ် န့ ပါယ် ပီ ဟာဝ် ဘေ ဒီ မိူင် အာဆူရီယာ ဘော ဒျီင် အိုမ် ခဲင် ဘ့လဲင် အိုမ် အူဖာရာတ်။း

19 နာ တူ မွှိုမ် ဘေ၊ န့ ဒီ ဝီ ဒမ် မှာပ် ဒီ ဘေ။ ကူပ် ဟဲ့ ဝဲန် ဘေ ဒီ အုဝ်၊ န့ ဒီ ဘဲန် မှာပ် ဒီ ဘေ။ ပါယ် တီ တဲး န့ ကာလှုး ဒီ နဝ်း ဘေ ခဲ့ ဒီ ဒုက် ဒီ ညှာပ် ဒီ ဘေ ကူပ် ဟဲ့ ဝဲန် ဘေ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ တဲး ဘေ နပ် ကူပ် တူ ယုဝ် တူ ရုဝ်ဆေ ဘေ ဒီ အုဝ်၊ န့ ဒီ ဘဲန် အီ တူ မွှိုမ် ဘော ဆွင့် ဒီ နဝ်း ဘေ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ဒီ အုဝ် ပါယ် တီ။

20 ဇဝ်ဖြာ ပီ ဝီ တဝ်း၊ “ဆေ ဘေ ဘူင် ပီ စ်ု အုဝ်၊ န့ ပီ အုဝ် ဟဲ့ ဘက် ဝဲန် မင် ဂွတ် အီ စန် ကာဆဝ် ဒီ ဘေ။ န့ ဘော ပီ အုဝ် ဟဲ့ ဒိုဝ်း ဝန် ဟိန် ပဲ့ ဟဲ့ ပက် ဘေ၊ အီ ဟဲ့ တဲး ဘေ ဘဲန် မှာယ် အီ။ ဘေ ယီ ဟဲ့ တဝ်း၊ ‘ယေ ဟဲ့ စူ၊ ယေ ဟူ ကြိုပ် ဇဝ်ဖြာ ပေါ န့ ပွါ။’ ဟဲ့ ဟွတ့် ဘေ ဘော ဟုဝ့် ဒဲင် နွန် စာ ဒွန် ပ့လုဝ့် ဘော ကြိုပ် အာရိုပ် ရာင် ဒီ ဒင် ဟေ တာင် ဒွန် ကာဒင်၊ ဘူင် ဒီ အုဝ် ပီ ပီ ဘူင် ယာ မာလမ်။

21 အုဝ် ပီ ဘော ဟဲ့ ဆမ် ဘေ ပီ အီ ဆမ် ဟေ မာငုန် အီ ဇဲတ် အီ မွှိုမ် မိူဝ်၊ မှဝ် န့ ပါယ် ပီ ဝီ ဝး ဘေ ဒီ အုဝ်၊ ဝီ ဘူင် တဲး ဘေ ပီ ဟေ မာငုန် အီ ပြာင် အီ တူ အး။း

22 ဘေ ပီ ဘော ဝီ ဒိုဝ်း အိုမ် ဆုတ် ဘာယ် ဘေ ဘော ဖဝ်း ဆာပျာ ကော တူတ့် ကိူန် မိူဝ်၊ မှာပ် ဘေ ယီ ဆီ လိုဝ်း ဆီချာ ဒီ အုဝ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

23 “ဘေ ဘော နပ် ဒီ တဝ်း၊ ‘ယေ တူ မိုဝ်း ဒီ ကာဒါတ့်။ ယေ တူ မိုဝ်း ဒီ ဒူပ် ဇဝ် ဘာလ။’ တဲး ဘေ ယွတ် ပဲ့ ဟဲ့ ဘူင် ဘေ ဒူပ် ဒီလယ့် တွိုန်။ တဲး ဘေ ဝီ ဖြူမ် ဒီ ရပ် လွင် ပဲ့ ဟဲ့ ဘူင် ဘေ တီ။ ဘေ ဟဲ့ ပီ မင်ပြွင့် ကာဟာတ့် ဒုဝ် မာ အီ နပ် ဒီ ကာဘ့လဲပ် ဟဲ ဟဲ ခြန် ခြန်၊ အီ ဟြေတ့် ဒီ ဝှါဝှုင်။

24 ဘေ ဟဲ့ ပီ ဘော မာလာ အာဟျာင် အီ ဟဲ့ ဒွိုမ် ကွယ် ခဲင် နင် ခဲင် ပြဲ ကာဟဝ်း အီ ဟဲ့ ဆီ ဝှါဝှုင် ကာဆဝ်။ အန် ဘော ဝီ ညွှတ် ခုန်။ ဆေ ဟီ ဇမ် အာခြာဝ် ဆီ ဝှါဝှုင် အန် တီ၊ အာဝ် မိုဝ်း အာဆေ အီ ပွိုန် ခြဲ အန်။ ဂေ ဒုဝ် အာလူင့် အီ ဟြေတ့် အန် တွိုန် ဂေ မိူဝ် တူ လုဝ် မှဲ နဝ်း၊ တူ လုဝ် နုန်။ ဆေ ဟီ ဇမ် အာခြာဝ် အန်၊ ဂေ ဒီ ဘော ယိုဝ် မာလာ အာဟျာင် တီ။

25 ကွဲ့ တဲး ဘေ ဟာဝ် တူင့်၊ တဲး ပ့လဝ် ဘေ ကော ဆဝ်။ ကွဲ့ တဲး မဲင် ဘေ ဟေန့် ကာဟဝ်း ကော ဆီ ဒျီင် ကာဆဝ် အိုမ်။ မာလဲ၊ ဘေ ဘော နပ် ဒီ ဝီ တဝ်း၊ ‘အာဝ် မိုဝ်း အီ ပွိုန် ခြဲ ပွိုန် ရဲ ယေ။’ ယေ ဟဲ့ ရွက့် ဇဝ် ပီ ကြိုပ် အီ ဟဝ်၊ ယေ ဒီ ဒူပ် ဇဝ် ဂေ တီ။”

26 “ဆေ န့ မုး ဒါ ပြာ ပဲ့ ဟဲ့ မှေတ့် ပွိုန် အီ၊ အန် ဘော မွှိုမ် ဆာယ် ကာဆဝ်။ ဂေ ဒူအီ အီဆာရေလ ဘောကာဂ့လျီတ် ဘော ခုန်ဒီခမ် ဘော ဒါ အီ လှူ ဒီ ဇဝ်ဖြာ ဘော ဒါ အီ ဘျာန် ဂြုဝ်း ဇဝ်ဖြာ၊ ဂေ ဒီ ဘော မွှိုမ် ဆာယ် ပါယ် တီ။

27 ဂေ ဘော ကာလာင် ဒီ န့ဂူင့် ဟေ တဝ်း၊ ‘မဲ မုး ဂုန့် ယေ။’ ဂေ ဘော ကာလာင် ဒီ မာဝ် တဝ်း၊ ‘မဲ ဟဲ့ တဲး ယေ ဂွိုတ်။’ ဂေ ဟဲ့ ဝဲန် အုဝ် အာခ်ု မှာန်။ ဂေ အာဝ် ဟူ ဝီ မာငး ညိူဝ် အုဝ်။ မာလဲ၊ ဆေ ဂေ ဝီ ကာဒုး ဒုက် ညှာပ်၊ ဂေ ဘော နပ် ဒီ ဝီ တဝ်း၊ ‘မှာန့်၊ တဲး မဲ ဇဝ်ဖြာ တး ချွတ် ယေ။’

28 ဆေ န့ ပါယ် တီ၊ ဇဝ် အာရိုပ် ပဲ့ ဟဲ့ ဘူင် ဘေ တဲး ဘေ ကြိုပ် ဂေ၊ ဂေ ကွယ် ဒီ မှဝ်။း ဆေ ဇဝ် ဂေ တီ ဟဲ့ ပွိုန် ချွတ် ဘေ ဒေါ ဟဲ့ ကာဒုး ဘေ ဒုက် ညှာပ်၊ တဲး ဂေ တး ချွတ် ဘေ။ မိူင် ဘေ ဒူအီ အာယူဒါ ဟဲ့ ကိူန် ခဲ့ မှဝ်၊ ဇဝ် ပီ ကြိုပ် ဘေ မိူဝ် ဟဲ့ ကိူန် ခဲ့ တီ။”

29 ဇဝ်ဖြာ ပီ ဝီ တဝ်း၊ “မှဝ် န့ ပါယ် ပီ နဲန ဘေ ဒီ အုဝ်။း ခဲ့ ကွယ် ဘေ ဘောကာဂ့လျီတ်၊ ဘေ ဟဲ့ ကာဘး ဒီ အုဝ်။

30 ပဲ့ ဟဲ့ ဒမ် အုဝ် မှာပ် ဒီ ဒူအီ အာမျုဝ် ဘေ၊ န့ တူ မိုဝ်း အာဂျိုဝ် မာဆေ။ န့ တူ စွယ် မာနုဝ် ဂေ။ ဘေ ဘော ဝီ ငဝ်း ဒါ အီ ဘျာန် ဂြုဝ်း ဇဝ်ဖြာ၊ တဲး န့ ပီ မာခြင်ဆီ နပ် ဒီ ကဝ့် ကာယာတ့် ဒုဝ် ပီ ဒီ ဟူမ် အန်။”

31 အိုယ် ဘေ အီ ကွယ် ဒေါ တီ နီ၊ တဲး ဘေ ဝီ ကာဒွါ့ ကာဖာ ဂြုဝ်း ဇဝ်ဖြာ။ အန် တဝ်း၊ “ဘေ ထာင် အုဝ် ဟဲ့ ပီ ပြဲ ကာဟဝ်း ဒီ ဘေ။း ဆေ အာဝ် ပါယ် တီ မိူဝ်၊ ဘေ ထာင် အုဝ် ဟဲ့ ပီ မိူင် အီ အပ် ဝွင့် ကာဆဝ် ဒီ ဘေ။း မှဝ် န့ ပါယ် ပီ ဝီ တဝ်း ဂေ ဒူအီ ပီ အိုပ် အုဝ်၊ ‘ယေ ဟဲ့ ဟွတ့် ပွိုန် ကွယ် ထင်ဟာင်။ ယေ အာဝ် ဟူ လုဝ် ကွယ် ကာဒိုက် ကာဒဝ့် ဒီ ဒါ ကာညာ ယေ။း’

32 ဂွန် ဒီဘျာ တူ ပိဝ် ခြိဝ် ဂါယ် ဆဲန့် ပီ ဒီ တာ အန်။ ဂွန် အီဘိုန့် အီ ဒီ ခတ် ကာမာယ်၊ အန် မိူဝ် တူ ပိဝ် ခြိုင် ပီ ဒီ လုဝ် စှိုပ် အန် ဒွန် မျုဝ်။ ဂေ ဒူအီ ပီ အိုပ် အုဝ်၊ ဂေ ယီ ဟဲ့ ပိဝ် အုဝ် ဟဲ့ လှေန့် ကာဆဝ်။ န့ ဘော မုး နှာင် ဆီငဲ ကော ဟူ နပ် ဒီ တိး။

33 ဘေ ဘော ကျ ကာဆဝ် ဒီ ဟြေတ့် ပါဝ် ကာမာယ် ဒီ ဘေ။ ဂေ အီဘိုန့် အီ ဟာယ် အီ တူ မွှိုမ် ဘော ပွိုန် ဝီ တး ဟေန် ဒီ ဘေ။

34 ဒဲင် တီ နှာမ် ဂေ ဒူအီ ဂိန် ဒူအီ အေတ့် အီ တူ မိုဝ်း မှာပ် မာဆေ ဟဲ့ ဒိုက် ဒီ ခြိုင် တာ ဘေ။ န့ ယီ တူ မုး နှာမ် ဂေ အီ ဟဲ့ တး ပြာ ကြုဝ်ကြာမ် ခဲင် ကာင် ဘေ။

35 ဘေ ပီ ဘော ဟဲ့ ဘူင် ပါယ် တီ မိူဝ်၊ ဘေ ယီ ဝီ တဝ်း၊ ‘ယေ တူ မိုဝ်း မှာပ်။ ဇဝ်ဖြာ တူ ရူ တူ စာဝ် ဒီ ယေ။’ မာလဲ၊ အုဝ် ယီ ဆုင်ဖျာတ် ဒမ် မှာပ် ဒီ ဘေ ကူပ် တဝ်း ဘေ၊ ‘ယေ တူ မိုဝ်း မှာပ်။’

36 မှဝ် န့ ပါယ် ပီ ဘျွင် ဘေ နဝ်း ဘေ ငှိုယ် ငှိုယ်။း ဒူအီ ခဲင် မိူင် အဲဂိုပ် ဂေ ဒီ ဝီ ဘူင် တဲး ဘေ ကာလုတ့် နဝ်း၊ တဲး န့ ပီ ပဲ့ ဟဲ့ ဒွိုမ် ဘူင် ဂေ ဒူအီ ခဲင် မိူင် အာဆူရီယာ ဒီ ဘေ။

37 ဘေ ဒီ ဝီ ကာဒုး ဒီ လေး ဟာဝ် တ မိူင် တီ ဘော မွှိုမ် ဆာယ် ကာဆဝ်။ ဇဝ်ဖြာ ဟဲ့ ဟွတ့် ဝဲန် တူတ့် မိူင် ပီ ဒီ ဘိုင် ဘေ တီ။ ခုဝ်၊ ဂေ တူ ပွိုန် စွယ် ဘေ မာဆေ။”