1 ဇဝ်ဖြာ ပီ ဝီ တဝ်း၊ “ဆေ အီမာယ် ဟဲ့ ဝဲန် အီဘိုန့် အန်၊ အီဘိုန့် အန် တီ မိူဝ် ဟဲ့ ဟွတ့် လေး ဟာဝ် တ အန်၊ ဟဲ့ ဝီ ဟာဝ် ဒိုဝ်း အီမာယ် ပေါ အူ ဝီ၊ အာဝ် ကာအာပ် အီမာယ် ဘြိမ် အန် ဝီ ဒိုဝ်း ဝိဝ် အီဘိုန့် ပဲ့ ဟဲ့ ဝဲန် အန်။ န့ ဒီ တဲး မိူင် တီ ကာဒါတ့်။ မာလဲ၊ ဘေ ပီ ဘော ဟဲ့ ဘူင် ပီ ပီ ဘူင် ယာ မာလမ်၊ ဟဲ့ ဒူပ် ပါဝ် ပီ ရွက့် ဘေ အီ ကိူန် ကာဆဝ်။ အုဝ် ယီ ဆီ တဲး ဘေ ဝီ တး ဒူပ် အုဝ်။” ဇဝ်ဖြာ ဟဲ့ ကာလာင် ဒီ အုဝ် ပါယ် တီ။

2 အန် ဝီ ကာလာင် ဟာဝ်၊ “တဲး ဘေ ယွတ်၊ ဒဲင် နွန် စာ ဒွန် ပ့လုဝ့် အာဝ် မိုဝ်း ခေါ အူ ပ့လုဝ့် ဒူင် တူ ဘူင် ဘေ အီ ပီ ပီ ဘူင် ယာ မာလမ်။ န့ ပီ ဘေ ဟဲ့ ကွယ် ခူပ် န့တေန့်၊ ဘ်ု ပါဝ် ပီ ရွက့် ဘေ၊ တဲး န့ ကော ပီ ဒါ ဇူန် အီ ဘ်ု ဒီ မှေတ့် ဒူအီ ခဲင် ပြဲ ကာဟဝ်း။ ဘေ ဘော ဘူင် ပီ ပီ ဘူင် ယာ မာလမ် ဘော အီ စီစိဝ် ဘဲန် မျုဝ် ဘဲန် မျုဝ်၊ တဲး မာန် မိူင် ကာဒါတ့်။

3 ကူပ် ဘူင် ဘေ ပါယ် တီ န့ ဘော ဆောဒါတ် ကာဆဝ်။ ဂ့လာယ် ပန် ဒီ တူတ့် ဆီနမ် မိူဝ်၊ အာဝ် ဟူ တး။ ဘေ ယီ ဆီ နဲ့ ဘူင် ပီ ယာ မာလမ်၊ တူ နပ် ဒီ ဆာယ် အာဆေ။

4 ဒေါ တီ နီ ဘေ ဟဲ့ ဝီ ဒဲ့ အုဝ် တဝ်း၊ ‘အိုယ် ဂုန့် ယေ၊ မဲ ဟဲ့ ဘဲန် ဂိုက် ယေ ဆိန့် ဒေါ ဆီ ဒီတဲတ် ယေ။

5 ယေ ထာင် မဲ ဇဝ် တူ ရူ ဒီ ယေ ကူပ် ဟဲ့ ကာလိုပ် ယေ အီ စဲက်။ ယေ ထာင် မဲ ဇဝ် ဒီ ပိဝ် လွင် အန် တီ။’ ဘေ ပီ ဘော ဟဲ့ ကာလာင် ပါယ် တီ မိူဝ်၊ ဘေ ယီ ဘူင် အီ ဟာယ် အီ မိူက် ခဲ့ ပီ ဆီ ဘူင် ဘေ။”

6 ဒေါ မုး စုဝ် ဘာန် ခုန်ဒီခမ် အာယုဝ်ဆီယာ ဇဝ်ဖြာ ဟဲ့ ဝီ ဒီမွှတ် အုဝ် တဝ်း၊ “မဲ ဟဲ့ ယိုဝ် ပဲ့ ဟဲ့ ဘူင် ဂေ ဒူအီ အီဆာရေလ အီ ပီ အီဘိုန့် အီ တူ မိုဝ်း နဝ်း ဆိူဝ် နဝ်း မှာန်။း ဂေ ဟဲ့ ဟုဝ့် ဒဲင် နွန် စာ ဒွန် ပ့လုဝ့် ဘော ကွယ် ဒီ ဒင် ဟေ တာင် ဒွန် ကာဒင်၊ တဲး ဂေ ဘူင် ပီ ပီ ဘူင် ယာ မာလမ်။ 7 အုဝ် ဟဲ့ ထာင်၊ ဆေ ဂေ ဟီ ဟွတ့် ဘူင် တူတ့် ဇိုဝ် တီ ဒွန် မျုဝ်၊ ဂေ ဒီ ဝီ တး ဒူင် ကွယ် အုဝ်။ မာလဲ၊ ဂေ ယီ တူ ဝီ တး။ ဂေ အာမျုဝ် ဒူအီ အာယူဒါ ဂေ ပီ ဂွန် အီဘိုန့် အီ မုး ဝါ ဂေ ဒူအီ အီဆာရေလ အီ ဟဲ့ ဒွိုမ် ဘူင် မှာပ် ဒီ အာတ့် အုဝ်၊ ဂေ မိူဝ် ဟဲ့ ဟွတ့် ယိုဝ် တူတ့် လွင် အန် တီ။ 8 အုဝ် ဟဲ့ ဟွတ့် ဒဲမ် ပဲ့ လွင် လာယ် ဝဲန်၊ ဒွါ ဒီ ဂေ ဒူအီ အီဆာရေလ အီ တူ မိုဝ်း နဝ်း ဆိူဝ် နဝ်း မှာန်။ အုဝ် မိူဝ် ဟဲ့ ဟွတ့် ဆုတ့် လေး ဂေ ဒူင် ကွယ် အုဝ်။ ဂေ ဒူအီ အာယူဒါ အီ ပီ ဝါ ဂေ ဒူအီ အီဆာရေလ ယီ ဘူင် ဒူပ် ပီ ပီ ဘူင် ဂေ။ 9 ဆေ ဂေ ကြိုပ် ဇဝ် ပီ ကြိုပ် အီ ဟဝ်၊ ဂေ တူ ထာင် ဟဲ့ ခိုက်ခမ်။ န့ ဘော ငှိုယ် ကာဆဝ် ဒီ ဂေ။ ခုဝ်၊ ဂေ ဘူင် တဲး မာန် မိူင် ဂေ ကာဒါတ့်။ ပီ ဘူင် ဒူအီ အီဆာရေလ၊ န့ ပီ ဂေ ဝီ လာယ် လုတ့် လာယ် လာယ် ဒီ မာဝ် ဘော ဒီ ဟေ။ 10 ဂေ ဒူအီ အီဆာရေလ ပီ ဘော ဟဲ့ ဘူင် ပါယ် တီ မိူဝ်၊ ဝါ ဂေ အီ မုး ဂွန် အီဘိုန့် အီ စိူဝ် နာင် ယူဒါ၊ အီ ဟဲ့ ဒွိုမ် ဘူင် မှာပ် ဒီ အာတ့် အုဝ်၊ အန် ယီ တူ ကာပ့လု နဝ်း အန် အာခါခ်ု၊ တူ ဝီ တး ဒူင် ကွယ် အုဝ်။ အန် ယီ ညိုင်ရာင် ဒီ တး။” ဇဝ်ဖြာ ဟဲ့ ကာလာင် ဒီ အုဝ် ပါယ် တီ။

11 ဇဝ်ဖြာ ပီ ဝီ ကာလာင် ဒီ အုဝ် တဝ်း၊ “ဒူအီ အီဆာရေလ အီ တူ မိုဝ်း နဝ်း ဆိူဝ် နဝ်း မှာန် တီ၊ ဂေ ဟဲ့ မွှိုမ် လွှိုမ် ဂေ ဒူအီ အာယူဒါ အီ ပီ ဝါ ဂေ အီ မုး ဂွန် အီဘိုန့်။”

12 ဇဝ်ဖြာ ဝီ ကာလာင် ဒီ အုဝ်၊ တဲး အုဝ် ဟာဝ် ကာလာင် ဂြုဝ်း အန် ဒီ ဂေ ဒူအီ အီ ကွယ် ဘ့လာက် နာ ကွာ။ အန် တဝ်း၊ “အိုယ် ဘေ ဒူအီ အီဆာရေလ အီ တူ မိုဝ်း နဝ်း ဆိူဝ် နဝ်း မှာန်၊ တဲး ဘေ ဝီ တး။ အာဝ် မုး အုဝ် တူ အိုင် ဘေ။ အာဝ် မုး အုဝ် ဒီ ရူ ဒီ ဘေ ဆေဆေ။ ခုဝ်၊ အုဝ် ဟဲ့ မိုဝ်း နဝ်း ရွက့် ကာဝေ။” ဇဝ်ဖြာ ဟဲ့ ကာလာင် ပါယ် တီ။

13 အန် ဇဝ် ဘော ကာလာင် ဟာဝ် တဝ်း၊ “တဲး ဘေ ဝီ ကာလာင် မှာပ် ပဲ့ ဟဲ့ လုတ့် ဘေ ဒေါ ဟဲ့ ဘူင် ဘေ ကာဘး ဒီ အုဝ် အီ မုး ဇဝ်ဖြာ ပီ ကြိုပ် ဘေ။ ဘေ မိူဝ် ဟဲ့ အိုင် ဒီ ဒူပ် ဇဝ် ပီ ကြိုပ် အီ ဟဝ် ဘော ကြိုပ် ဂေ ခြိုမ် ဟေ တာင်။ တဲး ဘေ ဝီ ကာလာင် ဘော မှာပ် လွင် တူ ထူမ် ဘေ ဂြုဝ်း အုဝ်။”

14 ဇဝ်ဖြာ ဘော တဝ်း၊ “အိုယ် ဘေ ဂွန် အီ ဟဲ့ ဝဲန် အုဝ်၊ တဲး ဘေ ဝီ တး။ ခုဝ်၊ အုဝ် မုး ဒါ ကာညာ အီ အိုပ် ဘေ။ အုဝ် ဒီ ရဝ်း ဘေ အူ မိူင် အူ ဝီ၊ ရဝ်း ခဲင် န့ကြိုဝ်း ဘေ အူ မျုဝ် အာ ဝီ၊ ဝီ တိုယ် ဟာဝ် ဘေ ခဲင် မိူင် ဇီအူန်။ 15 ဂေ ဒူအီ အီ လဝ့် နဝ်း အုဝ်၊ အုဝ် ဒီ တဲး ဂေ ဝီ ယွတ် မဲန် ဘေ ပီ ဒူအီ အီ ဟျီင် မာဘူ။ ဒူအီ ဂေ တီ၊ ဂေ ဒီ မိုဝ်း အာငျာန် ဘော နပ် ဘဲန် မျုဝ် ဘဲန် မျုဝ်၊ တဲး ဂေ ပွိုန် ဒီ ယဲတ့် ဘေ။ 16 ဆေ ဘေ ဟဲ့ ဟွတ့် ဘြဲ ကိူန် ခဲင် မိူင် ဒူင် ကွယ် ဘေ တီ၊ ဇဝ်ဖြာ ဒီ တဝ်း၊ အာဝ် ဟူ မိုဝ်း အီ ကာလာင် လွင် ဇီဒိူက် ဇဝ်ဖြာ။ န့ မိူဝ် တူ မိုဝ်း အာဆေ အီ လှုဝ်း လွင် အန် တီ။ အာဝ် မိုဝ်း အီ နမ်လှုဝ်း၊ အာဝ် မိုဝ်း အီ ယွတ် လိုမ်လာ၊ အာဝ် လုဝ် အီ ဘူင် ဇီဒိူက် ပေါ အူ ဘူင့်။” ဇဝ်ဖြာ ဟဲ့ တဝ်း ပါယ် တီ။ 17 အန် ဇဝ် ဝီ တဝ်း၊ “ပန် အန် တီ လွင် မိူင် ယေရူဆာလဲမ် ဂေ ဒီ ဘော တဝ်း၊ ‘န့ မုး မာလာင် ဇဝ်ဖြာ။’ ခဲ့ ကွယ် ဒူအီ ဒွန် မျုဝ်၊ ဂေ ဒီ ဘော တး ကာဇု ခဲင် မိူင် ယေရူဆာလဲမ်၊ တဲး ဂေ ပွိုန် ဒီ အိူပ် မျုက် ဇဝ်ဖြာ ဒီ တီ။ ဒေါ အန် တီ ဂေ မိူဝ် အာဝ် ဟူ ဒူပ် နဝ်း ဟာယ် နဝ်း စီစိဝ် ဘော နဝ်း ဒိူဝ် ဂေ။ 18 ဒေါ အန် တီ ဂေ ဒူအီ အာယူဒါ ဒီ ဘော ဝီ လာယ် ကာလဝ့် လာယ် ဖြူမ် ရိုမ် ဒူပ် ဂေ ဒူအီ အီဆာရေလ။ ဂေ ဒီ ဘော ဘဲန် အူ ဖိုင် တး နာ ကွာ၊ ဝီ ဇမ် ခဲင် မိူင် ပဲ့ ဟဲ့ ဒွိုမ် အာပ် ဒွါ အုဝ် ဒီ ဂေ ဂုန့် ဒင် ဘေ၊ တဲး န့ ဘဲန် ခါဂုန် ဒီ ဂေ။

19 အုဝ် ဟဲ့ ဒါခိုယ် ဒီ တဲး ဘေ ပီ ဂွန် အုဝ်။ အုဝ် ဒီ ဒိုဝ်း မိူင် အီ ဟဲ့ မွှိုမ် လွှိုမ် ဒွန် မိူင်၊ ဝီ အာပ် ဒွါ ဒီ ဘေ၊ တဲး န့ ဘဲန် ခါဂုန် ဘေ။ အုဝ် ထာင်၊ ဘေ ဒီ ဘော ဒဲ့ အုဝ် တဝ်း၊ ‘မဲ မုး ဂုန့် ယေ။’ အုဝ် မိူဝ် ဟဲ့ ထာင်၊ ဘေ အာဝ် ဟူ ဝး အုဝ် ဘော ဒူပ် အုဝ်။

20 မာလဲ၊ ဘေ ဒူအီ အီဆာရေလ ပီ အီဘိုန့် အီ ဟဲ့ ဝဲန် အီမာယ် အန်။ ဘေ မိူဝ် ဟဲ့ ဝဲန် အုဝ် ပါယ် တီ။” ခဲ့ တီ ဇဝ်ဖြာ ဟဲ့ ကာလာင်။

21 ဒဲင် နွန် စာ ဟဲ့ ပွိုန် ယိုဝ် ဂြုဝ်း ဂေ အီ ဟဲ့ က့လိုဝ် ဟဲ့ ငှဝ် ဘော ယာမ်။ န့ ဘော မုး ဂြုဝ်း ဂေ ဒူအီ အီဆာရေလ အီ ကွယ် ဒီ တီ။ ဂေ ဟဲ့ ပီ ဒူအီ အီ ဟဲ့ ကာလိုပ် န့တေန့်။ ဂေ ဟဲ့ ပိဝ် ဟဲ့ ဝဲန် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ။

22 အိုယ် ဘေ အီ တူ မိုဝ်း နဝ်း ဆိူဝ် နဝ်း မှာန်၊ တဲး ဘေ ဝီ ဘျွင် နဝ်း ဘေ။ အုဝ် ဒီ ဘူင် တဲး နဝ်း ဘေ ဝီ ဘဲန် နဝ်း ဆိူဝ် နဝ်း မှာန်။ တဲး ဘေ မိူဝ် ဝီ တဝ်း၊ ‘ယေ ဒီ ဝီ တး ဒူင် ကွယ် မဲ ဇဝ်။ ခုဝ်၊ မဲ ဇဝ် ဘော မုး ဇဝ်ဖြာ ပီ ကြိုပ် ယေ။

23 ဟဲ့ မှာန်၊ လွင် ပဲ့ ဟဲ့ ကြိုပ် အီ ဒဲင် နွန်၊ အာဝ် မိုဝ်း ဒီခုဝ် မာဆေ။ ဇဝ်ဖြာ အီ မုး ဇဝ်ဖြာ ပီ ကြိုပ် အေ၊ အန် ဘော မုး အီ ဒီ ချွတ် ဒူအီ အီဆာရေလ။

24 ဆိန့် ဒေါ ဆီ နှိုမ် အေ၊ ဇဝ် ပီ ကြိုပ် အီ ဟဝ် အီ မွှိုမ် ဆာယ် ဟဲ့ ဟွတ့် ဟူမ် တူတ့် ကြုဝ်ကြာမ် ပဲ့ ဟဲ့ ဟြေတ့် အုန် ဂေ ဂုန့် ဒင် အေ။ န့ ဘော မုး ဖိုင် မာဘူ ဂေ ဖိုင် မာမက် ဘော ဂွန် အီဘိုန့် ဂွန် အီမာယ် ဂေ။

25 န့ ပီ အေ လုဝ် အိတ် ကာလွှယ် ခဲင် မျုဝ် အီ တဲး အေ မွှိုမ် ဆာယ်။ န့ ဘော ပီ အာမျုဝ် အီ တဲး အေ စှိုမ် ဆာရေ ဒီ ပ့လိုက် အေ။ ခုဝ်၊ ဘော အေ ဘော ဂေ ဂုန့် ဒင် အေ ဟဲ့ ဘူင် လုတ့် ဇဝ်ဖြာ အီ မုး ဇဝ်ဖြာ ပီ ကြိုပ် အေ။ ဆိန့် ဒေါ နှိုမ် အေ ကော ဇမ် ဒေါ တီ နီ အေ မိူဝ် တူ ထူမ် ဂြုဝ်း ဇဝ်ဖြာ အီ မုး ဇဝ်ဖြာ ပီ ကြိုပ် အေ။’”