1 ဇဝ်ဖြာ ဝီ တဝ်း၊ “အိုယ် ဘေ ဒူအီ အီဆာရေလ၊ ဆေ ဘေ ဆီ ဝီ တး ဒူင် ကွယ် အုဝ်၊ တဲး ဘေ ဝီ တး။ ဆေ ဘေ ဆီ ဝဲန် အီ မွှိုမ် ကာအိး ပဲ့ ဟဲ့ ဒွိုမ် ဘူင် ဘေ၊ တဲး ဘေ ဝဲန်၊ ကွဲ့ တဲး အုဝ် ဆီ ယိုဝ် လွင် အန် တီ။ အာဝ် လုဝ် ကာလိုပ် န့တေန့် ဆေဆေ။

2 ဆေ ဘေ ကော မိုဝ်း နဝ်း ဆိူဝ် နဝ်း မှာန် ဘော ဆုင်ဖျာတ် ဒူပ် ဒါရာ ဆိူဝ် ဆိူဝ် မှာန် မှာန် ဘော ဒိူင် တဝ်း၊ ‘တဲး ဇဝ်ဖြာ ထူမ် ဂြုဝ်း ပီ ဒိူင် ယေ၊’ ဆေ ဘေ တဝ်း ပါယ် တီ ဇဝ်ဖြာ ဒီ ဘော မွင့်ကာရာ ဒွါ ဒီ ဘေ။ ဘေ မိူဝ် ဒီ ပွိုန် နဝ်း တာင် ဒီ ဇဝ်ဖြာ။”

3 ဇဝ်ဖြာ ပီ ဝီ ကာလာင် ဒီ ဒူအီ အာယူဒါ ဂါယ် ဒူအီ ခဲင် မိူင် ယေရူဆာလဲမ် တဝ်း၊ “တဲး ဘေ ထဲ ဒူင် နာ ဘေ။ ကွဲ့ တဲး ဘေ ဘြတ် ဆီမာ ငှုဝ် ဘေ ခဲင် ယွုန် မာအာတ့်။

4 ဘေ အီမာယ် ခဲင် မိူင် ယူဒါ ဘော အီမာယ် ခဲင် မိူင် ယေရူဆာလဲမ်၊ တဲး ဘေ ခမ် ဒီ ဆွာ့ ဝဲန် ဟုန် လခါနာ ဘေ အာဒါ ဇဝ်ဖြာ။ တဲး န့ ပီ ဘေ ဆွာ့ ဝဲန် အီ တူ မွှိုမ် ခဲင် နဝ်း ဘေ။ ဆေ အာဝ် ပါယ် တီ နဝ်း ရူ အုဝ် ဒီ ဘော လေး ပီ ငဝ်။ န့ မိူဝ် တူ မိုဝ်း အာဆေ အီ ဒီ ပဲ ဒီ ဘျတ် ငဝ် တီ။ ခုဝ်၊ ဘေ ဘောကာဂ့လျီတ် ဟဲ့ ဘူင် အီ တူ ဘွတ် အီ တူ မွှိုမ်။”

5 “တဲး ဘေ ဟာဝ် ကာလာင် ခဲင် မိူင် ယူဒါ ဘော ဒတ် ဒဲ့ ခဲင် မိူင် ယေရူဆာလဲမ်။ တဲး ဘေ ဘုတ် ဝဝ်၊ တဲး ဟမ် အန် ကော ကာလတ့် ဘော မိူင်။ တဲး ဘေ ဘော ဒတ် တာင်၊ တဲး ဒူအီ ဘောကာဂ့လျီတ် တး ကာဇု ခဲင် မိူင် အီ မိုဝ်း ရဲင် အီ ဟဲ့ မန် ဆီချာ။

6 တဲး ဘေ အုန် ပဲ့ အီ ဘျ န့တေန့် အီ ဟာဝ် ဒီ နွန် ဇီအူန်။ တဲး ဘေ ဟာဝ်၊ တဲး ဘေ လွတ် အာဖေ အာရေ။ ကွဲ့ ထိူင်၊ တဲး ဘေ ဟာဝ် ဟဲ ဟဲ ခြန် ခြန်။ ခုဝ်၊ အုဝ် ဒီ တဲး ဒူအီ တး ဘ့လာက် နာ ကွာ။ ဂေ ဘော ဒွါ ဒုက် တာင် ဒီ ဘေ ဘော ဘူင် တဲး န့ ကာပျာတ့် လိုဝ် တူတ့် ဒွန် မျုဝ်။

7 ဒါ အီ ဒီ ပျာတ့် အာမျုဝ် ဒူအီ ဒွန် မျုဝ် တီ ဟဲ့ ဟာဝ် ဒူပ် န့တေန့် ပီ မာခြင်ဆီ အီ လေး ခဲင် ကာလှိုပ် ဒူင် အိတ် အန်။ အန် ဟဲ့ လေး ဒူင် ကွယ် အန်၊ အန် ဒီ ဘူင် တဲး မိူင် ဘေ ကာပျာတ့် လိုဝ်၊ ကွဲ့ တဲး န့ ဆီ မိုဝ်း ဒူအီ။

8 ကူပ် ပါယ် တီ တဲး ဘေ ဝီ စှိုပ် ဒီ တာ ခြိုင် စာန်၊ တဲး ဘေ က့လိုဝ် ဘော ငှဝ် ဘော ယာမ် တာင်။ ခုဝ်၊ နဝ်း ရူ ဇဝ်ဖြာ ဒီ အေ တူ ယူမ် တူ လူင်။ အန် ဇဝ် ဒိူန် ဒီ တဲး အေ ခမ် ဒုက် အီ မွှိုမ် ယုဝ် ကာဆဝ်။

9 ဒေါ အန် တီ ခုန်ဒီခမ် ဘော ဂေ အာမူ အာမာတ် အန် ဘောကာဂ့လျီတ် ဒီ ဘော ဘဲန် နဝ်း လိုဝ်။ ဂေ ဒါ အီ လှူ ဒီ ဇဝ်ဖြာ ဒီ ဘော ဘဲန် ဂ့၀ွင် ကာဝှ်ု ကာဝျှီန်။ ဂေ ဒါ အီ ဘျာန် ဂြုဝ်း ဇဝ်ဖြာ ဒီ ဘော ကာစွာ ကာပိုန့် ဘော အာမ် ကာဆဝ်။” ဇဝ်ဖြာ ဟဲ့ ကာလာင် ပါယ် တီ။

10 ဒေါ အန် တီ အုဝ် ဝီ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ န့ ပီ မဲ ဇဝ် ဟဲ့ ကာလုဝ် ဒီ ဒူအီ ဂေ နီ ဘော ဒီ ဂေ ဒူအီ ခဲင် မိူင် ယေရူဆာလဲမ်။ မဲ ဇဝ် ဟဲ့ ဒွိုမ် ကာလာင်၊ ဂေ ဒီ ဝီ မိုဝ်း နဝ်း နှိမ် နဝ်း ယေန်။ မာလဲ၊ န့ ပီ မာပွါ့ လာင် ယီ ဟဲ့ ဝီ ကွယ် ဒဲင် မဲင် ယေ။”

11 ဒေါ အန် တီ ဇဝ်ဖြာ ဒီ ဝီ ကာလာင် ဒီ ဒူအီ ခဲင် မိူင် ယေရူဆာလဲမ် တဝ်း၊ “ခုန် အီ ကာဟွာ့ ကာဆဝ် ဒီ တး ဒဲင် နွန် စာ ခဲင် ပြဲ ကာဟဝ်း။ န့ ဒီ ဝီ တး ဇမ် ဒူင် ကွယ် ဂေ ဒူအီ အာမျုဝ် အုဝ်။ န့ ယီ တူ မုး ခုန် အီ ဒီ တး ဘုတ် တဲး န့ လိူမ်၊ တဲး န့ ဂ့လျီတ် ဆီချာ။ 12 ခုန် အီ ဆီ ဟဲန့် လွှိုမ် တီ ပီ ဒီ ဝီ ဘုတ် ကာဆဝ်၊ တဲး န့ ကော ကာပျာတ့် ခဲ့ ပီ လုဝ် အုဝ်၊ တဲး အုဝ် ဒမ် မှာပ် ဒီ ဂေ။”

13 ဘ်ု ဘေ ယွတ်၊ ဒါ အီ ပီ ခုန် တီ အီ ဒီ ပျာတ့် ဒွန် မျုဝ်၊ အန် ဒီ ဘော တး ပီ န့အု ဝွင့်။ လက်လဝ် ပီ ပဝ့် အန် ဘော ပီ ခုန် လာင်။ မင်ပြွင့် အန် မိူဝ် ဒီ ဘော ခြန် လွှိုမ် မာဂ့လာင်။ န့ ဒီ တဲး အေ ခမ် ဒုက် တာင် ဘော လိုဝ် စှိုမ် တူတ့်။

14 အိုယ် ဘေ ဒူအီ ခဲင် မိူင် ယေရူဆာလဲမ်၊ တဲး ဘေ ဝဲန် မှာပ် အီ တူ မွှိုမ် ဒွန် မျုဝ်၊ တဲး န့ ပီ ဘေ ဆုတ် ဘာယ် နဝ်း ဘေ တဲး န့ လုယ် ဆီငါ။ ဆေ ဘေ ဘူင် ပါယ် တီ အုဝ် အီ မုး ဇဝ်ဖြာ ဒီ ဘော ချွတ် ဘေ။ တဲး ဘေ ဝဲန် အာကျာမ် အာငျာန် ဘေ အီ ဟာယ် အီ မိူက်၊ ကွဲ့ တဲး ဘေ ဘူင် ဟာဝ် ပွါ။

15 န့ ဘော မိုဝ်း အီ ကာလာင် ဂြုဝ်း အီ တး ခဲင် ကာဒါယ် မိူင် ဒါန်။ န့ ဘော မိုဝ်း ဂြုဝ်း အီ ဒတ် တး ဒီ နွန် အာအေဖာရိမ်။

16 ဇဝ်ဖြာ ဝီ တဝ်း၊ “တဲး မဲ ကာလာင် လွင် အန် တီ ဒီ ဂေ ဒူအီ ဒွန် မျုဝ်။ တဲး ဘော ဒူအီ ခဲင် မိူင် ယေရူဆာလဲမ် နပ်။ ဂေ ဒါ ဆိုက် အီ ကိူန် အီ ကျ ဒီ ကာဂုဝ်း၊ အီ တး ခဲင် မိူင် တူင့် ကာဆဝ်၊ ဂေ ဟဲ့ ဒတ် တဝ်း ဒီ ကာဂုဝ်း ဒွန် မိူင် အီ ကွယ် ခဲင် ကာဒါယ် မိူင် ယူဒါ။

17 ဂေ ဘော ဘ်ု ဘော ဝဲင် ရူပ် မိူင် တဲး န့ ပီ ဒူအီ အီ ဘ်ု မာန် ဂေ ဒူင် နာ။ ခုဝ်၊ ဂေ ဒူအီ ခဲင် မိူင် တီ၊ ဂေ ဟဲ့ ကာဘး ဒီ အုဝ်။” ခဲ့ တီ ဇဝ်ဖြာ ဟဲ့ ကာလာင်။

18 “ပဲ့ ဟဲ့ ဘူင် ဘေ အီ တူ မွှိုမ်၊ န့ ဟဲ့ တဲး ဘေ ဝီ ခမ် လွင် အန် တီ။ န့ မုး အာဂျိုဝ် ပီ ဘူင် ဘေ အီ ဟာယ် အီ မိူက်။ န့ ဒီ ဘော ဆွင့် ဘော ကာဆဝ် ဒီ နဝ်း ဘေ။”

19 အာလိုဝ်၊ န့ ဟဲ့ ဒုက် ကာဆဝ် ဒီ နဝ်း အုဝ်၊ ဟဲ့ ညှာပ် ထွုန် ဒီ နဝ်း အုဝ်။ ဟဲ့ ဆဝ် ဘော ဒီလှဝ့် နဝ်း အုဝ်။ နဝ်း အုဝ် မိူဝ် ဟဲ့ တာ တိုက် ဟဲန့် ကာဆဝ်။ အုဝ် မိူဝ် အာဝ် ဟူ ပွိုန် ကွယ် နှိမ် နှိမ်။ ခုဝ်၊ အုဝ် ဟဲ့ ယိုဝ် ဟမ် ဝဝ် ဘော ပီ ဒတ် ဂေ အီ တဝ်း ဒီ လာယ် ကာဂုဝ်း။

20 ဆေ အာဖေ အာရေ အူ မျုဝ် ဟဲ့ ပွုန်၊ ပေါ အူ မျုဝ် ပီ ဒီ ဝီ တး ဒူပ်။ န့ ဘော တဲး မာန် မိူင် လိုဝ် စှိုမ် ဘော မိူင်။ အူ ကာစန် ထိုပ် အုဝ် ဟဲ့ လိုဝ် တူတ့်။ ပီ ဂွင့် အုဝ် မိူဝ်၊ အူ ကာစန် ဟဲ့ ဟွတ့် ကာပျာတ့် တူတ့်။

21 အုဝ် တူ နပ်၊ အုဝ် ဒီ ဘော လုဝ် ယွတ် အာလာမ် ရန်ဆူ ဘော ထူမ် ဟမ် ဆီနန် ဆီနိူင် ဂေ အီ လာယ် ကာဂုဝ်း၊ န့ ဒီ လှေန့် ခဲ့ မှဝ်။

22 ဇဝ်ဖြာ ပီ ဝီ တဝ်း၊ “ဂေ ဒူအီ ပီ အိုပ် အုဝ်၊ ဂေ ဟဲ့ ပီ ဒူအီ ရိုဝ်။ ဂေ အာဝ် ဟူ နပ် အုဝ်။ ဂေ ဟဲ့ ပီ ဂွန် အီ ဟာယ် အီ မိူက် အီ တူ မိုဝ်း အာငျာန်၊ အီ တူ နပ် မာဆေ။ ဂေ ဝီ လွှက့် လှဲမ် မီ လွင် နာ တူ ဘွတ် တူ မွှိုမ်။ ဂေ အာဝ် ဟူ ဝီ နပ် ပီ ဒီ ပါယ် ဒီ ဝီ ဘူင် နာ ဘွတ် နာ မွှိုမ်။”

23 အုဝ် ဝီ ယွတ် ကာဒါယ်၊ အာဝ် မိုဝ်း အာရိုပ် အန် ဘော အာဝ် မိုဝ်း မာဆေ ဒဲင် ကာဒါယ် နီ။ အုဝ် ပီ ဝီ ယွတ် ခဲင် ဂါင်ဟြာဝ် မိူဝ်၊ အာဝ် ဟူ မိုဝ်း ဘ့လာင် အန်။

24 အုဝ် ယွတ်၊ ခဲ့ ကွယ် နွန် ဘောကာဂ့လျီတ် ဘော ရ်ု ဒီယုး ဒီယေန့်။ ကူင့် နွန် ဒွန် ပ့လုဝ့် ဘော ရ်ု ဝိဝ် ရ်ု ဝေန့်။

25 အုဝ် ဝီ ယွတ်၊ တူ ယိုဝ် ဒူအီ။ ဂေ မာဆိမ် အီ ကွယ် ခဲင် ဂါင်ဟြာဝ် မိူဝ် ဟဲ့ ကာဖြူမ် ဒီ ဘိုန့် တဝ်။

26 အုဝ် ဝီ ယွတ်၊ ခဲင် ဒူင် နာ အီ မိုဝ်း ဟေ ဘ့လေ ဟဲ့ ဝီ ဘဲန် တူတ့် ပြဲ ကာဟဝ်း။ မာန် မိူင် မိူဝ် ဟဲ့ ကာပျာတ့် လိုဝ် တူတ့် ဒီ အာတ့် ဇဝ်ဖြာ ကူပ် ဟဲ့ ရူ ကာဆဝ် အန် ဇဝ်။

27 ဇဝ်ဖြာ ဟဲ့ ဟွတ့် တဝ်း၊ “မာန် မိူင် ဘော မိူင် ဒီ လိုဝ် ကာပျာတ့်။ မာလဲ၊ အုဝ် ယီ တူ ဘူင် တဲး န့ ကော လိုဝ် တူတ့်။”

28 ကူပ် ပါယ် တီ ကာဒါယ် နီ ဒီ ဘော ခမ် ဒုက် ဘဲန် က့လိုဝ် ဘဲန် ငှဝ်။ ဂါင်ဟြာဝ် မိူဝ် ဒီ အပ် ဝွင့် ဒီတိန့်။ အုဝ် ဟဲ့ ဟွတ့် ကာလာင်၊ အုဝ် ဒီ ဘူင် ပါယ် တီ။ အုဝ် မိူဝ် တူ ကာပ့လု နဝ်း အုဝ်၊ တူ ကာဝိဝ် ပီ ခြာမ် အုဝ်။

29 ဂေ ဒူအီ ခဲင် မိူင် ဘောကာဂ့လျီတ် ဘော ကာဖြူမ် ဒီ လေး တဝ် ကူပ် ဟဲ့ ယိုဝ် ဂေ ဟမ် ဒါ ဆိုက် အီ ပဝ့် မင်ပြွင့် ဘော ဒါ ဆိုက် အီ ဂူင့် အ။ ဒူအီ ဂေ တီ ဘော တဝ် ဟာဝ် ချြီင် ဒုဝ် ဂေ ခဲင် ယွုန် ဘော ခဲင် ပြဲ။ ဂေ ဘော တဝ် ဟုဝ့် ချြီင် ဂေ ကာတဲ ဒါအာင် မာဝ်။ ခဲ့ ကွယ် မာန် မိူင် ဒွန် မိူင်၊ ဂေ ဟဲ့ ဝဲန် တူတ့်၊ အာဝ် မိုဝ်း ဒူအီ ခေါ အူ ဝီ။

30 အိုယ် ဘေ ဒူအီ ပဲ့ ဟဲ့ ပျာတ့် အီ ဟဝ်၊ မှဝ် န့ ပါယ် ပီ ဝီ စှိုပ် ဘေ ခြိုင် ရေန့် ဂဲ၊ ဝီ စှိုပ် ဘော ကန်ဒဲ၊ ဂင်ခုဝ် ဘော ဆီကာနူ ခြိဝ်၊ ဝီ မ့ပြာယ် ဘော အာရိုပ် ဘေ ဘော ဟိုက် ငါယ် ဘေ။ ဘေ ပီစှိတ် ဘေ ဒီလူယ် ဒီလာယ်၊ အာဝ် မိုဝ်း ဒီခုဝ် မာဆေ။ ပါဝ် ဘေ အီ ဟဲ့ ဒွိုမ် ရွက့် ဘေ၊ ဂေ ဟဲ့ ဟွတ့် ဝဲန် ဘေ။ ဂေ ဟဲ့ ဝီ ဆီ ငဝ်း ယမ် ဘေ။

31 အုဝ် ပီ ဝီ ယိုဝ် ဂြုဝ်း အီ ပီ အီဘိုန့် ဆဝ် ဒီ မိုဝ်း ဂွန်။ န့ ပီ အီဘိုန့် ဟဲ့ ခမ် ဒုက် ဒေါ ဒီ မိုဝ်း အန် ဂွန် ဂိန့် အန်။ န့ ဘော မုး ပီ ဒတ် ဂေ အီဘိုန့် အီ ကွယ် ဒီ နွန် ဇီအူန်။ ဂေ ဟဲ့ ဒတ် ဟဲ့ နှဲန် ဖွိုမ် ဂေ ဒီ တူတ့်။ ဂေ ဟဲ့ ဘ့လး ဒဲ ဂေ ဘော ဒဲ့၊ တဲး န့ မိုဝ်း အီ စွယ် ဂေ။ ဂေ တဝ်း၊ “ယေ ဟဲ့ ခမ် ဒုက် တာင် ကာဆဝ်။ နဝ်း ယေ မိူဝ် ဟဲ့ ဒီလှး ဟဲ့ နုန် ကာဆဝ်၊ အာဝ် ဟူ ပွိုန် ကာခဲန့် ဒီ ဒူအီ အီ ဆီ ငဝ်း ယမ် ယေ။”