1 ဇဝ်ဖြာ တဝ်း၊ “တဲး မဲ ဟာဝ် ဝိဝ် ဟာဝ် ဝေန့် ဒူပ် န့တေန့် ခဲင် မိူင် ယေရူဆာလဲမ် ဘော ဆာခိ ဒီ ယွတ် ဒူအီ ခဲင် ဝဲင် မိူင်၊ ယုဝ် န့ မိုဝ်း ခေါ အူ ဝီ အီ ဘူင် ဒူပ် ဒါရာ ဘော မိုဝ်း နဝ်း ဆိူဝ် ဆိူဝ် မှာန် မှာန်။ ဆေ န့ မိုဝ်း၊ အုဝ် ဒီ ဂဝ်း ဝဲန် မှာပ် ဂေ ဒူအီ ဘောကာဂ့လျီတ် ခဲင် မိူင် တီ။”

2 ဂေ ပီ ဘော ဒိူင် တဝ်း၊ “တဲး ဇဝ်ဖြာ ထူမ် ဂြုဝ်း ယေ၊” ဂေ ယီ ကာလုဝ် ဒီ ဒိူင်။

3 အိုယ် ဇဝ်ဖြာ၊ မဲ ဇဝ် ဘော ဆီ ယိုဝ် နာ ဆိူဝ် နာ မှာန်။ မဲ ဇဝ် ပီ ဘော ဟဲ့ ဒမ် မှာပ် ဒီ ဂေ မိူဝ်၊ ဂေ ယီ တူ ယုဝ် တူ နဝ်း တျီ့။ မဲ ဇဝ် ပီ ဘော ဟဲ့ ဝဲန် ဂေ မိူဝ်၊ ဂေ ယီ ဝဲန် ပီ မာနုဝ် မဲ ဇဝ် ဒီ ဂေ။ ဂေ ဘော ဝီ ပီပ့လူမ် ဂိန့် ဂေ လွှိုမ် မာဝ်။ ဂေ ဝီ ထဲန့် မဲ ဇဝ်၊ တူ ခမ် ဒီ ဘျွင် နဝ်း။

4 အုဝ် မိူဝ် ဝီ တဝ်း၊ “ဒူအီ ဂေ နီ၊ ဂေ မုး ဒူအီ ဂိန် ဒူအီ ဖ့လာန်၊ ဂေ တူ မိုဝ်း အာငျာန် ဘော တူ နပ် မာဆေ။ ခုဝ်၊ ဂေ တူ နပ် လွင် ဇဝ်ဖြာ ဘော ဒါရာ ပီ ဒမ် အုန် ဇဝ်ဖြာ။

5 ခုဝ်၊ အုဝ် ဝီ တဝ်း ဒီ ဝီ ဟာဝ် ဒူင် ကွယ် ဂေ ဒါ တာင်၊ ကာလာင် ဒီ ဂေ။ အုဝ် ထာင်၊ ဂေ ဟဲ့ နပ် ဇဝ်ဖြာ ဘော ဒါရာ ပီ ဒမ် အုန် အန် ဇဝ်။ မာလဲ၊ အာဝ် ဝီ မုး ပါယ် တီ။ ဘော ဂေ တူ ထူမ် ဂြုဝ်း ဇဝ်ဖြာ။” န့ ပီ ဘော ဂေ ဟဲ့ ကာဘက် ဝဲန် အဲ့မဝ် ပီ ဒွါ အန် ဇဝ် ဂေ စှိုပ်။ န့ ဘော ပီ ဂေ ဟဲ့ ဒဲပ် ဝဲန် ဝန် ပီ ပက် အုန် အန် ဇဝ် ဒီ ဂေ။

6 ကူပ် န့ ပါယ် တီ မာခြင်ဆီ အီ ဒီ တး ခဲင် ပြဲ ဒီ ဘော တး ကဝ့် ယမ် ဂေ။ မာဆုဝ် ပြဲ အီ ဒီ တး ခဲင် ပြဲ ကာဟဝ်း ဒီ တး ပျာတ့် ဂေ၊ တဲး ဂေ လိုဝ် စှိုမ် တူတ့်။ မာဒီဝါယ် ဆီဇိုမ် ဒီ ဘော ဝီ ဘ်ု မိူင် ဂေ။ ဆေ ဒူအီ အီ လေး ဟာဝ် နာ ရေတ့် မိူင်၊ အန် ဒီ ဘော ကဝ့် ကာဒတ် ဂေ။ ခုဝ်၊ မှာပ် ပဲ့ ဟဲ့ ကာဘး ဂေ ဒီ ဇဝ်ဖြာ ဘော မှာပ် ပဲ့ ဟဲ့ လုတ့် ဂေ ဘဲန် မျုဝ် ဘဲန် မျုဝ် ဟဲ့ ကိူန် ကာဆဝ်။

7 “ပါယ် တီ အုဝ် တူ ပွိုန် ဂဝ်း ဝဲန် မှာပ် ဘေ။ ဂွန် ဘေ ဟဲ့ ဝဲန် အုဝ်။ ဂေ ဟဲ့ ဒိူင် ဟဲ့ ကာဆဲန့် တဲး ဇဝ် အီ တူ မုး ဇဝ်ဖြာ ထူမ်။ အုဝ် ဟဲ့ ဟျီင် ဖဲ ဂေ ဘော ဒွါ ခဲ့ ပီ လုဝ် ဂေ ဒွန် မျုဝ်။ ဂေ ယီ ဝီ ဒူပ် ဇဝ် ဘဲန် မျုဝ် ဘဲန် မျုဝ်၊ တဲး န့ ပီ ဂေ လာယ် လုတ့် လာယ် လာယ်၊ ဝီ ဟာဝ် ကွယ် နုဝ့် ခဲင် ကာင် ယာ မာလမ်။

8 ဂေ ဘော ပီ မ့ပြွင့် အာလူင့် အီ ဟဲ့ ကာဟဲ၊ ဟြေတ့် ဒီ ဒူပ် ဒုဝ် မာ။ ဂေ ဒွန် အီ ဝီ ဟြေတ့် ဒီ ဒူပ် အီဘိုန့် ဒူအီ ဟဝ်။

9 ကူပ် ဘူင် ဂေ ပါယ် တီ အုဝ် လုဝ် ဒမ် မှာပ် ဒီ ဂေ ဘော ဝီ ဘူင် ဝျီ့ ဒီ ဂေ။” ဇဝ်ဖြာ ဟဲ့ ကာလာင် ပါယ် တီ။

10 ဇဝ်ဖြာ ပီ ဝီ တဝ်း၊ “တဲး ဘေ ဟာဝ် ပျာတ့် ဝဲန် မာန် မာငုန် ဂေ။ မာလဲ၊ အာဝ် လုဝ် ဘူင် တဲး န့ ကော လိုဝ် တူတ့် ဒွန် မျုဝ်။ တဲး ဘေ ဟာဝ် ဘက် ဝဲန် ဘော ရာ ဟေ မာငုန် ဂေ။ ခုဝ်၊ ဒူအီ ဂေ တီ ဂေ တူ ခမ် ဇဝ်ဖြာ အိုပ် ဂေ။

11 ဂေ ဒူအီ အီဆာရေလ ဘော ဒူအီ အာယူဒါ ဟဲ့ ဘူင် အီ တူ ကာဆိူဝ် ဒီ အုဝ်။” ဇဝ်ဖြာ ဟဲ့ ကာလာင် ပါယ် တီ။

12 ဂေ ဘော ဝီ ကာလုဝ် ဒီ ကာလာင် နာ တူ မုး တူ မှာန် လွင် ဇဝ်ဖြာ။ ဂေ တဝ်း၊ “အန် ဇဝ် တူ ဘူင် မာဆေ ဒီ အေ။ အာဝ် မိုဝ်း အာဖေ အာရေ ခေါ အူ မျုဝ် အီ ဒီ တး ဇမ် ဒီ အေ။ အေ မိူဝ် တူ လုဝ် ခမ် ဒုက် ဒီ မာပွါ့ လာင် ဘော ဒုက် အေတ့် ပီ ဒီ ဟူမ်။

13 ဂေ ဒါ အီ ဘျာန် ဂြုဝ်း ဇဝ်ဖြာ မိူဝ် အာဝ် မိုဝ်း ဒီခုဝ် မာဆေ။ ဂေ ဘော ပီ ဟိုတ့် ပီယေန့်။ ဂြုဝ်း ဇဝ်ဖြာ မိူဝ် တူ ကွယ် ခဲင် နဝ်း ဂေ။ ပီ ကာလာင် ဂေ တီ၊ တဲး ဂေ ဝီ ခမ်။”

14 ဇဝ်ဖြာ အီ အိုပ် တူတ့် ဒွန် မျုဝ် ဝီ တဝ်း ပါယ် နီ၊ “ကူပ် ကာလာင် ဂေ ဂြုဝ်း ဇိုဝ် တီ၊ အုဝ် ဒီ တဲး ဂြုဝ်း အုဝ် ပီ ငဝ် အီ ကွယ် ခဲင် မူတ့် မဲ။ ဒူအီ ဂေ တီ၊ ဂေ ဒီ ဘော ပီ ဟေ အီ ကာဆိုမ် ခဲင် ငဝ် တီ။”

15 ဇဝ်ဖြာ ပီ ဝီ တဝ်း၊ “အိုယ် ဘေ ဒူအီ အီဆာရေလ၊ အုဝ် ဒီ ဝီ ဒဲ့ ဒူအီ အူ မျုဝ် အီ ကွယ် တူင့်၊ ဝီ တး ကာဂုဝ်း ဒီ ဘေ။ ဂေ ဘော မုး ဒူအီ အီ မိုဝ်း ပ့လူမ် တာင်၊ ဒူအီ အာမျုဝ် အီ ဟဲ့ ဒွိုမ် မိုဝ်း ဆိန့် ဒေါ မွိုန်။ ဘေ မိူဝ် တူ နပ် ဂြုဝ်း ပီ ကာလာင် ပီ တဝ်း ဂေ။

16 ဘယ့် ဘ့လာ ဂေ၊ န့ ဘော ပီ ကာဒဝ် ဘာရေဝ်။ ဂေ ဘောကာဂ့လျီတ် ဘော မုး ဒါ ဆိုက် အီ မိုဝ်း ပ့လူမ် ဂေ ဟဲန့် ကိူန်။

17 ဂေ ဒီ ဘော ဟူမ် ငှုဝ် ဒီဂါဝ် ဘေ၊ ဟူမ် ဘော ပီ ဒီ ဟူမ် ပီ ဒီ ဒျီင် ဘေ။ ဂေ ဒီ ဘော မှေတ့် ဟာဝ် ဂွန် အီဘိုန့် ဘော ဂွန် အီမာယ် ဘေ။ ဂေ ဒီ ဘော ငဝ်း ဟူမ် ဘော ဖိုင် မာဘူ ဖိုင် မာမက် ဘေ။ ဂေ ဒီ ဘော ပျာတ့် ဝဲန် ဟေ မာငုန် ဘော ဟေ ဒီပူ ဘေ။ ဂေ ဒီ ဘော တာ မာပွါ့ လာင် ဂေ၊ ပျာတ့် ဝဲန် တူတ့် မိူင် အီ ဟဲ့ မန် ဆီချာ ဒူင် ဘိုင် ဒူင် ကွယ် ဘေ တီ။”

18 ဇဝ်ဖြာ ပီ ဝီ တဝ်း၊ “ပီ ဘော ဟဲ့ ဘဲန် ပါယ် တီ မိူဝ်၊ အုဝ် ယီ တူ ဘူင် တဲး ဘေ ကော လိုဝ် စှိုမ် တူတ့်။” 19 ဂေ ဒူအီ အာမျုဝ် ဘေ ဒီ ဘော ဒီမွှတ် ဘေ တဝ်း၊ “မှဝ် မ့ပါယ်၊ ဇဝ်ဖြာ အီ မုး ဇဝ်ဖြာ ပီ ကြိုပ် အေ ဆော ဘူင် ပါယ် နီ ဒီ အေ။း” ဒေါ အန် တီ မဲ လုဝ် ဝီ ကာလာင် ဒီ ဂေ တဝ်း၊ “န့ ဘော မုး ကူပ် ဟဲ့ ဝဲန် ဘေ ဒီ အုဝ်၊ ဟဲ့ ဝီ ဟာဝ် ကြိုပ် ဇဝ် ပီ ကြိုပ် ဒူအီ အာမျုဝ် ဟဝ် အီ ကွယ် ခဲင် မိူင် ဘေ နီ။ ခုဝ်၊ ဘေ မိူဝ် ဒီ လုဝ် ဘဲန် မှာယ် ဒူအီ ပေါ အူ မိူင် အီ တူ မုး မိူင် ဘေ။”

20 တဲး ဘေ ဟာဝ် ကာလာင် လွင် အန် တီ ဒီ ဂေ ဒူအီ အာမျုဝ် အာကူပ်။ တဲး ဘေ ဒတ် ဒဲ့ ဒီ ကာလာင် ခဲင် ကာဒါယ် မိူင် ယူဒါ။

21 “အိုယ် ဘေ ဒူအီ ရိုဝ် ဘော ဒူအီ အီ တူ မိုဝ်း အာငျာန်၊ တဲး ဘေ ထူမ်။ ဘေ မိုဝ်း ငါယ်၊ ဘေ ယီ တူ ပွိုန် ယိုဝ် မာဆေ။ ဘေ မိုဝ်း ဟျုဝ့် ၊ ယီ တူ နပ် ဒီ ထူမ် ဆီချာ။”

22 ဇဝ်ဖြာ ပီ ဝီ တဝ်း၊ “ဘေ ဟဲ့ ကာအာပ် ယုဝ် အုဝ် ဘော ဒီယုး ဒီယေန့် ဒီ အာတ့် အုဝ်။ န့ မုး အုဝ် အီ ဟဲ့ ဒိုဝ်း ကာဟာတ့် ဘူင် တဲး န့ ဘဲန် ကာအုန်၊ ကွဲ့ တဲး အိုမ် နမ်မုက်ဆာရာ မ့ပုန် ကာဒါယ်။ အိုမ် ပီ ဘော ဆီလွယ် ဟုဝ့် စာ ခဲ့ မှဝ်၊ န့ ယီ တူ ပွိုန် ကာလုဝ်း ကာဟာတ့် တီ ဒေါ မှဝ်။ အိုမ် ပီ ဘော ဒီငိုန့် တာင် ခဲ့ မှဝ်၊ အန် တူ ပွိုန် ပွုန် ဒူင် တီ။

23 မာလဲ၊ ဒူအီ ဂေ နီ၊ ဂေ ဘော ဒိူဝ် ကာဆဝ်။ ဂေ ဘော မိုဝ်း နဝ်း အီ ကာဘး ဒီ အုဝ်။ ဂေ မိူဝ် ဝး န့တေန့် အုဝ်။

24 ဂေ မိူဝ် တူ ကာဖာ ခဲင် နဝ်း ဂေ တဝ်း၊ ‘အေ ဟဲ့ ကာအာပ် ယုဝ် ဇဝ်ဖြာ။ ဇဝ်ဖြာ ဟဲ့ တဲး န့ မိုဝ်း ဂ့လာယ် အာတ့် ဆမ် ဘော ဂ့လာယ် ဝါယ် ဟဲ့ ဟွတ့် ဆမ် ဒေါ ဟဲ့ ဇမ် အာခြာဝ် အန်။ အန် ဇဝ် ဘော တဲး အေ မိုဝ်း အာခြာဝ် ပွိုန် ဒီ ဂဲပ် အုန် ဘ့လေ ပီ ဆမ် ပီ ပိတ် အေ။’

25 မှာပ် ပဲ့ ဟဲ့ ဘူင် ဘေ တီ၊ န့ တူ တဲး ဇဝ်ဖြာ ဒွါ အာခြာဝ် တီ ဒီ ဘေ။ မှာပ် ဘေ တီ ဟဲ့ ဝီ ဘဲန် အီ ဂွင့် အီ ရဲ နာ ဘွတ် နာ မွှိုမ် ဒီ ဘေ။

26 ဟဲ့ မိုဝ်း အီ ဟာယ် အီ မိူက် အီ ကွယ် ကာတဲ ဂေ ဒူအီ ပီ အိုပ် အုဝ်။ ဂေ ဘ်ု ဒီ မှေတ့် ဒူအီ ပီ ဒူအီ အီ ဒိန့် ယွတ့် ဂေ ခိူမ်၊ ဘ်ု ဒီ မှေတ့် မာဆိမ်။

27 ခဲင် ကာင် ဂေ ဟဲ့ မိုဝ်း တူတ့် အီ လာယ် ပီလွှက့် ဘော အီ လာယ် ကာလုဝ်။ န့ ဘော ပီ ဆီဘ့လုဝ်း ဒူင် ခြွင့် ဂေ မာဆိမ် အီ ဟဲ့ နုဝ့် နာ ခဲင်။ ဂေ မိူဝ် ဟဲ့ ကြဲ ဒီ ခြမ် ဘော မိုဝ်း ပွုန် တာင်။

28 ဂေ မိူဝ် ဟဲ့ ဂ့လန့် ဆီချွင် ဆီချာ။ နာ ဂေ မိူဝ် ဟဲ့ ဆာဘ့လာင်။ နာ ဟာယ် နာ မိူက် ပီ ဘူင် ဂေ တူ နပ် ဒီ တူတ့်။ ဂေ မိူဝ် တူ ဆုင်ဖျာတ် အာမူ ဂွန် ဆီပြး၊ တဲး န့ ဒူပ် ဒါရာ။ ဂေ မိူဝ် တူ ယွတ် မဲန် ဒူအီ ဂိန် ဒူအီ အေတ့်၊ တူ စွယ် အာမူ ဂေ ဂွန် ဆီပြး။

29 ကူပ် ဘူင် ဂေ ပါယ် တီ ဘေ ထာင်၊ န့ ညှမ် ကာအာပ် အုဝ် ဒမ် မှာပ် ဒီ ဂေ။း ဘေ ထာင်၊ အာဝ် ကာအာပ် အုဝ် ဝီ ဘူင် ဝျီ့ ဒီ ဂေ။း” ဇဝ်ဖြာ ဟဲ့ ကာလာင် ပါယ် တီ။

30 ဇဝ်ဖြာ ပီ ဝီ တဝ်း၊ “လွင် အီ မွှိုမ် ယုဝ် ဘော အီ မွှိုမ် ကာအိး ကာဆဝ် ဟဲ့ ဘုဝ် ဘဲန် ခဲင် မိူင် ဘေ။

31 ဂေ ဒါ အီ ဘျာန် ဂြုဝ်း ဇဝ်ဖြာ၊ ဂေ ဘော ကာလာင် ဂြုဝ်း အီ တူ မုး အီ တူ မှာန်။ ဂေ ဒါ အီ လှူ ဒီ ဇဝ်ဖြာ မိူဝ် ဝီ ဆုင်ဖျာတ် အာမူ အီ ဒူပ် ပီ အိုင် ဂေ။ မာလဲ၊ ဆေ ဟီ ဇမ် ပန် ဒီ တူတ့် ဇာတ် နီ၊ ဘေ ဆီ ဒီ ဘူင် မာဆေ။း”