1 ဇဝ်ဖြာ ပီ ဝီ တဝ်း၊ “အိုယ် ဘေ လှုက်လှာန် အာဘေန်ယာမ်၊ တဲး ဘေ လေး တဝ် ခဲင် မိူင် ယေရူဆာလဲမ်၊ တဲး ဘေ လွတ်။ တဲး ဘေ ဘုတ် ဝဝ် ခဲင် ဒူင် စိူဝ် ဒေကော။ တဲး ဘေ ဒမ် ဆာဒိက် ဂေ အီ ကွယ် ခဲင် ဒူင် စိူဝ် ဘေတ်ဟာခါရိမ်၊ တဲး အီ နပ် န့ ဒီ မိုဝ်း အာဖေ အာရေ တာင် အီ တး နာ ကွာ။ န့ ဒီ ကာပျာတ့် လိုဝ် တူတ့် ဒွန် မျုဝ်။

2 အုဝ် ဒီ ပျာတ့် မိူင် ဇီအူန် အီ ဟဲ့ ပီ ဒီဘျာ အီ ဟဲ့ စှိတ် ကာဆဝ် ဘော မိုဝ်း နဝ်း န့စု န့စမ်။

3 ခုန်ဒီခမ် ဘဲန် ကာဒင် ဘဲန် ကာဒင် ဒီ တး တိုယ် ဒါ ဆိုက် ဂေ ပီ ဒါ အီ ဟျီင် မာဘူ အီ ယဲတ့် ဖိုင် မာဘူ ဂေ၊ တဲး ဂေ ကွယ် ရူပ် မိူင် တီ၊ တဲး မာဘူ ဂေ ပွိုန် ဒီ ဟူမ် ပေတ့် ဒူင် ကွယ် ဂေ တီ။

4 ဂေ ဒီ ဘော တဝ်း၊ ‘တး တဲး အေ ကာဂုဝ်း ဒီ ဒူအီ ခဲင် မိူင် ဇီအူန်။ တဲး အေ ကာဂုဝ်း ဒီ ဂေ ဒေါ ကာတဲ ဆီငဲ နီ။’ မာလဲ၊ ဂေ ယီ ဝီ တဝ်း၊ ‘ဆီငဲ ဟဲ့ ဟွတ့် ကျီင်၊ ကာမိုက် ဟဲ့ တူင့် ကာဆဝ်။

5 ခုဝ်၊ တဲး အေ ကာဂုဝ်း ဒီ ဂေ ခဲင် မှိုဝ် နီ၊ တဲး အေ ပျာတ့် ဘော ဟုဝ် စာ အီ ဟဲ့ မန် ဆီချာ အီ မုး ဒူင် ချြီင် ဂေ။’”

6 ဟဲ့ ဟွတ့်၊ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “တဲး ဘေ ဂ်ု ဝဲန် ဟေ ဒီတာင်။ တဲး ဘေ ဂိုဝ်း ကာဒါယ် ဘူင် ဘ့လဝ့် န့တဲင် ဒီ ရဲင် မိူင် ယေရူဆာလဲမ်။ ဂေ ဒူအီ ခဲင် မိူင် တီ ဒီ ဘော လုဝ် ခမ် ကာဆဝ် မှာပ် ဂေ။ ခုဝ်၊ ခဲင် မိူင် တီ န့ ဘော မုး တူတ့် မီ အီ လာယ် ခါနှာပ်။

7 ဂေ ဒူအီ ခဲင် မိူင် တီ မိူဝ် ဂေ ဘော နပ် ဒီ ဘူင် မီ အီ ဟာယ် အီ မိူက် ဘော အီ တူ မွှိုမ်၊ တဲး န့ ပီ အိုမ် အီ လေး ခဲင် အိုမ် ခိုမ်။ န့ ဘော မိုဝ်း မီ ဆီနန် ဆီနိူင် အီ လာယ် ဖာတ် လာယ် ပျာတ့် တဲး န့ လိုဝ် စှိုမ်။ အုဝ် ဘော ယိုဝ် မီ ဒူင် ဒိမ် ဒူင် ဆဝ် ဂေ ဆေဆေ။

8 အိုယ် ဘေ ဒူအီ ခဲင် မိူင် ယေရူဆာလဲမ်၊ တဲး ဘေ ဆာဒိက်။ ဆေ ဘေ တူ ဘူင် ပါယ် တီ၊ အုဝ် ဒီ ဘော ကာအိး ကာဆဝ် ဘေ။ အုဝ် ဒီ ဘော ဝဲန် ဘေ၊ ကွဲ့ တဲး န့ ဆီ မိုဝ်း ဒူအီ ခဲင် မိူင် ဘေ ဒေါ မှဝ်။”

9 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဂေ ဒီ ဘော ဒိုဝ်း ဝဲန် ဒူအီ အီဆာရေလ အီ ဆီ ဂိတ် ဆီ ကွယ်၊ တဲး န့ ကော ပီ အီ ဘေတ့် ဘ့လေ မာငုန်၊ တဲး ဂေ ဒူမ် တဲး န့ ကော တူတ့် ဒွန် ရာ။

10 အုဝ် ဒီ ဘော ပွိုန် ကာလာင် ဂြုဝ်း ဒီ အာဆေ၊ တဲး အုဝ် ပွိုန် ဒီ ဒမ် ဆာဒိက် ဒီ ဂေ တဲး ဂေ ထူမ်။ ဂေ ဟဲ့ ဟွတ့် ကာဘိတ် တူတ့် ဟျုဝ့် ဂေ။ ဂြုဝ်း ဇဝ်ဖြာ မိူဝ် ဂေ တူ ရုဝ်ဆေ။ ဂေ မိူဝ် တူ အိုင် တူ ဘျုဝ် ဒီ ထူမ် ဂြုဝ်း ဇဝ်ဖြာ။

11 ပါယ် တီ နဝ်း အုဝ် ဟဲ့ ရူ ကာဆဝ်၊ အာဝ် ဟူ ပွိုန် အူတ်၊ အာဝ် ပွိုန် ယိူန် ဒေါ မှဝ်။ ဂေ ဂွန် ဒီရွယ် အီ ဟာဝ် ဒူပ် န့တေန့်၊ အုဝ် ဒီ ဘော တဲး ဂေ ခမ် နဝ်း ရူ အုဝ် တီ၊ တဲး ဘော ဂေ ဒူအီ နှိုမ် အီ ကွယ် ကာဇု ကာဒိုမ် ခမ်။ အုဝ် ဒီ တဲး ဘော ဂေ အီဘိုန့် အီမာယ် အီ ဟဲ့ လာယ် ဘဲန် ဂူ ဘော ဂေ ဒူအီ ကတ် ဝီ ခမ် နဝ်း ရူ အုဝ် တီ။

12 ဆေ အုဝ် ဒီ ဘူင် ကာဘး ဒီ ဂေ ဒူအီ ခဲင် မိူင် တီ၊ အုဝ် ဒီ တဲး အီ ဟဝ် ဝီ တး ကွယ် ခဲင် ကာင် ဂေ။ ဘော မာန် ဘော ဒူင် နာ ဂေ ဘော အီဘိုန့် ဂေ ဒီ ဘော ဝီ ဘဲန် ကြုဝ် အီ ဟဝ်။” ဇဝ်ဖြာ ဟဲ့ ကာလာင် ပါယ် တီ။

13 ဇဝ်ဖြာ ကာလာင် ဟာဝ် တဝ်း၊ “ဂေ ဘောကာဂ့လျီတ် စုး ဒီ ဒူအီ အီ တူ မိုဝ်း အာရေ မာဆေ ကော ဝီ ဇမ် ဒီ ဒူအီ အီ တာင် လွှိုမ် အီ ဟဝ်၊ ဂေ ဘော မိုဝ်း နဝ်း လောဖ၊ ဆီ ဘူင် တဲး ဂေ ခြမ်။ ဘော ဒါ အီ ဘျာန် ဂြုဝ်း ဇဝ်ဖြာ ဘော ဒါ အီ လှူ ဒီ ဇဝ်ဖြာ ဘူင် တူတ့် အီ ကာလုဝ် အီ တူ မှာန်။

14 ဒူအီ ပီ အိုပ် အုဝ် အီ မိုဝ်း ဆဝ် မိုဝ်း ဒိမ် တာင်၊ ဂေ ယီ ဝီ ဆီနမ် ဘော တဝ်း၊ ‘အာရေ တူ တာင်။’ ဂေ ဘော တဝ်း၊ ‘ဟဲ့ ယေန် ဒါခိုယ်’ ယီ တူ မိုဝ်း မာဆေ အီ ယေန် ဒါခိုယ်။

15 ဂေ ဘော ဘူင် အီ မွှိုမ် ကာအိး ဘော အီ မွှိုမ် ဆာယ် ကာဆဝ်။ မာလဲ၊ ဂေ ယီ တူ ဝီ နပ် ဒီ ဆာယ် ဒေါ မှဝ်။ ဒေါ စှိုမ် ဂေ ဆာရေ နာ ဂေ မိူဝ် တူ ရေန့်။ ပါယ် တီ ဂေ ဒီ ဘော ကေး ပီ ဒူအီ အီ ဟဲ့ ကေး ယမ် ဒီ အာတ့် ဂေ။ ပန် ဒီ ဒမ် အုဝ် မှာပ် ဒီ ဂေ၊ ဂေ ဒီ ဘော စုဝ်း တျီမ် ကာဆဝ်။” ဇဝ်ဖြာ ဟဲ့ ကာလာင် ပါယ် တီ။

16 ဟဲ့ ဟွတ့် ဇဝ်ဖြာ ပီ ဝီ တဝ်း၊ “တဲး ဘေ ဟာဝ် စွင့် ဒီ ကာယဝ်း န့တေန့်။ တဲး ဘေ ဘော ဘ်ု ဒီ ယွတ် ဆီချာ၊ တဲး ဘေ ဟြေတ့် န့တေန့် ဘြိမ် ဘော ဒီမွှတ် န့တေန့် အီ မွှိုမ် န့ ကွယ် ဒီ မှဝ်။ တဲး ဘေ ဘော ဟာဝ် ဒူပ် န့တေန့် တီ။ ဆေ ဘေ ဘူင် ပါယ် တီ၊ ဘေ ဒီ ဘော ဝီ မိုဝ်း နဝ်း ဒါခိုယ် ဂျာမ်ဆာ။ မာလဲ၊ ဂေ ယီ ဝီ တဝ်း၊ ‘ယေ တူ ဟာဝ်၊ ယေ တူ ဒူပ်။’

17 အုဝ် ဟဲ့ အုန် တဲး န့ မိုဝ်း အီ ဘ်ု ဘေ ဘော ဒမ် ဂေ တဝ်း၊ ‘တဲး ဘေ ဆာဒိက် ဘော ဘ်ု ဒီ ထူမ် ဟမ် ဝဝ်။’ မာလဲ၊ ဘေ ဝီ တဝ်း၊ ‘ယေ တူ ထူမ်။’

18 ပါယ် တီ ဘေ ဒူအီ ဒွန် မျုဝ် အီ ကွယ် ဒဲင် ကာဒါယ် နီ၊ တဲး ဘေ ထူမ်။ အိုယ် ဘေ ဒူအီ ကိူန် အီ ကွယ် ကာဇု ကာဒိုမ်၊ တဲး န့ ဘော ကာလှုး ဒီ နဝ်း ဘေ လွင် အီ ဒီ ဘုဝ် ဘဲန် ဒီ ဂေ။

19 အိုယ် ဘေ ဒူအီ ဘောကာဂ့လျီတ် အီ ကွယ် ဒဲင် ကာဒါယ်၊ တဲး ဘေ ထူမ်။ အုဝ် ဒီ ဘူင် တဲး ဒူအီ ဂေ နီ ဝီ ခမ် ဒုက် တာင် အီ မုး အာဂျိုဝ် ပီ ဘူင် ဂေ။ ခုဝ်၊ ဂေ တူ ဆာဒိက်၊ တူ ထူမ် ဂြုဝ်း အုဝ်။ ဂေ ဟဲ့ ဝဲန် ဒါရာ အုဝ်။

20 အုဝ် တူ လုဝ် ဘေ တး လှူ ကာညန် လေဘူန် အီ တး ခဲင် မိူင် ဆေဘာ ဘော ဒီမှာယ် အီ ငါမ် အီ ဟဲ့ တး ခဲင် မိူင် တူင့်။ အုဝ် မိူဝ် တူ လုဝ် ပီ လှူ ဘေ အီ ဒုဝ့် ဒီ ငဝ်။ ဘော ပီ လှူ ဘေ ဒွန် မျုဝ် တူ လဝ့် နဝ်း အုဝ်။”

21 ကူပ် န့ ပါယ် တီ ဇဝ်ဖြာ ဝီ တဝ်း၊ “အုဝ် ဒီ ဒိုဝ်း မျုဝ် အီ နပ် ဒီ တဲး ဘေ ကာဝှး ကေး၊ ဝီ ဘ့လေး အုန် ဒူင် ဒီ ဟာဝ် ဘေ။ ဂုန့် ဘေ ဘော ဂွန် ဘေ ဒီ ဘော တာ ဒိုဝ် ကာဝှး ကေး ဒီ တီ။ ဒူအီ အီ ကွယ် ကာတတ် ဘေ ဘော ဂိုက် ဘေ ဒီ ဘော လိုဝ် စှိုမ် ဒူပ် ဘေ။”

22 ဇဝ်ဖြာ ပီ ဝီ တဝ်း၊ “ဘ်ု ဘေ ယွတ်၊ ဒူအီ အူ မျုဝ် ဒီ ဘော တး နာ ကွာ။ ဒူအီ ကိူန် အီ ကွယ် ခဲင် မိူင် အီ မန် ဆီချာ၊ ဂေ ဒီ ဘော လာယ် ကာဆုး နဝ်း ဂေ၊ တး ဒူင် ဆိူတ် ကာဒါယ်။

23 ဒူအီ ဂေ တီ၊ ဂေ ဒီ ဘော ဂူင့် အ ဂေ ဘ့လာ လျီး။ ဂေ ဘော မုး ဒူအီ အီ ဟာယ် ကာဆဝ်။ ဂေ မိူဝ် တူ နပ် ဒီ ရွက့် ကာဝေ အီ။ ဂြုဝ်း ဂေ၊ န့ ဘော ပီ ဟမ် ဒီငိုန့် အိုမ် နမ်မုက်ဆာရာ။ အိုယ် ဘေ အီ ကွယ် ဒီ နွန် ဇီအူန်၊ ဂေ ဟဲ့ ရဲန် ဒုဝ် ဂေ။ ဒါ ဆိုက် အီ ပဝ့် မ့ပြွင့် ဒီ ဟာဝ် ကာဂုဝ်း၊ ဟာဝ် ကာဘး ဒီ ဘေ။”

24 ယေ ဘော ယိုဝ် ဆာဒါင် လွင် ဒူအီ ဂေ တီ။ န့ ဟဲ့ ဘဲန် ဒီလှး ဒီ ယေ။ ဒုက် တာင် ပီ ဒီ ကာဒုး ယေ တီ၊ ဟဲ့ ကာဆဝ် တိူက် ဒီ နဝ်း ယေ၊ ဟဲ့ ပီ အီဘိုန့် ဆဝ် ဒီ မိုဝ်း ဂွန်။

25 ကွဲ့ တဲး ဘေ ဟာဝ် ခဲင် မာန် ဘော ခဲင် ဒူင် နာ ဘေ။ ကွဲ့ တဲး ဘေ ဟာဝ် ဒူပ် န့တေန့်။ ဂေ ရန်ဆူ အေ တီ၊ ဂေ ဟဲ့ ဂူင့် ဘ့လာ လျီး ဘော မာပွါ့ လာင်။ အီ မွှိုမ် ယုဝ် မိူဝ် ဟဲ့ ကွယ် ဒွန် ဘ့လာက်။

26 အိုယ် ဘေ ဒူအီ ပီ အိုပ် အုဝ်၊ တဲး ဘေ စှိုပ် ဒီ တာ ခြိုင် စာန် ဘော အိတ် ဂ့လိူက် ခဲင် ဘြဝ် ကာဝှါင်။ တဲး ဘေ ယာမ် တာင်၊ တဲး န့ ပီ ဘေ ယာမ် ဒေါ ဟဲ့ ယမ် ဂွန် အီမာယ် ဘေ အီ မုး မီ အူ ဝီ တီ။ တဲး ဘေ ဘော က့လိုဝ် ဘော ငှဝ်၊ တဲး န့ ကော ပီ ဟဲ့ ဆွင့် ကာဆဝ် ဒီ နဝ်း ဘေ။ ခုဝ်၊ ဝီ အီ ဒီ တး ပျာတ့် တး ကာဂုဝ်း ဒီ ဘေ တီ၊ အန် ဒီ ဘော တး ဒေါ တူ နမ်လှုဝ်း နမ်ရွယ် ဘေ။

27 ဇဝ်ဖြာ ပီ ဝီ တဝ်း၊ “အုဝ် ယီ ဟဲ့ တဲး မဲ ဇဲတ်ဆေ ဒီ ယွတ် ဂေ ဒူအီ ပီ အိုပ် အုဝ် ပီ ဇဲတ်ဆေ ဘေ ခြိဝ်၊ တဲး မဲ နပ် ပီ ဘူင် ဂေ။

28 မာလဲ၊ ဘေ ဘောကာဂ့လျီတ် ဘော ဝီ မုး တူတ့် ဒူအီ အီ မိုဝ်း နဝ်း ဒိူဝ် ဘော ကာဘး ဆေဆေ။ ဘေ ဘော မုး ဒူအီ အီ နပ် ဒီ လာယ် နဲန။ နဝ်း ဘေ ဘော ပ့လူမ် ဒီဂတ့် ပီ ဘွင့် ဒေန့် ဂေ ဟိန်။ ဘေ ဘောကာဂ့လျီတ် ဘော နပ် ဒီ ဘူင် အီ ဟာယ် အီ မိူက်။

29 ဘီယု ပီ တာ ဘေ ဘော နပ် ဒီ တဲး ငဝ် ကုး ဟဲန့် ကာဆဝ်။ မီစေတ့် ပီ ဆီ ထာရွင် ဘေ ဘော နပ် ဒီ ကာဆိုမ် တူတ့် ခဲင် ငဝ်။ န့ ပီ ပီ ထာရွင် ဘေ၊ အာဝ် မိုဝ်း ဒီခုဝ် မာဆေ။ ပါယ် တီ ဒူအီ ဟာယ် ဒူအီ မိူက် မိူဝ် တူ ပွိုန် ကာယဝ်း ဒီ ဘေ။

30 အီ ဟဝ် ဒီ ဘော တဝ်း၊ ဂေ ပီ အျီင် ရွိုန် ပီ ဝဲန် အီ။ ခုဝ်၊ ဇဝ်ဖြာ ဟဲ့ ဝဲန် ဂေ။”