1 ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ။ 2 အန် တဝ်း၊ “တဲး မဲ ဟာဝ် ကွယ် ဒီ ဘာင် မာလုဝ်း ဟုဝ် ဇဝ်ဖြာ ဘော ဒတ် ကာလာင် ဂြုဝ်း ဒီ ဂေ ဒူအီ ကိူန်။ တဲး မဲ တဝ်း၊ ‘အိုယ် ဘေ ဒူအီ အာယူဒါ အီ တး လိုပ် ခဲင် ဟုဝ် ဇဝ်ဖြာ၊ အီ တဝ်း ဒီ တး ကြိုပ် ဇဝ်ဖြာ၊ တဲး ဘေ ထူမ် ဂြုဝ်း ဇဝ်ဖြာ။ 3 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ ဒမ် အုန်၊ တဲး ဘေ ဝီ မ့ပြာယ် အာဂျာင် ဘေ ဘော ပီ ဘူင် ဘေ။ ဆေ ဘေ ဘူင် ပါယ် တီ၊ အုဝ် ဒီ တဲး ဘေ ကွယ် ခဲင် မိူင် ဘြိမ် ဘေ။ 4 ကွဲ့ တဲး ဘေ ဘိုင် ဂြုဝ်း အီ ကာလုဝ် တဝ်း၊ ‘အာနီ မုး ဟုဝ် ဇဝ်ဖြာ။ ခဲင် ဟုဝ် ဇဝ်ဖြာ အာဝ် ပွိုန် ဇမ် ဒုက်။’” 5 ဆေ ဘေ ဟဲ့ ဟွတ့် မ့ပြာယ် အာဂျာင် ဘေ ဘော ပီ ဘူင် ဘေ ဒွန် မျုဝ်၊ ဆေ ဘေ မိူဝ် ဝီ ဘူင် ဆိူဝ် ဆိူဝ် မှာန် မှာန် အီ ဒူပ် ဒါရာ၊ 6 ဘေ မိူဝ် တူ ခါနှာပ် ခဲတ့် ဂေ ဂွန် ဆီပြး ဘော ယာ ဆီပြး၊ ဘေ မိူဝ် တူ ငဝ်း ယမ် ဒူအီ အီ တူ မိုဝ်း မှာပ်၊ ဆေ ဘေ မိူဝ် တူ ဒူပ် ဒီ ကြိုပ် ဇဝ် ပီ ကြိုပ် အီ ဟဝ် အီ ဘူင် တဲး န့ ဒုက် ဒီ ဒုဝ် ဘြိမ် ဘေ၊ 7 ဆေ ဘေ ဘူင် ပါယ် တီ၊ အုဝ် ဒီ တဲး ဘေ ကွယ် ခဲင် မိူင် တီ အီ မုး မိူင် ပဲ့ ဟဲ့ အာပ် ဒွါ အုဝ် ဒီ ဂေ ဂုန့် ဒင် ဘေ အူ ဆိန့် အာတ့် နီ၊ တဲး န့ ဘော ဘဲန် မိူင် ဒူင် ကွယ် ဂေ ဆေဆေ။ 8 တဲး ဘေ ယွတ်၊ ဘေ ယီ ဟဲ့ ဝီ ညှိုမ် ဘိုင် ဂြုဝ်း ကာလုဝ် အီ တူ မိုဝ်း ဒီခုဝ်။

9 ဘေ ဟဲ့ ဝီ ပြာ အီ၊ ငဝ်း ယမ် အီ ဟဝ်၊ လုတ့် အီဘိုန့် အီ ဟဝ်၊ ဝီ ဒိူင် ကာဆဲန့် အီ တူ မုး အီ တူ မှာန်၊ ဝီ လှူ ဒီ ဇဝ် ဘာလ ဘော ဘိုင် ဇဝ် ပီ ကြိုပ် အီ ဟဝ် ပီ တူ ဒွိုမ် နပ် ဘေ။ 10 ဘေ ဟဲ့ ဟွတ့် ဘူင် ပါယ် တီ ဘေ ဘော ဝီ တး လိုပ် ခဲင် ဟုဝ် ဇဝ်ဖြာ အီ မုး ဒူင် ကွယ် အုဝ်။ ဘေ မိူဝ် တဝ်း၊ ‘ဇဝ်ဖြာ ဟဲ့ ဂေဇူ ယေ၊ တဲး ယေ ကွယ် ဆီချာ။’ ပါယ် တီ န့ ပီ ဘေ ထာင်၊ ဘေ ဟဲ့ ပွိုန် ဘူင် အီ မွှိုမ် ကာအိး ဒွန် မျုဝ်၊ ယီ တူ လုဝ် ခမ် မာဆေ။ 11 ဟုဝ် ဇဝ်ဖြာ အီ မုး ဒူင် ကွယ် အုဝ် တီ၊ ဘေ ဘော ဝီ ထာင် ဟဲ့ မုး ကာဒဝ် မာဝ် ဒူင် ဒီ ချြီင် ဒါ ဇူန်။ အုဝ် ဟဲ့ ဟွတ့် ယိုဝ် တူတ့် ပီ ပါယ် နဝ်း ဘေ။” ဇဝ်ဖြာ ဟဲ့ ကာလာင် ပါယ် တီ။

12 ဇဝ်ဖြာ ပီ ဝီ တဝ်း၊ “တဲး ဘေ ဟာဝ် ဒီ မိူင် ဆီလုဝ် အီ မုး ဒူင် ပဲ့ ဟဲ့ ရဝ်း အုဝ် ဆိန့် ဒေါ ဂုဝ်၊ တဲး န့ ဘဲန် ဒူင် ကွယ် အုဝ် ဒီ အာတ့်။ တဲး ဘေ ဟာဝ် ယွတ် ပဲ့ ဟဲ့ ဘူင် အုဝ် ဒူင် တီ ကူပ် အီ ဟာယ် အီ မိူက် ပီ ဘူင် ဂေ ဒူအီ အီဆာရေလ အီ မုး ဒူအီ အာမျုဝ် ပီ အိုပ် အုဝ်။ 13 ဒေါ ဟဲ့ ဘူင် ဘေ အီ ဟာယ် အီ မိူက် ဒွန် မျုဝ်၊ အုဝ် မိူဝ် ဟဲ့ ကာလာင် ဒီ ဘေ ဘဲန် ဇေန့် ဘဲန် ဇေန့်။ ဘေ ယီ တူ ထူမ် ဂြုဝ်း အုဝ်။ အုဝ် ပီ ဘော ဒဲ့ ဘေ မိူဝ်၊ ဘေ ယီ တူ အိုဝ် ဂြုဝ်း အုဝ်။ 14 ခဲ့ ပဲ့ ဟဲ့ ဒွိုမ် ဘူင် အုဝ် ဒီ မိူင် ဆီလုဝ် တွိုန်၊ အုဝ် ဒီ ဝီ ဘူင် ခဲင် ဟုဝ် ဇဝ်ဖြာ အီ မုး ဒူင် ကွယ် အုဝ် ဒေါ တီ နီ။ န့ ပီ ဘော မုး ဒူင် ဘိုင် ဂေ ဂုန့် ဒင် ဘေ ဘော ဒူင် ဘိုင် ဘေ ဒေါ တီ နီ၊ အုဝ် ဒီ ဘူင် တဲး န့ ကာပျာတ့် လိုဝ်။ 15 အုဝ် ဒီ ဟုဝ် တဝ် ဘေ ဒီ အာတ့် အုဝ်၊ တဲး န့ ပီ အုဝ် ဟဲ့ ဟုဝ် တဝ် ဘီနွင် ဘေ အီ မုး အာမျုဝ် အာအေဖာရိမ် တွိုန်။”

16 ဇဝ်ဖြာ ပီ ဝီ တဝ်း ဒီ အာယေရေမီ၊ “ကွဲ့ တဲး မဲ ဆာခိုဝ် ဒါင် ဂေ ဒူအီ အာမျုဝ် တီ။ ကွဲ့ တဲး မဲ ကာဆုး အုဝ်။ အုဝ် မိူဝ် ဒိူန် တူ ထူမ် ဂြုဝ်း ပီ ဒီ ဆာခိုဝ် မဲ ဒေါ မှဝ်။ 17 မဲ ဟဲ့ ယိုဝ် ပီ ဘူင် ဂေ ခဲင် ကာဒါယ် မိူင် ယူဒါ ဘော ဒူပ် န့တေန့် ခဲင် မိူင် ယေရူဆာလဲမ်။ 18 ဂွန် ဂေ ဘော ဟာဝ် ဟြေတ့် တး ဟေ။ ဂုန့် ဂေ ဘော ဒုဝ့် ခဲင် ငဝ်။ မာ ဂေ ဘော ကြိတ် ကာပဲ့၊ ဘူင် ခါမုန်၊ တဲး ဂေ ပွိုန် ဒီ လှူ ဒီ နာင် ကာနမ် အီ စိူဝ် နာင် ဟောခမ် အီ အိုပ် ခဲင် ဂါင်ဟြာဝ်။ ဂေ ဘော ဒိုဝ်း ပီ ဒီ လှူ အီ မုး အိုမ် မာငုန်၊ ဝီ လှုဝ် ဒီ အာတ့် ဇဝ် ပီ ကြိုပ် အီ ဟဝ်။ ဂေ ဘော ဘူင် တဲး အုဝ် ရူ ကာဆဝ်။ 19 အာဝ် မုး ဂေ ကာဆုး ဘူင် တဲး မီ အုဝ် ရူ၊ ဂေ ဝီ ဘူင် အီ မွှိုမ် ကာအိး ဒီ ဒုဝ် ဘြိမ် ဂေ၊ တဲး ဂေ ဝီ မွှိုမ် ဆာယ်။” ဇဝ်ဖြာ ဟဲ့ ကာလာင် ပါယ် တီ။

20 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “နဝ်း ရူ အုဝ် ဒီ ဘော လေး ပီ ငဝ်။ န့ ဒီ ဘော စုဝ်း ဒူင် တီ၊ စုဝ်း ဘော ဒဲင် ဒူအီ ဂေ ဒုဝ် ဆတ်ဒါဝါ ဘော ဒဲင် ဟေ ဘ့လေ ဂေ ယွုန် ဒွန် မျုဝ်။ ငဝ် တီ ဒီ ကာဆိုမ် ဆေဆေ၊ အာဝ် ယတ် ဒေါ မှဝ်။”

21 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် တဝ်း၊ “တဲး ဘေ ဒိုဝ်း ပီ ဒီ လှူ ဘေ အီ ဒုဝ့် ခဲင် ငဝ်၊ ဝီ အုန် ဒူပ် ပီ ဒီ လှူ အာမျုဝ် ဟဝ်။ ဟဲ့ ဟွတ့်၊ တဲး ဘေ ဝီ ဟူမ် ယင် တီ ရာင် ဘေ။ 22 ခုဝ်၊ ဒေါ ဟဲ့ စွယ် အုဝ် ဂေ ဂုန့် ဒင် ဘေ လေး ခဲင် မိူင် အဲဂိုပ် တွိုန်၊ အုဝ် မိူဝ် တူ မိုဝ်း ဒီ ကာလာင် ဒီ ဂေ မီ လွင် ပီ ဒီ လှူ အီ ဒုဝ့် ဒီ ငဝ်၊ ဘော ပီ ဒီ လှူ အာမျုဝ် ဟဝ်။ 23 ပီ ဒမ် အုန် အုဝ် ဒီ ဂေ န့ မုး၊ ‘တဲး ဘေ ထူမ် ဂြုဝ်း အုဝ်။ တဲး အုဝ် ဘဲန် ဇဝ်ဖြာ ပီ ကြိုပ် ဘေ။ တဲး ဘေ မိူဝ် ဘဲန် ဒူအီ ပီ အိုပ် အုဝ်။ တဲး ဘေ ဘူင် ဒူပ် ခဲ့ ပီ ကာလာင် အုဝ် ဒီ ဘေ၊ တဲး န့ ဘဲန် နာ ဘွတ် နာ မွှိုမ် ဒီ ဘေ။’ 24 မာလဲ၊ ဂေ တူ ဝီ ထူမ် ဂြုဝ်း အုဝ်။ ဂေ တူ တဲး န့ လိုပ် ဟျုဝ့် ဂေ။ ဂေ ဘော ဝီ ဒူပ် နာ ဟာယ် နာ မိူက် ဘော ပီပ့လူမ် နဝ်း ဂေ။ ဂေ မိူဝ် တူ ဟာဝ် ဆိူဝ် နာ အာတ့်၊ ဂေ ဝီ ကာဘတ် ဝိဝ် နာ ပန်။ 25 စုး ဆိန့် ဒေါ လေး ဂေ ဂုန့် ဒင် ဘေ ခဲင် မိူင် အဲဂိုပ် ကော ဇမ် အာတိုဝ် နီ၊ ဘဲန် ဆီငဲ ဘဲန် ဆီငဲ အုဝ် ဟဲ့ စ်ု ဂေ ဒဲစေန့် အုဝ် အီ မုး ဒါ အီ ဘျာန် ဂြုဝ်း ဇဝ်ဖြာ၊ တဲး ဂေ ဟာဝ် ဒူင် ကွယ် ဂေ။ 26 မာလဲ၊ ဂေ တူ ဝီ ထူမ် ဂြုဝ်း အုဝ်၊ တူ တဲး န့ လိုပ် ဟျုဝ့် ဂေ။ ဂေ ဘော ဝီ ပီပ့လူမ် ဒီဂတ့် နဝ်း ဂေ၊ ဝီ ဘူင် နာ စီစိဝ် နာ တူ မွှိုမ်၊ တဲး န့ ကော ဝီ လွှိုမ် ပဲ့ ဟဲ့ ဘူင် ဂုန့် ဒင် ဂေ ဒေါ မွိုန်။

27 မဲ ပီ ဘော ကာလာင် တူတ့် ခဲ့ ပီ ကာလာင် အုဝ် ဒီ မဲ မိူဝ်၊ ဂေ ယီ တူ ထူမ်။ မဲ ပီ ဘော ဒဲ့ ဂေ မိူဝ်၊ ဂေ တူ ယဝ်း ဂြုဝ်း မဲ။ 28 ခုဝ်၊ တဲး မဲ တဝ်း ဒီ ဂေ ပါယ် နီ၊ ‘ဘေ ဒူအီ အာမျုဝ် နီ၊ ဘေ မုး ဒူအီ အီ တူ ထူမ် ဂြုဝ်း ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ ဘေ ဘော မုး ဒူအီ အီ တူ ခမ် ပီ မာနုဝ် ဇဝ်ဖြာ၊ ဒူအီ အီ တူ မိုဝ်း နဝ်း ဆိူဝ်၊ ဒူအီ အီ တူ နပ် ဒီ ကာလာင် ဂြုဝ်း အီ မုး ဂြုဝ်း မှာန်။’ 29 တဲး မဲ မိုဝ်း နဝ်း က့လိုဝ် ဘော ဂါ့ လေး ဟိုက် ဂိန့် မဲ။ တဲး မဲ ကွယ် ဒဲင် နွန် စာ ဘော က့လိုဝ် ဘော ငှဝ် ဒီ တီ။ ခုဝ်၊ ဇဝ်ဖြာ ဒီ ဝဲန် ဂေ ဒူအီ အီ ဟဲ့ ဘူင် တဲး အန် ရူ စာဝ် ကာဆဝ်။”

30 ဟဲ့ ဟွတ့် ဇဝ်ဖြာ ပီ ဝီ တဝ်း၊ “ဂေ ဒူအီ အာယူဒါ မိူဝ် ဟဲ့ ဘူင် နာ ဟာယ် နာ စီစိဝ် ဒီ အုဝ်။ ဂေ ဟဲ့ ဒိုဝ်း အာရိုပ် ရာင် အီ မွှိုမ် ကာအိး ကာဆဝ်၊ ဝီ အုန် ခဲင် ဟုဝ် ဒူင် ကွယ် အုဝ်၊ တဲး န့ ကာဒါတ့်။ 31 ဂေ ဟဲ့ ဘူင် ကာစှူင့် ဒီ ဒူင် စာ အီ စိူဝ် တောဖေတ် အီ ကွယ် ခဲင် ဒီလယ့် ဘေန်ဟီနုမ်၊ တဲး ဂေ ပွိုန် ဒီ ဒိုဝ်း ဂွန် အီမာယ် ဂွန် အီဘိုန့် ဂေ၊ လှူ ဒုဝ့် ခဲင် ငဝ်။ လွင် အန် တီ၊ န့ ဘော မုး ပီ တူ ဒွိုမ် ကာလာင် အုဝ် ဒီ ဂေ၊ ပီ တူ ဒွိုမ် ဇေန့်ဇာ အုဝ် ဒေါ မှဝ်။ 32 ကူပ် န့ ပါယ် တီ ဇဝ်ဖြာ တဝ်း၊ တဲး ဘေ ဆာဒိက်။ န့ ဒီ ဘော ဇမ် အာခြာဝ် ဒေါ တူ တဝ်း ဂေ ကာစှူင့် တောဖေတ် ခဲင် ဒီလယ့် ဘေန်ဟီနုမ်။ ဂေ ဒီ ဝီ တဝ်း၊ ဒီလယ့် ဒူင် လာယ် ကာငဝ်း ယမ်။ ဂေ ဒီ ဘော ဒိပ် ဒူအီ ယမ် ဒူပ် ဒီလယ့် တီ ကော ဟူ မိုဝ်း ဒူင် ဘ့လဝ် ကာဒါယ်။ 33 ပန် တီ ဒုဝ် ယမ် ဒူအီ ဂေ တီ ဘော ဘဲန် ပီ ဒီ ဟူမ် မာဆိမ် ခဲင် ဂါင်ဟြာဝ် ဘော မာဒုဝ် ပြဲ အီ ဟာယ်။ န့ မိူဝ် တူ မိုဝ်း အာဆေ အီ ယ ညွန် တဝ် ဂေ။ 34 ဒေါ အန် တီ အုဝ် မိူဝ် တူ တဲး န့ မိုဝ်း ဂြုဝ်း ဒါခိုယ်၊ ဂြုဝ်း အီ ဘျုဝ် ဒီ နဝ်း ဘော ဂြုဝ်း ကာညူမ် ဂါယ် ဒီဘျာ အီ ဒီ ခတ်။ န့ ဒီ ဘော ယေန် ခဲင် ကာဒါယ် မိူင် ယူဒါ ဘော ဒူပ် န့တေန့် ခဲင် မိူင် ယေရူဆာလဲမ်။ ခုဝ်၊ မိူင် ဘေ ဒီ ဘော ငွင့် ဘော ယေန်၊ အာဝ် မိုဝ်း ဒူအီ။”