ဇဝ်ဖြာ ပီ ဝီ တဝ်း၊ “ဒေါ အန် တီ ဂေ ရန်ဆူ ဒီ ဘော ဒိုဝ်း လေး ကာအာင် ဒူအီ ယမ် အီ ကွယ် ခဲင် ကာဒဝ် ဘာရေဝ်။ န့ ဘော မုး ကာအာင် ခုန်ဒီခမ် အီ ဟဲ့ အိုပ် မိူင် ယူဒါ၊ ကာအာင် ဂေ အာမူ အာမာတ် အန်၊ ကာအာင် ဒါ အီ ဘျာန် ဂြုဝ်း ဇဝ်ဖြာ၊ ကာအာင် ဒါ အီ လှူ ဒီ ဇဝ်ဖြာ ဘော ကာအာင် ဒူအီ ခဲင် မိူင် ယေရူဆာလဲမ်၊ ဂေ ဒီ ဒိုဝ်း ဝဲန် တူတ့်။ 2 ကာအာင် ဂေ တီ၊ ဂေ ဘော ဝဲန် ဘုင်ဘြတ်၊ တဲး န့ ရာယ် ဒီ ဆီငဲ ဘော မာဂျီန် ဘော ဆီမန့်။ အာမျုဝ် ခဲင် ဂါင်ဟြာဝ် တီ ဘော မုး ပီ ဒွိုမ် ရွက့် ဒူအီ ပီ အိုပ် အုဝ် ဘော ပီ ဒွိုမ် လိုမ်လာ ဂေ၊ ပီ ဒွိုမ် ဒူပ် ဂေ၊ ပီ ဒွိုမ် ဟြေတ့် တး ဂေ ဘော ပီ ဒွိုမ် ကြိုပ် ဂေ။ အာဝ် မိုဝ်း အာဆေ အီ ဝီ ဒိုဝ်း ကာဇု ကာအာင် ဂေ တီ၊ ဝီ ဒိုဝ်း ဒိပ်။ ဂေ ဘော ဝဲန် ဒဲင် ကာဒါယ်၊ တဲး န့ ပီ ကာအး။ 3 ဂေ ဒူအီ ဟာယ် ဒူအီ မိူက် အီ ဆီ ဂိတ် ဆီ ကွယ် ဝါယ် ဟဲ့ ဟုဝ် တဝ် အုဝ် ဒီ ဂေ ဒွန် နာ ဒွန် ပ့လုဝ့်၊ ဂေ ဒီ ဘော မိုဝ်း နဝ်း ဆီ ယမ် လွှိုမ် ဆီ ကွယ် ဒဲင် ကာဒါယ်။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

4 မဲ လုဝ် ဟာဝ် ကာလာင် ဒီ ဂေ တဝ်း၊ “ဇဝ်ဖြာ ဟဲ့ တဝ်း ပါယ် နီ။ ဆေ ဒူအီ ဟဲ့ ကေး၊ အန် နပ် ဒီ ဝီ ယိတ့်။ ဆေ ဒူအီ ဟဲ့ ကာလိုပ် န့တေန့်၊ အန် နပ် ဒီ ဝီ ကာဘတ် ဝိဝ် နာ ပန်။

5 မာလဲ၊ ဂေ ဒူအီ အာမျုဝ် နီ၊ ဂေ ဟဲ့ ကာလိုပ်၊ ဂေ နဲ့ ဘူင် ဟာဝ် အီ ကာဘး ဆေဆေ။ ဂေ ဒူအီ မိူင် ယေရူဆာလဲမ် ဟဲ့ ဝး အုဝ် ဘော ဒူပ် အာမျုဝ် အီ ကာလုဝ်၊ ယီ တူ မိုဝ်း နဝ်း ဆီ ဝီ ဘူင် နာ မှာန်။

6 အုဝ် ဟဲ့ ဘ်ု ဒီ ထူမ် ဆီချာ ဂြုဝ်း ဂေ။ ဂေ ယီ တူ ကာလာင် ဆိူဝ် ဆိူဝ် မှာန် မှာန်။ အာဝ် မိုဝ်း အာဆေ အီ ဝီ လှုဝ်း မှာပ် ပဲ့ ဟဲ့ ဘူင် အန် ဘော တဝ်း၊ ‘အုဝ် ဟဲ့ ကာလိုပ် ဒီ ဘူင် မှာပ်။’ ခဲ့ ကွယ် ဂေ ဘောကာဂ့လျီတ် ဟဲ့ ဘူင် ဒူပ် ပီ အိုင် ဂေ။ ဂေ ဘော ပီ မင်ပြွင့် အီ ဆီ ကာဘ့လဲပ် ဟာဝ် ဆိူဝ် ဒီ ဒူင် လာယ် ကာဂုဝ်း ဒါ ဆိုက်။

7 မာနူက် ယာင် အီ ဘိုန့် ခဲင် ဂါင်ဟြာဝ် ဆီ ဘော နပ် အာခြာဝ် အန်။ မာဘ့လူယ် ဒီတဲတ် ဂေ မာလေဝ် ဘော မာနူက်ကွန် ဆီ ဘော နုဝ် ဘော နပ် အာခြာဝ် ဒီ လုဝ် ဟာဝ် လုဝ် တး ဂေ။ မာလဲ၊ အီ မုး ဂေ ဒူအီ ပီ အိုပ် အုဝ်၊ ဂေ တူ ဝီ နပ် တူ ဝီ နုဝ် ဒါရာ ဇဝ်ဖြာ။

8 ဘေ ဘော နပ် ဒီ တဝ်း၊ ‘ယေ မုး ဒူအီ အီ မိုဝ်း အာငျာန်။ ဒါရာ ဇဝ်ဖြာ ဟဲ့ ကွယ် ခဲင် နဝ်း ယေ။’ ယီ မုး ဂေ ဒါ စာရေ တာင် အီ ဒဲမ် ပဲ့၊ ဂေ ဝီ ဒဲမ် ဒါရာ အီ တူ မုး အီ တူ မှာန် ဒီလူယ်။

9 ဒူအီ အီ မိုဝ်း အာငျာန်၊ ဂေ လုဝ် ဝီ ဆာယ် အီ။ ဂေ ဒီ ဘော ကာစွာ ပီ ဒူအီ အီ ဟဲ့ ခြေ ယွတ့် ကူပ် ဟဲ့ ဝဲန် ဂေ ဂြုဝ်း ဇဝ်ဖြာ။

10 ကူပ် န့ ပါယ် တီ အုဝ် ဒီ ဒိုဝ်း အီဘိုန့် ဂေ၊ ဝီ အာပ် ဒီ အီ ဟဝ်၊ ဒိုဝ်း မာန် ဘော ဒူင် နာ ဂေ၊ ဝီ တဲး အီ ဟဝ် ဘိုင်။ ဂေ ဘောကာဂ့လျီတ် စုး ဒီ ဒူအီ အီ တူ မိုဝ်း အာရေ မာဆေ ကော ဝီ ဇမ် ဒီ ဒူအီ အီ တာင် လွှိုမ် အီ ဟဝ်၊ ဂေ ဘော မိုဝ်း နဝ်း လောဖ၊ ဆီ ဘူင် တဲး ဂေ ခြမ်။ ဘော ဒါ အီ ဘျာန် ဂြုဝ်း ဇဝ်ဖြာ ဘော ဒါ အီ လှူ ဒီ ဇဝ်ဖြာ ဘူင် တူတ့် အီ ကာလုဝ် အီ တူ မှာန်။

11 ဒူအီ ပီ အိုပ် အုဝ် အီ မိုဝ်း ဆဝ် မိုဝ်း ဒိမ် တာင်၊ ဂေ ယီ ဝီ ဆီနမ် တဝ်း၊ ‘အာရေ တူ တာင်။’ ဂေ ဘော တဝ်း၊ ‘ဟဲ့ ယေန် ဒါခိုယ်’ ဒေါ တူ မိုဝ်း မာဆေ အီ ယေန် ဒါခိုယ်။

12 ဂေ ဘော ဘူင် အီ မွှိုမ် ကာအိး ဘော အီ မွှိုမ် ဆာယ် ကာဆဝ်။ မာလဲ၊ ဂေ ယီ တူ ဝီ နပ် ဒီ ဆာယ် ဒေါ မှဝ်။ ဒေါ ဘူင် ဂေ အီ စှိုမ် ဆာရေ၊ နာ ဂေ မိူဝ် တူ ရေန့်။ ပါယ် တီ ဂေ ဒီ ဘော ကေး ပီ ဒူအီ အီ ဟဲ့ ကေး ဒီ အာတ့် ဂေ။ ပန် ဒီ ဒမ် အုဝ် မှာပ် ဒီ ဂေ၊ ဂေ ဒီ ဘော စုဝ်း တျီမ် ကာဆဝ်။” ဇဝ်ဖြာ ဟဲ့ ကာလာင် ပါယ် တီ။

13 ဇဝ်ဖြာ ဝီ တဝ်း၊ “အုဝ် ဒီ ဒိုဝ်း ကာဇု ဘ့လေ ပီ ဆမ် ဂေ ဒွန် မျုဝ်။ ဟေ မာငုန် ဘော ဟေ ဒီပူ ဂေ အာဝ် မိုဝ်း ဘ့လေ။ လှာ အန် မိူဝ် ဒီ ဘော ဟျီ့ ကာဟဝ်း။ ပဲ့ ဟဲ့ ဒွိုမ် ဒွါ အုဝ် ဒီ ဂေ၊ အုဝ် ဒီ ဝီ ဒိုဝ်း ဝိဝ် တူတ့် ဒီ ဂေ။”

14 ဘေ ဒီ ဘော တဝ်း၊ “ဆီ မုး ပီ ကွယ် နှိမ် နှိမ် အေ။း တး၊ တဲး အေ တး ကွယ် ကာဇု၊ တဲး အေ တဝ် ဟာဝ် လိုပ် ခဲင် မိူင် အီ မိုဝ်း ရဲင်၊ တဲး အေ ယမ် ဒီ တီ။ ခုဝ်၊ ဇဝ်ဖြာ အီ မုး ဇဝ်ဖြာ ပီ ကြိုပ် အေ၊ အန် ဟဲ့ ဆုင်ဖျာတ် တဲး အေ ယမ်။ အန် ဇဝ် ဟဲ့ တဲး အေ ဒျီင် အိုမ် အီ မိုဝ်း ဂူင် မိုဝ်း ယာင် ကူပ် ဟဲ့ ဘူင် လုတ့် အေ ဇဝ်ဖြာ။

15 အေ ပီ ဘော နှဝ့် န့ဒဝ့် အာခြာဝ် ဂတ် ဂျီတ် အီ ဂျာမ်ဆာ မိူဝ်၊ အေ အာဝ် ဟူ နပ် ဒီ ကာဒုး နာ ဘွတ် နာ မွှိုမ်။ အေ ပီ ဘော ဝီ နှဝ့် န့ဒဝ့် ပန် ဒီ ဒါခိုယ် ဒီ ဆီကဲန် အေ မိူဝ်၊ န့ ယီ ဝီ ဘဲန် တူတ့် အာဖေ အာရေ ဒီလူယ်။

16 ဟမ် ဂုင်မုး မင်ပြွင့် ရန်ဆူ အေ ဟဲ့ ပွိုန် ယိုဝ်၊ ဟဲ့ တး ခဲင် ကာဒါယ် မိူင် အာဒါန်။ ကူပ် ဟဲ့ ကာဟဲ မ့ပြွင့် ဒီငှာန် တီ၊ မိူင် ဘော မိူင် ဒီ ဘော ယုဝ် ဒီယုး ဒီယေန့်။ ဆေ ဒူအီ ဂေ တီ ဟီ တး၊ ဂေ ဒီ ဘော တး အိုပ် မိူင် ဘော မိူင်။ န့ ပီ ဂေ ဒီ မဲင် ဘ့လွိုပ် မိူင် ဘော မိူင် ဘော မျုဝ် အီ ကွယ် ခဲင် မိူင် ဒွန် မျုဝ်။”

17 ဇဝ်ဖြာ ပီ ဝီ တဝ်း၊ “ဘ်ု ဘေ ယွတ်၊ အုဝ် ဒီ စ်ု မာဟန့် ငျီန် အီ ဟာယ် ကာဆဝ် တး ဒူင် ကွယ် ဘေ။ ယီ တူ မိုဝ်း မာဆေ အီ ပွိုန် ပဲ မာဟန့် ဂေ တီ။ အာဝ် မိုဝ်း ကာထာ အီ ဒီ ပွိုန် ဘုတ် ဂေ။ မာဟန့် တီ ဒီ ဘော တး ဇုဝ့် ဘေ။” ဇဝ်ဖြာ ဟဲ့ ကာလာင် ပါယ် တီ။

18 အုဝ် ဝီ တဝ်း၊ “အိုယ် မဲ ဇဝ်ဖြာ အီ နပ် ဒီလှဝ် နဝ်း အုဝ်၊ နဝ်း အုဝ် ဟဲ့ ဒီတဲတ် ကာဆဝ် ကူပ် ဟဲ့ က့လိုဝ် ဟဲ့ ငှဝ် အုဝ်။

19 တဲး မဲ ထူမ် ဂြုဝ်း ဂေ ဒူအီ အာမျုဝ် အုဝ်။ ဂေ ဟဲ့ ခမ် ဒုက် တာင် ကာဆဝ်။ ဂေ ဘော ယာမ် ဒွန် နာ ဒွန် ပ့လုဝ့် ခဲင် မိူင် နီ။ ဟဲ့ မှာန်၊ မဲ ဇဝ် အာဝ် ဟူ ကွယ် ခဲင် မိူင် ဇီအူန်။း ခုန်ဒီခမ် မိူဝ် ဟဲ့ ဟွတ့် လေး ဟာဝ် တ မိူင် အန်။း” ဇဝ်ဖြာ ဝီ တဝ်း၊ “မှဝ် န့ ပါယ် ပီ ဒိုဝ်း တး ဂေ အာရိုပ် ရာင် အီ ကွယ် နာ တေတ့် နာ တ၊ ဘူင် တဲး အုဝ် ရူ ကာဆဝ်။း”

20 ဂေ ဝီ တဝ်း၊ “အာခြာဝ် ဆုဝ့် ငှုဝ် ဟဲ့ ဟွတ့် ပွုန်။ အာခြာဝ် ဆောဒါတ်၊ အာခြာဝ် ဒီယာင် ဟဲ့ ဟွတ့် တူတ့်၊ ယီ တူ မိုဝ်း အာဆေ အီ ဒီ ချွတ် တဲး အေ လွတ် အာဖေ အာရေ။”

21 ကူပ် ဟဲ့ ဒုက် ဟဲ့ ဂိန် ဂေ ဒူအီ အာမျုဝ် အုဝ်၊ န့ ပီ ဘော အုဝ် ဟဲ့ ဆဝ် ဟဲ့ ဒိမ်။ အုဝ် မိူဝ် ဟဲ့ ငှုန် ဟဲ့ ယာမ် ဘော ဂ့၀ွင်၊ အာဝ် ဟူ လှုဝ်း ဒုဝ်။

22 န့ ပီ ခဲင် မိူင် ဂီလေအာတ် အာဝ် မိုဝ်း ဆီနမ်။ ဘော ခဲင် မိူင် တီ၊ အာဝ် မိုဝ်း ဆာရာဝူန်။ ဂေ ဒူအီ အာမျုဝ် အုဝ် ဟဲ့ ခမ် ဒုက် ခမ် ဆဝ် ဒီ ဒိမ် အီ တူ နပ် ဒီ ဟြာယ် ဒီ ကဲန် ဒေါ မှဝ်။