“အာလိုဝ်၊ ဆေ ဂိန့် အုဝ် ပီ အိုမ် တုဝ်း ဘော အိုမ် ငါယ် အုဝ် ပီ အိုမ် ဘ့လဲင်၊ အုဝ် ဒီ ဘော လုဝ် ယာမ် ဒွင် ဝန် ဒွင် ခိူန် ကူပ် ဟဲ့ ယမ် ဂေ ဒူအီ အာမျုဝ် အုဝ် ဘော ခမ် ဒုက် တာင်။

2 ဆေ န့ မိုဝ်း ထိုပ် ခဲင် ပြဲ ကာဟဝ်း တဲး ဒူအီ အီ ဟာဝ် ဒူပ် န့တေန့် ပွိုန် ဒီ တမ်၊ အုဝ် ဒီ ဘော ဟာဝ် ကွယ် တဲး အုဝ် ပွိုန် ဒီ ကာဂဝ်း တူင့် တူင့် ဒီ ဂေ ဒူအီ အာမျုဝ် အုဝ်။ ခုဝ်၊ ဂေ ဘောကာဂ့လျီတ် ဟဲ့ ဘူင် ကာလိုပ်၊ တူ မိုဝ်း နဝ်း ဆိူဝ် နဝ်း မှာန်။ ဂေ ဘော ဘူင် ပီ ပီ ဘူင် ယာ မာလမ်။

3 ဂေ ဘော ကာဖာ ပီ ဒီ ကာလာင် ဂေ၊ တဲး န့ ပီ အီ ဝိတ့် အ။ ဆေ အီ ဘန့် အ တီ၊ န့ ဘော ပီ ဂြုဝ်း တူ မုး တူ မှာန် အီ လေး ခဲင် မူတ့် ဂေ။ ဂေ ထာင် ဆေ ဂေ ကာလုဝ် ပါယ် တီ၊ ဂေ ဒီ ဘော အွင် ခဲင် မိူင် ဂေ။ ဂေ ဘော ဘူင် နာ ဟာယ် ဘဲန် ဇေန့် ဘဲန် ဇေန့်။ ဂေ မိူဝ် အာဝ် ဟူ ဝီ လှုဝ်း အုဝ်။” ဇဝ်ဖြာ ဟဲ့ ကာလာင် ပါယ် တီ။

4 ဇဝ်ဖြာ ဝီ တဝ်း၊ “တဲး ဘေ ဆာဒိက် လွင် ဂေ ဂိုက် ဘေ။ ကွဲ့ တဲး ဘေ ညှိုမ် ဘီနွင် ဝေါဝဲ ဘေ။ ခုဝ်၊ ဘီနွင် ဘေ တီ မိုဝ်း နဝ်း ဂုဝ့် နဝ်း ဂဲ့။ ဂေ ဂိုက် ဘေ ဒွန် အီ ဘော နပ် ဒီ နဲန အီ ဟဝ်။

5 ဂေ ဘောကာဂ့လျီတ် နပ် ဒီ ကာလုဝ် ဂိုက် ဂေ။ အာဝ် မိုဝ်း အီ ကာလာင် ဂြုဝ်း မုး ဂြုဝ်း မှာန် ခေါ အူ ဝီ။ န့ ပီ ဂေ ဒွန် အီ ဟဲ့ ဖိုက် ဟဲ့ ဟေန်၊ တဲး ဂေ နပ် ဒီ ကာလုဝ်။ ကူပ် မှာပ် တာင် ပဲ့ ဟဲ့ ဘူင် ဂေ၊ န့ ဘော တဲး ဂေ နုန် ကာဆဝ်၊ အာဝ် ဟူ မိုဝ်း ပ့လူမ် ဂေ ဟဲန့်။

6 မဲ ဟဲ့ ကွယ် ကာတဲ ဂေ ဒူအီ အီ ကာလုဝ် ဆေဆေ။ ဂေ မိူဝ် တူ မိုဝ်း နဝ်း ဆီ လှုဝ်း အုဝ်။” ဇဝ်ဖြာ ဟဲ့ ကာလာင် ပါယ် တီ။

7 ကူပ် န့ ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဘ်ု ဘေ ယွတ်၊ အုဝ် ဒီ ဘော ဘူင် ဒီ ဂေ၊ တဲး န့ ပီ အီ ထာရွင် ခြိဝ်။ ဂေ ဟဲ့ ဘူင် မှာပ် ကိူန် ကာဆဝ်၊ အာဝ် ဟူ မိုဝ်း ပေါ အူ မျုဝ် ပီ ဒီ ပွိုန် ဘူင် အုဝ်၊ တဲး ဂေ ဝီ လှုဝ်း မှာပ် ဂေ။

8 ဂြုဝ်း အီ လေး ခဲင် မူတ့် ဂေ ဘော ပီ ဘ့လာ အ အီ နပ် ဒီ တဲး အီ ယမ်။ ဂြုဝ်း ဂေ တီ ဘော မုး တူတ့် ဂြုဝ်း ကာလုဝ်၊ ဂြုဝ်း တူ မှာန်။ ဒွန် အီ ဘော နပ် ဒီ ညိုင်ရာင် ကာလာင် ဂြုဝ်း ဒါခိုယ်၊ ဂြုဝ်း ငါမ် ဒီ ဂိုက် ဂေ။ မာလဲ၊ ခဲင် နဝ်း ဂေ အာခါခ်ု၊ ဂေ ယီ ခြာမ် ဒီ ဘူင် မီ နာ တူ မွှိုမ် ဒီ အီ ဟဝ်။

9 ကူပ် န့ ပါယ် တီ အုဝ် လုဝ် ဒမ် မှာပ် ဒီ ဂေ။ အုဝ် လုဝ် ဝီ ဘူင် ဝျီ့ ဒီ ဂေ ဒူအီ အီ ဟဲ့ ဘူင် ကာဘး ကိူန် ဒီ အုဝ်။” ဇဝ်ဖြာ ဟဲ့ ကာလာင် ပါယ် တီ။

10 အာယေရေမီ ဝီ တဝ်း၊ “အုဝ် ဒီ ဘော လုဝ် ယာမ် ဘော ငှုန် ကူပ် ဒုက် အီ ဒီ တး ဇမ် ဒီ နွန် ဘောကာဂ့လျီတ်။ အုဝ် ဒီ လုဝ် က့လိုဝ် ဘော ငှဝ် ကူပ် ဂ့လင် ပြဲ ကာဟဝ်း။ ခုဝ်၊ ဒူင် တီ ဒီ ဘော ဟျီ့ ကာဟဝ်း တူတ့် ဒွန် မျုဝ်။ န့ ဒီ ဘော ငွင့်၊ အာဝ် မိုဝ်း ဒူအီ အီ ဟာဝ်၊ အာဝ် မိုဝ်း ဟမ် မာဘူ ဂေ မ့ပေါ မက်။ မာဆိမ် အီ ကွယ် ခဲင် ဘ့လေန့် ဘော ဒုဝ် ဆတ်ဒါဝါ ဘောကာဂ့လျီတ် ဟဲ့ တဝ်။

11 ခုဝ်၊ ဇဝ်ဖြာ ဟဲ့ တဝ်း၊ ‘အုဝ် ဒီ ဘူင် တဲး မိူင် ယေရူဆာလဲမ် ကာပျာတ့် လိုဝ် ဘဲန် မ့ပိုမ် မာဝ်၊ တဲး န့ ဝီ ဘဲန် ဒူင် ကွယ် မာဆုဝ် ပြဲ။ အုဝ် ဒီ ဘူင် တဲး ကာဒါယ် မိူင် ယူဒါ ရာမ်၊ ကွဲ့ ဟူ တဲး န့ ဆီ မိုဝ်း ဒူအီ အီ ပွိုန် ကွယ်။’” ဇဝ်ဖြာ ဟဲ့ ကာလာင် ပါယ် တီ။

12 အုဝ် ဝီ တဝ်း၊ “အာဝ် မိုဝ်း အာဆေ အီ မိုဝ်း အာငျာန် ဘော နပ် လွင် အန် တီ။ အာဝ် မိုဝ်း အာဆေ အီ ဟဲ့ ခမ် ဇဝ်ဖြာ မာနုဝ် အန် ဘော ဝီ ကာလာင် တဲး န့ ကာလှုး ဒီ နဝ်း အီ ဟဝ်။ ကူပ် မာဆေ မိူင် ဘော မိူင် ပီ ဆော လိုဝ် ရာမ် တဲး န့ ကော ယေန် ကော ငွင့် ပီ ခဲင် ပြဲ ကာဟဝ်း၊ ကွဲ့ တဲး န့ ဆီ မိုဝ်း အာဆေ တး ဝဝ့်။း”

13 ဇဝ်ဖြာ ဝီ တဝ်း၊ “ဂေ ဟဲ့ ဝဲန် ဒါရာ ပဲ့ ဟဲ့ ဒွါ အုဝ် ဒီ ဂေ။ ဂေ မိူဝ် တူ ထူမ် တူ ဘူင် ဒူပ် ပီ စ်ု အုဝ် ဂေ ဘူင်။ 14 နဝ်း ဂေ မိူဝ် ဟဲ့ ဒိူဝ် ကာဆဝ်။ ဂေ ဝီ ဘူင် မီ ပီ အိုင် ဂေ၊ ဝီ ဒူပ် ဒီ ကြိုပ် ဇဝ် ဘာလ ပီ ဂုန့် ဂေ ဟဲ့ မာနုဝ် ဂေ။” 15 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် တဝ်း၊ “အုဝ် ဒီ ဝီ ဟျီင် ဂေ ဟူမ် ဒဝ် အီ ဆွင့် ကာဆဝ်။ အုဝ် ဒီ ဒိုဝ်း အိုမ် အီ မိုဝ်း ဂူင်၊ ဝီ ဒွါ ဂေ ဒျီင်။ 16 အုဝ် ဒီ ဘူင် တဲး ဂေ ကွယ် ကာယဝ်း ကာရေး ကာတဲ ဒူအီ အာမျုဝ် ဟဝ် အီ မုး ဒူအီ ပီ တူ ဒွိုမ် နပ် ဂေ ဘော ပီ တူ ဒွိုမ် နပ် ဂုန့် ဒင် ဂေ။ အုဝ် ဒီ ခုင်ခြး ဒူပ် ဒီ ပန် ဂေ၊ တဲး ဂေ ခမ် အာဖေ အာရေ ဒီ မာပွါ့ လာင်၊ တဲး န့ ကော ဇမ် ပန် ဒီ ငဝ်း ယမ် တူတ့် အုဝ် ဒီ ဂေ။”

17 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “တဲး ဘေ ကာဒွါ့ ကာဖာ၊ တဲး ဘေ ဝီ လှုဝ်း။ တဲး ဘေ ဒဲ့ တး အီဘိုန့် အီ မှုဝ် ဒီ ယာမ်၊ တဲး ဂေ ယာမ်၊ တဲး န့ ပီ ဒေါ မိုဝ်း ဒူအီ ယမ်။ တဲး ဘေ ဒဲ့ တး အီဘိုန့် ဇိုဝ် တီ အီ လွှက့် လှဲမ် လွှိုမ် အီ ဟဝ်။

18 တဲး ဂေ တီ ဘူင် ဟဲ ဟဲ ခြန် ခြန်၊ တဲး ဂေ ယာမ် ကူပ် ဒုက် ပီ ဒီ ခမ် အေ။ တဲး ဘော အေ ဝီ ယာမ် ဘော မိုဝ်း အိုမ် ငါယ် ကိူန် အီ လေး။

19 ဒွန် အီ ဟဲ့ ပွိုန် ယိုဝ် ငှုန် ယာမ် ဒီ နွန် ဇီအူန်။ န့ တဝ်း၊ ‘ယေ ဟဲ့ ခမ် ပီ ပျာတ့် အီ ဟဝ် ဒီ ယေ အီ ဟဲ့ ကိူန် ကာဆဝ်။ ယေ မိူဝ် ဟဲ့ မွှိုမ် ဆာယ် ကာဆဝ်။ ယေ မိူဝ် ဟဲ့ ကာဒုး ဒီ လေး တဝ် တ မိူင် ယေ ကူပ် ဟဲ့ ပျာတ့် အီ ဟဝ် ဒူင် ကွယ် ယေ။’”

20 အိုယ် ဘေ အီဘိုန့်၊ တဲး ဘေ ထူမ် ဂြုဝ်း ဇဝ်ဖြာ။ တဲး ဂြုဝ်း ပီ ကာလာင် အန် ဇဝ် ဘော လိုပ် ခဲင် ဟျုဝ့် ဘေ။ တဲး ဘေ ဝီ မာနုဝ် ဂွန် ဒီဘျာ ဘေ လွင် ပီ ဒီ ပါယ် ဒီ ယာမ်။ တဲး ဘေ ဝီ လာယ် မာနုဝ် မှုဝ် လွင် နဝ်း က့လိုဝ် နဝ်း ငှဝ်။

21 ခုဝ်၊ ဘုဝ် အီ နပ် ဒီ တဲး အီ ယမ် ဒီ ဘော လိုပ် တး ခဲင် ကာဒဝ် ပါတဲင်၊ လိုပ် ဘော ခဲင် ဟုဝ် ဒူင် ချြီင် ဒါ ဆိုက် အေ အီ ဟဲ့ မန် ဆီချာ။ အန် ဒီ ဘော ငဝ်း ယမ် ဂွန် ဒီရွယ် အီ ကွယ် ဒူပ် န့တေန့် ဘော ဒူအီ နှိုမ် အီ ကွယ် ခဲင် ကာလး။

22 တဲး မဲ ဝီ လာယ် ကာလာင် ဂြုဝ်း ပဲ့ ဟဲ့ ကာလာင် ဇဝ်ဖြာ။ အန် ဟဲ့ တဝ်း၊ “ဂေ ဒီ ဝဲန် ဒုဝ် ယမ် ဒူအီ ဂေ တီ ပီ အျီင် မက် အီ ကွယ် ခဲင် ဒူင် နာ။ န့ ဒီ ဘော ပီ ဒူအီ အီ ဆုဝ့် ဘ့လေး ဆီဘယ့် ငှုဝ် ဒီ ပန် အန်။ န့ ယီ တူ မိုဝ်း အာဆေ အီ ဝီ ဒိုဝ်း အုန်။”

23 ဇဝ်ဖြာ ပီ ဝီ တဝ်း၊ “ကွဲ့ တဲး ဒူအီ မိုဝ်း အာငျာန် ပီဖုင် အန် ကူပ် မိုဝ်း အန် အာငျာန် တီ။ ကွဲ့ တဲး ဒူအီ အီ မိုဝ်း ပ့လူမ် တာင် ပီဖုင် အန် ကူပ် မိုဝ်း အန် ပ့လူမ် တာင် တီ။ ကွဲ့ တဲး ဒူအီ ခြမ် ပီဖုင် အန် ကူပ် မိုဝ်း အန် ကြုဝ်ကြာမ် ကိူန်။

24 မာလဲ၊ ဒူအီ အီ ဆီ ပီဖုင် အန်၊ တဲး အန် ဝီ ပီဖုင် အန် ကူပ် ဟဲ့ ကာလှုး ဒီ နဝ်း အန် လွင် မုး အုဝ် ဇဝ်ဖြာ အီ နပ် ဒီ ရွက့် ကာဝေ။ တဲး အန် ဝီ ပီဖုင် အန် ကူပ် ဟဲ့ နပ် အန် လွင် မုး အုဝ် ဇဝ်ဖြာ အီ ဆုင်ဖျာတ် ဆိူဝ် ဆိူဝ် မှာန် မှာန် ဘော လွင် မိုဝ်း အုဝ် နဝ်း ရွက့် ဘော လွင် အိုင် လွင် ဝုဝ် အုဝ် ဒီ ဘူင် ပါယ် တီ။” ဇဝ်ဖြာ ဟဲ့ ကာလာင် ပါယ် တီ။

25 ဇဝ်ဖြာ ပီ ဝီ တဝ်း၊ “န့ ဒီ ဘော ဇမ် ဆီငဲ ဒီ ဒမ် အုဝ် မှာပ် ဒီ ဂေ ဒူအီ အီ ဟဲ့ ဆွာ့ ဝဲန် ဟုန် လခါနာ အီမာယ် ဒီ ဒုဝ် ဘူင့် ဂေ၊ ယီ တူ ဘျွင် နဝ်း ဂေ။ 26 ဒူအီ ဂေ တီ၊ န့ ဘော မုး ဒူအီ အဲဂိုပ်၊ ဒူအီ အာယူဒါ၊ ဒူအီ အေဒူမ်၊ ဒူအီ အမ်မူန်၊ ဒူအီ မုဝ်အာပ် ဘော ဒူအီ အီ နပ် ဒီ ဂါ့ ဝဲန် ဟိုက် ဒီမုဝ်း ဒီ ကုင်ကာပ် ဂေ ဘော ဒူအီ အီ ကွယ် ခဲင် ပြဲ ကာဟဝ်း။ ဒူအီ ဂေ တီ၊ ဂေ တူ ခမ် ဒီ ဆွာ့ ဝဲန် ဟုန် လခါနာ အီမာယ်။ ဒူအီ အီဆာရေလ၊ ဂေ ပီ ဘော ဟဲ့ ခမ် ဒီ ဆွာ့ ဝဲန် ဟုန် လခါနာ အီမာယ် ဒီ ဒုဝ် ဂေ မိူဝ်၊ ဂေ ယီ တူ ခမ် ဒီ ဘျွင် နဝ်း ဂေ။”