1 အိုယ် ဘေ ဒူအီ အီဆာရေလ၊ တဲး ဘေ ထူမ် ဂြုဝ်း ပီ ဝီ ကာလာင် ဇဝ်ဖြာ ဒီ ဘေ။

2 ဇဝ်ဖြာ ဟဲ့ တဝ်း၊ “ကွဲ့ တဲး ဘေ ညိုင် ဒူပ် ပီ ပါယ် ဒူအီ အာမျုဝ် ဟဝ်။ ကွဲ့ တဲး ဘေ ယုဝ် ဘော ကာစွာ အာမျုဝ် အီ ကွယ် ခဲင် ဂါင်ဟြာဝ် အီ မုး ပီ ယုဝ် ပီ ကာပိုန့် ဂေ ဒူအီ အာမျုဝ် ဟဝ်။

3 ဟိတ် ပီ ဒူပ် ဂေ ဒူအီ အာမျုဝ် ဟဝ် အာဝ် မိုဝ်း ဒီခုဝ်။ ကူပ် န့ ပါယ် တီ ဂေ နပ် ဒီ ဟာဝ် ဒဲပ် တး ဟေ အူ ကာဒင် ခဲင် ပြဲ။ ဟဲ့ ဟွတ့်၊ ဂေ ဒါ လက်ဆာမာ ဘော ဝီ ဒိုဝ်း ခြိုင် တာ ဂေ ဘူင် အာရိုပ် ရာင်။

4 ဂေ ဘော ပိတ် ရွိုန် ဂေ ခြိဝ်၊ ဝီ မ့ပြာယ် တဲး န့ စှိတ်။ ဂေ ဘော ဒိုဝ်း မာဟိန် ဝီ ဒွက်၊ ကွဲ့ တဲး န့ နပ် ဒီ ရ်ု၊ နပ် ဒီ ဘ့လိူင်။

5 အာရိုပ် ပီ ဘူင် ဂေ တီ၊ န့ ဘော ပီ ရာင် ကာဘျုဝ် ပီ ဟွယ် အုန် အီ ခဲင် မာန် ဒီဂျီ၊ တဲး န့ ကာဘျုဝ် မာကာအ ဂေ မာဆိမ်။ ဂြုဝ်း မိူဝ်၊ ဂေ တူ နပ် ဒီ ကာလာင်။ ဟာဝ် နာ မှဝ် မိူဝ်၊ ဂေ တူ နပ် ဒီ ဟာဝ်။ ဒူအီ ဘော လုဝ် ကာဂွတ်၊ လုဝ် ကာယူင့် ကူပ် တူ နပ် ဂေ ဒီ ဟာဝ်။ ကွဲ့ တဲး ဘေ ယုဝ် အာရိုပ် ဇိုဝ် တီ။ ဂေ တူ ပွိုန် ဘူင် နာ ဟာယ် ဒီ ဘေ။ နာ မွှိုမ် မိူဝ်၊ ဂေ တူ နပ် ဒီ ဘူင်။”

6 အိုယ် ဇဝ်ဖြာ၊ အာဝ် မိုဝ်း အာဆေ အီ ပီ မဲ ဇဝ်။ မဲ ဇဝ် ဟဲ့ ဘွတ် မျာတ် ကာဆဝ်။ ပွုန် မဲ ဇဝ် မိူဝ် ဟဲ့ တာင် ကာဆဝ် ဘော မိုဝ်း အာဖုင် ဒင်ခုဝ်။

7 မဲ ဇဝ် မုး ခုန်ဒီခမ် အီ အိုပ် ဒူအီ ဒွန် ဇိုဝ် ဒွန် ခြိုဝ်။ ဂေ ဘောကာဂ့လျီတ် လုဝ် ရုဝ်ဆေ ရီမာတ် မဲ ဇဝ်။ ခုဝ်၊ မဲ ဇဝ် ဟဲ့ ကာအာပ် ရုဝ်ဆေ ခဲင် မာန် မိူင် ဘောကာဂ့လျီတ်။ ခဲ့ ကွယ် ဒူအီ ဒွန် မျုဝ် အီ မိုဝ်း အာငျာန်၊ အာဝ် မိုဝ်း ခေါ အူ ဝီ အီ ပီ မဲ ဇဝ်။

8 နဝ်း ဂေ ဒူအီ တီ ဟဲ့ ကာဒန် လန်၊ တူ နပ် မာဆေ။ ခုဝ်၊ ဂေ ဟဲ့ ခမ် ပီ မာနုဝ် အာရိုပ် ရာင် အီ တူ မိုဝ်း ဒီခုဝ် မာဆေ။

9 ဒီခ့လဲပ် ရွိုန် ပီ မး ဂေ၊ ဂေ ဟဲ့ ဒိုဝ်း တး ခဲင် မိူင် ထာဆိတ်။ ခြိဝ် ဂေ ဘော ဒိုဝ်း တး ခဲင် မိူင် အူဖာတ်။ အာဇ တီ၊ န့ ဘော မုး တူတ့် ပီ ဘူင် ဂေ အီ လှဲဝ် ဒီ ဘူင်။ န့ ဘော မုး ပီ ဘူင် ဂေ ဒါ အီ မှုဝ် ဒီ စိုမ်။ ခြိုင် ပီ စှိုပ် ဂေ ဒီ အာရိုပ် ရာင် တီ ဘော မုး ဘိက် အီ ရေန့် ဂဲ။ န့ မုး ပီ ဘူင် ဂေ အီ ကျ ဒီ ဒဝ့်၊ ကျ ဒီ စိန့်။

10 မာလဲ၊ အီ မုး ဇဝ်ဖြာ၊ အန် မုး ဇဝ်ဖြာ အာခါခ်ု၊ ဇဝ်ဖြာ အီ အိမ်။ အန် မုး ဘော ခုန်ဒီခမ် အီ ကွယ် ဆေဆေ။ ဆေ အန် ဇဝ် ဟီ ရူ၊ ကာဒါယ် ဒီ ဒီယုး ဒီယေန့်။ ဒူအီ ဒွန် ဇိုဝ် ဒွန် ခြိုဝ် အာဝ် မိုဝ်း အီ ပွိုန် ခမ် နဝ်း ရူ အန် ဇဝ်။

11 ဇဝ်ဖြာ ပီ ဝီ တဝ်း၊ “ဂြုဝ်း ပီ လုဝ် မဲ ဟာဝ် ကာလာင် ဒီ ဂေ တီ၊ န့ ဘော ပါယ် နီ။ ‘ဇဝ် အာရိုပ် အီ တူ မိုဝ်း ဒီ ဖာန် ဘ့လေး ဂါင်ဟြာဝ် ဘော ကာဒါယ်၊ ဂေ ဒီ ဘော လိုဝ် ဟြာယ် တူတ့် ဒဲင် ကာဒါယ် ဘော ခြိုမ် ဘ့လေန့်။’”

12 ဇဝ်ဖြာ ဟဲ့ တာ ပွုန် အန်၊ ဖာန် ဘ့လေး ကာဒါယ်။ အန် ဇဝ် ဘော စ်ု အာငျာန် အန် တဲး န့ မိုဝ်း ဂါင်ဟြာဝ်။ အန် ဇဝ် ဘော စ်ု အီ ကာလှုး ဒီ နဝ်း အန်၊ ဘူင် တဲး ဘ့လေန့် မ့ဘ့လး။

13 ဒေါ ဘူင် အန် ဇဝ် တဲး န့ မိုဝ်း ဟမ် ကာနမ်၊ အိုမ် ဂ့လာယ် နာ ဒဲင် ခဲင် ဂါင်ဟြာဝ် ဘော ဟမ် ဒီငိုန့် ဆီနန် ဆီနိူင်။ အန် ဇဝ် ဘော တဲး န့အု တး ဒူင် ဆိူတ် ကာဒါယ်။ အန် ဘော ဘူင် ပ့လ မ့ပ့လေတ့်၊ တဲး န့ တး ဒူပ် ဂ့လာယ်။ ဘော ခုန် အန် ဇဝ် ဘော ဒိုဝ်း လေး ခဲင် ဒူင် အုန် အန်။

14 ဒူအီ ဒွန် အီ ဟဲ့ ကာဒန် လန်၊ အာဝ် မိုဝ်း အီ ကာလှုး ဒီ နဝ်း ဂေ။ ဂေ ဒါ အီ နပ် ဒီ စိုမ် ခြိဝ်၊ ဂေ ဒီ ဝီ ဆာယ် အီ ကူပ် အာရိုပ် ရာင် ပီ စိုမ် ဂေ။ အာရိုပ် ရာင် တီ ယီ တူ မုး အီ မုး အီ မှာန်။ ဂေ တူ နပ် ဒီ ဟိုဝ်း လိုပ် ဟိုဝ်း လေး ဖွိုမ် ဂေ။

15 ဂေ တူ မိုဝ်း ဒီခုဝ် မာဆေ။ န့ ဘော မုး ပီ လုက်တာယ် အီ ဟဝ်။ ဆေ ဟီ ဇမ် ပန် ဒီ ဒမ် အန် ဇဝ် မှာပ် ဒီ ဂေ၊ ဂေ ဒီ ဘော လိုဝ် စှိုမ် ဟြာယ် တူတ့်။

16 အီ မုး ဇဝ်ဖြာ ပီ ကြိုပ် အာကူပ် တွိုန်၊ အန် တူ ပီ အာမျုဝ် ဇိုဝ် တီ။ ခုဝ်၊ အန် မုး ဒါ ကာညာ အီ ဖာန် ဘ့လေး ဇိုဝ် တီ ဒွန် မျုဝ်။ ဂေ ဒူအီ အီဆာရေလ၊ ဂေ ဟဲ့ ခမ် ဒီ ဘဲန် ပီ ခါဂုန် အန် ဇဝ်။ ဂေ ဘော ဒဲ့ အန် ဇဝ် တဝ်း၊ “ဇဝ်ဖြာ အီ အိုပ် တူတ့် ဒွန် မျုဝ်။”

17 အိုယ် ဘေ ဒူအီ အီ ကွယ် ဒူင် ဟဲ့ ဝဲင် ရူပ် အီ ဟဝ်၊ တဲး ဘေ ဒီဂျြီပ် အုန် ကြုဝ်ကြာမ် ဘေ၊ တဲး ဘေ ပွိုန် ဒီ လေး ဒူင် ကွယ် ဘေ။

18 ခုဝ်၊ ဇဝ်ဖြာ ဟဲ့ တဝ်း၊ “ဒေါ တီ နီ အုဝ် ဒီ ဟုဝ် တဝ် ဒူအီ ဘော ရဝ် ဘော မိူင် တဲး ဂေ လေး ခဲင် မိူင် နီ၊ တဲး ဂေ ခမ် အီ ဒုက် အီ ညှာပ် ကာဆဝ်။”

19 အုဝ် ဟဲ့ ခမ် ဝူတ် ကိူန် ကာဆဝ် ကူပ် ဟဲ့ မိုဝ်း အုဝ် ဒိမ် တာင် အီ တူ ပွိုန် ဆီနမ် တဲး န့ ကဲန်။ မာလဲ၊ အုဝ် ဝီ တဝ်း၊ ‘န့ ဘော မုး ဆဝ် ပီ လုဝ် ခမ် အုဝ်။’

20 ထိုပ် ဒူင် ကွယ် အုဝ် ဟဲ့ ဟွတ့် ကာပျာတ့်။ ဝန် ပက် ထိုပ် မိူဝ် ဟဲ့ ဟွတ့် ကာဒတ်။ ဂွန် အီမာယ် အုဝ် ဟဲ့ ဟွတ့် လေး တ အုဝ်။ အာဝ် မိုဝ်း အာဆေ အီ ဒီ ဝီ ဆမ် ထိုပ် ဒွါ ဒီ အုဝ်။ အာဝ် မိုဝ်း အီ ဒီ ဂွင့် ဘိက် ဒွါ ဒီ အုဝ်။”

21 ခုဝ်၊ ဂေ ဒါ အီ ဟျီင် မာဘူ တူ မိုဝ်း အာငျာန်။ ဂေ မိူဝ် တူ ဒီမွှတ် ဇဝ်ဖြာ။ ဂါန် ပီ ဘူင် ဂေ တူ အွင်။ ဖိုင် မာဘူ ဂေ မိူဝ် ဟဲ့ ဟွတ့် ကာယဝ်း ကာရေး တူတ့်။

22 တဲး ဘေ ထူမ် ဆာဒါင် အီ ဒီ တး။ န့ ဒီ မိုဝ်း ဆီနန် ဆီနိူင် တာင် ဒီငိုန့် တး နာ ကွာ။ ဂေ ဒူအီ ကိူန် ဒီ ဘော တး ဘူင် တဲး မိူင် ဒွန် မိူင် အီ ကွယ် ခဲင် ကာဒါယ် မိူင် ယူဒါ ကာပျာတ့် ရာမ် တူတ့်၊ တဲး န့ ဝီ ဘဲန် ဒူင် ကွယ် မာဆုဝ် ပြဲ။

23 အိုယ် မဲ ဇဝ်ဖြာ၊ အုဝ် ဟဲ့ ဟွတ့် နပ်၊ ဒူအီ တူ ပွိုန် အိုပ် အာဆာက် အန်။ အန် တူ ပွိုန် ဝီ ယဲတ့် ဒုဝ် ဘြိမ် အန် ရာင် အန်။

24 မဲ ဇဝ်ဖြာ၊ မှာန့်၊ ကွဲ့ တဲး မဲ ဇဝ် ရူ ကာဆဝ် ဒီ အုဝ်။ တဲး မဲ ဇဝ် ဆုင်ဖျာတ် ဘော မာနုဝ် အုဝ် ခဲ့ ဒီ ကာငျာ အန်။ ဆေ အာဝ် ပါယ် တီ မဲ ဇဝ် နပ် ဒီ ဘူင် ကွဲ့ တဲး အုဝ် မိုဝ်း ဒီခုဝ် မာဆေ။

25 တဲး မဲ ဇဝ် ရူ ဒီ ဂေ ဒူအီ အာမျုဝ် ဟဝ် ဘော ဒီ ဂေ ဒူအီ အီ တူ ဒွိုမ် နပ် မဲ ဇဝ်၊ အီ တူ ဆာခိုဝ် ဒီ မဲ။ ခုဝ်၊ န့ ပီ ဂေ ဟဲ့ ကဝ့် ဟူမ် တူတ့် ဒူအီ အာမျုဝ် အာကူပ် ဘောကာဂ့လျီတ်။ ဂေ ဟဲ့ ပျာတ့် ဝဲန် ဘော မိူင် ဒွန် မိူင် အီ မုး ခဲင် ကာဒါယ် ဒူင် ကွယ် ဂေ ဒူအီ အာမျုဝ် အာကူပ် တီ။