1 ဇဝ်ဖြာ ဝီ ကာလာင် ဂြုဝ်း ဒီ အာယေရေမီ။ 2 အန် တဝ်း၊ “တဲး မဲ ထူမ် ကာဒိက် ဆတ်ဇာ ပီ တဝ်း အုဝ် ဒေါ တီ နီ။ တဲး မဲ ပီ ဝီ ဟာဝ် ကာလာင် ဒီ ဂေ ဒူအီ အီ ကွယ် ခဲင် ကာဒါယ် မိူင် ယူဒါ ဘော ဒီ ဂေ ဒူအီ အီ ကွယ် ခဲင် မိူင် ယေရူဆာလဲမ်။ 3 မဲ လုဝ် ကာလာင် ဒီ ဂေ ပါယ် နီ။ ‘ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ ကာလာင် အုန် ပါယ် နီ။ ဝီ အီ တူ ထူမ် ဂြုဝ်း ကာဒိက် ဆတ်ဇာ နီ၊ အန် လုဝ် ခမ် ပီ ဒိူင် အုဝ်။ 4 ကာဒိက် ဆတ်ဇာ တီ အုဝ် ဟဲ့ ဒွိုမ် ဒွါ ဒီ ဂေ ဂုန့် ဒင် ဘေ ဒေါ ဒိုဝ်း လေး အုဝ် ဒီ ဂေ ခဲင် မိူင် အဲဂိုပ် တွိုန်။ န့ ဟဲ့ ပီ အုဝ် ဟဲ့ ဒိုဝ်း လေး ဂေ ခဲင် ငဝ် ဘီယု။’ အုဝ် ဟဲ့ ဒမ် ဂေ တဝ်း၊ ‘တဲး ဘေ ထူမ် ဂြုဝ်း အုဝ် ဘော ဘူင် ဒူပ် ပီ ကာလာင် အုန် အုဝ် ဒီ ဘေ။ ဆေ ဘေ ဘူင် ပါယ် တီ၊ ဘေ ဒီ ဘဲန် ဒူအီ ပီ အိုပ် အုဝ်။ အုဝ် မိူဝ် ဒီ ဘဲန် ဇဝ်ဖြာ ပီ ကြိုပ် ဘေ။’ 5 ဒေါ အန် တီ အုဝ် မိူဝ် ဒီ ဘူင် ဒူပ် ဂြုဝ်း ကာဒိက် ဆတ်ဇာ ပဲ့ ဟဲ့ ဒွိုမ် ဒိူင် ဒွိုမ် ကာဆဲန့် အုဝ် ဒီ ဂေ ဂုန့် ဒင် ဘေ။ အုဝ် မိူဝ် ဟဲ့ တဝ်း၊ အုဝ် ဒီ တဲး ဂေ ဟာဝ် ကွယ် ခဲင် မိူင် အီ မုး ကာဒါယ် ဘွတ် ကာဒါယ် မွှိုမ်။ န့ ဘော မုး မိူင် ပီ ကွယ် ဘေ ဒေါ တီ နီ။” အုဝ် မိူဝ် ဝီ တဝ်း၊ “အိုယ် မဲ ဇဝ်ဖြာ၊ တဲး န့ ဘဲန် ပါယ် တီ။”

6 ဟဲ့ ဟွတ့်၊ ဇဝ်ဖြာ ပီ ဝီ တဝ်း ဒီ အုဝ်၊ “ဂြုဝ်း ပီ ဒီ ကာလာင် အုဝ် ဒီ မဲ၊ မဲ လုဝ် ဝီ ဟာဝ် ကာလာင် ခဲင် ကာဒါယ် မိူင် ယူဒါ ဘော ဒူပ် န့တေန့် ခဲင် မိူင် ယေရူဆာလဲမ်။ မဲ လုဝ် တဝ်း၊ ‘တဲး ဘေ ထူမ် ဘော ဘူင် ဒူပ် ဂြုဝ်း ကာဒိက် ဆတ်ဇာ ပဲ့ ဟဲ့ ဒွါ အုဝ် ဒီ ဘေ။ 7 ခုဝ်၊ အုဝ် မိူဝ် ဟဲ့ ဒမ် ဆာဒိက် ဒီ ဂေ ဂုန့် ဒင် ဘေ ဘဲန် ဇေန့် ဘဲန် ဇေန့် ဆိန့် ဒေါ ဒိုဝ်း လေး အုဝ် ဒီ ဂေ ခဲင် မိူင် အဲဂိုပ် တွိုန် ကော ဝီ ဇမ် အာတိုဝ် နီ။ အုဝ် မိူဝ် ဟဲ့ တဝ်း၊ “တဲး ဘေ ထူမ် ဂြုဝ်း အုဝ်။” 8 ဂေ ယီ တူ ထူမ်၊ တူ တဲး န့ လိုပ် ဟျုဝ့် ဂေ။ ခဲ့ ကွယ် ဂေ ဘောကာဂ့လျီတ် ဟဲ့ ဝီ ဒူပ် နဝ်း ဒိူဝ် ဂေ အီ ဟာယ် အီ တူ မွှိုမ်။ ပါယ် တီ အုဝ် မိူဝ် ဟဲ့ ဒိူင် ဂေ ဘော စ်ု ဂေ ဘူင် ဒူပ် ကာဒိက် ဆတ်ဇာ ခဲ့ ပီ ကာလာင် အုဝ် ဒွန် မျုဝ် ပီ တူ ထူမ် ပီ တူ ခမ် ဂေ။’”

9 ဟဲ့ ဟွတ့်၊ ဇဝ်ဖြာ ပီ ဝီ တဝ်း ဒီ အုဝ်၊ “အုဝ် ဟဲ့ ယိုဝ် ပီ ဆီ ဘူင် ဂေ ဒူအီ ခဲင် ကာဒါယ် မိူင် ယူဒါ ဘော ဂေ ဒူအီ ခဲင် မိူင် ယေရူဆာလဲမ်။ ဂေ ဟဲ့ ခြာမ် ဒီ ဘူင် ကာဘး ဒီ အုဝ်။ 10 ဂေ ဟဲ့ ဝီ ဘူင် အီ တူ မွှိုမ် ပီ ပီ ဒွိုမ် ဘူင် ဒါ ဒါ ဂေ။ ဂေ ဘော ဝီ ထဲန့် အုဝ် ဘော ဝဲန် ဂြုဝ်း အုဝ်။ ဂေ ဘော ဝီ ဟာဝ် ဘိုင် ဟာဝ် ကြိုပ် ဇဝ် ပီ ကြိုပ် အီ ဟဝ်။ ပါယ် တီ ဂေ ဒူအီ အီဆာရေလ ဘော ဂေ ဒူအီ အာယူဒါ၊ ဂေ ဟဲ့ ပျာတ့် ဝဲန် ကာဒိက် ဆတ်ဇာ ပီ ဒွိုမ် ကာဆဲန့် အုဝ် ဒီ ဂုန့် ဒင် ဂေ။” 11 ကူပ် န့ ပါယ် တီ ဇဝ်ဖြာ ဝီ တဝ်း၊ “အုဝ် ဒီ ဘူင် တဲး ဂေ ခမ် အာဖေ အာရေ၊ ကွဲ့ တဲး ဂေ လွတ်။ ဂေ ပီ ဘော ဝီ ဆာခိုဝ် ဒဲ့ အုဝ် မိူဝ်၊ အုဝ် တူ ထူမ် ဂြုဝ်း ဂေ။ 12 ဂေ ဒူအီ အီ ကွယ် ခဲင် ကာဒါယ် မိူင် ယူဒါ ဘော ခဲင် မိူင် ယေရူဆာလဲမ်၊ ဂေ ပီ ဘော ဝီ ယာမ် ဒဲ့ ဇဝ် ပဲ့ ဟဲ့ ဒွိုမ် ဒုဝ့် လှူ ဂေ ဆီနမ် အုး ငှုန် မိူဝ်၊ ဇဝ် ပီ ကြိုပ် ဂေ တီ ယီ တူ ချွတ် ဂေ ဒေါ မှဝ်။ ဂေ လုဝ် ခမ် အာဖေ အာရေ တီ။ 13 အိုယ် ဘေ ဒူအီ အာယူဒါ၊ မိူင် ဘေ ဟဲ့ ကိူန် ခဲ့ မှဝ်၊ ဇဝ် ပီ ကြိုပ် ဘေ မိူဝ် ဟဲ့ ကိူန် ခဲ့ တီ။ ဘေ ဟဲ့ ဘူင် ကာစှူင့် ဒူင် ဒီ ဒုဝ့် လှူ ဆီနမ် အုး ငှုန် ဒီ အာမျုဝ် အီ မွှိုမ် ဆာယ် အီ မုး ဇဝ် ဘာလ၊ ဟဲ့ ကိူန် ပီ န့တေန့် ခဲင် မိူင် ယေရူဆာလဲမ်။

14 အီ မုး မဲ၊ ကွဲ့ တဲး မဲ ဆာခိုဝ် ဒါင် ဒူအီ အာမျုဝ် တီ။ ကွဲ့ တဲး မဲ ယာမ် က့လိုဝ်၊ ဝီ မှာန့် အုဝ် စွယ် ဒူအီ ဂေ တီ။ ဒေါ ဟဲ့ ခမ် ဂေ အာဖေ အာရေ၊ ဆေ ဂေ ဝီ ဒဲ့ အုဝ်၊ အုဝ် ဒိူန် တူ ထူမ် ဂြုဝ်း ပီ ဆာခိုဝ် ဂေ ဒေါ မှဝ်။

15 န့ ပီ အီဘိုန့် ပီ ရွက့် အုဝ်။ ဆေ အန် ဟဲ့ ဘူင် မှာပ်၊ ဘူင် အီ တူ မွှိုမ် ကိူန် ကာဆဝ်၊ အန် တူ ပွိုန် ကွယ် ခဲင် ကာင် အုဝ် အီ မုး ဟုဝ် ဇဝ်ဖြာ။ ယင် ဒုဝ် ဆတ် ပီ ဒီ လှူ အန် ပီ ဘော ဟဲ့ ကိူန် မိူဝ်၊ န့ ယီ တူ ပွိုန် တဲး အန် လွတ် အုဝ် ဒမ် မှာပ် ဒီ အန်။ ပါယ် တီ ဘေ ယီ ဆီ နဲ့ ခူယ် ဒီ ဘူင် မှာပ်။”

16 ဇဝ်ဖြာ ဟဲ့ ဒွိုမ် တဝ်း၊ “ဘေ ဟဲ့ ပီ ဟေ နာမန် အီ စှိတ် အီ ငျီန် ဆေဆေ ဘော မိုဝ်း ဘ့လေ ကိူန်၊ ဘ့လေ မွှိုမ်။” မာလဲ၊ အန် ဇဝ် ဒီ ဝီ ဘူင် တဲး န့ မိုဝ်း ခုန် လာင် အီ မိုဝ်း ဟမ် ဆီနန် ဆီနိူင်၊ ဝီ ဒိုဝ်း ဟေ တီ၊ ဒုဝ့် ခဲင် ငဝ်။ ရာ အန် မိူဝ် ဒီ ကာဘက် လိုဝ် တူတ့်။

17 ဇဝ်ဖြာ အီ အိုပ် တူတ့် ဒွန် မျုဝ်၊ အီ ဟဲ့ ဒွိုမ် ဖာန် ဘ့လေး ဘေ၊ အန် ပီ ဝီ တဝ်း၊ “ဘေ လုဝ် ခမ် အာဖေ အာရေ။ ခုဝ်၊ ဘေ ဒူအီ အာမျုဝ် အီဆာရေလ ဘော ဒူအီ အာမျုဝ် အာယူဒါ ဟဲ့ ကာဆုး တဲး အုဝ် ရူ ကာဆဝ် ဒေါ ဒိုဝ်း ဘေ ဆီနမ် အုး ငှုန် ဘော ဒုဝ့် လှူ ဒီ ဇဝ် ဘာလ။”

18 ဇဝ်ဖြာ ဟဲ့ တဲး အုဝ် နပ် လွင် ပီ ခြာမ် အီ ဟဝ် ဒီ ဘူင် နာ တူ မွှိုမ် ဒီ အုဝ်။ ခုဝ်၊ အုဝ် ကော နပ်၊ ဒေါ အန် တီ ဇဝ်ဖြာ ဟဲ့ ဘျ တဲး အုဝ် ယိုဝ် ပီ ဘူင် ဂေ။ 19 အုဝ် ဘော ပီ ဂွန် မာဘူ ပီ ဒီ ဒိုဝ်း ဟာဝ် ငဝ်း ယမ် အီ ဟဝ်။ အုဝ် မိူဝ် တူ နပ် ဂေ ခြာမ် ဒီ ဘူင် နာ တူ မွှိုမ် ဒီ အုဝ်။ ဂေ ဟဲ့ တဝ်း၊ “တဲး အေ ဒဲပ် ဝဲန် ဟေ နီ ဘော ဘ့လေ အန် ဘောကာဂ့လျီတ်။ တဲး အန် ဟာဝ် ကွယ် ရဝ် မူင့် အန်၊ ကွဲ့ ဟူ တဲး န့ ဆီ မိုဝ်း အီ နမ်လှုဝ်း အန် ဒေါ မှဝ်။

20 မာလဲ၊ မဲ ဇဝ်ဖြာ အီ အိုပ် တူတ့် ဒွန် မျုဝ်၊ မဲ မုး ဇဝ်ဖြာ အီ နပ် ဒီ ဇဲတ် ဒီ ယွတ် နဝ်း ဖွိုမ် အီ။ မဲ မိူဝ် ဆုင်ဖျာတ် ဒူပ် ဒါရာ ဆေဆေ။ အုဝ် မှာန့်၊ တဲး အုဝ် ယိုဝ် မဲ ဇဝ် ဘူင် ဝျီ့ ဒီ ဂေ ဘော ဒမ် မှာပ် ဒီ ဂေ။ ခုဝ်၊ အုဝ် ဟဲ့ အာပ် အာမူ တီ ဒီ မဲ ဇဝ်။”

21 ပါယ် တီ ဇဝ်ဖြာ ဝီ ကာလာင် လွင် ဂေ ဒူအီ ခဲင် မိူင် အာနာထူတ်။ အန် တဝ်း၊ “ဂေ ဟဲ့ ဟြေတ့် ဒီ ငဝ်း ယမ် အာဆာက် မဲ။ ဂေ ဟဲ့ တဝ်း၊ ‘ကွဲ့ တဲး မဲ ဘျာန် ဂြုဝ်း ဇဝ်ဖြာ။ ဆေ မဲ ယီ ဘူင်၊ ယေ ဒီ ငဝ်း ယမ် မဲ။’” 22 ဝါယ် အန် တီ၊ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အုဝ် ဒီ ဒမ် မှာပ် ဒီ ဂေ၊ တဲး ဂေ ဒူအီ နှိုမ် ယမ် ဒီ မာပွါ့ လာင်။ ဂွန် အီဘိုန့် ဘော ဂွန် အီမာယ် ဂေ ဒီ ဘော ယမ် ဒီ အေတ့် ပီ ဒီ ဟူမ်။ 23 ဂေ ဒီ ယမ် တူတ့် ဘောကာဂ့လျီတ်၊ ကွဲ့ တဲး န့ ဆီ မိုဝ်း ခေါ အူ ဝီ ဒူင် ကွယ် ဂေ။ ဆီနမ် ဒီ ဒမ် အုဝ် မှာပ် ဒီ ဂေ၊ ဂေ အီမာယ် အီ ကွယ် ခဲင် မိူင် အာနာထူတ် လုဝ် ခမ် အာဖေ အာရေ ကိူန်။”