1 အိုယ် မဲ ဇဝ်ဖြာ၊ ဆေ အုဝ် ကာလာင် ဒီ မဲ ဇဝ် လွင် အာမူ ဒူအီ၊ မဲ ဘော ဆုင်ဖျာတ် ဒူပ် နာ မှာန် ဆေဆေ။ မာလဲ၊ အုဝ် ဆီ ဒီမွှတ် လွင် ပီ ဆုင်ဖျာတ် မဲ ဇဝ်။ ပီ ဘူင် ဂေ ဒူအီ အီ တူ မိုဝ်း နဝ်း ဆိူဝ်၊ မှဝ် န့ ပါယ် ပီ တဲး မဲ ဂေ အွင်။း ဂေ ဒူအီ အီ တူ ရုဝ်ဆေ မဲ၊ မှဝ် န့ ပါယ် ပီ တဲး မဲ ဂေ ပွိုန် ကွယ် ဒါခိုယ် ဂျာမ်ဆာ။း

2 န့ ပီ မဲ ဇဝ် ဟဲ့ ဆမ် ဂေ။ ရျီး ဂေ မိူဝ် ဟဲ့ လူင် လိုက် ဘော စေဝ် ဟြေး စေဝ် တာင်၊ မိုဝ်း ဘ့လေ ကိူန်။ ဂေ မိူဝ် အွန် ဒီ ကာလာင် လွင် မဲ ဇဝ် ဆေဆေ။ ခဲင် နဝ်း ဂေ ယီ တူ ရုဝ်ဆေ မဲ ဇဝ်။ န့ ပီ ဂေ ကွယ် ကာတူင့် ဒီ မဲ ဇဝ်။

3 မာလဲ၊ မဲ ဇဝ်ဖြာ၊ မဲ ဟဲ့ ဟွတ့် နပ် ပီ ပါယ် အုဝ်။ မဲ ဇဝ် မိူဝ် ဟဲ့ ယိုဝ် အုဝ်။ မဲ ဘော ဇဲတ် ဒီ ယွတ် နဝ်း အုဝ် ဘော နပ် ပီ ဇေန့်ဇာ အုဝ် လွင် မဲ ဇဝ်။ တဲး မဲ ဇဝ် ဒိူတ် လေး ဒူအီ ဟာယ် ဒူအီ မိူက် ဂေ တီ၊ တဲး န့ ကော ပီ မာဘူ ပီ ဒီ ဒိူတ် ဟာဝ် ငဝ်း ယမ် အီ။ တဲး မဲ ကာယဝ်း အုန် ဂေ ပေါ အူ ပ့လုဝ့်၊ တဲး န့ ကော ဇမ် ဆီငဲ ဒီ ယမ် ဂေ။

4 ကာဒါယ် ခဲင် မိူင် ယေ နီ ဒီ ကာဟဝ်း လှေန့် ခဲ့ မှဝ်။း ပေတ့် အီ ကွယ် ဒဲင် ကာဒါယ် ဒွန် နာ ဒွန် ပ့လုဝ့် ဒီ ဟျီ့ လှေန့် ခဲ့ မှဝ်။း ကူပ် မိုဝ်း ဂေ ဒူအီ အီ ကွယ် ခဲင် မိူင် တီ နဝ်း ဟာယ် နဝ်း မိူက်၊ ဂေ ဒုဝ် ဆတ်ဒါဝါ ဘော မာဆိမ် ဟဲ့ ယမ် တူတ့်။ ဒူအီ ဂေ တီ ပီ ဝီ တဝ်း၊ “နာ အာတ့် နီ ဟာဝ် ဇဝ်ဖြာ တူ စွယ် အေ။”

5 ဇဝ်ဖြာ ဝီ တဝ်း၊ “ဆေ မဲ ကာခဲန့် ကာဘ့လဲပ် ဒီ ဒူအီ၊ မဲ ဆီ ဘော နုန်။ မှဝ် မဲ ဒီ ပါယ် ဒီ ဝီ ကာခဲန့် ကာဘ့လဲပ် ဒီ မ့ပြွင့်။း မဲ ဟဲ့ ဟာဝ် ဒူပ် န့တေန့် ခဲင် မာန် မိူင် အီ ဟဲ့ ဆီချာ၊ မဲ ဆီ ဘော ကေး။ ဆေ မဲ ဝီ လုဝ် ဟာဝ် ခဲင် ယွုန် ခဲင် ပြဲ ဒူပ် ဒီလယ့် ဘ့လဲင် ယောဒါန်၊ မဲ ဒီ ပါယ် မှဝ်။း

6 ဟဲ့ မုး အီကတ် မဲ ဂေ ဝါ မဲ ဘော ဒူအီ ခဲင် န့ဟူမ် မဲ၊ ဂေ ဆီ ဘော ဝီ ဘူင် နာ တူ မွှိုမ် ဒီ မဲ။ ဂေ ဘော ဝီ ဖျာက် မဲ ဘော ဒတ် တာင် ဒူပ် ဒီ ပန် မဲ။ ဆေ ဂေ ကာလာင် ဂြုဝ်း ဒါခိုယ် ဂြုဝ်း ငါမ် လွင် မဲ၊ မဲ ကွဲ့ ညှိုမ် နဝ်း ဂေ။

7 အုဝ် ဒီ ဘ့လေး ဝဲန် ကာင် အုဝ်၊ ဘ့လေး အုန် ခါဂုန် အုဝ်။ အုဝ် ဒီ ဒိုဝ်း ဒူအီ ပီ ရွက့် ကာဆဝ် အုဝ်၊ ဝီ အာပ် အန် ဒီ ရန်ဆူ။

8 ခါဂုန် အုဝ် တီ ဟဲ့ ဝီ ဘဲန် ပီ မာခြင်ဆီ အီ ကွယ် ခဲင် ပြဲ ဘော ဝီ ကာအိူန် ဒီ အုဝ်။ အုဝ် မိူဝ် ဇွင့် ကာဆဝ် အန်။

9 ဂေ ဒူအီ အီ မုး ခါဂုန် အုဝ် တီ ဟဲ့ ဝီ ပီ မာဆိမ် ဒီလာယ် အီ ဟူမ် ယင် အိမ်။ မာဆိမ် မျုဝ် ဟဝ် ဟဲ့ ကွယ် ရူပ် မာဆိမ် တီ၊ တဝ်း ဒီ ဇုဝ့် အန်။ တဲး မဲ ဒဲ့ ဂေ မာဒုဝ် ပြဲ ဟာယ် တး ကွယ် ကာဇု ဘော ကဝ့် ယမ် ဒူအီ အာမျုဝ် အုဝ် အီ ဟာယ် အီ မိူက် ဂေ တီ။

10 န့ ပီ ဂေ ဒါ အီ ဟျီင် မာဘူ ကိူန်၊ ဂေ ဝီ ပျာတ့် မာန် မာငုန် အုဝ်။ ဂေ ညဲတ့် ကာဝ်ု တူတ့် ဒူင် နာ အုဝ်။ ဂေ ဘူင် တဲး န့ ဝီ ဘဲန် ဒူင် ယေန် ဒူင် ငွင့် ဒူအီ၊ ပီ ခဲင် ပြဲ ကာဟဝ်း။

11 ဂေ ဟဲ့ ဘူင် တဲး မာန် ဂေ ဒူင် နာ အုဝ် တီ ဝီ ဘဲန် ဒူင် ယေန် ဒူင် ငွင့် ဒူအီ ဘော ဘဲန် ပြဲ ကာဟဝ်း။ မိူင် ဟဲ့ ယေန် ငွင့် ပါယ် တီ ကူပ် တူ မိုဝ်း အီ ယွတ် လိုမ်လာ။

12 ဂေ ဒူအီ အီ ဘူင် တဲး န့ ကာပျာတ့် လိုဝ် တူတ့် ဒွန် မျုဝ်၊ ဂေ ဟဲ့ တး ဇမ် ခဲင် ပြဲ ကာဟဝ်း ဒဲင် နွန် ဒွန် ပ့လုဝ့်။ ပါယ် တီ န့ ပီ ဇဝ်ဖြာ ဒီ ဘော ဒိုဝ်း မာပွါ့ လာင် အန်၊ ဒုဝ်း ဝဲန် တူတ့်၊ စုး ဒူင် ဆိူတ် ကာဒါယ် အူ ဘ့လာက် ကော ဝီ ဇမ် ဒူင် ဆိူတ် ကာဒါယ် ပေါ အူ ဘ့လာက်။ န့ မိူဝ် တူ မိုဝ်း ခေါ အူ ဝီ အီ ဒီ ပွိုန် ကွယ် ဒါခိုယ် ဂျာမ်ဆာ။

13 ဂေ ဒီ ဘြတ် ဆီမာ ငှုဝ်။ ဂေ ယီ ဝီ ဆုဝ့် မီ ဒဝ် မာအာတ့် ဒီလူယ်။ ဂေ ပီ ဘော ရန့် ဒုက် ရန့် ညှာပ် မွက် မှဝ်၊ န့ ယီ တူ မိုဝ်း အာဂျိုဝ် မာဆေ။ ဂေ လုဝ် ဝီ ဆာယ် အီ ဟဝ် ပန် ဒီ ဝီ ဆုဝ့် ဂေ။ ခုဝ်၊ ဇဝ်ဖြာ ဟဲ့ ရူ ကာဆဝ် ဒီ ဂေ။”

14 ဇဝ်ဖြာ ပီ ဝီ တဝ်း၊ “အီ မုး ဂေ ဒူအီ ဟာယ် ဒူအီ မိူက် အီ ကွယ် ကာတတ် အုဝ်၊ အီ ဟဲ့ ဖာတ် ဒိုဝ်း ကာဒါယ် အီ မုး ခါဂုန် ပီ ဒွါ အုဝ် ဒီ ဒူအီ ပီ ရွက့် အုဝ် အီ မုး ဒူအီ အီဆာရေလ၊ အုဝ် ဒီ ဒိုဝ်း လေး ဂေ ခဲင် မိူင် ဒူင် ကွယ် ဂေ။ အုဝ် ဒီ ဘူင် တဲး န့ ပီ အီ ရိုတ့် လေး ပေတ့်။ အုဝ် ဒီ ဒိုဝ်း လေး ဘော ဒူအီ အာယူဒါ အီ ကွယ် ကာတဲ ဂေ။ 15 ဝါယ် ဟဲ့ ဟွတ့် ဒိုဝ်း လေး အုဝ် ဒီ ဂေ ခဲင် မိူင် တီ၊ အုဝ် ပီ ဒီ ဝီ ကာဝေ ဂေ၊ ဝီ တိုယ် ဂေ တဲး ဂေ ဝီ တး ကွယ် ခဲင် မိူင် ဘြိမ် ဂေ ပဲ့ ဟဲ့ အာပ် အုဝ်၊ တဲး န့ ဘဲန် ခါဂုန် ဂေ။ အုဝ် ဒီ တဲး ဂေ ဒွန် မျုဝ် ဝီ ကွယ် ခဲင် မိူင် ဂေ၊ ဝီ မှဝ် ဝီ အန်။ 16 ဆေ ဂေ ဘော ဝီ မိုဝ်း နဝ်း ဆီ ဟေန် ပီ ဒီ ပါယ် ဒီ ဒူပ် အုဝ်၊ ဆေ ဂေ ဘော ဒိူင် ဂါဝ် ပွုန် အုဝ် တဝ်း၊ ‘တဲး ဘော ဇဝ်ဖြာ ထူမ် ဂြုဝ်း အုဝ်။’ အုဝ် မိူဝ် ဒီ တဲး ဂေ ကွယ် ကာတဲ ဂေ ဒူအီ အာမျုဝ် ပီ အိုပ် အုဝ်။ ပဲ့ ဟဲ့ ဒိူင် ဂေ တီ၊ န့ ပီ ပဲ့ ဟဲ့ ဒွိုမ် မာနုဝ် ဂေ ဒူအီ ဟဝ် ဒီ ဒူအီ အာမျုဝ် အုဝ်၊ တဲး ဂေ ဂါဝ် ဒိူင် ပွုန် ဇဝ် ဘာလ။ 17 မာလဲ၊ ဆေ န့ ယီ မိုဝ်း ဒူအီ အူ မျုဝ် အီ တူ ထူမ် တူ ဒူပ်၊ အုဝ် မိူဝ် ဒီ ဒိုဝ်း လေး တူတ့် ဂေ ကာတဲ ဒူအီ အာမျုဝ် ပီ အိုပ် အုဝ်။”