1 ဇဝ်ဖြာ ပီ ဝီ တဝ်း ဒီ အုဝ်၊ “တဲး မဲ ဟာဝ် စိုဝ်း ဆဲ့ ဘိက် ကာတမ် လုယ်၊ ရိတ် ဒီ ညွယ် မဲ။ မာလဲ၊ မဲ ယီ တူ ပွိုန် စိုပ် ခဲင် အိုမ်။” 2 ပါယ် တီ အုဝ် မိူဝ် ဟာဝ် စိုဝ်း တး ဆဲ့ ဘော ရိတ် ဒိုက် ဒီ ညွယ် အုဝ် ဒူပ် ပီ ကာလာင် ဇဝ်ဖြာ ဒီ အုဝ်။ 3 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် ပေါ အူ ဇေန့် တဝ်း၊ 4 “တဲး မဲ ဒိုဝ်း ဆဲ့ ပီ စိုဝ်း တး မဲ၊ ပဲ့ ဟဲ့ ရိတ် မဲ ဒီ ညွယ် မဲ တီ၊ ဝီ ဟာဝ် ဒီ ဘ့လဲင် အိုမ် အူဖာရာတ်။ ဟဲ့ ဟွတ့်၊ တဲး မဲ ဝီ ချြီင် အုန် ခဲင် ကာဒဝ် မာဝ်။” 5 ပါယ် တီ အုဝ် မိူဝ် ဒိုဝ်း ဆဲ့ တီ၊ ဝီ ဟာဝ် ချြီင် ခူပ် ဘ့လဲင် အိုမ် အူဖာရာတ် ဒူပ် ဂြုဝ်း ပီ ကာလာင် ဇဝ်ဖြာ ဒီ အုဝ်။

6 ဝါယ် အန် တီ ဟဲ့ လှေန့် ကာဆဝ် ဇဝ်ဖြာ ပီ ဝီ ကာလာင် ဒီ အုဝ် တဝ်း၊ “တဲး မဲ ဝီ ဟာဝ် ဒီ ဘ့လဲင် အိုမ် အူဖာရာတ် တွိုန်၊ တဲး မဲ ဝီ ဒိုဝ်း ဆဲ့ ပဲ့ ဟဲ့ ဒွိုမ် စ်ု အုဝ် မဲ ချြီင် အုန် တွိုန်။” 7 အုဝ် မိူဝ် ဟာဝ် ဒီ ဘ့လဲင် အိုမ် အူဖာရာတ် တီ၊ ဝီ ဒိုဝ်း တး ဆဲ့ ပီ ချြီင် အုန် အုဝ် တွိုန်။ မာလဲ၊ ဆဲ့ တီ ဟဲ့ ဟွတ့် ရာမ်၊ ဟဲ့ ဟွတ့် လိုဝ်။ အာဝ် ဟူ ပွိုန် စ်ု။

8 ပါယ် တီ ဇဝ်ဖြာ ပီ ဝီ ကာလာင် ဂြုဝ်း ဒီ အုဝ်။ 9 အန် တဝ်း၊ “အုဝ် ဒီ ဒိုဝ်း ဝဲန် နဝ်း ပီခိုက် ဂေ ဒူအီ ခဲင် ကာဒါယ် မိူင် ယူဒါ ဘော ဒူအီ ခဲင် မိူင် ယေရူဆာလဲမ်၊ တဲး န့ ပီ ဆဲ့ အီ ဟဲ့ ရာမ် တီ။ 10 ဂေ မုး ဒူအီ အာမျုဝ် အီ ဟာယ် အီ မိူက် အီ တူ ထူမ် ဂြုဝ်း အုဝ်။ ဂေ မိုဝ်း နဝ်း ဒိူဝ် ကာဆဝ်။ ဂေ ဘော ဝီ ဘူင် ဒူပ် ပီ အိုင် ဂေ၊ ဝီ ဒူပ် ဒီ ကြိုပ် ဇဝ် ပီ ကြိုပ် အီ ဟဝ်။ ဂေ ဘော ပီ ဆဲ့ တီ အီ ဟဲ့ ရာမ်၊ အီ တူ ပွိုန် စ်ု။ 11 ဂေ ဒူအီ အီဆာရေလ ဘောကာဂ့လျီတ် ဘော ဒူအီ အာယူဒါ ဘော တူတ့်၊ အုဝ် ဟဲ့ တဲး ဂေ ကာဒိုက် ကာဒဝ့် ဒီ အုဝ် ပီ ဆဲ့ အီ ဟဲ့ ဒိုက် ဒီ ညွယ် ဒူအီ။ အုဝ် ဟဲ့ ဆီ တဲး ဂေ ဘဲန် ဒူအီ အာမျုဝ် အုဝ်၊ ဘဲန် ဒူအီ အီ အိူပ် မျုက် ပွုန် အုဝ် ဘော အာဖုင် ဒင်ခုဝ် အုဝ်။ မာလဲ၊ ဂေ တူ မိုဝ်း နဝ်း ဆီ ထူမ် ဂြုဝ်း အုဝ်။”

12 “ဂြုဝ်း ပီ လုဝ် ဟာဝ် ကာလာင် မဲ ဒီ ဂေ၊ န့ ပါယ် နီ။ ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ တဝ်း၊ ‘ခဲ့ ကွယ် ကာပဝ် အိုမ် မာငုန်၊ န့ လုဝ် နုဝ့် ဒွန် ဘူင့်။’ ဂေ ပီ ဒီ ဝီ တဝ်း ဒီ မဲ၊ ‘မဲ ထာင်၊ ယေ တူ နပ် ကာပဝ် အိုမ် မာငုန် ဒီ ဘော နုဝ့် ဒွန် ဘူင့်။း’ 13 မဲ ပီ ဝီ လုဝ် ကာလာင် ဂြုဝ်း ဇဝ်ဖြာ အီ ဟဲ့ တဝ်း၊ ‘အုဝ် ဒီ ဒိုဝ်း ဒူအီ ဘော မာန် ဘော မိူင်၊ တဲး ဂေ ဒျီင် ဖဲ ပဝ်း။ န့ မုး ခုန်ဒီခမ် အီ တုတ့် ဒဲင် မာလာင် ခုန်ဒီခမ် အာဒါဝိတ်၊ ဂေ ဒါ အီ လှူ ဒီ ဇဝ်ဖြာ၊ ဂေ ဒါ အီ ဘျာန် ဂြုဝ်း ဇဝ်ဖြာ ဘော ဂေ ဒူအီ အီ ကွယ် ခဲင် မိူင် ယေရူဆာလဲမ်၊ တဲး ဂေ ဘောကာဂ့လျီတ် ကော ယိုတ့် ကာဆဝ်။ 14 အုဝ် ဒီ ဘူင် တဲး ဂေ ဝီ လာယ် ကာဂ့လွက် ပီ ကာပဝ် အိုမ် မာငုန်။ ဂုန့် ဂေ ဒီ ဘော ဝီ လာယ် ကာဂ့လွက် ဒီ ဂွန်၊ တဲး န့ ကော ဆဝ် ကာဆဝ်။ ဒေါ ဘူင် အုဝ် ဒီ ဂေ ပါယ် တီ အုဝ် တူ မိုဝ်း နဝ်း လှယ့် နဝ်း ကာဝေ ဂေ ဒေါ မှဝ်၊ တဲး အုဝ် ဘော ပွိုန် ဒီ ပျာတ့် ဝဲန် တူတ့် ဂေ။’” ဇဝ်ဖြာ ဟဲ့ ကာလာင် ပါယ် တီ။

15 တဲး ဘေ ထူမ်၊ တဲး န့ ကာလှုး ဒီ နဝ်း ဘေ။ ကွဲ့ တဲး ဘေ ပီခိုက် နဝ်း ဘေ။ ခုဝ်၊ ဇဝ်ဖြာ ဟဲ့ ဟွတ့် ကာလာင် အုန် ပါယ် နီ။

16 “တဲး ဘေ ဝီ အိူပ် မျုက် ဇဝ်ဖြာ ပီ ကြိုပ် ဘေ ဒေါ ဆီ မိုဝ်း ဘ့လာင် ဆီငဲ။ ဆေ န့ ဟီ အပ် ဝွင့်၊ ဘေ ဘော နပ် ဒီပ့လာတ် ကေး ဒဲင် နွန်။ ဒေါ နှဝ့် န့ဒဝ့် ဘေ ပန် ဒီ ဘ့လာင်၊ အန် ဇဝ် ဒီ ဘူင် တဲး န့ အပ် ဝွင့် ကာဆဝ်၊ တဲး န့ ဘော ဘဲန် နဝ်း လိုဝ် နဝ်း ကာပျာတ့် ဒီ ဘေ။

17 ဆေ ဘေ ယီ တူ ထူမ်၊ အုဝ် ဒီ ဘော ယာမ် ဒူင် တူ လိုဝ်း တူ ယိုဝ် အီ ဟဝ် ကူပ် နဝ်း ပီခိုက် ဘေ တီ။ အိုမ် ငါယ် အုဝ် မိူဝ် ဒီ စုဝ်း ကူပ် ဟဲ့ မှေတ့် ဟာဝ် အီ ဒီ ဘေ ဒူအီ အီ ပီ ဖိုင် မာဘူ ဇဝ်ဖြာ။”

18 တဲး ဘေ ကာလာင် ဒီ ခုန်ဒီခမ် ဘော ဒီ မာ အန် တဝ်း၊ “တဲး ဘာယ် လူင် ဒဲင် မာလာင် ဘာယ်။ ခုဝ်၊ မင်ဂိုမ် အီ စှိတ် ကာဆဝ် ပီ စှိုပ် ဘာယ်၊ န့ ဒီ ဘော စုဝ်း ဒီ ဂိန့် ဘာယ်။

19 မိူင် ဘ့လာက် နာ တေတ့် မိူဝ် ဟဲ့ ဟွတ့် ကာဘိတ် တူတ့်။ န့ ယီ တူ မိုဝ်း ခေါ အူ ဝီ အီ ပွိုန် ဝိုဝ်း။ ဂေ ဒူအီ ဟဝ် ဟဲ့ ဟွတ့် မှေတ့် ဟာဝ် ဒူအီ အာယူဒါ ဘောကာဂ့လျီတ်။ တဲး ဂေ ဘောကာဂ့လျီတ် ဟာဝ် ဇမ် တူတ့် ခဲင် မိူင် အီ ဟဝ်။”

20 တဲး ဘေ ဆာကိုဝ်း ယွတ် ဂေ အီ တး နာ ကွာ တီ။ ဖိုင် မာဘူ ပဲ့ ဟဲ့ အာပ် အုဝ် ဒီ ဘေ၊ ဖိုင် မာဘူ ဘေ အီ စှိတ် ဂေ တီ၊ န့ ဝီ ကွယ် ဒီ မှဝ်။း

21 ဒူအီ ဂေ တီ၊ ဒေါ မာနုဝ် ဘေ ဒီ ဂေ၊ ဘေ ဟဲ့ တဝ်း၊ တဲး ဂေ ဘဲန် အူ ဂိုက် ဒီ ဘေ။ ဂေ ယီ ဒီ ဝီ အိုပ် ဘေ၊ ဘဲန် ဒါ ကာညာ ဘေ။ ဆေ ဟီ ပါယ် တီ ဘေ ဒီ တဝ်း မာဆေ။း န့ ဒီ ဘော ဆဝ် ဒီ နဝ်း ဘေ ပီ အီဘိုန့် ဟဲ့ ဆဝ် ဒီ မိုဝ်း ဂွန်။

22 မဲ ဒီ ဘော ကာဖာ ခဲင် နဝ်း မဲ တဝ်း၊ မှဝ် န့ ပါယ် န့ ဆော ဘဲန် ပါယ် နီ ဒီ အုဝ်။း န့ ဘော မုး ကူပ် မှာပ် ဘေ အီ ဟဲ့ တာင်၊ ဟဲ့ ကိူန် ကာဆဝ်။ ကူပ် မှာပ် ပီ ဘူင် ဘေ တီ၊ ဘေ လုဝ် ခမ် အီ ဟဝ် ဘုတ့် လေး ခြိုင် တာ ဘေ ဘော မှေတ့် ခါနှာပ် ဒီ လာယ် ဘေ။

23 ဂေ ဒူအီ အာမျုဝ် အေထီအူပ် တူ ပွိုန် ဘျွင် ဟုန် ဂေ အီ ဝွင့်၊ တဲး န့ ဝီ ဘဲန် အီ လုယ်။

မာဒီဝါယ် ဆီဇိုမ် မိူဝ် တူ ပွိုန် ဘျွင် ပဲ့ အန်။ ပါယ် တီ ဘော ဘေ ဒူအီ အီ ဟဲ့ ဒွိုမ် ဘူင် နာ တူ မွှိုမ်၊ ဘေ တူ ပွိုန် ဘျွင်၊ ဝီ ဘူင် အီ ဘွတ် အီ မွှိုမ်။

24 အုဝ် ဒီ ဘော ဒိုဝ်း ဘြတ် ဘေ၊ တဲး န့ ပီ ခါမ် ပီ ဘုတ် ကာဟိုင် ခုန် အီ တး နာ ခဲင် ပြဲ ကာဟဝ်း။

25 လွင် အန် တီ ဘေ လုဝ် ခမ် ကူပ် ဟဲ့ ပိဝ် ဘေ ဒီ အုဝ်၊ ဟဲ့ ဝီ ဒူပ် ဒီ ကြိုပ် ဇဝ် ဘဲန် မျုဝ် ဘဲန် မျုဝ် အီ တူ မုး အီ တူ မှာန်။

26 န့ ပီ အုဝ် ဒီ ဂ့လတ့် ဂ့လာင် ပီ တာ ဘေ၊ ဝီ ပ့လိုက် ဒီ ဂိန့် ဘေ၊ တဲး န့ ဘော လိုဝ်း တူတ့် ခဲ့ မွှိုမ် ဆာယ် ဘေ။

27 အုဝ် ဟဲ့ ဟွတ့် ယိုဝ် အီ မွှိုမ် ကာအိး ကာတဲ ဘေ။ ဘေ ဟဲ့ ဘူင် အီ ကာဒါတ့် ကာဆဝ်၊ ယီ တူ နပ် ဒီ ဆာယ် အီ။ ဘေ ဟဲ့ လာယ် လုတ့် လာယ် လာယ် ဘော ဘူင် ပီ ပီ ဘူင် ယာ မာလမ် အီ ကွယ် ဒဲင် နွန် နာ ရေတ့် ရဝ် ရေတ့် မိူင်။ အိုယ် ဘေ ဒူအီ ခဲင် မိူင် ယေရူဆာလဲမ်၊ ဘေ လုဝ် ခမ် ဝူတ် တာင်။ ဘေ ဆီ ဒီ ကွယ် ပါယ် တီ လှေန့် ခဲ့ မှဝ်။း”