1 ဇဝ်ဖြာ ပီ ဝီ ကာလာင် ဂြုဝ်း ဒီ အာယေရေမီ လွင် ဆောဒါတ် ကာဆဝ် ဒေါ တူ မိုဝ်း ဂ့လာယ်။

2 အန် တဝ်း၊ “ဒူအီ ခဲင် ကာဒါယ် မိူင် ယူဒါ၊ ဂေ ဒီ ဘော ဇမ် ဒုက် တာင်။ ဂေ အီ ကွယ် ခဲင် မိူင် ဒွန် မိူင် အာဝ် ဟူ မိုဝ်း ပ့လူမ် ဂေ ဟဲန့်။ ဒူအီ ခဲင် မိူင် တီ၊ ဂေ ဒီ ဘော ကွယ် ဒဲင် ကာဒါယ် ကူပ် ဟဲ့ က့လိုဝ် ဟဲ့ ငှဝ် ဂေ။ ဒူအီ ခဲင် မိူင် ယေရူဆာလဲမ် ဘော ယာမ် တာင်။

3 ဂေ ဒါ ကာညာ ဘေ ဒီ ဘော စ်ု ဒဲစေန့် ဂေ ဟာဝ် ဟြေတ့် ဒီ တဝ့် အိုမ်။ ဂေ ဟဲ့ ဟွတ့် ဇမ် ဒီ ဘာင် အိုမ် ခိုမ်၊ ယီ တူ မိုဝ်း အိုမ်။ ဂေ ဝီ ဂူင့် ဝေန့် ကာပဝ် ကာအူင့် ပီယေန့်။ ဂေ ဒီ ဘော ကာလုတ့် နဝ်း၊ အာဝ် နပ် ပီ ဒီ ပါယ် ဘော ကာမှုဝ့် ဂိန့် ဂေ။

4 ကူပ် တူ စုဝ်း ဂ့လာယ် ခဲင် မိူင် ဂေ တီ၊ ကာဒါယ် ဒီ ဘော မာအ မာတုး မာတုး။ ဂေ ဒူအီ အီ ရန့် မာန် ဂေ ဒူင် နာ၊ န့ ဒီ ဘော ဘဲန် နဝ်း လိုဝ် ဘော လုဝ် ကာမှုဝ့် ဂိန့် ဂေ။

5 မာဇ အီ မိုဝ်း ဂွန် ကာမာယ်၊ အန် ဒီ ဘော ဘ့လေး ဝဲန် ဂွန် အန် ကူပ် အာဝ် မိုဝ်း ဒီ ဟူမ် ပေတ့်။

6 ဂေ မာလာ ဘော ကွယ် ဒဲင် နွန် စာ ဒူင် ကာဟဝ်း၊ ဝီ ညွှတ် ခုန် ပီ မာဆုဝ် ပြဲ။ ငါယ် ဂေ မိူဝ် ဟဲ့ ဒီဂ့လုဝ့် လိုက် ကာဆဝ် ကူပ် အာဝ် မိုဝ်း ဒီ ဟူမ် ပေတ့်။”

7 အိုယ် မဲ ဇဝ်ဖြာ၊ ကူပ် ဟဲ့ ဘူင် ယေ မှာပ်၊ ယေ ဟဲ့ ကာအာပ် ခမ် ဒုက် ဘဲန် မျုဝ် ဘဲန် မျုဝ်။ မာလဲ၊ ယေ ဝီ မှာန့်၊ တဲး မဲ ဇဝ် ဝီ စွယ် ယေ၊ တဲး န့ ဒူပ် ကာဒိက် ဆတ်ဇာ ပဲ့ ဟဲ့ ဒွါ မဲ ဒီ ယေ။

8 အိုယ် မဲ ဇဝ် အီ မုး ပီ နှဝ့် န့ဒဝ့် ယေ ဒူအီ အီဆာရေလ၊ မဲ မုး ဇဝ် အီ ချွတ် ယေ ဒေါ ဇမ် ယေ ဒုက်။ မှဝ် န့ ပါယ် မဲ ဇဝ် ဆော ပီ ခဲတ့် ခဲင် မိူင် ယေ နီ ဘော ပီ ဒူအီ ဟာဝ် ဒူပ် န့တေန့် ဘော တမ် မီ အူ မှိုဝ်။း

9 မှဝ် န့ ပါယ် မဲ ဇဝ် ဆော ပီ ဒူအီ အီ ဟဲ့ ကာစွာ ဘော ပိဝ် ဒုဝ် ဘော ပီ ဒါ ဆိုက် အီ မိုဝ်း ပ့လူမ် တာင်၊ ယီ တူ ပွိုန် ချွတ် အီ။း မဲ ဇဝ်ဖြာ ယီ ကွယ် ကာတဲ ယေ။ အီ ဟဝ် မိူဝ် ဒဲ့ စိူဝ် ယေ အီ ပီ စိူဝ် မဲ ဇဝ်။ ယေ မှာန့်၊ ကွဲ့ တဲး မဲ ဇဝ် ဝဲန် ယေ။

10 ဇဝ်ဖြာ ဘော ဝီ ကာလာင် လွင် ဂေ ဒူအီ ပီ အိုပ် အန် တဝ်း၊ “ဂေ ဟဲ့ အိုင် ဒီ လဲ ဝိဝ် လဲ ဝေန့်။ ဂေ မိူဝ် တူ ယိူန် နဝ်း ဆီ ဟာဝ် ဂေ။ ကူပ် န့ ပါယ် တီ ဇဝ်ဖြာ မိူဝ် တူ ရပ် ဂေ။ အန် ဇဝ် ဝီ လှုဝ်း ပီ ဘူင် ဂေ အီ ဟာယ် အီ မိူက် ဘော ဒမ် မှာပ် ဒီ ဂေ။”

11 ဟဲ့ ဟွတ့်၊ ဇဝ်ဖြာ ပီ ဝီ တဝ်း ဒီ အုဝ်၊ “ကွဲ့ ဆာခိုဝ် မှာန့် နာ ဘွတ် နာ မွှိုမ် အာဒါ ဒူအီ ဂေ တီ။ 12 ဂေ ပီ ဘော ယိူန် ပီ ဒီ ဟူမ်၊ အုဝ် ယီ တူ ထူမ် ဂြုဝ်း ပီ ယာမ် ပီ ဒဲ့ ဂေ ဒီ အုဝ်။ ဂေ ပီ ဘော လှူ ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ ဒီဂါဝ် မိူဝ်၊ အုဝ် တူ ရပ် တူ ဒိုဝ်း။ အုဝ် ဒီ ဝီ တဲး ဂေ ခမ် ဒုက် ဒီ မာပွါ့ လာင် ဘော အေတ့် ပီ ဒီ ဟူမ်။”

13 အုဝ် မိူဝ် ဝီ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ ဂေ ဒါ အီ ဘျာန် ဂြုဝ်း ဇဝ်ဖြာ ဟဲ့ ဝီ ကာလာင် ဒီ ဒူအီ ဂေ တီ ဘဲန် ဇေန့် ဘဲန် ဇေန့် တဝ်း၊ ‘ဘေ တူ လုဝ် ခမ် ဒုက် ဒီ မာပွါ့ လာင် ဘော တူ လုဝ် အေတ့် ပီ ဒီ ဟူမ်။ ဇဝ်ဖြာ ဒီ ဝီ တဲး န့ ဂတ် ဂျီတ် ယေန် ဒါခိုယ် ဆေဆေ ခဲင် မိူင် ဒူင် ကွယ် ဘေ တီ။’”

14 ဇဝ်ဖြာ ဝီ တဝ်း ဒီ အုဝ်၊ “ဒူအီ အီ ဘျာန် ဂြုဝ်း ဇဝ်ဖြာ တီ၊ ဂေ တဝ်း၊ ပီ ကာလာင် ဂေ မုး ဂြုဝ်း အုဝ်။ န့ ယီ တူ မှာန်။ န့ မုး ဂြုဝ်း ကာလုဝ်။ အုဝ် တူ စ်ု ဂေ။ အုဝ် မိူဝ် တူ ကာလာင် ဂြုဝ်း ဒီ ဂေ။ ဂေ ဘော တဝ်း၊ ဂေ ဟဲ့ ယိုဝ် ပီ ဘျ အုဝ် ဒီ ဂေ ဘော ဘျ အီ ဒီ ပါယ် နာ အာတ့် ဒီ ဂေ။ န့ ယီ တူ မိုဝ်း ဒီခုဝ်။ ဂေ ဘော ကြိုပ် အာရိုပ် ရာင် ဘော ကာလာင် အီ လေး ခဲင် အာငျာန် ဂေ။

15 ပါယ် တီ အုဝ် အီ မုး ဇဝ်ဖြာ ဒီ ကာလာင် လွင် ဒူအီ အီ ဘျာန် ဂြုဝ်း ဇဝ်ဖြာ ပီ တူ စ်ု အုဝ် တီ။ ဂေ ဟဲ့ ညိုင်ရာင် ဒီ ဂါဝ် ပွုန် အုဝ် ဘော တဝ်း၊ ‘ခဲင် မိူင် နီ အာဝ် မိုဝ်း ဒီ လုဝ် ခမ် ဒုက် ဒီ မာပွါ့ လာင် ဘော အေတ့် ပီ ဒီ ဟူမ်။’ န့ ယီ မုး ဂေ ဒါ အီ ဘျာန် ဂြုဝ်း ဇဝ်ဖြာ တီ၊ ဂေ ဒီ ဝီ စှိုမ် ဝီ ယမ် ဒီ မာပွါ့ လာင် ဘော အေတ့် ပီ ဒီ ဟူမ်။ 16 ဘော ဂေ ဒူအီ ကိူန် အီ ထူမ် ဂြုဝ်း ပီ ကာလာင် ဂေ ဒါ အီ ဘျာန် ဂြုဝ်း ဇဝ်ဖြာ တီ၊ ဂေ ဒီ ဘော ဘ့လေး ဝဲန် ဒုဝ် ယမ် ဂေ ဒူပ် န့တေန့် ခဲင် မိူင် ယေရူဆာလဲမ် ကူပ် ဟဲ့ ခမ် ဂေ ဒုက် ဒီ မာပွါ့ လာင် ဘော အေတ့် ပီ ဒီ ဟူမ် တီ။ အီ ဒီ ဒိပ် ဒုဝ် ယမ် ဂေ၊ ဘော မုး အီဘိုန့် ဂေ ဘော ဂွန် အီဘိုန့် ဂွန် အီမာယ် ဂေ၊ အာဝ် မိုဝ်း ခေါ အူ ဝီ။ အုဝ် ဒီ တဲး ဂေ ခမ် မှာပ် ဂေ ခဲ့ ကာအာပ် ဂေ ခမ်။

17 ဂြုဝ်း ပီ ဒီ လုဝ် ဟာဝ် ကာလာင် မဲ ဒီ ဂေ၊ န့ ပါယ် နီ။ ‘အိုမ် ငါယ် အုဝ် ဒီ ဘော စုဝ်း ဒွင် ခိူန် ဒွင် ဝန်။ အာဝ် ကာဒတ် ဒေါ မှဝ်။ ဂေ ဒူအီ အာမျုဝ် အုဝ် အီ ပီ ဒီဘျာ ဇဲတ်၊ န့ ပီ ဂေ ဟဲ့ မိုဝ်း ဒိမ် တာင် ကူပ် ဟဲ့ ခမ် ဂေ အီ ဟဝ် ဂ့လွက် ကာဆဝ် ဂေ။’

18 ဒေါ ဝီ လေး ဟာဝ် အုဝ် နာ ရေတ့် မိူင်၊ အုဝ် ဘော ဝီ ယိုဝ် ဂေ အီ ဟဲ့ ယမ် ဒီ မာပွါ့ လာင်။ ဒေါ ဝီ လိုပ် အုဝ် ခဲင် မိူင်၊ အုဝ် ပီ ဝီ ယိုဝ် ဂေ အီ ဟဲ့ ဒီလှး န့စမ် ကူပ် ဟဲ့ အေတ့် ဂေ ပီ ဒီ ဟူမ်။ ဘော ဂေ ဒါ အီ ဘျာန် ဂြုဝ်း ဇဝ်ဖြာ ဘော ဂေ ဒါ အီ လှူ ဒီ ဇဝ်ဖြာ၊ ဂေ ဘော ဘူင် ဂါန် ဂေ၊ ယီ တူ နပ်၊ န့ မိုဝ်း ဒီခုဝ် မာဆေ။”

19 “ဟဲ့ မှာန်၊ မဲ ဇဝ်ဖြာ ဒီ ဘော ဝဲန် ကာဒါယ် မိူင် ယူဒါ ဘောကာဂ့လျီတ်။း ဟဲ့ မှာန်၊ မဲ ဇဝ် ဟဲ့ ကာအိး ကာဆဝ် မိူင် ဇီအူန်။း မှဝ် န့ ပါယ် ပီ ဒွါ ကာဆဝ် မဲ ဇဝ် ဒုက် ဒီ ယေ၊ တူ တဲး န့ ဟြာယ် ဒေါ မှဝ်။း ယေ ပီ ဘော နှဝ့် န့ဒဝ့် တဲး မိူင် ယေ ယေန် ဒါခိုယ်၊ န့ ယီ တူ ဘဲန် နာ ဘွတ် နာ မွှိုမ် ဒီ ယေ။ ယေ ပီ ဘော နှဝ့် န့ဒဝ့် နာ ဒါခိုယ် ဂျာမ်ဆာ မိူဝ်၊ ယေ ယီ ဝီ ခမ် မီ အာဖေ အာရေ။

20 အိုယ် မဲ ဇဝ်ဖြာ၊ ယေ ဟဲ့ ဟွတ့် လှုဝ်း အီ တူ မွှိုမ် ပဲ့ ဟဲ့ ဘူင် ယေ ဘော မှာပ် ပဲ့ ဟဲ့ ဘူင် ဂေ ဂုန့် ဒင် ယေ။ ဟဲ့ မှာန် အာခါခ်ု၊ ယေ ဟဲ့ လုတ့် မဲ ဇဝ်။

21 ကူပ် မိုဝ်း မဲ ဇဝ် နဝ်း ရွက့် ကာဝေ ဆေဆေ၊ ကွဲ့ တဲး မဲ ကာအိး ကာဆဝ် ယေ။ မှာန့်၊ ကွဲ့ တဲး အီ ဟဝ် လုက်တာယ် မိူင် ယေရူဆာလဲမ် အီ မုး ဒူင် ကွယ် မာလာင် မဲ အီ မိုဝ်း ဆာရေ ဘော အာဖုင် ဒင်ခုဝ် တာင်။ တဲး မဲ ဇဝ် ဝီ လှုဝ်း၊ ကွဲ့ ဝဲန် ကာဒိက် ဆတ်ဇာ ပဲ့ ဟဲ့ ဒွိုမ် ဒွါ မဲ ဒီ ယေ။

22 အာရိုပ် ရာင် ပီ ကြိုပ် အီ ဟဝ် မိူဝ် တူ နပ် ဒီ တဲး ဂ့လာယ် စုဝ်း။ ဂါင်ဟြာဝ် မိူဝ် တူ နပ် ဒီ ဘူင် ရာင် အန် တဲး ဂ့လာယ် စုဝ်း။ န့ မုး မဲ ဇဝ် အီ ဘူင်။ ခုဝ်၊ ယေ ဒီ နှဝ့် န့ဒဝ့် မီ မဲ ဇဝ် ကူပ် မဲ ဇဝ် မုး အီ ဘူင် တဲး န့ မိုဝ်း တူတ့် ဒွန် မျုဝ်။ မဲ ဇဝ်ဖြာ မုး ဇဝ်ဖြာ ပီ ကြိုပ် ယေ။”