1 ဇဝ်ဖြာ ပီ ဝီ ကာလာင် ဒီ အုဝ် တဝ်း၊ “ဆေ အာမုဝ်ဆဲ ဂါယ် အာဆာမူအေန် ဘော ကွယ် ဒီ အာတ့် အုဝ် မိူဝ်၊ အုဝ် ယီ တူ မိုဝ်း နဝ်း ကာဝေ ဒူအီ ဂေ နီ။ တဲး မဲ ဟုဝ် တဝ် ဂေ၊ ကွဲ့ တဲး အုဝ် ဝီ ယိုဝ် ဂေ ဒေါ မှဝ်။

2 ဆေ ဂေ ဘော ဒီမွှတ် မဲ တဝ်း၊ ‘ယေ လုဝ် ဟာဝ် ကွယ် ဒီ မှဝ်။း’ တဲး မဲ ဝီ ကာလာင် ဒီ ဂေ တဝ်း၊ ‘ဇဝ်ဖြာ ဟဲ့ ဟွတ့် ဆုင်ဖျာတ် အုန် ဝီ အီ လုဝ် ယမ်၊ တဲး ဂေ ဟာဝ် ကွယ် ဒူင် ဒီ ယမ် အီ တီ။ ဂေ အီ လုဝ် ယမ် ဒီ ဆဝ် ရောဂါ၊ တဲး ဂေ ဟာဝ် ဒူင် မိုဝ်း ဆဝ် ရောဂါ။ ဂေ အီ လုဝ် ယမ် ဒီ မာပွါ့ လာင်၊ တဲး ဂေ ဟာဝ် ဒူင် ကွယ် မာပွါ့ လာင်။ ဂေ အီ လုဝ် ခမ် ဒီ အေတ့် ပီ ဒီ ဟူမ်၊ တဲး ဂေ ဟာဝ် ကွယ် ဒူင် တူ မိုဝ်း ပီ ဒီ ဟူမ်။ ဂေ အီ လုဝ် ခမ် တဲး အီ ဟဝ် မှေတ့် ခြွင့် ဂေ၊ တဲး ဂေ ဟာဝ် ဒူင် ကွယ် ဒူအီ ဂေ တီ။’

3 အုဝ် ဒီ ဘူင် တဲး န့ မိုဝ်း ဖွုန် မျုဝ် အီ ပျာတ့် ဂေ။ အုဝ် ဒီ တဲး ဂေ ယမ် ဒီ မာပွါ့ လာင်။ ဟဲ့ ဟွတ့်၊ မာဆုဝ် ဒီ ဘော ကဝ့် လာက် ဂေ ဘော မာဆိမ် ခဲင် ဂါင်ဟြာဝ် ဘော မာဒုဝ် ပြဲ အီ ဟာယ် ကာဆဝ် ဒီ ဘော တး ဟူမ် ယင် ဂေ။ 4 အုဝ် ဒီ ဘူင် တဲး ဒူအီ ခဲင် မိူင် ဒွန် မိူင် ဒဲင် ကာဒါယ် နီ ကော ကာစွာ ကော ဒိူန် လွင် ဂေ တီ။ န့ ဘော မုး ကူပ် မှာပ် ပဲ့ ဟဲ့ ဘူင် ခုန်ဒီခမ် အာမာနာဆေ အီ မုး ဂွန် အာဟေစကီ အီ ဟဲ့ အိုပ် ဒူအီ အာယူဒါ ခဲင် မိူင် ယေရူဆာလဲမ်။”

5 အိုယ် ဘေ ဒူအီ ခဲင် မိူင် ယေရူဆာလဲမ်၊ အာဆေ ဒီ ဘော ကာဝေ ဘေ။း အာဆေ ဒီ ဘော က့လိုဝ် ဘော ငှဝ် ကူပ် ဘေ။း အာဆေ ဒီ ဘော တး ဒီမွှတ် ဘေ တဝ်း၊ “ဘေ ဟဲ့ ဒါခိုယ်၊ ဟဲ့ ဂျာမ်ဆာ။း”

6 ဇဝ်ဖြာ တဝ်း၊ “ဘေ ဟဲ့ ဝဲန် အုဝ်၊ ဘေ ဟဲ့ ဝီ ဝိဝ် ဒူပ် န့တေန့် ဘြိမ် ဘေ။ အုဝ် ဒီ ဒွါ ဒုက် ဒီ ဘေ ဘော ပျာတ့် ဘေ။ အုဝ် အာဝ် ဟူ ကာဝေ ဘေ။

7 အုဝ် ဒီ ဘူင် တဲး ဘေ ယမ်၊ တဲး န့ ပီ အီ ယပ် လေး ဒျီပ် ငှုဝ် ဒီ ဘာင် မာလုဝ်း မိူင်။ အုဝ် ဒီ ပျာတ့် ဂေ ဒူအီ အာမျုဝ် အုဝ် ကူပ် တူ ဆီ ဟာဝ် ဂေ ဒူပ် အုဝ်။

8 ဂေ ယာ ဆီပြး ဒီ ဘော ကိူန် ကာဆဝ် လွှိုမ် ကာဟာတ့် ဒီ အိုမ် နမ်မုက်ဆာရာ။ ဂွန် ကာညူမ် ဘေ၊ အုဝ် ဒီ ဘူင် တဲး ဂေ လိုဝ် စှိုမ် ဒေါ ဆီ နှိုမ် ဂေ။ အုဝ် ဘော တဲး မာ ဂေ ခမ် ဒုက်။ န့ ဒီ ဘော ဘဲန် အီ မွှိုမ် ယုဝ် ကာဆဝ် အူ ဇေန့်။ န့ ဒီ ဘော ဒုက် ညှာပ် ကာဆဝ် ဒီ နဝ်း ဂေ။

9 အီဘိုန့် အီ ဟဲ့ မိုဝ်း ဂွန် ဘူ ဝီ၊ အန် ဘော ဒီလှး န့စမ် ဘော ကေး ပိဝ်။ ဒီ အန် န့ ပီ ပြဲ ဟဲ့ အပ် ဆိန့် အာတ့် ဂေတ့် ဆီငဲ။ ဂေ ဒီ ဘော ဝီ ဆာယ် အီ ဘော ခမ် အီ ဟဝ် လုက်တာယ် ဂေ။ ဂေ အီ ဆီ ဂိတ် ဆီ ကွယ်၊ အုဝ် ဒီ တဲး ဂေ ယမ် ဒီ မာပွါ့ လာင် ရန်ဆူ ဂေ။” ဇဝ်ဖြာ ဟဲ့ ကာလာင် အုန် ပါယ် တီ။

10 အုဝ် ဝီ တဝ်း၊ “မာ အိုယ်၊ အုဝ် ဟဲ့ ခမ် ဒုက် တာင် ကာဆဝ်။ မဲ မာ ဟဲ့ ဂွိုတ် တး အုဝ်၊ တဲး အုဝ် ဘဲန် အီ ကာအေး ကာထဲန့် ဒီ ဒူအီ ဘော မိူင်။ အုဝ် တူ ဒွိုမ် ကာရဝ်း ကာဝါယ် ဒီ အီ ဟဝ်၊ အီ ဟဝ် မိူဝ် တူ ကာရဝ်း ကာဝါယ် ဒီ အုဝ်။ မာလဲ၊ ဒူအီ ဘောကာဂ့လျီတ် ဟဲ့ ဝီ ကာဖြူမ် ဒီ အေး ဒီ ဒိူင် အုဝ်။”

11 ဇဝ်ဖြာ ဝီ တဝ်း၊ “အုဝ် ဒီ တဲး မဲ အာယေရေမီ ဝီ ပွိုန် နာ မွှိုမ် အာခ်ု မှာန်။ ပန် ဒီ တး အာဖေ အာရေ ဘော အီ ခါနှာပ် ဂေ၊ အုဝ် ဒီ ဘူင် တဲး ဂေ ရန်ဆူ မဲ ဝီ ဂူမ် မဲ ဘော ဝီ ဒွင်ဘာန် မဲ အာခ်ု မှာန်။

12 န့ တူ မိုဝ်း အာဆေ အီ ဒီ ပဲ ဒီ ကာဘက် ဟိန် အီ တး ခဲင် မိူင် နာ ကွာ။ န့ မိူဝ် တူ မိုဝ်း အာဆေ အီ ပဲ ဒီ ကာဘက် ဘွင့် ဒေန့်။

13 အုဝ် ဒီ ဒိုဝ်း ကြုဝ်ကြာမ် ဘေ၊ ဝီ အာပ် ဒီ ဂေ ရန်ဆူ ဘေ။ တဲး ဂေ ဖာတ် ဒိုဝ်း ဒီလူယ် ဒီလာယ်၊ အာဝ် လုဝ် စိုဝ်း။ အုဝ် တဲး ဂေ ဘူင် ပါယ် တီ ကူပ် မှာပ် ပဲ့ ဟဲ့ ဘူင် ဘေ ခဲင် မိူင် ဘေ ဒွန် နာ ဒွန် ပ့လုဝ့်။

14 အုဝ် ဒီ တဲး ဘေ ဝီ ဘဲန် မှာယ် ရန်ဆူ ဘေ၊ ကွယ် ခဲင် မိူင် ပီ တူ ဒွိုမ် ယိုဝ် ဘေ။ ခုဝ်၊ နဝ်း ရူ နဝ်း စာဝ် အုဝ် ဒီ ဘော လေး ပီ ငဝ် တဲး ကာဆိုမ် ဘေ။”

15 အုဝ် ဝီ တဝ်း၊ “အိုယ် မဲ ဇဝ်ဖြာ၊ မဲ ဇဝ် မိူဝ် ဟဲ့ ဟွတ့် နပ် တူတ့် ဒွန် မျုဝ်။ အုဝ် မှာန့်၊ ကွဲ့ တဲး မဲ ဇဝ် ပိဝ် အုဝ် ဘော ဝီ တး စ်ု အုဝ်။ တဲး မဲ ဇဝ် ဝီ ဘူင် ဝျီ့ ဒီ ဂေ ခဲ့ ပီ ခါနှာပ် ဂေ ဒီ အုဝ်။ တဲး မဲ ဇဝ် ဘော အူတ် နဝ်း မဲ၊ ကွဲ့ ဘူင် တဲး အုဝ် စှိုမ်။ တဲး မဲ ဇဝ် လှုဝ်း၊ အုဝ် ဟဲ့ ဘဲန် ပီ နဲန အီ ဟဝ် ကူပ် ကာလာင် အုဝ် ဂြုဝ်း မဲ ဇဝ်။

16 အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် ဟဲ့ ယိုဝ် ဂြုဝ်း မဲ ဇဝ်ဖြာ၊ န့ ပီ အုဝ် မိူဝ် ဟူမ် ဂေ အူ ဇေန့်။ ဂြုဝ်း မဲ ဇဝ်ဖြာ တီ၊ န့ ဘော တဲး နဝ်း အုဝ် ဘျုဝ် ဒါခိုယ်။ မဲ ဇဝ် မိူဝ် ဟဲ့ တဲး အုဝ် ဘဲန် ဂွန် မဲ။

17 အုဝ် မိူဝ် တူ ကွယ် ရိုမ် ဒူပ် ဂေ အီ ကွယ် ကာဇု ကာဒိုမ် ဘော အိုင် ဒီ ဘူင် တဲး န့ ကျဝ်။ အုဝ် ဘော ကွယ် အုဝ် အူ ဝီ အူ ပ့လုဝ့်။ ခုဝ်၊ မဲ ဇဝ် ဟဲ့ အိုပ် အုဝ်။ မဲ ဇဝ် ဟဲ့ ဘျွင် နဝ်း အုဝ်၊ တဲး အုဝ် မိုဝ်း နဝ်း ရူ ဒီ ဂေ။

18 ကူပ် မာဆေ နဝ်း အုဝ် ဟဲ့ ဆဝ် ဆေဆေ ဘော ဒိမ် ခဲင် နဝ်း အုဝ် ပီ ဆော ဟူ နပ် ဒီ ကဲန်။း မဲ ဇဝ်ဖြာ ကွဲ့ ဘူင် ဒီ အုဝ်၊ တဲး န့ ပီ ဒီလယ့် ကာဟဝ်း ဘော အိုမ် ခိုမ် အီ ဟဲ့ ဟိတ် ဟေန့်။”

19 ပန် အန် တီ ဇဝ်ဖြာ ဝီ တဝ်း၊ “ဆေ မဲ ဟဲ့ လှုဝ်း ဘော ကာလာင် မှာပ် မဲ၊ အုဝ် ဒီ တဲး မဲ ကဲန်။ မဲ ဘော ပွိုန် ဒီ ဘူင် ဂါန် အုဝ်။ ဆေ မဲ ဘော ကာလာင် မီ ဂြုဝ်း ဘွတ် ဘော တူ ကာလာင် ဂြုဝ်း ပီယေန့် အီ တူ မိုဝ်း ဒီခုဝ်၊ အုဝ် ဒီ တဲး မဲ ကာလာင် ဂြုဝ်း အုဝ်။ ဒူအီ ဂေ တီ၊ ဂေ ဒီ ဘော တး ဒူင် ကွယ် မဲ။ မဲ ယီ တူ လုဝ် ဟာဝ် ဒူင် ကွယ် ဂေ။

20 အုဝ် ဒီ တဲး မဲ ပီ ရဲင် အီ မန် ဆီချာ အီ ပီ ရဲင် ဘွင့် ဒေန့်။ ဂေ ဒီ ဘော ကာဂုဝ်း ဒီ မဲ၊ ဂေ ယီ တူ အွင် တူ ပဲ မဲ။ အုဝ် ယီ ဒီ ကွယ် ဘ့လာက် မဲ ဘော ဘ်ု ဒီ စွယ် ဒီ ချွတ် မဲ။” ဇဝ်ဖြာ ဟဲ့ ကာလာင် အုန် ပါယ် တီ။

21 ဇဝ်ဖြာ ပီ ဝီ တဝ်း၊ “အုဝ် ဒီ ချွတ် တဲး မဲ လွတ် ဒီ ဒူအီ ဟာယ် ဒူအီ မိူက်။ အုဝ် ဒီ ဝီ ထုတ် လေး မဲ ဒီ ဂေ ဒူအီ အီ မွှိုမ် ယုဝ် ကာဆဝ်။”