1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “ကွဲ့ တဲး မဲ ခတ် ဒိုဝ်း အီဘိုန့်။ ဒူင် ကွယ် မဲ နီ၊ အုဝ် တူ ဆီ တဲး မဲ မိုဝ်း ဂွန်။” 3 ခုဝ်၊ ဇဝ်ဖြာ ဟဲ့ ဟွတ့် ကာလာင် ဘော လွင် ဂွန် အီဘိုန့် ဘော လွင် ဂွန် အီမာယ် အီ ဂွိုတ် ဒီ နီ။ အန် ဟဲ့ ကာလာင် ဘော လွင် ဂုန့် မာ ဂွန် ဂေ တီ။ 4 အန် ဟဲ့ တဝ်း၊ ဂေ ဒီ ယမ် ဒီ ဆဝ် ရောဂါ အီ မွှိုမ် ယုဝ် ကာဆဝ်၊ အီ တူ နပ် ဒီ ကဲန်။ န့ ယီ တူ မိုဝ်း အာဆေ အီ က့လိုဝ် အီ ငှဝ် ကူပ် ဟဲ့ ယမ် ဂေ။ ဒုဝ် ယမ် ဂေ တီ မိူဝ်၊ အာဝ် မိုဝ်း အီ ဒီ ဒိုဝ်း ဒိပ်။ ဂေ ဒီ ဘော ဘ့လေး ဝဲန် ဒုဝ် ယမ် ဂေ တီ ခူပ် န့တေန့်၊ တဲး န့ ပီ ကာအး အီ မွှိုမ် ကာအိး မွှိုမ် ကာဒါတ့်။ ဒူအီ ဂေ တီ ဒီ ဘော လိုဝ် စှိုမ် ဒီ မာပွါ့ လာင် ဘော အေတ့် ပီ ဒီ ဟူမ်။ ဒုဝ် ယမ် ဂေ တီ ဒီ ဘော ဘဲန် ပီ ဒီ ဟူမ် မာဆိမ် အီ ကွယ် ခဲင် ဘ့လေန့် ဘော ပီ ဒီ ဟူမ် မာဒုဝ် ပြဲ ဟာယ်။”

5 ဇဝ်ဖြာ ပီ ဝီ တဝ်း၊ “ကွဲ့ တဲး မဲ ဟာဝ် လိုပ် ခဲင် ကာင် ဒူအီ ယမ် ဂေ တီ။ အာဝ် လုဝ် ဟာဝ် က့လိုဝ် ဟာဝ် ငှဝ် ကူပ် ဟဲ့ ယမ် ဂေ။ ခုဝ်၊ အုဝ် အာဝ် ဟူ ဘ်ု အာဆာက် ဂေ ဘော အာဝ် ဟူ တဲး ဂေ မိုဝ်း နဝ်း ယေန်။ အုဝ် အာဝ် ဟူ မိုဝ်း နဝ်း ရွက့် ကာဝေ ဒူအီ ဂေ တီ။ 6 ဘော ဒူအီ ရဝ် ဒူအီ ကာင် ဘော ဂေ ဒါ တာင် ဒီ ဘော ယမ် တူတ့် ခဲင် ကာဒါယ် မိူင် နီ။ မာလဲ၊ ယီ တူ မိုဝ်း အာဆေ အီ ဒီ ဒိုဝ်း ဒိပ် ဒုဝ် ယမ် ဂေ။ န့ မိူဝ် တူ မိုဝ်း အာဆေ အီ ဒီ ယာမ် ဒီ က့လိုဝ် ကူပ် ဟဲ့ ယမ် ဂေ။ န့ မိူဝ် တူ မိုဝ်း အာဆေ အီ ဒီ ကပ် ဟိုက် ဂိန့် အန် ဘော ကြိး ဟုန် အန် တဲး န့ ဒိမ် ကူပ် ဟဲ့ ယမ် ဂေ။ 7 န့ မိူဝ် တူ မိုဝ်း အာဆေ အီ ဒီ ဒွါ ပီ ဒီ ဟူမ် ဒီ ဂေ အီ ဟဲ့ မိုဝ်း နဝ်း လိုဝ်၊ အီ ဟဲ့ က့လိုဝ် ဟဲ့ ငှဝ် ကူပ် ဟဲ့ ယမ် ဒူအီ၊ တဲး န့ ဝီ လှဝ် နဝ်း ဂေ။ န့ မိူဝ် တူ မိုဝ်း အာဆေ အီ ဒွါ ပီ ဒီ ဒျီင် ဒီ ဂေ၊ တဲး န့ ဝီ လှဝ် နဝ်း ဂေ ကူပ် ဟဲ့ ယမ် ဒူအီ၊ ဘော မုး ဂုန့် ဂေ၊ ဘော မုး မာ ဂေ။

8 ကွဲ့ တဲး မဲ ဟာဝ် လိုပ် ခဲင် ကာင် ဒူင် ဘူင် ဂေ ဘ့လွယ်။ ကွဲ့ တဲး မဲ ဟူမ် ရိုမ် ကွယ် ရိုမ် ဒူပ် ဂေ။” 9 ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် ဟဲ့ ဟွတ့် ကာလာင် အုန်။ အန် တဝ်း၊ “အုဝ် ဒီ ဘူင် တဲး ဂြုဝ်း အီ ဘျုဝ် ဒါခိုယ် ဟြာယ် တူတ့်။ ဘော ဂြုဝ်း အီ ခူယ်၊ ဂြုဝ်း ကာညူမ် ဒီဘျာ အီ ဒီ ခတ်၊ န့ ဒီ ယေန် ဒီ ငွင့် ဒေါ မုး စုဝ် ဘေ နီ။

10 ဒေါ ဟဲ့ ဟွတ့် ကာလာင် မဲ ဂြုဝ်း ပီ တဝ်း အုဝ် နီ ဒီ ဂေ၊ ဂေ ဘော နပ် ဒီ ဝီ ဒီမွှတ် မဲ တဝ်း၊ ‘မှဝ် န့ ပါယ် ပီ ဆော ဒမ် ကာဆဝ် ဇဝ်ဖြာ မှာပ် ဒီ ယေ။း မှာပ် မာဆေ ပီ ဟဲ့ လုတ့် ယေ ဒီ ဇဝ်ဖြာ ပီ ကြိုပ် ယေ။း’ 11 ဆေ ဂေ တဝ်း ပါယ် တီ မဲ လုဝ် ဝီ ကာလာင် ဒီ ဂေ တဝ်း၊ ‘န့ မုး ကူပ် ဂေ ဂုန့် ဒင် ဘေ ဟဲ့ ဝဲန် ဇဝ်ဖြာ၊ ဟဲ့ ဝီ ဟာဝ် ဒူပ် ဒီ ကြိုပ် ဇဝ် ပီ ကြိုပ် အီ ဟဝ်။ ဂေ ဟဲ့ ဝီ ကြိုပ် ဝီ လှူ ဒီ ဇဝ် မျုဝ် တီ ဘော ဝီ ဝဲန် အုဝ်၊ အာဝ် ဟူ ဝီ ဘူင် ဒူပ် ဒါရာ အုဝ်။ 12 န့ ယီ မုး ဘေ၊ ဘေ ဟဲ့ ဝီ ဘူင် အီ ဟာယ် အီ မိူက် လွှိုမ် ဂေ ဂုန့် ဒင် ဘေ။ ဘေ ဟဲ့ ဝီ ဒူပ် နဝ်း ဒိူဝ် ဘေ ရာင် အာဆေ ရာင် အန်၊ အာဝ် ဟူ ထူမ် ဂြုဝ်း ပီ ကာလာင် အုဝ်။ 13 ကူပ် န့ ပါယ် တီ အုဝ် ဒီ ဟုဝ် တဝ် ဘေ ခဲင် မိူင် နီ၊ တဲး ဘေ ဝီ ဟာဝ် ကွယ် ခဲင် မိူင် ပီ တူ ဒွိုမ် နပ် ဘေ ဘော ပီ တူ ဒွိုမ် နပ် ဂေ ဂုန့် ဒင် ဘေ။ ခဲင် မိူင် တီ၊ ဘေ ဒီ ဘော ဝီ ကြိုပ် ဇဝ် ပီ ကြိုပ် အီ ဟဝ် ဒွင် ဝန် ဒွင် ခိူန်။ ခုဝ်၊ အုဝ် အာဝ် ဟူ ဂေဇူ ဘေ။’”

14 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “န့ ဒီ ဘော ဇမ် အာခြာဝ် ဂေ ဒူအီ အာဝ် ဟူ ဒိူင် တဝ်း၊ ‘ပီ တဝ်း အုဝ် ဟဲ့ မုး ဟဲ့ မှာန် ပီ ဇဝ်ဖြာ ဟဲ့ ချွတ် လေး ဂေ ဒူအီ အီဆာရေလ ခဲင် မိူင် အဲဂိုပ် ဟဲ့ မုး ဟဲ့ မှာန်။’ 15 ဂေ ယီ ဒီ ဝီ ဒိူင် တဝ်း၊ ‘ပီ တဝ်း အုဝ် ဟဲ့ မုး ဟဲ့ မှာန် ပီ ဇဝ်ဖြာ ဟဲ့ ဒိုဝ်း လေး ဂေ ဒူအီ အီဆာရေလ ခဲင် မိူင် နာ ကွာ ဟဲ့ မုး ဟဲ့ မှာန်။ အန် ဟဲ့ ဒွိုမ် ဟုဝ် တဝ် ဒူအီ ခဲင် မိူင် တီ။’ ခုဝ်၊ အုဝ် ဒီ ဝီ ဒိုဝ်း တး ဂေ ခဲင် မိူင် ပဲ့ ဟဲ့ ဒွိုမ် အာပ် အုဝ် ဒီ ဂုန့် ဒင် ဂေ။”

16 ဇဝ်ဖြာ ပီ ဝီ တဝ်း၊ “ဒေါ တီ နီ အုဝ် ယီ စ်ု ဒူအီ ကိူန် ကာဆဝ် အီ ပီ ဒူအီ မှေတ့် ဂါ၊ တဲး ဂေ ဟာဝ် မှေတ့် ဒူအီ ဂေ တီ။ ဝါယ် တီ၊ အုဝ် ပီ ဒီ ဝီ စ်ု ဒူအီ လဲ ပြဲ၊ တဲး ဂေ ဟာဝ် ဟြေတ့် ဒူအီ ဂေ တီ ဒွန် နွန် ဒွန် ဆွုန် ဘော ခဲင် ဒး မာဝ် ဂေ ဒး ဒါအာင်။ 17 အုဝ် မိူဝ် ဒီ ယွတ် ပီ ဘူင် ဂေ ဒွန် မျုဝ်။ အာဝ် မိုဝ်း မာဆေ ပီ ပွိုန် ချြီင် ဂေ ဒီ အုဝ်။ နာ တူ မွှိုမ် ပီ ဘူင် ဂေ မိူဝ်၊ ဂေ တူ ပွိုန် ချြီင် မာဆေ ဒီ အုဝ်။ 18 အုဝ် မိူဝ် ဒီ ဝီ ဘူင် ဝျီ့ ဒီ ဂေ အာ ဘုန်။ ခုဝ်၊ ဂေ ဟဲ့ ဘူင် တဲး ကာဒါယ် မိူင် အုဝ် ကာဒါတ့် ကူပ် ဟဲ့ ဘ့လေး ဂေ အာရိုပ် ရာင် အီ မွှိုမ် ကာအိး မွှိုမ် ကာဒါတ့်၊ တဲး န့ ကော နုဝ့် ခဲင် ကာဒါယ် မိူင် အီ မုး ခါဂုန် ပီ ဒွါ အုဝ် ဒီ ဂေ။”

19 အိုယ် မဲ ဇဝ်ဖြာ အီ တဲး ပ့လူမ် ဂေ ဟဲန့် ဒီ အုဝ်၊ မဲ ဇဝ် ဟဲ့ ပီ ဒူင် ဒီ ပွိုန် အုဝ် ချြီင် ဆီချာ ဒေါ ဟဲ့ တး အာဖေ အာရေ။ ဂေ ဒူအီ အာမျုဝ် ဟဝ် ဒီ ဘော ယိတ့် ဒူင် ဆိူတ် ကာဒါယ်၊ ဝီ တး ဒူင် ကွယ် မဲ ဇဝ်။ ဂေ ဒီ ဘော တဝ်း၊ “ဂေ ဂုန့် ဒင် ယေ၊ ဂေ မိုဝ်း မီ အာရိုပ် ရာင် အီ တူ မိုဝ်း ဒီခုဝ်၊ အီ တူ ပွိုန် စွယ် ဂေ မာဆေ။”

20 ဂေ ဒူအီ ဘော နပ် ဒီ ဘူင် ဒီ ကြိုပ် အာရိုပ် ရာင် တဝ်း၊ “န့ မုး ဇဝ်ဖြာ။” န့ ယီ တူ မုး ဇဝ်ဖြာ အာခါခ်ု။

21 ဇဝ်ဖြာ ပီ ဝီ တဝ်း၊ “ကူပ် န့ ပါယ် တီ အုဝ် ဒီ ဘော တဲး ဂေ နပ် ပီ ပါယ် ပွုန် အုဝ် ဘော အာဖုင် ဒင်ခုဝ် အုဝ်။ ဂေ ဒီ ဘော နပ် လွင် မုး အုဝ် ဇဝ်ဖြာ အာခါခ်ု။”