ခါန် 52
လွင် မိူင် ယေရူဆာလဲမ် လိုဝ် စှိုမ်
1 ဒေါ ကာစုး ခုန်ဒီခမ် အာဇေဒေကီ ဒီ အိုပ် မာန် မိူင်၊ အာဆာက် အန် ဟဲ့ ပွိုန် အာ ဂိုဝ် ဒီ အူ ဆီနမ်။ အန် ဘော အိုပ် ကွယ် ခဲင် မိူင် ယေရူဆာလဲမ် အာဒါ ဂိုဝ် ဒီ အူ ဆီနမ်။ မာ အန် စိူဝ် နာင် ဟာမူတာလာ အီ မုး ဂွန် အာယေရေမီ အီ တး ဒီ မိူင် လီပါနာ။ 2 အန် မိူဝ် ဘူင် အီ တူ မွှိုမ် ပီ ပီ ဘူင် ခုန်ဒီခမ် အာယောယာခိမ် တွိုန်။ 3 ဇဝ်ဖြာ မိူဝ် ဟဲ့ ရူ ကာဆဝ် ဒီ ဂေ ဒူအီ ခဲင် မိူင် ယေရူဆာလဲမ် ဘော ဒီ ဒူအီ ခဲင် မိူင် ယူဒါ။ အန် ဇဝ် မိူဝ် ဟုဝ် တဝ် ဂေ အူ ဇေန့်၊ ကွဲ့ တဲး ဂေ ကွယ် ကာချြီ့ ဒီ အန်။ ပန် တီ ခုန်ဒီခမ် အာဇေဒေကီ မိူဝ် ကာခဲန့် ဒီ ခုန်ဒီခမ် အီ အိုပ် မိူင် ဘာဘဲ။
4 ဒေါ ဟဲ့ ဝီ အိုပ် ခုန်ဒီခမ် အာဇေဒေကီ မာန် မိူင် အာဒါ ဒိမ် ဆီနမ်၊ ဘော ဇမ် မာဂျီန် ဂိုဝ် ဘော ဆီငဲ ဂိုဝ်၊ ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ ဟဲ့ ယူင့် ခဲ့ ကွယ် ဂေ ဒါ ဆိုက် အန် ဘောကာဂ့လျီတ်၊ တး ဒီ မိူင် ယေရူဆာလဲမ်။ ဂေ မိူဝ် တး ချ နာ ရေတ့် မိူင် ယေရူဆာလဲမ်။ ဂေ မိူဝ် ဘူင် ဘ့လဝ့် န့တဲင် ဘော ဝဲင် ရူပ် မိူင် ယေရူဆာလဲမ်။ 5 ဂေ မိူဝ် ဘ်ု ရူပ် မိူင် တီ၊ တဲး န့ ကော ဇမ် ခုန်ဒီခမ် အာဇေဒေကီ အိုပ် မိူင် အာဒါ ဂိုဝ် ဒီ အူ ဆီနမ်။
6 ဒေါ မုး မာဂျီန် မ့ဖွုန် ဆီငဲ န့ဒိမ်၊ ပီ ဒီ ဟူမ် ဒီ ဟာပ် အာဝ် ဟူ မိုဝ်း ခဲင် မိူင် တီ။ ဒူအီ ဘော မာန် ဘော မိူင် ကော အေတ့် ကာဆဝ် ပီ ဒီ ဟူမ်။ 7 ပါယ် တီ ဂေ ဘော ဘ့လုး ရဲင် မိူင် တဲး န့ ကာဒဝ်။ ဂေ ဒါ ဆိုက် ဒူအီ ဘာဘဲ ပီ ဘော ဟဲ့ ဘ်ု ကော ရူပ် မိူဝ်၊ ဂေ ဒါ ဆိုက် ဒူအီ အီဆာရေလ ဘော ပြာ ဒီ လေး တဝ် ခဲင် မှိုဝ်။ ဂေ မိူဝ် ဟာဝ် ဒူပ် ရဲင် မိူင် အီ ကွယ် အာ ထာပ် အီ ဒူပ် န့တေန့် ကာပိုမ် မာန် ခုန်ဒီခမ်။ ဂေ မိူဝ် တဝ် ဟာဝ် ဒူပ် ဒီလယ့် ဘ့လဲင် ယောဒါန်။ 8 မာလဲ၊ ဂေ ဒါ ဆိုက် မိူင် ဘာဘဲ ဘော ခုင်ခြး ဒူပ် ဒီ ပန် ခုန်ဒီခမ် အာဇေဒေကီ။ ဂေ ဘော ခြပ် အန် ခဲင် ဂ့လင် မိူင် ယေရီခုဝ် တွိုန်။ ဂေ ဒါ ဆိုက် အန် မိူဝ် ဟဲ့ ဟွတ့် တဝ် ကာယဝ်း တူတ့် ဒီ အန်။ 9 ဂေ ဘော မှေတ့် အန် ဘော ဝီ ဒိုဝ်း ဟာဝ် အန် ဒူင် ကွယ် ခုန်ဒီခမ် အီ အိုပ် မိူင် ဘာဘဲ အီ ကွယ် ဒီ မိူင် ရီဘာလာ ခဲင် ကာဒါယ် မိူင် ဟာမာတ်။ အာနေဘူခတ်နေစာ ဘော ဒမ် မှာပ် ဒီ အာဇေဒေကီ။ 10 ဒီ မိူင် ရီဘာလာ တီ အန် မိူဝ် ငဝ်း ယမ် ဂေ ဂွန် အီမာယ် အာဇေဒေကီ ဒီ အာတ့် ဂုန့် ဂေ။ အန် မိူဝ် ငဝ်း ယမ် တူတ့် ဂေ အာမူ အာမာတ် ခုန်ဒီခမ် မိူင် ယူဒါ။ 11 ခုန်ဒီခမ် မိူင် ဘာဘဲ ဘော ဂွယ့် လေး ငါယ် အာဇေဒေကီ ဘော ဝီ ဒိုဝ်း ဝန် ဘွင့် ဒေန့်၊ ပက် အန်။ အန် ဘော ဝီ ဒိုဝ်း ဟာဝ် အာဇေဒေကီ ဒီ မိူင် ဘာဘဲ ဘော ခြွင့် အုန် အန် ခဲင် ကာပိုမ် ကော ဇမ် တူတ့် အာဆာက် အန်။
12 ဒေါ ဟဲ့ အိုပ် ခုန်ဒီခမ် အာနေဘူခတ်နေစာ မိူင် ဘာဘဲ ဂိုဝ် ဒီ ဒိမ် ဆီနမ်၊ ဒေါ မုး မာဂျီန် မ့ဖန်၊ ဆီငဲ ဂိုဝ်၊ အာနေဘူဆာရဒါန် အီ မုး ဒါ ဘုဝ် အီ ဘ်ု အာဆာက် ခုန်ဒီခမ် အီ အိုပ် မိူင် ဘာဘဲ၊ အန် ဘော တး ဇမ် ခဲင် မိူင် ယေရူဆာလဲမ်။ 13 အန် ဘော ဒိုဝ်း ငဝ်၊ ဒုဝ့် ဟုဝ် ဇဝ်ဖြာ ဘော ဟုဝ် ခုန်ဒီခမ်။ ခဲ့ ကွယ် ကာင် ဒီ တူင့် ဒီ တာင် ခဲင် မိူင် ယေရူဆာလဲမ်၊ ဟဲ့ ဟွတ့် ကာဆိုမ် တူတ့် ခဲင် ငဝ်။ 14 ဂေ ဒါ ဆိုက် ဒူအီ ဘာဘဲ ပီ အိုပ် ဒါ ဘုဝ် တာင် အီ ဘ်ု အာဆာက် ခုန်ဒီခမ် တွိုန်၊ ဂေ ဘော ကာဖြူမ် ဒီ ပျာတ့် ဝဲန် တူတ့် ရဲင် မိူင် ယေရူဆာလဲမ်။ 15 ဒါ ဘုဝ် တာင် အီ စိူဝ် အာနေဘူဆာရဒါန် တွိုန်၊ အန် ဘော မှေတ့် ဟာဝ် ဂေ ဒူအီ ဂိန် ဒူအီ ဖ့လာန် ဘော အီ ဆီ ဂိတ် ဆီ ကွယ် ခဲင် မိူင်၊ မှေတ့် ဟာဝ် ဘော ဂေ ဒူအီ အီ ဟဲ့ ဟာဝ် ကွယ် ဘ့လာက် ခုန်ဒီခမ် အီ အိုပ် မိူင် ဘာဘဲ။ ဘော ဖိုင် ဂေ လက်ဆာမာ အီ ဆီ ဂိတ် ဆီ ကွယ် ဂေ တွိုန်။ 16 အာနေဘူဆာရဒါန် အီ မုး ဒါ ဘုဝ် တာင် အီ ဘ်ု အာဆာက် ခုန်ဒီခမ် တွိုန်၊ အန် ယီ ဝီ အုန် ဂေ ဒူအီ အီ ဂိန် အီ ဖ့လာန် ကာဆဝ် မင် ကာလဝ့်၊ တဲး ဂေ ဝီ လိုမ်လာ ကာပိုမ် ဘ့လေ မာငုန်၊ ဝီ ရန့် ဘော မာန် ဂေ ဒူင် နာ။
17 ဂေ ဒူအီ ဘာဘဲ ဘော ဒိုဝ်း ကာဘက် တူတ့် ရွင့် ဘွင့် ဒေန့် အီ ကွယ် ခဲင် ဟုဝ် ဇဝ်ဖြာ။ န့ ဘော မုး မ့ပါန် ဘွင့် ဘော န့ဒါင် အန်။ ခဲ့ ကွယ် ဘွင့် ဒေန့် ဂေ ဘော ဒိုဝ်း ဟာဝ် တူတ့် ဒီ မိူင် ဘာဘဲ။ 18 ဂေ ဒိုဝ်း ဘော ကာလုဝ့်၊ အာဇုဝ်၊ န့ကျီပ် ငဝ်၊ ကာလုဝ့် ပီ ဟပ် ဂေ ကာဝှါင်၊ ဘော ဆီလယ့် ဘဲန် မျုဝ် ဘဲန် မျုဝ် ပီ တာ ဂေ ခဲင် ဟုဝ် ဇဝ်ဖြာ။ ကာလုဝ့် ပီ ဒူင့် ဂေ နှာမ် အီ လေး ဒီ ဒုဝ် ပီ လှူ ဂေ ဘော အဲပ် ဒုဝ့် ဂေ ဆီနမ် အုး ငှုန် ဘော ခဲ့ ကွယ် န့ကြိုဝ်း ဘွင့် ဒေန့် ပီ စ်ု ပီ တာ ဂေ ခဲင် ဟုဝ် ဇဝ်ဖြာ။ 19 ဂေ ဘော ဒိုဝ်း ဟာဝ် ဘော မ့ပါန် ဒီတဲတ် ဘော ဖာန် ဘော ဆီလယ့်၊ ကာလုဝ့်၊ ဒင် ငဝ် အွမ်၊ အာဇုဝ်၊ ကွက့် ဘော ခဲ့ ကွယ် ခြိုင် ပီ တာ အီ မုး ခြိဝ် မုး ရွိုန်။
20 ဂေ ဘော ဒိုဝ်း ဟာဝ် ဘော ရွင့် အာ ညွင့် အီ မုး ဘွင့် ဒေန့် ဘော မ့ပါန် တာင် တွိုန်၊ ရာင် မာမက် ဂိုဝ် ဒီ အာ ဒုဝ် အီ ဘဲန် ဒူင် ဘ့လေး ဂေ မ့ပါန် တာင်။ န့ မုး ပီ ဘူင် အုန် ခုန်ဒီခမ် အာဆာလုဝ်မုဝ် အာဒါ ဟုဝ် ဇဝ်ဖြာ။ ခြိုင် ဘွင့် ပဲ့ ဟဲ့ ဒိုဝ်း ဟာဝ် ဂေ တီ ဟဲ့ စန် ကာဆဝ်၊ န့ ကော ဟူ ပဲ ဒီ ဆ။ 21 ရွင့် တီ ဘော စာ ဂိုဝ် ဒီ ဒါ ကာနိး။ ဆေ ဟီ ဂဝ် ရူပ်၊ န့ ဘော ကွယ် ဂိုဝ် ဒီ အာ ကာနိး။ နာ ဟေတ့် အန်၊ န့ ဘော ဟေတ့် ဖွုန် အာနူ၊ ကာတဲ အန် န့ ဘော ကာအူင့်။ 22 ဂိန့် ရွင့် တီ၊ န့ ဘော ဝီ မိုဝ်း ရွင့် ဘွင့် ဒေန့်။ ဂိန့် ရွင့် ဘွင့် ဒေန့် တီ၊ န့ ဘော စာ ဖန် ကာနိး။ အီ လဲပ် ရူပ် ဒီ ဂိန့် ရွင့် တီ၊ န့ ဘော မိုဝ်း ရာင် ကာဘဲး ဘော ရာင် ဘ့လေ မာစက် အီ မုး ဘွင့် ဒေန့် ဒီလူယ်။ ရွင့် ဘော အာ ညွင့် ဟဲ့ မိုဝ်း ရာင် ဘ့လေ မာစက် အီ လာယ် ကာနှဲန်။ 23 ဖွုန် ဘ့လာက် ရွင့် တွိုန်၊ န့ ဘော မိုဝ်း ရာင် ဘ့လေ မာစက် ဒိမ် ဂိုဝ် ဒီ ဒဝ် ဘူင့်။ ဒီ ကာဘဲး အီ ကွယ် ဒီ ဂိန့် ရွင့် တွိုန်၊ န့ ဘော ကွယ် အူ မာယဝ်း ဘူင့်။
24 ဒါ ဘုဝ် တာင် တွိုန် ဘော မှေတ့် ဟာဝ် ဒါ တာင် အီ လှူ ဒီ ဇဝ်ဖြာ အီ စိူဝ် အာဆေရာယာ ဘော ဒါ အီ ဒါမ် အန် အီ စိူဝ် အာစေဖာနီ၊ ဘော ဒူအီ အူယ် ဝီ အီ ဘ်ု မာလုဝ်း ဟုဝ် ဇဝ်ဖြာ။ 25 အန် ဘော ဒဲ့ ဒါ တာင် အီ အိုပ် ဂေ ဒါ ဆိုက် အူ ဝီ၊ ဒဲ့ ဘော အာမူ အာမာတ် ခုန်ဒီခမ် အာဇေဒေကီ ဘူ ဝီ။ အန် ဒဲ့ ဘော ဒါ အီ ဒါမ် အီ မုး ဒါ စာရေ တာင် အူ ဝီ ပီ ရဝ်း ဒူအီ ရဝ် တး ဘဲန် ဒါ ဆိုက် အူ ဝီ ဘော ဒူအီ ပီ ကာတုန့် ဂေ ခဲင် မိူင် တွိုန် ဒဝ် ဂိုဝ် ဝီ။ 26 အာနေဘူဆာရဒါန် အီ မုး ဒါ ဘုဝ် အီ အိုပ် ဒါ ဆိုက် ဘာဘဲ အန် ဘော ဒိုဝ်း ဒူအီ ဂေ တီ၊ ဝီ တိုယ် ဟာဝ် ဒီ ခုန်ဒီခမ် မိူင် ဘာဘဲ အီ ကွယ် ဒီ မိူင် ရီဘာလာ။ 27 ခုန်ဒီခမ် မိူင် ဘာဘဲ ဘော ဒမ် မှာပ် ဒီ ဂေ ဘော ငဝ်း ဝဲန် တူတ့် ဂေ ဒီ မိူင် ရီဘာလာ အီ ကွယ် ခဲင် ကာဒါယ် မိူင် ဟာမာတ်။ ပါယ် တီ ဂေ ဒူအီ အာယူဒါ ဘော လုဝ် ခမ် အီ ဟဝ် မှေတ့် လေး ဂေ ခဲင် မိူင် ဒူင် ဒွိုမ် ကွယ် ဂေ။ 28 ဒေါ မှေတ့် ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ ဒီ ဒူအီ ဂေ တီ၊ အန် ဟဲ့ အိုပ် မာန် မိူင် အာဒါ ဘူ ဆီနမ်။ ဒေါ အန် တီ အန် ဟဲ့ မှေတ့် ဟာဝ် ဂေ ဒူအီ အာယူဒါ အာဒါ အူယ် ဟြဲန့် ဒီ အာ ဂိုဝ် ဒီ အူယ် ဝီ။ 29 ဒေါ ဝီ အိုပ် အာနေဘူခတ်နေစာ မာန် မိူင် အန် အာဒါ ဂိုဝ် ဒီ ဒါ ဆီနမ်၊ အန် ဟဲ့ မှေတ့် ဟာဝ် ဒူအီ ပေါ ဒါ မာယဝ်း ဒီ အူယ် ဂိုဝ် ဒီ အာ ဝီ။ 30 ဒေါ ဝီ အိုပ် အာနေဘူခတ်နေစာ မာန် မိူင် အန် အာဒါ အာ ဂိုဝ် ဒီ အူယ် ဆီနမ်၊ အာနေဘူဆာရဒါန် ပီ ဝီ မှေတ့် ဒူအီ အာယူဒါ ဘူ မာယဝ်း ဒီ ဖွုန် ဂိုဝ် ဒီ ဖန် ဝီ။ ဒေါ ဝီ တိး ဂေ ဒူအီ ပဲ့ ဟဲ့ မှေတ့် ဟာဝ် ဂေ တီ ဘောကာဂ့လျီတ်၊ ဟဲ့ ဘဲန် ဖွုန် ဟြဲန့် ဒီ ဒဝ် မာယဝ်း ဝီ။ 31 အာယောယာခိမ် အီ မုး ခုန်ဒီခမ် အီ အိုပ် မိူင် ယူဒါ ဟဲ့ ကွယ် ခဲင် ကာပိုမ် အာဒါ အူယ် ဂိုဝ် ဒီ ဘူ ဆီနမ်။ ဒေါ ဇမ် မာဂျီန် ဂိုဝ် ဒီ ဟာအာ၊ ဆီငဲ အာ ဂိုဝ် ဒီ မ့ဖန်၊ အာအေဝီလမာရော အီ ဟဲ့ ဘဲန် ခုန်ဒီခမ် အီ အိုပ် မိူင် ဘာဘဲ၊ အန် ဘ့လေး အာယောယာခိမ် လေး ခဲင် ကာပိုမ်။ ခုန်ဒီခမ် အီ အိုပ် မိူင် ဘာဘဲ ဝီ တဲး အန် ပွိုန် ဒီ ကွယ် ဒါခိုယ် ကွယ် ဂတ် ဂျီတ်။ ဒေါ အန် တီ န့ မုး ဆီနမ် ဒီ ကာစုး ခုန်ဒီခမ် တီ ဒီ အိုပ် မိူင် ဘာဘဲ။ 32 အန် ကာလာင် ဂြုဝ်း ဒါခိုယ် ဂြုဝ်း ဆီချာ ဒီ အာယောယာခိမ်။ အန် ဘော ဝီ စုဝ့် အန်၊ တဲး အန် တာင် လွှိုမ် ခုန်ဒီခမ် ဘဲန် ကာဒင် အီ ကွယ် ခဲင် မိူင် ဘာဘဲ တွိုန်။