1 ဇဝ်ဖြာ ပီ ဝီ တဝ်း၊ “အုဝ် ဒီ တဲး ခုန် တး၊ တဲး အန် ဘူင် ကာပျာတ့် လိုဝ် ဒွန် မျုဝ်၊ တဲး အန် တး ကာဂုဝ်း ဒီ ဒူအီ ခဲင် မိူင် ဘာဘဲ ဘော ဒီ ဂေ ဒူအီ ခဲင် ရဝ် ခဲင် ကာဒါယ် မိူင် အန်။

2 အုဝ် ဒီ တိုယ် ဒူအီ အာမျုဝ် ဟဝ်၊ တဲး ဂေ တး ဇမ် ခဲင် မိူင် ဘာဘဲ၊ တဲး ဂေ တး ပျာတ့် မိူင်။ ဂေ ဒီ ပီ အီ ဂူင့် မာနာ ဘော ယပ် ငှုဝ်။ ဆီငဲ ဒီ တး ဇမ် အာဖေ အာရေ တီ၊ ဂေ ဒီ ဘော တး ကာဂုဝ်း ဒွန် ဘ့လာက် ဒွန် နာ၊ တဲး န့ ကာပျာတ့် တူတ့်။

3 ကွဲ့ တဲး ဂေ အီ ဂူင့် အ ဆီ ဒန် ဝိတ့် အ ဂေ။ ကွဲ့ တဲး ဂေ ဆီ ဒန် စှိုပ် ဆီတုဝ် ဟိန် ဂေ။ ကွဲ့ တဲး ဂေ ဒူအီ နှိုမ် ခဲင် မိူင် တီ လွတ် အာဖေ အာရေ၊ တဲး ဘေ ငဝ်း ဝဲန် တူတ့် ဒါ ဆိုက် ဂေ။

4 ပါယ် တီ ဂေ ဒီ ဘော ကေး ယမ် ခဲင် မိူင် ဘာဘဲ ဘော ကာဒုး ဆဝ် ဒူပ် န့တေန့် ခဲင် မိူင် တီ။

5 ခုဝ်၊ ဇဝ်ဖြာ တူ ဘ့လေး ဝဲန် ဂေ ဒူအီ အီဆာရေလ ဘော ဒူအီ အာယူဒါ။ အန် မုး ဇဝ်ဖြာ ပီ ကြိုပ် ဂေ ဘော ဇဝ်ဖြာ အီ အိုပ် တူတ့် ဒွန် မျုဝ်။ မာလဲ၊ မိူင် ဂေ ဟဲ့ မိုဝ်း မှာပ် ကိူန် ဒီ အာတ့် ဇဝ်ဖြာ အီ မုး ဇဝ်ဖြာ အီ ဆီငါ ဘွတ်၊ အီ အိုပ် ဒူအီ အီဆာရေလ။

6 ဘေ အီ ဆီ ကွယ် ခဲင် မိူင် ဘာဘဲ၊ တဲး ဘေ လေး တဝ်၊ တဲး ဘေ လွတ် ယမ် ရာင် အာဆေ ရာင် အန်။ ကွဲ့ တဲး ဘေ လိုဝ် စှိုမ် ကူပ် မှာပ် ပဲ့ ဟဲ့ လုတ့် ဂေ ခဲင် မိူင် တီ။ န့ ဟဲ့ ဟွတ့် ဇမ် အာခြာဝ် ဒီ ဒမ် ဇဝ်ဖြာ မှာပ် ဂေ၊ တဲး န့ ဘြေ့ ဒီ နဝ်း ဇဝ်ဖြာ အီ ဟဲ့ ရူ ကာဆဝ် ဒီ ဂေ။ အန် ဇဝ် ဒီ ဘူင် ဝျီ့ ဒီ ဂေ၊ တဲး န့ ဒူပ် မှာပ် ပီ ဘူင် ဂေ။

7 မိူင် ဘာဘဲ ဘော ပီ ဆီလယ့် ခြိဝ် ပီ ဂူင့် ဇဝ်ဖြာ၊ အန် ဒီ ဘော တဲး ဒူအီ ဘော ကာဒါယ် ယိုတ့် ပဝ်း။ ဒူအီ ဒွန် ဇိုဝ် ဒွန် မျုဝ် ဟဲ့ ဒျီင် အိုမ် မာငုန် ခဲင် ဆီလယ့် တီ။ န့ ဒီ ဘော ဘဲန် ရိုဝ် ဘဲန် ဝှိုန့် ဒီ ဂေ အူ ဇေန့်။

8 မိူင် ဘာဘဲ ဒီ ဘော လိုဝ် ကာပျာတ့် အူ ဇေန့်။ တဲး ဘေ ဘော က့လိုဝ် ငှုန် ဒါင် အန်။ တဲး ဘေ ဟြေတ့် ဆီနမ် အီ ပွိုန် ဖဝ်း ဒူင် ဟဲ့ ဒိမ် ဟဲ့ ဆဝ် ဂေ တီ။ ယုဝ် န့ ဆော ဝီ ဟြာယ် ဝီ ကဲန်။

9 ယေ ပီ ဘော ဆီ တဲး ဂေ ဒူအီ ခဲင် မိူင် ဘာဘဲ ဆီ ကဲန် မိူဝ် ဒိမ် ဘော ဆဝ် ဂေ တီ ယီ တူ ဟြာယ် ဒေါ မှဝ်။ လွင် ဒီ ဒမ် ဇဝ်ဖြာ မှာပ် ဒီ ဒူအီ ဂေ တီ၊ န့ ပီ ဟဲ့ စာ ကော ဒုး န့အု ဂေ ဘ့လေန့်။ ခုဝ်၊ တဲး အေ လေး ဒူင် ကွယ် ဂေ၊ ဝေန့် ဒူင် ကွယ် ဘြိမ် အေ ရာင် အာဆေ ရာင် အန်။

10 ဇဝ်ဖြာ ဟဲ့ ဘျ ဒီ အီ ဟဝ် လွင် နဝ်း ဆိူဝ် နဝ်း မှာန် အေ။ တဲး အေ တး ကာလာင် ခဲင် မိူင် ဇီအူန် လွင် ပဲ့ ဟဲ့ ဘူင် ဇဝ်ဖြာ ပီ ကြိုပ် အေ။

11 တဲး ဘေ လာ့ အုန် ကာဒဲ့ ဘ့လာ အ ဘေ၊ တဲး ဘေ ဂူင့် မင် ဂွင့် ဟိန် ဘေ။ ခုဝ်၊ ဇဝ်ဖြာ ဟဲ့ ကာဆုး နဝ်း ခုန်ဒီခမ် ဂေ ဒူအီ အာမျုဝ် မေဒီ။ အန် ဇဝ် ဟဲ့ ဆုင်ဖျာတ် ဒီ ဘူင် ကာဘး ဒီ ဒူအီ ခဲင် မိူင် ဘာဘဲ၊ တဲး အန် ပွိုန် ဒီ ပျာတ့် မိူင် ဂေ။ ဇဝ်ဖြာ ဒီ ဘူင် ဝျီ့ ဒီ ဂေ ခဲ့ ပီ ဘူင် ဂေ ဒီ ဟုဝ် ဇဝ်ဖြာ။

12 တဲး ဘေ ဆမ် ရွင့် အာလာမ် ဒဲင် ရဲင် မိူင် ဘာဘဲ။ တဲး ဘေ ရဲန် အုန် ဒူအီ အီ ဒီ ကာဂုဝ်း တဲး န့ ကိူန် ကိူန်။ တဲး ဘေ ရဲန် တဲး န့ မိုဝ်း ဘော ဒူအီ အီ ဘ်ု ဒီ ယွတ် ဒူပ် န့တေန့်၊ တဲး ဒါ ဆိုက် ကာဂုဝ်း ဒီ ဒူအီ ဘာဘဲ ဒေါ တူ လှုဝ်း ဂေ။ ခုဝ်၊ ဇဝ်ဖြာ ဒီ ဘူင် ခဲင် မိူင် ဘာဘဲ ခဲ့ ပီ ခြာမ် အန် ဒီ ဘူင်။

13 အိုယ် ဘေ အီ ကွယ် ခူပ် ဘ့လဲင် အိုမ် ဘဲန် ညွင့် ဘဲန် ညွင့် ဘော မိုဝ်း ကြုဝ်ကြာမ် ကိူန်၊ န့ ဟဲ့ ဇမ် အာခြာဝ် ဒီ တူတ့် အာဆာက် ဘေ။ န့ ဒီ ပီ အီ ဒဲပ် ဝဲန် ဘေ။

14 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ဝီ ဒိူင် ကာဆဲန့် ဒီ ဒုဝ် ဘြိမ် အန် တဝ်း၊ အုဝ် ဒီ တဲး ဘေ မိုဝ်း ဒါ ဆိုက် ကိူန် ကာဆဝ်၊ တဲး ဂေ ကော ကိူန် ပီ မာ အာဇူင့်။ ဂေ ဒီ ဘော ဒတ် ရျီင်၊ ဝီ လာယ် ကာဘး ဒီ ဘေ။

15 ဇဝ်ဖြာ ဟဲ့ တာ ပွုန် အန်၊ ဖာန် ဘ့လေး ကာဒါယ်။ အန် ဇဝ် ဘော စ်ု အာငျာန် အန်၊ တဲး န့ မိုဝ်း ဂါင်ဟြာဝ်။ အန် ဇဝ် ဘော စ်ု အီ ကာလှုး ဒီ နဝ်း အန်၊ ဘူင် တဲး ဘ့လေန့် မ့ဘ့လး။

16 ဒေါ ဘူင် အန် ဇဝ် တဲး န့ မိုဝ်း ဟမ် ကာနမ်၊ အိုမ် နာ ဒဲင် ခဲင် ဂါင်ဟြာဝ် ဘော ဟမ် ဒီငိုန့် ဆီနန် ဆီနိူင်။ အန် ဇဝ် ဘော တဲး န့အု တး ဒူင် ဆိူတ် ကာဒါယ်။ အန် ဘော ဘူင် ပ့လ မ့ပ့လေတ့်၊ တဲး န့ တး ဒူပ် ဂ့လာယ်။ ဘော ခုန် အန် ဇဝ် ဘော ဒိုဝ်း လေး ခဲင် ဒူင် အုန် အန်။

17 ဒူအီ ဒွန် အီ ဟဲ့ ကာဒန် လန်၊ အာဝ် မိုဝ်း အီ ကာလှုး ဒီ နဝ်း ဂေ။ ဂေ ဒါ အီ နပ် ဒီ စိုမ် ခြိဝ်၊ ဂေ ဒီ ဝီ ဆာယ် အီ ကူပ် အာရိုပ် ရာင် ပီ စိုမ် ဂေ။ အာရိုပ် ရာင် တီ ယီ တူ မုး အီ မုး အီ မှာန်။ ဂေ တူ နပ် ဒီ ဟိုဝ်း လိုပ် ဟိုဝ်း လေး ဖွိုမ် ဂေ။

18 ဂေ တူ မိုဝ်း ဒီခုဝ် မာဆေ။ န့ ဘော မုး ပီ လုက်တာယ် အီ ဟဝ်။ ဆေ ဟီ ဇမ် ပန် ဒီ ဒမ် အန် ဇဝ် မှာပ် ဒီ ဂေ၊ ဂေ ဒီ ဘော လိုဝ် စှိုမ် ဟြာယ် တူတ့်။

19 အီ မုး ဇဝ်ဖြာ ပီ ကြိုပ် အာကူပ်၊ အန် တူ ပီ အာမျုဝ် ဇိုဝ် တီ။ ခုဝ်၊ အန် မုး ဒါ ကာညာ အီ ဖာန် ဘ့လေး ဇိုဝ် တီ ဒွန် မျုဝ်။ ဂေ ဒူအီ အီဆာရေလ၊ ဂေ ဟဲ့ ခမ် ဒီ ဘဲန် ပီ ခါဂုန် အန် ဇဝ်။ ဂေ ဘော ဒဲ့ အန် ဇဝ် တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ်။’

20 ဘေ ဟဲ့ ပီ မီဒဲ တာင် ပီ စ်ု အုဝ်။ ဘေ ဟဲ့ ပီ ခြိုင် တာ ပီ ဒီ ကာဂုဝ်း အုဝ် ဒီ ဒါ ဆိုက် အာမျုဝ် ဟဝ်၊ တဲး ဘေ ဘူင် တဲး ဒူအီ အာမျုဝ် ဟဝ် ကာပျာတ့် လိုဝ်။ 21 အုဝ် ဟဲ့ စ်ု ဘေ တဲး ဘေ မး ကာဘက် လိုဝ် လက်လဝ် ဘော ဂေ ဒါ ဆိုက် အီ ပဝ့် လက်လဝ်။

22 အုဝ် ဟဲ့ စ်ု တဲး ဘေ မး ဝဲန် အီမာယ် ဘော အီဘိုန့်။ အုဝ် ဟဲ့ စ်ု တဲး ဘေ မး ယမ် ဒူအီ ဂဲ ဘော ဒူအီ နှိုမ်။ အုဝ် ဟဲ့ စ်ု တဲး ဘေ မး ယမ် ဘော ဂွန် ကာညူမ် ဂေ ဂွန် ဒီဘျာ။

23 အုဝ် ဟဲ့ စ်ု တဲး ဘေ မး ယမ် ဒါ အီ ဟျီင် မာဘူ ဘော ဖိုင် မာဘူ အန်။ အုဝ် ဟဲ့ စ်ု တဲး ဘေ မး ယမ် ဒူအီ အီ ထဲ ဒူင် နာ ဘော မာမက် အန်။ အုဝ် ဟဲ့ စ်ု ဘေ မး ယမ် ဂေ ခုန်ဒီခမ် ဘော အာမူ အာမာတ် အန် ဘောကာဂ့လျီတ်။” ဇဝ်ဖြာ ဟဲ့ ကာလာင် ပါယ် တီ။

24 “ပါယ် တီ ဘေ ဒီ ဝီ ယိုဝ် အုဝ် ဝီ ဘူင် ဝျီ့ ဒီ ဂေ ဒူအီ ခဲင် မိူင် ဘာဘဲ၊ တဲး န့ ဒူပ် နာ တူ မွှိုမ် ပဲ့ ဟဲ့ ဘူင် ဂေ ဒီ မိူင် ဇီအူန် တွိုန်။” ဇဝ်ဖြာ ဟဲ့ ကာလာင် ပါယ် တီ။

25 ဇဝ်ဖြာ ပီ ဝီ တဝ်း၊ “အိုယ် မိူင် ဘာဘဲ၊ မဲ ပီ နွန် တာင် အီ နပ် ဒီ ဘူင် တဲး အီ ကာပျာတ့် လိုဝ် ဘော ကာဒါယ်၊ အုဝ် ဒီ ကာဘး ဒီ မဲ။ အုဝ် ဒီ ဒိုဝ်း မဲ၊ တဲး မဲ ကာလွှယ် စုဝ်း ဒီ နွန် ဒါအာင် ဒူင် ကွယ် မဲ။ အုဝ် ဒီ တဲး မဲ ဝီ ပီ နွန် ပဲ့ ဟဲ့ ကာဆိုမ် ငဝ်။

26 မာဝ် ဒူင် ကွယ် ဘေ တီ၊ ဘေ မိူဝ် တူ ပွိုန် ဒိုဝ်း လေး၊ တဲး န့ ဝီ ဘဲန် စေန့် ရွင့် ဘော ဘိူန် ကာင် ခေါ အူ မျုဝ်။ ခုဝ်၊ ဘေ ဒီ ဘော လိုဝ် ဆေဆေ။”

27 တဲး ဘေ ဆမ် ရွင့် အာလာမ် ခဲင် မိူင် တီ။ တဲး ဘေ ဘုတ် ဝဝ် နိုင် ပဲ ကာတဲ ဒူအီ ဒွန် မျုဝ် ဒွန် ဇိုဝ်။ တဲး ဘေ ရဲန် ဒူအီ ဒီ လာယ် ကာဂုဝ်း ဒီ ဒူအီ ဘာဘဲ။ တဲး ဘေ ဒူအီ အီ ကွယ် ခဲင် မိူင် အာရာရာတ်၊ မိူင် မိန်နီ ဘော မိူင် အာဒေနာတ် တး ကာဇု၊ ဘ်ု ဒီ ကာဂုဝ်း ဒီ ဂေ။ တဲး ဘေ ဒဲ့ ဘော ဒါ တာင် အီ ယဲတ့် ဒါ ဆိုက်။ တဲး ဘေ ဒဲ့ ဒါ ဆိုက် အီ ပဝ့် မ့ပြွင့်၊ တဲး န့ ကော ပီ ဖိုင် မာ အာဇူင့် တာင် ဒီ တး။

28 တဲး ဘေ ရဲန် အုန် ဂေ ဒူအီ ကိူန် ဘော ဂေ ခုန်ဒီခမ် ခဲင် မိူင် မေဒီ ဘော ဂေ ဒါ ကာညာ အီ အိုပ် မိူင် ဘော ဂေ အာမူ အာမာတ် ဘော ဂေ ဒူအီ ဘောကာဂ့လျီတ် အီ ကွယ် ခဲင် မာန် မိူင် ပီ အိုပ် ဂေ ခုန်ဒီခမ် တီ၊ တဲး ဂေ တး လာယ် ကာဂုဝ်း ဒီ ဂေ။

29 ဒူအီ ခဲင် မိူင် ဂေ တီ၊ ဂေ ဘော ဒီယေန့် ဘော ယုဝ် ကာဆဝ်။ ခဲ့ ပီ ခြာမ် ဇဝ်ဖြာ ဒီ ဘူင်၊ အန် ဒီ ဘော ဘူင် တဲး န့ ကော ဘြေ့၊ တဲး မိူင် ဘာဘဲ ကော ရာမ် တူတ့်၊ ကွဲ့ တဲး န့ ဆီ မိုဝ်း ဒူအီ ခေါ အူ ဝီ အီ ကွယ် ဒီ တီ။

30 ဂေ ဒါ ဆိုက် ခဲင် မိူင် ဘာဘဲ၊ ဂေ ဒီ ဘော ဂိူတ် ဘော စူ ကာဂုဝ်း။ ဂေ ဒီ ကွယ် ခဲင် ဒူင် ချြီင် ဂေ။ ဂေ အာဝ် ဟူ မိုဝ်း ပ့လူမ် ဂေ ဟဲန့်၊ ဟဲ့ ပီ အီဘိုန့်။ ကာင် ဂေ ဒူအီ ခဲင် မိူင် တီ မိူဝ် ဟဲ့ ဟွတ့် ကာဆိုမ် တူတ့် ခဲင် ငဝ်။ မာလုဝ်း မိူင် မိူဝ် ဟဲ့ ဟွတ့် မး ကာဘက် တူတ့်။

31 ဂေ ဒါ လာမ် အီ ကာလာင် ဒီ ခုန်ဒီခမ် လွင် ရန်ဆူ၊ ဂေ တး ဘဲန် ဝီ ဘဲန် ဝီ။ ဂေ ကာလာင် လွင် ရန်ဆူ ဟဲ့ ဟွတ့် ပွိုန် မိူင် ဘာဘဲ ဘော မိူင်။

32 ဒူင် ဒီ ကာလုဝ်း ဘ့လဲင် အိုမ် မိူဝ် ဒါ ဆိုက် ဟဲ့ ဖာတ် ဒိုဝ်း။ ဂ့လူင့် အီ ကွယ် ခူပ် ဘာင် အိုမ် မိူဝ်၊ ဂေ ဟဲ့ ဒုဝ့် ကာဆိုမ် တူတ့်။ ခဲ့ ကွယ် ဂေ ဒါ ဆိုက် ဘော ယုဝ် ဒီယုး ဒီယေန့်။

33 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဟဲ့ ကာလာင် ပါယ် နီ၊ “မိူင် ဘာဘဲ ပီ အူင့် ကာင်နဝ်း၊ ဒူင် ဒီ ညဲတ့် အီ ဒေါ မး ဂေ ငှုဝ်။” ခုဝ်၊ အာဝ် လှေန့် ဒီ ဇမ် အာခြာဝ် ဆုဝ့် ငှုဝ်။

34 အာနေဘူခတ်နေစာ အီ မုး ခုန်ဒီခမ် အီ အိုပ် မိူင် ဘာဘဲ၊ အန် ဟဲ့ တဲး ယေ ကာဝှ်ု ကာဝျှီန်။ အန် ဘော တဲး ယေ ပီ ကာလုဝ့် ကာအူင့် အီ တူ မိုဝ်း မာဆေ။ အန် ဘော မဲင် ဘ့လွိုပ် ယေ ပီ မာကြာယ် မဲင် ဘ့လွိုပ် ပီ ဒီ ဟူမ် အန်။ အန် မိူဝ် ဒိုဝ်း ပီ လုဝ် အန် ပီ မွက့် အန် ဒဲတ့် တဲး န့ ကော နုဝ့် ခဲင် ဝတ့် အန် ဘော ဝဲန် ပီ တူ လုဝ် အန်။

35 ဂေ ဒူအီ ခဲင် မိူင် ဇီအူန် ဒီ ဘော တဝ်း၊ “ဒုက် တာင် ပဲ့ ဟဲ့ ခမ် ယေ၊ တဲး ဘော ဂေ ဒူအီ ခဲင် မိူင် ဘာဘဲ ဝီ ခမ်။” ဂေ ဒူအီ မိူင် ယေရူဆာလဲမ် ဒီ ဘော တဝ်း၊ “ပဲ့ ဟဲ့ ကာဒုး ဒူအီ အာမျုဝ် ယေ ဒီ ယမ်၊ တဲး ဘော ဂေ ဒူအီ အာမျုဝ် ဘာဘဲ ဝီ ခမ်။”

36 ပါယ် တီ ဇဝ်ဖြာ ပီ ဝီ တဝ်း၊ “အုဝ် ဒီ ကွယ် ဘ့လာက် ဘေ။ အုဝ် ဒီ စွယ် ဘေ၊ အုဝ် ဒီ ဘူင် ဝျီ့ ခဲ့ ပီ ဘူင် ရန်ဆူ ဘေ ဒီ ဘေ။ အုဝ် ဒီ ဘော ဘူင် တဲး အိုမ် နမ်မုက်ဆာရာ ကော ဟိတ် တူတ့်၊ တဲး ဘော တုဝ်း အိုမ် ဘောကာဂ့လျီတ် ဟိတ် ဟေန့် တူတ့်။

37 မိူင် ဘာဘဲ တီ ဒီ ဘော ဝီ ဘဲန် မ့ပိုမ် ဖုန် ဂေ မ့ပိုမ် ကာဒါယ်၊ ဘဲန် ဒူင် တး ကွယ် မာဆုဝ် ပြဲ။ န့ ဒီ ဘော မွှိုမ် ယုဝ် ကာဆဝ်၊ ဘဲန် ပီ နဲန အီ။ အာဝ် မိုဝ်း ဒူအီ အီ ကွယ်။

38 ဂေ ဒူအီ တီ ဒီ ဘော ဟမ် ကာအိူန် ပီ မာခြင်ဆီ။ ဂေ ဒီ ဘော ဒတ် ရျီင် ပီ မာခြင်ဆီ နှိုမ်။

39 ဒေါ ကာပြာန့် ကာဆဝ် ဂေ၊ အုဝ် ဒီ ဘော ဒွါ ဂေ ဟူမ်၊ တဲး ဂေ ကော ယိုတ့်၊ တဲး န့ ကော ကျဝ် ဒီ နဝ်း ဂေ။ မာလဲ၊ ဝါယ် တီ ဂေ ဒီ ဘော ဝီ အိတ် ဘော စုဝ် ဂေ။ ဂေ မိူဝ် တူ နပ် ဒီ ဝီ န့ဆိုဝ်း ဒေါ မှဝ်။

40 အုဝ် ဒီ ဘော ဝီ ဒိူတ် လာက် ဂေ၊ တဲး န့ ပီ အီ ဒိူတ် လာက် မာဘူ အီ လုဝ် ယမ်။ တဲး န့ ပီ ဘော မာဘူ အာလူင့် ဂေ မာပဲ အာလူင့် ပီ ဒီ ငဝ်း ယမ် ဂေ။

41 အီ ဟဝ် ဟဲ့ ဟွတ့် တး ရိုပ် တး ပွိုန် မိူင် ဘာဘဲ။ မိူင် ပဲ့ ဟဲ့ အိူပ် ဟဲ့ အာမ် အီ၊ ဂေ ဟဲ့ ဟွတ့် တး ဖာတ် တး ဒိုဝ်း။ မိူင် ဘာဘဲ တီ၊ န့ ဒီ ဘော ဘဲန် ပီ ကာစွာ ဒူအီ ဒွန် မျုဝ် ဒွန် ဇိုဝ်။

42 န့ ပီ အိုမ် နမ်မုက်ဆာရာ ဒီ ဘော လှဲ တး ခဲင် မိူင် ဘာဘဲ။ ဂေ ဒူအီ ခဲင် မိူင် တီ၊ ဂေ ဘော လုဝ် ခမ် ဆီလွယ် အိုမ် တး ပ့လိုက် တး ဘိန် ဂေ။

43 ခဲ့ ကွယ် မိူင် ခဲင် ကာဒါယ် မိူင် ဘာဘဲ၊ န့ ဒီ ဘော ဘဲန် ပီ ယုဝ် ပီ ကာဟိဝ် အီ၊ ဘဲန် ဘော ပြဲ ကာဟဝ်း။ န့ ဒီ ဘော ဘဲန် မိူင် ပီ ဘ့လေး ဝဲန် အီ၊ မိူင် တူ မိုဝ်း ဒူအီ ကွယ်။ န့ မိူဝ် တူ မိုဝ်း ဒူအီ ခေါ အူ ဝီ အီ တး ဝဝ့် တး ဟာဝ် ခဲင် မိူင် တီ။

44 အုဝ် ဒီ ဘော ဒမ် မှာပ် ဒီ ဇဝ် ဘေလ အီ ကွယ် ခဲင် မိူင် ဘာဘဲ တီ။ အုဝ် ဒီ ဘူင် တဲး အန် ဝီ ဟိုဝ် လေး ပီ ဟူမ် အန်။ ဝါယ် အန် တီ ဒူအီ ဒွန် မျုဝ်၊ အာဝ် ဟူ တး ကာဇု ကာဒိုမ် ခဲင် မိူင် ဒူင် ကွယ် ဇဝ် ဘေလ တီ။ ရဲင် တာင် အီ ရူပ် မိူင် ဘာဘဲ န့ ဒီ ကေး ကာပျာတ့် တူတ့်။

45 အိုယ် ဘေ ဒူအီ ပီ အိုပ် အုဝ်၊ တဲး ဘေ လေး တဝ် ခဲင် မိူင် တီ။ တဲး ဘေ လွတ် တဲး န့ ချွတ် ဘေ ရာင် အာဆေ ရာင် အန်။ ကွဲ့ တဲး ဘေ လုဝ် ခမ် နဝ်း ရူ ဇဝ်ဖြာ အီ ဟဲ့ ဟဲန့် ကာဆဝ်။

46 ကွဲ့ တဲး နဝ်း ဘေ လိုဝ်၊ ကွဲ့ တဲး ဘေ ယုဝ် ကူပ် ဟဲ့ ယိုဝ် ဘေ ပီ ကာလာင် အီ ဟဝ် လွင် မိူင် တီ။ အူ ဆီနမ် ဘေ ယိုဝ် ဂြုဝ်း လွင် အန် တီ။ ပေါ အူ ဆီနမ် ဘေ ပီ ဒီ ဝီ ယိုဝ် ဂြုဝ်း ပေါ အူ မျုဝ်။ န့ မုး လွင် အီ လာယ် ခါနှာပ် ကာဆဝ် ခဲင် မိူင် တီ။ ကာတဲ ဂေ ဒါ ကာညာ အီ အိုပ် မိူင်၊ အူ ဝီ ဒီ ဘော ဝီ လာယ် ကာဘး ဒီ ပေါ အူ ဝီ။

47 ကူပ် န့ ပါယ် တီ န့ ဒီ မိုဝ်း အာခြာဝ် ဒီ ဒမ် အုဝ် မှာပ် ဒီ အာရိုပ် ရာင် အီ ကွယ် ခဲင် မိူင် ဘာဘဲ။ ဒူအီ ခဲင် မိူင် ဂေ ဘော မိူင် ဒီ ဘော စှိုမ် ဆာရေ။ ဒုဝ် ယမ် ဒူအီ ခဲင် မာန် မိူင် ဂေ တီ ဒီ ကွယ် ဘဲန် ပ့လုဝ့် ဘဲန် ပ့လုဝ့်။

48 ဒေါ အန် တီ ဂါင်ဟြာဝ် ဘော ကာဒါယ် ဘော အာမျုဝ် အီ ကွယ် ခဲင် ကာဒါယ် ဘောကာဂ့လျီတ်၊ ဂေ ဒီ ဒါခိုယ် ကာဆဝ် ကူပ် မိူင် ဘာဘဲ တီ။ ခုဝ်၊ ဂေ အီ ဒီ တး ကာဂုဝ်း တး ရိုပ် မိူင် တီ၊ ဂေ ဒီ ဘော လူင် တး နာ ကွာ။

49 မိူင် ဘာဘဲ ဒီ ဘော ကာပျာတ့် လိုဝ်။ ခုဝ်၊ ဂေ ဟဲ့ ငဝ်း ယမ် ကိူန် ကာဆဝ် ဒူအီ အီဆာရေလ။ ဂေ ဟဲ့ ဘူင် တဲး ဒူအီ ကိူန် ဘော ကာဒါယ် ယမ်။” ဇဝ်ဖြာ ဟဲ့ ကာလာင် ပါယ် တီ။

50 အိုယ် ဘေ ဒူအီ အီဆာရေလ အီ ဟဲ့ လွတ် ယမ် ဒီ မာပွါ့ လာင် ခဲင် မိူင် ဘာဘဲ၊ တဲး ဘေ လေး ဟာဝ်။ အာဝ် လုဝ် နှဝ့် ပါယ် တီ။ တဲး ဘေ လှုဝ်း ဇဝ်ဖြာ အီ ကွယ် ခဲင် မိူင် တူင့်။ ဘော မိူင် ယေရူဆာလဲမ် မိူဝ်၊ တဲး ဘေ လှုဝ်း ခဲင် နဝ်း ဘေ။

51 အေ ဟဲ့ စှိုမ် ဆာရေ ကူပ် ဟဲ့ ယိုဝ် အေ ဂြုဝ်း ပီ ဖျာက် အီ ဟဝ် ဒီ အေ။ အေ ဟဲ့ မွှိုမ် ဆာယ် ကာဆဝ်။ ခုဝ်၊ ဒူအီ အာမျုဝ် ဟဝ် ဟဲ့ တး လိုပ် ဒူင် ဆီငါ ဘွတ် ခဲင် ဟုဝ် ဇဝ်ဖြာ။

52 ခုဝ် အန် တီ ဇဝ်ဖြာ ပီ ဝီ တဝ်း၊ “န့ ဒီ ဇမ် အာခြာဝ် ဒီ ဒမ် အုဝ် မှာပ် ဒီ အာရိုပ် ရာင် အီ ကွယ် ခဲင် မိူင် ဘာဘဲ။ ဒူအီ အီ မိုဝ်း ဆဝ် မိုဝ်း ဒိမ်၊ ဂေ ဒီ ဝီ ယာမ် ဝီ ငှုန် ဒွန် ပ့လုဝ့်။

53 ဂေ ဒူအီ ခဲင် မိူင် ဘာဘဲ၊ ဂေ ပီ ဘော ဟဲ့ ပွိုန် ဟုဝ့် ကွယ် ဒဲင် နွန် စာ၊ ပီ ဘော ဘူင် ရဲင် မိူင် ဂေ ဒဲင် နွန် စာ တီ၊ တဲး န့ ကော မန် ဆီချာ မိူဝ်၊ အုဝ် ယီ ဒီ တဲး ဒူအီ တး ကာဂုဝ်း တး ပျာတ့် ဂေ။” ဇဝ်ဖြာ ဟဲ့ ကာလာင် ပါယ် တီ။

54 ဇဝ်ဖြာ ဝီ တဝ်း၊ “ဘေ ဒီ ဘော ယိုဝ် ယာမ် ဂေ ဒူအီ ခဲင် မိူင် ဘာဘဲ ဘော ဟမ် တာင်။ ခုဝ်၊ ဒူအီ ခဲင် မိူင် တီ ဒီ လိုဝ် စှိုမ်။

55 ဇဝ်ဖြာ ဒီ ပျာတ့် ဝဲန် မိူင် ဘာဘဲ တဲး န့ ရာမ်၊ တဲး ဟမ် အီ ဆီနန် ဆီနိူင် တီ ဝီ ယေန်။ ရန်ဆူ ဘဲန် ဖိုင် ဘဲန် ဖိုင် ဒီ တး ခဲင် မိူင် တီ။ ဂြုဝ်း ဂေ တီ ဒီ ပီ ဟမ် ဆီလွယ် အိုမ် တာင်။

56 ဝီ အီ ဒီ တး ပျာတ့် တွိုန်၊ အန် ဒီ ဘော တး ခဲင် မိူင် ဘာဘဲ တီ။ ဂေ ဒါ ဆိုက် ခဲင် မိူင် တီ ဒီ ဘော လုဝ် ခမ် ရန်ဆူ ဂေ မှေတ့် ဟာဝ် ဂေ။ အ ပီ ဂူင့် ဂေ ဒီ ဘော ကာဘက် လိုဝ်။ ဇဝ်ဖြာ နပ် ဒီ ဒမ် မှာပ်။ အန် ဇဝ် ဒီ ဘော ဝီ ဘူင် ဝျီ့ ဒီ ဂေ ခဲ့ ကာဒါန် မှာပ် ဂေ။

57 အာမူ အာမာတ် အီ အိုပ် မိူင် ဘော ဂေ အီ မိုဝ်း အာငျာန်၊ ဂေ ဒါ ကာညာ ဘော ဒူအီ အီ ယဲတ့် ဒါ ဆိုက် ဘော ဒါ ဆိုက် ခဲင် မိူင် တီ၊ အုဝ် ဒီ တဲး ဂေ ဝီ ပီ ဒူအီ ယိုတ့် ပဝ်း။ ဝါယ် အန် တီ ဂေ ဒီ ဘော အိတ် ဘော စုဝ် ဂေ၊ အာဝ် ဟူ န့ဆိုဝ်း ဒေါ မှဝ်။” ခုန်ဒီခမ် တာင် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ကာလာင် ပါယ် တီ။

58 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ရဲင် မိူင် ဘာဘဲ အီ ဟဲ့ တာင် ဟဲ့ ဟေတ့် ကာဆဝ်၊ န့ ဒီ ဘော ကာပျာတ့် လိုဝ် တူတ့်။ မာ မာလုဝ်း အီ စာ ဘော ကာဆိုမ် တူတ့် ခဲင် ငဝ်။ ပီ ဘူင် ဒူအီ ခဲင် မိူင် တီ တူ မိုဝ်း ဒီခုဝ်။ ဂေ နုန် ပီယေန့်။ ဂေ ဒူအီ ဒွန် မျုဝ် ဒီ ဘော ဘူင် အီ ဒီ တဲး ငဝ် ကာဆိုမ်။”

59 ခုန်ဒီခမ် အာဇေဒေကီ ဟဲ့ အိုပ် မိူင် အာဒါ ဖွုန် ဆီနမ် ဒေါ အာယေရေမီ အီ မုး ဒူအီ အီ ဘျာန် ဂြုဝ်း ဇဝ်ဖြာ ဟာဝ် ဒူပ် ခုန်ဒီခမ် အာဇေဒေကီ။ ဒေါ အန် တီ အာယေရေမီ ကာလာင် ဂြုဝ်း ဒီ အာဆေရာယာ အီ မုး ဂွန် အာနေရီ ဘော လှာန် အာမာဟာဆာယာ။ အာဆေရာယာ တီ ဘော ဘဲန် ဒါ စာရေ တာင်။ 60 အာယေရေမီ ဟဲ့ ဒဲမ် အုန် ခဲင် ဆီလွယ် ပဲ့ လွင် အာဖေ အာရေ အီ ဒီ တး ဇမ် ခဲင် မိူင် ဘာဘဲ။ 61 အန် ဝီ တဝ်း ဒီ အာဆေရာယာ၊ “ဆေ မဲ ဟီ ဟာဝ် ဇမ် ခဲင် မိူင် ဘာဘဲ၊ တဲး မဲ ဝိုဝ်း ဆီလွယ် ပဲ့ နီ ဘော တိး တူတ့် ပဲ့ ဟဲ့ ဒဲမ် အုန် ဒီ တီ။ 62 ဟဲ့ ဟွတ့်၊ မဲ ဘော ဝီ တဝ်း၊ ‘အိုယ် မဲ ဇဝ်ဖြာ၊ မဲ ဇဝ် ဟဲ့ ဟွတ့် ကာလာင် အုန်၊ မဲ ဒီ ပျာတ့် ဝဲန် မိူင် နီ၊ ကွဲ့ တဲး န့ ဆီ မိုဝ်း ဒူအီ ဂေ ဒုဝ် ဆတ်ဒါဝါ အီ ဆီ ကွယ်။ န့ ဒီ ဘော ဘဲန် ဒူင် ယေန် ဒူင် ငွင့် ဆေဆေ။’ 63 ဆေ မဲ ဟဲ့ ဟွတ့် တိး တူတ့်၊ မဲ ဘော ဝီ ပက် ဒိုက် ပဲ့ တီ ဒီ မာဝ်၊ ဘော ဝီ ဘျွာ လူင် ဒီ ကာတဲ အိုမ် ဘ့လဲင် အူဖာရာတ်။

64 ဟဲ့ ဟွတ့် မဲ ဝီ တဝ်း ပါယ် နီ၊ ‘မိူင် ဘာဘဲ အီ မုး မိူင် တာင် ဒီ ဘော ကာပျာတ့် လိုဝ် တူတ့်။ ဝါယ် နီ၊ အာဝ် မိုဝ်း အီ ဝီ ယိုဝ် အန် ပေါ အူ ဇေန့် ကူပ် အာဖေ အာရေ ပဲ့ ဟဲ့ တဲး အုဝ် ဂေ ခမ်။’”

ဂြုဝ်း နီ မုး ပီ ကာလာင် အာယေရေမီ။