1 ဇဝ်ဖြာ ဝီ ကာလာင် ဒီ အာယေရေမီ လွင် ဂေ ဒူအီ ခဲင် မိူင် ဘာဘဲ။ အန် တဝ်း၊

2 “တဲး မဲ ကာလာင် ဒီ ဒူအီ ဒွန် မျုဝ် ဒွန် ခြိုဝ်။ တဲး မဲ ဆမ် ဘော ရွင့် အာလာမ်၊ တဲး ဂေ လှုဝ်း လွင် အန် တီ။ မဲ ကွဲ့ ချြီင် မာဆေ ဘော ဒတ် တဝ်း၊ ‘ရန်ဆူ ဒီ တး ကာဂုဝ်း ဒီ မိူင် ဘာဘဲ။ ဇဝ် ဘေလ မိူဝ် ဟဲ့ ဟွတ့် စှိုမ် ဆာရေ။ ဇဝ် မဲရော ဒီ ဘော ကာဘက် ကာပျာတ့် လိုဝ် တူတ့်။ အာရိုပ် ရာင် ခဲင် မိူင် ဘာဘဲ ဂေ ဒီ စှိုမ် ဆာရေ။ ဒီဂ်ု ဟေ ပီ ဘူင် ဂေ အာရိုပ် ရာင် တွိုန် မိူဝ်၊ ဒီ ကာဘက် လိုဝ် တူတ့်။’

3 ဒူအီ အူ မျုဝ် ဒီ တး နာ ကွာ ဘော ကာဂုဝ်း ဒီ မိူင် ဘာဘဲ ဘော တဲး မာန် မိူင် လိုဝ် စှိုမ် တူတ့်။ အာဝ် ဟူ မိုဝ်း အာဆေ အီ ဆီ ဂိတ် ဆီ ကွယ်။ ဘော ဒူအီ ဘော ဒုဝ် ဆတ်ဒါဝါ ဂေ ဘောကာဂ့လျီတ် ဒီ တဝ် တူတ့်။”

4 ဇဝ်ဖြာ ပီ ဝီ တဝ်း၊ “ဆီငဲ တီ အာခြာဝ် ဒေါ အန် တီ ဂေ ဒူအီ အီဆာရေလ ဘော ဂေ ဒူအီ အာယူဒါ၊ ဂေ ဒီ ဘော ဝီ တး ဒီ ရိုမ်။ ဂေ ဒီ ယာမ်၊ ဝီ ဟြေတ့် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ။

5 ဂေ ဒီ ဝီ ဒီမွှတ်၊ ဝီ ဟြေတ့် န့တေန့် အီ ဟာဝ် ဒီ မိူင် ဇီအူန်။ ဂေ မိူဝ် ဒီ ဝီ ဟာဝ် ဆိူဝ် နာ တီ။ ဂေ ဒီ ဒွါ ကာဒိက် ဆတ်ဇာ ဘော တဝ်း ဒီ ကွယ် ဆေဆေ။ ဂေ ဆီ ဝီ ကွယ် ကာဒိုက် ကာဒဝ့် ဒီ ဇဝ်ဖြာ၊ ကွဲ့ ဟူ တဲး နဝ်း ဂေ ဘ့လိူင် ဒေါ မှဝ်။”

6 ဇဝ်ဖြာ ပီ ဝီ တဝ်း၊ “ဂေ ဒူအီ ပီ အိုပ် အုဝ်၊ ဂေ ဟဲ့ ပီ မာဘူ အီ ဟဲ့ ဘျုဝ်း။ ဂေ ဒါ အီ ဟျီင် မာဘူ ဟဲ့ ဝီ ယဲတ့် တဲး ဂေ ကာလိုပ် န့တေန့်၊ တဲး ဂေ ဝီ ဟာဝ် ဝိဝ် ဟာဝ် ဝေန့် ဒဲင် နွန်။ ဂေ မိူဝ် ဟဲ့ ကာလိုပ် န့တေန့်၊ ဟဲ့ ဂ့၀ွင် ပြဲ ဘော ယိတ့် ဒီ နွန် အူ ဘူင့်၊ ပီ ဝီ ဟာဝ် ဒီ နွန် ပေါ အူ ဘူင့်။ ဂေ မိူဝ် အာဝ် ဟူ နပ် ဒူင် ကွယ် ဘြိမ် ဂေ။

7 ခဲ့ ကွယ် ဒူအီ အီ ကာတုန့် ဂေ၊ ဂေ ဘော ဝီ ကာဂုဝ်း ဒီ ဂေ တဲး ဂေ စှိုမ်။ ရန်ဆူ ဂေ ဘော တဝ်း၊ ‘အေ တူ မိုဝ်း မှာပ်။ ဂေ ဟဲ့ လုတ့် ဇဝ်ဖြာ အီ ဒွါ ဒီ ဂေ ခဲ့ ပီ လုဝ် ဂေ။ အန် မုး ဇဝ်ဖြာ ပီ ဒွိုမ် ဘိုင် ဂုန့် ဒင် ဂေ။’

8 တဲး ဘေ တဝ် လေး ခဲင် မိူင် ဘာဘဲ။ တဲး ဘေ တဝ် လေး ခဲင် မိူင် ဒူအီ ခါလာဒေ၊ တဲး ဘေ ဘူင် ပီ မာပဲ ဒုဝ် အာလူင့် အီ ဟဲ့ ယဲတ့် ဖိုင် အန် လေး ဟာဝ်။

9 ခုဝ်၊ အုဝ် ဒီ ကာဆုး အာမျုဝ် ဂေ ဒူအီ အီ ကိူန် ကာဆဝ် အီ ကွယ် ဘ့လာက် နာ ကွာ၊ တဲး ဂေ တး ကာဂုဝ်း ဒီ ဒူအီ ခဲင် မိူင် ဘာဘဲ။ ဂေ ဒီ တဲး ဒါ ဆိုက် ဂေ ကွယ် ဒွန် ဘ့လာက် နာ ရေတ့် မိူင် တီ။ ဂေ အီ တး နာ ကွာ ဒီ ဘော တး ကာဂုဝ်း ပွိုန် မိူင် တီ။ ဘ့လာ အ ပီ ဘန့် ဂေ ဘော မုး ဘ့လာ ပီ ဘန့် ဒါ ဆိုက် အီ ဟဲ့ ကျ၊ ဟဲ့ လှဲဝ် ဒီ ကာဂုဝ်း။ ဆေ ဂေ ဟီ ဘန့်၊ န့ ဒိူန် တူ လွတ် တူ ဝး ဒေါ မှဝ်။

10 မိူင် ဘာဘဲ ဘော ဘဲန် ပီ ဖာတ် ပီ ဒိုဝ်း အီ ဟဝ်။ ဂေ အီ ဖာတ် ဒိုဝ်း တီ၊ ဂေ ဒီ ဘော ဖဲ ဆီချာ။” ဇဝ်ဖြာ ဟဲ့ ကာလာင် ပါယ် တီ။”

11 ဇဝ်ဖြာ ပီ ဝီ တဝ်း၊ “အိုယ် ဘေ ဒူအီ အီ ဟဲ့ ဖာတ် ဟဲ့ ဒိုဝ်း ခါဂုန် အုဝ်၊ ဘေ အီ ဟဲ့ ခူယ် ကာဆဝ်၊ တဲး န့ ကော ပီ ဂွန် မက် ဆိူဝ် အီ ဟဲ့ ဒဲန် ဝိဝ် ဒဲန် ဝေန့် ဒူင် ညဲတ့် အန် ဒီ ငှုဝ် ဘော ဟမ် တာင်၊ တဲး န့ ကော ပီ မ့ပြွင့် ကာဟာတ့်။

12 မိူင် ဘာဘဲ အီ ပီ မာ ဘေ ယီ ဒီ ဝီ မွှိုမ် ဆာယ် ကာဆဝ်။ ယာ အီ ဂွိုတ် တး ဘေ၊ န့ ဒီ ဘော ဘဲန် နာ ရေန့် ကာဟဝ်း ဒီ အန်။ အန် ဒီ ဘော ပီ မိူင် အီ ချဝ့် လွှိုမ် မိူင် အီ ဟဝ် ဘောကာဂ့လျီတ်၊ အီ ကွယ် ခဲင် ပြဲ၊ အီ ဟဲ့ ဟေန့် ကာဟဝ်း တွင့်။

13 ကူပ် ဟဲ့ ရူ ကာဆဝ် ဇဝ်ဖြာ၊ ဝါယ် တီ အာဝ် မိုဝ်း အီ ပွိုန် ကွယ် ခဲင် မိူင် တီ။ န့ ဒီ ဘော ဘဲန် တူတ့် ဒူင် ရာမ်။ ဂေ ဒူအီ အီ တး ဝဝ့် ခူပ် မိူင် ဘာဘဲ တီ၊ ဂေ ဒီ ဘော ဝီ ကာစွာ ကူပ် အာဖေ အာရေ ပဲ့ ဟဲ့ ခမ် ဂေ ဘော ကူပ် အီ ဖျာက် ဂေ။

14 တဲး ဘေ ရဲန် ဒီ ကာဂုဝ်း၊ တဲး ဘေ ကွယ် ရူပ် မိူင် ဘာဘဲ။ အိုယ် ဘေ အီ မုး ဒါ ကာညာ အ၊ တဲး ဘေ ဘန့် အ ဘေ၊ ကွဲ့ ယုဝ် ဒီ စှိုမ် ဘ့လာ အ ဘေ။ ခုဝ်၊ ဂေ ဟဲ့ ဟွတ့် လုတ့် ဇဝ်ဖြာ။

15 တဲး ဘေ ကာဖြူမ် ဒီ ဒတ် ရျီင် ခူပ် မိူင် တီ၊ အန် ဒီ ဘော ဘ့လေး လူင် ခြိုင် ကာဂုဝ်း အန်။ န့ ပီ မိူင် တီ ဟဲ့ ဟွတ့် ဒီဂြပ် လူင်။ ရဲင် မိူင် တီ ဟဲ့ ဟွတ့် ဒီဂ့လဝ်း စုဝ်း တူတ့်။ ကူပ် ဟဲ့ ရူ ကာဆဝ် ဇဝ်ဖြာ ဒီ ဂေ၊ အန် ဝီ ဘူင် ဝျီ့ ဒီ ဂေ။ ခုဝ်၊ တဲး ဘော ဘေ ဘူင် ဝျီ့ ဒီ ဂေ ခဲ့ ကာဒါန် မှာပ် ဂေ။ တဲး ဘေ ဘူင် ဝျီ့ ဒီ ဂေ ခဲ့ ပီ ဘူင် ဂေ ဒီ အီ ဟဝ်။

16 တဲး ဘေ ဒိုဝ်း ဝဲန် ဂေ အီ ဘြတ် ဆီမာ ခဲင် မိူင် ဘာဘဲ၊ ဝဲန် ဘော ဂေ အီ ဆုဝ့် ငှုဝ် အာခြာဝ် ဆုဝ့်။ ကူပ် ဂူင့် ဂေ မာပွါ့ လာင် အီ နပ် ဒီ ခါနှာပ် ကာဆဝ် အီ ဟဝ်၊ တဲး ဂေ ဘော ဝီ တး ဒူင် ကွယ် ဒူအီ အာမျုဝ် ဂေ ရာင် အာဆေ ရာင် အန်။ တဲး ဒွန် အီ ဘော ဝီ ဟာဝ် ဝေန့် ခဲင် မိူင် ဂေ။

17 ဂေ ဒူအီ အီဆာရေလ ဂေ ပီ မာဘူ အီ ဟဲ့ ကာယဝ်း ကာရေး ကူပ် မာခြင်ဆီ ဟဲ့ တး ခုင်ခြး ဂေ။ ခုန်ဒီခမ် အီ အိုပ် မိူင် အာဆူရီယာ ဟဲ့ တး ပီ မာခြင်ဆီ၊ ကဝ့် ဟူမ် ဂေ ဒီ အာတ့် အီ ဟဝ်။ ဟဲ့ ဟွတ့်၊ ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ ပီ ဒုဝ် ဆတ် အီ ဝီ ကာဘက် ဝဲန် ကာအာင် ဂေ။”

18 ပါယ် တီ ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ အန် တဝ်း၊ “အုဝ် ဒီ ဒမ် မှာပ် ဒီ ခုန်ဒီခမ် အီ အိုပ် မိူင် ဘာဘဲ၊ တဲး န့ ပီ ပဲ့ ဟဲ့ ဒမ် အုဝ် မှာပ် ဒီ ခုန်ဒီခမ် အီ အိုပ် မိူင် အာဆူရီယာ တွိုန်။

19 အုဝ် ဒီ ဘော ဝီ ဒိုဝ်း တး ဂေ ဒူအီ အီဆာရေလ၊ တဲး ဂေ ဝီ ကွယ် ဒူင် ကွယ် ဘြိမ် ဂေ။ ဂေ ဒီ ဘော ဝီ ပွိုန် ဒီ တး ကွယ် တး ဟူမ် ဒဲင် နွန် ဂါမေလ ဘော ခဲင် မိူင် ဘာဆန်။ ဂေ ဒီ ဘော ပွိုန် ဒီ ဟူမ် ဖဲ ဒဲင် နွန် အာအေဖာရိမ် ဘော ခဲင် မိူင် ဂီလေအာတ်။”

20 ဇဝ်ဖြာ တဝ်း၊ “ဆီငဲ တီ အာခြာဝ် ဒေါ အန် တီ ဒူအီ ဟဝ် ပီ ဘော ဝီ ဟြေတ့် ဒီ ဇဲတ် ဒီ ယွတ် မှာပ် ဂေ ဒူအီ အီဆာရေလ မိူဝ်၊ အာဝ် ဟူ မိုဝ်း မာဆေ။ အီ ဟဝ် ပီ ဘော ဝီ ဟြေတ့် ဒီ ယွတ် နာ တူ မွှိုမ် ဂေ ဒူအီ အာယူဒါ မိူဝ်၊ အာဝ် ဟူ ယိုဝ်။ ခုဝ်၊ အုဝ် ဟဲ့ ဟွတ့် ဂဝ်း ဝဲန် တူတ့် မှာပ် ဂေ ဒူအီ အီ ဆီ ဂိတ် ဆီ ကွယ်။

21 တဲး ဘေ ရဲန် ဒါ ဆိုက် ဘေ၊ ဟုဝ့် ကာဂုဝ်း ဒီ မိူင် မေရီဆိမ် ဘော ဒီ ဒူအီ ခဲင် ရဝ် ခဲင် မိူင် ဘီဂွတ်။ တဲး ဘေ ငဝ်း ဝဲန် ဘော ပျာတ့် ဝဲန် တူတ့် ဒူအီ ဂေ တီ။ တဲး ဘေ ဘော ဘူင် ခဲ့ ပီ ကာလာင် အုဝ် ဒီ ဘေ တီ။” ဇဝ်ဖြာ ဟဲ့ ကာလာင် ပါယ် တီ။

22 ဇဝ်ဖြာ ပီ ဝီ တဝ်း၊ “ဒွန် အီ မိူဝ် ဟဲ့ ပွိုန် ယိုဝ် ဟမ် ဂေ အီ လာယ် ကာဂုဝ်း၊ ဟဲ့ ယိုဝ် ဟမ် ဆီနန် ဆီနိူင် ဂေ အီ လာယ် ပျာတ့်။

23 မီဒဲ ဟိန် ပီ မး ဂေ ဒဲင် ကာဒါယ် ဟဲ့ ဟွတ့် ကာဒဲပ်၊ တဲး န့ ကာဘက် ကာပျာတ့် လိုဝ် တူတ့်။ မိူင် ဘာဘဲ ဟဲ့ ဘဲန် ပီ ယုဝ် ပီ အာမ် ဒူအီ ဒွန် မျုဝ် ဒဲင် ကာဒါယ်။

24 အိုယ် ဘေ ဒူအီ မိူင် ဘာဘဲ၊ အုဝ် ဟဲ့ ဟွတ့် ဒိန့် အုန် ယွတ့် ဂေ ခိူမ် ဒီ ဘေ။ ဘေ ယီ တူ နပ်၊ ဘေ ဟဲ့ ဟွတ့် ခြေ အူ ဇေန့်။ ဂေ ရန်ဆူ ဘေ ဟီ ယိုဝ် ဘေ၊ ဂေ ကာဂုဝ်း ဒီ ဘေ ကူပ် ဟဲ့ ဘူင် ကာဘး ဘေ ဒီ ဇဝ်ဖြာ။

25 န့ ပီ ဇဝ်ဖြာ ဟဲ့ ဝိုဝ်း ဒူင် အုန် အန် ခြိုင် ကာဂုဝ်း အန်။ အန် ဒီ စ်ု ဒွန် မျုဝ် ကူပ် ဟဲ့ ရူ ကာဆဝ် အန်။ ခုဝ်၊ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ခြာမ် ဒီ ဘူင် ဘဲန် မျုဝ် ဘဲန် မျုဝ် ဒီ ဒူအီ ခဲင် မိူင် ဘာဘဲ။

26 တဲး ဘေ တး ဒူင် ကာတူင့်၊ တး ကာဂုဝ်း ဒီ အန်။ တဲး ဘေ ဝိုဝ်း တူတ့် ဂြွာ ငှုဝ် အန်။ တဲး ဘေ ဝီ ဒိုဝ်း တူတ့် ဒွန် မျုဝ် ဘ့လေး ဘဲန် မ့ပိုမ် ပီ ငှုဝ်။ တဲး ဘေ ပျာတ့် မိူင် တီ၊ တဲး ဂေ ကော လိုဝ် စှိုမ် တူတ့်၊ ကွဲ့ တဲး န့ ဆီ ဂိတ် မာဆေ။

27 ငဝ်း ဝဲန် ဒါ ဆိုက် ဘောကာဂ့လျီတ် အီ ပီ မက် ဒီဆုဝ် ဘော ဒိုဝ်း လူင် ဂေ ဒူင် ငဝ်း ယမ် အီ ဒီ ဒုဝ် ဆတ်ဒါဝါ။ ဒူအီ ခဲင် မိူင် ဘာဘဲ လုဝ် ခမ် အီ တူ မွှိုမ် ပန် ဒီ ဇမ် ဆီငဲ ဒီ ဒမ် အုဝ် မှာပ် ဒီ ဂေ ဘော ဆုင်ဖျာတ် အာမူ ဂေ။

28 တဲး ဘေ ထူမ် ဂြုဝ်း ဂေ အီ လေး တဝ် ခဲင် မိူင် ဘာဘဲ ဇမ် ဒီ မိူင် ဇီအူန်။ ဂေ ဟဲ့ ဝီ ဟာဝ် ခဲ ဟာဝ် ကာလာင် လွင် ပဲ့ ဟဲ့ ဘူင် ဝျီ့ ဇဝ်ဖြာ ဒီ ဂေ၊ တဲး န့ ဒူပ် ခဲ့ ကာဒါန် မှာပ် ပီ ဘူင် ဂေ ဒူအီ ခဲင် မိူင် ယေရူဆာလဲမ် ဒေါ ဟဲ့ ပျာတ့် ဂေ ဟုဝ် ဇဝ်ဖြာ။

29 တဲး ဘေ ဒဲ့ တး ဒူအီ အီ ကျ ဒီ ဘန့် အ။ တဲး ဂေ တး ကာဂုဝ်း ဒီ ဒူအီ ခဲင် မိူင် ဘာဘဲ။ တဲး ဒါ ဆိုက် ကော ရူပ် မိူင် တီ၊ ကွဲ့ တဲး ဒူအီ ခဲင် ရဝ် ခဲင် မိူင် တီ လွတ် ခေါ အူ ဝီ ဝီ ဒမ် မှာပ် ဒီ ဂေ၊ တဲး န့ ဒူပ် ခဲ့ ပီ ဒွိုမ် ဘူင် ဂေ။ ခုဝ်၊ ဂေ ဟဲ့ ပီခိုက် ပီဖုင် ဂေ ဒီ ဇဝ်ဖြာ အီ ဆီငါ ဘွတ်၊ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။

30 ခုဝ် အန် တီ၊ ဂေ အီမာယ် အီ ဆီ နှိုမ် ခဲင် မိူင် တီ ဒီ ဘော ဝီ ကေး ယမ် ဒူပ် န့တေန့်။ ဆီငဲ တီ၊ ဒါ တာင် အီ အိုပ် ဒါ ဆိုက် ဘော ဂေ ဒါ ဆိုက် ဒီ ဘော လိုဝ် စှိုမ် တူတ့်။” ဇဝ်ဖြာ ဟဲ့ ကာလာင် ပါယ် တီ။

31 ဟဲ့ ဟွတ့်၊ ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “အိုယ် ဘေ ဒူအီ အီ ပီခိုက် ကာဆဝ်၊ အုဝ် ဒီ ဘူင် ကာဘး ဒီ ဘေ။ ခုဝ်၊ ဆီငဲ ဒီ ဒမ် အုဝ် မှာပ် ဒီ ဘေ ဘော အာခြာဝ် ဒီ ဆုင်ဖျာတ် အုဝ် အာမူ ဘေ၊ န့ ဟဲ့ ဟွတ့် ဇမ်။

32 ဒူအီ အီ ပီခိုက် တီ၊ အန် ဒီ ဘော ဒီပ့လာတ် ကေး။ န့ ယီ တူ မိုဝ်း ခေါ အူ ဝီ အီ ဒီ ဝီ စွယ် တဲး အန် ယိတ့်။ အုဝ် ဒီ ဘော ဒိုဝ်း ငဝ် ဒုဝ့် မိူင် အန်၊ တဲး န့ ကာဆိုမ် ဘော ဂေ အီ ကွယ် ရူပ် ကွယ် ချြီ့ အန်။”

33 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဂေ ဒူအီ အီဆာရေလ ဘော ဂေ ဒူအီ အာယူဒါ၊ ဂေ ဘောကာဂ့လျီတ် ဟဲ့ ခမ် အီ ဟဝ် ခါနှာပ် ဂေ။ ဂေ ဒူအီ အီ ဟဲ့ မှေတ့် ဟာဝ် ဂေ၊ ဂေ မိူဝ် ဟဲ့ ခြွင့် အုန် ဂေ၊ တူ ဆီ ဘ့လေး ဂေ။

34 ပီ ဘော ဟဲ့ ပါယ် တီ မိူဝ်၊ အန် ဇဝ် အီ ဒီ ထုတ် လေး ဂေ ယီ မိုဝ်း ပ့လူမ် မိုဝ်း ဟဲန့် ကိူန် ကာဆဝ်။ အန် ဇဝ် ဘော စိူဝ် ဇဝ်ဖြာ အီ အိုပ် တူတ့် ဒွန် မျုဝ်။ အန် ဇဝ် ယီ ဒီ ဝီ မ့ပြာယ်၊ ဝီ ဘူင် တဲး ကာဒါယ် ပီ အိုပ် အန် ကော ဝီ မွှိုမ် ဝီ ယေန် ဒါခိုယ်။ မာလဲ၊ အန် ယီ ဒီ ပျာတ့် ဒူအီ ခဲင် မိူင် ဘာဘဲ။

35 ဇဝ်ဖြာ တဝ်း၊ အာဖေ အာရေ အီ ဒီ တဲး အီ ယမ် ဒီ မာပွါ့ လာင်၊ န့ ဒီ ဘော တး ခဲင် မိူင် ဘာဘဲ ဘော ဒီ ဂေ အာမူ အာမာတ် ခဲင် မိူင် တီ ဘော ဒီ ဂေ ဒူအီ အီ မိုဝ်း အာငျာန်။

36 အာဖေ အာရေ ဒီ မာပွါ့ လာင် ဒီ ဘော ဒိုဝ် ဂေ အီ ညိုင်ရာင် ဒီ ဘျာန် ဂြုဝ်း ဇဝ်ဖြာ၊ န့ ဒီ ဘော ဘဲန် ရိုဝ် ဒီ ဂေ။ အာဖေ အာရေ တီ န့ ဒီ ဘော ဒိုဝ် ဘော ဂေ ဒါ ဆိုက် ဒူအီ ဘာဘဲ ဘောကာဂ့လျီတ်။ န့ ဒီ ဘော ဘဲန် နဝ်း လိုဝ်၊ နဝ်း ကာပျာတ့် ဒီ ဂေ။

37 အာဖေ အာရေ ဒီ မာပွါ့ လာင်၊ န့ ဒီ ဘော ဒိုဝ် ဘော မင်ပြွင့် ဂေ လက်လဝ် ပီ ပဝ့် ဂေ ဒါ ဆိုက်။ န့ ဒီ ဒိုဝ် ဘော ဂေ ဒါ ဆိုက် အာမျုဝ် ဟဝ် အီ ကွယ် ဒူပ် ဂေ ဒူအီ ခဲင် မိူင် တီ။ ဂေ ဒီ ဘော ဘဲန် ပီ အီဘိုန့်။ မာပွါ့ လာင် တီ န့ ဒီ ဘော ဒိုဝ် ဘော ကြုဝ်ကြာမ် ဘော ဒုဝ် ဆတ်ဒါဝါ ပီ ဟျီင် ဂေ။ န့ ဒီ ဘော ဘဲန် ပီ ဖာတ် ပီ ဒိုဝ်း ဟာဝ် အီ။

38 န့ ဒီ ဘော မိုဝ်း ဘော အာဖေ အာရေ အီ ဟေန့် ကာဟဝ်း တွင့် ဇမ် ဒီ ဘ့လဲင် အိုမ် ခဲင် မိူင် တီ။ အိုမ် ခဲင် မိူင် တီ ဒီ ဘော ဟိတ် ဟေန့် တူတ့်။ ခုဝ်၊ ခဲင် မိူင် တီ၊ န့ မိုဝ်း မီ အာရိုပ် ရာင် ဘော ဂေ အီ ဘူင် မီ အီ ဒီရိုဝ် ဒီဒေတ့် ဒီလူယ် ကူပ် ယုဝ် ကာဆဝ် ဂေ။

39 ပါယ် တီ မာဒုဝ် ပြဲ ဘော ဂေ မာဆုဝ် ပြဲ ဒီ တး ကွယ် ခဲင် မိူင် ဘာဘဲ။ မာဒီဘုဝ့် ဒီ ကွယ် ဒူင် တီ။ ဒွန် စုဝ် ဒွန် ဘာန်၊ အာဝ် ဟူ မိုဝ်း ဒူအီ အီ ဒီ တး ကွယ် ဒီ တီ။

40 န့ ဒီ ဘော ဘဲန် ပီ မိူင် ပီ ပျာတ့် ဝဲန် ဇဝ်ဖြာ အီ မုး မိူင် ဆုဝ်ဒူမ် ဂါယ် မိူင် ဂုဝ်မုဝ်။ ဘော မိူင် အီ ကွယ် ကာတတ် ကွယ် ချြီ့ မိူင် ဂါယ် တီ။ အာဝ် မိုဝ်း အာဆေ အီ ပွိုန် ကွယ် ဒီ တီ။ ဒူအီ အူ ဝီ မိူဝ် အာဝ် မိုဝ်း အီ ကွယ် ကာတဲ မိူင် တီ။” ဇဝ်ဖြာ ဟဲ့ ကာလာင် ပါယ် တီ။

41 ဇဝ်ဖြာ ပီ ဝီ တဝ်း၊ “ဘ်ု ဘေ ယွတ်၊ ဒူအီ အူ မျုဝ် ဒီ တး နာ ကွာ။ ဒူအီ အီ ကိူန် ကာဆဝ် အီ ကွယ် ခဲင် မိူင် အီ မန် ဆီချာ ဂေ မိူဝ် ဒီ တး ဒူင် ဆိူတ် ကာဒါယ်။

42 ဂေ ဂူင့် အ ဂေ ဘ့လာ လျီး။ ဂေ ဘော မုး ဒူအီ အီ ဟာယ် ကာဆဝ်။ ဂေ မိူဝ် တူ နပ် ဒီ ကာဝေ ဒူအီ။ ဂြုဝ်း ဂေ ဘော ပီ ဟမ် ဒီငိုန့် အိုမ် နမ်မုက်ဆာရာ။ အိုယ် ဘေ အီ တး ခဲင် မိူင် ဘာဘဲ၊ ဂေ ဟဲ့ ရဲန် ဒုဝ် ဂေ ဘော ဖြူမ် ဒီ ကာဂုဝ်း။ ဂေ ဒီ ဘော တး ကာဂုဝ်း ဒီ ဘေ အီ ပီ ဂွန် ဒီဘျာ။

43 ယေ ဘော ယိုဝ် ဆာဒါင် လွင် ဒူအီ ဂေ တီ။ န့ ဟဲ့ ဘဲန် ဒီလှး ဒီ ယေ။ ဒုက် တာင် ပီ ဒီ ကာဒုး ယေ တီ၊ ဟဲ့ ပီ အီဘိုန့် အီ ဆဝ် ဒီ မိုဝ်း ဂွန်။”

44 ဇဝ်ဖြာ ဝီ တဝ်း၊ “အုဝ် ဒီ တး ပီ မာခြင်ဆီ အီ ဟဲ့ တး လေး ခဲင် ပြဲ တာင်၊ တး ဒူပ် ဒီလယ့် ဘ့လဲင် အိုမ် ယောဒါန်။ န့ ဘော ပီ မာခြင်ဆီ အီ တး ဒူင် မိုဝ်း ပေတ့် ငျီန် န့စမ်။ အုဝ် ဒီ တဲး ဂေ ဒူအီ အီ ကွယ် ခဲင် မိူင် ဘာဘဲ လေး ခဲင် မိူင် ဂေ။ ဝါယ် အန် တီ အုဝ် ဒီ ဝီ ဒါင် တဲး န့ မိုဝ်း ဒါ ကာညာ အီ အိုပ် မိူင် တီ။ အာဝ် မိုဝ်း အာဆေ အီ ပီ အုဝ်။ အာဝ် မိုဝ်း အာဆေ အီ ပွိုန် ကာဘး ဒီ အုဝ်။ အာဝ် မိုဝ်း အီ ပီ ဒါ အီ ဟျီင် မာဘူ ဝီ မှဝ်၊ အီ ပွိုန် ကာခဲန့် ဒီ အုဝ်။

45 ကူပ် န့ ပါယ် တီ တဲး ဘေ ထူမ် အာကျာမ် အာငျာန် ဇဝ်ဖြာ ပီ ဒီ ဒွါ အန် ဒီ ဒူအီ ခဲင် မိူင် ဘာဘဲ။ တဲး ဘေ ထူမ် ဘော ပီ ဒီ ဘူင် အန် ဒီ ဂေ ဒူအီ ခဲင် မိူင် ဘာဘဲ။ န့ ပီ ရန်ဆူ ဂေ ဒီ ဘော လာက် လေး ဒူအီ အီ ပီ ဂွန် မာဘူ။ ဇဝ်ဖြာ ဒီ တဲး ရန်ဆူ ပျာတ့် ဝဲန် တူတ့် ဒူင် ဒီ ဟူမ် ဂေ ပေတ့်။

46 ကာဒါယ် ကော ဒီယုး ဒီယေန့် ကူပ် ဟမ် ကေး ဂေ။ ဟမ် ပီ ယာမ် ပီ ဒတ် ဂေ၊ န့ ကော လိုဝ်း ဇမ် ဒီ အိုမ် နမ်မုက်ဆာရာ။”