1 လွင် ဂေ ဒူအီ အမ်မူန် ဇဝ်ဖြာ တဝ်း၊ “ဂေ ဒူအီ အီဆာရေလ၊ ဂေ တူ မိုဝ်း ဂွန် အီမာယ်၊ တူ မိုဝ်း အီ ဒီ ပ့လု ခါဂုန် ဂေ။ ခုဝ်၊ ဂေ တဲး ဇဝ် မူလွက့် ပွိုန် ဒီ တး အိုပ် မိူင် ဒူင် ကွယ် ဂေ ဒူအီ ခြိုဝ် အာဂတ်။ ဂေ ဒူအီ အီ ကြိုပ် ဇဝ် မူလွက့်၊ ဂေ ကွယ် ခဲင် မိူင် တီ။

2 ကူပ် န့ ပါယ် တီ ဇဝ်ဖြာ ဝီ ကာလာင်၊ ‘ဆီငဲ ဒီ တဲး အုဝ် အီ လာယ် ကာဂုဝ်း ဒီ မိူင် ရာဘာ ခဲင် ကာဒါယ် အမ်မူန် ဟဲ့ ကာတတ် ဒီ ဇမ်။ မိူင် တီ၊ န့ ဒီ လိုဝ် ကာပျာတ့် တူတ့်။ ဘော ရဝ် အီ ကွယ် နာ ရေတ့် မိူင် ဂေ တီ ငဝ် ဒီ ကာဆိုမ် တူတ့်။ ဒေါ အန် တီ ဂေ ဒူအီ အီဆာရေလ ဒီ ဝီ ဟုဝ် လေး ရန်ဆူ ဂေ အီ ဟဲ့ ဒွိုမ် ဖာတ် မိူင် ဂေ။’” ဇဝ်ဖြာ ဟဲ့ ကာလာင် ပါယ် တီ။

3 “အိုယ် ဘေ ဒူအီ အီ ကွယ် ခဲင် မိူင် ဟေဆာဖူန်၊ တဲး ဘေ ယာမ် ဘော ငှုန်။ မိူင် အာယီ မိူဝ် ဟဲ့ ဟွတ့် လိုဝ်။ အိုယ် ဘေ ဒူအီ အီ ကွယ် ခဲင် မိူင် ရာဘာ၊ တဲး ဘေ ယာမ် ဘော ငှုန်၊ စှိုပ် ဘော ခြိုင် စာန်။ တဲး ဘေ ငှုန် ဘော ယာမ်၊ ဝီ ကာဘ့လဲပ် ဝိဝ် ကာဘ့လဲပ် ဝေန့် ခူပ် လူင့် ဂေ ခူင် ဝဲင် ဘေ။ ခုဝ်၊ အီ ဟဝ် ဒီ ဘော တး မှေတ့် ဟာဝ် ဇဝ် မူလွက့် ဘော ဂေ ဒါ အီ လှူ ဒီ အန် ဘော ဂေ ဒါ ကာညာ အီ အိုပ် မိူင် အန်။

4 ဘေ ဒူအီ အီ ကာဘး ဒီ ဇဝ်ဖြာ ဆေဆေ၊ မှဝ် န့ ပါယ် ပီ ဝီ ပီဖုင် ဘေ ဒီ ဘေ ကူပ် ဒီလယ့် ခဲင် မိူင် ဘေ။း ပ့လူမ် ဘေ ဂေ ဟဲန့် ဘေ တီ၊ န့ ဒီ ကြဲ ဒီ ယူမ်၊ ကြဲ ဒီ ဟြာယ်။ မှဝ် န့ ပါယ် ပီ ဝီ နဝ်း တာင် ဘေ ဒီ ကြုဝ်ကြာမ် ဘေ တဝ်း၊ ‘အာဝ် မိုဝ်း အာဆေ အီ ဒီ ပွိုန် တး ကာဂုဝ်း ဒီ ယေ။’

5 ဇဝ်ဖြာ အီ အိုပ် တူတ့် ဒွန် မျုဝ်၊ အန် ဟဲ့ ဟွတ့် တဝ်း၊ ‘ဘ်ု ဘေ ယွတ်၊ အုဝ် ဒီ တဲး အီ မွှိုမ် ယုဝ် ကာဆဝ် အီ ကွယ် ရူပ် ဘေ ဒွန် ပ့လုဝ့် ဝီ တး ဒူင် ကွယ် ဘေ။ ဘေ ဒွန် အီ ဘော ကာဒုး ဒီ တဝ် ရာင် အာဆေ ရာင် အန်။ န့ မိူဝ် တူ မိုဝ်း အာဆေ အီ ပွိုန် ဝီ ဘူင် တဲး ဂေ အီ ဟဲ့ တဝ် ကာယဝ်း ကာရေး တီ ပွိုန် ဝီ တး ကွယ် ကာဇု ပေါ အူ ဇေန့်။

6 ပီ ဘော ဟဲ့ ပါယ် တီ မိူဝ်၊ အုဝ် ယီ ဒီ ဝီ တဲး ဂေ ဒူအီ အမ်မူန် ဝီ ပွိုန် အီ ဘွတ် အီ မွှိုမ်။’” ဇဝ်ဖြာ ဟဲ့ ကာလာင် ပါယ် တီ။”

7 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ ကာလာင် လွင် ဂေ ဒူအီ ခဲင် မိူင် အေဒူမ်။ အန် တဝ်း၊ “ကူပ် မာဆေ အာဝ် ဟူ မိုဝ်း အီ မိုဝ်း အာငျာန် ခဲင် မိူင် ထေမာန်။း ဝီ အီ မိုဝ်း အာငျာန်၊ မှဝ် န့ ပါယ် ဂေ အာဝ် ဟူ ပွိုန် ဒွါ အာကျာမ် အာငျာန် ဂေ။း န့ ပီ အာငျာန် ဂေ ဟဲ့ ဟွတ့် ဟြာယ် တူတ့်။

8 အိုယ် ဘေ ဒူအီ အီ ကွယ် ခဲင် မိူင် ဒေဒါန်၊ တဲး ဘေ လေး တဝ်၊ ဟြေတ့် ဒူင် ဒီ ချြီင် ဘေ။ အုဝ် ဒီ တဲး အာဆုဝ် ကာဒုး အာဖေ အာရေ ဒေါ ဟဲ့ ဇမ် အာခြာဝ် ဒီ ဒမ် အုဝ် မှာပ် ဒီ အန်။

9 ဆေ ဒူအီ အီ ဘေတ့် ဘ့လေ မာငုန် တး ဒူင် ကွယ် ဘေ၊ ဂေ ဒီ ဘော အုန် မင် ကာလဝ့် အာဒါ အီ ဟဝ်။ ဆေ ဒါ ဇူန် တး ပြာ ဘေ ခဲင် မှိုဝ်၊ ဂေ ဒီ ဘော ဒိုဝ်း မီ ကြုဝ်ကြာမ် အီ လဝ့် နဝ်း ဂေ။

10 မာလဲ၊ န့ ပီ အုဝ် ဟဲ့ ဘုတ့် လေး တူတ့် ခြိုင် ပီ တာ လှုက်လှာန် အာဆုဝ်။ အုဝ် ဟဲ့ ဘျ တူတ့် ဒူင် ပီ ချြီင် အန်။ ကွဲ့ တဲး အန် ပွိုန် ချြီင် ဒေါ မှဝ်။ ဂွန် အန်၊ ဘီနွင် ဝေါဝဲ အန် ဘော ဂေ အီ ကွယ် ကာတတ် အန်၊ ဂေ ဒီ ဟြာယ် တူတ့်။ အာဝ် ဟူ မိုဝ်း ခေါ အူ ဝီ။

11 အုန် ဂေ ဂွန် ဆီပြး၊ တဲး ဂေ ကွယ်။ အုဝ် ဒီ ယွတ် မဲန် ဂေ။ ဂေ ယာ ဆီပြး တဲး ဂေ နဝ်း တာင် ဒီ အုဝ် ဘော ဘိုင် အုဝ်။”

12 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “ဆေ ဒူအီ အီ တူ ကာအာပ် ဒျီင် ဆီလယ့် အိုမ် အီ မိုဝ်း ဂူင် ယီ ကာဒုး ဒီ ဒျီင်၊ ဘေ ထာင် ဘေ ဒီ ပွိုန် လွတ် ခမ် မှာပ် ဘေ။း ဘေ မိူဝ် တူ လွတ် ဒေါ မှဝ်။ န့ ပီ ဘေ ဒီ ကာဒုး ဒီ ဒျီင် ဆီလယ့် အိုမ် အီ မိုဝ်း ဂူင် အာခါခ်ု။

13 အုဝ် ဟဲ့ ဝီ ကာဆဲန့် ဒိူင် တဲး ဒုဝ် ဘြိမ် အုဝ် နပ်။ မိူင် ဘုဝ်ဇာရာ ဒီ ဘော ဘဲန် အီ မွှိုမ် ယုဝ် ကာဆဝ်။ န့ ဒီ ဘော ဘဲန် ဒူင် ယေန် ဒူင် ငွင့် ဒူအီ၊ ဘဲန် ဘော ပီ အေး ပီ ဒိူင် အီ ဟဝ်။ ခဲ့ ကွယ် မိူင် ဘောကာဂ့လျီတ် အီ ကွယ် ခဲင် ကာဒါယ် မိူင် အာဆုဝ်၊ ဂေ ဒီ ရာမ် ဆေဆေ။” ဇဝ်ဖြာ ဟဲ့ ကာလာင် ပါယ် တီ။

14 အုဝ် ဟဲ့ ယိုဝ် ဂြုဝ်း ဇဝ်ဖြာ။ အန် ဟဲ့ စ်ု အာမူ အာမာတ် အန် ဟာဝ် ဒူင် ကွယ် ဂေ ဒူအီ ဒွန် မျုဝ် ဘော တဝ်း ဒီ လှုက်လှာန် အာဆုဝ်၊ “တဲး ဘေ တး ကွယ် ကာဇု ကာဒိုမ် ဘော ရဲန် အုန် ဒါ ဆိုက် ဘေ၊ တဲး ဘေ ပွိုန် ဒီ ကာဂုဝ်း။”

15 “ဘ်ု ဘေ ယွတ်၊ အုဝ် ဒီ ဘူင် တဲး ဘေ ဘဲန် ပီ လုက်တာယ် ဒူအီ ဒွန် မျုဝ် ဒွန် ခြိုဝ်၊ တဲး ဘေ စုဝ်း တျီမ် လွှိုမ် ဒူအီ ဟဝ် ဘောကာဂ့လျီတ်။

16 အိုယ် ဘေ အီ ချြီင် ကွယ် ဒဲင် နွန် ဂေ ကာဒဲ့ ဒါအာင်၊ ဘေ တဲး အီ ဟဝ် ယုဝ် ဘေ။ ဘေ ဘော တဲး နဝ်း ပီခိုက် ဘေ ဝီ ကာလုဝ် ဘေ။ ဘေ ပီ ဘော ပွိုန် ဘူင် ကာဟုန် ဘေ ကာဒဲ့ နွန် စာ၊ တဲး န့ ကော ပီ မာဂ့လာင် မိူဝ်။ အုဝ် ယီ ဒီ တဲး ဘေ ဝီ စုဝ်း။” ဇဝ်ဖြာ ဟဲ့ ကာလာင် ပါယ် တီ။

17 မိူင် အေဒူမ် ဒီ ဘော ဘဲန် ပီ ယုဝ် အီ ဟဝ်။ အာဆေ တး ဝဝ့် တး ဟာဝ် ဒူင် ကွယ် ဂေ၊ ဂေ ဒီ ဘော ကာစွာ ကူပ် အာဖေ အာရေ ပဲ့ ဟဲ့ ခမ် ဂေ ဒူအီ ခဲင် မိူင် အေဒူမ် တီ။

18 န့ ဒီ ပီ မိူင် ဆုဝ်ဒူမ် ဂါယ် မိူင် ဂုဝ်မုဝ် ဘော မိူင် အီ ကွယ် ကာတတ် ကွယ် ချြီ့ မိူင် အီ ဟဲ့ လိုဝ် ကာပျာတ့်။ န့ တူ မိုဝ်း အာဆေ အီ ကွယ် ခဲင် မိူင် ဂေ တီ။” ဇဝ်ဖြာ ဟဲ့ ကာလာင် ပါယ် တီ။

19 ဇဝ်ဖြာ ဝီ တဝ်း၊ “အုဝ် ဒီ တး ပီ မာခြင်ဆီ အီ ဟဲ့ တး လေး ခဲင် ပြဲ တာင်၊ တး ဒူပ် ဒီလယ့် ဘ့လဲင် အိုမ် ယောဒါန်။ န့ ဘော ပီ မာခြင်ဆီ အီ တး ဒူင် မိုဝ်း ပေတ့် ငျီန် န့စမ်။ အုဝ် ဒီ တဲး ဂေ ဒူအီ အီ ကွယ် ခဲင် မိူင် အေဒူမ် လေး ခဲင် မိူင် ဂေ။ ဝါယ် အန် တီ အုဝ် ဒီ ဝီ ဒါင် တဲး န့ မိုဝ်း ဒါ ကာညာ အီ အိုပ် မိူင် တီ။ အာဝ် မိုဝ်း အာဆေ အီ ပီ အုဝ်။ အာဝ် မိုဝ်း အာဆေ အီ ပွိုန် ကာဘး ဒီ အုဝ်။ အာဝ် မိုဝ်း အီ ပီ ဒါ အီ ဟျီင် မာဘူ ဝီ မှဝ် အီ ပွိုန် ကာခဲန့် ဒီ အုဝ်။”

20 ကူပ် န့ ပါယ် တီ တဲး ဘေ ထူမ် အာကျာမ် အာငျာန် ဇဝ်ဖြာ ပီ ဒီ ဒွါ အန် ဒီ ဒူအီ ခဲင် မိူင် အေဒူမ်။ တဲး ဘေ ထူမ် ဘော ပီ ဒီ ဘူင် အန် ဒီ ဂေ ဒူအီ ခဲင် မိူင် ထေမာန်။ န့ ပီ ရန်ဆူ ဂေ ဒီ ဘော လာက် လေး ဂွန် မာဘူ ဂေ ခဲင် ဖိုင်။ ဇဝ်ဖြာ ဒီ တဲး ရန်ဆူ ပျာတ့် ဝဲန် တူတ့် ဒူင် ဒီ ဟူမ် ဂေ ပေတ့်။

21 ကာဒါယ် ကော ဒီယုး ဒီယေန့် ကူပ် ဟမ် ကေး ဂေ။ ဟမ် ပီ ယာမ် ပီ ဒတ် ဂေ၊ န့ ကော လိုဝ်း ဇမ် ဒီ အိုမ် ဒီနှူင် ရေန့်။

22 ဘ်ု ဘေ ယွတ်၊ ရန်ဆူ ဘေ ဒီ ဘော တး ပီ မာဂ့လာင် ဘိုန့် ဟုဝ့် ခဲင် ဘ့လေန့်။ ဂေ ဒီ ကာဂုဝ်း ဒီ ဒူအီ ခဲင် မိူင် ဘုဝ်ဇာရာ၊ တဲး န့ ပီ မာဂ့လာင် ဘ့လး ဖျီင် အန် ဒဲင် မိူင် တီ။ ဆီငဲ တီ နဝ်း ဂေ ဒါ ဆိုက် ခဲင် မိူင် အေဒူမ် ဒီ ပီ နဝ်း အီဘိုန့် အီ ဟဲ့ ဝတ့် ဆဝ် ဒီ မိုဝ်း ဂွန်။” ဇဝ်ဖြာ ဟဲ့ ကာလာင် ပါယ် တီ။

23 ဇဝ်ဖြာ ပီ ဝီ ကာလာင် လွင် ဒူအီ ခဲင် မိူင် ဒါမာခူ။ အန် တဝ်း၊ “ဒူအီ ခဲင် မိူင် ဟာမာတ် ဘော ခဲင် မိူင် အာရာဖာတ်၊ ဂေ မိုဝ်း နဝ်း ကာဟွာ့ ဘော က့လိုဝ် ကူပ် ယိုဝ် ဂေ ဆာဒါင် အီ တူ မွှိုမ်။ ဂေ ဘော ယုဝ် ကာဆဝ်။ နဝ်း ယုဝ် ဂေ တီ န့ ဒီ ဘော ပီ အိုမ် နမ်မုက်ဆာရာ အီ ဆီလွယ် ဆီလွယ်၊ အီ တူ ယေန် ဒေါ မှဝ်။

24 ဂေ ဒူအီ ခဲင် မိူင် ဒါမာခူ၊ ဂေ ဟဲ့ ဒီလှး၊ အာဝ် မိုဝ်း ပ့လူမ် ဂေ ဟဲန့်။ ဂေ ရိန် တဲး ဂေ ပွိုန် ဒီ တဝ်။ ဂေ ယီ တူ နပ် မှဝ် ဒီ ပါယ် ဒီ ဘူင်။ ဂေ လုဝ် ခမ် ဒုက် တာင် တီ၊ တဲး န့ ပီ အီဘိုန့် ဝတ့် ဆဝ် ဒီ မိုဝ်း ဂွန်။

25 ဒူအီ ကိူန် ဟဲ့ နပ် ဟဲ့ အိုင် မိူင် ဒါမာခူ တီ။ ဂေ ဒူအီ အီ ကွယ် ခဲင် မိူင် တီ ဟဲ့ ဒါခိုယ်။ မာလဲ၊ ဂေ ဒူအီ ဒွန် အီ ဟဲ့ ဟွတ့် လေး ခဲင် မိူင် တီ။

26 ပန် တီ၊ ဂေ ဒူအီ နှိုမ် အီ ကွယ် ခဲင် မိူင် တီ၊ ဂေ ဒီ ဘော ကေး တူတ့် ဒူပ် န့တေန့်။ ခဲ့ ကွယ် ဂေ ဒါ ဆိုက်၊ ဂေ ဘောကာဂ့လျီတ် ဒီ ကာဒုး အီ ပျာတ့် ဂေ၊ တဲး ဂေ လိုဝ် စှိုမ်။

27 အုဝ် ဒီ ဒိုဝ်း ငဝ်၊ ဒုဝ့် မိူင် ဒါမာခူ၊ တဲး န့ ကော ကာဆိုမ် ဘော ဟုဝ် ခုန်ဒီခမ် အာဘေန်ဟာဒါတ်။” ဇဝ်ဖြာ ဟဲ့ ကာလာင် ပါယ် တီ။

28 ဇဝ်ဖြာ ပီ ဝီ ကာလာင် လွင် ဒူအီ အာမျုဝ် ကေဒါ ဘော ရဝ် ဂေ အီ ကွယ် ခဲင် ပြဲ ကာဟဝ်း ပီ အိုပ် ခုန်ဒီခမ် အာနေဘူခတ်နေစာ အီ မုး ခုန်ဒီခမ် ခဲင် မိူင် ဘာဘဲ။ ဇဝ်ဖြာ တဝ်း၊ “တဲး ဘေ ရဲန် အုန် ဒါ ဆိုက် ဘေ။ အိုယ် ဘေ ဒူအီ အာမျုဝ် ကေဒါ ဘော ခြိုဝ် ဘဲန် မျုဝ် ဘဲန် မျုဝ် အီ ကွယ် ခဲင် ပြဲ ကာဟဝ်း ဘ့လာက် နာ လေး ဆီငဲ၊ အုဝ် ဟဲ့ စ်ု အာနေဘူခတ်နေစာ တဲး အန် ဟာဝ် ကာဂုဝ်း ဘော ပျာတ့် ဝဲန် ဘေ။

29 တဲး ဘေ ဒိုဝ်း ထိုပ် ဘိက် ဂေ၊ ဒိုဝ်း ဘော ဖိုင် မာဘူ ဂေ။ ဘော ဘိက် ဂွင့် ဂေ ဘော ခြိုင် ပီ စ်ု ပီ တာ ဂေ၊ ဘော ဖိုင် မင်ပြွင့် ကာဟာတ့် ဂေ။ ဒူအီ ဒီ ဒတ် တဝ်း၊ ‘အီ မွှိုမ် ယုဝ် ဟဲ့ ကွယ် ရူပ် ဘေ ဘော ဒွန် ဘ့လာက်။’

30 ဇဝ်ဖြာ တဝ်း၊ “အိုယ် ဘေ ဒူအီ အီ ကွယ် ခဲင် မိူင် ဟာစော၊ တဲး ဘေ လေး တဝ် ဘော ဟာဝ် တူင့် တူင့်။ ခုန်ဒီခမ် အာနေဘူခတ်နေစာ အီ အိုပ် မိူင် ဘာဘဲ တွိုန်၊ အန် ဟဲ့ ခြာမ် ဒီ ကာဂုဝ်း ဒီ ဘေ၊ ဟဲ့ ခြာမ် ဘော ဒီ ကာလုတ့် ဒီ ဘေ။”

31 ဇဝ်ဖြာ ဝီ တဝ်း၊ “တး၊ တဲး ဘေ ကာဂုဝ်း ဒီ ဂေ ဒူအီ အီ ထာင် ဂေ ဟဲ့ ကွယ် ဒါခိုယ်။ ဂေ မိူဝ် တူ မိုဝ်း မာလုဝ်း အီ ကာဘိတ် မိူင် ဂေ။ မာလုဝ်း ဂေ မိူဝ် အာဝ် မိုဝ်း ဆဲ အန်။ ဂေ မိူဝ် တူ မိုဝ်း နဝ်း မှဲ မာဆေ။” ဇဝ်ဖြာ ဟဲ့ ကာလာင် ပါယ် တီ။

32 ဇဝ်ဖြာ ဘော တဝ်း၊ “ဂေ ဒီ ဖာတ် မင်ပြွင့် ကာဟာတ့် ဂေ ဘော ဒုဝ် ဆတ်ဒါဝါ ဂေ ဘောကာဂ့လျီတ်။ ဂေ ဒူအီ အီ နပ် ဒီ ဂါ့ ဝဲန် ဟိုက် ဒီမုဝ်း ဘော ဒီ ကုင်ကာပ် ဂေ၊ တဲး ဂေ ကာယဝ်း ဟာဝ် ဒွန် နာ ဒွန် ဘ့လာက်။ အုဝ် ဒီ တဲး အာဖေ အာရေ တး ဒွန် ဘ့လာက် ဒူင် ကွယ် ဂေ။” ဇဝ်ဖြာ ဟဲ့ ကာလာင် ပါယ် တီ။

33 “မိူင် ဟာစော တွိုန် ဒီ ဘော ဘဲန် ဒူင် ကွယ် မာဆုဝ် ပြဲ ဘော ဒူင် ယေန် ဒူင် ငွင့် ဒူအီ ဆေဆေ။ န့ မိူဝ် တူ မိုဝ်း အာဆေ ပွိုန် ကွယ် ကာဆိူဝ် တီ။”

34 ဇဝ်ဖြာ ပီ ဝီ ကာလာင် ဂြုဝ်း ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာယေရေမီ လွင် မိူင် အေလမ် ဒေါ ဟဲ့ စုး ဒီ ဘဲန် အာဇေဒေကီ ခုန်ဒီခမ် အီ အိုပ် မိူင် ယူဒါ။

35 ဇဝ်ဖြာ အီ အိုပ် တူတ့် ဒွန် မျုဝ် တဝ်း၊ “ဘ်ု ဘေ ယွတ်၊ အုဝ် ဒီ ကာဘက် ဝဲန် ဘ့လာ အ ဂေ ဒူအီ ခဲင် မိူင် အေလမ် အီ ဟဲ့ တဲး ဂေ မိုဝ်း ပ့လူမ် မိုဝ်း ဟဲန့်။

36 အုဝ် ဒီ ဒိုဝ်း တး ခုန် ဒီ ကာဒါယ် ဖွုန် ဘ့လာက်၊ တဲး န့ တး ဖွုန် ကာတုဝ့် ခဲင် ဘ့လေန့်၊ တး ဘုတ် ခဲင် မိူင် အေလမ်။ အုဝ် ဒီ ဒိုဝ်း ခဲ့ ကွယ် ဂေ ဒူအီ ခဲင် မိူင် တီ၊ တဲး ဂေ ဟာဝ် ဒူပ် ခုန် တီ။ ဂေ ဒူအီ အီ ဟဲ့ လေး ခဲင် မိူင် အေလမ် တီ၊ ဂေ ဟဲ့ ဟာဝ် ဇမ် ဒွန် မိူင်။ န့ တူ မိုဝ်း ခေါ အူ မိူင် ပီ တူ ဟာဝ် ဇမ် ဂေ။

37 အုဝ် ဒီ တဲး ဂေ ဒူအီ ခဲင် မိူင် အေလမ် ယုဝ် ရန်ဆူ ဂေ၊ ယုဝ် ဂေ အီ ဟြေတ့် ဒီ ငဝ်း ယမ် အာဆာက် ဂေ။ အုဝ် ဒီ တဲး ဂေ ခမ် အာဖေ အာရေ ကူပ် ဟဲ့ ရူ ကာဆဝ် အုဝ် ဒီ ဂေ။ အုဝ် ဒီ တဲး ဂေ အီ ဂူင့် မာပွါ့ လာင် ခုင်ခြး ဒူပ် ဒီ ပန် ဂေ၊ တဲး န့ ကော ပွိုန် ဒီ ငဝ်း ဝဲန် တူတ့် ဂေ။” ဇဝ်ဖြာ ဟဲ့ ကာလာင် ပါယ် တီ။

38 ဇဝ်ဖြာ ဝီ ကာလာင် တဝ်း၊ “အုဝ် ဒီ ဘော ဘ့လေး မာလာင် အုဝ် ခဲင် မိူင် အေလမ်။ အုဝ် ဒီ ဘော ကွယ် ဒူင် တီ၊ ဒိုဝ်း ဝဲန် ခုန်ဒီခမ် ဂေ ဘော အာမူ အာမာတ် ခုန်ဒီခမ် ဘောကာဂ့လျီတ်။” ဇဝ်ဖြာ ဟဲ့ ကာလာင် ပါယ် တီ။

39 အန် ပီ ဝီ တဝ်း၊ “မာလဲ၊ ဝါယ် အန် တီ အုဝ် ဒီ ဝီ တဲး ဂေ ဒူအီ မိူင် အေလမ် ကွယ် ဒါခိုယ် ပီ ခါ အာတ့်။” ဇဝ်ဖြာ ဟဲ့ ကာလာင် အုန် ပါယ် တီ။