1 ဇဝ်ဖြာ အီ အိုပ် တူတ့် ဒွန် မျုဝ် အီ မုး ဇဝ်ဖြာ ပီ ကြိုပ် ဒူအီ အီဆာရေလ၊ အန် ဝီ ကာလာင် လွင် ဒူအီ မိူင် မုဝ်အာပ်။ အန် တဝ်း၊ “ခဲင် မိူင် နေပေါ န့ ဒီ မိုဝ်း ဒုက် တာင်။ န့ ဒီ လိုဝ် ကာပျာတ့် တူတ့်။ ဒူအီ ခဲင် မိူင် ကီရီယာဆိမ်။ ဂေ ဒီ ဘော စှိုမ် ဆာရေ၊ ခမ် တဲး အီ မှေတ့် ဟာဝ် ဂေ။ ဒူင် ချြီင် ဂေ ဒါ ဆိုက်၊ န့ ဒီ ဘော လိုဝ် ကာပျာတ့် ဘော မွှိုမ် ဆာယ် ကာဆဝ်။

2 အာဝ် ဟူ မိုဝ်း ဒူအီ အီ အိုပ် မိူင် မုဝ်အာပ် ဒေါ မှဝ်။ ဂေ ဒူအီ ခဲင် မိူင် ဟေဆာဖူန် ဟဲ့ ဟွတ့် ခြာမ် ဒီ ဘူင် လာယ် ကာဘး ဒီ ဂေ။ ဂေ ခဲင် မိူင် ဟေဆာဖူန် ဟဲ့ တဝ်း၊ ‘တး တး အေ၊ တဲး အေ ပျာတ့် ဝဲန် မိူင် မုဝ်အာပ်၊ ကွဲ့ တဲး ဂေ ဆီ ပွိုန် ဒီ ဝီ ဒဲ ရဝ်၊ ဒဲ မိူင် ဂေ တီ ဒေါ မှဝ်။’ အိုယ် ဘေ အီ ကွယ် ခဲင် မိူင် မာတာမဲနာ၊ န့ ကော ဒီ ယေန် ဘော ငွင့် ခဲင် မိူင် ဘေ တီ။ အာဖေ အာရေ အီ တဲး အီ ယမ် ဒီ မာပွါ့ လာင်၊ န့ ဒီ ဘော ဒူပ် ဒီ ပန် ဘေ။

3 တဲး ဘေ ထူမ် ခဲင် မိူင် ဟုဝ်ရာနိမ် ဒီ ဂြုဝ်း အီ ယာမ်၊ ထူမ် ဘော အီ လာယ် ခါနှာပ် အီ လာယ် ပျာတ့် ကာဆဝ်။

4 ဒူအီ မိူင် မုဝ်အာပ် ဒီ ဘော လိုဝ် စှိုမ်။ ဂွန် ဂေ ဒီ ဘော ကာဖြူမ် ဒီ ယာမ်။

5 ဂေ ဘော ဝီ ဟုဝ့် ဒဲင် နွန် ဒီ မိူင် လူဟိတ် ဘော ယာမ် ဆေဆေ။ ကူပ် ဟဲ့ ခမ် ဂေ ဒုက် ကာဆဝ်၊ ဂေ ဒီ ဘော ယာမ် ဘော ဟာဝ် ဒူပ် န့တေန့် အီ ဟာဝ် ဒီ မိူင် ဟုဝ်ရာနိမ်။

6 တဲး ဘေ ကာဖြူမ် ဒီ တဝ်၊ တဲး ဘေ လွတ်။ တဲး ဘေ ကာဘ့လဲပ် တဝ်၊ တဲး န့ ကော ပီ မာလာ အီ ကာဘ့လဲပ် ခဲင် ပြဲ ကာဟဝ်း။

7 ဘေ ဟဲ့ ဘိုင် ဟဲန့် ဘေ ဂေ ပ့လူမ် ဘေ ဘော ကြုဝ်ကြာမ် ဘေ။ ကူပ် န့ ပါယ် တီ ဘေ လုဝ် ခမ် အီ ဟဝ် မှေတ့် ဟာဝ် ဘေ။ ဇဝ် ခေမူဆာ ဘော ဂေ ဒါ အီ လှူ ဒီ အန် ဘော ဂေ ဒါ ကာညာ အီ အိုပ် မိူင်၊ ဂေ လုဝ် ခမ် အီ ဟဝ် မှေတ့် ဟာဝ် ဂေ။

8 ဝီ အီ ဒီ ပျာတ့် တဲး န့ လိုဝ် တီ၊ အန် ဒီ ဘော တး လိုပ် ဒွန် မိူင်။ န့ မိူဝ် တူ လွတ် ခေါ အူ မိူင်။ ဒူပ် ဒီလယ့် ဒွန် ပ့လုဝ့် ဒီ လိုဝ် ကာပျာတ့်။ ခဲင် ဂ့လင် ဒွန် ပ့လုဝ့် ဒီ ဘော လိုဝ် စှိုမ်။ ခုဝ်၊ ဇဝ်ဖြာ ဟဲ့ ကာလာင် ပါယ် တီ။

9 ဒိုဝ်း ဆယ့် ဘြတ် ခဲင် မိူင် မုဝ်အာပ်။ ခုဝ်၊ မိူင် ဂေ တီ ဒီ ကာပျာတ့် လိုဝ် တူတ့်။ မိူင် ဂေ တီ ဒီ ဘော ဘဲန် မိူင် ရာမ်၊ အာဝ် မိုဝ်း ဒူအီ အီ ကွယ် နာ ခဲင်။

10 အာဆေ တူ တဲး ဘော နဝ်း ဘော ဖွိုမ် အန် ဘူင် ဂါန် ဇဝ်ဖြာ၊ အန် လုဝ် ခမ် ကာဆမ် ဒိူင်။ အာဆေ တူ တဲး မာပွါ့ လာင် အန် ငဝ်း ယမ် ဒူအီ၊ အန် လုဝ် ခမ် ကာဆမ် ဒိူင်။

11 ဆိန့် ဒီတဲတ် ဂေ၊ ဒူအီ ခဲင် မိူင် မုဝ်အာပ် ဟဲ့ လွတ် ကာဒုး အာဖေ အာရေ။ ဂေ ဘော ပွိုန် ကွယ် ဒါခိုယ်၊ ကွယ် ဂျာမ်ဆာ။ ဂေ မိူဝ် တူ ဒွိုမ် ကာဒုး အီ မှေတ့် ဟာဝ် ဂေ ပေါ အူ ပ့လုဝ့် ခေါ အူ ဇေန့်။ ဂေ ဟဲ့ ပီ အိုမ် မာငုန် ပဲ့ ဟဲ့ ဂဲပ် အုန် ဆီချာ အီ ခဲင် ပြဲန့်။ အာဝ် ဒွိုမ် မိုဝ်း အီ ဝီ ဟုး ပေါ အူ ပြဲန့်။ ဆီငဲး အန် ဆီ ကွယ် ပီ ဘြိမ်။ အုး ငှုန် အန် မိူဝ် တူ လိုဝ် တူ ဟြာယ်။”

12 ပီ ဘော ဟဲ့ ပါယ် တီ မိူဝ်၊ န့ ဒီ ဘော ဇမ် ဆီငဲ ဒီ စ်ု အုဝ် ဒီ အီ၊ တဲး န့ ပီ ဂေ တး ဟုး လေး အိုမ် မာငုန် ခဲင် ပြဲန့် တီ။ ဂေ ဒီ ဘော တး ဒိုဝ်း လေး ဒူအီ ခဲင် မိူင် မုဝ်အာပ်၊ တဲး န့ ပီ အီ ဟုး ဝဲန် ဂေ၊ ဝဲန် ဘော ကာလုဝ့် ဆီလယ့် ဂေ ဘောကာဂ့လျီတ်၊ ဝီ မး ကာလာတ့် ဘော ကာပဝ် အိုမ် ဂေ။

13 ဒူအီ မိူင် မုဝ်အာပ် ဒီ ဘော မွှိုမ် ဆာယ် ကူပ် ကြိုပ် ဂေ ဇဝ် ခေမူဆာ၊ ပီ ဂေ ဒူအီ အီဆာရေလ အီ ဟဲ့ မွှိုမ် ဆာယ် ကူပ် ဇဝ် ပီ ကြိုပ် ဂေ အီ ကွယ် ခဲင် မိူင် ဘေဒါအေန် တွိုန်။

14 ဘေ မိူဝ် ဟဲ့ တဝ်း၊ ‘ယေ နီ၊ ယေ မုး ဒူအီ အီ မိုဝ်း ပ့လူမ် တာင်။ ယေ မုး ဒူအီ အီ ကျ ဒီ ကာဂုဝ်း။’

15 ဝီ အီ ဒီ တး ပျာတ့် မိူင် မုဝ်အာပ် ဘော မိူင် အီ ကွယ် ခဲင် ကာဒါယ် မိူင် တီ၊ ဂေ ဟဲ့ ဟွတ့် တး ဇမ်။ ဂေ ဒူအီ အီ ကွယ် ခဲင် မိူင် တီ၊ ဒူအီ အီ ဆီ နှိုမ် ဘော ဂေ အီ ဆီ ကျ ဆီ မိုဝ်း ပ့လူမ် ဂေ ဟဲန့်၊ ဂေ ဒီ စှိုမ် ဒီ မာပွါ့ လာင်။ ဇဝ်ဖြာ အီ အိုပ် တူတ့် ဒွန် မျုဝ် အီ မုး ဘော ခုန်ဒီခမ် အီ အိုပ် ဒူအီ မုဝ်အာပ်၊ အန် ဟဲ့ ကာလာင် ပါယ် တီ။

16 အာဖေ အာရေ အီ ဒီ တး ခဲင် မိူင် မုဝ်အာပ် ဟဲ့ ကာတတ် ဒီ ဇမ်။ ဒုက် တာင် ပီ ဒီ လုဝ် ဂေ ခမ် မိူဝ်၊ န့ ဒီ ဘော တး ခြန် ခြန်။

17 အိုယ် ဘေ အီ ကွယ် ကာတတ် မိူင် မုဝ်အာပ် တီ ဘောကာဂ့လျီတ်၊ တဲး ဘေ က့လိုဝ် ဘော ငှုန် အာဒါ ဂေ။ ယေ အီ ဟဲ့ လာယ် နပ် ဒီ ဒူအီ ခဲင် မိူင် တီ၊ တဲး ယေ ကာလာင် ဒီ ဂေ တဝ်း၊ “ဂ့လွင့် လျီး အီ မိုဝ်း အာဖုင် ဒင်ခုဝ် ဘော န့ကြွုန် အီ ဟဲ့ ဒွိုမ် မိုဝ်း ဆာရေ အီ ဟဲ့ စှိတ် ကာဆဝ် ဟဲ့ ဟွတ့် ဝီ ကာဘက် လိုဝ်။”

18 အိုယ် ဘေ ဒူအီ အီ ကွယ် ခဲင် မိူင် ဒီဖူန်၊ တဲး ဘေ လေး ဒူင် ဘိုင် ဘေ တီ၊ ဝီ တုတ့် ဒဲင် ကာဒါယ်။ ဂေ ဒူအီ အီ ဒီ တး ဖာတ် မိူင် မုဝ်အာပ် တွိုန်၊ ဂေ ဒီ ဘော ဘူင် ကာဘး ဘော ဒီ ဘေ။ ဂေ ဒီ ဘော တး ပျာတ့် ဒူင် ချြီင် ဂေ ဒါ ဆိုက် ဘေ။

19 အိုယ် ဘေ ဒူအီ အီ ကွယ် ခဲင် မိူင် အာရော၊ တဲး ဘေ ကွယ် ခူပ် န့တေန့်၊ ဘ်ု ဒီ ယွတ်။ တဲး ဘေ ဒီမွှတ် ဂေ အီမာယ် အီ လေး တဝ် ဘော ဂေ အီဘိုန့် အီ ဟဲ့ လွတ် တး။ တဲး ဘေ တဝ်း၊ “န့ ဟဲ့ ဘုဝ် ဘဲန် မာဆေ။း”

20 ဂေ ဒီ ဘော ဝီ ကာလာင် ဒီ ဘေ တဝ်း၊ “မိူင် မုဝ်အာပ် ဟဲ့ ဟွတ့် စှိုမ် တူတ့်၊ တဲး အေ ကာဖြူမ် ဒီ ယာမ် ကူပ် မိူင် တီ။ တဲး အေ ဝီ ဟာဝ် ကာလာင် လွင် မိူင် မုဝ်အာပ် တီ ခူပ် ဘ့လဲင် အိုမ် အာရာနုန်။”

21 ဇဝ်ဖြာ ဟဲ့ ဒမ် မှာပ် ဒီ ဂေ အီ ကွယ် ခဲင် ဂ့လင် ခဲင် မိူင် ဟောလူန်၊ ခဲင် မိူင် ယာဟာတ် ဘော ခဲင် မိူင် မေဖာတ်၊

22 အန် ဟဲ့ ဒမ် မှာပ် ဘော ဒီ မိူင် ဒီဖူန်၊ မိူင် နေပေါ၊ မိူင် ဘေတီဘ့လာဆိမ်၊

23 ဒီ မိူင် ကီရီယာဆိမ်၊ မိူင် ဘေတ်ကာမူလ၊ မိူင် ဘေတ်မူင်၊

24 ဒီ မိူင် ကီရအုတ်၊ မိူင် ဘုဝ်ဇာရာ ဘော ဒီ မိူင် အီ ကွယ် ကာတူင့် ဘော အီ ကွယ် ကာတတ် ခဲင် ကာဒါယ် မိူင် မုဝ်အာပ်။

25 အာဖုင် ဒင်ခုဝ် ဂေ ဒူအီ ခဲင် မိူင် မုဝ်အာပ် ဟဲ့ ဟွတ့် ဟြာယ်၊ ဟဲ့ ဟွတ့် ကာပျာတ့်။ ပ့လူမ် ဟဲန့် ဂေ မိူဝ်၊ ဟဲ့ ဟွတ့် တူတ့်။” ဇဝ်ဖြာ ဟဲ့ ကာလာင် ပါယ် တီ။

26 ဇဝ်ဖြာ ပီ ဝီ တဝ်း၊ “ဂေ ဒူအီ ခဲင် မိူင် မုဝ်အာပ် ဟဲ့ ပီဖုင် ဂေ၊ ဟဲ့ ကာဘး ဒီ ဇဝ်ဖြာ၊ ဂေ ဟဲ့ ပီ ဒူအီ အီ ယိုတ့် ပဝ်း၊ အီ ဟဲ့ ဝီ အိတ် ခဲင် ဟိုဝ် ဂေ။ ဂေ ဒီ ဘော ဘဲန် ပီ ကာညး ပီ ဝါညာက် အီ ဟဝ်။

27 ဘေ မိူဝ် ဟဲ့ ဒွိုမ် ကာညး ဒူအီ အီဆာရေလ။ ဘေ ယီ တူ ဒွိုမ် ယိုဝ်၊ တူ ဒွိုမ် ကာတုန့် ဂေ ကွယ် ရိုမ် ဒူပ် ဒါ ဇူန် ဂေ ဒါ ပြာ။ မာလဲ၊ ဒေါ ကာလာင် ဘေ လွင် ဂေ၊ ဘေ ဘော မာဝတ် ဂိန့် ဘေ။

28 အိုယ် ဘေ ဒူအီ အီ ကွယ် မိူင် မုဝ်အာပ်၊ တဲး ဘေ ဝဲန် မိူင် ဘေ တီ၊ ဝီ ဟာဝ် ကွယ် ယာပ် မာဝ် ဂေ ယာပ် ဒီအာင်။ တဲး ဘေ ဘူင် ပီ မာဘ့လူယ် အီ ဘူင် ကာဟုန် အန် ခူပ် ဘာင် ကာဒဝ် မာဝ်။

29 ယေ ဟဲ့ ယိုဝ် လွင် ပီ ပီဖုင် ဂေ ဒူအီ အာမျုဝ် မုဝ်အာပ် ဒီ ဂေ။ ဂေ ဟဲ့ ပီခိုက် ဂေ ဘော ဘူင် မီ တဲး န့ ဘဲန် အာဂျိုဝ် ဒီ ဒုဝ် ဘြိမ် ဂေ။ ဂေ မိူဝ် ပီခိုက် ပီဖုင် ဂေ ဘော တူ မာတ် တူ ရုဝ်ဆေ အီ ဟဝ်။

30 အုဝ် ဟဲ့ နပ် လွင် တူ မာတ် တူ ရုဝ်ဆေ ဘေ အီ ဟဝ်။ ပီ ဘူင် ဘေ တီ၊ န့ ယီ တူ မိုဝ်း ဒီခုဝ် မာဆေ။” ဇဝ်ဖြာ ဟဲ့ ကာလာင် ပါယ် တီ။

31 ဇဝ်ဖြာ ပီ ဝီ တဝ်း၊ “ခုဝ်၊ အုဝ် ဘော က့လိုဝ် ဘော ငှုန် ကူပ် ဒူအီ အာမျုဝ် မုဝ်အာပ်။ အုဝ် ဘော ယာမ် ဘော ဒတ် ကူပ် ဂေ ဘော မိူင်။ အုဝ် ဘော လုဝ် က့လိုဝ် လုဝ် ငှဝ် ကူပ် ဂေ ဒူအီ ကီရဟေဆိတ်။

32 အိုယ် ဘေ အီ ကွယ် ခဲင် မိူင် ဆီဘာမာ၊ အုဝ် လုဝ် ယာမ် အာဒါ ဘေ လွှိုမ် ပီ ယာမ် အုဝ် မိူင် ယာဇေရာ တွိုန်။ ဘေ ဟဲ့ ပီ ယွုန် ဝန်။ ရျီး အန် ဂေ ရာ အန် ဟဲ့ ဇမ် ခူပ် အိုမ် နမ်မုက်ဆာရာ ဘော ဝီ ဟာဝ် ဇမ် မိူင် ယာဇေရာ။ မာလဲ၊ ဝီ အီ ဒီ ပျာတ့် ဘေ၊ အန် ဒီ ဘော တး ညဲတ့် ကေး ဘ့လေ ပီ ပိတ် ပီ ဆမ် ဘေ အီ ဟဲ့ ဆိန် ဘော ဘ့လေ မာငုန် ဘေ။

33 လွင် နာ ဘျုဝ် ဒါခိုယ် ဘော လွင် အီ တဲး ပြဲ ကာဒါယ် ဘွတ်၊ န့ ဘော ဟြာယ် ဒီ ဂ့လင် မုဝ်အာပ်။ အုဝ် ဒီ တဲး အိုမ် မာငုန် ကာဒတ် ဒီ ဒူင် ကြိတ် အီ ဘ့လေ မာငုန်။ န့ မိူဝ် တူ မိုဝ်း အာဆေ အီ ဒီ ဘျုဝ် ဒါခိုယ် ကြိတ် ဘ့လေ မာငုန်။ ဟဲ့ မိုဝ်း ဂြုဝ်း ပီ လာယ် ဒတ် လာယ် ဒဲ့ ဂေ၊ န့ ယီ တူ မုး နာ ဘျုဝ် ဒါခိုယ်။

34 ဂြုဝ်း ပီ ယာမ် ပီ ဒတ် ဂေ ဒူအီ ခဲင် မိူင် ဟေဆာဖူန် ဘော မိူင် အေလေအာလေ၊ န့ ကော လိုဝ်း ဇမ် မိူင် ယာဟာတ်။ ဂြုဝ်း ဂေ တီ န့ ဒီ ဘော ဇမ် ဘော မိူင် ဇုဝ်အာန်၊ မိူင် ဟုဝ်ရာနိမ် ဘော မိူင် အေကာလတ်ဆေလီစီယာ။ အိုမ် ဘ့လဲင် နိမ်ရိမ် မိူဝ် ဟဲ့ ဟိတ် ကာဟဝ်း။

35 ဂေ ဒူအီ အီ လှူ ပီ ဒီ လှူ ဒဲင် နွန် စာ ဘော ဂေ အီ ဒုဝ့် ဆီနမ် အုး ငှုန် ဒီ ဇဝ် ပီ ကြိုပ် ဂေ၊ အုဝ် ဒီ တဲး ဂေ ဟြာယ် ခဲင် မိူင် မုဝ်အာပ် ဘော မိူင်။

36 အုဝ် ဟဲ့ က့လိုဝ် ကာဆဝ် ကူပ် ဒူအီ ခဲင် မိူင် မုဝ်အာပ် ဘော ဒူအီ ခဲင် မိူင် ကီရဟေဆိတ် ဂေ တွိုန်။ ခဲင် နဝ်း အုဝ် န့ ပီ ဟမ် ဝဝ် အီ တူ ဒါခိုယ်။ ခုဝ်၊ ကြုဝ်ကြာမ် ပဲ့ ဟဲ့ ဂဲပ် အုန် ဂေ ဟဲ့ စှိုမ် တူတ့်။

37 ဂေ ဒူအီ ဒွန် အီ ဟဲ့ ဂါ့ ဂိန့် ဂေ၊ ဂါ့ ဒီမုဝ်း ဒီ ကုင်ကာပ် ဂေ။ ဂေ ဒွန် အီ ဟဲ့ ကြိး ဘော ဒဲ ဂေ၊ ဟဲ့ စှိုပ် ဒီ တာ ဘော ခြိုင် စာန်။

38 ခဲ့ ကွယ် ဂေ ဒူအီ ခဲင် မိူင် မုဝ်အာပ်၊ ဂေ အီ ကွယ် ဒဲင် ကာတု ကာင် ဘော ခဲ့ ကွယ် ဂေ အီ ကွယ် ဒူပ် န့တေန့် ခဲင် မိူင် ဂေ ဘောကာဂ့လျီတ်၊ ဂေ ဘော က့လိုဝ် ဘော ငှုန် ဒွန် ပ့လုဝ့် ဒွန် နာ။ ခုဝ်၊ အုဝ် ဟဲ့ တဲး မိူင် မုဝ်အာပ် ကာပျာတ့် လိုဝ်၊ တဲး န့ ပီ အီ ဆတ့် ဝဲန် ကာလုဝ့် ကာဒါယ် ပီ တူ လုဝ် တူ စ်ု အီ။” ဇဝ်ဖြာ ဟဲ့ ကာလာင် ပါယ် တီ။

39 ဂေ မိူဝ် ဟဲ့ က့လိုဝ် ဟဲ့ ငှဝ် ဘော ပိုန့် တဝ်း၊ “မိူင် မုဝ်အာပ် ဟဲ့ ဟွတ့် ကာပျာတ့် လိုဝ်။ လွင် အီ မွှိုမ် ဆာယ် မိူဝ် ဟဲ့ ဟွတ့် ဘုဝ် ဘဲန်။ မိူင် မုဝ်အာပ် ဟဲ့ ဘဲန် ပီ ကာညး ပီ ဝါညာက် အီ ဟဝ်။ န့ ဒီ ဘော မွှိုမ် ယုဝ် ကာဆဝ် ဒီ ဂေ အီ ကွယ် ကာတတ် ကွယ် ရူပ် မိူင် တီ။”

40 ဇဝ်ဖြာ ပီ ဝီ တဝ်း၊ “ဘ်ု ဘေ ယွတ်၊ ရန်ဆူ ဘေ ဂေ ဒီ ဘော တး ပီ မာဂ့လာင် ဘိုန့် တး။ န့ ပီ အန် ဒီ တာ ဖျီင် အန် ဆီဘ့လိုက် မိူင် မုဝ်အာပ်။

41 ခဲ့ ကွယ် ဒူအီ ခဲင် မိူင် ဒွန် မိူင် ဂေ ဒီ မှေတ့် ဟာဝ် တူတ့်။ ဒူင် ချြီင် ဂေ ဒါ ဆိုက်၊ ဂေ ရန်ဆူ ဒီ ပျာတ့် ဝဲန် တူတ့်။ ဆီငဲ တီ ဂေ ဒါ ဆိုက် အီ ကွယ် ခဲင် မိူင် မုဝ်အာပ်၊ ဂေ ဒီ မိုဝ်း နဝ်း ယုဝ် ကာဆဝ် ကော ပီ အီဘိုန့် အီ ဟဲ့ ကာပိုန့် ဒေါ ဒီ မိုဝ်း အန် ဂွန်။

42 မိူင် မုဝ်အာပ် ဒီ ဘော လိုဝ် ကာပျာတ့်၊ ကွဲ့ တဲး န့ ဆီ ဝီ ဘဲန် မိူင်။ ခုဝ်၊ ဂေ ဟဲ့ ကာဘး ဒီ ဇဝ်ဖြာ။

43 အိုယ် ဘေ ဒူအီ အီ ကွယ် ခဲင် မိူင် မုဝ်အာပ်၊ ဘေ လုဝ် ခမ် အီ မွှိုမ် ယုဝ် ဘော အီ မွှိုမ် ကာပိုန့်။ ဘော ကာဒဝ် ကာဒါယ် ဘော ယွတ့် ဂေ ခိူမ် ဘေ လုဝ် ခမ်။” ဇဝ်ဖြာ ဟဲ့ ကာလာင် ပါယ် တီ။

44 ဇဝ်ဖြာ ပီ ဝီ တဝ်း၊ “ဂေ ဒူအီ အီ တဝ် အီ မွှိုမ် ယုဝ်၊ ဂေ ဒီ ဘော စုဝ်း ခဲင် ကာဒဝ် ကာဒါယ်။ ဂေ အီ ပွိုန် လေး ခဲင် ကာဒဝ် ကာဒါယ်၊ ဂေ ဒီ ဘော ဝီ ခြေ ယွတ့် ခြေ ခိူမ်။ ဆီငဲ ဒီ ဒမ် အုဝ် မှာပ် ဒီ ဒူအီ မိူင် မုဝ်အာပ် ဟဲ့ ဟွတ့် ဇမ်။”

45 ဇဝ်ဖြာ ပီ ဝီ တဝ်း၊ “ဂေ ဒူအီ အီ လေး တဝ် ခဲင် မိူင် ဟေဆာဖူန်၊ ဂေ ဒီ ဘော ဒီလှး၊ တူ နပ် ပီ ဒီ ဘူင် ဂေ။ ခုဝ်၊ ငဝ် ဟဲ့ လေး ခဲင် မိူင် ဟေဆာဖူန်။ ပ့လဲ့ ငဝ် မိူဝ် လေး ခဲင် မိူင် ဆီဟူန်။ ငဝ် တီ ဘော ကာဆိုမ် ဒွန် ကာတုဝ့် ကာတျီမ် ခဲင် မိူင် မုဝ်အာပ်။ န့ ဘော ကာဆိုမ် ကာတဝ်း ဂေ ဒူအီ အီ ပီခိုက် အီ ဆီနန် ဆီနိူင်။

46 အိုယ် ဘေ ဒူအီ ခဲင် မိူင် မုဝ်အာပ်၊ ဘေ ဒီ ဇမ် ဒုက် တာင်။ ဂေ ဒီဘဲ ဒီဘာန် ဇဝ် ခေမူဆာ တွိုန် ဒီ ဘော ဟြာယ် တူတ့်။ ဂေ ဂွန် အီမာယ် ဘေ၊ ဂေ ဒီ ဘဲန် ပီ မှေတ့် ဟာဝ် အီ။ ဘော ဂေ ဂွန် အီဘိုန့် ဘေ ဒီ ဘဲန် ပီ မှေတ့် ဟာဝ် ဂေ။

47 ပီ ဘော ဟဲ့ ပါယ် တီ မိူဝ်၊ ဝါယ် နီ အုဝ် ယီ ဒီ ဝီ တဲး ဒူအီ အာမျုဝ် မုဝ်အာပ် ဝီ ကွယ် ဒါခိုယ်။” ဟဲ့ ဟွတ့် ခဲ့ တီ ပီ ဒမ် ဇဝ်ဖြာ ဒီ ဒူအီ ခဲင် မိူင် မုဝ်အာပ်။