1 အန် ဇဝ် ဝီ တဝ်း ဒီ အုဝ်၊ “အိုယ် ဂွန် ဒူအီ၊ တဲး မဲ ယိတ့် စွင့်၊ အုဝ် ဒီ ကာလာင် ဂြုဝ်း ဒီ မဲ။” 2 ဒေါ ကာလာင် အန် ဂြုဝ်း တီ၊ နဝ်း ဖွိုမ် ဇဝ်ဖြာ မိူဝ် ဟဲ့ လိုပ် ခဲင် နဝ်း အုဝ်။ န့ ဘော ဘျိတ့် တဲး အုဝ် ယိတ့်။ အုဝ် ပီ ဝီ ယိုဝ် ဂြုဝ်း ပေါ မ့ပွါ တဝ်း၊

3 “အိုယ် မဲ ဂွန် ဒူအီ၊ အုဝ် စ်ု မဲ ဟာဝ် ကာလာင် ဒီ ဂေ ဒူအီ အီဆာရေလ။ ဒူအီ ဂေ တီ ဟဲ့ မုး အာမျုဝ် အီ ကာဘး ဒီ အုဝ်။ ကော ဇမ် အာတိုဝ် ဂေ ဟဲ့ ဝီ ဘူင် ကာဘး ဒီ အုဝ် ပီ ပဲ့ ဟဲ့ ဒွိုမ် ဘူင် ဂုန့် ဒင် ဂေ။ 4 ဂေ မိူဝ် ဟဲ့ ပီ ပ့လူမ် ဒီဂတ့် နဝ်း ဂေ၊ အာဝ် ဟူ ရုဝ်ဆေ အုဝ်။ ခုဝ်၊ အုဝ် အီ မုး ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် စ်ု မဲ ကာလာင် တဝ်း၊ 5 ဒူအီ အီ အွန် ဒီ ဘူင် ကာဘး ဒီ အုဝ် တီ၊ ဂေ ဒီ ထူမ် တူ ထူမ် ဂြုဝ်း အုဝ် အာဝ် လိူက်၊ တဲး ဂေ နပ် လဲ ဟဲ့ မိုဝ်း ဒူအီ ဘျာန် ဂြုဝ်း ဇဝ်ဖြာ တး ဒူင် ကွယ် ဂေ။ 6 အိုယ် မဲ အီ မုး ဂွန် ဒူအီ၊ ကွဲ့ တဲး မဲ ယုဝ် ဂေ ဘော ဂြုဝ်း ပီ ကာလာင် ဂေ။ ဂေ ပီ ဘော ဘူင် ဒီ မဲ၊ တဲး န့ ကော ပီ မဲ ဟဲ့ ကွယ် ကာတဲ မာအာတ့် ဘော မာ မဲင်ငဝ် မိူဝ်၊ ကွဲ့ တဲး မဲ ယုဝ် ဒူအီ အီ အိုင် ဒီ ဘူင် ကာဘး ဒီ အုဝ်။ 7 ကူပ် မုး ဂေ ဒူအီ အီ အိုင် ဒီ ဘူင် ကာဘး ပါယ် တီ ဂေ ဒီ ထူမ် တူ ထူမ် ဂြုဝ်း အုဝ် အာဝ် လိူက်။ တဲး မဲ ဟာဝ် ကာလာင် လဲ ဂြုဝ်း အုဝ် ဒီ ဂေ။ 8 မဲ ဂွန် ဒူအီ၊ အီ မုး မဲ၊ တဲး မဲ ထူမ် ဂြုဝ်း ပီ ကာလာင် အုဝ် ဒီ မဲ နီ။ ကွဲ့ တဲး မဲ မိုဝ်း နဝ်း ဆီ ကာဘး ပီ ဂေ။ တဲး မဲ အာင် မူတ့် မဲ၊ ဟူမ် ပီ ဒီ ဟူမ် ပီ ဒွါ အုဝ် မဲ ဟူမ်။”

9 ဟဲ့ ဟွတ့်၊ အုဝ် ဝီ ယိုဝ် ဒဲ အူ ဘ့လာက် ဆူင့် ဒီ အုဝ်။ ခဲင် ဒဲ တီ ဟဲ့ မိုဝ်း ဆီလွယ် ပဲ့ အူ ဖိူန်။ 10 အန် ဇဝ် ဘော ဘ့လး ဆီလွယ် ပဲ့ တီ နာ အာတ့် အုဝ်။ န့ ဘော ဟဲ့ ဒဲမ် အုန် ဘော နာ ပန် နာ အာတ့်။ န့ ဘော မုး ဂြုဝ်း အီ ယာမ် အီ ငှုန်၊ ဂြုဝ်း အီ ဘဲန် နဝ်း တူ ဒါခိုယ် အီ ဘဲန် က့လိုဝ် ဘဲန် ငှဝ်။ န့ ဘော မုး ဂြုဝ်း အီ ဒီ ဘဲန် နာ စီစိဝ် ဒီလူယ်။