ဇဝ်ဖြာ ပီ ဝီ တဝ်း၊ “အိုယ် ဂွန် ဒူအီ၊ တဲး မဲ ဒိုဝ်း ဟူမ် အီ ကွယ် နာ အာတ့် မဲ။ တဲး မဲ ဒိုဝ်း ဟူမ် ဆီလွယ် ပဲ့ တီ။ ဟဲ့ ဟွတ့်၊ မဲ ဘော ဝီ ဟာဝ် ကာလာင် ဒီ ဂေ ဒူအီ အီဆာရေလ။” 2 ပါယ် တီ အုဝ် မိူဝ် အာင် မူတ့် အုဝ်။ ဇဝ်ဖြာ မိူဝ် ဟပ် ဆီလွယ် တီ ခဲင် မူတ့် အုဝ်။

3 အန် ဇဝ် ပီ ဝီ တဝ်း၊ “အိုယ် ဂွန် ဒူအီ၊ တဲး မဲ ဟူမ် ဆီလွယ် ပဲ့ ပီ ဒွါ အုဝ် မဲ ဟူမ် တီ၊ တဲး န့ ကော နုဝ့် ခဲင် ဝတ့် မဲ။” ပါယ် တီ အုဝ် မိူဝ် ဟူမ်။ န့ ဟဲ့ ငါမ် ဟဲ့ ဆီငဲး၊ န့ ပီ ငါမ် မာဖျီန်။

4 ပါယ် တီ ဇဝ်ဖြာ ပီ ဝီ တဝ်း၊ “တဲး မဲ ဟာဝ် ဒူင် ကွယ် ဂေ ဒူအီ အီဆာရေလ၊ တဲး မဲ ဟာဝ် ကာလာင် ဒီ ဂေ ဂြုဝ်း ပီ ကာလာင် အုဝ် ဒီ မဲ။ 5 အုဝ် တူ စ်ု မဲ ဟာဝ် ကာလာင် ဒီ ဒူအီ အီ ကာလာင် ဂြုဝ်း အာမျုဝ် ဟဝ် အီ ညှာပ် ထူမ်။ အုဝ် စ်ု မဲ ဟာဝ် ဒူင် ကွယ် ဂေ ဒူအီ အီဆာရေလ။ 6 ဆေ အုဝ် ယီ စ်ု မဲ ဟာဝ် ဒီ ဒူအီ အီ ကွယ် ခဲင် မိူင် တာင် အီ ကာလာင် ဂြုဝ်း အီ ညှာပ် အီ မုး ဂြုဝ်း ပီ တူ နပ် မဲ၊ ဂြုဝ်း အီ တူ ကာလှုး ဒီ နဝ်း မဲ၊ ဂေ ဒူအီ တီ ဒီ ဘော ထူမ် ဂြုဝ်း မဲ။ 7 အီ မုး ဒူအီ အီဆာရေလ အာဝ် မိုဝ်း အီ ဆီ ထူမ် ဂြုဝ်း မဲ ခေါ အူ ဝီ။ ခုဝ်၊ ဂြုဝ်း အုဝ် မိူဝ် ဂေ တူ ဆီ ထူမ် ဒေါ မှဝ်။ ဂေ မုး ဒူအီ ဒိူဝ် အီ တူ ဆီ ဘျွင် နဝ်း။ 8 အုဝ် ယီ တဲး မဲ မိုဝ်း နဝ်း တူ ယူမ် တူ ဘျွင် ပီ ဂေ။ 9 အုဝ် ဒီ တဲး နဝ်း မဲ ပ့လူမ် ပီ မာဝ်၊ တဲး န့ ဘော ပ့လူမ် လွှိုမ် မာဝ် ဆာဝ်။ ဂေ ပီ ဘော မုး ဒူအီ အီ ဆီမာ ကာဘး မိူဝ်၊ မဲ တူ လုဝ် ယုဝ် ဂေ။”

10 ဟဲ့ ဟွတ့်၊ ဇဝ်ဖြာ ပီ ဝီ တဝ်း ဒီ အုဝ်၊ “အိုယ် ဂွန် ဒူအီ၊ တဲး မဲ ထူမ် ဂြုဝ်း ပီ ကာလာင် အုဝ် ဒီ မဲ၊ တဲး မဲ အုန် ဆီချာ ခဲင် နဝ်း မဲ။ 11 ဟဲ့ ဟွတ့်၊ တဲး မဲ ဟာဝ် ဒူင် ကွယ် ဂေ ဒူအီ အာမျုဝ် မဲ အီ ဟဲ့ ကွယ် ခဲင် မိူင် ဘာဘဲ။ ဂေ ဒီ ထူမ် တူ ထူမ်၊ တဲး မဲ ကာလာင် လဲ ဒီ ဂေ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တး ကာလာင် ဒီ ဘေ။’” 12 ဒေါ အန် တီ နဝ်း ဖွိုမ် ဇဝ်ဖြာ ဘော စုဝ့် ဟာဝ် အုဝ်။ နာ ပန် အုဝ်၊ အုဝ် ဝီ ယိုဝ် ဂြုဝ်း ဆီနန် တာင် ကာဆဝ် တဝ်း၊ “တဲး အေ အိူပ် မျုက် ဇဝ်ဖြာ အီ ကွယ် ခဲင် ဂါင်ဟြာဝ်။ 13 အုဝ် ဝီ ယိုဝ် ဘော ဟမ် မာဖ့လပ် ဖျီင် ဒုဝ် အီ မိုဝ်း အာဆာက် ဂေ တွိုန်၊ ယိုဝ် ဘော ဟမ် ကာလေန့် အီ ကွယ် ခူပ် ဒုဝ် ဂေ တီ။ န့ ဘော ဟမ် တာင် ကာဆဝ် ကော ပီ ဟမ် မာအိမ် ယေန့်။ 14 နဝ်း ဖွိုမ် ဇဝ်ဖြာ ဟဲ့ ပ့လိုက် အုဝ်။ ဒေါ စုဝ့် ဟာဝ် အန် ဒီ အုဝ်၊ န့ ဘော ဘဲန် နဝ်း ဆွင့် ဘော နဝ်း မှဲ ဒီ အုဝ်။ 15 ပန် တီ အုဝ် ဘော တး ဇမ် ဒီ မိူင် ဒေလဘိပ် အီ ကွယ် ခူပ် ဘ့လဲင် ခေဘာ ဒီ ဒူင် ကွယ် ဂေ ဒူအီ အီဆာရေလ ပဲ့ ဟဲ့ မှေတ့် ဟာဝ် ဂေ။ အုဝ် မိူဝ် ကွယ် ဒူင် ကွယ် ဂေ အာဒါ ဘူ ဆီငဲ။ န့ ယီ ဆီ ဂွင့် ဒီ နဝ်း အုဝ် လွင် ပဲ့ ဟဲ့ ယိုဝ် တး အုဝ် ဂေ တွိုန်။”

16 ဟဲ့ ဟွတ့် ပွုန် ဘူ ဆီငဲ၊ ဇဝ်ဖြာ ပီ ဝီ ကာလာင် ဒီ အုဝ် တဝ်း၊ 17 “အိုယ် ဂွန် ဒူအီ၊ အုဝ် ဒီ တဲး မဲ ဘဲန် ဒူအီ အီ ဘ်ု ဂေ ဒူအီ အီဆာရေလ။ ခုဝ်၊ တဲး မဲ ဒိုဝ်း ပီ ကာလာင် အုဝ် ဒီ မဲ၊ ဝီ ဒမ် ဆာဒိက် ဒီ ဂေ။ 18 ဆေ အုဝ် ဟဲ့ ကာလာင် ဒီ ဒူအီ အူ ဝီ တဝ်း၊ ‘မဲ ဒီ ယမ် အာခါခ်ု မှာန်။’ ဆေ အုဝ် ဟဲ့ တဝ်း ပါယ် တီ၊ ဆေ မဲ ယီ တူ ဒမ် ဆာဒိက် ဒီ အန်၊ တူ ကာလာင် ဂြုဝ်း တဲး အန် ဝီ ပွိုန် ဒီ ဝး၊ ပွိုန် ဒီ ဝဲန်၊ နာ ဟာယ် နာ မိူက် အန်၊ ကွဲ့ တဲး အာဆာက် အန် စှိုမ်၊ ဒူအီ ဟာယ် တီ ဒီ ယမ် ကူပ် မှာပ် အန်။ အုဝ် ယီ ဒီ ဒမ် မှာပ် ဒီ မဲ ကူပ် ဟဲ့ ယမ် ဒူအီ တီ။ 19 ဆေ မဲ ဟဲ့ ဒမ် ဆာဒိက် ဒီ ဒူအီ ဟာယ် တီ၊ အန် ယီ တူ ဝဲန် နာ တူ မွှိုမ် ပီ ဘူင် အန်၊ အန် ဒီ ယမ် ကူပ် မှာပ် အန်။ အီ မုး မဲ၊ မဲ ယီ ဟဲ့ ဟွတ့် လွတ် ခမ် မှာပ် မဲ။

20 ဘော၊ ဆေ န့ မုး ဒူအီ အီ မိုဝ်း နဝ်း ဆိူဝ် နဝ်း မှာန်၊ ယီ ဟဲ့ ဘူင် နာ တူ မွှိုမ်၊ ဘူင် တဲး အန် ကာဒုး ဒုက်။ ဆေ မဲ တူ ဒမ် ဆာဒိက် ဒီ အန်၊ အန် ဒီ ယမ်။ အန် ဒီ ယမ် ကူပ် ဘူင် အန် နာ တူ မွှိုမ် တီ။ အုဝ် မိူဝ် တူ လှုဝ်း နာ မုး နာ မှာန် ပဲ့ ဟဲ့ ဒွိုမ် ဘူင် အန်။ အုဝ် ယီ ဒီ ဝီ ဒမ် မှာပ် ဒီ မဲ။ ကူပ် တူ ဒမ် မဲ ဆာဒိက် ဒီ အန်၊ န့ ဟဲ့ ဘာ့ ဘော မဲ လွင် ယမ် အန် တီ။ 21 ဆေ အာဝ် ပါယ် တီ မိူဝ်၊ ဆေ မဲ ဟဲ့ ဒမ် ဆာဒိက် ဒီ ဒူအီ အီ မိုဝ်း နဝ်း ဆိူဝ် နဝ်း မှာန် တီ၊ အန် ဘော ဝဲန် နာ တူ မွှိုမ် ပီ ဆီ ဘူင် အန်၊ ဆေ အန် မိူဝ် ထူမ် ဂြုဝ်း မဲ၊ အာဝ် ဟူ ဘူင် နာ တူ မွှိုမ်၊ အန် ဒီ ဘော ပွိုန် ဒီ ကွယ် ဒါခိုယ် ဂျာမ်ဆာ။ မဲ မိူဝ် ဟဲ့ ချွတ် အာဆာက် မဲ။” 22 ဒေါ အန် တီ နဝ်း ဖွိုမ် ဇဝ်ဖြာ ဟဲ့ ပ့လိုက် အုဝ်။ အုဝ် ဘော ယိုဝ် ဂြုဝ်း ဇဝ်ဖြာ ကာလာင် ဒီ အုဝ် တဝ်း၊ “တဲး မဲ ဟာဝ် ဒီ ဂ့လင် နာ ဒွယ်။ အုဝ် ဒီ ဘော ကာလာင် ဂြုဝ်း ဒီ မဲ ဒီ တီ။” 23 အုဝ် မိူဝ် ဟာဝ် ဒီ ဂ့လင် တီ။ အုဝ် ဘော ယိုဝ် အာဖုင် ဒင်ခုဝ် ဇဝ်ဖြာ အီ ပီ ပီ ဒွိုမ် ယိုဝ် အုဝ် ဒီ ဘ့လဲင် အိုမ် ခေဘာ တွိုန်။ အုဝ် မိူဝ် ဝီ မုတ် ဂိုပ် ဒီ ကာဒါယ်။

24 ပန် တီ နဝ်း ဖွိုမ် ဇဝ်ဖြာ ဘော တး လိုပ် ခဲင် ဒုဝ် ဘူင့် အုဝ်၊ ဝီ ဘျိတ့် တဲး အုဝ် ယိတ့်။ ဇဝ်ဖြာ ဝီ ကာလာင် ဒီ အုဝ် တဝ်း၊ “တဲး မဲ ဟာဝ် ကွယ် ချြီင် ခဲင် ကာင် မဲ။ 25 အိုယ် ဂွန် ဒူအီ၊ မဲ ကာဒုး အီ ဟဝ် တး ပက် အုန် မဲ၊ ကွဲ့ တဲး မဲ ပွိုန် ဒီ ဟာဝ် လဲ ဒူင် ကွယ် ဂေ ဒူအီ ကိူန်။ 26 အုဝ် ဒီ တဲး ဆီဒ မဲ ဝီ ဒိုက် ဒီ နှိုန့် မဲ၊ တဲး မဲ ရိုဝ်၊ ကွဲ့ တဲး မဲ ဆီ ပွိုန် ဒီ ဒမ် ဆာဒိက် ဒီ ဂေ ဒူအီ အီ ဘူင် ကာဘး ဂေ တွိုန်။ 27 မာလဲ၊ ပန် ဒီ ဝီ ကာလာင် အုဝ် ဂြုဝ်း ဒီ မဲ ပေါ အူ ဇေန့်၊ န့ ပီ အုဝ် ဒီ ဝိုဝ်း မူတ့် မဲ၊ တဲး မဲ ဝီ ကာလာင် ဒီ ဂေ တဝ်း၊ ‘ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ဒီ ဘေ။’ ဂေ အီ မိုဝ်း နဝ်း ဆီ ထူမ်၊ တဲး ဂေ ထူမ်။ ဂေ အီ တူ ဆီ ထူမ်၊ ကွဲ့ တဲး ဂေ ထူမ်။ ခုဝ်၊ ဂေ မုး ဒူအီ အီ အိုင် ဒီ ဘူင် ကာဘး ဒီ အုဝ် ပါယ် တီ။”