1 ဇဝ်ဖြာ ဝီ တဝ်း၊ “အိုယ် ဂွန် ဒူအီ၊ တဲး မဲ ဒိုဝ်း မာဝ် မာအုတ် အူ ဘူင့်၊ ဝီ ဒဲမ် ဒိုက် အာရိုပ် မိူင် ယေရူဆာလဲမ်။ 2 တဲး မဲ ဘူင် ဝဲင် ရူပ် မိူင် တီ၊ ဘော ဘူင် ဘ့လဝ့် န့တဲင်၊ တဲး န့ မိုဝ်း ဒူင် ကွယ် ဒါ ဆိုက် ကော ရူပ် မိူင် ဘော တဲး ဂေ ဒိုဝ်း န့ဂူင့် ဟေ၊ လာယ် ကာခပ် ရဲင် မိူင် ဒွန် ပ့လုဝ့်။ 3 ဟဲ့ ဟွတ့်၊ တဲး မဲ ဟာဝ် ဟြေတ့် တး ဘော ဒီဖ့လ ဟိန်၊ တဲး န့ ကွယ် ဒီ ကာတဲ မဲ ဂါယ် မိူင် တီ။ တဲး မဲ ဘော ဝီ မာငး ဟာဝ် နာ ကွယ် မိူင် တီ၊ တဲး မဲ ပွိုန် ဒီ ဝဲင် ရူပ် မိူင် တီ။ န့ ဘော မုး မဲ အီ ဒီ ဝဲင် ရူပ် မိူင် တီ။ အာတီ၊ တဲး န့ ဘဲန် လက်ဆာနာ ဒီ ဂေ ဒူအီ အီဆာရေလ။

4 ဝါယ် တီ တဲး မဲ ဝီ အိတ် ဆီဂေး ဘ့လာက် အာဂ။ အုဝ် ဒီ ဒိုဝ်း မှာပ် ဂေ ဒူအီ အီဆာရေလ ဝီ ဘ့လေး ဒဲင် မဲ။ မဲ လုဝ် ခမ် မှာပ် ပီ ဒမ် အီ ဒီ ဂေ တီ၊ တဲး န့ တိး ဒူပ် ဆီငဲ အိတ် မဲ တီ။ 5 ခုဝ်၊ အုဝ် ဟဲ့ ဟွတ့် တိး အုန် ဆီငဲ အန် ဒီ မဲ။ အူ ဆီငဲ၊ န့ ပီ ဝီ ဒါန် အူ ဆီနမ်။ တဲး န့ ဘော ဒူပ် ခဲ့ လုဝ် ခမ် ဂေ မှာပ် ဂေ တွိုန်။ ပါယ် တီ န့ ကွယ် အူယ် မာယဝ်း ဒီ ဒိမ် ဂိုဝ် ဆီငဲ ပီ လုဝ် ခမ် မဲ။

6 ပန် ဒီ နုဝ့် ဆီငဲ အန် တီ၊ တဲး မဲ ပီ ဝီ ကာဘ့လျီ့ အိတ်။ တဲး မဲ ဝီ အိတ် ဆီဂေး ဘ့လာက် အာအး၊ တဲး မဲ ဝီ ခမ် မှာပ် ဂေ ဒူအီ အာယူဒါ အာဒါ ဘော ဖွုန် ဂိုဝ် ဆီငဲ။ အူ ဆီငဲ အာဒါ အူ ဆီနမ်၊ တဲး ဂေ ခမ် မှာပ် ဂေ တီ။ 7 မဲ လုဝ် ဆာခိ ဒီ ယွတ် ရဲင် မိူင် ယေရူဆာလဲမ်၊ တဲး မဲ ဘူင် တဲး န့ ပီ ဒါ ဆိုက် ပီခဲပ် ဒဲ ဆီတုဝ် အန် ဆေ အန် လာယ် ကာဘး ဒီ ဂေ ဒူအီ ဟဝ်။ 8 အုဝ် ဒီ ပက် အုန် မဲ၊ ကွဲ့ တဲး မဲ ပွိုန် ဒီ ကာဘ့လျီ့ ဒုဝ် မဲ၊ တဲး န့ ကော ဇမ် ဆီငဲ ဒီ ဝဲင် ရူပ် တူတ့် မဲ မိူင် တီ ဒွန် နာ ဒွန် ပ့လုဝ့်။

9 ဒဲင် တီ၊ မဲ လုဝ် ဒိုဝ်း ဒီဂါဝ် ခဝ်ချုင်၊ ဆီဂူင့်ရာ၊ ဘ့လေ လူမ်၊ ဘ့လေ လူမ် ရေန့်၊ ဘ့လေ ဒီပါယ် ဘော ငှုဝ် ဆာပေတ်၊ ဝီ ဟပ် ခဲင် ကာလုဝ့် အူ ဘူင့်၊ ဝီ ဘူင် ဘဲန် ခါမုန်။ အာတီ တဲး န့ ဘဲန် ပီ ဒီ ဟူမ် မဲ အာဒါ အူယ် မာယဝ်း ဒီ ဒိမ် ဂိုဝ် ဆီငဲ ဒေါ အိတ် ဆီဂေး မဲ ဘ့လာက် အာဂ တွိုန်။ 10 ခါမုန် ပီ ဒီ ဟူမ် မဲ ဒွန် ဆီငဲ ဒွန် ဆီငဲ အာခြာဝ် အူ မျုဝ်၊ မဲ လုဝ် ဆ ဒီ ယွတ်။ အူ ဆီငဲ အာ ဂိုဝ် ဆေခေန် မဲ ပွိုန် ဒီ ဟူမ်။ 11 အိုမ် မိူဝ် မဲ လုဝ် ဒျီင် ဒွန် ဆီငဲ ဒွန် ဆီငဲ အာခြာဝ် အူ မျုဝ် ဘော လုဝ် ဂဝ် ဒီ ယွတ်။ မဲ လုဝ် ဒျီင် တဲး န့ မိုဝ်း ခဲ့ ပွက့်၊ အူ ဆီငဲ အာ ကွက့်။ 12 မဲ လုဝ် ဒိုဝ်း အျီင် ဒူအီ ဟပ် ခဲင် ငဝ် တဲး ကုး။ ဝီ ဒိုဝ်း ခါမုန် ဆီဂူင့်ရာ၊ တဲး န့ ဆိန် ခဲင် ငဝ် တီ။ ဟဲ့ ဟွတ့်၊ မဲ ဘော ဝီ ဟူမ် တဲး ဒူအီ ကိူန် ယိုဝ်။ 13 အာတီ န့ ဘဲန် လက်ဆာနာ ဒီ ဂေ ဒူအီ အီဆာရေလ လွင် ဂေ ဒီ ကာဒုး ဒီ ဟူမ် ပီ ဒီ ဟူမ် အီ တူ ဆီငါ ဒေါ ကွယ် ဂေ ဒူပ် ဒူအီ အာမျုဝ် ဟဝ် ဒူင် ဟဲ့ ဟုဝ် ဇဝ်ဖြာ တဲး ဂေ ဟာဝ် ကွယ် တွိုန်။” ဇဝ်ဖြာ ဟဲ့ ကာလာင် အုန် ပါယ် တီ။

14 အုဝ် မိူဝ် ပီ ဝီ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် တူ ဒွိုမ် ဘူင် တဲး ဒုဝ် ဘူင့် အုဝ် တူ ဆီငါ။ ဆိန့် ဒေါ ဒီတဲတ် အုဝ်၊ အုဝ် တူ ဒွိုမ် ဟူမ် ယင် ဒုဝ် အီ ယမ် ပီယေန့် ဘော ဒုဝ် ပီ ကဝ့် ယမ် မာဒုဝ် ပြဲ။ ဒုဝ် အီ မွှိုမ် ကာအိး မွှိုမ် ကာဒါတ့် မိူဝ်၊ အုဝ် တူ ဒွိုမ် ဘ့လိုပ် ခဲင် မူတ့် အုဝ် ဒေါ မှဝ်။”

15 ဇဝ်ဖြာ ပီ ဝီ ကာလာင် ဒီ အုဝ် တဝ်း၊ “ဟဲ့ မုး၊ အုဝ် တဲး မဲ ဒိုဝ်း အျီင် မက်၊ တဲး န့ ဝီ ကာဒါင် အျီင် ဒူအီ။ မဲ ဒီ ဒိုဝ်း အျီင် မက် ဒုဝ့် ခဲင် ငဝ်၊ ဝီ ဂိုမ် ခါမုန် မဲ။”

16 ဟဲ့ ဟွတ့်၊ ဇဝ်ဖြာ ပီ ဝီ ကာလာင် ပေါ န့ ပွါ တဝ်း၊ “အိုယ် ဂွန် ဒူအီ၊ အုဝ် တူ တဲး ပီ ဒီ ဟူမ် ခဲင် မိူင် ယေရူဆာလဲမ်။ ဒူအီ ခဲင် မိူင် တီ ဒီ ဘော ဘဲန် က့လိုဝ် ဘဲန် ငှဝ်၊ ဘဲန် ဒုက် ဘဲန် ညှာပ် ကာဆဝ် ဒီ ဂေ ဆေ ဂေ လုဝ် ဆ ခါမုန် အာဒါ ပီ ဒီ ဟူမ် ဂေ ဘော လုဝ် ဂဝ် အိုမ် ပီ ဒီ ဒျီင် ဂေ။ 17 ပီ ဒီ ဟူမ် ဂေ ဒီ ဘော တူတ့် ဘောကာဂ့လျီတ်။ န့ ဒီ ဘော ဘဲန် နဝ်း ကာဝှ်ု ကာဝျှီန် ဒီ ဂေ၊ တဲး ဂေ ဟျီ့ ကာဟဝ်း ကူပ် မှာပ် ပီ ဘူင် ဂေ။”