1 ဇဝ်ဖြာ ပီ ဝီ တဝ်း၊ “အိုယ် ဂွန် ဒူအီ၊ တဲး မဲ ဒိုဝ်း မာပွါ့ လာင် အီ လမ် လမ်၊ ဂါ့ ဟိုက် ဂိန့် မဲ ဘော ဒီမုဝ်း မဲ ဘောကာဂ့လျီတ်။ ဟဲ့ ဟွတ့်၊ မဲ ဘော ဝီ ဆ ဒဲင် လစူ၊ ဝီ ကာယဝ်း တဲး န့ ဘဲန် အူယ် ဘုန်။ 2 ဒေါ ဟဲ့ ဟွတ့် ဘျ မဲ လွင် ရန်ဆူ ဘေ ဒီ ရူပ် မိူင်၊ တဲး မဲ ဒိုဝ်း ဟိုက် ဂိန့် မဲ အာဒါ အူ ဘုန်၊ ဝီ ဒုဝ့် ကာဆိုမ် ဒဲင် မာဝ် အုတ် တွိုန် ပဲ့ ဟဲ့ ဒဲမ် မဲ မိူင် ယေရူဆာလဲမ်။ အာဒါ ပေါ အူ ဘုန်၊ တဲး မဲ ကာဇိတ့် တာ မာပွါ့ လာင်။ ဟဲ့ ဟွတ့် မဲ ကာယဝ်း ခဲင် မိူင် ဘော မိူင် ပဲ့ ဟဲ့ ဒဲမ် မဲ ဒဲင် မာဝ် အုတ်။ အာဒါ ပေါ အူ ဘုန်၊ တဲး မဲ ကာယဝ်း တဲး ခုန် ဘုတ်။ အုဝ် ဒီ ဝီ ဒိုဝ်း မာပွါ့ လာင်၊ ခုင်ခြး ဒီ ပန် ရန်ဆူ။ 3 တဲး မဲ ဝီ ဒိုဝ်း ဟိုက် ဂိန့် မဲ အီ စဲက်၊ ဝီ န့ ဒိပ် အုန် ခဲင် ခြိုင် မဲ။ 4 မဲ ပီ ဝီ ဒိုဝ်း ဟိုက် ဂိန့် အီ စဲက်၊ ဝီ ဒုဝ့် ခဲင် ငဝ်။ ငဝ် ဒီ ဘော လေး တး ဒီ တီ၊ ဝီ ဘြဲ ကာလတ့် ဒီ ဂေ ဒူအီ အီဆာရေလ ဘောကာဂ့လျီတ်။”

5 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ဘ်ု မဲ ယွတ်၊ မိူင် ယေရူဆာလဲမ် တီ အုဝ် ဒီ တဲး န့ ကွယ် ဒီ ကာတဲ။ မာန် မိူင် ဒူအီ အာမျုဝ် ဟဝ် တဲး ဂေ ဘောကာဂ့လျီတ် ရူပ် အန်။ 6 မာလဲ၊ ဒူအီ မိူင် ယေရူဆာလဲမ် တီ၊ ဂေ တူ ရုဝ်ဆေ ဒါရာ အုဝ်။ န့ ဟဲ့ လိုဝ်း ဆီချာ လွင် တူ ဒူပ် ဂေ ဒါရာ အုဝ် လွှိုမ် ဒူအီ အာမျုဝ် ဟဝ်။ ဂေ မိူဝ် တူ ထူမ် ဂြုဝ်း အုဝ် လွှိုမ် ဒူအီ အီ ကွယ် ခဲင် မာန် မိူင် အီ ကွယ် ရူပ် ဂေ။ ဂေ ဒူအီ မိူင် ယေရူဆာလဲမ် တီ၊ ဂေ ဟဲ့ ဝဲန် ဒါရာ ပီ အုန် အုဝ်။ ဂေ မိူဝ် တူ ဒူပ် န့တေန့် ပီ ကာလာင် အုဝ် ဒီ ဂေ။

7 အိုယ် ဘေ ဒူအီ ခဲင် မိူင် ယေရူဆာလဲမ်၊ ဒေါ တီ နီ၊ တဲး ဘေ ထူမ် ဂြုဝ်း ပီ ကာလာင် ဇဝ်ဖြာ အီ အိုပ် တူတ့် ဒွန် မျုဝ်။ ကူပ် တူ ထူမ် ဘေ ဂြုဝ်း အုဝ် ဘော တူ ဘူင် ဒူပ် ဘေ ဒါရာ အုဝ်၊ ဘေ ဘော ဘူင် အီ တူ မွှိုမ် လွှိုမ် ဒူအီ အာမျုဝ် ဟဝ် အီ ကွယ် ရူပ် ဘေ။

8 ကူပ် ဘူင် ဘေ ပါယ် တီ အုဝ် ဇဝ်ဖြာ အီ အိုပ် တူတ့် ဒွန် မျုဝ် ဝီ ကာလာင်၊ အုဝ် ဒီ ဝီ ဘဲန် ရန်ဆူ ဘေ။ အုဝ် ဒီ ဝီ ဒမ် မှာပ် ဒီ ဘေ နာ အာတ့် ဂေ ဒူအီ အာမျုဝ် ဟဝ်။ 9 ကူပ် ဟဲ့ ဘူင် ဘေ အာရိုပ် ပီ ကာအိး အုဝ်၊ အုဝ် ဝီ ဒမ် မှာပ် ဒီ ဘေ ပီ တူ ဒွိုမ် ဒမ် အုဝ် ဒေါ မှဝ်။ ဝါယ် နီ၊ အုဝ် မိူဝ် အာဝ် ဟူ ဝီ ဒမ် မှာပ် ဒီ ဘေ ပါယ် တီ။ 10 ပါယ် တီ ခဲင် မိူင် ယေရူဆာလဲမ် ဂေ အီ မုး ဂုန့် ဂေ ဒီ ဘော ဝီ ဟူမ် ဂွန် ဂေ။ ဂေ ဂွန် မိူဝ် ပီ ဒီ ဝီ ဟူမ် ဂုန့် ကာတဲ ဘေ။ အုဝ် ဒီ ဒမ် မှာပ် ဒီ ဘေ အီ ဆီ ဂိတ် ဆီ ကွယ်၊ တဲး ဘေ ကာယဝ်း ကာရေး ဟာဝ် ဒွန် ဘ့လာက် ဒူပ် ခုန်။ 11 ခုဝ် အန် တီ ကူပ် မုး အုဝ် ဇဝ်ဖြာ အီ မိုဝ်း အာဆာက် အိမ်၊ အုဝ် အာဝ် ဟူ ဂေဇူ ဘေ။ ကူပ် ဟဲ့ ဒိုဝ်း ဘေ အီ မွှိုမ် ကာအိး ဘော အီ မွှိုမ် ကာဒါတ့် တဲး န့ တး လိုပ် ခဲင် ဟုဝ် ဇဝ်ဖြာ၊ အုဝ် မိူဝ် တူ ကာဝေ ဘေ၊ တူ လှယ့် ဘေ ဒေါ မှဝ်။ အုဝ် ဒီ ဝဲန် ဘေ ပီ ဒူအီ အီ ဂ်ု ဝဲန် ဟေ။ 12 ဒူအီ ဘေ အူယ် ဘုန်၊ အာဒါ အူ ဘုန် ဂေ ဒီ ဘော ယမ် ဒီ ဆဝ် ရောဂါ ဘော အေတ့် ပီ ဒီ ဟူမ်။ အာဒါ ပေါ အူ ဘုန် ဒီ ဘော ယမ် ဒီ မာပွါ့ လာင် နာ ရေတ့် မိူင်။ အာဒါ ပေါ အူ ဘုန် ဒီ ကာဒဲ့ နီ၊ အုဝ် ဒီ တဲး ခုန် ဘုတ် ကာယဝ်း ကာရေး ဂေ ဟာဝ် ဒွန် ဘ့လာက်၊ ပီ ဝီ တဲး အီ ဂူင့် မာပွါ့ လာင် ဒူပ် ဒီ ပန် ဂေ။

13 ဝါယ် အန် တီ ပဲ့ ဟဲ့ ရူ ကာဆဝ် အုဝ် ဒီ ဘြေ့ ဒီ နဝ်း အုဝ်။ ဆေ ဟဲ့ ဟွတ့် ဘဲန် တူတ့် ဒွန် မျုဝ် ဒီ ဘေ၊ ဘေ ဒီ နပ် အုဝ် အီ မုး ဇဝ်ဖြာ ဟဲ့ ကာလာင် ဒီ ဘေ ကူပ် တူ ခမ် အုဝ် အီ တူ မွှိုမ် ပဲ့ ဟဲ့ ဘူင် ဘေ။

14 ဒေါ တး ဝဝ့် ဟာဝ် ဂေ ဒူအီ ဒွန် မျုဝ် အီ ကွယ် ခူပ် ဘေ၊ ဂေ ဒီ ဘော ကာညး ဘေ။ 15 ဒေါ ဟဲ့ ရူ ကာဆဝ် အုဝ် ဒီ ဘေ ဒေါ ဟဲ့ လေး ဟဲန့် ဒေါဆ အုဝ် ဘော ဒေါ ဒမ် အုဝ် မှာပ် ဒီ ဘေ တီ၊ ဂေ ဒူအီ အီ ကွယ် ခူပ် ကွယ် ရူပ် ဘေ ဂေ တီ ဂေ ဒီ ဘော ယုဝ် ကာဆဝ်။ ဂေ ဒီ ဘော ယွတ် ဘေ ဘော ကာအိး ကာဆဝ် ဘေ၊ နဲန ဘေ။ 16 အုဝ် ဒီ ပျာတ့် ဝဲန် ပီ ဒီ ဟူမ် ဘေ၊ ဘော တဲး ဘေ အေတ့် ပီ ဒီ ဟူမ်။ ဘေ ဒီ ဘော လုဝ် ခမ် ဒုက် တာင် ကာဆဝ် ကူပ် ကာပြာန့် ဘေ ပီ ဒီ ဟူမ်၊ တဲး န့ ကော ပီ ဘ့လာ အ အီ ဟဲ့ တး ဒိုဝ် တး လဝ့် ဘေ။ 17 အုဝ် ဒီ စ်ု အာဖေ အာရေ အီ တဲး ဘေ အေတ့် ပီ ဒီ ဟူမ်၊ ဘော မာဒုဝ် ပြဲ ဟာယ်၊ တး ကဝ့် ယမ် လှုက်လှာန် ဘေ ဘော ဂွန် ဘေ။ အုဝ် ဒီ စ်ု ဘော အာဖေ အာရေ အီ ဘဲန် ဆဝ် ရောဂါ၊ တဲး ဒူအီ ယမ်။ အုဝ် ဒီ တဲး အီ ယမ် ဘော ဒီ ဒါ ဆိုက် အီ ဒီ ဘော တး ငဝ်း ယမ် တူတ့် ဘေ။ အုဝ် ဇဝ်ဖြာ ဟဲ့ ကာလာင် အုန် ပါယ် တီ။”