1 ဇဝ်ဖြာ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ တဲး မဲ ယွတ် နွန် ဒူင် ကွယ် ဒူအီ အီဆာရေလ၊ ဝီ ဒမ် မှာပ် ဒီ ဂေ။ 3 တဲး ဂေ တဝ်း၊ အိုယ် ဘေ နွန် ဒူင် ကွယ် ဒူအီ အီဆာရေလ၊ တဲး ဘေ ထူမ် ဂြုဝ်း ပီ ကာလာင် ဇဝ်ဖြာ အီ အိုပ် တူတ့် ဒွန် မျုဝ်။ ဇဝ်ဖြာ ဟဲ့ ကာလာင် ဒီ နွန် ဒူင် ကွယ် ဒူအီ အီဆာရေလ ဘော ဒီ နွန် အီ တျီ့ အီ တာင် ဘော ဒူပ် ဒီလယ့် ဂေ ခဲင် ဂ့လင်။ အန် ဟဲ့ တဝ်း၊ အန် ဒီ ဘူင် တဲး ဂေ အီ ဂူင့် မာပွါ့ လာင် ဘော ဘ့လာ လျီး တး ဒူင် ကွယ် ဂေ အီ ကြိုပ် အာရိုပ် ရာင်။ 4 န့ယာင် ဖြာ ဂေ ဒီ ဘော လုဝ် ရိုတ့် ဝဲန်၊ ပျာတ့် ဝဲန်။ ကာစှူင့် ဒူင် လှူ ဂေ ဆီနမ် အုး ငှုန် ဒီ ဘော ကာဘက် ဝဲန်၊ ပျာတ့် ဝဲန် ဘောကာဂ့လျီတ်။ ဒူအီ အီ ကွယ် ဒူင် တီ၊ ဂေ ဘောကာဂ့လျီတ် ဒီ ဘော ယမ် ဒီ အာတ့် အာရိုပ် ရာင် တီ။ 5 အုဝ် ဒီ ဘော ဒိုဝ်း ဒုဝ် ယမ် ဂေ ဒူအီ အီဆာရေလ တီ၊ ဝီ ဘြတ် ဇုင်ဇဝ်း နာ အာတ့် အာရိုပ် ရာင် ဂေ တီ၊ ဝီ ဒိုဝ်း ကာအာင် ဂေ၊ ဘြတ် ဇုင်ဇဝ်း လဲပ် ရူပ် န့ယာင် ဖြာ ဂေ တီ။ 6 ခဲ့ ကွယ် မိူင် ဒီ တာင်၊ မိူင် ဒူအီ အီဆာရေလ ဘောကာဂ့လျီတ် ဒီ ဘော လိုဝ် ကာပျာတ့် တူတ့်။ ပါယ် တီ န့ယာင် ဖြာ ဂေ ဘော အာရိုပ် ရာင် ပီ ကြိုပ် ဂေ ဒီ ကာဒုး ဒီ မး တဲး န့ ကာလာတ့် တူတ့်။ ကာစှူင့် လှူ ဂေ ဆီနမ် အုး ငှုန်၊ န့ ဒီ ဘော ကာဘက် လိုဝ်။ ဘော ပီ ဘူင် ပီ ရန့် ဂေ ဒွန် မျုဝ် န့ ဒီ ဟြာယ် တူတ့်။ 7 ဒူအီ အာမျုဝ် မဲ ဂေ ဒီ ဘော ယမ် ဒွန် နာ ဒွန် ပ့လုဝ့်။ တဲး ဂေ ကော နပ် အုဝ် မုး ဇဝ်ဖြာ။

8 ပီ ဘော ဟဲ့ ပါယ် တီ မိူဝ်၊ အုဝ် ယီ ဒီ တဲး ဂေ မင် ကာလဝ့် လွတ် ယမ် ဒီ မာပွါ့ လာင် ဒေါ ကွယ် ဂေ ကာတဲ ဒူအီ အာမျုဝ် ဟဝ်။ 9 ဒူင် ဟာဝ် ကွယ် ဂေ တီ ဂေ ဒီ ဘော ဝီ လှုဝ်း အုဝ် ဘော ဝီ နပ်၊ န့ မုး အုဝ် အီ ဒမ် မှာပ် ဒီ ဂေ ဘော ဘူင် တဲး ဂေ မွှိုမ် ဆာယ်။ ကူပ် တူ မိုဝ်း ဂေ နဝ်း ဆိူဝ်၊ ဂေ ဘော ကာဒုး ဒီ လေး ဒူင် ကွယ် အုဝ်၊ ဝီ ဟာဝ် ဝုဝ် ဟာဝ် အိုင် အာရိုပ် ရာင် လွှိုမ် ဂေ ဝုဝ် ဘော အိုင် အုဝ်။ ပါယ် တီ ဂေ ဒီ ဘော ဝီ ဆာယ် ဒုဝ် ဘြိမ် ဂေ ကူပ် ဟဲ့ ဘူင် ဂေ အီ မွှိုမ် ကာအိး၊ မွှိုမ် ကာဒါတ့် တီ။ 10 ဂေ ဒီ ဘော နပ်၊ အုဝ် မုး ဇဝ်ဖြာ ဘော ဂြုဝ်း ပီ ကာလာင် အုဝ် အီ ဒွါ ဆာဒိက် အီ တဝ်း ဒီ ဒမ် မှာပ် တွိုန်၊ အာဝ် မုး ဂြုဝ်း ဒီလူယ် ဒီလာယ်။ အာဝ် မုး ဂြုဝ်း ပီယေန့် အီ တူ မှာန်။”

11 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “တဲး မဲ ဝတ် ဘင်နဝ်း မဲ ဘော ယာမ် ဒီဇုး ဒဲင် ကာဒါယ် တီ ဘော က့လိုဝ် ငှုန် ကူပ် ဟဲ့ ဘူင် ဂေ ဒူအီ အီဆာရေလ အီ မွှိုမ် ကာအိး ဘော အီ မွှိုမ် ဆာယ်။ ခုဝ်၊ ဂေ ဒီ ဘော ယမ် ကူပ် အာဖေ အာရေ အီ တး ဒီ ဒါ ဆိုက်။ ဂေ ဒီ အေတ့် ပီ ဒီ ဟူမ် ဘော မိုဝ်း ဆဝ် ရောဂါ။ 12 ဂေ အီ ကွယ် ဒူင် ကာတူင့်၊ ဂေ ဒီ ဘော ယမ် ဒီ ဆဝ် ရောဂါ။ ဂေ အီ ကွယ် ဒူင် ကာတတ်၊ ဂေ ဒီ ဘော ယမ် ဒီ မာပွါ့ လာင်။ ဂေ အီ ဆီ ဂိတ် ဆီ ကွယ် အီ ညှမ် ယမ်၊ ဂေ ဒီ ဘော ယမ် ဒီ အေတ့် ပီ ဒီ ဟူမ်။ ဂေ လုဝ် ခမ် ပဲ့ ဟဲ့ ရူ ကာဆဝ် အုဝ် ပါယ် တီ။ 13 ဒုဝ် ယမ် ဂေ ဒီ ဘော ဘုင်ဘြတ် ဇုင်ဇဝ်း ဒဲင် နွန် စာ ဘော ကာဒဲ့ နွန် ဘော ဒူပ် ကူင့် နွန် ဘောကာဂ့လျီတ်။ ဂေ ပီ ဘော ကွယ် ဒင် ဟေ ထေရေပ် တာင် ဒွန် ကာဒင် အီ မုး ဒူင် ဒုဝ့် လှူ ဂေ ပီ ဒီ လှူ ဒီ အာရိုပ် ရာင် ဒွန် နာ ဒွန် ပ့လုဝ့်။ ဝါယ် အန် တီ ဂေ ဒီ ဘော ဝီ နပ် လွင် မုး အုဝ် ဇဝ်ဖြာ။ 14 န့ ပီ အုဝ် ဒီ ဆူင့် ဒဲ အုဝ်၊ ပျာတ့် ဝဲန် တူတ့် မာန် မိူင် ဂေ။ အုဝ် ဒီ ဘူင် တဲး မိူင် ဂေ တီ ဘဲန် ဒူင် ရာမ် ဒူင် ယေန်။ န့ ဘော စုး ဒီ ပြဲ ကာဟဝ်း ကော ဇမ် ဒီ မိူင် ရီဘာလာ၊ ဟာဝ် ဘ့လာက် နာ ကွာ ဒူင် ကွယ် ဒူအီ အီဆာရေလ ဘောကာဂ့လျီတ်။ ဝါယ် အန် တီ ဂေ ဒီ ဘော ဝီ နပ်၊ အုဝ် မုး ဇဝ်ဖြာ။”