1 ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ 2 “အိုယ် ဂွန် ဒူအီ၊ ဇဝ်ဖြာ အီ အိုပ် တူတ့် ဒွန် မျုဝ် ပဲ့ ဟဲ့ ကာလာင် လွင် မိူင် အီဆာရေလ ပါယ် နီ။ အန် ဟဲ့ တဝ်း၊ ‘ဟဲ့ တူတ့် ဒွန် မျုဝ်။ ဟဲ့ ဇမ် အာခြာဝ် ပန် ဒီ တူတ့် ဒွန် မျုဝ် ခဲင် မိူင် ဘော မိူင်။’ 3 အာခြာဝ် ဒီ တူတ့် ဇာတ် နီ ဟဲ့ ဟွတ့် တး။ ဘေ ဒီ နပ် ခဲ့ ရူ အုဝ်။ အုဝ် ဒီ ဒမ် မှာပ် ဒီ ဘေ ဒူပ် ပီ ဘူင် ပီ ပါယ် ဘေ။ အုဝ် ဒီ ဘော ဒမ် မှာပ် ဒီ ဘေ၊ တဲး န့ ကာဒါန် အီ မွှိုမ် ကာအိး မွှိုမ် ကာဒါတ့် ပဲ့ ဟဲ့ ဘူင် ဘေ။ 4 အုဝ် မိူဝ် အာဝ် ဟူ လှယ့်၊ အာဝ် ဟူ ကာဝေ ဘေ ဒေါ မှဝ်။ အုဝ် ဒီ ဒမ် မှာပ် ဒီ ဘေ ဒူပ် ပီ ဘူင် ဘေ အီ မွှိုမ် ကာအိး မွှိုမ် ကာဒါတ့် ကာတဲ ဘေ တီ။ ဝါယ် အန် တီ ဘေ ဒီ ဘော နပ် လွင် မုး အုဝ် ဇဝ်ဖြာ။”

5 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ ကာလာင် ပေါ မ့ပွါ တဝ်း၊ “အာဖေ အာရေ အူ မျုဝ် ဟီ ဟွတ့်၊ ပေါ အူ မျုဝ် ပီ ဒီ ဝီ ကာပ့လုး တး။ 6 အာတီ ဟဲ့ မုး ဒီ ကာဒဲ့ တူတ့် ဒွန် မျုဝ်။ ဘေ မိူဝ် ဒီ ဟွတ့် ခဲ့ တီ။ 7 အိုယ် ဘေ အီ ကွယ် ခဲင် မိူင် တီ၊ ဝူတ် ပီ လုဝ် ခမ် ဘေ ဟဲ့ ဟွတ့် တး။ အာခြာဝ် အန် မိူဝ် ဟဲ့ ဟွတ့် ဇေ့ဇုင်။ အာခြာဝ် ဒီ တူ မိုဝ်း အီ ဒတ် အီ ဒဲ့ ဘျုဝ် ဘျုဝ် ကျဝ် ကျဝ် ဒဲင် နွန် ဟဲ့ ဟွတ့် ကာတတ် ဒီ ဇမ်။ ဘော လွင် အီ ဆီနန် ဆီနိူင် ကာဝှ်ု ကာဝျှီန် မိူဝ် ဟဲ့ ဟွတ့် ကာတတ် ဒီ ဇမ်။ 8 အာဝ် လှေန့် ဘေ လုဝ် ခမ် ပဲ့ ဟဲ့ ရူ ကာဆဝ် အုဝ်။ အုဝ် မိူဝ် ဒီ ဆုင်ဖျာတ် ဒူပ် ခဲ့ ပီ ဘူင် ဘေ။ အုဝ် မိူဝ် ဒီ ဒမ် မှာပ် ဒီ ဘေ ကူပ် ဟဲ့ ဘူင် ဘေ အီ မွှိုမ် ကာအိး ကာဆဝ်။ 9 အုဝ် မိူဝ် အာဝ် ဟူ လှယ့် အာဝ် ဟူ ကာဝေ ဘေ ဒေါ မှဝ်။ အုဝ် ဒီ ဒမ် မှာပ် ဒီ ဘေ၊ တဲး န့ ဒူပ် ခဲ့ ပီ ဒွိုမ် ဘူင် ဘေ အီ မွှိုမ် ကာအိး မွှိုမ် ကာဒါတ့်။ ဝါယ် အန် တီ ဘေ ဒီ ဘော ဝီ နပ်၊ အုဝ် ဇဝ်ဖြာ အီ ဒမ် မှာပ် ဒီ ဘေ။”

10 ဆီငဲ ဒီ တး အာဖေ အာရေ ဒီ ဒူအီ အီဆာရေလ ဟဲ့ ဟွတ့် ဇမ်။ လွင် အီ ဘူင် ကျာမ်၊ ဘူင် ကာဆဝ် မိူဝ် ဟဲ့ ဝဲ ဘြဲ ကိူန်။ လွင် အီ ပီဖုင် အီ ပီခိုက် မိူဝ် ဟဲ့ ဒုး ကာဒဲ့ အန်။ 11 လွင် အီ ဘူင် ကျာမ်၊ ဘူင် ကာဆဝ် တီ၊ န့ တဲး နာ ဟာယ် ဝဲ ကိူန်၊ ဒမ် မှာပ် ဒီ အန်။ အီ ဘဲန် နာ မိုဝ်း နာ ဘွတ်၊ ဘော မုး ကြုဝ်ကြာမ် ဘော ခါဂုန် ဂေ ဆာရေ၊ န့ တူ မိုဝ်း တူ ဂိတ် မာဆေ။ 12 အာခြာဝ် အန် ဟဲ့ ဟွတ့် တး။ ဆီငဲ အန် ဟဲ့ ဟွတ့် ဇမ်။ ဝီ အီ စိုဝ်း၊ ကွဲ့ တဲး အန် ခူယ်။ ဝီ အီ ယွင့်၊ ကွဲ့ တဲး အန် ဘဲန် နဝ်း တူ ဒါခိုယ် ဘော ဘဲန် က့လိုဝ် ဘဲန် ငှဝ်။ ခုဝ်၊ ဇဝ်ဖြာ ဟဲ့ ရူ ဒီ ဒွန် အီ။ 13 ဒူအီ အီ ဟဲ့ ယွင့် ကြုဝ်ကြာမ်၊ ယွင့် ကာဒါယ်၊ စုဝ် ဆီ အိမ် အန် နီ၊ အန် တူ ပွိုန် ဝီ ဒိုဝ်း တး ကြုဝ်ကြာမ် ပဲ့ ဟဲ့ ယွင့် ဟာဝ် အန် တီ။ ခုဝ်၊ ပီ ဘျ ဇဝ်ဖြာ ဟဲ့ မုး လွင် ဒူအီ ပီ အိုပ် အန် ဇဝ် ဘောကာဂ့လျီတ်။ အာဝ် ပွိုန် ဘျွင် ပဲ့ ဟဲ့ ဘျ အန် ဇဝ် တီ။ ကူပ် ဝူတ် ဂေ မှာပ် ပီ ဘူင် ဂေ၊ အာဝ် မိုဝ်း ခေါ အူ ဝီ အီ ပွိုန် လွတ် အာဆာက် အန်။ 14 ဂေ ဘော ဘုတ် ဝဝ် နိုင် ပဲ၊ ဂေ ဒါ ဆိုက် ရဲန် ဒီ ကာဂုဝ်း။ န့ ယီ တူ မိုဝ်း ဒါ ဆိုက် ခေါ အူ ဝီ အီ ဟာဝ် ကာဂုဝ်း။ ခုဝ်၊ ဇဝ်ဖြာ ဟဲ့ ရူ ကာဆဝ် ဒီ ဂေ ဘောကာဂ့လျီတ်။

15 နာ ရေတ့် မိူင် ဒူပ် န့တေန့် ဟဲ့ မိုဝ်း မီ ဂေ အီ လာယ် ကာဂုဝ်း၊ လာယ် ကာငဝ်း။ ခဲင် မိူင် ခဲင် ကာင် ဘော မိုဝ်း မီ ဆဝ် ရောဂါ ဘော အေတ့် ပီ ဒီ ဟူမ်။ ဝီ အီ ကွယ် ခဲင် ဂ့လင် ဘော ခဲင် ဒူင် နာ၊ အန် ဒီ ဘော ယမ် ဒီ မာပွါ့ လာင်။ ဝီ အီ ကွယ် ခဲင် ရဝ် ခဲင် မိူင်၊ အန် ဒီ ဘော ယမ် ကူပ် ဆဝ် ရောဂါ ဘော အေတ့် ပီ ဒီ ဟူမ်။ 16 ဂေ မင် အီ ဒီ ဘော တဝ် ဟုဝ့် ဒဲင် နွန် တဲး ဂေ လွတ်။ ဂေ ဒီ ဘော ပီ မာဘ့လူယ် အီ ဟဲ့ ကာစွာ၊ ဟဲ့ တဝ် တး ခဲင် ဂ့လင် ဘော ခဲင် ဒီလယ့်။ ဂေ ဘော ဝီ က့လိုဝ် ဝီ ငှဝ် ကူပ် မှာပ် ပီ ဘူင် ဂေ။ 17 န့ ပီ ဒဲ ဂေ မိူဝ် အာဝ် မိုဝ်း ပ့လူမ် ဂေ ဟဲန့်။ ဂိန့်ကြူင့် ဂေ ဒွန် အီ ဒီ ဘော ဒီယုး ဒီယေန့်။ 18 ဂေ ဒီ ဘော ဒိုဝ်း ခြိုင် စာန်၊ ဝီ ရိတ် ဒီ ညွယ် ဂေ။ ဂေ ဒီ ဘော ကာစွာ ကာပိုန့် ဆေဆေ။ ဂေ ဒီ ကာဘိတ် နာ ဂေ ကူပ် ဟဲ့ မွှိုမ် ဆာယ် ဂေ။ ဂေ မိူဝ် ဂါ့ ဂိန့် ဂေ တဲး န့ ဂ့လ။ 19 ဂေ ဒီ ဒိုဝ်း ရွိုန် ခြိဝ် ဂေ ဘြတ် ဒဲင် န့တေန့်။ ဂေ ဒီ ဘော မာတ် န့ မွှိုမ် ကာဒါတ့်။ ခုဝ်၊ ရွိုန် ခြိဝ် ဂေ တီ တူ ပွိုန် ထုတ် လေး ဂေ ကူပ် ဟဲ့ ရူ ကာဆဝ် ဇဝ်ဖြာ။ ဂေ တူ ပွိုန် ဟူမ်၊ တဲး ဝတ့် ဂေ ဖဲ။ ရွိုန် ခြိဝ် ဂေ တီ၊ န့ ဘော ဝီ တဲး ဂေ ဘူင် အီ တူ မွှိုမ်။ 20 ဒေါ မွိုန် ဂေ ဟဲ့ ပီဖုင် ဂေ ကူပ် ကြုဝ်ကြာမ် ဘော ရွိုန် ဘော ခြိဝ် ဂေ။ မာလဲ၊ ဂေ ဟဲ့ ဝီ ဒိုဝ်း ကြုဝ် ဂေ တီ၊ ဝီ ဘူင် အာရိုပ် ရာင် အီ မွှိုမ် ကာအိး ကာဆဝ်။ ကူပ် န့ ပါယ် တီ ဇဝ်ဖြာ ဝီ တဲး ကြုဝ် ဂေ တီ ဘဲန် အီ မွှိုမ် ကာဒါတ့် ဒီ ဂေ။ 21 ခုဝ်၊ ဇဝ်ဖြာ တဝ်း၊ အန် ဒီ စ်ု ဒူအီ အာမျုဝ် ဟဝ် တး ဇူန် ဂေ။ တဲး ဂေ ဒူအီ ဟာယ် တး ဖာတ်၊ တး ဒိုဝ်း ကြုဝ်ကြာမ် ဂေ။ ဟဲ့ ဟွတ့်၊ ဂေ ဘော ဝီ ဘူင် တဲး ကြုဝ်ကြာမ် ဂေ တီ ကာဒါတ့်။ 22 အုဝ် ဒီ ဘော ဝီ မာငး ပေါ အူ ဘ့လာက်၊ တဲး ဂေ ပွိုန် ဒီ လိုပ် ဘူင် အီ ကာဒါတ့် နာ ခဲင် ကာင် အုဝ် အီ ဘွတ် ကာဆဝ်၊ တဲး ဒါ ဇူန် ဘူင် အီ တူ မွှိုမ်။

23 “တဲး န့ ကော ဘဲန် မိူင် ရာမ်။ ခုဝ်၊ ခဲင် မိူင် တီ၊ ဟဲ့ မုး တူတ့် အီ လာယ် ကာငဝ်း ယမ် ဘော အီ လာယ် ခါနှာပ် ဒီလူယ်။ 24 အုဝ် ဒီ ဘော စ်ု ဒူအီ အာမျုဝ် ဟဝ် အီ ဟာယ် ကာဆဝ် တး၊ တဲး ဂေ တး ဖာတ် ဒိုဝ်း ကာင် ဘေ။ ဒူအီ ဘေ အီ ဟဲ့ မိုဝ်း ဟဲန့် လွှိုမ် အီ ဟဝ်၊ ဂေ ဒီ ဒီလှး ဒေါ စ်ု အုဝ် ဒူအီ အာမျုဝ် ဟဝ် တး ဘူင်၊ တဲး ဒူင် ကြိုပ် ဘေ ကာဒါတ့်။ 25 ဆေ အာဖေ အာရေ အီ ဒီ တဲး ဘေ လိုဝ် စှိုမ် ဟဲ့ ဟွတ့် တး၊ ဘေ ပီ ဘော ဝီ ဟြေတ့် ဒူင် ဒီ ချြီင်၊ ဒူင် ဒီ ကွယ် ဆီချာ ဘေ မိူဝ် ဘေ ယီ တူ ယိုဝ် မာဆေ။ 26 အာဖေ အာရေ အီ တဲး ဘေ လိုဝ် စှိုမ် တီ၊ အူ မျုဝ် ဟဲ့ ဟွတ့်၊ ပေါ အူ မျုဝ် ပီ ဒီ ဝီ ကာပ့လုး တး။ ဆာဒါင် လွင် နာ စီစိဝ် မိူဝ် လာယ် ဒူပ် ဘဲန် မျုဝ် ဘဲန် မျုဝ်။ ဘေ ဒီ ဘော ဝီ ဟြေတ့် ပီ ဘျ ဇဝ်ဖြာ ဒီ ဒါ အီ ဘျာန် ဂြုဝ်း ဇဝ်ဖြာ။ မာလဲ၊ ဂေ ဒါ အီ လှူ ဒီ ဇဝ်ဖြာ ယီ တူ ပွိုန် ဟုဝ် ဒါရာ။ ဘော ဂေ ဒူအီ ကတ် ဒူအီ ဂဲ မိူဝ်၊ အာဝ် မိုဝ်း အီ ထူမ် အာကျာမ် အာငျာန် ဂေ။ 27 ခုန်ဒီခမ် ဒီ ဘော က့လိုဝ် ဘော ငှုန်။ ဂေ ဂွန် ခုန်ဒီခမ် အာဝ် ဟူ မိုဝ်း ပီ ခြာမ် ပီ နှဝ့် န့ဒဝ့်။ ဂေ ဒူအီ ရဝ် ဒူအီ ကာင် ဒီ ဘော ဒီယုး ဒီယေန့် ဒီ ယုဝ်။ အုဝ် ဒီ ဒမ် မှာပ် ဒီ ဘေ၊ တဲး န့ ဒူပ် ခဲ့ ပီ ဒွိုမ် ဘူင် ဘေ။ အုဝ် ဒီ ဝီ ဆုင်ဖျာတ် အာမူ ဘေ၊ တဲး န့ ပီ ပဲ့ ဟဲ့ ဆုင်ဖျာတ် ဘေ အာမူ အီ ဟဝ် တွိုန်။ လွင် အန် တီ န့ ဒီ ဘော ဘျ တဲး ဘေ နပ် ဆီချာ အုဝ် မုး ဇဝ်ဖြာ။”