1 ဒေါ ဟဲ့ ဇမ် ဒဝ် ဆီနမ်၊ ဒေါ မုး မာဂျီန် န့ဒဝ်၊ ဆီငဲ မ့ဖန် ဒေါ ကွယ် အုဝ် ခဲင် ကာင် အုဝ် ဒူပ် ဂေ ဒါ တာင် အီ ယဲတ့် ဂေ ဒူအီ အာယူဒါ၊ အာဖုင် ဒင်ခုဝ် ဇဝ်ဖြာ အီ အိုပ် တူတ့် ဒွန် မျုဝ် ဘော တး ပ့လိုက် အုဝ်။ 2 အုဝ် ဝီ ယွတ် ဘော ယိုဝ် ငဝ် အီ ပီ အာရိုပ် ဒူအီ။ စုး ဒီ ညွယ် အန် လူင် နာ ခြိုမ်၊ န့ ဘော ပီ ငဝ်။ ဒိုဝ်း ပုင် ညွယ် အန် ဟုဝ့် နာ ဒဲင်၊ န့ ဘော ကာလ မာဘြိဝ် ပီ ဘွင့် ဒေန့် ပဲ့ ဟဲ့ ဟွတ့် ဖ အီ။ 3 အန် ဘော ဆူင့် လေး အီ ပီ ဒဲ ဘော ဆီစူမ် ဟိုက် ဂိန့် အုဝ်။ နဝ်း ဖွိုမ် ဇဝ်ဖြာ ဘော စုဝ့် ဟုဝ့် အုဝ် ခဲင် ဒီဝူင့် အီ စာ ကာဆဝ်၊ ဝီ တဲး အုဝ် ယိုဝ် ဇဝ်ဖြာ ဘော ဝီ ဒိုဝ်း ဟာဝ် အုဝ် ခဲင် မိူင် ယေရူဆာလဲမ်။ ဟဲ့ ဟွတ့် ဘော ဝီ ဟာဝ် ဘ့လေး အုဝ် ဒီ ဘာင် မာလုဝ်း ဘူင့် ခဲင် ဒူင် ကွယ် မာလုဝ်း တာင် ဘ့လာက် နာ ကွာ ဟုဝ် ဇဝ်ဖြာ ဒူင် မိုဝ်း အာရိုပ် ရာင် အီ ကာဆုး တဲး ဇဝ်ဖြာ ရူ။ 4 ဒူင် တီ အုဝ် ဝီ ယိုဝ် အာဖုင် ဒင်ခုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ။ န့ ဘော ပီ ပဲ့ ဟဲ့ ဒွိုမ် ယိုဝ် အုဝ် ခူပ် အိုမ် ဘ့လဲင် ခေဘာ တွိုန်။

5 အန် ဇဝ် ဝီ ကာလာင် ဒီ အုဝ်၊ “အိုယ် ဂွန် ဒူအီ၊ တဲး မဲ ဝီ မာငး ယွတ် ဘ့လာက် နာ ကွာ။” ပါယ် တီ အုဝ် ဝီ ယွတ်၊ အုဝ် ဘော ယိုဝ် အာရိုပ် ရာင် အီ ကာဆုး တဲး ဇဝ်ဖြာ ရူ။ အန် ဟဲ့ ဝီ ကွယ် ခူပ် ကာစှူင့် လှူ အီ ကွယ် ခူပ် မာလုဝ်း တာင် တွိုန်။

6 ဇဝ်ဖြာ ပီ ဝီ ကာလာင် ဒီ အုဝ် ပေါ မ့ပွါ တဝ်း၊ “အိုယ် ဂွန် ဒူအီ၊ မဲ ဟဲ့ ယိုဝ် လွင် အန် တီ။း ယွတ်၊ ခဲ့ ပီ ဘူင် ဂေ ဒူအီ အီဆာရေလ အီ မွှိုမ် ကာအိး။ န့ ပီ ဂေ ဟဲ့ ဟုဝ် တဲး အုဝ် လေး ဟာဝ် တူင့် ခဲင် ဒူင် ကွယ် အုဝ် အီ ဆီငါ ဘွတ်။ မဲ ဒီ ဝီ ယိုဝ် အီ မွှိုမ် ကာအိး လွှိုမ် အာတီ။”

7 အန် ဇဝ် ပီ ဝီ ဒိုဝ်း ဟာဝ် အုဝ် ဒီ ဘာင် မာလုဝ်း အီ ကွယ် ဒီ ဝဲင် ဟုဝ် ဇဝ်ဖြာ။ အန် ဘော တဲး အုဝ် ယိုဝ် ကာဒဝ် ဒီ ရဲင်။ 8 အန် ဇဝ် ဝီ တဝ်း ဒီ အုဝ်၊ “တဲး မဲ ပျာတ့် ဒီ လိုပ် ခဲင် ကာဒဝ် ရဲင် တီ။” ပါယ် တီ အုဝ် မိူဝ် ပျာတ့် လိုပ် ခဲင် ကာဒဝ် ရဲင် တီ၊ အုဝ် ဘော ဝီ ယိုဝ် မာလုဝ်း။

9 အန် ဇဝ် ပီ ဝီ ကာလာင် ဒီ အုဝ် ပေါ န့ ပွါ တဝ်း၊ “တဲး မဲ လိုပ် ဟာဝ် ယွတ် အီ ဟာယ် အီ ဟဲ့ မွှိုမ် ကာအိး ကာဆဝ် ပဲ့ ဟဲ့ ဘူင် ဂေ ဒူင် တီ။” 10 အုဝ် မိူဝ် လိုပ် ဟာဝ် ဘော ယိုဝ် ဒီ ရဲင် ဒွန် ပ့လုဝ့်၊ ဟဲ့ ဒဲမ် အုန် ရာင် မာဟန့်၊ ရာင် ဒုဝ် ဆတ်ဒါဝါ အီ မွှိုမ် ကာအိး၊ ဘော အာရိုပ် ရာင် ပီ ကြိုပ် ဂေ ဒူအီ အီဆာရေလ ဘောကာဂ့လျီတ်။ 11 ဂေ အီ မုး ဒါ တာင် အီ အိုပ် အီ ယဲတ့် ဂေ ဒူအီ အီဆာရေလ ဘူ ဂိုဝ် ဝီ၊ ဂေ ဘော ကွယ် ဒီ တီ။ အာစာရာယာ အီ မုး ဂွန် အာဆာဖာန်၊ အန် မိူဝ် ကွယ် ကာတဲ ဂေ တီ။ ခဲင် ဒဲ ဂေ ဒွန် အီ န့ ဘော မိုဝ်း ဆီလယ့် ပီ ဒုဝ့် ဂေ ဆီနမ် အုး ငှုန်၊ တဲး အုး ငှုန် အန် ဟုဝ့် နာ ဒဲင်။

12 ဟဲ့ ဟွတ့်၊ အန် ဇဝ် ပီ ဝီ တဝ်း ဒီ အုဝ်၊ “အိုယ် ဂွန် ဒူအီ၊ မဲ ဟဲ့ ယိုဝ် ပီ ဘူင် ဂေ ဒါ တာင် အီ အိုပ် ဒူအီ အီဆာရေလ။း မဲ ဟဲ့ ယိုဝ် ပီ ကွယ် ဂေ ခဲင် အပ် ဝွင့် ရာင် အာဆေ ရာင် အန်။း ဂေ ဟဲ့ ကာဖြူမ် ဒီ ကြိုပ် ခဲင် ဟူင် ဒူင် ကွယ် နုဝ့် အာရိုပ် ရာင် တီ။ ဂေ မိူဝ် ဟဲ့ တဝ်း၊ ‘ဇဝ်ဖြာ တူ ယိုဝ် အေ။ အန် ဇဝ် ဟဲ့ ဟွတ့် ဝဲန် မိူင် နီ။’” 13 ဇဝ်ဖြာ ပီ ဝီ ကာလာင် ဒီ အုဝ် တဝ်း၊ “မဲ ဆီ ဒီ ယိုဝ် လွင် အီ မွှိုမ် ကာအိး၊ အီ ဆီ ဒီ မွှိုမ် ကာအိး လွှိုမ် ပီ ဘူင် ဂေ တီ။း” 14 ပါယ် တီ အန် ဇဝ် ဘော ဝီ ဒိုဝ်း ဟာဝ် အုဝ် ဒီ ဘာင် မာလုဝ်း ဟုဝ် ဇဝ်ဖြာ အီ ကွယ် ဘ့လာက် နာ ကွာ။ ဒူင် တီ အုဝ် ဝီ ယိုဝ် ဂေ အီဘိုန့် ဟဲ့ ကွယ် ဒီ တီ၊ ကာဖြူမ် ဒီ ယာမ် ကူပ် ဇဝ် ဒမ်မု။ 15 ဇဝ်ဖြာ ပီ ဝီ တဝ်း ဒီ အုဝ်၊ “အိုယ် ဂွန် ဒူအီ၊ မဲ ဟဲ့ ယိုဝ် လွင် အန် တီ။း မဲ ပီ ဆီ ဒီ ဝီ ယိုဝ် အီ မွှိုမ် ကာအိး အီ ဆီ လွှိုမ် တီ။”

16 ပါယ် တီ အန် ဇဝ် ဝီ ဒိုဝ်း ဟာဝ် အုဝ် ခဲင် ဝဲင် ဟုဝ် ဇဝ်ဖြာ အီ ကွယ် နာ ခဲင်။ ဒီ ဘာင် မာလုဝ်း အီ လိုပ် ဒူင် ဆီငါ ဘွတ်၊ အီ ကွယ် ဒီ ကာတဲ ကာစှူင့် လှူ ဂါယ် ဒီဂြး ခဲင်၊ န့ မိုဝ်း ဂေ အီမာယ် အာ ဂိုဝ် ဒီ ဖန် ဝီ။ ဒူအီ ဂေ တီ၊ ဂေ ဝီ ဒိန့် ကာတု ဂေ ဒီ ဒူင် ဆီငါ ဘွတ်၊ ဝီ မာငး လေး နာ လေး ဆီငဲ။ ဂေ ဝီ မုတ် ကြိုပ် ဆီငဲ အီ ဟဲ့ လေး တး။

17 ဟဲ့ ဟွတ့်၊ ဇဝ်ဖြာ ပီ ဝီ တဝ်း ဒီ အုဝ်၊ “အိုယ် ဂွန် ဒူအီ၊ မဲ ဟဲ့ ယိုဝ် လွင် အန် တီ။း ဂေ ဒူအီ အာယူဒါ ဟဲ့ ဘူင် အီ မွှိုမ် ကာအိး ပါယ် တီ ဒီ တီ။ ဂေ မိူဝ် ဟဲ့ ဘူင် တဲး မိူင် ပီ အိုပ် အုဝ် ဘဲန် တူတ့် အီ တူ မွှိုမ်။ န့ ညှမ် ဘြေ့ ဒီ နဝ်း ဂေ။ ဂေ ယီ ဝီ ကာဖြူမ် ဒီ ဘူင် အီ တူ မွှိုမ် တီ ခဲင် ဟုဝ် အုဝ်၊ တဲး န့ ကာဆုး နဝ်း ရူ အုဝ်၊ တဲး န့ ဝဲ ကိူန် ဝဲ တာင်။ ဘေ ယွတ်၊ ခဲ့ ပီ ပွိုန် ဘူင် ဂေ။ ဂေ ဘူင် တူတ့် အီ ဒီ ကာဆုး နဝ်း အုဝ် အီ ဒီ ပျာတ့် တဲး အုဝ် ဝဲ ရူ ကာဆဝ်။” 18 ဂေ လုဝ် ခမ် ခဲ့ ပဲ့ ဟဲ့ ရူ ကာဆဝ် အုဝ်။ အုဝ် မိူဝ် ဒိူန် တူ လှယ့်၊ ဒိူန် တူ ကာဝေ ဂေ ဒေါ မှဝ်။ ဂေ ပီ ဘော ဒတ်၊ ပီ ဘော ရျီင် ဒဲ့ အုဝ် မိူဝ်၊ အုဝ် တူ ထူမ်၊ တူ တဲး အုဝ် ယိုဝ် ဂြုဝ်း ဂေ။