1 ပန် တီ အုဝ် ဝီ ယိုဝ် ဇဝ်ဖြာ ဒတ် တာင် ကာဆဝ်။ အန် တဝ်း၊ “အိုယ် ဘေ အီ လုဝ် ဒမ် မှာပ် ဒီ အီ၊ တဲး ဘေ တး ဒီ နီ၊ တဲး ဘေ ဒိုဝ်း တး ဘော ခြိုင် ကာဂုဝ်း ဘေ။ 2 ဒေါ အန် တီ အူ ဇေန့်၊ အုဝ် ဘော ယိုဝ် အီမာယ် ဒဝ် ဝီ လေး တး ဂူင့် ဘော ခြိုင် ကာဂုဝ်း အီ နပ် ဒီ ငဝ်း ဒူအီ။ ဂေ ဘော တး ဒီ ဘာင် မာလုဝ်း အီ ကွယ် ဘ့လာက် နာ ကွာ ဟုဝ် ဇဝ်ဖြာ တွိုန်။ န့ မိူဝ် မိုဝ်း အီမာယ် အူ ဝီ၊ အီ လေး တး ဒူပ် ဂေ။ အန် ဘော စှိုပ် ဒီ တာ ခြိုင် ကာတမ် လုယ်၊ ဝီ ဂူင့် ဘော အိုမ် မိုက် ဘော မင် ဒဲမ်၊ တဲး အန် ပွိုန် ဒီ ဒဲမ် အုန်။ ဒူအီ ဂေ တီ ဘော တး စွင့် ခူပ် ကာစှူင့် လှူ အီ မုး ဘွင့် ဒေန့်။”

3 ဒေါ အန် တီ အာဖုင် ဒင်ခုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဒူအီ အီဆာရေလ အီ ကွယ် ဒူင် တီ ဘော လေး တး ဒီ အာမူ အာမာတ် ဇဝ်ဖြာ အီ စိူဝ် ခေရုပ် တွိုန်။ အန် ဝီ ကာထုဝ့် ဟာဝ် ဒီ မာလုဝ်း ဒီ ဟုဝ် ဇဝ်ဖြာ။ ဇဝ်ဖြာ ဝီ ဒဲ့ ဝီ အီ တာ ခြိုင် ကာတမ် လုယ် တွိုန်၊ တဲး အန် ဂူင့် ဘော အိုမ် မိုက် ဘော မင် ဒဲမ် အန်၊ တဲး အန် ပွိုန် ဒီ ဒဲမ် အုန်။ 4 ဇဝ်ဖြာ ဝီ ကာလာင် ဒီ အန် တဝ်း၊ “တဲး မဲ ဟာဝ် ဝိန် ဒီလဲ ခဲင် မိူင် ယေရူဆာလဲမ် ဘော မိူင်။ ဟဲ့ ဟွတ့်၊ တဲး မဲ နုဝ် ဂေ အီ ဟဲ့ က့လိုဝ် ဟဲ့ ငှဝ် ဘော ယာမ် ကူပ် ပီ ဘူင် ဂေ အီ မွှိုမ် ကာအိး ခဲင် မိူင် တီ၊ တဲး မဲ မှာယ် အုန် ဒီ ကာတဝ်း ဂေ။”

5 ဟဲ့ ဟွတ့်၊ အုဝ် ပီ ဝီ ယိုဝ် ဇဝ်ဖြာ ကာလာင် ဒီ ဂေ ဒဝ် ဝီ တွိုန်။ အန် တဝ်း၊ “တဲး ဘေ ဟာဝ် ဒူပ် ဒီ ပန် အန်၊ တဲး ဘေ ငဝ်း ယမ် တူတ့် ဂေ ဒူအီ ခဲင် မိူင် နီ။ ကွဲ့ တဲး ဘေ လှယ့် ဂေ ခေါ အူ ဝီ ဘော ကွဲ့ တဲး ဘေ ကာဝေ ဂေ ဒေါ မှဝ်။ 6 တဲး ဘေ ငဝ်း ယမ် ဘော ဒူအီ ကတ် ဘော ကာညူမ် ဒီဘျာ၊ ဘော ယာ ဘာနှိုမ် ဂေ ဂွန် င။ မာလဲ၊ အီ မုး ဂေ အီ ဟဲ့ ဟွတ့် မှာယ် ဒီ ကာတဝ်း တွိုန်၊ အာဝ် လုဝ် ဒိုဝ်၊ အာဝ် လုဝ် ဘ့လတ့် ဂေ။ တဲး ဘေ ကာစုး ဒီ ငဝ်း ဂေ အီ ကွယ် နာ အာတ့် ဟုဝ် ဇဝ်ဖြာ။” ပါယ် တီ ဂေ မိူဝ် ကာစုး ဒီ ငဝ်း ယမ် ဒါ တာင် အီ ကွယ် နာ အာတ့် ဟုဝ် ဇဝ်ဖြာ။

7 အန် ဇဝ် ပီ ဝီ ကာလာင် ဒီ ဂေ ပေါ မ့ပွါ တဝ်း၊ “ဘူင် တဲး န့ ကာဒါတ့် ခဲင် ဟုဝ် ဇဝ်ဖြာ၊ တဲး ဒုဝ် ယမ် ဂေ တီ ကော နုဝ့် ခဲင် ဝဲင် ဟုဝ် ဇဝ်ဖြာ တီ။ ဟာဝ်၊ တဲး ဘေ ဟာဝ် ဘူင် ဂါန် တီ။” ပါယ် တီ ဂေ မိူဝ် ဟာဝ် စုး ဒီ ငဝ်း ယမ် ဒူအီ ခဲင် မိူင်။ 8 ဒေါ ငဝ်း ယမ် ဂေ ဒူအီ တီ၊ အုဝ် မိူဝ် ကွယ် ရာင် အုဝ် အူ ဝီ။ အုဝ် မိူဝ် ဝီ မုတ် ဂိုပ် ဘော ဒတ် ဒဲ့ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ မဲ ဇဝ် ဟဲ့ တဲး နဝ်း ရူ မဲ လေး ဟဲန့် ကာဆဝ် ဒီ မိူင် ယေရူဆာလဲမ်။ မဲ ဇဝ် ဒီ ဘော ငဝ်း ဝဲန် တူတ့် ဂေ ဒူအီ အီဆာရေလ အီ ဆီ ဂိတ် ဆီ ကွယ်။း”

9 ပန် တီ ဇဝ်ဖြာ ဝီ တဝ်း ဒီ အုဝ်၊ “မှာပ် ဒူအီ အီဆာရေလ ဂါယ် ဒူအီ အာယူဒါ ဟဲ့ ကိူန် ဟဲ့ တာင် ကာဆဝ်။ ဂေ ဟဲ့ လာယ် ကာဂုဝ်း လာယ် ကာငဝ်း ယမ် ခဲင် မိူင် နီ ဘော မိူင်။ ဂေ ဟဲ့ ဘူင် အီ တူ မွှိုမ် ဒီလူယ်၊ တူ ဒူပ် ဒါရာ။ ဂေ ပီ ဝီ တဝ်း၊ ‘ဇဝ်ဖြာ ဟဲ့ ဟွတ့် ဝဲန် မာန် မိူင် အန်။ အန် မိူဝ် တူ ယွတ် အေ၊ တူ ယိုဝ် ပီ ဘူင် အေ။’ 10 ကူပ် န့ ပါယ် တီ အုဝ် မိူဝ် တူ လှယ့် ဂေ၊ တူ ကာဝေ ဂေ ဒေါ မှဝ်။ အုဝ် ဒီ ဘူင် ဒီ ဂေ တဲး န့ ပီ ပီ ဘူင် ဂေ ဒီ အီ ဟဝ်။”

11 ဟဲ့ ဟွတ့် ပါယ် တီ ဝီ အီ တာ ခြိုင် ကာတမ် လုယ် တွိုန်၊ အန် ဝီ တး ကာလာင် ဒီ ဇဝ်ဖြာ တဝ်း၊ “အုဝ် ဟဲ့ ဟွတ့် ဘူင် တူတ့် ခဲ့ ပီ ကာလာင် မဲ ဇဝ်။”