1 ခုန်ဒီခမ် အာနေဘူခတ်နေစာ ဘော ဒိုဝ်း ခြိဝ်၊ ဘူင် အာရိုပ် တာင်။ နာ စာ အန် ဒဝ် ဂိုဝ် ကာနိး။ နာ ကာဝဝ်း အန် ဒဝ် ကာနိး။ အန် မိူဝ် ဘ့လေး အုန် ခဲင် ဂ့လင် အီ စိူဝ် တူရာ ခဲင် မိူင် ဘာဘဲ တွိုန်။ 2 ခုန်ဒီခမ် မိူဝ် ဒွါ အာမိင် ဒီ ဂေ ဒါ ကာညာ အီ အိုပ် မိူင်၊ ဂေ ဒါ တာင် အီ ဂဲပ် ရွိုန် စိုင်၊ ဒါ တာင် အီ အိုပ် ဘဲန် မျုဝ် ဘဲန် မျုဝ် ဘော ဒါ အီ ဒွါ အာကျာမ် အာငျာန်၊ ဒါ အီ အိုပ် ရွိုန် ဂေ ခြိဝ်၊ ဒါ အီ ဆုင်ဖျာတ် ဒါရာ၊ အာမူ အာမာတ် ဘဲန် မျုဝ် ဘဲန် မျုဝ် ဘော ဒီ ဒါ တာင် ဒွန် အီ အီ ကွယ် ခဲင် မိူင် ပီ အိုပ် အန်။ အန် စ်ု တဲး ဂေ တး ကာဇု ဒေါ ဘူင် အန် ဘ့လွယ် စုး ဒီ ကြိုပ် အာရိုပ် ရာင် ပီ ဘ့လေး အုန် အန် တွိုန်။ 3 ဂေ ဒါ ကာညာ အီ အိုပ် မိူင် ဘော တး ကာဇု ဒီ အာတ့် အာရိုပ် ရာင် တာင် တွိုန်။ န့ မုး ဘော ဒါ တာင် အီ ဂဲပ် ရွိုန် စိုင်၊ ဒါ တာင် အီ အိုပ် ဘဲန် မျုဝ် ဘဲန် မျုဝ်၊ ဒါ တာင် အီ ဒွါ အာကျာမ် အာငျာန်၊ ဂေ ဒါ တာင် အီ အိုပ် ရွိုန် ဂေ ခြိဝ်၊ ဒါ အီ ဆုင်ဖျာတ် ဒါရာ၊ အာမူ အာမာတ် ဘဲန် မျုဝ် ဘဲန် မျုဝ် ဘော ဒါ တာင် ဒွန် အီ အီ ကွယ် ခဲင် မိူင် ပီ အိုပ် အန်။

4 ဒူအီ အီ ကာလာင် ဂြုဝ်း တာင် တဝ်း၊ “အိုယ် ဘေ ဒူအီ ဒွန် ဇိုဝ် ဒွန် မျုဝ် ဘော ဘေ ဒူအီ အီ ကာလာင် ဂြုဝ်း မျုဝ် မှဝ် မျုဝ် အန်၊ ခုန်ဒီခမ် ဟဲ့ စ်ု ဘေ ဘူင် ပါယ် နီ။ 5 ဆေ ဘေ ဟီ ယိုဝ် ဟမ် ဘုတ် ဝဝ် နိုင် ပဲ၊ ဟမ် ဘုတ် ဝဝ် ဘော ဟမ် ဒိင်၊ ဟမ် ဒိင် ဒီရဝ်၊ ဟမ် ဂြိုင် ဘော ဟမ် ပီ ဒွယ် ပီ ဘး ဘဲန် မျုဝ် ဘဲန် မျုဝ်၊ ဘေ လုဝ် မုတ် ဂိုပ်၊ ကြိုပ် အာရိုပ် ခြိဝ် ပီ ဘ့လေး အုန် ခုန်ဒီခမ် အာနေဘူခတ်နေစာ။ 6 အာဆေ ယီ တူ ဂူမ် တူ ကြိုပ်၊ လုဝ် ဒိုဝ်း ဘျွာ လူင် အန် ခဲင် ဖုဝ် ငဝ် အီ ဟဲ့ ကုး တာင် ကာဆဝ်။”

7 ဟဲ့ ဟွတ့် ကာလာင် ပါယ် တီ ဒေါ ယိုဝ် ဂေ ဟမ် ပီ ဒွယ် ပီ ဘး ဘဲန် မျုဝ် ဘဲန် မျုဝ် တွိုန်၊ ခဲ့ ကွယ် ဒူအီ ဒွန် ဇိုဝ် ဒွန် မျုဝ် အီ ကာလာင် ဂြုဝ်း မျုဝ် မှဝ် မျုဝ် အန်၊ ဂေ ဘောကာဂ့လျီတ် ဝီ မုတ် ဂိုပ် ကြိုပ် အာရိုပ် ရာင် ပီ ဘ့လေး အုန် ခုန်ဒီခမ် အာနေဘူခတ်နေစာ တွိုန်။

8 ဒေါ အန် တီ ဂေ ဒူအီ မိူင် ဘာဘဲ ဝီ ဆီ ဖျာက် ဒူအီ အာယူဒါ။ 9 ဂေ ဝီ ကာလာင် ဒီ ခုန်ဒီခမ် အာနေဘူခတ်နေစာ တဝ်း၊ “တဲး မဲ ခုန်ဒီခမ် တာင် မိုဝ်း အာဆာက် တူင့်၊ ကွယ် ဆေဆေ။ 10 မဲ ခုန်ဒီခမ် ဟဲ့ ဘ့လေး အာမိင် တဝ်း၊ ‘ဆေ ဟီ ယိုဝ် ဟမ် ဘုတ် ဝဝ်၊ ဘး ဒိင်၊ က်ု ပီ ဒွယ် ပီ ဘး ဒွန် မျုဝ်၊ ဒူအီ ဒွန် အီ လုဝ် မုတ် ဂိုပ် ကြိုပ် အာရိုပ် ခြိဝ် တွိုန်။ 11 ဝီ မှဝ် တူ မုတ် ဂိုပ် ကြိုပ် လုဝ် ဒိုဝ်း ဘျွာ လူင် အန် ခဲင် ဖုဝ် ငဝ် အီ ဟဲ့ ကုး တာင်။’ 12 န့ ယီ မိုဝ်း ဒူအီ အာယူဒါ မင် အီ။ မဲ ခုန်ဒီခမ် ဟဲ့ တဲး ဂေ ဘဲန် ဒူအီ အီ အိုပ် ခဲင် မိူင် ဘာဘဲ။ ဂေ စိူဝ် အာဆာတာရိက်၊ အာမေဆိက် ဘော အာဘေတ်နေကုဝ်။ ဂေ တူ ထူမ် အာမိင် ပီ ဒွါ မဲ ခုန်ဒီခမ်။ ဂေ မိူဝ် တူ ကြိုပ် ဇဝ် ဘဲန် မျုဝ် ဘဲန် မျုဝ် ပီ ကြိုပ် မဲ ခုန်ဒီခမ် ဘော တူ မုတ် တူ ဂူမ် ဒီ အာတ့် အာရိုပ် ခြိဝ် ပီ ဘ့လေး အုန် မဲ ခုန်ဒီခမ်။”

13 ပါယ် တီ ခုန်ဒီခမ် မိူဝ် ရူ ကာဆဝ်။ အန် စ်ု ဂေ ဒဲ့ တး အူယ် ဝီ တွိုန်၊ တဲး ဂေ ဇမ် ဒီ အာတ့် အန်။ 14 အန် တဝ်း ဒီ ဂေ၊ “အိုယ် အာဆာတာရိက်၊ အာမေဆိက် ဘော အာဘေတ်နေကုဝ် ဟဲ့ မှာန် ဘေ တူ ကြိုပ် ဇဝ် ပီ ကြိုပ် အုဝ် ဘော တူ မုတ် တူ ဂူမ် ဒီ အာတ့် အာရိုပ် ရာင် ပဲ့ ဟဲ့ ဘ့လေး အုန် အုဝ် တွိုန်။း 15 ခါ နီ ဟာဝ်၊ ဆေ ဘေ ဟီ ယိုဝ် ဟမ် ဝဝ် နိုင် ပဲ၊ ဟမ် ဘုတ် ဝဝ် ဘော ဟမ် ဒိင်၊ ဟမ် ဒိင် ဒီရဝ်၊ ဟမ် ဂြိုင် ဘော ဟမ် မျုဝ် ပီ ဒွယ် ပီ ဘး ဂေ ဒွန် မျုဝ်၊ ဆေ ဘေ မုတ် ဂိုပ် ကြိုပ် အာရိုပ် ရာင် တွိုန်၊ ဟဲ့ ပွိုန် ကွယ် ဒါခိုယ်။ ဆေ ဘေ ယီ တူ ကြိုပ်၊ ဒေါ အန် တီ အူ ဇေန့် အီ ဒီ ကာဒုး ဒီ ဒိုဝ်း ဘေ ဘျွာ လူင် ခဲင် ဖုဝ် ငဝ် အီ ဟဲ့ ကုး တာင် တွိုန်။ န့ တူ မိုဝ်း ဇဝ်ဖြာ ကာဒင် မှဝ် အီ ဒီ ပွိုန် ချွတ် ဘေ။ န့ မိုဝ်း မီ အုဝ် အီ ပွိုန် တဲး ဘေ လွတ်။”

16 ဂေ အူယ် ဝီ တွိုန် ဝီ တဝ်း၊ “အိုယ် မဲ ခုန်ဒီခမ် တာင်၊ ယေ တူ နပ် ပီ ဒီ ဝျီ့ ဒီ မဲ ခုန်ဒီခမ်။ 17 ဆေ အီ ဘျွာ လူင် ယေ ခဲင် ဖုဝ် ငဝ်၊ ဆေ ဇဝ်ဖြာ ပီ ကြိုပ် ယေ ဘော အိုင် ဒီ ချွတ် ယေ တဲး ယေ လွတ် ဒီ မဲ ခုန်ဒီခမ်။ အန် ဒီ ဘော နပ် ဒီ ချွတ် ယေ တဲး ယေ လွတ်။ 18 ဆေ အာဝ် ပါယ် တီ မိူဝ်၊ မဲ ခုန်ဒီခမ် တာင်၊ တဲး မဲ နပ်၊ ယေ တူ ကြိုပ် ဇဝ် ပီ ကြိုပ် မဲ။ ယေ မိူဝ် တူ မုတ် တူ ဂူမ် ဒီ အာတ့် အာရိုပ် ရာင် ခြိဝ် ပီ ဘ့လေး အုန် မဲ ခုန်ဒီခမ်။”

19 ပါယ် တီ ခုန်ဒီခမ် ဘော ဝဲ ရူ ကာဆဝ်။ နာ အန် မိူဝ် ဟဲ့ ဝွင့် အပ် ကူပ် ဟဲ့ ရူ အန် ဒီ အာဆာတာရိက်၊ အာမေဆိက် ဘော အာဘေတ်နေကုဝ် ဂေ တွိုန်။ အန် မိူဝ် ဝီ စ်ု ဒူအီ အန်၊ တဲး ဂေ ကာဒိုင် ငဝ်၊ တဲး န့ ဝဲ ကုး ဟဲန့် လွှိုမ် ဘြိမ် ပေါ ဘူ တုဝ့်။ 20 အန် မိူဝ် ဒွါ အာမိင် ဒီ ဂေ ဒါ ဆိုက် အန် အီ မိုဝ်း ပ့လူမ် တာင်၊ တဲး ဂေ ပက် အူယ် ဝီ တွိုန်၊ တဲး ဂေ ဘျွာ အူယ် ဝီ တီ ခဲင် ဖုဝ် ငဝ် အီ ဟဲ့ ကုး ဟဲန့် ကာဆဝ်။ 21 ပါယ် တီ ဂေ မိူဝ် ပက် အူယ် ဝီ တီ အီ ဟဲ့ စှိုပ် ဘော ဆီတုဝ် ဆီလာ ဂေ ဘော ဆီတုဝ် တုန် ဘော ခြိုင် တာ ဂေ ဘောကာဂ့လျီတ်၊ ဝီ ဘျွာ ဂေ ခဲင် ငဝ် အီ ဟဲ့ ကုး တာင် တွိုန်။ 22 ကူပ် အာမိင် ခုန်ဒီခမ် တွိုန် ဟဲ့ ခြဲန့် ကာဆဝ်၊ ငဝ် တီ ကော ဟဲန့် ကာဆဝ်။ ပ့လဲ့ ငဝ် တွိုန် ဘော ဝီ လှိုပ် ယမ် ဂေ ဒါ ဆိုက် အီ ဒိုဝ်း ဘျွာ ဂေ အူယ် ဝီ တွိုန်။ 23 အီ မုး အာတာရိက်၊ အာမေဆိက် ဘော အာဘေတ်နေကုဝ်၊ ဂေ ယီ ဟဲ့ ကာဒုး အီ ပက်၊ ဟဲ့ ဝီ စုဝ်း ခဲင် ငဝ် အီ ဟဲ့ ကုး တာင် ကာဆဝ်။

24 ပန် အန် တီ ခုန်ဒီခမ် အာနေဘူခတ်နေစာ ဘော အာမ် ကာဆဝ် ဘော ယိတ့် ပီခြန် အန်။ အန် မိူဝ် ဒီမွှတ် ဒါ အီ ဒွါ အာကျာမ် အာငျာန် ဒီ အန်။ အန် တဝ်း၊ “အုဝ် ထာင် အေ ဟဲ့ ပက် ဂေ အူယ် ဝီ တီ၊ ဝီ ဘျွာ ခဲင် ငဝ်။” ဂေ မိူဝ် ဝီ ကာလာင် ဒီ ခုန်ဒီခမ် တဝ်း၊ “အိုဝ်၊ မဲ ခုန်ဒီခမ် တာင်၊ ဂြုဝ်း မဲ ဟဲ့ မုး ဟဲ့ မှာန်။”

25 ခုန်ဒီခမ် ပီ ဝီ တဝ်း ဒီ ဂေ၊ “မှဝ် န့ ပါယ် ပီ ယိုဝ် အုဝ် ဖွုန် ဝီ အီ ဟာဝ် ဝိဝ် ဟာဝ် ဝေန့် ခဲင် ငဝ် တီ။း ဂေ ယီ တူ မိုဝ်း ဝန် အီ ပက် ဒဲ ဂေ၊ တူ ယိုဝ် ဒူင် ဒိမ် ဒူင် ဆဝ် ခေါ အူ မျုဝ်။ ဂေ မိူဝ် လွတ် အာဖေ အာရေ ဒွန် မျုဝ်။ ဝီ မ့ဖွုန် တီ၊ အန် နှဲန် ဂွန် ဇဝ် ပီ ကြိုပ် အေ။”

26 ပန် အန် တီ ခုန်ဒီခမ် အာနေဘူခတ်နေစာ ဘော ယိတ့် ဟာဝ် ဒူင် ကွယ် ငဝ် အီ ဟဲ့ ကုး တာင် တွိုန် ဘော ဒတ် တဝ်း၊ “အိုယ် အာဆာတာရိက်၊ အာမေဆိက် ဘော အာဘေတ်နေကုဝ်၊ ဘေ အီ မုး ဒဲစေန့် ဇဝ်ဖြာ အီ တာင် လွှိုမ် တူတ့်၊ တဲး ဘေ လေး တး ဒီ နီ။” ဟဲ့ ဟွတ့် ဂေ မိူဝ် လေး တး အူ ဇေန့်။ 27 ခဲ့ ကွယ် ဂေ ဒါ ကာညာ အီ အိုပ် မိူင်၊ ဂေ ဒါ တာင် အီ ဂဲပ် ရွိုန် စိုင်၊ ဂေ ဒါ တာင် အီ အိုပ် ဘဲန် မျုဝ် ဘဲန် မျုဝ် ဘော ဒါ အီ ဒွါ အာကျာမ် အာငျာန်၊ ဂေ ဘောကာဂ့လျီတ် ဘော တး ကွယ် ရူပ်၊ ယွတ် ဂေ အူယ် ဝီ တွိုန်။ ဂေ တူ မိုဝ်း ဒူင် ဒိမ် ဒူင် ဆဝ် မာဆေ။ ဂေ ဟဲ့ လွတ် အာဖေ အာရေ ဒီ ငဝ် တွိုန်။ ဒါ တာင် ဂေ တွိုန် ယိုဝ် ဟိုက် ဂိန့် ဂေ မိူဝ် တူ ခြဲမ်။ ဆီတုဝ် ဂေ မိူဝ် တူ ကာဆိုမ်။ ဒီ ဒုဝ် ဂေ မိူဝ် အာဝ် မိုဝ်း အုး မှဝ် မာဆေ။

28 ခုန်ဒီခမ် ဝီ တဝ်း၊ “အေ ဟဲ့ ကာအာပ် အိူပ် မျုက် ဇဝ်ဖြာ ပီ ကြိုပ် အာဆာတာရိက်၊ အာမေဆိက် ဘော အာဘေတ်နေကုဝ်။ အန် ဇဝ် တီ ဟဲ့ တိုယ် အာမူ အာမာတ် အန်၊ တး ချွတ် ဂေ ကူပ် ညှိုမ် ဂေ ဘော ရုဝ်ဆေ ဇဝ်ဖြာ ပီ ကြိုပ် ဂေ။ ဂေ မိူဝ် ယ လှိုဝ် အာမိင် ပီ ဒမ် အုန် ခုန်ဒီခမ် ဘော ခမ် ဒီ ဇုန် ဒုဝ် ဘူင့် ဂေ ခဲင် ငဝ် ကူပ် တူ ကြိုပ် ဂေ ဇဝ်ဖြာ ပီ ကြိုပ် အီ ဟဝ် အီ တူ မုး ဇဝ်ဖြာ ပီ ကြိုပ် ဂေ။ 29 ကူပ် န့ ပါယ် တီ အုဝ် ဒီ ဝီ ဘ့လေး အာမိင် ဒီ ဒူအီ ဒွန် ဇိုဝ် ဒွန် မျုဝ် အီ ကာလာင် ဂြုဝ်း မျုဝ် မှဝ် မျုဝ် အန်။ ဝီ မှဝ် အီ ကာလာင် ဂြုဝ်း နာ တူ မွှိုမ် လွင် ဇဝ်ဖြာ ပီ ကြိုပ် အာဆာတာရိက်၊ အာမေဆိက် ဘော အာဘေတ်နေကုဝ်၊ အန် လုဝ် ခမ် အီ ကာဒဲပ် အန် ဘဲန် ဒီဂ်ု ဘဲန် ဒီဂ်ု။ ကာင် အန် မိူဝ်၊ လုဝ် ဘဲန် မ့ပိုမ် ဖုန်။ ဇဝ်ဖြာ အီ ပွိုန် ချွတ် အေ ပါယ် နီ၊ အာဝ် မိုဝ်း ပေါ အူ ကာဒင်။”

30 ဝါယ် အန် တီ ခုန်ဒီခမ် ဝီ စုဝ့် မျုက် အာဆာတာရိက်၊ အာမေဆိက် ဘော အာဘေတ်နေကုဝ်၊ တဲး ဂေ ဘဲန် ဒါ တာင် ခဲင် မိူင် ဘာဘဲ တွိုန်။