1 ခုန်ဒီခမ် အာနေဘူခတ်နေစာ ဝီ ကာလာင် ဂြုဝ်း ဒီ ဂေ ဒူအီ ဒွန် ဇိုဝ် ဒွန် မျုဝ်၊ ဂေ အီ ကာလာင် ဂြုဝ်း မျုဝ် မှဝ် မျုဝ် အန် အီ ကွယ် ဒဲင် ကာဒါယ် နီ ဘောကာဂ့လျီတ်။ အန် တဝ်း၊ “တဲး ဘေ ဒါခိုယ် ဂျာမ်ဆာ ဘော မိုဝ်း နဝ်း ဂတ် ဂျီတ် ဆေဆေ။

2 အုဝ် ဟဲ့ ဒါခိုယ် ဒီ ကာလာင် ဒီ ဘေ လွင် အီ မွှိုမ် အာမ် ကာဆဝ် ပဲ့ ဟဲ့ ဘူင် ဇဝ်ဖြာ အီ တာင် လွှိုမ် တူတ့် ဒီ အုဝ်။

3 ပီ ဘျ ဇဝ်ဖြာ ဒီ အုဝ် တီ၊ န့ ဟဲ့ ခိုက်ခမ် ကာဆဝ်။ ပီ ဘျ အန် တီ၊ န့ ဘော မိုဝ်း ပွုန် အီ တာင် အီ ဟဲန့် ကာဆဝ်။ ဇဝ်ဖြာ ဘော မုး ခုန်ဒီခမ် အီ ကွယ် ဆေဆေ။ အန် ဇဝ် ဘော အိုပ် ကာဒါယ် ဒွန် စုဝ် ဒွန် ဘာန်။

4 အုဝ် ခုန်ဒီခမ် အာနေဘူခတ်နေစာ ဘော ကွယ် ယေန် ယေန်၊ ကွယ် နှိမ် နှိမ် ခဲင် ဟုဝ် အုဝ်။ အုဝ် ဘော ဘျုဝ် ဒါခိုယ် ဒူပ် ကြုဝ်ကြာမ် အုဝ် အီ ဟဲ့ ကိူန်။ 5 မာလဲ၊ ဒေါ အိတ် အုဝ် အုဝ် ဟဲ့ မ့ဘာဝ် အီ ဟဲ့ မွှိုမ် ကာပိုန့် ကာဆဝ်။ အုဝ် ပီ ဝီ ယိုဝ် ဘော ပီ ဘျ ဇဝ်ဖြာ အီ တဲး အုဝ် ဘဲန် နဝ်း ဒီယုး ဒီယေန့်။ 6 ခုဝ်၊ အုဝ် ဒွါ အာမိင် တဲး ဂေ ဒူအီ ဘောကာဂ့လျီတ် အီ မိုဝ်း အာငျာန် အီ ကွယ် ခဲင် မိူင် ဘာဘဲ နီ တး ဒူင် ကွယ် အုဝ်၊ တဲး ဂေ ကာလာင် လွင် ဒါင် ပီ မ့ဘာဝ် အုဝ် တီ ဒီ အုဝ်။ 7 ဝါယ် အန် တီ၊ ခဲ့ ကွယ် ဂေ ဒါ ဆာရာ အီ နပ် ဒီ မဲန် ဘေဒါင်၊ ဒါ ဆာရာ အီ နပ် ဒီ ဘူင် မျလှယ့် ဘော ဒါ ဆာရာ အီ ဘိုင် ကာနမ်၊ ဂေ ဟဲ့ တး ဒူင် ကွယ် အုဝ်။ အုဝ် ပီ ဘော ကာလာင် ဒီ ဂေ လွင် ပီ မ့ဘာဝ် အုဝ် မိူဝ်၊ ဂေ တူ နပ် ဒီ ကာလာင် လွင် ဒါင် အန်။ 8 ဒေါ အန် တီ အာဒါနေလ ဘော ဝီ လိုပ် တး ဒူင် ကွယ် အုဝ်။ အန် ယီ ဟဲ့ မိုဝ်း စိူဝ် ကာမာယ်။ အန် ဘော စိူဝ် အာဘေလထေဆာစာ အီ မုး စိူဝ် ဇဝ် ပီ ကြိုပ် အုဝ်။ နဝ်း ဖွိုမ် ဇဝ်ဖြာ အီ ဘွတ် အီ မွှိုမ် မိူဝ် ဟဲ့ ကွယ် ရိုမ် ဒူပ် အန်။ အုဝ် ဘော ကာလာင် ပီ မ့ဘာဝ် အုဝ် ဒီ အန်။”

9 အုဝ် တဝ်း၊ “အိုယ် အာဘေလထေဆာစာ၊ မဲ မုး အီ မွှိုမ် လွှိုမ် ဂေ အီ မိုဝ်း အာငျာန် ဘောကာဂ့လျီတ်။ အုဝ် ဟဲ့ နပ်၊ နဝ်း ဖွိုမ် ဂေ ဇဝ် အီ ဘွတ် အီ မွှိုမ် ဟဲ့ ကွယ် ရိုမ် ဒူပ် မဲ။ န့ ဒီ တဲး မဲ နပ် လွင် အီ ခိုက်ခမ် အီ လိုက် ဒွန် မျုဝ်။ အုဝ် ဒီ ကာလာင် ဒီ မဲ လွင် ပီ မ့ဘာဝ် အုဝ် တဲး မဲ ဝီ ကာလာင် လွင် ဒါင် အန် ဒီ အုဝ်။ 10 ဒေါ ဟဲ့ အိတ် မ့ဘာဝ် အုဝ်၊ အုဝ် ဟဲ့ ယိုဝ်၊ န့ မိုဝ်း ဟေ တာင် အူ ကာဒင် အီ ကွယ် ဒီ ကာတဲ ဒဲင် ကာဒါယ် နီ။ 11 ဟေ တီ ဘော ကြဲ ဒီ ဟြေး၊ ကြဲ ဒီ တာင် ဘော စာ ကာဆဝ်၊ ကော ဇမ် န့အု၊ ဇမ် ဘ့လေန့် ငျီန်။ ဒူအီ ဒဲင် ကာဒါယ် နီ ဒွန် အီ ဘော ပွိုန် ယိုဝ် ဟေ တီ။ 12 လှာ အန် မိူဝ် စှိတ် ကာဆဝ်။ ဘ့လေ အန် မိူဝ် ဟဲ့ ကိူန် ကာဆဝ်။ န့ ကော ဂ့လိုမ် အာဒါ ပီ ဒီ ဟူမ် ဒွန် အီ။ ခဲ့ ကွယ် ဂေ မာဒုဝ် ပြဲ ဘော တး ကွယ် တး ကာဒိုမ် ခြိုမ် ယာပ် အန် တီ။ ခဲ့ ကွယ် ဂေ မာဆိမ် မိူဝ် တး ဘူင် ကာဟုန် ဂေ ဒီ ရာ အန်။ ခဲ့ ကွယ် ဂေ ဒုဝ် ဆတ်ဒါဝါ ဘောကာဂ့လျီတ် ဘော ဂေ ဒူအီ ပွိုန် ဒီ ဟူမ် ဘ့လေ အန် တီ။

13 ဒေါ ဆီငျာ အိတ် အုဝ် အုဝ် ဝီ ယိုဝ် အာမူ အာမာတ် ဇဝ်ဖြာ အူ ကာဒင် အီ ဘွတ်။ အန် တး ခဲင် ဂါင်ဟြာဝ် လူင်။ 14 အန် ကာလာင် ဂြုဝ်း တာင် တဝ်း၊ ‘ဂ်ု ကေး ဟေ တီ။ ဒဲပ် ဝဲန် ရာ အန်။ ဘြွတ့် ဝဲန် ဘော လှာ အန်။ ဒိုဝ်း ဝဲန် ဘော ဘ့လေ အန်။ ညွန် တဝ် ဘော မာဒုဝ် ပြဲ ဂေ အီ ကွယ် ခြိုမ် ယာပ် ဟေ တီ။ ညွန် တဝ် ဘော ဂေ မာဆိမ် အီ ကွယ် ဒီ ရာ ဟေ တီ။ 15 အီ မုး ငူယ် အန်၊ တဲး န့ ကွယ် ဒိုက် ဒီ ကာဒါယ် ဒူပ် ရျီး အန် ခူပ် ပေတ့် န့စမ်။ ဟဲ့ ဟွတ့်၊ တဲး ဘေ ဝီ ဒိုဝ်း ဝန် ဟိန် ဂေ ဝန် ဘွင့် ဒေန့်၊ ဝီ ပက် ငူယ် အန် တီ။ တဲး အိုမ် ဂ့လာယ် ဂေ အိုမ် ဒီငါန် ဝီ ရိုက်၊ တဲး အန် အမ် ည၊ တဲး အန် ဘော ကွယ် ရိုမ် ဒူပ် ဂေ မာဒုဝ် ပြဲ ခဲင် ဂ့လင် တီ။ 16 တဲး နဝ်း ဒူအီ လေး ခဲင် ဒုဝ် ဘူင့် အန်၊ တဲး အန် ဝီ မိုဝ်း မီ နဝ်း ဒုဝ် ဆတ်ဒါဝါ။ တဲး န့ ဘဲန် ပါယ် တီ အာဒါ ဘူ ဆီနမ်။ 17 အာမူ အာမာတ် ဇဝ်ဖြာ၊ တဲး ဂေ အီ ဆီ မိုဝ်း အာဆာက် ပွိုန် ဒီ နပ် လွင် ဇဝ်ဖြာ အီ အိုပ် တူတ့် ဒွန် မျုဝ်။ အန် မုး အီ အိုပ် တူတ့် မာန် မိူင် ဒဲင် ကာဒါယ် နီ။ အန် ဒီ ဘော ဒွါ မိူင် ဒီ ဝီ ပီ ဆီ ဒွါ အန်။ အန် ဇဝ် ဒီ ဘော ဝီ စုဝ့် မျုက် ဝီ အီ မိုဝ်း နဝ်း ဂူမ်၊ တဲး အန် ဝီ အိုပ် မိူင် တီ။’”

18 ခုန်ဒီခမ် အာနေဘူခတ်နေစာ ဝီ တဝ်း၊ “အာတီ ဟဲ့ မုး ပီ မ့ဘာဝ် အုဝ်။ ဒေါ တီ နီ မဲ အာဘေလထေဆာစာ၊ တဲး မဲ ကာလာင် လွင် ဒါင် အန် ဒီ အုဝ်။ ဂေ ဒူအီ အီ မိုဝ်း အာငျာန် အီ ကွယ် ခဲင် ဟုဝ် အုဝ် နီ အာဝ် မိုဝ်း ခေါ အူ ဝီ အီ ပဲ ဒီ ကာလာင် လွင် ဒါင် အန်။ အီ မုး မဲ၊ မဲ ဟဲ့ ပွိုန် ကာလာင် ကူပ် ဟဲ့ ကွယ် နဝ်း ဖွိုမ် ဇဝ်ဖြာ အီ ဘွတ် ကာဆဝ် ခဲင် နဝ်း မဲ။”

19 ဝါယ် အန် တီ အာဒါနေလ အီ ဘော ဝီ စိူဝ် အာဘေလထေဆာစာ၊ အန် ဘော ဝီ ကာစွာ အာဒါ အူ ကာစန် ဘော ဘဲန် ဂ့၀ွင် ဒီ နဝ်း အန်။ ခုန်ဒီခမ် ဝီ တဝ်း၊ “အိုယ် အာဘေလထေဆာစာ၊ အာဝ် လုဝ် ယုဝ်၊ အာဝ် လုဝ် တဲး န့ ဘဲန် နဝ်း ကာဟွာ့ ကူပ် မ့ဘာဝ် အုဝ် ဘော ကူပ် လွင် ဒါင် အန် တီ။” အာဘေလထေဆာစာ မိူဝ် ဝီ တဝ်း ဒီ ခုန်ဒီခမ်၊ “အိုယ် မဲ ခုန်ဒီခမ် အီ အိုပ် အုဝ်၊ လွင် ပီ မ့ဘာဝ် မဲ ဘော လွင် ဒါင် အန် တီ၊ အုဝ် တူ ဆီ တဲး န့ ဘဲန် ဒီ မဲ။ အုဝ် ဆီ တဲး န့ ဘဲန် ဒီ ဂေ ရန်ဆူ မဲ။ 20 ဟေ ပဲ့ ဟဲ့ ယိုဝ် မဲ အီ ကြဲ ဒီ ဟြေး ကြဲ ဒီ တာင် ဘော စာ ကော ဒုး ဘ့လေန့် ဂေ န့အု၊ ဒူအီ ဒဲင် ကာဒါယ် ဒွန် အီ ဟဲ့ ပွိုန် ယိုဝ်။ 21 အီ မိုဝ်း လှာ အီ ဟဲ့ စှိတ် ကာဆဝ် ဘော မိုဝ်း ဘ့လေ အီ ဟဲ့ ဂ့လိုမ် အာဒါ ပီ ဒီ ဟူမ် ဂေ မာဒုဝ် ပြဲ ဘော ဒူအီ ဘောကာဂ့လျီတ် ဘော အာဒါ ပီ ဒီ ဟူမ် ဂေ ဒုဝ် ဆတ်ဒါဝါ အီ တး ကွယ် ခြိုမ် ယာပ် အန်၊ အီ တဲး ဂေ မာဆိမ် ဘူင် ကာဟုန် ဂေ ဒီ ရာ အန်၊ 22 ဟေ ပီ ယိုဝ် မဲ ခုန်ဒီခမ် တာင် တီ၊ မဲ ပီ ဟေ တီ။ မဲ ဟဲ့ တာင်၊ ဟဲ့ မိုဝ်း ပ့လူမ် မိုဝ်း ဟဲန့်။ မဲ မိူဝ် ဟဲ့ စာ ပီ ဟေ အီ ဒုး ဘ့လေန့် ဂေ ဂါင်ဟြာဝ်။ ပွုန် မဲ ဘော အာဖုင် ဒင်ခုဝ် မဲ မိူဝ်၊ ဟဲ့ အိုပ် ဘော ကာဒါယ် နီ။

23 ဒေါ ဆီငျာ ယွတ် မဲ ခုန်ဒီခမ်၊ မဲ ဟဲ့ ယိုဝ် အာမူ အာမာတ် ဇဝ်ဖြာ အီ ဘွတ် တး လူင် ခဲင် ဂါင်ဟြာဝ် ဘော တဝ်း၊ ‘ဂ်ု ဝဲန် ဟေ တီ၊ တဲး မီ ငူယ် အန် ကွယ် ဒိုက် ဒီ ကာဒါယ်။ ဝီ ဒိုဝ်း ဝန် ဟိန် ဂေ ဝန် ဘွင့် ဒေန့်၊ ပက် အန်။ တဲး အန် ကွယ် ကာတဲ ပေတ့် ဂေ ပြဲ။ တဲး အိုမ် ဂ့လာယ် ဂေ အိုမ် ဒီငါန် စုဝ်း ဒဲင် အန်၊ တဲး အန် ဝီ ကွယ် ရိုမ် ဒူပ် ဒုဝ် ဆတ်ဒါဝါ ဂေ တွိုန် အာဒါ ဘူ ဆီနမ်။’

24 အိုယ် မဲ ခုန်ဒီခမ် တာင်၊ လွင် ဒါင် ဆီဖဝ် အန်၊ န့ ဘော မုး ပါယ် နီ။ န့ ဘော မုး ဇဝ်ဖြာ အီ တာင် လွှိုမ် တူတ့် ဒွန် မျုဝ်၊ အန် ဟဲ့ ကာလာင် တဲး န့ ဘဲန် ပါယ် တီ ဒီ မဲ ခုန်ဒီခမ်။ 25 မဲ ခုန်ဒီခမ် လုဝ် ခမ် အီ ဟဝ် ဟုဝ် လေး မဲ ခဲင် ဖိုင် ဒူအီ၊ တဲး မဲ ဝီ ဟာဝ် ကွယ် ရိုမ် ဒူပ် ဒုဝ် ဆတ်ဒါဝါ။ မဲ ဒီ ကာဒုး ဒီ ဟူမ် ပေတ့် ပီ မက် ဘော အိတ် ခဲင် ဂ့လင်ဂ့လဲန့်၊ ခမ် အိုမ် ဂ့လာယ် ဂေ အိုမ် ဒီငါန် အာဒါ ဘူ ဆီနမ်။ ပန် အန် တီ န့ ဒီ ဘော ဝီ ကာလှုး ဒီ နဝ်း မဲ လွင် ဇဝ်ဖြာ အီ အိုပ် တူတ့် ဒွန် မိူင် ဒဲင် ကာဒါယ် နီ။ အန် ဒီ ဘော တဲး ဒူအီ ပီ အိုင် အန် အိုပ် မိူင် တီ။ 26 အာမူ အာမာတ် ဇဝ်ဖြာ ဟဲ့ ဟွတ့် ကာလာင် လွင် ငူယ် ဟေ တီ၊ တဲး အန် ကွယ် ခဲင် ကာဒါယ်။ လွင် အန် တီ ဘော မုး လွင် မဲ။ မဲ ပီ ဒီ ဝီ ပွိုန် ဒီ ဘဲန် ခုန်ဒီခမ် ဒေါ ဟဲ့ ဝီ နပ် မဲ ဇဝ်ဖြာ အီ အိုပ် တူတ့် ဒဲင် ကာဒါယ်။ 27 ကူပ် န့ ပါယ် တီ အုဝ် ဝီ မှာန့်၊ တဲး မဲ ခုန်ဒီခမ် ဘူင် ဒူပ် ဂြုဝ်း ပီ ကာလာင် အုဝ် နီ။ ကွဲ့ တဲး မဲ ဘူင် အီ တူ မွှိုမ်။ တဲး မဲ ဝီ ဘူင် နာ ဆိူဝ် နာ မှာန် ဘော ရွက့် ကာဝေ ဂေ ဒူအီ ဂိန် ဒူအီ ဖ့လာန်။ ဆေ မဲ ဘူင် ပါယ် တီ မဲ ဒီ ဘော ကွယ် ဒါခိုယ် ဂျာမ်ဆာ တဲး န့ တူင့် ဟာဝ် နာ အာတ့်။”

28 လွင် အန် တီ န့ ဘော ဘဲန် ဒွန် မျုဝ် ဒီ ခုန်ဒီခမ် အာနေဘူခတ်နေစာ။ 29 ဝါယ် အန် တီ ဘော ပွိုန် ဂိုဝ် ဒီ အာ မာဂျီန်၊ ခုန်ဒီခမ် ဘော ဝီ ဟုဝ့် နာ ဒဲင် ကာတု ဟုဝ် အန် ဒီ မိူင် ဘာဘဲ တွိုန်။ 30 အန် ဝီ တဝ်း၊ “ယွတ် မိူင် ဘာဘဲ နီ၊ န့ ဟဲ့ မုး မိူင် အီ တာင် ကာဆဝ်။ အုဝ် ဟဲ့ ဒဲ မိူင် နီ၊ တဲး န့ ဘဲန် မိူင် ဒူင် ကွယ် ဒါ ကာညာ ဂေ ခုန်ဒီခမ်၊ တဲး န့ ဘော ဘျ ခဲ့ တာင် ပွုန် အုဝ် ဘော အာဖုင် ဒင်ခုဝ် အုဝ်၊ တဲး န့ လိုဝ်း ဘော ဆာရေ အုဝ်။”

31 အန် ကာလာင် ဂြုဝ်း တီ ညှမ် ဒန် ဟွတ့်၊ န့ ဘော မိုဝ်း ဂြုဝ်း အီ လေး တး ခဲင် ဂါင်ဟြာဝ် တဝ်း၊ “အိုယ် မဲ ခုန်ဒီခမ် အာနေဘူခတ်နေစာ၊ တဲး မဲ ထူမ် ဂြုဝ်း အုဝ် နီ။ အာဖုင် ဒင်ခုဝ် မဲ အုဝ် ဟဲ့ ဒိုဝ်း လေး ဒီ မဲ ဒေါ တီ နီ။ 32 မဲ လုဝ် လေး တဝ် ခဲင် ဖိုင် ဒူအီ၊ ဝီ ဟာဝ် ကွယ် ဒူပ် ဒုဝ် ဆတ်ဒါဝါ ဘော ဟူမ် ပေတ့် ဂေ ပြဲ ပီ မာမက်၊ တဲး န့ ကော နုဝ့် ဘူ ဆီနမ်။ ပန် အန် တီ န့ ဒီ ဝီ ကာလှုး ဒီ နဝ်း မဲ လွင် ဇဝ်ဖြာ အီ အိုပ် တူတ့် ဒွန် မျုဝ်။ န့ ဘော မုး အန် ဇဝ် အီ အိုပ် မာန် မိူင် ဒူအီ ဒဲင် ကာဒါယ် နီ အန် ဒီ ဝီ ဒွါ ဒီ ဒူအီ ပီ ဆီ ဒွါ အန် ဝီ အိုပ် မိူင် ဂေ တီ။”

33 ဒေါ အန် တီ ဂြုဝ်း ပီ ကာလာင် အာမူ အာမာတ် ဇဝ်ဖြာ လွင် ခုန်ဒီခမ် အာနေဘူခတ်နေစာ ဟဲ့ ဘုဝ် ဘဲန် အူ ဇေန့်။ အန် ကာဒုး အီ ဟုဝ် လေး အန် ခဲင် ဖိုင် ဒူအီ၊ ဝီ ဟာဝ် ဟူမ် ပေတ့် ပီ မာမက်။ အန် ဘော ကာဒုး ဒီ ခမ် အိုမ် ဒီငါန် အီ တး ခဲင် ဂါင်ဟြာဝ်၊ စုဝ်း ဒဲင် အန်။ န့ ဘော တဲး ဟိုက် ဒီ ဒုဝ် အန် ဝီ လေး ဒီတူင့် ပီ ဟိုက် မာဂ့လာင်။ န့ဟိမ် ပ့လဝ် ဂေ န့ဟိမ် ဒဲ အန် မိူဝ်၊ ဟဲ့ ကြဲ ဒီတူင့် ပီ န့ဟိမ် မာဆိမ်။

34 ခုန်ဒီခမ် မိူဝ် ဝီ တဝ်း၊ “ဝါယ် ဟဲ့ ဟွတ့် ပွုန် ဘူ ဆီနမ် တီ၊ အုဝ် အီ မုး အာနေဘူခတ်နေစာ ဘော ဝီ ဆာကိုဝ်း ခဲင် ဂါင်ဟြာဝ် ဘော လှုဝ်း ဇဝ်ဖြာ။ နဝ်း အုဝ် ဘော ဝီ ဆီချာ ပီ ဘြိမ်။ အုဝ် မိူဝ် ဝီ အိူပ် မျုက် ဇဝ်ဖြာ အီ ဟဲ့ တာင် လွှိုမ် တူတ့် ဘော ကာလာင် ဂုင် ဂေဇူ ဒီ အန် ဇဝ် အီ မိုဝ်း အာဆာက် အီ ကွယ် ဆေဆေ။” အုဝ် တဝ်း၊ “မာန် မိူင် ပီ အိုပ် အန် ဇဝ် န့ ကွယ် ဆေဆေ။ မာန် မိူင် ပီ အိုပ် အန် ဇဝ် န့ ဘော ကွယ် ဒွန် စုဝ် ဒွန် ဘာန်။ 35 ခဲ့ ကွယ် ဒူအီ ဒဲင် ကာဒါယ် အာဝ် မိုဝ်း ဒီခုဝ် မာဆေ။ အန် ဇဝ် မိူဝ် ဘူင် ဒူပ် ခဲ့ ပီ ခြာမ် အန် ဒီ ဘူင်။ ဘော မုး အာမူ အာမာတ် ဇဝ်ဖြာ ဘော မုး ဂေ ဒူအီ ဒဲင် ကာဒါယ် နီ၊ အာဝ် မိုဝ်း ခေါ အူ ဝီ အီ ပွိုန် ခြဲ ပီ ဆီ ဘူင် အန် ဇဝ်။ လွင် ပီ ဘူင် အန် ဇဝ် တီ မိူဝ်၊ အာဝ် မိုဝ်း အီ ပွိုန် ဝီ ဒီမွှတ် ဇဲတ့် အန် ဇဝ်။”

36 ဒေါ ဟဲ့ ဟွတ့် ဝီ ဆီချာ နဝ်း အုဝ် တီ၊ အုဝ် ဘော ဝီ မိုဝ်း ပွုန်၊ မိုဝ်း ဘော အာဖုင် ဂေ ဆာရေ ခဲင် မာန် မိူင် ပီ အိုပ် အုဝ်။ ဂေ ဒါ ကာညာ အီ အိုပ် ခဲင် မိူင် အုဝ် ဘော ဂေ အာမူ အာမာတ် အုဝ်၊ ဂေ ဝီ ရွုး အုဝ်။ အာဖုင် ဒင်ခုဝ် အုဝ် ဘော ဝီ ဝဲ တာင် လွှိုမ် ခါ အာတ့်။ 37 ဒေါ တီ နီ အုဝ် အာနေဘူခတ်နေစာ၊ အုဝ် ဝီ အိူပ် မျုက် ခုန်ဒီခမ် အီ အိုပ် ဂါင်ဟြာဝ်။ ပဲ့ ဟဲ့ ဘူင် အန် ဟဲ့ ကာဆိူဝ်၊ ဟဲ့ မုး တူတ့် နာ မုး နာ မှာန်။ အန် ဇဝ် ဘော နပ် ဒီ ဒိုဝ်း အီ ပီခိုက်၊ ဝီ ဘူင် တဲး အန် စုဝ်း တျီမ်။”