ခါန် 5
လွင် ဒုဝ် ပဲ့ အီ လိုဝ်း ဒီ ရဲင်
1 န့ ဘော မိုဝ်း အူ ဆီငဲ ဒေါ ဟဲ့ ဘဲန် အာဘေလဆာစာ ခုန်ဒီခမ် အီ အိုပ် မိူင် ဘာဘဲ၊ အန် ဘော ဒဲ့ တး ဂေ ဒူအီ အီ မုး အာမူ အာမာတ် အန်၊ တဲး ဂေ ဘူင် ဘ့လွယ် တာင်။ န့ မိုဝ်း ဒါ တာင် အူ ဟြဲန့် ဝီ အီ ဟဲ့ တး ကာဇု ဘော ဒျီင် ရိုမ် အိုမ် မာငုန်။ 2 ဒေါ ဆီငျာ ဒျီင် ရိုမ် ဂေ တီ၊ ခုန်ဒီခမ် အာဘေလဆာစာ မိူဝ် စ်ု ဒဲစေန့် အန်၊ တဲး ဂေ ဒိုဝ်း တး ကွက့် ခြိဝ် ဘော ကွက့် ရွိုန် ပီ ဒိုဝ်း တး ဂုန့် အန် အီ စိူဝ် အာနေဘူခတ်နေစာ ခဲင် ဟုဝ် ဇဝ်ဖြာ ဒီ မိူင် ယေရူဆာလဲမ် တွိုန်။ အန် တဲး ဘော အန် ဘော ဂေ အာမူ အာမာတ် အန် ဘော နာင် ဟောခမ် အန် ဘော ဂေ အီဘိုန့် တျီ့ အန် ပွိုန် ဒီ ဒျီင် အိုမ် မာငုန် ခဲင် ကွက့် တီ။ 3 ဝါယ် အန် တီ အူ ဇေန့်၊ ဂေ ဘော ဒိုဝ်း တး ကွက့် ခြိဝ် ဘော ကွက့် ရွိုန်။ ဂေ ဒွန် အီ ဘော ဂြူယ် အိုမ် မာငုန် ခဲင် ကွက့် ဂေ တီ ဘော ဒျီင်။ 4 ဂေ မိူဝ် ကာဖြူမ် ဒီ အိူပ် ဇဝ် ပီ ကြိုပ် ဂေ အီ မုး အာရိုပ် ရွိုန်၊ အာရိုပ် ခြိဝ်၊ အာရိုပ် ဘွင့် ဒေန့်၊ အာရိုပ် ဟိန်၊ အာရိုပ် ဟေ ဘော အာရိုပ် မာဝ်။
5 ဒေါ အန် တီ အူ ဇေန့်၊ ဟဲ့ ပွိုန် ယိုဝ် ဒဲ ဒူအီ ဘော ကာနူ အန် အီ ဒဲမ် ပဲ့ ဒီ ရဲင် ခဲင် ဟုဝ် ခုန်ဒီခမ်။ န့ ကွယ် ဒူင် ထွင် ဘ့လာင် ငဝ် အွမ်၊ တဲး န့ ပွိုန် လိုဝ်း ဆီချာ။ ပါယ် တီ ခုန်ဒီခမ် ဘော ယိုဝ် ကာနူ ဒူအီ ဒေါ ဆီငျာ ဒဲမ် အန် တီ။ 6 နာ ခုန်ဒီခမ် ဘော ဟျီ့ ကာဟဝ်း တွင့် ကူပ် ဟဲ့ ယုဝ် ကာဆဝ် အန်။ အန် အာဝ် ဟူ မိုဝ်း ပ့လူမ် ဘော ကိန့်ကြူင့် အန် မိူဝ် ဘော ကာဒွယ်။
7 အန် မိူဝ် ဒတ် တာင် ဒဲ့ ဂေ အီ မုး ဒါ ဆာရာ အီ မိုဝ်း အာငျာန်၊ ဒါ ဆာရာ အီ မဲန် ဘေဒါင် ဘော ဒါ ဆာရာ အီ ဘိုင် ကာနမ်၊ တဲး ဂေ တး။ ဒူအီ ဂေ တီ မိူဝ် ဟဲ့ ဟွတ့် တး၊ ခုန်ဒီခမ် မိူဝ် တဝ်း ဒီ ဂေ၊ “အာဆေ နပ် ဒီ တိး ဒုဝ် ပဲ့ နီ ဘော ပွိုန် ကာလာင် ဘော လွင် ဒါင် အန် ဒီ အုဝ်၊ အုဝ် ဒီ တဲး အန် စှိုပ် တာ ခြိုင် အီ ရေန့် ဂဲ၊ ဟွယ် ဘော မာကာဝဲ့ ခြိဝ် ဒီ မဲင် အန်၊ တဲး အန် ဘဲန် ဒါ ကာညာ ကာဒင် ဟာအူယ် အီ ဒူပ် အုဝ် ဘော အိုပ် မာန် မိူင် အုဝ် နီ။”
8 ခဲ့ ကွယ် ဂေ ဒါ အီ မိုဝ်း အာငျာန် အီ မုး ဒူအီ ပီ အိုပ် ခုန်ဒီခမ် တွိုန်၊ ဂေ ဟဲ့ တး ယွတ် ဒုဝ် ပဲ့ တွိုန်၊ ယီ တူ မိုဝ်း ခေါ အူ ဝီ အီ နပ် ဒီ တိး၊ အီ နပ် ဒီ ကာလာင် လွင် ဒါင် အန် ဒီ ခုန်ဒီခမ်။ 9 ပါယ် တီ ခုန်ဒီခမ် အာဘေလဆာစာ ဘော ဝဲ ယုဝ် ကာဆဝ်။ နာ အန် မိူဝ် ဟဲ့ ဝဲ ကာဟဝ်း တွင့်။ ဂေ အာမူ အာမာတ် အန် မိူဝ် ကာဖာ ဟဲ့ ဂ့၀ွင်။
10 ဒေါ အန် တီ အီဘိုန့် ခုန်ဒီခမ် ဘော ယိုဝ် လွင် ခုန်ဒီခမ် ဂေ အာမူ အာမာတ် အန် ဟဲ့ ကာလာင် ဘော ကာပိုန့်၊ အန် ဘော တး လိုပ် ခဲင် ဘ့လွယ် ဟျီင် ဂေ တွိုန်။ အန် ဘော ကာလာင် ဒီ ခုန်ဒီခမ် တဝ်း၊ “အိုယ် မဲ ခုန်ဒီခမ် တာင်၊ တဲး အာဆာက် မဲ တူင့်၊ အာဝ် လုဝ် ကာပိုန့်၊ တဲး နာ မဲ ကော ကာဟဝ်း တွင့် ပါယ် တီ။ 11 ခဲင် မာန် မိူင် ပီ အိုပ် မဲ နီ၊ န့ ဟဲ့ မိုဝ်း ဒူအီ အူ ဝီ အီ ဟဲ့ မိုဝ်း နဝ်း ဖွိုမ် ဇဝ်ဖြာ အီ ဘွတ် ကာဆဝ် ကွယ် ခဲင် နဝ်း အန်။ ဒေါ မုး စုဝ် ဘာန် ဂုန့် မဲ၊ ဟဲ့ မုး ဝီ တီ အီ ဟဲ့ နပ် ဒီ ဇေန့်ဇာ အီ မွှိုမ်၊ နပ် ဒီ ကာလာင် နာ မှာန် ဒွန် မျုဝ် ဘော မိုဝ်း အာငျာန် ပီ ဇဝ် ပီ ကြိုပ် အီ။ ဂုန့် မဲ အီ စိူဝ် ခုန်ဒီခမ် အာနေဘူခတ်နေစာ ဟဲ့ ဒါင် တဲး ဒူအီ ဝီ တီ တာင် လွှိုမ် ဂေ ဒါ ဆာရာ ဘေဒါင်၊ ဒါ ဆာရာ အီ ဘိုင် ကာနမ် ဘော ဂေ ဒါ ဆာရာ အီ နပ် ဒီ ကာလာင် ဘဲန် မျုဝ် ဘဲန် မျုဝ်၊ တဲး အန် အိုပ် ဂေ။ 12 ဒူအီ ဝီ တီ မုး အာဒါနေလ။ ဂုန့် မဲ ဘော တဲး အန် စိူဝ် အာဘေလထေဆာစာ၊ အန် ဘော နပ် ဒီ ဇေန့်ဇာ ဘဲန် မျုဝ် ဘဲန် မျုဝ်၊ နပ် ဒီ ကာလာင် ပီ ပါယ် ဘဲန် မျုဝ် ဘဲန် မျုဝ် ဘော နပ် ဒီ ကာလာင် လွင် ဒါင် ပီ မ့ဘာဝ် အီ။ အန် နပ် ဘော ဒီ ကာလာင် ဂြုဝ်း ပီ ဒီမွှတ် အီ၊ အီ ညှာပ် အီ လိုက်။ တဲး ဘေ ဒဲ့ တး အန်။ အန် နပ် ဒီ ကာလာင် လွင် ဒါင် ဒုဝ် ပဲ့ အီ ဟဲ့ ဒဲမ် အုန် ဒီ ရဲင် တီ။”
လွင် အာဒါနေလ ကာလာင် လွင် ဒါင် ဒုဝ် ပဲ့
13 ဂေ မိူဝ် ဒဲ့ အာဒါနေလ တဲး အန် ဟာဝ် ဒူင် ကွယ် ခုန်ဒီခမ် အူ ဇေန့်။ ခုန်ဒီခမ် မိူဝ် ဒီမွှတ် အန် တဝ်း၊ “ဟဲ့ မှာန် မဲ မုး ဒူအီ အာယူဒါ အီ စိူဝ် အာဒါနေလ ပဲ့ ဟဲ့ မှေတ့် တး ခုန်ဒီခမ် အီ မုး ဂုန့် အုဝ် ခဲင် မိူင် ယူဒါ တွိုန်။း 14 အုဝ် ဟဲ့ ယိုဝ် အီ ကာလာင် လွင် မဲ၊ မဲ ဟဲ့ မိုဝ်း နဝ်း ဖွိုမ် ဇဝ်ဖြာ အီ ဘွတ် ပီ ကြိုပ် အီ ကွယ် ခဲင် နဝ်း မဲ။ မဲ နပ် ဒီ ဇေန့်ဇာ အီ မွှိုမ်၊ နပ် ဘော ဒီ ကာလာင် နာ မှာန် ဒွန် မျုဝ် ဘော မိုဝ်း အာငျာန် လွှိုမ် အီ ဟဝ်။ 15 ဂေ ဒါ ဆာရာ အီ မိုဝ်း အာငျာန် ဘော ဒါ ဆာရာ အီ နပ် ဒီ ယွတ် ဘေဒါင် ဂေ ဟဲ့ ဟွတ့် တး ဒီ နီ။ အုဝ် ဟဲ့ တဲး ဂေ တိး ပဲ့ တီ၊ တဲး ဂေ ကာလာင် ဘော လွင် ဒါင် အန် ဒီ အုဝ်။ ဂေ ယီ တူ နပ် ဒီ တိး ခေါ အူ ဝီ။ 16 ဒေါ တီ နီ အုဝ် ဝီ ယိုဝ် အီ ကာလာင်၊ မဲ နပ် ဒီ ဘျာန် ဂြုဝ်း အီ တူ လိုဝ်း ဆီချာ၊ နပ် ဘော ဒီ ကာလာင် လွင် အီ ညှာပ် အီ လိုက် ကာဆဝ် ပီ တူ နပ် အီ။ ဆေ မဲ ယီ နပ် ဒီ တိး ပဲ့ နီ၊ နပ် ဘော ဒီ ကာလာင် လွင် ဒါင် အန်၊ အုဝ် ဒီ တဲး မဲ စှိုပ် ခြိုင် အီ ရေန့် ဂဲ၊ ဟွယ် ဘော မာကာဝဲ့ ခြိဝ် ဒီ မဲင် မဲ၊ တဲး မဲ ဘဲန် ဒါ ကာညာ ကာဒင် ဟာအူယ် အီ ဒူပ် အုဝ် ဒီ အိုပ် မာန် မိူင် အုဝ် နီ။”
17 အာဒါနေလ ဝီ ကာလာင် ဒီ ခုန်ဒီခမ် တဝ်း၊ “ရုး ပီ ဒီ ဒွါ မဲ၊ တဲး မဲ အုန် ဒီ မဲ။ ဘော ခေါဆွင် ပီ ဒီ ဒွါ မဲ၊ တဲး မဲ ဒွါ ဒီ အီ ဟဝ်။ အုဝ် ယီ ဒီ တိး ပဲ့ တီ၊ ကာလာင် ဘော လွင် ဒါင် အန်၊ တဲး မဲ နပ်။ 18 ဇဝ်ဖြာ အီ တာင် လွှိုမ် တူတ့် ဟဲ့ ကာဝေ ဟဲ့ တဲး ဂုန့် မဲ အာနေဘူခတ်နေစာ ဘဲန် ခုန်ဒီခမ် တာင်။ အန် ဟဲ့ တဲး ဂုန့် မဲ မိုဝ်း ပွုန် ဘော ဆာရေ၊ မိုဝ်း ဘော အာဖုင် ဒင်ခုဝ် တာင်။ 19 ကူပ် ဟဲ့ တာင် အန် ခဲ့ တီ၊ ဒူအီ ဒွန် ဇိုဝ် ဒွန် မျုဝ် အီ ကာလာင် ဂြုဝ်း မျုဝ် မှဝ် မျုဝ် အန်၊ ဂေ ဘောကာဂ့လျီတ် ကော ယုဝ် ဒီယေန့် ဒေါ ကွယ် ဂေ နာ အာတ့် အန်။ ဆေ အန် ဆီ တဲး အာဆေ ယမ်၊ အန် ဟဲ့ ပွိုန် ငဝ်း ယမ်။ ဆေ အန် ဆီ တဲး အာဆေ မိုဝ်း အာဆာက်၊ အန် ဟဲ့ ပွိုန် တဲး ဝီ တီ လွတ် ယမ်။ ဆေ အန် ဆီ စုဝ့် မျုက် ဝီ မှဝ် ဘော ဆီ တဲး ဝီ မှဝ် စုဝ်း၊ အန် ပွိုန် ဘူင် တူတ့် ဒွန် မျုဝ် ပီ အိုင် အန်။ 20 မာလဲ၊ အန် ဝီ ဘဲန် နဝ်း ပီခိုက် ဘော နဝ်း ဒိူဝ်၊ န့ တဲး အန် ကော ကာဒုး ဒီ လေး ဒဲင် မာလာင် အန်၊ တဲး ဘော အာဖုင် ဒင်ခုဝ် အန် ကော ဟြာယ်။ 21 အန် ဘော ကာဒုး ဒီ ဟုဝ် လေး ခဲင် ဖိုင် ဒူအီ၊ တဲး နဝ်း အန် ဝီ ပီ နဝ်း ဒုဝ် ဆတ်ဒါဝါ၊ တဲး အန် ဝီ ကွယ် ရိုမ် ဒူပ် ဂေ မာလာ ခဲင် ပြဲ၊ ဝီ ဟူမ် ပေတ့် ဂေ ပြဲ ပီ မာမက်၊ ဝီ အိတ် ကာတဲ ဂ့လ ခဲင် ဂ့လင်ဂ့လဲန့်။ အန် ခမ် အိုမ် ဂ့လာယ် ဂေ အိုမ် ဒီငါန်။ တဲး န့ ကော ဇမ် ပန် ဒီ ဝီ နပ် အန် ဇဝ်ဖြာ အီ တာင် လွှိုမ် တူတ့် ဘော အိုပ် တူတ့် မာန် မိူင် ဒူအီ ဒဲင် ကာဒါယ် နီ။ အန် ဇဝ် ဒီ ဘော အာပ် မာန် မိူင် ဂေ တီ ဒီ ဝီ ပီ အိုင် အန် တဲး ဂေ အိုပ်။
22 မာလဲ၊ မဲ ခုန်ဒီခမ် အာဘေလဆာစာ၊ မဲ ပီ ဘော ဟဲ့ နပ် တူတ့် လွင် အန် တီ မိူဝ်၊ မဲ ယီ တူ ပီတျီမ် နဝ်း မဲ။ 23 မဲ ဝီ ဘူင် ကာဘး ဒီ ဇဝ်ဖြာ အီ အိုပ် ဂါင်ဟြာဝ်၊ ဝီ စ်ု အီ ဒိုဝ်း ကွက့် အီ ဟဲ့ ဒွိုမ် ကွယ် ခဲင် ဟုဝ် ဇဝ်ဖြာ၊ တဲး ဂေ တး ဒူင် ကွယ် မဲ။ ခဲ့ ကွယ် ဂေ အာမူ အာမာတ် မဲ ဘော နာင် ဟောခမ် မဲ ဘော ဂေ အီဘိုန့် တျီ့ မဲ၊ မဲ တဲး ဂေ ဝီ ဒိုဝ်း ကွက့် တီ၊ ဝီ ဒျီင် အိုမ် မာငုန် နာ ခဲင်။ ဟဲ့ ဟွတ့်၊ ဘေ ဘော ဝီ အိူပ် မျုက် ဇဝ် ပီ ကြိုပ် ဘေ အီ မုး ရွိုန် ဂေ ခြိဝ်၊ ဘွင့် ဒေန့် ဂေ ဟိန်၊ ဟေ ဂေ မာဝ် အီ တူ နပ် ဒီ ဘူင် မာဆေ၊ တူ ယိုဝ် မာဆေ။ မဲ ယီ တူ ဝီ အိူပ် မျုက် ဇဝ်ဖြာ အီ ဘ်ု အာဆာက် မဲ၊ အီ တဲး မဲ မိုဝ်း ဖွိုမ် ဘော အိုပ် ပီ ဘူင် မဲ။ 24 ကူပ် န့ ပါယ် တီ ဇဝ်ဖြာ မိူဝ် ဟဲ့ တဲး ဒဲ ဒဲမ် ပဲ့ နီ။
25 ကာဆမ် ပဲ့ ပီ ဒဲမ် တီ ဘော တဝ်း၊ ‘မေနေ မေနေ ဒေကာလာ အူဖာစိန်’။
26 လွင် ဒါင် အန် န့ ပါယ် နီ။ ‘မေနေ’ န့ ဘော လေး၊ ဇဝ်ဖြာ ဟဲ့ တိး ဆီငဲ ဒီ တူတ့် အာခြာဝ် မာန် မိူင် ပီ အိုပ် မဲ ဘော အာခြာဝ် ဒီ ဟွတ့် ဒီ ဟြာယ် အန်။ 27 ‘ဒေကာလာ’ န့ ဘော လေး၊ မဲ ကာဒုး ဒီ ဆ ဒဲင် လစူ၊ န့ ဟဲ့ လိုဝ်း၊ မဲ ဟဲ့ န့စိုဝ်၊ တူ ကာအာပ် အိုပ် မိူင်။ 28 ‘အူဖာစိန်’ ဘော လေး၊ ဘော မာန် မိူင် ပီ အိုပ် မဲ၊ န့ ဒီ ကာယဝ်း ကာရေး၊ ကာဒုး ဒီ ကာဆာင် ဒွါ ဒီ ဂေ ဒူအီ မေဒီ ဂါယ် ဒူအီ ဘီရာဆီ။”
29 အာဒါနေလ ဟဲ့ ဟွတ့် ကာလာင် ဂြုဝ်း တီ၊ ခုန်ဒီခမ် အာဘေလဆာစာ ဘော စ်ု ဂေ၊ တဲး ဂေ ဒိုဝ်း တး ခြိုင် ရေန့် ဂဲ၊ ဝီ စှိုပ် ဒီ အာဒါနေလ၊ ဟွယ် ဘော မာကာဝဲ့ ခြိဝ် ဒီ မဲင် အန်။ ခုန်ဒီခမ် ဘော တဲး အီ ကာလာင် လွင် အာဒါနေလ ဟဲ့ ဘဲန် ဒါ ကာညာ ကာဒင် ဟာအူယ် ခဲင် မာန် မိူင် ပီ အိုပ် အန်။