1 ခုန်ဒီခမ် အာတာရိတ် ဘော ဘူင် ဒူပ် ပီ အိုင် အန်။ အန် မိူဝ် ရဝ်း ဂေ အာမူ အာမာတ် အန် အူ မာယဝ်း ဒီ အာ ဂိုဝ် ဝီ၊ တဲး ဂေ ဘဲန် ဒါ ကာညာ အီ အိုပ် မိူင်။ 2 ဒဲင် အာမူ အာမာတ် အန် တီ အန် ရဝ်း ဘော အာဒါနေလ ပေါ အာ ဝီ၊ တဲး ဂေ ဝီ ဘဲန် ဒါ တာင် အီ အိုပ် ဂေ အာမူ အာမာတ် အန်၊ ကွဲ့ တဲး ခုန်ဒီခမ် လိုဝ် စှိုမ် မာဆေ။ 3 အာဒါနေလ ဘော အိုပ် ဂေ အာမူ အာမာတ် ခုန်ဒီခမ် ဘော ဝဲ နပ် ဒီ ဘူင် အီ မွှိုမ် ဘဲန် မျုဝ် ဘဲန် မျုဝ် အီ ကျ လွှိုမ် ဒါ တာင် အာ ဝီ တွိုန်။ ခုဝ်၊ နဝ်း ဖွိုမ် ဇဝ်ဖြာ ကွယ် ခဲင် နဝ်း အန်။ ခုန်ဒီခမ် မိူဝ် မိုဝ်း နဝ်း ဆီ ဒါင် တဲး အန် ဘဲန် ဒါ တာင် အီ အိုပ် တူတ့် ခဲင် မာန် မိူင် အန်။ 4 ပါယ် တီ ဂေ ဒါ တာင် အီ အိုပ် မိူင် ဘော ဂေ အာမူ အာမာတ် ခုန်ဒီခမ်၊ ဂေ ဝီ ဟြေတ့် ဒီ ဖျာက် အာဒါနေလ လွင် ဂါန် ပီ ဘူင် အန်။ ဂေ ယီ တူ ပွိုန် ကာလာင် မာဆေ ပီ လုတ့် အန်။ ခုဝ်၊ အန် မိုဝ်း နဝ်း ဆိူဝ် နဝ်း မှာန်။ အန် မိူဝ် တူ ဘူင် အီ တူ မွှိုမ် ခေါ အူ မျုဝ်။ 5 ဟဲ့ ဟွတ့်၊ ကာတဲ ဂေ တွိုန် ဂေ ဘော လာယ် ဆင်ချာင် တဝ်း၊ “န့ မိုဝ်း မီ လွင် ဇဝ်ဖြာ ပီ ကြိုပ် အန်။ ဒဲင် တီ အာဝ် မိုဝ်း မာဆေ ပီ ဒီ ပွိုန် အေ ကာလာင် လွင် ပီ လုတ့် အန်။”

6 ပန် တီ ဂေ ဘော ဝီ ဟာဝ် ဒူင် ကွယ် ခုန်ဒီခမ် အာတာရိတ် တွိုန်။ ဂေ ဘော တဝ်း ဒီ အန်၊ “အိုယ် မဲ ခုန်ဒီခမ် အာတာရိတ်၊ တဲး အာဆာက် မဲ တူင့်။ 7 ခဲ့ ကွယ် ယေ အီ ဘူင် ဂါန် ခဲင် မာန် မိူင် ပီ အိုပ် မဲ နီ၊ ဘော မုး ဒါ တာင် ဘော ဒါ ကာညာ အီ အိုပ် မိူင်၊ ဒါ ကာညာ အီ ဒွါ အာကျာမ် အာငျာန် ဘော ဂေ အာမူ အာမာတ် မဲ ခုန်ဒီခမ်၊ ယေ ဟဲ့ လာယ် ဖြူမ် ရိုမ် တဝ်း၊ တဲး မဲ ခုန်ဒီခမ် ဒွါ အာမိင်၊ တဲး ဒူအီ ရဝ် ဒူအီ ကာင် ဘူင် ဒူပ် ခြန် ခြန်။ အာဒါ အူယ် ဂိုဝ် ဆီငဲ တဲး ဂေ ကြိုပ် မီ မဲ ခုန်ဒီခမ်။ ဆေ န့ ယီ မိုဝ်း အီ ဝီ ဆာခိုဝ် ဒီ ဇဝ် ဘော ဒီ ဒူအီ ဒဲင် မဲ ခုန်ဒီခမ်၊ ဒူအီ ဝီ တီ ဒီ ကာဒုး အီ ဒိုဝ်း ဘျွာ အန် ခဲင် ကာဒဝ် မာခြင်ဆီ။ 8 ပါယ် တီ တဲး မဲ ခုန်ဒီခမ် တာင် ဘ့လေး အာမိင်၊ ဒွက် ဘော ဇိုမ် မဲ ဒီ ပဲ့ အာမိင် ပီ ဘူင် မဲ တီ၊ ကွဲ့ တဲး အီ ပွိုန် ဒီ ဘျွင် ဒီ ပျာတ့် ဒေါ မှဝ်။ တဲး န့ ဒူပ် ထုင်ဂျာမ် ဒူအီ မေဒီ ဘော ဒူအီ ဘီရာဆီ အီ တူ ပွိုန် ကာပ့လု၊ တူ ပွိုန် ဘျွင် အာမိင် ခုန်ဒီခမ် ဒေါ မှဝ်။” 9 ခုန်ဒီခမ် အာတာရိတ် မိူဝ် ဒဲမ် ပဲ့ အာမိင် တီ။

10 ဒေါ ဝီ နပ် အာဒါနေလ လွင် ခုန်ဒီခမ် ဟဲ့ ထုတ် လေး အာမိင် တီ၊ အန် ဘော ဝီ ဝေန့် ဒီ ကာင် အန်။ ခဲင် ကာင် အန် ဒီ ခြွင့် နာ ဒဲင်၊ န့ ဘော မိုဝ်း ကာဒဝ် ပါတဲင် အီ ဝိုဝ်း မာငး ဟာဝ် နာ မိူင် ယေရူဆာလဲမ်။ အန် ဘော မုတ် ဂိုပ် ဆာခိုဝ် ဒီ ဇဝ်ဖြာ အူ ဆီငဲ အူယ် ဇေန့်၊ တဲး န့ ပီ ပီ ဒွိုမ် ဘူင် အန် ဆေဆေ။ 11 ဂေ ဖိုင် အာမူ အာမာတ် တွိုန်၊ ဂေ အီ ဟြေတ့် ပီ လုတ့် အာဒါနေလ၊ ဂေ ဝီ ယိုဝ် အန် ခြိုပ်ခြဝ် ဆာခိုဝ် ဒီ ဇဝ်ဖြာ။ 12 ဂေ ဝီ ဟာဝ် ဒူင် ကွယ် ခုန်ဒီခမ်၊ ကာလာင် ဒီ အန် လွင် ပဲ့ အာမိင် ပဲ့ ဟဲ့ ဒွါ အန်။ ဂေ ဝီ ဒီမွှတ် ခုန်ဒီခမ် တဝ်း၊ “မဲ ခုန်ဒီခမ် တာင်၊ မဲ ဟဲ့ ဒွက် ဇိုမ် ဒီ ပဲ့ အာမိင် အီ တဝ်း၊ အာဒါ အူယ် ဂိုဝ် ဆီငဲ၊ အာဆေ ကြိုပ် ဆာခိုဝ် ဒီ ဇဝ် ပေါ အူ ကာဒင် ဘော ဒီ ဒူအီ ဒဲင် မဲ ခုန်ဒီခမ် တာင်၊ အန် ဒီ ကာဒုး ဒီ ဘျွာ လူင် ခဲင် ကာဒဝ် မာခြင်ဆီ။” ခုန်ဒီခမ် မိူဝ် ဝီ တဝ်း၊ “အိုဝ် ဟဲ့ မှာန်၊ န့ ဘော မုး အာမိင် အီ ဟဲ့ ခြဲန့် ကာဆဝ် အီ ဒူပ် ထုင်ဂျာမ် ဒူအီ အာမျုဝ် မေဒီ ဂါယ် ဒူအီ အာမျုဝ် ဘီရာဆီ အီ တူ ပွိုန် ကာပ့လု၊ တူ ပွိုန် ဘျွင် ဒေါ မှဝ်။”

13 ဒူအီ ဂေ တွိုန် မိူဝ် ဝီ ကာလာင် ဒီ ခုန်ဒီခမ် တဝ်း၊ “အာဒါနေလ အီ ဘာ ခဲင် ဖိုင် ဒူအီ အာယူဒါ ပီ မှေတ့် တး ဂေ တွိုန်၊ အန် တူ ရုဝ်ဆေ မဲ ခုန်ဒီခမ်။ အန် မိူဝ် တူ ထူမ် အာမိင် ပီ ထုတ် လေး မဲ တီ။ အန် ဝီ ဆာခိုဝ် ဒီ ဇဝ်ဖြာ ပီ ကြိုပ် အန် အူ ဆီငဲ အူယ် ဇေန့်။” 14 ဒေါ ယိုဝ် ခုန်ဒီခမ် လွင် အန် တီ၊ အန် ဘော ကာစွာ ဘော ကာပိုန့် အူ ဇေန့်။ အန် ဘော ဝီ ဟြေတ့် ပီ ဒီ ပါယ် တဲး အန် ပွိုန် စွယ် ချွတ် အာဒါနေလ။ အန် ဘော ဂျုဝ်ဂျာ ဟြေတ့် ပီ ဒီ ပါယ် တဲး အန် ပွိုန် ဒီ လွတ် အာဒါနေလ။ န့ ကော ဝီ ဇမ် ဂေတ့် ဆီငဲ။

15 ဖိုင် အာမူ အာမာတ် ဂေ တွိုန် ပီ ဝီ တး ဒူင် ကွယ် ခုန်ဒီခမ်၊ ပီ ဝီ တဝ်း ဒီ အန်၊ “မဲ ခုန်ဒီခမ် တာင်၊ တဲး မဲ လှုဝ်း လွင် ဒါရာ ဒူအီ အာမျုဝ် မေဒီ ဂါယ် ဒူအီ အာမျုဝ် ဘီရာဆီ အီ မုး ပဲ့ အာမိင် ပီ ထုတ် လေး မဲ ခုန်ဒီခမ်၊ အီ ဟဲ့ ဟွတ့် ဒွက် ဇိုမ်၊ တူ ပွိုန် ဘျွင် တူ ပွိုန် ကာပ့လု ဒေါ မှဝ်။”

16 ဝါယ် အန် တီ ခုန်ဒီခမ် ဘော ဝီ ဒွါ အာမိင်၊ တဲး ဂေ မှေတ့် အာဒါနေလ ဟာဝ် ဘျွာ အန် ခဲင် ကာဒဝ် မာခြင်ဆီ။ ခုန်ဒီခမ် ဝီ ကာလာင် ဒီ အာဒါနေလ တဝ်း၊ “တဲး ဇဝ်ဖြာ ပီ ကြိုပ် မဲ ချွတ် မဲ။”

17 ဂေ မိူဝ် ဒိုဝ်း တး မာဝ် ဒီဖ့လ တာင်၊ တဲး န့ ကာဘိတ် ကာဒဝ် တွိုန်။ ခုန်ဒီခမ် မိူဝ် ဒွက် ဇိုမ် အီ မုး ဇိုမ် အန် ဘော ဇိုမ် ဂေ အာမူ အာမာတ် အန်။ အန် ဒွက် ဒိုက် ဇိုမ် တီ ဒဲင် မာဝ် ဒီဖ့လ တွိုန်၊ ကွဲ့ တဲး န့ မိုဝ်း အာဆေ အီ ပွိုန် ဒိုဝ်း လေး အာဒါနေလ။ 18 ဟဲ့ ဟွတ့် ပါယ် တီ ခုန်ဒီခမ် ဝီ ဝေန့် ခဲင် ဟုဝ် အန်။ အန် မိူဝ် တူ ဟူမ် တူ ဒျီင် မာဆေ။ အန် တူ ဘူင် အီ ဘျုဝ် အီ ကျဝ် ခေါ အူ မျုဝ်။ ခဲင် မှိုဝ် တီ အန် မိူဝ် တူ ပွိုန် ဒီ အိတ်။

19 န့ ဘော ဇမ် ဘာင် ဒီ ဝး၊ ခုန်ဒီခမ် ဘော ယိတ့် ဆိန့် ဆိန့်ဝး စေဝ်၊ ပီခြန် အန် ဟာဝ် ဒူင် ကွယ် ကာဒဝ် မာခြင်ဆီ တွိုန်။ 20 အန် ဘော ဟာဝ် ဇမ် ဘာင် ကာဒဝ် မာခြင်ဆီ တွိုန်၊ အန် ဘော ကာပိုန့် ဘော ဒတ် ဒဲ့ အာဒါနေလ တဝ်း၊ “အိုယ် အာဒါနေလ အီ မုး ဒဲစေန့် ဇဝ်ဖြာ အီ ကွယ် ဆေဆေ၊ ဇဝ်ဖြာ ပီ ကြိုပ် မဲ တီ၊ အန် ဟဲ့ ပွိုန် ချွတ် မဲ၊ တဲး မဲ လွတ် ဒီ မာခြင်ဆီ ဂေ တီ။း”

21 အာဒါနေလ မိူဝ် ဝီ တဝ်း ဒီ ခုန်ဒီခမ်၊ “အိုဝ်၊ တဲး မဲ ခုန်ဒီခမ် မိုဝ်း အာဆာက် တူင့်။ 22 ဇဝ်ဖြာ ဟဲ့ စ်ု အာမူ အာမာတ် အန်၊ တဲး ဂေ တး ကာဘိတ် မူတ့် မာခြင်ဆီ။ အုဝ် မိူဝ် ဟဲ့ လွတ် ဒီ မာခြင်ဆီ ဂေ တီ။ အန် ဇဝ် ဘူင် ပါယ် တီ ခုဝ်၊ အန် နပ် အုဝ် တူ မိုဝ်း ဒီ ဘူင် မှာပ် ဒီ အာတ့် အန် ဇဝ်။ အုဝ် မိူဝ် တူ မိုဝ်း ဒီ ဘူင် လုတ့် မဲ ခုန်ဒီခမ်။”

23 ခုန်ဒီခမ် မိူဝ် ခူယ် ကာဆဝ်။ အန် ဝီ စ်ု ဂေ ဒိူတ် လေး အာဒါနေလ ခဲင် ကာဒဝ် တွိုန်။ ပါယ် တီ ဂေ မိူဝ် ဒိုဝ်း လေး အာဒါနေလ ခဲင် ကာဒဝ် မာခြင်ဆီ။ အန် မိူဝ် တူ မိုဝ်း ဒူင် ဒိမ် ဒူင် ဘ့လိူင် ဒီ မှဝ် ကူပ် ညှိုမ် ဘိုင် အန် ဇဝ်ဖြာ။

24 ဝါယ် အန် တီ ခုန်ဒီခမ် ဝီ ဘ့လေး အာမိင်၊ တဲး ဂေ မှေတ့် တူတ့် ဂေ ဒူအီ အီ ကာဖြူမ် ဒီ ဖျာက် အာဒါနေလ၊ ဝီ ဘျွာ ဂေ ခဲင် ကာဒဝ် မာခြင်ဆီ တွိုန်၊ ဘော အီဘိုန့် ဂေ ဘော ဂွန် ဂေ ဘောကာဂ့လျီတ်။ ပါယ် တီ ဂေ ညှမ် ဒန် ဇမ် ကာဒမ် ကာဒဝ် တွိုန်၊ မာခြင်ဆီ ဟဲ့ ဒဲန် ပ ဒီ ဂေ ဘော ကာယာတ့် ဟူမ် ယင် ဂေ၊ ကာဘက် ဘော ကာအာင် ဂေ။

25 ဝါယ် အန် တီ ခုန်ဒီခမ် အာတာရိတ် ဝီ ဒဲမ် ပဲ့ အာမိင်၊ တိုယ် ဟာဝ် ဒီ ဒူအီ ဒွန် ဇိုဝ် ဒွန် ခြိုဝ် အီ ကာလာင် ဂြုဝ်း မျုဝ် မှဝ် မျုဝ် အန် အီ ကွယ် ခဲင် မိူင် ဘော မိူင်။ အန် တဝ်း၊ “တဲး ဘေ ကွယ် ဒါခိုယ်၊ ကွယ် ဂျာမ်ဆာ ဒွန် အီ။

26 အုဝ် ဟဲ့ ဘ့လေး အာမိင် တဲး ဘေ ဒူအီ အီ ကွယ် ခဲင် မာန် မိူင် ပီ အိုပ် အုဝ် နီ ယုဝ် ဘော ရုဝ်ဆေ ဇဝ်ဖြာ ပီ ကြိုပ် အာဒါနေလ။ ခုဝ်၊ အန် ဇဝ် မုး ဇဝ်ဖြာ အီ အိမ်။ အန် ဘော အိုပ် ဘော ယွတ် မဲန် ကာဒါယ် နီ ဆေဆေ။ မာန် မိူင် ပီ အိုပ် အန် မိူဝ် တူ လိုဝ် တူ ဟြာယ် ဒေါ မှဝ်။ မိူင် ပီ အိုပ် အန် မိူဝ်၊ န့ တူ နပ် ဒီ ဆိူတ်၊ အာဝ် နပ် ဒီ တူတ့် ဒေါ မှဝ်။

27 အန် ဇဝ် ဘော မုး ဇဝ်ဖြာ အီ ပွိုန် ချွတ် အေ။ အန် ဇဝ် မိူဝ် နပ် ဒီ ဘူင် အီ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ် ဘော ခဲင် ဂါင်ဟြာဝ် ဘော ဒဲင် ကာဒါယ်။ အန် မိူဝ် ဟဲ့ ချွတ် အာဒါနေလ တဲး အန် လွတ် ယမ် ဒီ မာခြင်ဆီ။”

28 ပါယ် တီ အာဒါနေလ ဘော ပွိုန် ဒီ ကွယ် ဒါခိုယ် ဒေါ မုး စုဝ် ဘာန် ခုန်ဒီခမ် အာတာရိတ် ဘော စုဝ် ဘာန် ခုန်ဒီခမ် အာဆာယ်ရတ် အီ မုး ဒူအီ အာမျုဝ် ဘီရာဆီ။