1 အာဘေလဆာစာ ဟဲ့ ဘဲန် ခုန်ဒီခမ် အီ အိုပ် မိူင် ဘာဘဲ အာဒါ အူ ဆီနမ်။ ဒေါ အန် တီ အာဒါနေလ ဘော မ့ဘာဝ် ဘော ယိုဝ် ပီ ဘျ ဇဝ်ဖြာ ဒီ အန် ဒေါ ဆီငျာ ကွယ် အန် ဒဲင် ကာစှူင့် အိတ် အန်။ အန် မိူဝ် ဒဲမ် အုန် လွင် ပီ မ့ဘာဝ် အန် တီ။

2 န့ တဝ်း၊ “အုဝ် အာဒါနေလ ဟဲ့ ယိုဝ် ပီ ဘျ ဇဝ်ဖြာ ဒီ အုဝ် ခဲင် မှိုဝ်။ ခုန် ဘော ဘုတ် တး ဒီ ဖွုန် ကာတုဝ့် ကာဒါယ် ဘော ဘုတ် ခဲင် အိုမ် နမ်မုက်ဆာရာ၊ တူ တဲး န့ ယေန်။ 3 ဒုဝ် ဆတ်ဒါဝါ ဖွုန် ဒုဝ် အီ တာင် အီ မွှိုမ် ယုဝ် ဘော လေး တး ခဲင် အိုမ် နမ်မုက်ဆာရာ တီ။ ဖွုန် ဒုဝ် တီ တူ လာယ် ခါနှဲန်။

4 ဒုဝ် ဆတ်ဒါဝါ အီ တာင် ဂေ တီ ဒုဝ် ဒေါ ဂုဝ် မိုဝ်း အာရိုပ် အီ ပီ မာခြင်ဆီ။ န့ ဘော မိုဝ်း ဖျီင် ပီ ဖျီင် မာဂ့လာင်။ ဒေါ ဆီငျာ ယွတ် အုဝ် တီ၊ န့ ဘော မိုဝ်း အီ ဒိူတ် လေး တူတ့် ဖျီင် အန်။ ဒုဝ် တီ ဘော ဟုဝ့်၊ တဲး အန် စွင့် ပီ ဒူအီ။ ဂေ ဘော ဟပ် နဝ်း ဒူအီ ခဲင် ဒုဝ် ဘူင့် အန်။

5 ဟဲ့ ဟွတ့်၊ ပီ ဝီ မိုဝ်း ဒုဝ် ဆတ်ဒါဝါ ပေါ အူ ဒုဝ်။ ဟဲ့ မုး ဒုဝ် ဟာအာ။ အာရိုပ် အန် ဘော ပီ မာဂြေး။ အန် ဘော စွင့် ဒီ ပ့လဝ် ပန် အန် အာ ဘ့လာက်။ အန် ဘော ကာပ် ကာအာင် ဘြေတ့် အာဒါ အူယ် ဘူင့် ခဲင် မူတ့် အန်။ န့ ဘော မိုဝ်း ဂြုဝ်း အီ တဝ်း ဒီ အန်၊ ’ယိတ့်၊ တဲး မဲ ဟူမ် ယင်၊ တဲး မဲ ကော ဖဲ။’”

6 ဒေါ ဆီငျာ ယွတ် အုဝ် တီ၊ န့ ပီ ဝီ မိုဝ်း ဒုဝ် ဆတ်ဒါဝါ ပေါ အူ ဒုဝ် ဝီ ကာပ့လုး ဒီ အုဝ်။ အာရိုပ် အန် ဘော ပီ မာဒီဝါယ် ဆီဇိုမ်။ ဒဲင် ကာတု အန် ပီ ဝီ မိုဝ်း ဖျီင် ဖွုန် ဘူင့် အီ ပီ ဖျီင် မာဆိမ်။ ဒုဝ် တီ ဘော မိုဝ်း ဂိန့် ဖွုန် ဂိန့်၊ မိုဝ်း ဘော ပွုန် ဒီ အိုပ် အီ။

7 ဒေါ ဆီငျာ ယွတ် အုဝ် တီ၊ ဒုဝ် ဆတ်ဒါဝါ ဒုဝ် မ့ဖွုန် ပီ ဝီ ကာပ့လုး ဒီ အုဝ်။ ဒုဝ် နီ ဘော မိုဝ်း ပ့လူမ် မိုဝ်း ဟဲန့် ဘော မွှိုမ် ယုဝ် ကာဆဝ်။ အန် ဘော မိုဝ်း ဟြာင် ဟိန် အီ ပွိုန် ကာပ် ပွိုန် ကဝ့် ဒုဝ် ပဲ့ ဟဲ့ မှေတ့် အီ။ အန် ဘော တာ ပ့လဝ် အန် ညဲတ့် အီ ဆီ ဂိတ် ဆီ ကွယ်။ ဒုဝ် တီ ဘော လာယ် ဘ့လိူင် ဒီ ဂေ ဒုဝ် ပီ ယိုဝ် အုဝ် ခါ အာတ့်။ အန် ဘော မိုဝ်း နိုင် ဘတ့် ဂိုဝ် ဘူင့်။

8 ဒေါ ဆီငျာ ယွတ် အုဝ် ဒီ နိုင် အန် ဂေ တွိုန်၊ အုဝ် ဝီ ယိုဝ် နိုင် ဘတ့် ဒီတဲတ် အူ ဘူင့် ဝီ လေး တး ကာတဲ နိုင် ဘတ့် ဂိုဝ် ဘူင့် တွိုန်။ နိုင် ဘတ့် ဒီတဲတ် တီ ဘော ဝီ ရိုတ့် လေး နိုင် ဘတ့် အီ ကွယ် ဘြိမ် တွိုန် အူယ် ဘူင့်။ နိုင် ဘတ့် ဒီတဲတ် တီ ဘော မိုဝ်း ငါယ် ပီ ငါယ် ဒူအီ။ အန် ဘော မိုဝ်း မူတ့် အီ နပ် ဒီ ကာလာင် ဂြုဝ်း ပီဖုင် ပီခိုက် ကာဆဝ်။

9 ဒေါ ဆီငျာ ယွတ် အုဝ် တီ၊ အုဝ် ဝီ ယိုဝ် ဂေ ဘ့လေး မာလာင် ဘဲန် ဘူင့် ဘဲန် ဘူင့်။ အန် ဇဝ် အီ ကွယ် ဆိန့် ဒေါ မွိုန် အီ ဟဲ့ လှေန့် ကာဆဝ် ဘော တုတ့် ဒဲင် မာလာင် အူ ဘူင့်။ ခြိုင် ပီ တာ အန် ဘော လုယ် ရာဝ် ပီ ဘျြီ။ ဟိုက် ဂိန့် အန် မိူဝ် လုယ် ပီ ဟိုက် မာဘူ။ မာလာင် ဒူင် တုတ့် အန် တီ ဘော ပီ ပ့လဲ့ ငဝ်။ ကာလေန့် အီ ကွယ် ဒီ မာလာင် တီ ဘော ပီ ငဝ် ကုး။

10 စီညွင့် ငဝ် တီ ဘော လေး နာ အာတ့် အန် ဇဝ်၊ တဲး န့ ပီ ဘ့လဲင် အိုမ်။ န့ ဘော မိုဝ်း ဒူအီ ဘဲန် မှိုန့် ဘဲန် ဆဲန် အီ ဒီ ဘူင် ဂါန် အန် ဇဝ်။ ဘော မိုဝ်း ဒူအီ ဘဲန် အူ ကာဒ အူ ကာဒေ ယီ ဟာဝ် စွင့် နာ အာတ့် အန် ဇဝ်။ ဒါ အီ ဒီ ဆုင်ဖျာတ် အာမူ အီ မိူဝ် ဟဲ့ ဟွတ့် တုတ့် ဒီ မာလာင် ဂေ တွိုန်။ ဂေ မိူဝ် ဟဲ့ ဟွတ့် ဝိုဝ်း အုန် ဘပ် ဂေ။

11 ဒေါ အန် တီ အုဝ် မိူဝ် ယွတ် နိုင် ဘတ့် ဒီတဲတ် တွိုန်။ အန် ကာလာင် ဂြုဝ်း အီ ပီခိုက် ကာဆဝ်။ အုဝ် ဘော ယွတ် ကော ဇမ် ပန် ဒီ ငဝ်း ယမ် ဂေ ဒုဝ် ဆတ်ဒါဝါ ဒုဝ် မ့ဖွုန် တွိုန်။ ဒုဝ် ယမ် အန် တီ၊ ဂေ ဘော ဝီ ဟာဝ် ဇတ့် ခဲင် ငဝ်၊ တဲး န့ ကာဆိုမ်။ 12 ဂေ ဒုဝ် ဆတ်ဒါဝါ ဒုဝ် ဟဝ် အူယ် ဒုဝ် တွိုန်၊ ဂေ အာဝ် ဟူ မိုဝ်း ပွုန် အီ ပွိုန် အိုပ်။ မာလဲ၊ ဂေ ယီ ပွိုန် ကွယ် အာဒါ အူ ကာစန်။

13 ခဲင် မှိုဝ် တီ အုဝ် ဝီ ယိုဝ် ဒါ အူ ဝီ။ အာရိုပ် အန် ပီ ဂွန် ဒူအီ။ အန် ဘော ပဝ့် န့အု၊ တး ဒူင် ကွယ် အန် ဇဝ် အီ ကွယ် ဆိန့် ဒေါ မွိုန် အီ ဟဲ့ လှေန့် ကာဆဝ်။ ဝီ တီ ဘော ပွိုန် ဟာဝ် ကွယ် နာ အာတ့် အန် ဇဝ်။ 14 အန် ဇဝ် အီ ဟဲ့ ကွယ် ဆိန့် ဒေါ မွိုန်၊ အီ ဟဲ့ လှေန့် ကာဆဝ် တွိုန်၊ အန် ဟဲ့ ဒွါ ဒီ ဝီ တီ၊ တဲး အန် မိုဝ်း ပွုန်၊ မိုဝ်း အာဖုင် ဒင်ခုဝ် ဘော တဲး အန် ပွိုန် အိုပ် တူတ့် ဒွန် မျုဝ်။ ခဲ့ ကွယ် အာမျုဝ် ဒူအီ ဘောကာဂ့လျီတ်၊ ဒွန် ဇိုဝ် ဒွန် မျုဝ် အီ ကာလာင် ဂြုဝ်း မျုဝ် မှဝ် မျုဝ် အန် ဘော ကြိုပ် အန်။ မိူင် ပီ အိုပ် အန် တီ၊ န့ ဘော မုး မိူင် အီ တူ နပ် ဒီ ဘ့လိူင်၊ တူ နပ် ဒီ ဟြာယ် ဒေါ မှဝ်။ ပွုန် အီ တဲး အန် ဘဲန် ခုန်ဒီခမ် တွိုန် မိူဝ်၊ န့ တူ နပ် ဒီ လိုဝ် ဒီ ဟြာယ် ဒေါ မှဝ်။ 15 အုဝ် အီ မုး အာဒါနေလ၊ အုဝ် ဘော ယိုဝ် ပီ ဘျ ဇဝ်ဖြာ တီ။ န့ တဲး အုဝ် ကာစွာ ဘော ဘဲန် က့လိုဝ် ဘဲန် ငှဝ်။ 16 အုဝ် ဘော ဟာဝ် ဒီ ဒူအီ အူ ဝီ အီ ကွယ် ကာတဲ ဂေ ဒူအီ ကိူန် တွိုန်။ အုဝ် ဘော ဒီမွှတ် လွင် ဒါင် အီ မုး နာ မှာန် ဒီ အန်။ အန် မိူဝ် ကာလာင် ပီ ပါယ် လွင် ဒါင် အန် ဒီ အုဝ်။ 17 အန် တဝ်း၊ “ဒုဝ် ဆတ်ဒါဝါ ဖွုန် ဒုဝ် တီ ဘော မုး ခုန်ဒီခမ် ဖွုန် ကာဒင် အီ အိုပ် ဖွုန် မိူင်၊ အီ ဒီ ဘုဝ် တး ဒဲင် ကာဒါယ် နီ။ 18 ဒူအီ အီ ဘွတ် အီ မုး ဒူအီ ပီ အိုပ် ဇဝ်ဖြာ အီ အိုပ် တူတ့် ဒွန် မျုဝ် တွိုန်၊ ဂေ ဒီ ဘော ပွိုန် ဒီ အိုပ် မာန် မိူင် တီ။ ဂေ ဒီ ဘော အိုပ် မာန် မိူင် တီ ဆေဆေ ဒွန် စုဝ် ဒွန် ဘာန်။”

19 ဟဲ့ ဟွတ့် ပါယ် တီ အုဝ် ဝီ ဆီ နပ် အီ မှာန် အာခါခ်ု လွင် ဒုဝ် ဆတ်ဒါဝါ ဒုဝ် မ့ဖွုန် တွိုန်။ အန် လာယ် ဘ့လိူင် ဒီ ဒုဝ် ဟဝ် ဂေ တွိုန် ဘော မွှိုမ် ယုဝ် ကာဆဝ်။ န့ဟိမ် ပ့လဝ် ဂေ န့ဟိမ် ဒဲ အီ မုး ဘွင့် ဒေန့် ဘော ဟြာင် ဟိန် အန် ဘော နပ် ဒီ ကဝ့် ဟူမ် ဘော ဒွန် မျုဝ် ဘော ကာယာတ့် ကာဘက် တဲး န့ လိုဝ်။ အန် ပီ ဝီ တာ ပ့လဝ် အန် ညဲတ့် အီ ဆီ ဂိတ် ဆီ ကွယ်။ 20 အုဝ် ဝီ ဆီ နပ် ဘော လွင် နိုင် ဘတ့် ဂိုဝ် ဘူင့် အီ ကွယ် ဒဲင် ဂိန့် အန် ဘော နိုင် ဒီတဲတ် အီ ဝီ လေး ဒီ ပန်၊ အီ ဝီ ပွိုန် ထွတ် လေး နိုင် အီ ဟဲ့ ကွယ် ဘြိမ် အာဒါ အူယ် ဘူင့်။ န့ မုး နိုင် အီ ဟဲ့ တာင် လွှိုမ် နိုင် ဟဝ် ဘော မိုဝ်း ငါယ် ဂေ မူတ့် အီ နပ် ဒီ ကာလာင် ဂြုဝ်း ပီဖုင် ဘော ဂြုဝ်း အီ ပီခိုက် ကာဆဝ်။ 21 ဒေါ ဆီငျာ ယွတ် အုဝ် တီ၊ နိုင် ဘတ့် ဒီတဲတ် ဘော ကာဂုဝ်း ဒီ ဂေ ဒူအီ ဘွတ် ပီ အိုပ် ဇဝ်ဖြာ ဘော ပဲ ဂေ။ 22 အန် ဇဝ် အီ ဟဲ့ မိုဝ်း ဟဲ့ ကွယ် ဆိန့် ဒေါ မွိုန်၊ အီ ဟဲ့ လှေန့် ကာဆဝ် ဘော တး ဇမ် ဘော ဆုင်ဖျာတ် ဒါရာ ဒီ ဒူအီ ဘွတ် ပီ အိုပ် ဇဝ်ဖြာ။ ပန် တီ အာခြာဝ် အန် ဟဲ့ ဟွတ့် ဇမ်၊ တဲး ဒူအီ ဘွတ် ပီ အိုပ် ဇဝ်ဖြာ ဘော ပွိုန် ဒီ အိုပ် မိူင်။

23 ဒူအီ ဝီ တွိုန် ဘော ဝီ ကာလာင် နှဲ ဒီ အုဝ် တဝ်း၊ “ဒုဝ် ဆတ်ဒါဝါ ဒုဝ် မ့ဖွုန် တီ၊ အန် မုး မာန် မိူင် မ့ဖွုန် အီ ဒီ ကွယ် ဒဲင် ကာဒါယ် နီ။ န့ ဘော လာယ် ဘ့လိူင် ဒီ မိူင် အူယ် မျုဝ် အီ ဟဲ့ ဒွိုမ် မိုဝ်း။ ဒုဝ် ဆတ်ဒါဝါ ဒုဝ် တီ၊ အန် ဒီ ဘော ကဝ့် ဟူမ် ကာယာတ့် ဘော ညဲတ့် မိူင် အီ ကွယ် ဒဲင် ကာဒါယ် ဘောကာဂ့လျီတ်။ 24 နိုင် ဘတ့် ဂိုဝ် ဘူင့် တွိုန် ဘော မုး ခုန်ဒီခမ် ဂိုဝ် ကာဒင် အီ ဒီ အိုပ် မာန် မိူင် ဂေ တီ။ ဝါယ် ဂေ တီ န့ ပီ ဒီ ဝီ မိုဝ်း ခုန်ဒီခမ် ပေါ အူ ကာဒင်။ အန် ဒီ လာယ် ဘ့လိူင် ဒီ ဂေ ခုန်ဒီခမ် အီ ဟဲ့ ကွယ် အာတ့် အန် တွိုန်။ အန် ဒီ ဘော ဘ့လွာ့ စုဝ်း ဂေ ခုန်ဒီခမ် အူယ် ကာဒင်။ 25 အန် ဒီ ဘော ကာလာင် ကာဘး ဘော ဒီ ဇဝ်ဖြာ အီ ဟဲ့ တာင် လွှိုမ် တူတ့်။ အန် ဒီ ဘော ခါနှာပ် ဂေ ဒူအီ ဘွတ် ပီ အိုပ် ဇဝ်ဖြာ။ အန် ဘော ဂျုဝ်ဂျာ ဒီ ကာပ့လု ဝဲန် ထုင်ဂျာမ် ဘော ဒါရာ။ အန် ဒီ ဘော ပွိုန် ဒီ အိုပ် ဂေ ဒူအီ ဘွတ် ပီ အိုပ် ဇဝ်ဖြာ အာဒါ အူယ် ဆီနမ် ဒီ ဒဝ် မာဂျီန်။

26 ဝါယ် အန် တီ ဒူအီ အီ ဆုင်ဖျာတ် ဒါရာ အီ ကွယ် ခဲင် ဂါင်ဟြာဝ်၊ ဂေ ဒီ ကွယ် ဒဲင် မာလာင် ဂေ ဘော ဒိုဝ်း ဝဲန် ဘော ပျာတ့် ပွုန် အန်၊ တဲး န့ လိုဝ် တူတ့်။ 27 ပွုန် ဘော အာဖုင် ဒင်ခုဝ် အီ အိုပ် မာန် မိူင် ဒဲင် ကာဒါယ် နီ ဘောကာဂ့လျီတ်၊ ဂေ ဒီ ဘော ဝီ အာပ် ဒီ ဒူအီ ဘွတ် ပီ အိုပ် ဇဝ်ဖြာ အီ တာင် လွှိုမ် တူတ့်။ ပွုန် ဘော အာဖုင် ဒင်ခုဝ် တီ ဘော မုး ပွုန် ဘော အာဖုင် ဒင်ခုဝ် အီ ကွယ် ဆေဆေ။ ဂေ ဒါ ကာညာ အီ အိုပ် ကာဒါယ်၊ ဂေ ဒီ ကာဒုး ဒီ ဘူင် ပီ အိုင် ဂေ ဒူအီ ဘွတ် ပီ အိုပ် ဇဝ်ဖြာ အီ တာင် လွှိုမ် တူတ့် ဘော ထူမ် ဂြုဝ်း ဂေ။”

28 အာတီ ဟဲ့ မုး လွင် ဒါင် ပီ မ့ဘာဝ် အုဝ်။ အုဝ် အာဒါနေလ မိူဝ် ဟဲ့ ကာစွာ ဟဲ့ ကာပိုန့် ကာဆဝ်။ နာ အုဝ် ကော ကာဟဝ်း တွင့်။ ပီ ဘော ဟဲ့ ပါယ် တီ မိူဝ်၊ အုဝ် ယီ ဝီ တဲး အုဝ် နုဝ် အုန် လွင် အန် တီ ခဲင် နဝ်း အုဝ်၊ တူ တဲး အီ ဟဝ် နပ်။