1 ခုန်ဒီခမ် အာဘေလဆာစာ ဟဲ့ ဘဲန် ခုန်ဒီခမ် အီ အိုပ် မိူင် အာဒါ အူယ် ဆီနမ်။ ဒေါ အန် တီ အုဝ် အီ မုး အာဒါနေလ ဝီ ယိုဝ် ပီ ဘျ ဇဝ်ဖြာ ဒီ အုဝ် ပေါ အူ မျုဝ်။ န့ နှဲန် ပဲ့ ဟဲ့ ဟွတ့် ယိုဝ် အုဝ် တွိုန်။ 2 ပီ ယိုဝ် အုဝ် တီ န့ ပါယ် နီ။ န့ ပီ အုဝ် ဟဲ့ ကွယ် ခဲင် မိူင် ဆူဆာန် အီ ကွယ် ခဲင် ကာဒါယ် အိူင် အေလမ်။ အုဝ် မိူဝ် ဟဲ့ စွင့် ခူပ် ဘ့လဲင် အိုမ် အီ စိူဝ် အူလာယ်။ 3 ခူပ် ဘာင် အိုမ် တီ၊ အုဝ် ဝီ ယိုဝ် မာဘူ အာလူင့် အူ ဒုဝ်။ အန် ဘော မိုဝ်း နိုင် ဘတ့် အီ တူင့် အာ ဘူင့်။ နိုင် ဘတ့် အူ ဘူင့် ဟဲ့ တူင့် လွှိုမ် ပေါ အူ ဘူင့်။ နိုင် တူင့် တီ ယီ လေး တး ဒီ ပန်။ 4 အုဝ် ဝီ ယိုဝ် မာဘူ အာလူင့် တီ၊ အန် ဘော တာ နိုင် အန်၊ ဝီ တုး နာ ဂေတ့် ဆီငဲ ဘော တုး နာ ကွာ ဘော နာ တေတ့် ဘော အူယ် ဘ့လာက်။ ခဲ့ ကွယ် ဂေ ဒုဝ် ဆတ်ဒါဝါ အာဝ် မိုဝ်း အီ ပွိုန် ခမ် အန် ခေါ အူ ဒုဝ်။ န့ မိူဝ် တူ မိုဝ်း ဒုဝ် အီ ပွိုန် လွတ် ဒီ အန်။ အန် မိူဝ် ဘူင် ခဲ့ ပီ အိုင် အန်။ အန် ဘော ဝဲ မိုဝ်း ပ့လူမ် မိုဝ်း ဟဲန့်။

5 ဒေါ ဆီငျာ ကာဒွါ့ ကာဖာ အုဝ် လွင် အန် တီ၊ န့ ပီ ဝီ မိုဝ်း ဘော မာပဲ အာလူင့် အူ ဒုဝ်။ အန် ဘော ကာဘ့လဲပ် တး ခြန် ခြန်၊ တး နာ ဂေတ့် ဆီငဲ။ ပ့လဝ် အန် ကော နှဲန် ဟူ ဇာပ် ဒီ ကာဒါယ်။ အန် မိုဝ်း နိုင် ဘတ့် အူ ဘူင့် အီ ဟဲ့ မန် ဆီချာ၊ အီ လေး ဒီ ကာတဲ ငါယ် အန်။ 6 အန် ကာဘ့လဲပ် ဟာဝ် ဒူင် ကွယ် မာဘူ အာလူင့် ပဲ့ ဟဲ့ ယိုဝ် အုဝ်၊ အီ ကွယ် ခူပ် ဘာင် အိုမ် တွိုန်။ အန် မိူဝ် ဒဲန် ပ ဒီ မာဘူ အာလူင့် တွိုန် ခဲ့ ဆီ ဟဲန့် အန်။ 7 အုဝ် မိူဝ် ဘ်ု ဒီ ယွတ် ပီ ပါယ် အန် ဒီ တုး မာဘူ အာလူင့် တွိုန်။ မာပဲ တွိုန် မိူဝ် ဟဲ့ ရူ ကာဆဝ်။ အန် ဘော တုး မာဘူ အာလူင့် တွိုန်၊ တဲး နိုင် အန် ကော ကာဘက် ဘော အာ ဘ့လာက်။ မာဘူ အာလူင့် တွိုန် အာဝ် ဟူ မိုဝ်း ဟဲန့် ဒီ ဝီ ကာခဲန့် ဒီ မာပဲ။ အန် ဘော ကေး လူင် ဒဲင် ကာဒါယ် အူ ဇေန့်။ မာပဲ အာလူင့် တွိုန် ဘော ဟာဝ် ညဲတ့် ဒဲင် အန်။ န့ ယီ တူ မိုဝ်း ခေါ အူ ဝီ အီ ပွိုန် ချွတ် တဲး မာဘူ အာလူင့် တွိုန် လွတ်။ 8 ပါယ် တီ မာပဲ တွိုန် ယီ ဝဲ မိုဝ်း ဟဲန့် ကာပွါ။ ဒေါ ဟဲ့ ဟဲန့် တိူက် အန် တီ၊ နိုင် တာင် အန် အူ ဘူင့် ဘော ကာဘက် စုဝ်း။ ဒူင် ကွယ် ပန် နိုင် အန် တွိုန်၊ န့ ပီ ဝီ မိုဝ်း နိုင် ဘတ့် ပေါ ဖွုန် နိုင် အီ ဝီ လေး။ နိုင် တီ ဘော မာငး ညိူဝ် ဖွုန် ဘ့လာက် ခဲင် ဂါင်ဟြာဝ်။

9 နိုင် အန် ဂေ တွိုန် အာဒါ နိုင် အူ ဘူင့် ပီ ဝီ မိုဝ်း နိုင် ဒီတဲတ် အူ ဘူင့် အီ ဝီ လေး။ ဟဲန့် ဂါယ် အာဖုင် ဒင်ခုဝ် အန် ဘော ကိူန် ကာဆဝ်။ နိုင် တီ မိူဝ် မာငး ဟာဝ် ဘ့လာက် နာ တေတ့်၊ နာ လေး ဆီငဲ ဘော နာ ကွယ် မိူင် အီဆာရေလ အီ ဟဲ့ စှိတ် ကာဆဝ်။ 10 အန် ဘော ဝဲ တာင် တဲး အန် ကော ပွိုန် ဒီ ကာဂုဝ်း ဘော ဒါ ဆိုက် မျုဝ် အီ ကွယ် ခဲင် ဂါင်ဟြာဝ်။ အန် ဘော ဒိုဝ်း ဆီမန့် အီ ကွယ် ခဲင် ဂါင်ဟြာဝ် မင် ကာလဝ့်၊ ဂ့ဝါ စုဝ်း ဂေ ဒဲင် ကာဒါယ် ဘော ညဲတ့် ဟာဝ် နာ ဒဲင်။ 11 အန် ဘော ပီခိုက် အန် ဒီ ဒါ တာင် အီ ယဲတ့် ဒါ ဆိုက် မျုဝ် အီ ကွယ် ခဲင် ဂါင်ဟြာဝ် တီ။ အန် အာဝ် ဟူ ခ့ဝါင် ဂေ လှူ ဒွန် မှိုဝ် ဒွန် ညှာ ဒီ ဒါ တာင် အီ အိုပ် ဒါ ဆိုက် ဇဝ်ဖြာ တွိုန်။ အန် မိူဝ် ဘူင် တဲး ဘော ဟုဝ် ဇဝ်ဖြာ ကာပျာတ့် လိုဝ်။ 12 ဂေ ဒူအီ ကိူန် ဘော ဘူင် ကာဘး ဒီ ဇဝ်ဖြာ၊ ဝီ တဲး နိုင် ဘတ့် တွိုန် အိုပ် ဂေ။ ဂေ ဘော ဝဲန် ပီ လှူ ဂေ ဒွန် မှိုဝ် ဒွန် ညှာ။ နိုင် ဘတ့် တွိုန် ဘော ပွိုန် ပွုန် ခဲ့ ပီ လုဝ် အန်။ အန် ယီ ဝဲန် တူတ့် နာ မုး နာ မှာန်။

13 ဒေါ အန် တီ အုဝ် ဝီ ယိုဝ် ဂြုဝ်း အာမူ အာမာတ် ဇဝ်ဖြာ အူ ကာဒင် ဝီ ဒီမွှတ် အာမူ အာမာတ် ဇဝ်ဖြာ ပေါ အူ ကာဒင် တဝ်း၊ “န့ မုး ပီ ဘျ ဇဝ်ဖြာ ဒီ အုဝ် လွင် ပီ ဒီ လှူ ဒွန် ဆီငဲ ဒွန် ဆီငဲ၊ လွင် ပီ ကာဘး ဒီ ဇဝ်ဖြာ ဘော လွင် လိုဝ် စှိုမ် တူတ့် ဒွန် မျုဝ်၊ လွင် ဟုဝ် ဇဝ်ဖြာ အီ ဟဲ့ ချဝ့် မွှိုမ် ကာအိး ဘော လွင် ဒူအီ ကိူန် အီ ကြိုပ် ဇဝ်ဖြာ၊ န့ ဒီ ဘော လှေန့် ခဲ့ မှဝ် တဲး န့ ဘုဝ် ဘဲန် ပါယ် တီ။း”

14 အုဝ် ပီ ဝီ ယိုဝ် ဂြုဝ်း အာမူ အာမာတ် ဇဝ်ဖြာ ပေါ အူ ကာဒင် တွိုန် ပီ ဝီ တဝ်း၊ “လွင် အန် တီ၊ န့ ဒီ ဘော လှေန့် အာ ဟြဲန့် ဒီ အူယ် မာယဝ်း ဇေန့် ဒေါ တူ ပွိုန် ဂေ ဒီ လှူ ဘာ ဒီ အပ် ဘော ဆိန့်ဝး။ ဝါယ် အန် တီ ဂေ ဒီ ဘူင် တဲး ဟုဝ် ဇဝ်ဖြာ ဝီ ဆီငါ ဘွတ် ပီ ဘြိမ်။”

15 ဒေါ ယိုဝ် အုဝ် အာဒါနေလ လွင် အန် တီ၊ အုဝ် မိူဝ် ဟဲ့ ဂျုဝ်ဂျာ တဲး အုဝ် နပ် လွင် ဒါင် အန်။ ဒေါ အန် တီ န့ ဘော မိုဝ်း ဒူအီ အူ ဝီ ကာပ့လုး တး စွင့် နာ အာတ့် အုဝ် အူ ဇေန့်။ 16 အုဝ် ဝီ ယိုဝ် ဂြုဝ်း အီမာယ် အူ ဝီ အီ ကွယ် ဘာင် အိုမ် အူလာယ် တွိုန်၊ ဝီ ဒဲ့ တဝ်း၊ “အိုယ် အာကာပြီအေန်၊ တဲး မဲ ကာလာင် နှဲ လွင် ဒါင် တီ ပီ ဘျ ဇဝ်ဖြာ ဒီ အန်။”

17 အာကာပြီအေန် မိူဝ် တး စွင့် ခူပ် အုဝ်။ အုဝ် မိူဝ် ဟဲ့ ယုဝ် ဘော မုတ် ဂိုပ် ဒီ အာတ့် အန် အူ ဇေန့်။ အန် ဝီ တဝ်း ဒီ အုဝ်၊ “အိုယ် မဲ ဂွန် ဒူအီ၊ တဲး န့ ကာလှုး ဒီ နဝ်း မဲ လွင် အန် တီ၊ န့ ဘော မုး လွင် ပန် ဒီ တူတ့် ဇာတ် နီ။”

18 ဒေါ ဆီငျာ ကာလာင် အန် ဂြုဝ်း တီ၊ အုဝ် ဘော ကေး လူင် ဒဲင် ကာဒါယ် ဘော ပိဝ် ဒုဝ် အူ ဇေန့်။ မာလဲ၊ အန် ဘော ဝီ ပါ အုဝ်၊ ဝီ ဘျိတ့် တဲး အုဝ် ဝီ စွင့်။

19 အန် ဝီ တဝ်း ဒီ အုဝ်၊ “အုဝ် ဒီ ကာလာင် ဒီ မဲ လွင် အာခြာဝ် ပန် ဒီ တူတ့် ဇာတ် နီ။ ဒေါ အန် တီ ဇဝ်ဖြာ ဒီ ရူ ကာဆဝ် ကူပ် မှာပ် အီ ဟဲ့ ကိူန်။ ခုဝ်၊ ပဲ့ ဟဲ့ ဘျ ဇဝ်ဖြာ ဒီ မဲ တီ၊ န့ မုး လွင် အာခြာဝ် အန် တီ။ 20 မာဘူ အာလူင့် ပီ ယိုဝ် မဲ အီ ဟဲ့ မိုဝ်း နိုင် ဘတ့် အာ ဘူင့် တွိုန်၊ န့ မုး ခုန်ဒီခမ် အီ အိုပ် မိူင် မေဒီ ဘော ခုန်ဒီခမ် အီ အိုပ် မိူင် ဘီရာဆီ။ 21 မာပဲ အာလူင့် တွိုန်၊ န့ မုး ခုန်ဒီခမ် အီ အိုပ် ခဲင် မိူင် ဂြိက်။ နိုင် တာင် အီ လေး ဒီ ကာတဲ ငါယ် အန်၊ န့ မုး ခုန်ဒီခမ် အီ အိုပ် မိူင် ဒေါ ဂုဝ် အန်။ 22 နိုင် ဘတ့် ဖွုန် ဘူင့် အီ လေး ဒူင် ကာဘက် လိုဝ် နိုင် ဘတ့် တာင် တွိုန် ဟဲ့ မုး မိူင် ဖွုန် မိူင် အီ ဒီ ကာယဝ်း လေး ဒီ မိူင် အီ ဟဲ့ ကွယ် ဒေါ ဂုဝ် တွိုန်။ မိူင် ဂေ တီ ယီ တူ မိုဝ်း ပွုန် ဂေ ဟဲန့် ပီ မိူင် အီ ဟဲ့ မိုဝ်း ဒေါ ဂုဝ် တွိုန်။

23 ဆေ ဟီ ဇမ် ပန် ဒီ တူတ့် အာခြာဝ် မိူင် ဂေ တီ၊ မှာပ် ပီ ဘူင် ဒူအီ ခဲင် မိူင် တီ မိူဝ် ဟဲ့ ကိူန် ကာဆဝ်။ ဒေါ အန် တီ န့ ဒီ ဘော မိုဝ်း ခုန်ဒီခမ် အူ ကာဒင် အီ ဟာယ် ကာဆဝ် ဘော လွှက့် ကာဆဝ်။ 24 ပွုန် အန် ကြဲ ဒီ တာင်။ မာလဲ၊ န့ တူ မုး ကူပ် ပွုန် ဒုဝ် ဘြိမ် အန်။ အန် ဘူင် ကာပျာတ့် ဘဲန် မျုဝ် ဘဲန် မျုဝ် အီ ကိူန် ကာဆဝ်။ ပီ ဒီ ဘူင် အန် ဒွန် မျုဝ်၊ န့ ဒီ အွင်။ အန် ဒီ ဒွါ ဒုက် ဘော ပျာတ့် ဝဲန် ဂေ အီ မိုဝ်း ဟဲန့် အီ မိုဝ်း အာဖုင် ဒင်ခုဝ် တာင် ဘော ဂေ ဒူအီ ပီ အိုပ် ဇဝ်ဖြာ။ 25 ကူပ် ဟဲ့ လွှက့် ကာဆဝ် အန်၊ အန် ဒီ ဘော မိုဝ်း နဝ်း ပီခိုက် ကာဆဝ်။ ဒေါ တူ ဆာဒိက် အီ ဟဝ်၊ အန် ဒီ ဘော ဘူင် တဲး ဂေ စှိုမ်။ အန် ဘော ယ ဘူင် ကာဘး ဒီ အန် ဇဝ် အီ မုး ခုန်ဒီခမ် အီ အိုပ် ခုန်ဒီခမ် ဘောကာဂ့လျီတ်။ အန် ပီ ဘော ပါယ် တီ မိူဝ်၊ အာဆာက် အန် ဒီ ဘော လိုဝ် စှိုမ်၊ ယီ တူ မုး ဒူအီ အီ ဘူင်။

26 ပီ ဘျ ဇဝ်ဖြာ လွင် ဘာ ဒီ အပ် ဘော လွင် စေဝ် ညှာ၊ န့ ဘော မုး နာ မုး နာ မှာန် အာခါခ်ု။ မဲ ယီ လုဝ် အုန် လွင် အန် တီ ခဲင် နဝ်း မဲ။ ခုဝ်၊ အာတ့် ဘုဝ် ဘဲန် လွင် အန် တီ၊ န့ ယီ ဆီ မိုဝ်း အာခြာဝ် အန် အီ ဟဲ့ လှေန့် ကာဆဝ်။”

27 ပါယ် တီ အုဝ် အီ မုး အာဒါနေလ အာဝ် ဟူ မိုဝ်း ပ့လူမ် ဂေ ဟဲန့် ဘော ဘဲန် ဆဝ်ဖိုဝ် လှေန့် ဒင်ဒါန် အန် ဒီ အုဝ်။ ဝါယ် အန် တီ အုဝ် ဘော ဝီ ရာမ် ဆီကဲန်၊ အုဝ် ဘော ဝီ ဟာဝ် ဘူင် ဂါန် ခုန်ဒီခမ်။ ပီ ဘော ဟဲ့ ပါယ် တီ မိူဝ်၊ န့ ယီ ဂ့၀ွင် ဒီ နဝ်း အုဝ် လွင် ပီ ဘျ ဇဝ်ဖြာ ဒီ အုဝ် တီ။ အုဝ် တူ နပ် လွင် ဒါင် အန်၊ န့ တူ ကာလှုး ဒီ နဝ်း အုဝ်။