1 ခုန်ဒီခမ် အာတာရိတ် အီ မုး ဂွန် အာဟာဆေရူ ဘော ဒူအီ အာမျုဝ် မေဒီ အန် ဟဲ့ ပွိုန် ဒီ အိုပ် မိူင် ဘာဘဲ။ 2 ဒေါ မုး ဆီနမ် ဒေါ ဂုဝ် ဒေါ အိုပ် အန် မိူင် တီ၊ အုဝ် အီ မုး အာဒါနေလ ဘော တိး ခဲင် ဘပ် ဇဝ်ဖြာ လွင် မိူင် ယေရူဆာလဲမ် ဒီ ကာပျာတ့် လိုဝ် အာဒါ ဘူ ဂိုဝ် ဆီနမ်။ န့ ဒူပ် ပီ ဘျ အုန် ဇဝ်ဖြာ ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာယေရေမီ။ အုဝ် ဘော ကာဖာ လွင် အန် တီ။ 3 ဒေါ အန် တီ အုဝ် ဘော ဝီ ဆာခိုဝ် ဒီ ဇဝ်ဖြာ ဘော ယိူန် ပီ ဒီ ဟူမ်၊ စှိုပ် ဒီ တာ ခြိုင် စာန်၊ ဝီ တုတ့် ခဲင် ကာဝှါင်။

4 အုဝ် ဘော ဆာခိုဝ် ဘော ဖြူမ် ဒီ ကာလာင် မှာပ် ယေ ဒီ ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်။ အုဝ် ဘော တဝ်း၊ “အိုယ် မဲ ဇဝ်ဖြာ၊ မဲ ဇဝ် ဟဲ့ ဘွတ် မျာတ် ကာဆဝ်။ ယေ ဘော ကာအာပ် ရုဝ်ဆေ မဲ ဇဝ်။ မဲ မုး ဇဝ်ဖြာ အီ ဘူင် နာ ဆိူဝ် နာ မှာန် ဘော ခမ် ကာဒိက် ဆတ်ဇာ ပဲ့ ဟဲ့ ဒွါ မဲ ဒီ ယေ။ မဲ မိူဝ် ဘျ နဝ်း ရွက့် ကာဝေ မဲ ဒီ ဂေ အီ ရွက့် မဲ ဘော ဘူင် ဒူပ် ခဲ့ ပီ ကာလာင် မဲ။ 5 ယေ ဟဲ့ ဘူင် နာ ဟာယ် နာ မိူက်၊ ဘူင် ကာလိုပ်။ န့ ဟဲ့ ဟွတ့် ဘဲန် မှာပ် ဒီ ယေ။ ယေ မိူဝ် ဟဲ့ ဘူင် ကာဘး ဒီ မဲ ဇဝ်၊ ဟဲ့ ဝဲန် ဂြုဝ်း ပီ ကာလာင် မဲ ဘော ဒါရာ ပီ အုန် မဲ။ 6 ယေ မိူဝ် တူ ထူမ် ဂြုဝ်း ပီ ကာလာင် ဒူအီ ပီ တိုယ် မဲ ဇဝ် အီ မုး ဂေ ဒူအီ အီ ဘျာန် ဂြုဝ်း မဲ ဇဝ်။ ဂေ ဟဲ့ ဂါဝ် ပွုန် မဲ ဇဝ်၊ ဝီ ကာလာင် ဒီ ခုန်ဒီခမ် အီ အိုပ် ယေ၊ ကာလာင် ဘော ဒီ အာမူ အာမာတ် ယေ၊ ဒီ ဂေ ဂုန့် ဒင် ယေ ဘော ဒီ ယေ အီ မုး ဒူအီ ခဲင် မာန် မိူင် ဘောကာဂ့လျီတ်။

7 အိုယ် မဲ ဇဝ်ဖြာ၊ မဲ ဇဝ် မိူဝ် ဘူင် နာ ဆိူဝ် နာ မှာန် ဆေဆေ။ အီ မုး ယေ၊ ယေ ဟဲ့ ဘူင် အီ ဒီ တဲး ယေ စှိုမ် ဆာရေ ဆေဆေ။ ယေ မုး ဒူအီ အီ ကွယ် ခဲင် မိူင် ယူဒါ ဘော ခဲင် မိူင် ယေရူဆာလဲမ်၊ ဒူအီ အီဆာရေလ ဘောကာဂ့လျီတ်၊ ဒူအီ အာမျုဝ် ယေ အီ ကွယ် တူင့် ဘော ယေ အီ ကွယ် ကာတတ် ခဲင် မိူင် အီ ဟဝ် ကူပ် တူ ဒူပ် ဆီချာ ယေ မဲ ဇဝ်။ 8 အိုယ် မဲ ဇဝ်ဖြာ၊ ဘော ယေ ဘော ခုန်ဒီခမ် ယေ ဘော ဂေ ဒါ ကာညာ အီ အိုပ် ယေ ဘော ဂုန့် ဒင် ယေ၊ ယေ ဘောကာဂ့လျီတ် ဟဲ့ ဘူင် အီ မွှိုမ် ကာအိး၊ အီ မွှိုမ် ဆာယ်။ ယေ ဟဲ့ လုတ့် မဲ ဇဝ်။ 9 ယေ ပီ ဘော ဟဲ့ ဘူင် ကာဘး ဒီ မဲ ဇဝ် မိူဝ်၊ မဲ ယီ ဝီ မိုဝ်း နဝ်း ရွက့် ယေ၊ ဝီ ဂဝ်း ဝဲန် မှာပ် ပီ လုတ့် ယေ။ 10 ယေ တူ ထူမ် ဂြုဝ်း ပီ ကာလာင် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ယေ။ ယေ မိူဝ် တူ ဒူပ် ဒါရာ ပဲ့ ဟဲ့ ဒွါ ဒါ အီ ဘျာန် ဂြုဝ်း ဇဝ်ဖြာ ဒီ ယေ အီ မုး ဒဲစေန့် မဲ ဇဝ်ဖြာ။

11 ခဲ့ ကွယ် ဒူအီ အီဆာရေလ ဘောကာဂ့လျီတ် ဟဲ့ လှိုဝ် ဒါရာ မဲ ဇဝ် ဘော တူ ထူမ် ပီ ဒမ် အုန် မဲ ဇဝ် ဒီ ဂေ။ ယေ မိူဝ် ဟဲ့ ဟွတ့် လုတ့် မဲ ဇဝ်။ မဲ ဇဝ် မိူဝ် ဟဲ့ တဲး ယေ ဝီ ခမ် ဂြုဝ်း ဒိူင် ဘော ပီ ဆုင်ဖျာတ် ပဲ့ ဟဲ့ ဒဲမ် အုန် ဒဲစေန့် မဲ အီ စိူဝ် အာမုဝ်ဆဲ တွိုန်။ 12 ခဲ့ ပီ ဒမ် အုန် မဲ ဇဝ် တီ၊ မဲ ဟဲ့ ဘူင် ဒီ ယေ ဘော ဒီ ဂေ ဒါ ကာညာ ယေ ဘောကာဂ့လျီတ်။ မဲ ဇဝ် ဟဲ့ တဲး အာဖေ အာရေ အီ တူ ဒွိုမ် ဘုဝ် ဘဲန် ဒီ မှဝ် ဝီ ဘုဝ် ဘဲန် ဒီ ဒူအီ ခဲင် မိူင် ယေရူဆာလဲမ်။ 13 ယေ လုဝ် ခမ် အာဖေ အာရေ တူတ့် ဒွန် မျုဝ် ပဲ့ ဟဲ့ ဒဲမ် အုန် အာမုဝ်ဆဲ ခဲင် ဘပ် ဒါရာ။ မဲ ဇဝ်ဖြာ မုး ဇဝ်ဖြာ ပီ ကြိုပ် ယေ။ ယေ ပီ ဘော ဟဲ့ ဘူင် ပါယ် တီ မိူဝ်၊ ယေ ယီ တူ ဝဲန် နာ တူ မွှိုမ် ပီ ဒွိုမ် ဘူင် ယေ၊ တူ ဘူင် ဒူပ် ဒါရာ မဲ ဇဝ်၊ တဲး န့ လဝ့် နဝ်း မဲ။ 14 အိုယ် မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် ယေ။ မဲ မိူဝ် ဟဲ့ ဒမ် မှာပ် ဒီ ယေ၊ တဲး ယေ ခမ် အာဖေ အာရေ။ ခဲ့ ပီ ဘူင် မဲ ဇဝ် တီ၊ မဲ ယီ ဘူင် ဒူပ် နာ မုး နာ မှာန်။ ပီ ဘော ဟဲ့ ပါယ် တီ မိူဝ်၊ ယေ ယီ တူ ထူမ် ဂြုဝ်း ပီ ကာလာင် မဲ ဇဝ် ဒီ ယေ။

15 အိုယ် မဲ ဇဝ်ဖြာ အီ မုး ဇဝ်ဖြာ ပီ ကြိုပ် ယေ၊ မဲ ဇဝ် ဟဲ့ ဘျ ခဲ့ ဟဲန့် ပွုန် မဲ ဘော အာဖုင် ဒင်ခုဝ် မဲ။ မဲ ဟဲ့ ချွတ် ဂေ ဒူအီ ပီ အိုပ် မဲ၊ တဲး ဂေ လေး ခဲင် မိူင် အဲဂိုပ် တွိုန်။ ခဲ့ ဟဲန့် ပွုန် မဲ ဘော အာဖုင် ဒင်ခုဝ် မဲ တီ၊ န့ ဘော တဲး အီ လှုဝ်း ကော ဇမ် ဒေါ တီ နီ။ ယေ ဟဲ့ ဟွတ့် ဘူင် မှာပ်။ ယေ ဟဲ့ ဟွတ့် ကာလိုပ်။ 16 အိုယ် မဲ ဇဝ် ကူပ် ဘူင် မဲ နာ ဆိူဝ် နာ မှာန် ဆေဆေ၊ ယေ မှာန့်၊ ကွဲ့ တဲး မဲ ဇဝ် ဝီ ပီရူ ဒီ မိူင် ယေရူဆာလဲမ်။ ခုဝ်၊ မိူင် တာင် တီ ဘော မုး မိူင် ပီ အိုပ် မဲ ဇဝ် အီ ကွယ် ဒဲင် နွန် ဆီငါ ဘွတ်။ ကူပ် မှာပ် ပီ ဘူင် ယေ ဘော ကူပ် နာ တူ မွှိုမ် ပီ ဘူင် ဂေ ဂုန့် ဒင် ယေ၊ န့ ဘော တဲး မိူင် ယေရူဆာလဲမ် ဘော ဂေ ဒူအီ ပီ အိုပ် မဲ ဇဝ် ဘဲန် ပီ နဲန ပီ ဖျာက် ဂေ အီ ကွယ် ရူပ် ယေ။ 17 အိုယ် မဲ ဇဝ်၊ မှာန့် တဲး မဲ ထူမ် ဂြုဝ်း ပီ ဆာခိုဝ် အုဝ် နီ။ မှာန့် တဲး မဲ ဇဝ် ဝီ ဆမ် ဝီ မ့ပြာယ် ဟုဝ် မဲ အီ ဟဲ့ လိုဝ် ဟဲ့ ကာပျာတ့်၊ တဲး မဲ ဝီ ဆမ် ဝီ ဘူင်၊ တဲး အီ ဟဝ် နပ် လွင် မုး မဲ ဇဝ်ဖြာ။ 18 အိုယ် မဲ ဇဝ်၊ မှာန့် တဲး မဲ ထူမ် ဂြုဝ်း အုဝ်။ ဘော မှာန့် တဲး မဲ ယွတ် ဒုက် ပဲ့ ဟဲ့ ခမ် ယေ ဘော မိူင် ပီ အိုပ် မဲ တီ။ ယေ မိူဝ် တူ ဘိုင် အာဂျိုဝ် ပီ ဘူင် ယေ။ ယေ ယီ ဒီ ဘိုင် နဝ်း ရွက့် ကာဝေ မဲ ဇဝ်။ ယေ မိူဝ် ဆာခိုဝ် ဒီ မဲ ဇဝ်။ 19 အိုယ် မဲ ဇဝ်၊ မှာန့် တဲး မဲ ထူမ် ပီ ဆာခိုဝ် ယေ၊ တဲး မဲ ဂဝ်း ဝဲန် မှာပ် ယေ၊ တဲး မဲ စွယ် ယေ၊ တဲး အီ ဟဝ် နပ် လွင် မုး မဲ ဇဝ်ဖြာ။ တဲး မဲ ဇဝ်ဖြာ ဘော ဘူင် ခြန် ခြန်။ ခုဝ်၊ မိူင် တာင် ဘော ဂေ ဒူအီ ကွယ် ခဲင် မိူင် တီ မုး ဒူအီ ပီ အိုပ် မဲ။”

20 အုဝ် ဘော ဆာခိုဝ် ပေါ မ့ပွါ။ အုဝ် ဘော ကာလာင် မှာပ် အုဝ် ဘော မှာပ် ဂေ ဒူအီ အုဝ် အီ မုး အာမျုဝ် အီဆာရေလ။ အုဝ် ဘော မှာန့် ဇဝ်ဖြာ အီ မုး ဇဝ်ဖြာ ပီ ကြိုပ် အုဝ်၊ တဲး အန် ဝီ မ့ပြာယ် ဟုဝ် ဇဝ်ဖြာ။ 21 ဒေါ ဆီငျာ ဆာခိုဝ် အုဝ် ပါယ် တီ အာမူ အာမာတ် ဇဝ်ဖြာ အီ စိူဝ် အာကာပြီအေန် ဝီ ပီ ဘျ ဇဝ်ဖြာ ဒီ အုဝ်၊ အန် ဘော ဘိုန့် တး၊ စုး ခူပ် ဒူင် ကွယ် အုဝ်။ ဒေါ အန် တီ ဟဲ့ မုး အာခြာဝ် ဒီ လုဝ် လှူ ပီ ဒီ လှူ ဘာ ဒီ အပ်။ 22 အန် မိူဝ် ကာလာင် ဒီ အုဝ် တဝ်း၊ “အိုယ် အာဒါနေလ၊ အုဝ် ဟဲ့ တး တဲး အုဝ် ပွိုန် ဒီ ဒွါ အာငျာန် ဘွတ် ဒီ မဲ ဘော တဲး မဲ နပ် ပီ ပါယ် ဘဲန် မျုဝ် ဘဲန် မျုဝ်။ 23 ဒေါ စုး မဲ ဒီ ဆာခိုဝ် ဒီ ဇဝ်ဖြာ၊ အန် ဇဝ် ဟဲ့ ထူမ် ဂြုဝ်း ပီ ဆာခိုဝ် မဲ။ အန် ဇဝ် မိူဝ် ရွက့် မဲ။ ခုဝ်၊ အုဝ် မိူဝ် ဟဲ့ တး တဲး အုဝ် ပွိုန် ဒီ ကာလာင် ဒီ မဲ။ ဒေါ တီ နီ၊ တဲး မဲ ဘော ကာဖာ လွင် ဂြုဝ်း အုဝ် ဘော နပ် လွင် ဒါင် ပဲ့ ဟဲ့ ယိုဝ် မဲ။

24 ဖွုန် မာယဝ်း ဒီ ဒိမ် ဂိုဝ် ဆီနမ် မုး အာခြာဝ် ဒီ ဒွါ ဇဝ်ဖြာ တဲး ဂေ ဒူအီ အာမျုဝ် မဲ ဘော ဂေ ဒူအီ ခဲင် မာန် မိူင် အီ ဆီငါ ဘွတ် လွတ် အာဖေ အာရေ၊ တဲး ဂေ လွတ် တ မှာပ် ဂေ၊ ကွဲ့ တဲး ဂေ လုတ့် ဒါရာ ဇဝ်ဖြာ ဘော ဝီ လဝ့် နဝ်း ဇဝ်ဖြာ ဝါယ် ဟဲ့ ဘူင် ဂေ နာ မိူက် နာ ဟာယ်။ ဝါယ် အာခြာဝ် အန် တီ၊ န့ ဒီ မိုဝ်း နာ ဆိူဝ် နာ မှာန် ဆေဆေ၊ တဲး န့ ဒူပ် ခဲ့ ပီ ဘျ ဇဝ်ဖြာ ဒီ ဒါ အီ ဘျာန် ဂြုဝ်း ဇဝ်ဖြာ။ ဟုဝ် ဇဝ်ဖြာ ဝီ ဘဲန် ဒူင် ဆီငါ ဘွတ်၊ ဒူင် ဒီ ပွိုန် ဒီ ဘူင် ဂါန် ဇဝ်ဖြာ ဒွန် မျုဝ်။

25 တဲး မဲ နုဝ်၊ ဆိန့် ဆီငဲ ကာစုး ဒီ ကာလာင် တဲး အီ ဝီ မ့ပြာယ် မိူင် ယေရူဆာလဲမ်၊ တဲး န့ ကော ဝီ ဇမ် ပန် ဒီ ဝီ တး ဝီ ပီ ဖဝ်း ဇဝ်ဖြာ နာမန် ဒီ ဂိန့် အန်၊ န့ ဒီ ဘော လှေန့် ဘူ ဇေန့် ကာတဲ့ ဟာဝ် ဘူ ဆီနမ် ဘော ဒဝ် ဂိုဝ် ဒီ အာ ဇေန့် ကာတဲ့ ဟာဝ် ဘူ ဆီနမ်။ ဂေ မိူဝ် ဒီ ဝီ မ့ပြာယ် မိူင် ယေရူဆာလဲမ်။ န့ ဒီ မိုဝ်း ဘော န့တေန့် ဘော ရူင် အိုမ်။ မာလဲ၊ အာခြာဝ် ဒေါ အန် တီ န့ ဒီ မိုဝ်း ဒုက် ဘော ညှာပ် ကာဆဝ်။ 26 ဆေ ဟဲ့ ဟွတ့် ပွုန် အာခြာဝ် ဒေါ အန် တီ၊ ဝီ ပီ ဖဝ်း ဇဝ်ဖြာ နာမန် ဒီ ဂိန့် အန်၊ အန် ဒီ ယမ် ဒေါ တူ ပဲ အန် မာဆေ။ ပန် အန် တီ ဒါ ဆိုက် တာင် အီ အိုပ် မိူင် ဟဝ် ဒီ ဘော တး ကာဂုဝ်း၊ တး ပျာတ့် ဘော မိူင် ပီ အိုပ် အန် ဇဝ် ဘော ဟုဝ် ဇဝ်ဖြာ။ ဒီ ကာဒဲ့ ဆိူတ် ပန် ဒီ တူတ့် ဇာတ် နီ၊ န့ ဒီ တး ပီ အိုမ် မ့ပုန် ကာဒါယ်။ န့ ဒီ ဘဲန် လာယ် ကာဂုဝ်း ကာငဝ်း၊ န့ ဒီ ဘော ကာပျာတ့် လိုဝ် တူတ့် ဒွန် မျုဝ် ပီ ဘူင် အုန် ဇဝ်ဖြာ။ 27 ဒါ တာင် တွိုန်၊ အန် ဒီ ဘော ကာဆဲန့် ဒီ ဂေ ဒူအီ ကိူန် အာဒါ ဘူ ဆီနမ်။ ဆေ ဟဲ့ ဇမ် ကာတဲ ဘူ ဆီနမ် တီ၊ အန် တူ တဲး ဂေ လှူ ဒုဝ် ဆတ်ဒါဝါ ဘော ပီ ဒီ လှူ ဘဲန် မျုဝ် ဘဲန် မျုဝ်။ ဘော ခဲင် ဟုဝ် ဇဝ်ဖြာ အူ ပ့လုဝ့် အန် ဒီ ဘော ဘ့လေး အုန် အီ မွှိုမ် ကာအိး ကာဆဝ် အူ မျုဝ်။ န့ ဒီ ကွယ် ဒီ တီ၊ တဲး န့ ကော ဇမ် ပန် ဒီ ဒမ် ဇဝ်ဖြာ မှာပ် ဒီ ဒူအီ အီ ဘူင် တဲး န့ ကာပျာတ့် လိုဝ် တူတ့် ဒွန် မျုဝ်။”