1 ခုန်ဒီခမ် အာဆာယ်ရတ် ဟဲ့ ဘဲန် ခုန်ဒီခမ် ခဲင် မိူင် ဘီရာဆီ အာဒါ အူယ် ဆီနမ်။ ဒေါ အန် တီ အုဝ် ဟဲ့ ယိုဝ် ပီ ဘျ ဇဝ်ဖြာ ဒီ အုဝ် အီ မုး အာဒါနေလ ဘော စိူဝ် အာဘေလထေဆာစာ။ ပီ ဘျ အန် ဇဝ် တီ ဟဲ့ မုး အီ ဒီ ဘုဝ် ဘဲန် အာခါခ်ု ဘော မုး လွင် အီ ဒီ လာယ် ကာဂုဝ်း ကိူန် ကာဆဝ် ဘော ဇမ် အီ ဒုက် အီ ညှာပ်။ အန် မိူဝ် ဟဲ့ နပ် လွင် ဒါင် ပီ ဘျ ဇဝ်ဖြာ ဒီ အန် တီ၊ တဲး န့ ကာလှုး ဒီ နဝ်း အန်။

2 ဒေါ အန် တီ အာဒါ အာ ဂိုဝ် ဒီ အူ ဆီငဲ န့ ဟဲ့ ဘဲန် ဒုက် ကာဆဝ် ဒီ နဝ်း အုဝ်။ 3 အုဝ် မိူဝ် တူ ဟူမ် ပီ ဒီ ဟူမ် အီ ဆီငဲး၊ တူ ဟာပ် ယင်၊ တူ ဒျီင် အိုမ် မာငုန် ဘော တူ ဖဝ်း နာမန် ဒီ ဒုဝ် အုဝ်။

4 မာဂျီန် ဒေါ ဂုဝ်၊ ဇမ် အာ ဂိုဝ် ဒီ ဖွုန် ဆီငဲ၊ အုဝ် ကွယ် ခူပ် ဘ့လဲင် အိုမ်။ 5 ဒေါ အန် တီ အုဝ် ဘော ဝီ ဆာကိုဝ်း ယွတ်၊ အုဝ် ဝီ ယိုဝ် ဒူအီ အူ ဝီ အီ ဟဲ့ စှိုပ် ဒီ တာ ဘိက် ကာတမ် လုယ်။ အန် ဟဲ့ စှိုပ် ဘော ဆဲ့ ဒီ ညွယ် အန် အီ မုး ခြိဝ် ဇဲတ်။ 6 ဒုဝ် အန် ဘော မာဘြိဝ် ပီ ဆဲန့် ငျီန် ဘ့လာင်။ နာ အန် ဘော ပီ ဘ့လာင် ပ့လ မ့ပ့လေတ့်။ ငါယ် အန် ဘော ပီ ပ့လဲ့ ငဝ်။ ဒဲ အန် ဂေ ပ့လဝ် အန် ဘော ကာလ မာဘြိဝ် ပီ ဘွင့် ဒေန့် ပဲ့ ဟဲ့ ဖ အီ တဲး န့ ကာမာယ်။ ဂြုဝ်း အန် ဘော ဆီနန် ဆီနိူင် ပီ ဂြုဝ်း ဂေ ဒူအီ အီ ဟဲ့ ကိူန် ကာဆဝ်။

7 မီ အုဝ် အူ ဝီ အီ စိူဝ် အာဒါနေလ ပွိုန် ယိုဝ် ပီ ဘျ ဇဝ်ဖြာ တီ။ ဂေ အီ ကွယ် ရိုမ် ဒူပ် အုဝ်၊ ဂေ တူ ယိုဝ် ခေါ အူ မျုဝ်။ မာလဲ၊ ဂေ ယုဝ် ကာဆဝ်၊ တဲး ဂေ တဝ် ဝိန် ဒီ ဟြေတ့် ဒူင် ဒီ ချြီင်။ 8 န့ ဘော ဂိတ် မီ အုဝ် အူ ဝီ အီ ယိုဝ် ပီ ဘျ ဇဝ်ဖြာ တီ၊ အီ ဟဲ့ အာရေ တာင် ကာဆဝ်။ န့ ဘော ဘဲန် ဒီလှး န့စမ် ဒီ အုဝ်၊ အာဝ် မိုဝ်း ပ့လူမ် ဂေ ဟဲန့်။ နာ အုဝ် မိူဝ် ဟဲ့ ဘ့လိူင်၊ ဟဲ့ ကာဟဝ်း တွင့်။ 9 ဟဲ့ ဟွတ့်၊ အုဝ် ဝီ ယိုဝ် ဂြုဝ်း အန်၊ အုဝ် မိူဝ် ကေး ကာတပ် ဘော ပိဝ် ဒုဝ်။

10 ဒေါ အန် တီ န့ ဝီ မိုဝ်း ဒဲ အူ ဘ့လာက် ဝီ ဘျိတ့် ယိတ့် အုဝ်။ အုဝ် မိူဝ် ဝီ ဇာန် ဒဲ အုဝ် ဘော ကိန့်ကြူင့် အုဝ် ဒီယုး ဒီယေန့်။ 11 ဒူအီ တွိုန် ပီ ဝီ တဝ်း ဒီ အုဝ်၊ “အိုယ် အာဒါနေလ၊ ဇဝ်ဖြာ ဟဲ့ ရွက့် ကာဆဝ် မဲ၊ တဲး မဲ ယိတ့် ထူမ် ဂြုဝ်း ပီ ဒီ ကာလာင် အုဝ် ဒီ မဲ။ ခုဝ်၊ ဇဝ်ဖြာ ဟဲ့ တိုယ် အုဝ်။” အန် ဟဲ့ ဟွတ့် တဝ်း ပါယ် တီ၊ အုဝ် မိူဝ် ယိတ့် စွင့် ဘော ဒီယုး ဒီယေန့်။

12 ဒေါ အန် တီ ဒူအီ ဝီ တွိုန် တဝ်း ဒီ အုဝ်၊ “အိုယ် အာဒါနေလ၊ ကွဲ့ တဲး မဲ ယုဝ်။ ဇဝ်ဖြာ ဟဲ့ ထူမ် ဂြုဝ်း ပဲ့ ဟဲ့ ဆာခိုဝ် မဲ ဆိန့် ဆီငဲ ဒေါ ဂုဝ် ဒေါ ကာစုး မဲ ဒီ ဆာခိုဝ်၊ ဒေါ ဟဲ့ ဆုင်ဖျာတ် မဲ ဒီ ပီတျီမ် နဝ်း မဲ ဒီ အာတ့် ဇဝ်ဖြာ ဘော ဆီ တဲး ပီ ဘျ ဇဝ်ဖြာ ကာလှုး ဒီ နဝ်း မဲ၊ ဇဝ်ဖြာ ဟဲ့ ထူမ် ဂြုဝ်း မဲ။ အန် ဟဲ့ တိုယ် အုဝ်၊ တဲး အုဝ် ဝီ ကာလာင် ပီ ဘျ ဇဝ်ဖြာ ဒီ မဲ။ 13 အာမူ အာမာတ် ဇဝ်ဖြာ အီ အိုပ် မိူင် ဘီရာဆီ အန် ယီ ဟဲ့ ခြဲ အုဝ် အာဒါ အာ ဂိုဝ် ဒီ အူ ဆီငဲ။ ဝါယ် အန် တီ အာမီခီလာ အီ မုး ဒါ တာင် ခဲင် ဖိုင် ဂေ အာမူ အာမာတ် ဇဝ်ဖြာ၊ အန် ဘော တး စွယ် အုဝ် ကူပ် တူ ပွိုန် လေး အုဝ် ဒူင် ကွယ် ခုန်ဒီခမ် ခဲင် မိူင် ဘီရာဆီ။ 14 ဒေါ တီ နီ အုဝ် ယီ ဟဲ့ တး ဇမ် ဒီ နီ။ အုဝ် ဒီ ဘူင် တဲး မဲ နပ် အီ ဒီ ဘုဝ် ဘဲန် ဒီ ဂေ ဒူအီ အာမျုဝ် မဲ နာ အာတ့် နီ ဟာဝ်။ ခုဝ်၊ လွင် ပီ ဘျ ဇဝ်ဖြာ ဒီ မဲ တီ၊ န့ မုး လွင် အီ ဒီ ဘုဝ် ဘဲန် နာ အာတ့် နီ ဟာဝ်။”

15 အန် ဟဲ့ ဟွတ့် ကာလာင် ဂြုဝ်း တီ ဒီ အုဝ်၊ အုဝ် ဘော မုတ် ဂိုပ် ဒီ ကာဒါယ် ဘော တူ နပ် ဒီ ကာလာင် ဂြုဝ်း မာဆေ။ 16 ဟဲ့ ဟွတ့် ပါယ် တီ အာမူ အာမာတ် ဇဝ်ဖြာ အီ မိုဝ်း အာရိုပ် ပီ ဒူအီ တွိုန် အန် မိူဝ် ဆူင့် ဒဲ အန်၊ တဲး န့ ဒိုဝ် ဆီပိုန့် အုဝ်။ အုဝ် မိူဝ် ပွိုန် ကာလာင် ဂြုဝ်း ဘော တဝ်း ဒီ အန် အီ ကွယ် ဒီ အာတ့် အုဝ်၊ “ပီ ဘျ ဇဝ်ဖြာ တီ၊ ဟဲ့ ဘူင် တဲး အုဝ် ဒီလှး ဘော ဒုဝ်၊ ကွဲ့ တဲး အုဝ် နပ် ပီ ပါယ် အုဝ် ဘော ဒီယုး ဒီယေန့်၊ အာဝ် မိုဝ်း ခဲ့ ဆိူတ် ခဲ့ ဝါယ်။ 17 အုဝ် နီ ဟဲ့ ပီ မှာယ် အီ ကွယ် နာ အာတ့် ဒါ ကာညာ အန်။ အုဝ် တူ ကာအာပ် ကာလာင် ဂြုဝ်း ဒီ မဲ။ အုဝ် မိူဝ် တူ မိုဝ်း ဟဲန့် ဂေ ပ့လူမ် မာဆေ။ အုဝ် မိူဝ် တူ ကူပ် မိုဝ်း ဖွိုမ် ဒီ ဟိုဝ်း။”

18 အန် ပီ ဝီ ပါ ဒဲ အုဝ် ပေါ အူ ဇေန့် တဲး အုဝ် ဘော ဝီ မိုဝ်း ဟဲန့် ဂေ ပ့လူမ်။ 19 အန် ဝီ တဝ်း၊ “ဇဝ်ဖြာ ဟဲ့ ရွက့် ကာဆဝ် မဲ။ ခုဝ်၊ ကွဲ့ တဲး န့ မိုဝ်း ခေါ အူ မျုဝ် အီ ကာဝှ်ု ကာဝျှီန် ဒီ နဝ်း မဲ၊ ကွဲ့ တဲး မဲ ယုဝ်။” အန် ဟဲ့ ဟွတ့် တဝ်း ပါယ် တီ၊ အုဝ် ဝီ မိုဝ်း ပ့လူမ် မိုဝ်း ဟဲန့် ဘော ဝီ တဝ်း ဒီ အန်၊ “အိုယ် မဲ ဇဝ်၊ တဲး မဲ ဝီ ကာလာင် ဒီ အုဝ်။ ခုဝ်၊ မဲ မိူဝ် ဟဲ့ ဟွတ့် ဒွါ ဟဲန့် ဂေ ပ့လူမ် ဒီ အုဝ်။”

20 အန် မိူဝ် ဝီ တဝ်း၊ “မဲ နပ်၊ အုဝ် ဟဲ့ တး ဒူင် ကွယ် မဲ ကူပ် မာဆေ။း 21 အုဝ် ဟဲ့ တး၊ တဲး အုဝ် ပွိုန် ဒီ ဘျ ဒီ မဲ လွင် ပဲ့ ဟဲ့ ဒဲမ် အုန် ခဲင် ဘပ် ဇဝ်ဖြာ အီ မှာန် အာခါခ်ု။ အုဝ် ဒီ ဝီ ဝေန့် ဘော ကာဂုဝ်း ဒီ ဒါ ကာညာ အီ အိုပ် မိူင် ဘီရာဆီ။ ဝါယ် အန် တီ အာမူ အာမာတ် ဇဝ်ဖြာ အီ ဘ်ု မိူင် ဂြိက် ဒီ ဝီ တး။ ဒဲင် အီ မုး အာမူ အာမာတ် ဇဝ်ဖြာ အီ စိူဝ် အာမီခီလာ အီ ဘ်ု မိူင် ဒူအီ အီဆာရေလ၊ အာဝ် မိုဝ်း အာဆေ အီ စွယ် အုဝ်။”