န့ မုး ခုန်ဒီခမ် တာင် အာတာရိတ် အီ မုး ဒူအီ မေဒီ၊ ဒေါ ဟဲ့ အိုပ် အန် မိူင် ဘာဘဲ အာဒါ အူ ဆီနမ် အုဝ် ဟဲ့ စွယ် အန် တဲး အန် မိုဝ်း ပ့လူမ် မိုဝ်း ဟဲန့်။

2 အာမူ အာမာတ် ဇဝ်ဖြာ ဝီ တဝ်း၊ “အုဝ် ဝီ ခဲ ဒီ မဲ လွင် အီ မုး အီ မှာန် အာခါခ်ု။ ခုန်ဒီခမ် ဘွတ် အူယ် ကာဒင် ဒီ ကာပ့လုး တး ခဲင် မိူင် ဘီရာဆီ။ ခုန်ဒီခမ် ကာဒင် မ့ဖွုန်၊ အန် ဒီ ခြမ် လွှိုမ် ဂေ အူယ် ကာဒင် တီ။ ဆေ အန် ဟဲ့ ဟွတ့် ပွိုန် ပ့လူမ် ပွိုန် ဟဲန့် ဘော မိုဝ်း အာဖုင် ဒင်ခုဝ် တာင် ကူပ် ခြမ် အန်၊ အန် ဒီ ဘော ဝီ ကာဆုး ဒွန် အီ ဒီ ကာဂုဝ်း ဒီ ဂေ ဒူအီ ခဲင် မိူင် ဂြိက်။ 3 ပန် အန် တီ န့ ဒီ ဝီ မိုဝ်း ခုန်ဒီခမ် အီ မိုဝ်း အာဖုင် ဒင်ခုဝ် တာင်။ ဝီ တီ ဒီ ဘော အိုပ် တူတ့် မာန် မိူင် အီ ဟဲ့ တာင် ကာဆဝ်။ အန် ဒီ ဘော အွင် ဒီ ဘူင် ခဲ့ ပီ ဆီ ဘူင် အန်။ 4 မာလဲ၊ ဆေ ပွုန် အန် ဟဲ့ တာင် လွှိုမ် တူတ့်၊ မိူင် ပီ အိုပ် အန် ဒီ ဘော ကာယဝ်း ဘဲန် ဖွုန် ပ့လုဝ့်။ ဂေ လှုက်လှာန် ခုန်ဒီခမ် တီ တူ ပ့လု အန်။ အန် မိူဝ် တူ မိုဝ်း ပွုန် အီ တာင် ပီ ဘြိမ်။ ခုဝ်၊ ဒူအီ ဟဝ် ဒီ တဲး မိူင် အန် တီ ကာပျာတ့် လိုဝ် ဘော တဲး အီ ဟဝ် ပွိုန် ဒီ အိုပ် မိူင် တီ။

5 ခုန်ဒီခမ် အီ အိုပ် မိူင် နာ တေတ့် တွိုန် အန် ဒီ ဘော မိုဝ်း အာဖုင် ဒင်ခုဝ် တာင်။ န့ ယီ မိုဝ်း ဒါ ကာညာ အီ အိုပ် ဒါ ဆိုက်၊ အန် ကြဲ ဒီ မိုဝ်း ပွုန် အီ တာင် လွှိုမ် ခုန်ဒီခမ်၊ တဲး အန် ပွိုန် ဒီ အိုပ် မိူင် တီ။ 6 ဆေ ဟဲ့ ဟွတ့် ပွုန် ဖွုန် ဖန် ဆီနမ်၊ ခုန်ဒီခမ် အီ အိုပ် မိူင် နာ တေတ့် ဂါယ် ခုန်ဒီခမ် အီ အိုပ် မိူင် နာ ကွာ ဒီ ဘော ဝီ လာယ် ဘဲန် အူ ဂိုက်။ ခုန်ဒီခမ် အီ အိုပ် မိူင် နာ တေတ့် ဒီ ဘော ဒိုဝ်း ဂွန် ဒီဘျာ အန်၊ အာပ် တဲး အန် ဘဲန် နာင် ဟောခမ် ခဲင် မိူင် နာ ကွာ။ မာလဲ၊ လွင် လာယ် ဘဲန် ဂါယ် အူ ဂိုက် တီ၊ ဂါယ် ယီ တူ ဘော နာယ် ဒီ လာယ် ကာလဝ့် ဆီချာ။ ဂွန် အီဘိုန့် တွိုန် တူ မိုဝ်း ပွုန်။ ဘော အန် ဘော အီမာယ် အန် ဘော ဂုန့် အန် ဘော မှာယ် အန် အီ ဒူပ် အန် ဂေ ကာဒုး အီ ဒီ အာပ် ဒွါ ဂေ ဒီ အီ ဟဝ်။

7 ဝါယ် အန် တီ အာဝ် ဘော လှေန့် ခဲင် ခြိုဝ် အီဘိုန့် တွိုန် န့ ဒီ ဘော မိုဝ်း အူ ဝီ ဒီ ဝီ တး ပ့လု ဂုန့် အန် ဂါယ် မာ အန်၊ ဝီ တး ကာဂုဝ်း ဒီ ခုန်ဒီခမ် အီ အိုပ် မိူင် နာ ကွာ။ အန် ဒီ လိုပ် ဇမ် ခဲင် ဒူင် ချြီင် ဂေ ဒါ ဆိုက် ဘော ကာဂုဝ်း ပဲ တူတ့် ဂေ။ 8 အန် ဒီ ဝီ ဒိုဝ်း အာရိုပ် ရာင် ဇဝ် ပီ ကြိုပ် ဂေ ဘော ခြိုင် တာ အီ မုး ခြိဝ် ဂေ ရွိုန် ပီ တာ ဂေ ဒေါ လှူ ဂေ ဒီ ဇဝ် ပီ ကြိုပ် ဂေ။ အန် ဝီ ဒိုဝ်း ဝေန့် တူတ့် ခဲင် မိူင် နာ တေတ့်။ ဟဲ့ ဟွတ့် ပါယ် တီ န့ ဒီ ဘော ရာမ် လှေန့်၊ အန် အာဝ် ဟူ တဲး ဂေ ဒါ ဆိုက် အန် ကာဂုဝ်း ဒီ မိူင် နာ ကွာ ။ 9 ခုန်ဒီခမ် အီ အိုပ် မိူင် နာ ကွာ ဒီ ဘော ဟာဝ် ဒီ မိူင် နာ တေတ့်။ မာလဲ၊ အန် ယီ ဝီ ကာဒုး ဒီ ဝီ ဝေန့် ဒီ မိူင် အန်။ 10 ဂေ ဂွန် ခုန်ဒီခမ် အီ အိုပ် မိူင် နာ ကွာ၊ ဂေ ဒီ ဘော တး ကာဇု ဒါ ဆိုက် ကိူန် ကာဆဝ်။ ဂေ ဒီ ဘော တး တဲး န့ ကော ပီ အိုမ် ပြဲ့ တာင်။ ဂေ ဒီ ဘော ကာဂုဝ်း တဲး န့ ကော လိုပ် ဇမ် ဒူင် ချြီင် ဂေ ရန်ဆူ။

11 ခုန်ဒီခမ် အီ အိုပ် မိူင် နာ တေတ့် ဒီ ဘော ရူ ကာဆဝ် ဘော ယဲတ့် ဒါ ဆိုက် အန် အီ ကိူန် ကာဆဝ်၊ ဝီ ကာဂုဝ်း ဒီ ခုန်ဒီခမ် အီ အိုပ် မိူင် နာ ကွာ တီ။ အန် ဒီ ဘော ပဲ ဂေ ဘော ပွိုန် တူတ့် ဒါ ဆိုက် ဂေ အီ ဟဲ့ ကိူန် ကာဆဝ်။ 12 ဝါယ် ဟဲ့ ဟွတ့် မှေတ့် အန် ဒါ ဆိုက် ရန်ဆူ အန် ဘောကာဂ့လျီတ်၊ အန် ဒီ ဘော ပီဖုင် အန် ကူပ် ဟဲ့ အွင် အန် ဘော ကူပ် ဟဲ့ ပွိုန် အန် ဒီ ငဝ်း ယမ် ဒါ ဆိုက် ဘဲန် မှိုန့် ဘဲန် ဆဲန်။ မာလဲ၊ ပွုန် အန် တီ ယီ တူ မန်၊ တူ ကွယ် လှေန့်။ 13 ခုန်ဒီခမ် အီ အိုပ် မိူင် နာ ကွာ ဒီ ဘော ဝီ တး ဝါယ် အန် တီ။ အန် ဒီ ဘော ရဲန် အုန် ဒါ ဆိုက် အန်၊ တဲး န့ ကိူန် လွှိုမ် ခါ အာတ့်။ ဆေ အာခြာဝ် အန် ဟီ ဆင်ဒုဝ်၊ အန် ဒီ ယဲတ့် ဂေ ဒါ ဆိုက် အန် တီ အီ ဟဲ့ ဇေ့ဇုင် ဘော မိုဝ်း ခြိုင် ကာဂုဝ်း ဒွန် မျုဝ်။

14 အာခြာဝ် ဒေါ အန် တီ န့ ဒီ မိုဝ်း ဒူအီ ကိူန် အီ ဝီ ကာဘး ဒီ ခုန်ဒီခမ် အီ အိုပ် မိူင် နာ တေတ့်။ ဂေ ဒူအီ ဟာယ် အီ ကွယ် ကာတဲ ဂေ ဒူအီ အာမျုဝ် မဲ အာဒါနေလ၊ ဂေ ဒီ ဝီ ဘူင် ကာဘး၊ တဲး န့ ဒူပ် ခဲ့ ပီ ဘျ ဇဝ်ဖြာ ဒီ မဲ။ မာလဲ၊ ဂေ ယီ တူ ပဲ။ 15 ခုန်ဒီခမ် အီ အိုပ် မိူင် နာ ကွာ ဒီ ဘော ယဲတ့် ဒါ ဆိုက် အန်။ ဂေ ဒီ ဘော တး ဂိုဝ်း ကာဒါယ်၊ ဘူင် ဘ့လဝ့် န့တဲင် ဒီ မိူင် အီ မိုဝ်း ရဲင် အီ မန် ဆီချာ။ ဂေ ဒီ ဘော ပဲ မိူင် တီ။ ဂေ ဒါ ဆိုက် ဒူအီ နာ တေတ့်၊ ဂေ အာဝ် ဟူ ခမ် ဒီ ကာဂုဝ်း ပေါ မ့ပွါ။ ဂေ ဒါ ဆိုက် အီ ဟဲ့ ဒွိုမ် မိုဝ်း ပ့လူမ် တာင်၊ ဂေ အာဝ် ဟူ နပ် ပီ ဒီ ပါယ် ဒီ ကာဂုဝ်း။ 16 ဒါ ကာညာ အီ ဟဲ့ ပဲ မိူင် တီ၊ အန် ဘူင် ခဲ့ ပီ အိုင် အန်။ န့ ယီ တူ မိုဝ်း အာဆေ ပွိုန် ခြဲ အန်။ အန် ဒီ ဘော ကွယ် ခဲင် မိူင် အီဆာရေလ အီ ဟဲ့ မွှိုမ် ကာဆဝ်။ အန် ဒီ ဘော မိုဝ်း ပွုန် တဲး အန် ဘူင် ကာပျာတ့် လိုဝ် မိူင် တီ။ 17 ခုန်ဒီခမ် အီ အိုပ် မိူင် နာ ကွာ၊ အန် ဒီ ယဲတ့် ခဲ့ ကွယ် ဂေ ဒါ ဆိုက် အန် ဘောကာဂ့လျီတ်၊ ဂူင့် ဘော ခြိုင် ကာဂုဝ်း အီ ဘျ အာဖုင် အန်။ အန် ဒီ ဆီ တဲး ခုန်ဒီခမ် အီ အိုပ် မိူင် နာ တေတ့် ဘဲန် အူ ဂိုက် ဒီ အန်။ အန် ထာင်၊ ဆေ အန် ဘူင် ပါယ် တီ အန် ဒီ ပွိုန် ဒီ ပဲ။ အန် ဒီ ဒွါ ဂွန် ဒီဘျာ အန် ဒီ ခုန်ဒီခမ် မိူင် နာ တေတ့်။ ပီ ဘော ဟဲ့ ပါယ် တီ မိူဝ်၊ ပီ ခြာမ် အန် ဒီ ဘူင် တီ၊ န့ ယီ တူ ဘဲန် ဒေါ မှဝ်။ 18 ဝါယ် အန် တီ အန် ဒီ ဘော ဟာဝ် ဒူင် ကွယ် ဂေ အာမျုဝ် ဒူအီ ခူပ် အိုမ် နမ်မုက်ဆာရာ။ အန် ဒီ ဘော ကာဂုဝ်း ပွိုန် ဒူင် ကွယ် ဂေ ကိူန်။ မာလဲ၊ န့ မိုဝ်း ဒါ ကာညာ အီ အိုပ် ဂေ တီ ပေါ အူ မျုဝ် ဒီ ကာဂုဝ်း ပဲ ခုန်ဒီခမ် မိူင် နာ ကွာ တွိုန်။ အန် ဒီ ဘူင် တဲး နဝ်း ဆီ ပီခိုက် ပီဖုင် အန် ကော ဟြာယ်။ ဒါ ကာညာ တီ ဘော ဘူင် တဲး ခုန်ဒီခမ် အာဆူရီယာ တွိုန် ဝီ ခမ် တူတ့် ရုး ဆီ ပီခိုက် ဆီ ပီဖုင် အန် ဒီ နဝ်း အန်။ 19 ဝါယ် အန် တီ ခုန်ဒီခမ် မိူင် နာ ကွာ ဒီ ဘော ဝီ ဝေန့် ဒီ မိူင် အန် အီ ဟဲ့ မိုဝ်း ဒူင် ချြီင် အီ ဟဲ့ မန် ဆီချာ။ မာလဲ၊ အန် ယီ ဒီ စှိုမ် ဒီ ဒါ ဆိုက် ဘော ဟြာယ်။

20 ခုန်ဒီခမ် ပေါ အူ ကာဒင် ဒီ ဘော ဝီ ပ့လု အန်၊ အန် ဒီ စ်ု ဒါ ကာညာ အူ ဝီ၊ တဲး အန် ဟာဝ် ဂဲပ် ရွိုန် စိုင်၊ တဲး အန် ပွိုန် ဒီ ကွယ် ဒါခိုယ် ဒါခိုယ်။ ကွဲ့ တဲး အာဖုင် ဒင်ခုဝ် အန် ယူမ်။ မာလဲ၊ ဝါယ် အန် တီ အာဝ် ဘော လှေန့်၊ အန် ဒီ ဘော ယမ် ဒေါ တူ မိုဝ်း ဒါ ဆိုက် ကာဂုဝ်း။”

21 အာမူ အာမာတ် ဇဝ်ဖြာ တွိုန် ပီ ဝီ ကာလာင် ဟာဝ် ပေါ န့ ပွါ။ အန် တဝ်း၊ “ခုန်ဒီခမ် အီ အိုပ် မိူင် နာ ကွာ ဝါယ် အန် တီ၊ အန် မုး ဒူအီ မွှိုမ် ဇွင့် ဘော ဟာယ် ကာဆဝ်။ အန် မုး လှုက်လှာန် ခုန်ဒီခမ်။ န့ မိူဝ် တူ မိုဝ်း အာဆေ တဲး အန် ဘဲန် ခုန်ဒီခမ်။ အန် ဒီ ဘော ဒိုဝ်း လွှက့် အန်၊ ဘူင် တဲး အန် မိုဝ်း ပွုန်။ 22 န့ ယီ တူ မိုဝ်း အာဆေ အီ ပွိုန် ဘူင် ကာဘး ဒီ အန်။ ပီ ဘော မုး ဒါ ဆိုက် ကိူန် ဘော ဒါ တာင် အီ လှူ ဒီ ဇဝ်ဖြာ၊ အန် ဒီ ဘော ပျာတ့် ဝဲန် ဂေ ဘောကာဂ့လျီတ်။ 23 အန် ဒီ ဒွါ ကာဒိက် ဆတ်ဇာ ဒီ ဒူအီ အာမျုဝ် ဟဝ် ဘော လာယ် ဘဲန် အူ ဂိုက်။ ဝါယ် အန် တီ အန် ဒီ ကာလုဝ် ဂေ ဘော အိုပ် ဂေ။ ပါယ် တီ အန် ဒီ မိုဝ်း ပွုန် တာင်။ အန် ယီ တူ လုဝ် ဒူအီ ကိူန် စွယ် အန်။ 24 ဆေ ဒူအီ ခဲင် အိူင် အီ ဟဲ့ ခြမ် ကာဆဝ် ထာင် ဂေ ဟဲ့ ကွယ် ဆီချာ၊ တူ မိုဝ်း ပီ ဒီ လုဝ် ယုဝ် မာဆေ၊ အန် ဒီ ကာဂုဝ်း ပဲ ဂေ အူ ဇေန့်။ ပါယ် တီ အန် နပ် ဒီ ဘူင် ပီ တူ ဒွိုမ် ဘူင် ဂေ ဂုန့် ဒင် အန်။ အန် ဘော နပ် ဒီ ကာဆာင် ကြုဝ်ကြာမ် ပီ ဖာတ် အန် ဒီ အီ၊ ဘော ခြိုင် တာ ပီ ဒိုဝ်း တး ဂေ ဒါ ဆိုက် အန် ဒွါ ဒီ ဒူအီ အီ ဒူပ် အန်။ အန် မိူဝ် ခြာမ် ဒီ ကာဂုဝ်း ပျာတ့် ဒူင် အီ မန် ဆီချာ အီ မုး ဒူင် ချြီင် ဒါ ဆိုက်။ မာလဲ၊ အန် ပဲ ဒီ ဘူင် မီ အာဒါ အူ ကာစန်။

25 အန် ဒီ ဘော မိုဝ်း နဝ်း ယ ဘော ယဲတ့် ဂေ ဒါ ဆိုက် အန် အီ ဟဲ့ ကိူန် ကာဆဝ်။ အန် ဘော ဟာဝ် ကာဂုဝ်း ဒီ ခုန်ဒီခမ် မိူင် နာ တေတ့်။ ခုန်ဒီခမ် မိူင် နာ တေတ့် မိူဝ် တဲး ဒါ ဆိုက် အန် အီ ဟဲ့ ကိူန် ကာဆဝ် ကာဂုဝ်း ဒီ ခုန်ဒီခမ် မိူင် နာ ကွာ တီ။ မာလဲ၊ အီ ဟဝ် ဒီ ဘော ကာလုဝ် ခုန်ဒီခမ် မိူင် နာ တေတ့်၊ ဘူင် တဲး အန် စှိုမ် ဒါ ဆိုက် အန်။ 26 ဂေ အီ ကွယ် ကာတတ် အန် အီ ဟူမ် ရိုမ် ဒူပ် အန်၊ ဂေ မိူဝ် ခြာမ် ဒီ တဲး ဒါ ဆိုက် အန် စှိုမ်။ ဂေ ကိူန် ဒီ ဘော ယမ် ဒေါ လာယ် ကာဂုဝ်း ဂေ တီ။ 27 ခုန်ဒီခမ် အာ ကာဒင် တီ ဒီ ဘော တုတ့် ဒီ ရိုမ်၊ ဟူမ် ဒီ ရိုမ်။ ဂါယ် ဒီ ဘော လာယ် ကာလုဝ်။ မာလဲ၊ ပီ ခြာမ် အာကျာမ် အာငျာန် ဂါယ် ယီ တူ အွင်။ ပီ ဘော ဟဲ့ ပါယ် တီ ပီ ခြာမ် ပီ ဇေန့်ဇာ ဂါယ်၊ န့ တူ ဘဲန်။ ခုဝ်၊ အာခြာဝ် ပဲ့ ဟဲ့ ဘ့လေး အုန် ဇဝ်ဖြာ ညှမ် တး။ 28 ခုန်ဒီခမ် မိူင် နာ ကွာ တွိုန် အန် ဒီ ဘော ဒိုဝ်း ကြုဝ်ကြာမ် အီ ကိူန် ကာဆဝ်၊ ဝီ ဝေန့် ဒီ မိူင် ဒူင် ကွယ် အန်။ အန် ဟဲ့ အုန် နဝ်း ဒီ ပျာတ့် ဝဲန် ဒါရာ အီ ဆီငါ ဘွတ် ဘော ဘူင် ဒူပ် ခဲ့ ပီ အိုင် အန်။ ဟဲ့ ဟွတ့်၊ အန် ဒီ ဘော ဝီ ဝေန့် ဒီ မိူင် ဒူင် ကွယ် အန်။

29 ဆေ ဟီ ဇမ် အာခြာဝ် အန်၊ ခုန်ဒီခမ် အီ အိုပ် မိူင် နာ ကွာ ဒီ ဝီ ယဲတ့် ဒါ ဆိုက် အန်၊ ဝီ ဟာဝ် ဒီ မိူင် နာ တေတ့် ပေါ အူ ဇေန့်။ မာလဲ၊ ခါ နီ အာဝ် ဟူ ပီ ခါ အာတ့် တွိုန်။ 30 ခုဝ်၊ ဂေ ဒူအီ အီ ပဝ့် ရိုဝ် ဆင်ဖုဝ် အီ တး ခဲင် မိူင် ခီထိမ်၊ ဂေ ဒီ ဘော တး ခြဲ အန်။ န့ ဘော ဆွင့် ကာဆဝ် ဒီ နဝ်း အန်။ အန် ဒီ ဝီ ဝေန့် အူ ဇေန့်။ အန် ဒီ ဘော ရူ ကာဆဝ် ဒီ ဒူအီ အီ ဒူပ် ဒါရာ ဇဝ်ဖြာ အီ ဆီငါ ဘွတ် တွိုန်။ အန် ဒီ ဘော ဝီ ဘူင် အီ မွှိုမ် ဒီ ဂေ အီ ဝဲန် ဒါရာ ဇဝ်ဖြာ။

31 ဂေ ဒါ ဆိုက် အန် ဒီ ဘူင် တဲး ဟုဝ် ဇဝ်ဖြာ အီ ဆီငါ ဘွတ် ကာဒါတ့်။ ဂေ ဒီ ဒိုဝ်း ဝဲန် ပီ ဒီ လှူ ဒွန် မှိုဝ် ဒွန် ညှာ ဘော ဘ့လေး အီ မွှိုမ် ကာအိး အီ တဲး န့ ကာပျာတ့် လိုဝ် တူတ့် ခဲင် ဟုဝ် ဇဝ်ဖြာ တီ။ 32 ခုန်ဒီခမ် တီ ဒီ ဘော ကဝ် ဘော ငျော ဂေ အီ ဟဲ့ ဝဲန် ဒါရာ ပီ ဒွိုမ် ညှိုမ် ဂေ၊ တဲး ဂေ ဝီ ဖြူမ် အန် ဘော ကွယ် ဘ့လာက် အန်။ မာလဲ၊ ဂေ အီ ဟဲ့ နပ် ဆီချာ ဇဝ်ဖြာ ပီ ကြိုပ် ဂေ၊ ဂေ ဒီ ဘော ဒီငန့် ဒီ ခြဲ အန်။

33 ဂေ အီ မိုဝ်း အာငျာန်၊ ဂေ ဒီ ဘော မာနုဝ် ဒူအီ ကိူန်။ မာလဲ၊ ကာတဲ ဂေ တီ မင် အီ ဒီ ဘော ယမ် ဒီ မာပွါ့ လာင် ဘော လုဝ် ခမ် အီ ဒုဝ့် ယမ် ခဲင် ငဝ်။ မင် အီ ဒီ ဘော ကာဒုး ဒီ ခမ် အီ တး ဇူန် တး ဖာတ် ကြုဝ်ကြာမ် ဂေ ဘော ခမ် အီ မှေတ့် ဟာဝ် ဂေ။ ပီ လုဝ် ခမ် ဂေ တီ ဒီ ဘော လှေန့် ဒင်ဒါန် အန်။ 34 ဆေ ဒူအီ ညှိုမ် ဇဝ်ဖြာ လုဝ် ခမ် ဒုက် တီ၊ န့ ဒီ မိုဝ်း အီ စွယ် ဂေ အီ စဲက်။ န့ ဒီ မိုဝ်း ဒူအီ ကိူန် အီ ကာဒိုက် ကာဒဝ့် ဒီ ဂေ၊ ယီ တူ မိုဝ်း နဝ်း ဆိူဝ် နဝ်း မှာန်။ 35 ဂေ အီ မိုဝ်း အာငျာန် မင် အီ၊ ဂေ ဒီ ဘော ကာဒုး ဒီ ယမ်။ မာလဲ၊ ဒုက် ပီ လုဝ် ခမ် ဂေ န့ တဲး ဂေ ဝီ ဆီငါ ဘွတ်၊ တဲး န့ ကော ဇမ် ပန် ဒီ တူတ့် ဇာတ် နီ။ ခုဝ်၊ အာခြာဝ် အန် ဒီ ဒူပ် ခဲ့ ပီ ပွက့် ဇဝ်ဖြာ။

36 ခုန်ဒီခမ် မိူင် နာ ကွာ တွိုန်၊ အန် ဒီ ဘော ဘူင် ခဲ့ လဝ့် နဝ်း အန်။ အန် ဒီ ပီဖုင် ဒုဝ် ဘြိမ် အန်၊ တဲး အန် တာင် လွှိုမ် ဇဝ် ဒွန် ကာဒင် ပီ ကြိုပ် အီ ဟဝ်။ ဒဲင် တီ၊ အန် ဒီ ဝီ စုဝ့် ဒုဝ် ဘြိမ် အန် တဲး အန် တာင် လွှိုမ် ဇဝ်ဖြာ အီ အိုပ် တူတ့် ဇဝ် ပီ ကြိုပ် အီ ဟဝ်။ အန် ဒီ ဘော ပွိုန် ဒီ ဘူင် ပါယ် တီ တဲး န့ ကော ဇမ် အာခြာဝ် ပန် ဒီ ဒမ် ဇဝ်ဖြာ မှာပ် ဒီ အန်။ ဇဝ်ဖြာ မိူဝ် ဒီ ဘူင် ဒူပ် ခဲ့ ပီ ခြာမ် အုန် အန်။ 37 ခုန်ဒီခမ် တီ မိူဝ် တူ ရုဝ်ဆေ ဇဝ် ပီ ကြိုပ် ဂေ ဂုန့် ဒင် အန် ဘော ဇဝ် ပီ အိုင် အီဘိုန့် ဂေ။ အန် ဒီ ဘော လုက်တာယ် ဇဝ် ဒွန် ကာဒင် ကူပ် ဟဲ့ ဝီ မာတ် အန် ဒုဝ် ဘြိမ် အန် ဟဲ့ တာင် လွှိုမ် ဂေ ဘောကာဂ့လျီတ်။ 38 အန် ဒီ ဝီ ရုဝ်ဆေ ဇဝ် အီ ဂွင့် ရဲ ဒူင် ဒီ ချြီင် အန်။ အန် ဒီ ဝီ ဒိုဝ်း ရွိုန်၊ ခြိဝ်၊ ဆဲန့် ဘော ကြုဝ် အီ မိုဝ်း ဒီငဝ်း ဒီခန်၊ ဝီ လှူ ဒီ ဇဝ် ပီ တူ ဒွိုမ် နပ် ဂေ ဂုန့် ဒင် အန်။ 39 အန် ဒီ ဘော စ်ု ဂေ အီ ကြိုပ် ဇဝ် အီ ဟဝ်၊ တဲး ဂေ စွယ် အန် ကာဂုဝ်း ဒီ ဒူင် ချြီင် ရန်ဆူ အန် အီ ဟဲ့ မန် ဆီချာ လွှိုမ် တူတ့်။ အန် ဒီ ဘော ဝီ ဒွါ ဆာရေ ဒီ ဂေ အီ ဟဲ့ ဖြူမ် ဒီ တဲး အန် ဘဲန် ခုန်ဒီခမ် အီ အိုပ် ဂေ။ အန် ဒီ ဘော တဲး ဂေ မိုဝ်း ပွုန် ဘော ဘဲန် ဒါ တာင် အီ အိုပ် ဒူအီ ကိူန် ဘော ကာဆာင် ဒွါ ကာဒါယ် ဒီ ဂေ၊ တဲး န့ ဘဲန် ရုး ဒီ ဂေ။

40 ဆေ ဟီ ဇမ် ပန် ဒီ တူတ့် အာခြာဝ် ခုန်ဒီခမ် အီ အိုပ် မိူင် နာ ကွာ တီ၊ ခုန်ဒီခမ် မိူင် နာ တေတ့် ဒီ ဘော ယဲတ့် တး ဒါ ဆိုက် အန်၊ ကာဂုဝ်း ဒီ အန်။ ပန် အန် တီ ခုန်ဒီခမ် မိူင် နာ ကွာ မိူဝ် ဒီ ဘော ဒိုဝ်း လက်လဝ် မ့ပြွင့် ဘော ဒါ ဆိုက် အီ ပဝ့် မင်ပြွင့် ဘော ရိုဝ် ဆင်ဖုဝ်၊ ဟာဝ် ဘ်ု န့တေန့်၊ ဘ်ု ဒီ ကာဂုဝ်း ဒီ ခုန်ဒီခမ် မိူင် နာ တေတ့်။ ခုန်ဒီခမ် မိူင် နာ ကွာ ဒီ ဘော အွင် ဘော ပွိုန် ဒီ ရိုပ် မာန် မိူင် ကိူန် ကာဆဝ်၊ တဲး န့ ကော ပီ အိုမ် ဟဲ့ မ့ပုန် တူတ့် ကာဒါယ်။ 41 အန် ဒီ ကာဂုဝ်း ဘော မိူင် အီဆာရေလ အီ ဟဲ့ မွှိုမ် ကာဆဝ် ဘော ငဝ်း ယမ် ဒူအီ ဘဲန် မှိုန့် ဘဲန် ဆဲန်။ မာလဲ၊ ဂေ ဒူအီ ခဲင် မိူင် အေဒူမ်၊ မိူင် မုဝ်အာပ် ဘော ဒူအီ ခဲင် မိူင် အမ်မူန်၊ ဂေ ဒီ ဘော လွတ်။ 42 ပါယ် တီ အန် ဒီ ပွိုန် ဒီ အိုပ် မိူင် ဘဲန် မိူင် ဘဲန် မိူင်။ ဘော ဒူအီ ခဲင် မိူင် နာ တေတ့် တူ လွတ်။ 43 အန် ဒီ ဘော ပွိုန် ဒီ ဘိုင် ကြုဝ်ကြာမ် အီ ကွယ် ခဲင် မိူင် နာ တေတ့် တွိုန်။ ကြုဝ်ကြာမ် ဂေ တီ န့ ဘော မုး ရွိုန် ဂေ ခြိဝ် ဘော ကြုဝ် အီ မိုဝ်း ဒီငဝ်း ဒီခန်။ အန် ဒီ ဘော ပွိုန် ဘော မိူင် လီဘီယာ ဘော မိူင် ကူဆာ။ 44 ဒေါ အန် တီ ဆာဒါင် အီ တး နာ လေး ဆီငဲ ဘော နာ ကွာ၊ န့ ဒီ ဘော တဲး အန် ကာစွာ။ အန် မိူဝ် ဒီ ဘော ရူ ကာဆဝ် ဘော ငဝ်း ယမ် ဒူအီ ကိူန်။ 45 အန် ဒီ ဘော ဘ့လေး ထိုပ် အန် ဒီ ကာတဲ အိုမ် နမ်မုက်ဆာရာ ဘော နွန် အီ ဘွတ် ကာဆဝ် အီ မုး ဒူင် ကွယ် ဟုဝ် ဇဝ်ဖြာ။ မာလဲ၊ အန် ဒီ ကာဒုး ဒီ ယမ်။ န့ ယီ တူ မိုဝ်း အာဆေ အီ စွယ် အန်။”