1 အာမူ အာမာတ် ဇဝ်ဖြာ တွိုန် အီ ဟဲ့ စှိုပ် ဒီ တာ ဘိက် ကာတမ် လုယ်၊ အန် ဝီ တဝ်း၊ “အာခြာဝ် ဒေါ အန် တီ အာမူ အာမာတ် ဇဝ်ဖြာ အီ တာင် အီ စိူဝ် အာမီခီလာ အီ ဘ်ု ဂေ ဒူအီ အာမျုဝ် မဲ၊ အန် ဒီ ကာပ့လုး တး။ ဒေါ အန် တီ န့ ဒီ ဘဲန် အာခြာဝ် အီ ဒုက် အီ ညှာပ် ကာဆဝ်။ ဆိန့် အာတ့် မိုဝ်း ဒူအီ ဒဲင် ကာဒါယ် နီ ကော ဇမ် အာခြာဝ် တီ၊ န့ တူ ဒွိုမ် မိုဝ်း ဒုက် တာင် ခဲ့ တီ။ ဂေ အီ မုး ဒူအီ မဲ၊ ဂေ အီ ဟဲ့ ဟပ် စိူဝ် ဂေ ခဲင် ဇာရာင် ဘပ် ဇဝ်ဖြာ၊ ဂေ ဒီ ဘော လွတ် အာဖေ အာရေ တီ။ 2 ဒေါ အန် တီ ဂေ ဒူအီ ကိူန် အီ ဟဲ့ ဟွတ့် ယမ်၊ ဂေ ဒီ ဝီ ယိတ့် ဝီ အိမ်။ မင် အီ ဒီ ဝီ ပွိုန် အာဆာက် အီ ကွယ် ဆေဆေ။ မင် အီ ဂေ ဒီ ဘော မွှိုမ် ဆာယ် ဘော စှိုမ် ဆာရေ ဆေဆေ။ 3 ဂေ အီ မိုဝ်း အာငျာန်၊ ဂေ ဒီ ဘော ပီ ဘ့လာင် ခဲင် ဘ့လေန့်၊ ဝီ ထွင် ခဲင် ဂါင်ဟြာဝ်။ ဂေ အီ နပ် ဒီ မာနုဝ် ဒူအီ ကိူန် တဲး ဂေ ဒူပ် ဒါရာ ဆိူဝ် ဆိူဝ် မှာန် မှာန်၊ ဂေ ဒီ ပီ ဘ့လာင် ဆီမန့် အီ ဘ့လာင် ဆေဆေ။ 4 ယီ မုး မဲ အာဒါနေလ၊ တဲး မဲ ကာဘိတ် အုန် ဂြုဝ်း အန် ဇဝ် တီ၊ ဝီ ဒွက် ဘော ဇိုမ် ဒီ ဆီလွယ် ပဲ့ တီ၊ အုန် တဲး န့ ကော ဇမ် ပန် ဒီ တူတ့် ဇာတ် နီ။ န့ ယီ မိုဝ်း ဒူအီ ကိူန် ကာဆဝ် အီ ဂျုဝ်ဂျာ တဲး ဂေ နပ် လွင် ဒါင် အန် တီ။”

5 ဒေါ အန် တီ အုဝ် အီ မုး အာဒါနေလ၊ အုဝ် ဝီ ယိုဝ် အာမူ အာမာတ် ဇဝ်ဖြာ ပေါ အာ ကာဒင်။ ဂါယ် ဝီ စွင့် ခူပ် ဘာင် အိုမ်၊ အူ ကာဒင် စွင့် အူ ဘ့လာက်၊ ပေါ အူ ကာဒင် ဝီ စွင့် ပေါ အူ ဘ့လာက်။ 6 အာဒါ အူ ကာဒင် ဝီ ဒီမွှတ် အာမူ အာမာတ် အီ ဟဲ့ စှိုပ် ဒီ တာ ခြိုင် ဘိက် ကာတမ် လုယ် တွိုန်၊ အီ ဟဲ့ စွင့် နာ ဒဲင် အိုမ် ဘ့လဲင် အန် တဝ်း၊ “န့ ဒီ ဘော လှေန့် ခဲ့ မှဝ်၊ တဲး န့ ကော ဇမ် အာခြာဝ် ဒီ ဘျ ဇဝ်ဖြာ အီ မွှိုမ် အာမ် ကာဆဝ် ဂေ တီ။း”

7 အာမူ အာမာတ် ဇဝ်ဖြာ ကာဒင် တွိုန် ဝီ စုဝ့် ဆူင့် ဒဲ အန် ဘော အာ ဘ့လာက် ဘော ဒိူင် ဒီ ဇဝ်ဖြာ အီ မုး ဇဝ်ဖြာ အီ ကွယ် ဆေဆေ ဘော တဝ်း၊ “န့ ဒီ ဘဲန် ပါယ် တီ အူယ် ဆီနမ် ဒီ အူ ကာတဲ။ ဆေ ဟီ ဟွတ့် ခါနှာပ် ဂေ ဒူအီ ပီ အိုပ် ဇဝ်ဖြာ ကူပ် ကာဂုဝ်း ဂေ၊ န့ ဒီ ဘော ဟွတ့် တူတ့် ဒွန် မျုဝ်။”

8 အုဝ် ပီ ဘော ဟဲ့ ယိုဝ် ဂြုဝ်း တီ မိူဝ်၊ အုဝ် ယီ တူ နပ် လွင် ဒါင် အန်။ ပါယ် တီ အုဝ် ဘော ဝီ ဒီမွှတ် တဝ်း၊ “အိုယ် မဲ ဇဝ်၊ လွင် ပန် ဒီ ဟွတ့် ပန် ဒီ တူတ့် အာမျုဝ် တီ၊ န့ ဒီ ပါယ် မှဝ်။း”

9 အန် ဝီ တဝ်း၊ “အိုယ် အာဒါနေလ၊ ကွဲ့ တဲး မဲ မိုဝ်း နဝ်း မှဲ လွင် အန် တီ။ ဂြုဝ်း ဂေ တီ၊ န့ ဘော မုး ဂြုဝ်း အီ ဟဲ့ ကာဘိတ် အုန်၊ ဟဲ့ ဟွတ့် ဒွက် ဇိုမ်၊ တဲး န့ ကော ဇမ် ပန် ဒီ တူတ့် ဇာတ် နီ။ 10 ဒူအီ ကိူန် ဒီ ဘော ဘဲန် ဒူအီ အီ ဆီငါ ဘွတ်။ ဂေ ဒူအီ အီ တူ မွှိုမ်၊ ဂေ မိူဝ် ဒီ ဘူင် ဟာဝ် အီ တူ မွှိုမ်၊ တူ တဲး န့ ကာလှုး မာဆေ ဒီ နဝ်း ဂေ။ န့ ယီ မိုဝ်း မီ ဂေ ဒူအီ အီ မိုဝ်း အာငျာန်၊ အီ နပ် လွင် အန် တီ။

11 စုး ဆိန့် ဆီငဲ ဝဲန် ဂေ ပီ ဒီ လှူ ဒွန် မှိုဝ် ဒွန် ညှာ ဘော ဝီ ဒိုဝ်း မျုဝ် အီ မွှိုမ် ကာအိး၊ ဝီ ဘ့လေး အုန် ခဲင် ဟုဝ် ဇဝ်ဖြာ၊ န့ ဒီ ဘော လှေန့် အူ ဟြဲန့် ဒီ အာ မာယဝ်း ဒီ ဒိမ် ဂိုဝ် ဆီငဲ။ 12 ဝီ အီ ခမ် ဒီ ဘ်ု တဲး န့ ကော နုဝ့် အူ ဟြဲန့် ဒီ အူယ် မာယဝ်း ဒီ အူယ် ဂိုဝ် ဒီ ဖန် ဆီငဲ၊ အန် ဒီ ပွိုန် ကွယ် ဒါခိုယ်။ 13 အိုယ် အာဒါနေလ၊ အီ မုး မဲ၊ ကွဲ့ တဲး မဲ မိုဝ်း နဝ်း မှဲ လွင် အန် တီ၊ တဲး မဲ ကွယ် ဒါခိုယ်၊ တဲး န့ ကော ဇမ် ပန် ဒီ တူတ့် ဇာတ် နီ။ မဲ ဒီ ဘော ယမ်။ ဝါယ် ဟဲ့ တူတ့် ဇာတ် နီ မဲ ဒီ ဝီ ယိတ့် ဝီ အိမ်၊ တဲး မဲ ပွိုန် ခါဂုန် ပဲ့ ဟဲ့ ရဲန် အုန် ဇဝ်ဖြာ အာဒါ မဲ။”