ကာဒါယ် ဒူအီ အီဆာရေလ ဘဲန် ခြိုဝ် ဘဲန် ခြိုဝ်၊ န့ ပါယ် နီ။ ဒီ ကာအုန် ကာဒါယ် ဘ့လာက် နာ ကွာ န့ မုး ကာဒါယ် ခြိုဝ် အာဒါန်။ စုး ဒီ အိုမ် နမ်မုက်ဆာရာ၊ ဒူပ် န့တေန့် အီ ဟာဝ် ဒီ မိူင် ဟေဆာလူန် ဘော မိူင် လေနုဝ်ဟာမာတ် ဘော ဟာဝ် ဇမ် မိူင် အာစာရေ ဘော ကာအုန် မိူင် ဒါမာခူ အီ ကွယ် ဘ့လာက် နာ ကွာ၊ အီ ကွယ် ခူပ် မိူင် ဟာမာတ် မုး ကာအုန် ကာဒါယ် ခြိုဝ် အာဒါန်၊ စုး ဒီ ဘ့လာက် နာ လေး ဆီငဲ ကော ဇမ် ဘ့လာက် နာ ဂေတ့် ဆီငဲ။

2 ခြိုဝ် အာဆေန် ဝီ ပွိုန် ကာဒါယ် ခူပ် ခြိုဝ် အာဒါန်၊ စုး ဒီ ဘ့လာက် နာ လေး ဆီငဲ ကော ဇမ် ဘ့လာက် နာ ဂေတ့် ဆီငဲ။

3 ခြိုဝ် အာနာပ်ထာလီ ဝီ ပွိုန် ကာဒါယ် အီ ကွယ် ခူပ် ခြိုဝ် အာဆာ၊ စုး ဒီ ဘ့လာက် နာ လေး ဆီငဲ ကော ဇမ် ဘ့လာက် နာ ဂေတ့် ဆီငဲ။

4 ခြိုဝ် အာမာနာဆေ ဝီ ပွိုန် ကာဒါယ် အီ ကွယ် ခူပ် ခြိုဝ် အာနာပ်ထာလီ၊ စုး ဒီ ဘ့လာက် နာ လေး ဆီငဲ ကော ဇမ် ဘ့လာက် နာ ဂေတ့် ဆီငဲ။

5 ခြိုဝ် အာအေဖာရိမ် ဝီ ပွိုန် ကာဒါယ် အီ ကွယ် ခူပ် ခြိုဝ် အာမာနာဆေ၊ စုး ဒီ ဘ့လာက် နာ လေး ဆီငဲ ကော ဇမ် ဘ့လာက် နာ ဂေတ့် ဆီငဲ။

6 ခြိုဝ် အာရူဘေန် ဝီ ပွိုန် ကာဒါယ် အီ ကွယ် ခူပ် ခြိုဝ် အာအေဖာရိမ်၊ စုး ဒီ ဘ့လာက် နာ လေး ဆီငဲ ကော ဇမ် ဘ့လာက် နာ ဂေတ့် ဆီငဲ။

7 ခြိုဝ် အာယူဒါ ဝီ ပွိုန် ကာဒါယ် အီ ကွယ် ခူပ် ခြိုဝ် အာရူဘေန်၊ စုး ဒီ ဘ့လာက် နာ လေး ဆီငဲ ကော ဇမ် ဘ့လာက် နာ ဂေတ့် ဆီငဲ။

8 ဘေ လုဝ် ဒိုဝ်း ကာဒါယ် အာဒါ အူ ပ့လုဝ့်၊ တဲး န့ ဘဲန် ဒူင် ဆီငါ ဘွတ်။ နာ ကာဝဝ်း ဒူင် တီ၊ န့ လုဝ် အာ မှိုန့် ဒီ ဖန် ဟြဲန့် ကာနိး၊ စုး နာ ကွာ ကော ဇမ် နာ တေတ့်။ နာ တူင့် အန် စုး ဒီ နာ လေး ဆီငဲ ကော ဇမ် နာ ဂေတ့် ဆီငဲ၊ တဲး န့ တူင့် ပီ နာ တူင့် ကာဒါယ် ပီ လာယ် ကာယဝ်း ဒွါ ဘေ ဒီ ဒူအီ ဒွန် ခြိုဝ်။ ဟုဝ် ဇဝ်ဖြာ လုဝ် ကွယ် ဒီ ကာတဲ ဒူင် တီ။

9 ပီ ဒီ ကာယဝ်း အာပ် လှူ ဘေ ဒီ ဇဝ်ဖြာ တီ၊ နာ တူင့် အန် လုဝ် မုး အာ မှိုန့် ဒီ ဖန် ဟြဲန့် ကာနိး။ နာ ကာဝဝ်း အန် လုဝ် မုး အူ မှိုန့် ကာနိး။ 10 ဂေ ဒါ အီ လှူ ဒီ ဇဝ်ဖြာ လုဝ် ဒိုဝ်း ကာဒါယ် ဒူင် ဆီငါ ဘွတ် တီ၊ တဲး န့ ဘဲန် ခါဂုန် ဂေ။ စုး ဒီ ဘ့လာက် နာ လေး ဆီငဲ ကော ဝီ ဇမ် ဘ့လာက် နာ ဂေတ့် ဆီငဲ လုဝ် ဂဝ် နာ တူင့် အန် အာ မှိုန့် ဒီ ဖန် ဟြဲန့် ကာနိး။ ဘ့လာက် နာ ကွာ ကော ဝီ ဇမ် ဘ့လာက် နာ တေတ့် လုဝ် ဂဝ် အူ မှိုန့် ကာနိး။ ဟဲ့ ဟွတ့်၊ ဟုဝ် ဇဝ်ဖြာ လုဝ် ကွယ် ဒီ ကာတဲ ဒူင် တီ။ 11 ကာဒါယ် ဒူင် ဆီငါ ဘွတ် တီ၊ န့ ဘော မုး အာဒါ ဂေ ဒါ အီ လှူ ဒီ ဇဝ်ဖြာ အီ မုး လှုက်လှာန် အာဇာဒူက်။ ခုဝ်၊ ဂေ ဟဲ့ မိုဝ်း နဝ်း ဆိူဝ် နဝ်း မှာန် ဒီ ဘူင် ဂါန် အုဝ်။ ဂေ မိူဝ် တူ ဘူင် ကာလိုပ် ပီ ဂေ ဒူအီ အာလေဝီ အီ ဟဲ့ ဘူင် ကာလိုပ် ဒေါ ဟဲ့ ကာလိုပ် ဂေ ဒူအီ အီဆာရေလ။ 12 ကာဒါယ် တီ၊ ဂေ ဒီ ဘော ပွိုန် ဒီ ကွယ် ခူပ် ဒူင် ကွယ် ဂေ ဒူအီ အာလေဝီ။ န့ ဒီ ဘော ဘဲန် အူ ပ့လုဝ့် ခဲင် ကာဒါယ် အီ မုး ဒူင် ဆီငါ ဘွတ် တွိုန်။

13 ဒူင် ကွယ် ဂေ ဒူအီ ခြိုဝ် အာလေဝီ၊ န့ ကွယ် ဘ့လာက် နာ တေတ့် ကာဒါယ် ဒူင် ကွယ် ဂေ ဒါ အီ လှူ ဒီ ဇဝ်ဖြာ။ နာ တူင့် အန် လုဝ် ကွယ် အာ မှိုန့် ဒီ ဖန် ဟြဲန့် ကာနိး။ နာ ကာဝဝ်း အန် အူ မှိုန့် ကာနိး။ 14 ဘေ တူ ပွိုန် ယွင့် ကာဒါယ် တီ။ န့ မွှိုမ် လွှိုမ် ကာဆိူဝ် ဟဝ် ဘောကာဂ့လျီတ်။ အာဝ် ပွိုန် လာယ် ကာရဝ်း၊ အာဝ် ပွိုန် ဒွါ ဒီ အီ ဟဝ် ဒေါ မှဝ်။ န့ မုး ဒူင် ဆီငါ ဘွတ်၊ မုး ကာဒါယ် ပီ အိုပ် ဇဝ်ဖြာ။

15 အီ မုး ကာဒါယ် အီ ဆီ ဂိတ် ဆီ ကွယ်၊ နာ တူင့် အန် အီ မုး အာ မှိုန့် ဒီ ဖန် ဟြဲန့် ကာနိး၊ နာ ကာဝဝ်း အန် ဖန် ဟြဲန့် ကာနိး။ န့ ဒီ ဘော ဘဲန် ဒူင် ဒီ ကွယ် ဂေ ဒူအီ ရဝ် ဒူအီ ကာင်။ ဂေ ဒီ ဘော ဆမ် ကာင် ဂေ ဘော ဘ့လေး အုန် ဒူင် ဒီ ဟျီင် မာဘူ ဂေ မာမက်။ န့ ဒီ မိုဝ်း မိူင် ဒူင် ကွယ် ဂေ အီ ကွယ် ဒီ ကာတဲ ကာဒါယ် တီ။ 16 လုဝ် ဂဝ် မိူင် တီ ဘ့လာက် နာ ကွာ ကွယ် ဖွုန် ဟြဲန့် ဒီ ဖန် မာယဝ်း ကာနိး၊ ဘ့လာက် နာ တေတ့် ဖွုန် ဟြဲန့် ဒီ ဖန် မာယဝ်း ကာနိး၊ ဘ့လာက် နာ လေး ဆီငဲ ဖွုန် ဟြဲန့် ဒီ ဖန် မာယဝ်း ကာနိး ဘော ဘ့လာက် နာ ဂေတ့် ဆီငဲ ဖွုန် ဟြဲန့် ဒီ ဖန် မာယဝ်း ကာနိး။ 17 ကာဒါယ် ဒူင် ဒီ ဟျီင် မာဘူ ဂေ မာမက် ကွယ် ရူပ် မိူင် တီ။ ဘ့လာက် နာ ကွာ အာ မာယဝ်း ဒီ ဖန် ဂိုဝ် ကာနိး၊ ဘ့လာက် နာ တေတ့် အာ မာယဝ်း ဒီ ဖန် ဂိုဝ် ကာနိး။ ဘ့လာက် နာ လေး ဆီငဲ အာ မာယဝ်း ဒီ ဖန် ဂိုဝ် ကာနိး ဘော ဘ့လာက် နာ ဂေတ့် ဆီငဲ အာ မာယဝ်း ဒီ ဖန် ဂိုဝ် ကာနိး။ 18 ဝါယ် ဟဲ့ ဟွတ့် ဂဝ် ဂေ မိူင် တီ၊ ကာဒါယ် အီ ဆီ ဂိတ် ဆီ ကွယ် အီ လာယ် ကာဇာပ် ဒီ ကာအုန် ကာဒါယ် ဒူင် ဆီငါ ဘွတ် ဘ့လာက် နာ လေး ဆီငဲ နာ ကာဝဝ်း အန် လုဝ် မိုဝ်း အူ မှိုန့် ကာနိး ဘော ဘ့လာက် နာ ဂေတ့် ဆီငဲ လုဝ် မိုဝ်း အူ မှိုန့် ကာနိး။ အီ လေး ခဲင် မာန် ဘော ခဲင် ဒူင် နာ တီ ဒီ ဘဲန် ပီ ဒီ ဟူမ် ဂေ အီ ရန့် ဂါန် ခဲင် မိူင် တီ။ 19 ဂေ ဒူအီ အီ ကွယ် ခဲင် မိူင် တီ၊ ဂေ အီ ပွိုန် ဘူင် မာန် ဂေ ဒူင် နာ၊ ဂေ မုး ဒူအီ အီ တး ခဲင် ခြိုဝ် ဒွန် ခြိုဝ်။ 20 ပါယ် တီ ကာဒါယ် အီ ကွယ် ဒီ ကာတဲ ကာဒါယ် ပဲ့ ဟဲ့ အာပ် လှူ တူတ့် တွိုန်၊ န့ ကွယ် ဖွုန် ဘ့လာက်၊ ကာရမ် ဒွန် ဘ့လာက်။ အူ ဘ့လာက် ဘော တူင့် အာ မှိုန့် ဒီ ဖန် ဟြဲန့် ကာနိး။ ကာဒါယ် ဒူင် တီ န့ ဘော ဘာ ကာဒါယ် မိူင် တွိုန်။

21 ကာဒါယ် အီ ကွယ် အာ ဘ့လာက် ဒူင် ဆီငါ ဘွတ် ဘော အီ ကွယ် နာ ဘြေတ့် မိူင် ပီ အိုပ် အန် ဇဝ်၊ န့ ဒီ ဘဲန် ကြုဝ် ခုန်ဒီခမ် အီ အိုပ် မိူင် တီ။ န့ မုး ကာဒါယ် အီ ကွယ် နာ လေး ဆီငဲ ဒူင် မုး ကာဒါယ် ဘွတ် တွိုန်၊ အာ မှိုန့် ဒီ ဖန် ဟြဲန့် ကာနိး။ ဘော ဘ့လာက် နာ ဂေတ့် ဆီငဲ ကွယ် အာ မှိုန့် ဒီ ဖန် ဟြဲန့် ကာနိး။ ဘော ကာဒါယ် အီ ကွယ် ဘော အာ ဘ့လာက် တီ အီ ကာဇာပ် ဒီ ကာဒါယ် အီ ဘဲန် ကြုဝ် ဒူအီ အီဆာရေလ၊ န့ ဒီ ဘဲန် ကြုဝ် ဂွန် ခုန်ဒီခမ်။ ကာဒါယ် အီ ဆီငါ ဘွတ် ဘော ဟုဝ် ဇဝ်ဖြာ ကွယ် ဒီ ကာတဲ ဒူင် တီ။ 22 ပါယ် တီ ကာဒါယ် အီ ဘဲန် ခါဂုန် ဒူအီ အာလေဝီ ဘော ကာဒါယ် အီ ဘဲန် မိူင် တွိုန် ဒီ ကွယ် ကာတဲ ကာဒါယ် အီ ဘဲန် ကြုဝ် ခုန်ဒီခမ်။ ကာဒါယ် အီ ဘဲန် ကြုဝ် ခုန်ဒီခမ် တီ န့ ကွယ် ဒီ ကာတဲ ကာဒါယ် ခြိုဝ် အာယူဒါ ဘော ကာဒါယ် ခြိုဝ် အာဘေန်ယာမ်။

23 ကာဒါယ် မိူင် အီဆာရေလ အီ ဆီ ဂိတ် ဆီ ကွယ်၊ အီ စုး ဒီ ဘ့လာက် နာ လေး ဆီငဲ ကော ဝီ ဇမ် ဘ့လာက် နာ ဂေတ့် ဆီငဲ၊ န့ ဒီ ဘဲန် ကာဒါယ် ခြိုဝ် အာဘေန်ယာမ်။

24 ဒီ ခူပ် ကာဒါယ် ခြိုဝ် အာဘေန်ယာမ် တီ၊ စုး နာ လေး ဆီငဲ ကော ဝီ ဇမ် နာ ဂေတ့် ဆီငဲ၊ န့ ဒီ ဘဲန် ကာဒါယ် ခြိုဝ် အာဆီမေအူန်။

25 ဒီ ခူပ် ကာဒါယ် ခြိုဝ် အာဆီမေအူန် တီ၊ စုး နာ လေး ဆီငဲ ကော ဝီ ဇမ် နာ ဂေတ့် ဆီငဲ၊ န့ ဒီ ဘဲန် ကာဒါယ် ခြိုဝ် အာအီဆာခါ။

26 ဒီ ခူပ် ကာဒါယ် ခြိုဝ် အာအီဆာခါ တီ၊ စုး ဘ့လာက် နာ လေး ဆီငဲ ကော ဝီ ဇမ် နာ ဂေတ့် ဆီငဲ၊ န့ ဒီ ဘဲန် ကာဒါယ် ခြိုဝ် အာဇေဘူလူန်။

27 ဒီ ခူပ် ကာဒါယ် ခြိုဝ် အာဇေဘူလူန် စုး နာ လေး ဆီငဲ ကော ဝီ ဇမ် နာ ဂေတ့် ဆီငဲ၊ န့ ဒီ ဘဲန် ကာဒါယ် ခြိုဝ် အာဂတ်။

28 အီ မုး ကာအုန် ကာဒါယ် ခြိုဝ် အာဂတ် ဘ့လာက် နာ တေတ့် စုး ဒီ မိူင် ထာမာ၊ ဝီ ဟာဝ် နာ ဂေတ့် ဆီငဲ၊ ဟာဝ် ဒီ ဘာင် တုဝ်း အိုမ် မေရီဘာကာဒေတ်၊ ပီ ဝီ ဟာဝ် ခူပ် ဒီလယ့် မိူင် အဲဂိုပ် ကော ဝီ ဇမ် ဒီ အိုမ် နမ်မုက်ဆာရာ။

29 အာတီ န့ မုး ကာဒါယ် ပီ လုဝ် ကာတာမ် ဘေ၊ လုဝ် ကာယဝ်း ဒွါ ဘေ ဒူအီ အီဆာရေလ၊ တဲး ဒွန် ခြိုဝ် ပွိုန် အီ ဘဲန် ခါဂုန် အန်။ ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။

30 မာလုဝ်း အီ လေး ဒီ မိူင် တီ၊ န့ ပါယ် နီ။ ရဲင် မိူင် ဘ့လာက် နာ ကွာ န့ တူင့် ဖွုန် ဟြဲန့် ဒီ ဖန် မာယဝ်း ကာနိး။

31 ဂေ မာလုဝ်း မိူင် တီ ဒီ မိုဝ်း စိူဝ် ဂေ ဒူအီ အီဆာရေလ ဒွန် ခြိုဝ်။ အီ မုး ဘ့လာက် နာ ကွာ ဘော မိုဝ်း မာလုဝ်း အူယ် မာလုဝ်း။ န့ ဘော မုး မာလုဝ်း အာရူဘေန်၊ မာလုဝ်း အာယူဒါ ဘော မာလုဝ်း အာလေဝီ။

32 ဘ့လာက် နာ ဂေတ့် ဆီငဲ ဘော တူင့် ဖွုန် ဟြဲန့် ဒီ ဖန် မာယဝ်း ကာနိး။ န့ ဘော မိုဝ်း မာလုဝ်း အူယ် မာလုဝ်း။ ဂေ စိူဝ် မာလုဝ်း အာယုဝ်၊ မာလုဝ်း အာဘေန်ယာမ် ဘော မာလုဝ်း အာဒါန်။

33 ဘ့လာက် နာ တေတ့် ဘော တူင့် ဖွုန် ဟြဲန့် ဒီ ဖန် မာယဝ်း ကာနိး။ န့ ဘော မိုဝ်း မာလုဝ်း အူယ် မာလုဝ်း အီ စိူဝ် မာလုဝ်း အာဆီမေအူန်၊ မာလုဝ်း အာအီဆာခါ ဘော မာလုဝ်း အာဇေဘူလူန်။

34 ဘ့လာက် နာ ဂေတ့် ဆီငဲ ဘော တူင့် ဖွုန် ဟြဲန့် ဒီ ဖန် မာယဝ်း ကာနိး န့ ဘော မိုဝ်း မာလုဝ်း အူယ် မာလုဝ်း အီ စိူဝ် မာလုဝ်း အာဂတ်၊ မာလုဝ် အာဆေန် ဘော မာလုဝ်း အာနာပ်ထာလီ။

35 ပါယ် တီ ဆေ န့ ဂဝ် ရူပ် လဲပ် မိူင် တီ၊ န့ ကွယ် အူ မှိုန့် ဒီ ဒါ ဟြဲန့် ကာနိး။ ဆိန့် ဆီငဲ တီ၊ မိူင် တီ ဂေ ဘော တဲး အန် စိူဝ်၊ “ဇဝ်ဖြာ ဟဲ့ ကွယ် ခဲင် ဒူင် တီ။”