1 ဒူအီ ဝီ တွိုန် ပီ ဝီ ယဲတ့် အုဝ် ဇမ် ဒီ ဘာင် မာလုဝ်း ဟုဝ် ဇဝ်ဖြာ။ အုဝ် ဘော ဝီ ယိုဝ် အိုမ် လှဲ လေး ဒီ မာ မာလုဝ်း၊ ဝီ လှဲ ဟာဝ် ဘ့လာက် နာ လေး ဆီငဲ အီ မုး ဘ့လာက် နာ မာငး ဟုဝ် ဇဝ်ဖြာ။ အိုမ် တီ ဘော တး ဘ့လာက် နာ တေတ့် ဟုဝ် ဇဝ်ဖြာ ဘော လှဲ ဟာဝ် ခူပ် ကာစှူင့် လှူ ဘ့လာက် နာ တေတ့်။ 2 ဒူအီ ဝီ တွိုန် ပီ ဝီ ယဲတ့် လေး အုဝ် ဝီ ဟာဝ် ဒူပ် န့တေန့် အီ လေး ဒီ ဘာင် မာလုဝ်း ဘ့လာက် နာ ကွာ။ အန် ဘော ဝီ ယဲတ့် အုဝ် လဲပ် ဟာဝ် ဘ့လာက် နာ လေး ဆီငဲ။ အိုမ် ဘ့လဲင် တွိုန် ဝီ လှဲ ဟာဝ် ဘ့လာက် နာ တေတ့်။

3 ဒူအီ ဝီ တွိုန် ဘော ဝီ ဒိုဝ်း ဝန် မင် ဂဝ်။ အန် ဘော ဂဝ် လူင် ဒူပ် ဘ့လဲင် အိုမ် အီ လှဲ ဟာဝ် နာ လေး ဆီငဲ အာဒါ အူ ဟြဲန့် ကာနိး။ ဟဲ့ ဟွတ့်၊ အန် ဘော ဝီ စ်ု အုဝ် ကာလုဝ်း။ အိုမ် တီ ကော ဇမ် ပုင် ပါအျီန် စေန့်။ 4 အန် ပီ ဝီ ဂဝ် ဟာဝ် ပေါ အူ ဟြဲန့် ကာနိး။ အန် ဝီ တဲး အုဝ် ဟာဝ် ခဲင် အိုမ် အီ ဇမ် ကိန့်ကြူင့်။ အန် ပီ ဝီ ဂဝ် ဟာဝ် ပေါ အူ ဟြဲန့် ကာနိး၊ ဝီ စ်ု အုဝ် ဟာဝ် ခဲင် အိုမ် အီ ဟဲ့ ဇမ် ညွယ်။ 5 အန် ပီ ဝီ ဂဝ် ပေါ အူ ဟြဲန့် ကာနိး၊ အိုမ် တွိုန် ဘော လိုက် ကာဆဝ်၊ အာဝ် တဲး အုဝ် ပွိုန် ဒီ ကာလုဝ်း။ အိုမ် ဘ့လဲင် တီ ဟဲ့ လိုက် ကာဆဝ်၊ ဆေ တူ လှမ်၊ အာဝ် ဟူ ပွိုန် ကာလုဝ်း။

6 ဒူအီ ဝီ တွိုန် ဝီ ဒီမွှတ် အုဝ် တဝ်း၊ “အိုယ် ဂွန် ဒူအီ၊ မဲ ယိုဝ် လွင် ဝန် တီ။း” ဝါယ် အန် တီ၊ အန် ဘော ဝီ ဒဲ့ အုဝ် ဟုဝ့် ဒီ ခူပ် ဘာင် အိုမ်။ 7 အုဝ် ဘော ဇမ် ဒီ တီ၊ အုဝ် ဝီ ယိုဝ် ဟေ ကိူန် ကာဆဝ် အီ ကွယ် ခူပ် ဘ့လဲင် အိုမ် အာ ဘ့လာက်။ 8 အန် ဝီ ကာလာင် ဒီ အုဝ် တဝ်း၊ “အိုမ် နီ ဟဲ့ လှဲ ဟာဝ် ဘ့လာက် နာ လေး ဆီငဲ ဘော ဝီ လှဲ လူင် ဒီ ဒီလယ့် ဘ့လဲင် ယောဒါန်။ ဟဲ့ ဟွတ့်၊ အန် ဘော ဝီ လေး လိုပ် ခဲင် အိုမ် ဒိုင် ဆယ့် ဆွင့်။ အန် ဟဲ့ ဟွတ့် လှဲ လိုပ် ခဲင် အိုမ် ဒိုင် တီ၊ ဆွင့် အန် ဝီ ဟြာယ်၊ ဝီ ဘဲန် အိုမ် ဆီငဲး။ 9 ဒူင် လှဲ ဇမ် အိုမ် တီ၊ န့ ဘော မိုဝ်း ဒုဝ် ဆတ်ဒါဝါ ကိူန် ကာဆဝ်။ အိုမ် ဘ့လဲင် တီ ဘော ဘူင် တဲး အိုမ် ဆယ့် ဆွင့် ဝီ ဘဲန် အိုမ် ဆီငဲး။ ဒူင် လှဲ ဇမ် အိုမ် တီ၊ ခဲ့ ကွယ် ဒုဝ် ဆတ်ဒါဝါ ဘောကာဂ့လျီတ် မိုဝ်း အာဆာက် အိမ်။ 10 န့ ဒီ ဘော မိုဝ်း ဒူအီ မှေတ့် ဂါ၊ ဂေ ဒီ ကွယ် ဒီ ဘာင် အိုမ် ဘ့လဲင် တီ စုး ဒီ ဒူင် စိူဝ် အေန်ကေဒီ ကော ဝီ ဇမ် အူ ပ့လုဝ့် အီ စိူဝ် အေန်ကာလိမ်၊ န့ ဒီ မိုဝ်း ဘဲန် ပ့လုဝ့် ဘဲန် ပ့လုဝ့် ဂေ ဒီ ဘြတ် န့ရပ် ဂေ။ မာဂါ ဒီ မိုဝ်း ဘဲန် မျုဝ် ဘဲန် မျုဝ် ပီ မာဂါ အီ ကွယ် ခဲင် အိုမ် နမ်မုက်ဆာရာ။ 11 မာလဲ၊ အိုမ် ဒိုင် ဒီတဲတ် အီ မိုဝ်း ညုဝ့် ဘော အိုမ် ဒိုင် ဒီတဲတ် အီ ကွယ် ခူပ် အိုမ် နမ်မုက်ဆာရာ၊ ဂေ ယီ တူ ဘဲန် အိုမ် အီ ဆီငဲး။ ဂေ ဒီ ကွယ် မုး အိုမ် ဆယ့် ဆွင့် ဆေဆေ။ 12 န့ ဘော မိုဝ်း ဟေ ဘ့လေ ပီ ဒီ ဟူမ် ဒွန် မျုဝ် ဘော ကွယ် ဒီ ဘာင် အိုမ် ဘော အာ ဘ့လာက်။ လှာ ဟေ တီ မိူဝ် တူ ဟျီ့ ကာဟဝ်း။ ဘ့လေ အန် မိူဝ် တူ မိုဝ်း ဒေါ ဝါယ် ဒေါ မှဝ်။ န့ ဘော မိုဝ်း ဘ့လေ အီ ကာဒွတ် ဆေဆေ။ ဒွန် မာဂျီန် ဒီ မိုဝ်း ဘ့လေ ကာမာယ်။ ခုဝ်၊ အိုမ် အီ ရိုက် ဟေ ဘ့လေ ဂေ တီ န့ လှဲ တး ဒီ ဟုဝ် ဇဝ်ဖြာ။ ဘ့လေ အန် ဘော ဘဲန် ပီ ဒီ ဟူမ်။ လှာ အန် မိူဝ် ဘဲန် ဆီနမ်။”

13 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “ကာအုန် ကာဒါယ် မိူင် ပီ အိုပ် ဇဝ်ဖြာ န့ ဒီ ပါယ် နီ။ ဘေ လုဝ် ကာယဝ်း ဒွါ တဲး န့ ဘဲန် ခါဂုန် ဂေ ဒူအီ အီဆာရေလ ဂိုဝ် ဒီ အာ ခြိုဝ်။ ယီ မုး ခြိုဝ် အာယုဝ်၊ ဂေ ဒီ ပွိုန် အာ ဘုန်။ 14 တဲး ဘေ လာယ် ကာယဝ်း ကာဆာင်၊ တဲး န့ ကာရမ် ခါနာ ဘေ။ ခုဝ်၊ အုဝ် ဟဲ့ ဟွတ့် ဒွါ ကာဒိက် ဆတ်ဇာ ဒီ ဂေ ဂုန့် ဒင် ဘေ၊ ဂေ ဒီ ပွိုန် ကာဒါယ် တဲး န့ ဘဲန် ခါဂုန် ဂေ။

15 ကာအုန် ကာဒါယ် ဘ့လာက် နာ ကွာ၊ န့ ဘော စုး ဒီ အိုမ် နမ်မုက်ဆာရာ ဟာဝ် ဘ့လာက် နာ လေး ဆီငဲ၊ ဟာဝ် ဒူပ် န့တေန့် အီ ဟာဝ် ဒီ မိူင် ဟေဆာလူန်၊ ဝီ ဟာဝ် ဒီ နွန် လေနုဝ်ဟာမာတ် ဘော ဒီ မိူင် စေတာတ်၊

16 ဝီ ဟာဝ် ဘော ဒီ မိူင် ဘေဟုဝ်ဆာ ဘော မိူင် ဆီဘြိမ်၊ မိူင် အီ ကွယ် ကာတဲ မိူင် ဒါမာခူ ဘော မိူင် ဟာမာတ်။ န့ ကော ဝီ ဟုဝ့် ဇမ် ဘော ဒီ မိူင် ဒီကွန် အီ ကွယ် ခူပ် ကာဒါယ် မိူင် ဟုဝ်ရာန်။ 17 ကာအုန် ကာဒါယ် ဘ့လာက် နာ ကွာ၊ န့ ဘော စုး ဒီ အိုမ် နမ်မုက်ဆာရာ ဘော ဝီ ဟုဝ့် ဟာဝ် ဘ့လာက် နာ လေး ဆီငဲ ကော ဟာဝ် ဇမ် ဒီ မိူင် ဟာစာရေ။ န့ ဘော ဘာ ကာဒါယ် မိူင် ဒါမာခူ ဘော ကာဒါယ် မိူင် ဟာမာတ် အီ ကွယ် ဘ့လာက် နာ ကွာ တွိုန်။ ခဲ့ တီ အီ မုး ကာအုန် ကာဒါယ် ဘ့လာက် နာ ကွာ။

18 အီ မုး ကာအုန် ကာဒါယ် ဘ့လာက် နာ လေး ဆီငဲ၊ န့ ဘော စုး ဒီ ကာတဲ မိူင် ဒါမာခူ ဘော မိူင် ဟုဝ်ရာန်၊ လူင် ဒူပ် ဘ့လဲင် အိုမ် ယောဒါန်၊ တဲး န့ ကော ဇမ် ဒီ ကာတဲ ကာအုန် ကာဒါယ် မိူင် အီဆာရေလ ဘ့လာက် နာ ဂေတ့် ဆီငဲ ဘော မိူင် ဂီလေအာတ်။ ဘ့လာက် နာ လေး ဆီငဲ န့ ကော ဝီ ဇမ် မိူင် ထာမာ အီ ကွယ် ခူပ် အိုမ် နမ်မုက်ဆာရာ တွိုန်။ ခဲ့ တီ မုး ကာအုန် ကာဒါယ် ဘ့လာက် နာ လေး ဆီငဲ။

19 ကာအုန် ကာဒါယ် ဘ့လာက် နာ တေတ့်၊ န့ ဘော စုး ဒီ မိူင် ထာမာ ဘော ဟာဝ် ဘ့လာက် နာ တေတ့် နာ လေး ဆီငဲ၊ ဟာဝ် ဒီ တုဝ်း အိုမ် မေရီဘာကာဒေတ်။ န့ ပီ ဝီ ဂုဝ့် ဟုဝ့် ဒီ ကာတုဝ့် ဘ့လာက် နာ ကွာ နာ ဂေတ့် ဆီငဲ၊ ဝီ ဒူပ် ဒီလယ့် မိူင် အဲဂိုပ်၊ ဝီ ဟာဝ် ဒီ အိုမ် နမ်မုက်ဆာရာ တွိုန်။ ခဲ့ တီ မုး ကာအုန် ကာဒါယ် ဘ့လာက် နာ တေတ့်။

20 ကာအုန် ကာဒါယ် ဘ့လာက် နာ ဂေတ့် ဆီငဲ၊ န့ မုး ဘာင် အိုမ် နမ်မုက်ဆာရာ ကော ဝီ ဇမ် ဒီ မိူင် လေနုဝ်ဟာမာတ်။ ခဲ့ တီ မုး ကာအုန် ကာဒါယ် ဘ့လာက် နာ ဂေတ့် ဆီငဲ။

21 ဘေ လုဝ် ဒိုဝ်း ကာဒါယ် မိူင် တီ၊ ကာဆာင် ဒွါ ဒီ ဘေ ဒွန် ခြိုဝ်။ 22 တဲး န့ ဘဲန် ခါဂုန် ဒီ ဘေ ဆေဆေ။ ဂေ ဒူအီ အာမျုဝ် ဟဝ် အီ ကွယ် ကာတဲ ဘေ ဘော ဂွန် ဂေ အီ ဂွိုတ် ဒီ နီ၊ ဘေ လုဝ် ကာယဝ်း ဒွါ ဘော ဒီ ဂေ။ ဘေ လုဝ် မာတ် ဒူအီ ဂေ တီ ပီ ဒူအီ အီဆာရေလ။ ဘော ဂေ လုဝ် ကာတာမ် ကာဒါယ် အီ ဒီ ဘဲန် ခါဂုန် ဒီ ဂေ၊ တဲး န့ ပီ ဒူအီ အီဆာရေလ။ 23 ဒူင် ဒီ ကွယ် ဒူအီ အာမျုဝ် ဟဝ်၊ ကာဒါယ် ခြိုဝ် မှဝ် ခြိုဝ် အန်၊ ဘေ လုဝ် ဒွါ ဒီ ဂေ၊ တဲး န့ ဘဲန် ခါဂုန် ဂေ။” ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် တီ။