ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ “မာလုဝ်း အီ ကွယ် ဘ့လာက် နာ လေး ဆီငဲ အီ လိုပ် ဒီ ဝဲင် ဟုဝ် ဇဝ်ဖြာ၊ အီ ကွယ် နာ ခဲင် တွိုန် လုဝ် ကာဘိတ် အာဒါ ဒဝ် ဆီငဲ ဒေါ မုး ဆီငဲ ရန့် ဂါန်။ ဆေ န့ ဘော မုး ဆီငဲ ဒီလှဝ် ဘော မာဂျီန် ကာမာယ်၊ လုဝ် ဝိုဝ်း။ 2 ခုန်ဒီခမ် လုဝ် လိုပ် ခဲင် ဟုဝ် ဇဝ်ဖြာ၊ ဟာဝ် ဒူပ် န့တေန့် အီ လိုပ် ခဲင် ဝဲင် နာ ရေတ့်၊ ဘော ဝီ လိုပ် ဒီ ဘာင် မာလုဝ်း အီ ကွယ် ဒီ ဂြး ခဲင် တွိုန်။ အန် လုဝ် စွင့် ဒီ ဘာင် မာလုဝ်း။ ဂေ ဒါ အီ လှူ ဒီ ဇဝ်ဖြာ လုဝ် လှူ ပီ ဒီ လှူ ဂွန် ခုန်ဒီခမ် အီ ဒုဝ့် ဒီ ငဝ် ဘော ပီ ဒီ လှူ အန် အီ ကွယ် ကာဇု ဟူမ် ရိုမ်။ အန် လုဝ် ကြိုပ် ဇဝ်ဖြာ ဒီ ဘာင် မာလုဝ်း တီ။ ဟဲ့ ဟွတ့်၊ အန် ဘော ဝီ လေး ဟာဝ်။ မာလုဝ်း တီ ယီ တူ လုဝ် ကာဘိတ်၊ တဲး န့ ကော ဇမ် ဘာ ဒီ အပ်။ 3 ဆီငဲ ဒီလှဝ် ဒွန် ဆီငဲ ဘော ဆီငဲ ဘ့လွယ် မာဂျီန် ကာမာယ် ဒွန် ဇေန့် ဒူအီ အီဆာရေလ ဘောကာဂ့လျီတ် လုဝ် တး ကြိုပ် ဇဝ်ဖြာ ဒီ မာလုဝ်း တီ။ 4 ပီ လုဝ် လှူ ခုန်ဒီခမ် ဒီ ဇဝ်ဖြာ ဒေါ မုး ဆီငဲ ဒီလှဝ်၊ န့ ဘော မုး ဂွန် မာဘူ ဘူ ဒုဝ်၊ ဘော မာဘူ အာလူင့် အူ ဒုဝ် အီ တူ မိုဝ်း ဒူင် စှေ ဒူင် နဲ။ 5 အန် လုဝ် လှူ ကာပဲ့ အူ အေဖာ အီ လုဝ် ဒူပ် ပီ ဒီ လှူ အီ မုး မာဘူ အာလူင့် အာဒါ အူ ဒုဝ် တွိုန်။ ကာပဲ့ ပီ လုဝ် လှူ ဒူပ် ဂွန် မာဘူ အူ ဒုဝ် တွိုန်၊ လုဝ် ဒူပ် ခဲ့ အိုင် အန်။ လုဝ် ဟပ် ဘော နာမန် အူ ကာပဝ် အာဒါ ကာပဲ့ အူ အေဖာ။ 6 ဘ့လွယ် မာဂျီန် ကာမာယ် ဘေ လုဝ် လှူ မက် အာလူင့် အူ ဒုဝ်၊ ဂွန် မာဘူ ဒဝ် ဒုဝ် ဘော မာဘူ အာလူင့် အူ ဒုဝ်။ ဒွန် ဒုဝ် ကွဲ့ တဲး န့ မိုဝ်း ဒူင် စှေ ဒူင် နဲ ဒီ မှဝ်။ 7 ခုန်ဒီခမ် လုဝ် လှူ ကာပဲ့ အူ အေဖာ ဒူပ် ဂွန် မက် အာလူင့် တီ။ ပေါ အူ အေဖာ လုဝ် ဒူပ် မာဘူ အာလူင့် အူ ဒုဝ် တွိုန်။ ဆေ န့ မုး ဂွန် မာဘူ၊ အန် လုဝ် လှူ ကာပဲ့ ခဲ့ ပီ အိုင် အန် ဒူပ် ဒွန် ဒုဝ်။ အန် လုဝ် ဟပ် ဘော နာမန် အူ ကာပဝ် အာဒါ ဒွန် အေဖာ။ 8 ခုန်ဒီခမ် လုဝ် လိုပ် ခဲင် ဟုဝ် ဇဝ်ဖြာ ဒီ ဘာင် မာလုဝ်း အီ ကွယ် ခဲင် ဂြး ခဲင် တွိုန်၊ ဝီ လေး ဟာဝ် ဒူပ် န့တေန့် ဒူင် လိုပ် အန် တီ။

9 ဆေ ဂေ ဒူအီ ကိူန် ဝီ တး ကြိုပ် ဇဝ်ဖြာ ဆီငဲ ဘ့လွယ် ဒေါ မှဝ် အာဝ် တဝ်း၊ ဆေ ဂေ လိုပ် ဒီ မာလုဝ်း ဘ့လာက် နာ ကွာ၊ တဲး ဂေ ကြိုပ် ဇဝ်ဖြာ၊ ဂေ လုဝ် ဝီ လေး ဒီ မာလုဝ်း ဘ့လာက် နာ တေတ့်။ ဂေ အီ တး လိုပ် ဘ့လာက် နာ တေတ့်၊ ဂေ လုဝ် ဝီ ဟာဝ် လေး ဒီ မာလုဝ်း ဘ့လာက် နာ ကွာ။ ဂေ တူ ပွိုန် ဝီ လေး ဟာဝ် ဒီ မာလုဝ်း ဒူင် လိုပ် တး ဂေ။ ဂေ လုဝ် ဟာဝ် ဆိူဝ် နာ အာတ့် ဂေ။ 10 ခုန်ဒီခမ် ဘော ဟာဝ် ရိုမ် ဒူပ် ဂေ။ အန် လုဝ် တး ဒူင် တး ဂေ ဒူအီ ကိူန်၊ ပီ ဝီ လေး ဟာဝ် ဒူပ် ဂေ ဒူအီ ကိူန်။

11 ဆေ န့ မုး ဆီငဲ ဘ့လွယ် လာယ် ဟျီင် ဘော ဆီငဲ ဘ့လွယ် အာမျုဝ် ဟဝ်၊ ပီ ဒီ လှူ ကာပဲ့ အူ အေဖာ လုဝ် လှူ ဒူပ် ဂွန် မက် အာလူင့် အူ ဒုဝ်။ အာဒါ မာဘူ အာလူင့် အူ ဒုဝ် မိူဝ်၊ လုဝ် လှူ ကာပဲ့ အူ အေဖာ။ ဘော အာဒါ ဂွန် မာဘူ လုဝ် လှူ ကာပဲ့ ခဲ့ ပီ အိုင် ဘေ။ ခုန်ဒီခမ် လုဝ် လှူ နာမန် အူ ကာပဝ် အာဒါ ကာပဲ့ ဒွန် အေဖာ။ 12 ဆေ ခုန်ဒီခမ် လှူ ပီ အိုင် အန် ဒီ ဇဝ်ဖြာ၊ ဘော မုး ပီ ဒီ လှူ အီ ဒုဝ့် ဒီ ငဝ်၊ ဘော မုး ပီ ဒီ လှူ အီ ကွယ် ကာဇု ဟူမ် ရိုမ်၊ လုဝ် ဝိုဝ်း မာလုဝ်း အီ ကွယ် ဘ့လာက် နာ လေး ဆီငဲ အာဒါ ဂွန် ခုန်ဒီခမ် တီ။ ပီ ဒီ လှူ အီ ဒုဝ့် ဒီ ငဝ် ဘော ပီ ဒီ လှူ အီ ကွယ် ကာဇု ဟူမ် ရိုမ်၊ တဲး န့ ပီ ပီ ဒီ လှူ အန် ဒေါ ဆီငဲ ဒီလှဝ်။ ဆေ အန် ဟဲ့ ဟွတ့် လှူ၊ အန် လုဝ် ဝီ လေး။ ဆေ အန် ဟဲ့ ဟွတ့် လေး၊ လုဝ် ဝီ ကာဘိတ် မာလုဝ်း တီ။

13 ဒွန် ဆီငဲ ဘေ လုဝ် ဒိုဝ်း ဂွန် မာဘူ အီ ဟဲ့ နုဝ့် အူ ဆီနမ် အီ တူ မိုဝ်း ဒူင် စှေ ဒူင် နဲ အာဒါ အူ ဒုဝ်၊ ဘူင် တဲး န့ ဘဲန် ပီ ဒီ လှူ အီ ဒုဝ့် ဒီ ငဝ်၊ ဝီ လှူ ဒီ ဇဝ်ဖြာ စေဝ် ညှာ။ ပီ ဒီ လှူ တီ လုဝ် လှူ ဒွန် ဆီငဲ ဒွန် ဆီငဲ။ 14 ဒွန် ညှာ ဒွန် ညှာ ဘေ လုဝ် လှူ ပီ ဒီ လှူ ကာပဲ့ အာဒါ ဒဝ် ဘုန် အူ ဘုန် ခဲင် အူ အေဖာ ဘော နာမန် အူယ် ဘုန် အူ ဘုန် ခဲင် အူ ကာပဝ်၊ တဲး ကာပဲ့ ရာမ် ည။ ပီ ဒီ လှူ တီ ဘဲန် ဒါရာ အီ တူ ပွိုန် ဘျွင် ဒေါ မှဝ်။ 15 ကူပ် န့ ပါယ် တီ ဂွန် မာဘူ ဘော ပီ ဒီ လှူ ကာပဲ့ ဘော ပီ ဒီ လှူ နာမန် လုဝ် လှူ ဒီ ဇဝ်ဖြာ ဒွန် ညှာ ဒွန် ညှာ။”

16 ဇဝ်ဖြာ ပီ ဝီ တဝ်း၊ “ဆေ ခုန်ဒီခမ် ဒိုဝ်း ကာဒါယ် ဒွါ တဲး န့ ဘဲန် ခေါဆွင် ဒီ ဂွန် အီမာယ် အန်၊ ကာဒါယ် တီ ဒီ ဘော ဘဲန် ခါဂုန် ဂွန် အီမာယ် အန် တီ။ န့ ဒီ ဘဲန် ခါဂုန် ပီ ပွိုန် ဒိုဝ်း ဂေ ဘော ပွိုန် ဒွါ ဒီ လှုက်လှာန် ဂေ။ 17 မာလဲ၊ ဆေ ခုန်ဒီခမ် ဝီ ဒွါ ကာဒါယ် အူ ပ့လုဝ့် ဒီ ဒဲစေန့် အန်၊ ကာဒါယ် ဒူင် တီ လုဝ် ဝီ ဘဲန် ကြုဝ် ခုန်ဒီခမ် တွိုန် ပန် ဒီ ဇမ် ဆီနမ် လုဝ် ဝီ ဒွါ ဝိဝ် တူတ့်။ န့ မုး ခါဂုန် ပီ ပွိုန် ဒွါ အန် မီ ဒီ လှုက်လှာန် အန်။ 18 ခုန်ဒီခမ် တူ ပွိုန် ဒိုဝ်း ကာဒါယ် ဒူအီ ရဝ် ဒူအီ ကာင်၊ အီ မုး ခါဂုန် ဂေ။ အန် တူ ပွိုန် ဟုဝ် လေး ဂေ ဒီ ကာဒါယ် အီ မုး ခါဂုန် ဂေ တီ။ အန် လုဝ် ဒွါ ခါဂုန် ဒီ ဂွန် အန် အီ မုး ကြုဝ် အန်။ ပါယ် တီ အာဝ် မိုဝ်း ဒူအီ အီ လုဝ် ကာယဝ်း ခါဂုန် အန်။”

19 ဟဲ့ ဟွတ့် ပါယ် တီ ဒူအီ ဝီ တွိုန် ပီ ဝီ ယဲတ့် ဟာဝ် အုဝ် ဒူပ် န့တေန့် အီ လိုပ် ဟာဝ် ခဲင် ဟူင် အီ လာယ် ကာဆိူဝ် နာ ကွာ၊ အီ ကွယ် ဘာင် မာလုဝ်း ဘ့လာက် နာ တေတ့် ခဲင် ဝဲင် ဟုဝ် ဇဝ်ဖြာ အီ ကွယ် နာ ခဲင် တွိုန်။ ဟူင် တီ မုး ဟူင် အီ ဆီငါ ဘွတ် အာဒါ ဂေ ဒါ အီ လှူ ဒီ ဇဝ်ဖြာ။ အန် နှဲ တဲး အုဝ် ယိုဝ် အူ ပ့လုဝ့် ဘ့လာက် နာ ဂေတ့် ဆီငဲ ဟူင် ဂေ တီ။ 20 အန် တဝ်း ဒီ အုဝ်၊ “ဒီ နီ ဂေ ဒါ အီ လှူ ဒီ ဇဝ်ဖြာ လုဝ် ကွင့် ပီ ဒီ လှူ အီ ဂဝ်း ဝဲန် မှာပ်၊ ဘော ပီ ဒီ လှူ အီ ဝီ လာယ် ကာလဝ့် ဒီ ဇဝ်ဖြာ။ ဂေ လုဝ် ဂိုမ် ဘော ခါမုန် အီ မုး ပီ ဒီ လှူ ကာပဲ့ ဂေ တွိုန်။ န့ မိူဝ် တူ ပွိုန် ဒိုဝ်း လေး မျုဝ် အီ ဆီငါ ဘွတ် ခဲင် ဝဲင် ဟုဝ် ဇဝ်ဖြာ နာ ရေတ့်၊ ကွဲ့ တဲး ဒူအီ ကိူန် ဝီ ဘဲန် ဒူအီ ဆီငါ ဘွတ် အီ ဒူပ် ဒါရာ။”

21 ဟဲ့ ဟွတ့်၊ ဒူအီ တွိုန် ပီ ဝီ ယဲတ့် အုဝ် ဟာဝ် ဒီ ဝဲင် ဟုဝ် ဇဝ်ဖြာ အီ ကွယ် နာ ရေတ့်။ အန် ဘော ဝီ ယဲတ့် အုဝ် ဟာဝ် ဇမ် ဘော ဖွုန် ကာတုဝ့် ခဲင် ဝဲင် ဟုဝ် ဇဝ်ဖြာ တီ။ အုဝ် ဘော ဝီ ယိုဝ် ဝဲင် ဒီတဲတ် အီ ကွယ် ဒီ ကာတုဝ့် ဒွန် ကာတုဝ့်။ 22 ဝဲင် ဒီတဲတ် တီ၊ အူ ပ့လုဝ့် နာ တူင့် အန် ဖွုန် ဂိုဝ် ကာနိး။ နာ ကာဝဝ်း အန် အူယ် ဂိုဝ် ကာနိး။ 23 အီ လဲပ် ရူပ် ဝဲင် တီ ဘ့လာက် နာ ခဲင်၊ ဂေ ဟဲ့ ဂုဝ် တာ မာဝ် တဲး န့ ဘဲန် ပီ ရဲင် ဒီတျီမ်။ ပီ ဝီ မိုဝ်း ဘော ပုင် ငဝ် ကွယ် ကာဒမ် ရဲင် တီ၊ ဘဲန် ဘူင့် ဘဲန် ဘူင့်။ 24 ဒူအီ ဝီ တွိုန် ဝီ တဝ်း ဒီ အုဝ်၊ “ဒီ နီ ဂေ အီ ဘူင် ဂါန် ခဲင် ဟုဝ် ဇဝ်ဖြာ၊ ဂေ ဒီ စွိုမ် ပီ ဒီ လှူ ဂေ ဒူအီ ကိူန်။”